(龔水) <若躲不過燁緣>
上一頁
第 2 頁
下一頁
妹仔老爺
2019-1-10 12:25:19
支持
:^(
:^(
Ads
Channelno6
2019-1-10 12:48:55
第三章 <若水大獲了?>
下午,辦公室
午膳後,龔燁帶若水,Jessica及Mandy到處遊覽辦公室。跨國公司不愧為跨國公司,辦公室不但有舒適的沙發給員工構思點子,還有放滿零食及飲品的茶水間,加班時也不怕餓壞肚子。
公司的會議室亦很有特色,每間裝潢風格也不一樣,讓員工開會時可以減低壓力,發揮好的表現。
最令若水吃驚的是公司竟然有健身室及娛樂室,讓員工在午膳時間可以讓身心好好放鬆,令之後工作更加有動力。
「哇office咁靚做嘢都零舍醒神!」Mandy 高興得眉飛色舞。
「呢啲都係公司挽留人才嘅方法,所以公司嘅員工流失率不嬲都係全行最低㗎。」龔燁解釋道。
「唔怪得知要考入嚟咁辛苦啦,呢度真係天堂呀!」若水懶洋洋地攤在沙發上,再次審視著四周環境,樂極忘形地說道。
「咁你地又唔好開心得咁早,公司投放咁多資源係員工身上,自然要求員工付出100%嘅努力,所以嚟緊嘅project你哋一定要俾心機,唔好影衰marketing!」龔燁不忘提點。
「好啦行完個Office tour,我帶你地返埋位啦。」
龔燁先帶Mandy 及Jessica 回座位,最後到若水,因為她的座位最近龔燁的房間。
「嗱Mary,你個位就係呢度,我間房就係你斜對面。依家俾啲時間你settle down, IT部嘅同事陣間會上嚟幫你set好部電腦,你搞掂之後就入嚟房搵我,我同你傾傾嚟緊個project要做嘅嘢。」
「好啊。」
若水拉開椅子坐下,再細細端詳一下自己的辦公桌。
「呢張將會係我人生第一份正職嘅工作枱,一定要好好裝飾先得!」
若水從手袋裏拿出一隻緣份天使玩偶,這是她母親送的,她一直珍而重之。母親希望這玩偶能為若水帶來好運,最重要是—保佑若水能找個對的人。
「你要睇住我呀,我下半世幸福靠你啦!」若水輕輕摸一下天使的頭,莞爾一笑。
IT部為若水安裝好所需的應用程式後,若水便去找龔燁。
「叩叩」
「我可以入嚟?」
「Come in」
「呀龔,我settle好啦。」
「搞掂就好,請坐。」
「今日主要想同你brief下嚟緊要做贊助商嘅事。今朝同你講過啦,我哋要聯絡返自己母校唔同嘅學會。本身我哋team就有三個香港島大學嘅校友,就係我、你同埋Rebecca,不過Rebecca放緊產假,所以聯絡香港島嗰邊就得我同你一齊負責。」
「好,咁我哋應該由邊方面入手呢?」若水問道。
「我都有諗過呢個問題,我覺得我哋應該由相熟嘅朋友入手。係呢...你以前有冇上過莊?」
「有啊,year 1嘅時候就上咗marketing society 枝莊。」若水回答道。
「哈,呢個世界真係細,竟然喺呢度俾我遇到我嘅下下下莊。」
「吓,你都曾經上過呢枝莊?咁你當年做咩職位呀?」若水驚訝地問。
「我係主席啊,你呢?」
「主席咁犀利,一定好大壓力。我只係做個秘書仔咋。」
若水再看看龔燁,突然靈機一觸說道:「唔怪得之我覺得你個名同把聲咁熟啦,我以前做外務秘書就係要負責對外聯絡,我一定係有打過俾你叫你番去會員大會啦。」
「哦,個陣打比我嘅原來就係你。」
「咁你最後有冇番過去?」
「畢咗業之後都掛住做嘢,都係返過去一兩次咋。」
「咁你記唔記得...09年嗰屆你有冇返去?」若水神色突然變得有點凝重,雙眼凝視著龔燁。
「嘩咸豐年前嘅事,我唔記得啦,都分唔到邊屆打邊屆。」龔燁口吻變得有點猶豫。
「冇就好啦。」若水輕聲地喃喃自語。
「你講咩話?」龔燁追問下去。
「哦冇,不如我哋傾返個project呀。」若水連忙轉移話題。
「好。我冇記錯每年9月,學會都會搞會員大會,比現屆交代返全年做過嘅野。不如我哋今年趁呢個機會返去,順便說服佢哋搵我哋公司做贊助商?」龔燁提議。
「番去會員大會?」若水睜大雙眼。
「你有問題?」龔燁問道。
「哦冇。只係呢幾年都冇番去姐。」若水神色像是有些不情願。
「咁我哋一於一齊翻去,你負責聯絡學會,睇下佢哋當日有冇時間開個會。陣間我會比一疊文件你,裏面有晒我哋旗下商品嘅資料,你整理下再寫個proposal 俾我有冇問題?」
「冇問題。」
「咁你出返去做嘢先啦。」
若水回到座位,心情忐忑不安。
「死啦,今次番去實會撞到好多熟人,仲要係同呀龔去添。比佢知道當年發生嘅事,我以後都唔知點係呢個office面對佢啦。」若水心感不妙,但又想不到辦法阻止事情發生。
「算啦,都係做嘢先。」若水搖搖頭,開始埋頭苦幹。
(待續)
聖劍之騎士王
2019-1-10 16:49:30
推
Channelno6
2019-1-11 17:49:02
第四章 <若水的秘密>
九月初,香港島大學
一大清早,若水與龔燁相約在香港島大學東閘入口等。
龔燁比原定時間早到,在入口來回踱步,默默等候著若水。突然,遠處有一個女子的身影慢慢走近,該女子戴著白色鴨舌帽,束起一條簡單的馬尾,還帶上口罩。起初龔燁不以為意,直至那身影再度移近。
「Mary?你咩事著成咁呀?仲帶埋口罩?你被人追殺呀?」龔燁湊近若水,從頭到腳仔細打量她今天的造型,不禁發笑。畢竟他平日見慣的,總是一身事業型女性裝束,打扮一絲不苟的若水。
「哦,冇呀,今日有啲凍呀嘛,我又有啲感冒,咪帶番個口罩囉,廢事傳染你啦。」若水故意壓低聲線,還咳了兩聲。
「咁行啦。」
市場學會辦公室
「喂Hello,呀龔,好耐冇見喎,咩風吹你嚟呀。」那個男子一見龔燁,便熱情地上前打招呼。
「Hi Peter,真係好耐冇見,我哋公司想同學會傾啲合作嘅嘢,所以咪黎囉。同你介紹,呢位係我同事Mary Hung,佢都係呢個學會㗎,係我下下下莊。」
「哦原來你就係Mary,真係久仰大名,你係學會出晒名啦。」Peter抿嘴一笑,伸出手來想與若水握手。
若水尷尬地伸出手,一邊說:「你好。」,一邊心想:「唔係掛,我包到咁你都認到我? 我真係咁出名咩?」
「係呢呀龔,自從09年個次會員大會之後,都冇見過你返嚟,係咪真係咁忙先?」
「09年?」 Mary心中在想他那一年竟然有回來,那他豈不是知道那天發生的事…
龔燁一聽見他提起09年,頓時好像面有難色似的,急忙轉移話題。
「做嘢忙吖嘛,遲啲約你出嚟敍下舊,做正經野先。」龔燁三兩句便擺脫了Peter。
龔燁接著帶若水去見新一屆的學會幹事。
「你哋好呀,我係Emily,係今屆主席。」
「你好,我係龔燁,你可以叫我呀龔,呢張係我卡片。之前email咗詳細proposal 比你,唔知大致上有冇問題?」
「睇過啦,都冇咩問題,話晒你地都係上莊,信得過你地啦。陣間我地簽埋份合約,就正式開始今年的合作。」Emily有禮地說道。
「係呢咁唔知你哋第一個活動係咩呢?」若水問。
「嚟緊九月尾就係我哋學會迎新營,到時我哋會安排一個session 俾你地詳細講解你地贊助嘅產品。我哋都會喺所有宣傳刊物上面加上彈珠台集團嘅贊助logo。」
「好啊,迎新營有確實日子未?」
「9月23-25號喺麥理浩夫人度假村,確實時間再通知你地。」
「咁合作愉快。」
龔燁與若水和學會幹事逐一握手後便離開。
「估唔到合作咁順利,佢哋一口就應承啦。」若水喜出望外,這始終是她第一個負責的計劃,想不到一切如此順利。
「所以話出嚟做嘢人脈關係係幾咁重要呢,我哋遲啲仲要同其他學會傾架,唔好咁易鬆懈。」龔燁不忘提醒意氣風發的若水。
「我知㗎啦,我一定會全力以赴。」
正當他們要離開之際,Peter 突然追出來。
「呀龔咪走住,有啲野要比番你呀。」
「我漏左嘢咩?」龔燁迷惘地問。
「09年個陣你番黎漏低架,個陣你咪攞左隻usb出黎嘅,又唔記得拎番走,隻usb一直擺係學會office個locker到,而家終於物歸原主。」
龔燁一看到那隻usb,頓覺腦袋一片空白…
「隻usb係你拎出黎嘅?」若水難以置信⋯⋯
機靈的Peter 見氣氛變得凝重,立即轉身離開,遺下一臉茫然的龔燁與若水。
「件事…唔係你想像中咁架,我都係比人擺上枱架咋。」龔燁結結巴巴地說。一向冷靜機智的龔燁都有如此不知所措的時候,他不想自己在若水心中建立的形象一下子被摧毀。
「當年幫魚蛋基攞隻usb出黎個個就係你?哦,即係你根本一早已經認得我嘅。你扮唔識我有咩企圖呀?」若水一想到自己過去幾年的經歷,既氣憤又覺自己可悲。自從那次會員大會後,若水一直成為眾人的笑柄,在大學也抬不起頭做人。她以為畢業之後,自己就可以擺脫過往的一切,重新出發,但命運之神始終對她窮追猛打,要跟她開玩笑,上司偏偏就是有份連累她被恥笑足足數年的仇人。
龔燁從來沒有見過這般面如鐵色的若水。看到若水氣紅的臉,和不住在眼眶內打轉的眼淚,他在想:「我真的間接害得她這麼慘嗎?」
「咩企圖呀?你冷靜啲先,我地一係搵個地方坐低,我慢慢解釋比你聽,好冇?」龔燁知道三言兩語是無法將事情始末解釋清楚。
「好,我就聽下你有咩解釋。」若水的語氣倔強又冷淡,以往對著上司笑容滿面,恭恭敬敬的熊若水一下子消失得無影無蹤。在這刻,她已氣憤得將龔燁是她上司的事實完全拋諸腦後。
(待續)
Channelno6
2019-1-12 23:26:03
第五章 <燁緣的開始>
大學餐廳內
龔燁與若水隨便找了個角落位坐下。
「你係咪一早已經認得我,所以專登安排我入你條team?你同魚蛋基咩關係呀?係咪佢叫你接近我?」若水氣急敗壞地問。
「係,我係認得你,我冇講係因為我覺得你唔會想公司有人知道呢件事,我怕你尷尬咋。仲有,當年我都係被魚蛋基擺左上枱,我知道之後已經冇再同佢聯絡架啦。」龔燁振振有辭地解釋。
「你而家講咩都得架啦。」
「你仲記唔記得當年會員大會係延遲左3個字先開始?」
「點會唔記得,個日嘅野,我諗我到入棺材個日都會記得一清二楚。」若水咬牙切齒地說。
時間倒退到09年市場學會會員大會那天。
會議開始前,許多人已陸續抵達。今年的會員大會是最多人出席的一屆,幾乎整個會堂滿座,因為聽聞有學會幹事「穿櫃桶底」,將用來籌備派福利活動的數萬元資金偷去,最後被若水揭發。大家都是抱著「食花生、湊熱鬧」的心態而來。
在台上
「Candy 你唔使驚佢架!陣間啲人問起穿櫃桶底嘅事,你將成件事一五一十咁講哂出黎就得,我一定會幫你!」若水想向膽怯的Candy打下強心針。
「嗯…知道啦。」Candy 眼神閃縮,戰戰兢兢地回答。
「唔好意思主席,我好肚痛,要去廁所,可唔可以延遲15分鐘開會?」魚蛋基向主持今次會議的主席問道。
「見依家仲未齊人,咁你快啲去啦。」會議主席批准。
魚蛋基其實並沒有肚痛,他只是看見台下的救星來了。
「阿龔,你終於嚟啦。」魚蛋基急忙拉龔燁出會堂外。
「你叫到,我一定黎嘅。你諗好陣間點樣解釋未?」龔燁也聽聞學會穿櫃桶底的事了。
「諗好㗎啦。但係我驚陣間Mary會咬住我唔放。」
「Mary?係咪就係你之前話對你求愛不遂嗰個女仔?」
「係呀。因為我同佢講分手,佢就一直對我懷恨在心,想藉今次嘅事係全場人面前屈我穿櫃桶底。」
「玩到咁大?但你唔係話係Candy主動幫你偷錢嘅咩?」
「佢根本唔信。佢今日一定唔會放過我。我呢度有隻USB,陣間必要時我會摸下隻耳仔,你到時幫我比隻USB大會主席,話有證據證明我係清白嘅,就得㗎啦。」
「點解你唔自己攞出嚟,要我攞去呢?」龔燁不解地問。
「如果我自己攞出嚟,啲人一定會懷疑啲證據係我偽造。」
「就係咁簡單就幫到你?」龔燁不虞有詐,始終他與魚蛋基是中學師兄弟,已經相識多年,他相信他的為人。
「係呀。靠晒你啦。」
15分鐘過去,會員大會正式開始,會員A馬上舉手提問。
「我想主席交代下學會穿櫃桶底嘅事。」
那年的學會主席是呀基,即是若水口中的魚蛋基。若水是外務秘書,Candy 則是財務秘書。
「好。首先我要同廣大會員衷心咁講聲,對唔住。」魚蛋基站起來,誠懇地九十度鞠躬。
魚蛋基續道:「其實成件事都係因我而起。因為之前我屋企小食店出咗事,需要用錢,有莊員知道我要籌錢還債,先冒險幫我偷錢。」
「你講咩啊?啲錢明明就係你偷。你唔好屈其他人喎!」若水氣憤地說。
魚蛋基向身旁Candy打一打眼色,示意她起來說話。
「啲錢係我偷嘅。」Candy 冷靜地說。
頓時全場嘩然,討論聲此起彼落。
「Candy你知唔知自己講緊咩啊?」若水十分驚訝。
Candy 續說:「其實...我係呀基女朋友,係我唔忍心見到佢俾人追債,我先決定幫佢偷錢。好對唔住。」
「對唔住Mary,係我講大話呃左你。我同阿基會想辦法盡快填番筆數,希望你哋可以唔再追究落去。」Candy 轉身望向若水道。
「冇可能!我識你咁多年會唔知你性格?你平時咁正直,學會一分一毫你都要清楚知道用左係邊,你會為左佢破壞你咁多年嘅原則?你係咪有啲咩俾佢威脅住你先要幫佢孭呢隻獲?」若水不願相信,繼續追問。
「我諗你真係睇少咗愛情嘅魔力。Candy就係唔忍心睇住我出事,先至會冒險幫我。況且你都識講啦,佢平時睇得盤數咁緊,冇佢嘅同意,你估我有機會攞到錢咩?」魚蛋基理直氣壯地說。
「你講大話!嗰日我親眼睇住你鬼鬼崇崇攞住一大個信封喺學會房行出嚟,之後我入去睇,個夾萬就俾人打開咗。」
「Come on Mary! 雖然我最後係同你分左手,你都唔使作咁大個故仔黎屈我架。」魚蛋基嘆氣地說道。
「喂,唔該你唔好講其他嘢轉移視線喎。」若水看見台下的會員討論聲四起,急忙說道。她棋差一著,沒有想過魚蛋基會在這個場合將這些感情瓜葛公開,用作攻擊她的最佳武器。
魚蛋基看準時機,摸一摸耳朵,向台下的龔燁打了個眼色。龔燁便把USB交給大會主席,說有證據說明事情始末。
「大家停一停!啱啱有位會員聲稱有證據交代成件事,依家會投射係螢幕到俾大家睇。」
大會主席將USB插入電腦,怎料一打開,就看見一堆魚蛋基與若水頭貼頭的親密合照,還有數份證明Candy親自到銀行簽名提款的文件。
「大家依家睇到啦。呢啲文件可以證明啲錢係Candy親自去攞嘅。Mary,雖然我同你分左手姐,冇諗過你會因為咁而屈我。」
若水百辭莫辯,畢竟她曾經與魚蛋基在一起是不爭的事實。初入大學的若水就是相信了他的花言巧語,墮進了這個糖衣陷阱。想不到昔日的甜蜜,現在竟變成了一把用來偷襲她的利刃,連昔日的閨蜜Candy 都為了一個人渣,不惜欺騙她。
「喂夠啦!我哋今日嚟到呢度,唔係想聽你哋啲感情糾紛。乜而家啲人偷完錢講句對唔住就得㗎啦?咁你點對得住班會員啊?計我話,呢單野一定要報警!」會員B不屑地說道,其他人也隨即起哄。
「報咩警呀?我地咪講左會盡快填番筆數出黎,使唔使玩到咁大呀?」魚蛋基一聽到報警兩個字,本性立刻表露無遺,站起來拍枱,眼神變得凶險又猙獰。
會員B被他一挑釁,也怒火中燒,衝上台與他理論,幾乎大打出手。大會主席見情況不受控制,宣布會議腰斬。
心如死水的若水眼神空洞,垂頭喪氣地離開會場,儘管其他人如何叫她,她都充耳不聞。此時此刻,她只想掘個大洞把自己埋進去。
目睹這一幕的龔燁,心中竟不期然地揪著揪著痛。他雖然與這個女生素未謀面,但他感覺到,她應該是個善良、有義氣的人。他沒有想過魚蛋基口中的證據,竟然包含那一堆親密照片。這些照片在那麼多人面前公開,她一定感到無地自容吧。是我連累了她嗎?一絲內疚感覺湧上心頭,但再多的同情及歉疚,想必也彌補不了,事情已成定局,無法挽回。
第六章 <係你欠我嘅!>
「成件事就係咁啦。你而家明啦,我都係比魚蛋基利用,我真係冇心要hurt你。」龔燁將事情一五一十交代清楚,希望若水會明白他的苦衷。
「就算你係無心又點?我Mary Hung呢個名係大學已經出晒名啦,啲人個個恥笑我爭仔爭到屈人偷錢,仲愈傳愈過份,有啲仲話…」
「仲話咩呀?」龔燁睜起雙眼。
「仲話當日啲相有啲係床照,我係因為俾佢呃左隻豬先要報復,你話離唔離譜呀?」若水情緒愈發激動,旁邊的三姑六婆聽見都立即把臉轉過來。
「殊!你細聲啲啦。」龔燁把頭伸前,將手指貼在嘴唇上。
「我唔理呀,係你有份搞到我大學個幾年過得咁慘!你知唔知人人都話讀大學係人生最開心嘅時期,但我一啲都唔覺,簡直係地獄呀!總之係你欠我嘅!」
「Okay 咁你想我點還呀?以身相許呀?」龔燁打趣道。
「仲有心機講笑!我唔知啊!」
「你咁憎魚蛋基,一係我去買哂成個canteen啲魚蛋,比你用叉狠狠咁逐粒逐粒拮落去,咁好未?」龔燁自己說完都忍不住發笑。
「你係咪玩野呀?自從個件事之後,我見到魚蛋就憎啦!」若水掐緊拳頭,氣鼓鼓地說。
「咁如果魚蛋基唔係賣魚蛋,係賣鮑魚,咁你呢世都唔食鮑魚呀?」龔燁嘲笑道。
「係!你可唔可以唔好再講佢啊!」
「好囉,不過我哋仲要去迎新營度宣傳㗎喎,你驚唔驚又比人認得啊?」
「冇辦法㗎啦,為咗份工都要頂硬上。依家個頭開得咁好,我冇理由唔繼續,將啲功勞比左人㗎。我諗都隔左幾年,新一屆啲人應該唔識我掛...」若水口雖這樣說,心卻在暗暗擔心。
「好難講㗎,Mary Hung咁出名。話時話,Mary Hung...Mary Hung…咪即係媽呢空!哈哈哈哈。」
「仲笑!你呀真係唔好周圍講啊,我唔想公司有人知道我啲黑歷史,你講咗出去嘅話呀,上司都無情講啊!」若水狠狠地警告龔燁。
「我出黎做野幾年呢,都真係未見過咁樣同上司講嘢嘅下屬囉。」龔燁對著若水不禁翻了個白眼。
「因為係你欠我嘅!」
(待續)
Channelno6
2019-1-13 21:55:29
第七章 <再歷一次迎新營>
9月23日 星期六
天氣十分悶熱,九月的陽光仍然是那麼灼熱難擋。龔燁與若水背着一大個宣傳易拉架和數大袋贊助禮品包,緩緩地由麥理浩夫人度假村村口行進營地。
「點解成九月都仲係又熱又焗架,我出晒汗啦!一日最衰都係個的士佬,死都唔肯駛入嚟!」若水一邊抹汗,一邊抱怨。
「冇辦法啦,條路咁窄,啲的士入咗嚟好難轉返出去架。你咪當做下運動囉,成日坐係Office,因住變雙下巴水桶腰豪華臀嘅美芝蓮車軑人呀!」龔燁又趁機揶揄若水。
「我睬過你把烏鴉口啊!點解堂堂跨國公司,連book架車俾我哋嘅錢都要慳架!」
「你唔係唔知我哋老細首富呢個位就係咁樣慳返嚟呀嘛?」
在營地入口,兩位新一屆學會成員David和Emily已在等候。
「你哋終於到啦,等我嚟幫手拎啦!」Emily 見他們一袋二袋十分狼狽,立即上前幫忙。
「係呢,你哋今日第一日迎新營喎,一切順利?有冇人甩底啊?」龔燁問道。
「冇啊齊晒啊,有成80幾個同學仔,你哋今次宣傳一定好有迴響!」Emily興奮地說。
「咁就好啦,不枉我咁辛苦大熱天時咩住咁多禮品包行入嚟啊。」若水覺得自己的辛勞總算沒有白費。
「你哋入去坐下先啦,完埋陣間啲遊戲,就會安排時間俾你地宣傳㗎啦。」
「好啊唔該晒。」
等到差不多黃昏,下午的遊戲環節終於結束。接下來輪到龔燁與若水的宣傳時間。龔燁與若水拿着咪高峰準備介紹這次贊助活動。
「Everybody 大家好呀。我係彈珠臺集團嘅市場部經理龔燁。而家派發緊比大家嘅禮品包相當豐富,全部都係我地公司旗下代理嘅產品,好似有牙膏牙刷、沖涼液、洗頭水、零食、杯面、紙巾、暖包等等,男仔仲會有剃鬚刀,女仔就會有衛生護理用品。」
「冇錯啊,入面仲會有一張彈珠臺百貨嘅折扣卡,只要大家黎到我地百貨公司買我地旗下代理品牌嘅產品,都可以享有九折優惠。」若水接著說。
「今日我地仲準備左個小遊戲,大家只要上彈珠臺百貨facebook專頁睇最新嘅宣傳片,話比我地知條片到底出現左幾多次我地公司嘅logo,最快嘅頭三個同學,就可以得到價值$1000嘅購物禮劵!」
差不多七點,宣傳環節也順利完成。
「橫掂都到食飯時間,兩位唔介意嘅話,不如留低一齊食啊?」Emily 盛意拳拳地邀請。
「好啊!」龔燁一口答應。
「不過我地都係叫到會咋,budget 有限,唔係太豐富,你地唔好介意!」
「點會呢!我地咩都食架!」若水笑道。
到會來了,天啊,那完全不是Emily 口中所說的「唔係太豐富」,薄餅、沙律、意粉,應有盡有。
「Emily 你地今屆好有錢喎,咁揼本對啲新生咁好嘅!我地以前都係買飯盒咋!」若水想起那些年每次舉辦活動,最多都只是買飯盒,學會的資金甚至只足夠他們光顧一些廉價茶餐廳。記得有次打開一個名為「日式燒汁黑豚肉配北海道滑蛋飯」的飯盒,若水滿心期待地想著自己終於「有啖好食」,最後打開只是個又乾又硬的叉燒蛋飯。
「係咪因為個年魚蛋基穿櫃桶底,搞到你地咁窮呀?」龔燁輕聲的在若水耳邊說道,若水立刻回以一個凌厲的眼神。
「咁我地盡量都想對啲新生好啲,吸引佢地參加學會活動嘅!」
看來玩了一整天,大家肚子都餓壞了,轉瞬間,到會食物已被一掃而空。
「我諗你地走唔到住啊。」渾身濕透的David帶著雨傘從外跑進來。
「嘩出面好大雨咩?你全身濕哂喎。」若水驚訝地問。明明下午還陽光普照,怎料一下子竟驟風暴雨,風雲色變。
「天文台話有個風打緊黎啊,所以今朝先咁熱,而家仲落緊黑雨,我地因為全日係室內,所以先唔知。」
「吓黑雨,咁我地點走啊?」若水不知所措,望望身旁的龔燁。
「唯有等佢停雨啦,而家call的士都唔會有人肯入黎啦。」
若水與龔燁在營地一直等,等到晚上11時許,大雨也沒有絲毫要減弱的跡象。
「場雨睇怕仲有排落喎。」龔燁向一臉煩悶的若水說。
「唉,點番屋企啊。」
「我諗你地今晚都走唔到架啦,都冇車肯入黎。其實我地訂多左間房用黎擺野,一係你地留低係到過一晚?」Emily 提議道。
「但係我地咩都冇帶黎喎。」若水擔憂地說。
「你地唔係仲有啲派淨嘅禮品包咩?入面咪有齊梳洗用品囉,我地都有啲camp tee 同短褲多左,可以比你地當睡衣著。」
「係啦,你地係到訓一晚,我諗聽朝停雨你地就可以走架啦,橫掂聽日星期日,你地又唔使趕番工。」David 也贊成Emily的建議。
「其實我地今晚都唔打算點訓,會同啲新生一齊傾下計,玩下遊戲咁,你地都可以一齊join喎。」
「好喎,我畢業左咁多年,都好耐冇試過咁玩通宵啦。」龔燁不只想重拾那些年的青春,更重要是,這是一個與若水過夜共處,增進感情的大好機會。
「咁唯有係咁啦。」若水無奈地說好。
「咁我去安排下間房先,陣間比埋套衫你地,你地就可以去梳洗下。今晚我地約左1點鐘201號房玩遊戲,到時見啦!」
(待續)
Channelno6
2019-1-14 16:04:27
出篇短短地
:^(
第八章 <共處一室>
Emily 為龔燁與若水安排了最後一間房間,房間雖小,但都配備兩張單人床,梳妝桌和小衣櫃,尚算雅緻。
「咁你地梳洗下先啦,陣間見。」Emily 放下兩套T-shirt 短褲在床上便離開。
「鈴...鈴...」若水的電話響起。
「喂,呀爸,出面好大雨啊...係啊...我番唔到黎...係啊...我今晚會係度假村過一晚,你唔使等我門啦。」若水向樹根報平安。
「屋企人打黎啊?」龔燁問道。
「係呀。你都快啲打番去報平安啦。」
「唔使啦,我自己一個住嘅。」龔燁眼神流露出一絲失落。他一向都是獨自生活,母親早已離家出走,父親長年在老人院,記憶力又逐漸衰退,很少主動打給他問候近況。有時他也很羨慕若水,原來有家人讓自己報平安,是一個多麼平淡簡單、但他又永遠無法觸得及的幸福。
「咁你讓我沖涼先啦,我個頭好難乾架。」若水哀求道。
「讓你先啦,嗱唔好話我唔gentleman啦。」
二人共處狹窄的一室。房間十分寧靜,從浴室傳來的就是唯一的聲音來源。淅瀝淅瀝的花灑水聲,蓮蓬頭與水龍頭的碰撞聲,花灑被關掉的聲音⋯龔燁都能聽得一清二楚。看著那扇浴室門,龔燁一想到與若水之間的距離就只有一門之隔,不知為何竟感到面紅心跳。
「你諗咩啊。」龔燁拍拍自己的後腦,叫自己清醒。
水聲慢慢停止。不久,浴室門被打開,冒出一縷縷熱蒸氣。若水穿著不太合身的T-shirt 短褲,濕透的髮絲還滴著水珠,把肩膊都弄濕了。
「到你啦。」若水緩緩地解下頭上的毛巾,任瀑布似的頭髮撒落在肩膀上,再用梳子輕輕梳直。
龔燁不自控地,目不轉睛的看著若水。
「你望夠未啊。」若水很久未試過被異性這樣盯著看了。
「哦冇,比你落左妝個樣嚇親姐。」龔燁又取笑若水來化解尷尬。
「有冇咁誇啊。」
「你試下出去行個圈,睇下有冇人認得你囉。」
「你串少我一日係咪會死?」
「啊聽人講呢,女人只會夠膽係老豆同老公面前落妝,唔通你對我有咩企圖?」龔燁交叉雙手放於胸前,一副保護自己的姿勢。
「好心你幾廿歲人就唔好咁多幻想啦。冇你咁好氣,我出去斟水。」
「喂,化番個妝先出去見人啊!」
若水向龔燁怒吼了一聲,就氣鼓鼓地出去了。其實龔燁所說的,都只是違心之話。若水臉上縱然沒有任何修飾,但皮膚仍然白皙細嫩,雙頰被蒸氣蒸得緋紅,顯得非常稚氣。
「日日見你呢個樣都幾好。」
(待續)
魚柳包加蛋
2019-1-14 22:09:11
支持樓主!好好睇
:^(
Channelno6
2019-1-14 22:33:24
多謝支持
:^(
改名改到想喊
2019-1-14 22:52:07
個post有聲嘅屌你
:^(
Channelno6
2019-1-15 18:54:33
第九章 <猛鬼夜>
(內有鬼故,慎入)
龔燁梳洗過後,也換上了Emily提供的ocamp T-shirt 及短褲。
「你終於出黎啦?一點啦,夠鐘過去201號房啦。」若水在床上玩著手機說道。
「哦,好啊。」龔燁看到若水的穿著與自己一模一樣,不禁揚揚嘴角。
若水敲敲201號房門,迎接的是Emily。
「你地終於黎啦,等緊你地啊。」
「係啊,佢囉沖涼沖咁耐。」若水瞪一瞪身旁的龔燁。
龔燁反了反白眼 :「咪又係因為我讓你先。」
「快啲入黎啦,我地準備講鬼故啊,我有大把貨。」David提議道,他早在入營前已準備好一大堆鬼故,務求把我們嚇得魂飛魄散。
「快啦,驚你啊。」膽大包天的Emily催促著David。
「咪住先,要營造好個氣氛先得。」
David搬了一張小茶几,將房間的燈全關掉,再搬了一個枕頭放在茶几後面,讓自己坐上去。其他人急不及待窩在同一張沙發上,確保身後沒有任何一絲空隙,以防後面有任何風吹草動,嚇壞自己。龔燁與若水就是這樣身貼身,窩在擠迫的沙發上。若水瞄了瞄龔燁的側面,這數公分的距離讓她有點心跳加速,咫尺之間,她能感覺到龔燁帶點溫熱的鼻息。再仔細端詳一下,原來在黑夜裡,他的側面是蠻帥氣的,只是白天顧著跟他鬥嘴,從未有留意。
David亮起白光電筒照著自己,再在手機播放一首極度哀怨悲涼的純音樂,配合著窗外淅瀝淅瀝的雨聲,還未開始聽鬼故,寒慄感已遍襲若水全身。
「睇黎你真係有備以黎喎,放馬過黎!」
「好啦,講個冇咁驚先喇。你地知唔知香港島大學有個籃球場?」David chok起他那把模仿電台DJ的聲線問道。
「我知!係咪就係近游泳池嗰個?」一個新生問道。
一聽見David 的開場白,龔燁就知道他要說的是那個鬼故事了。作為大師兄的龔燁,早已將大學的鬼故聽個十遍八遍,能背得滾瓜爛熟。但識趣的龔燁當然不會揭穿,看見用雙臂緊緊抱著雙膝的若水,他正期待著她被嚇到驚惶失措的樣子。
「冇錯。個到好近宿舍,所以每晚都會有一大班男仔落去一齊打波。而每晚差唔多十一點,都會有個女仔坐係看台到睇佢地打波,個女仔遠睇都幾清秀,頭髮長長,吸引左一個男仔嘅注意。但每次個男仔好專注咁打完波之後,當佢望番去個看台,個女仔就走左。」
「唔駛問啦,個女仔一定係鬼黎!」若水忍不住插嘴,以緩和自己緊張的情緒。
「你咪岔亂歌柄先啦!都未到戲肉。」龔燁撞撞若水的手肘。
「咦呀龔睇黎你聽過啦喎。」David笑著道。
「我唔會劇透嘅,請繼續。」
「如是者,有一日個男仔就決定的起心肝,完左埸波就去搵個女仔。佢跟住嗰位女同學,但個女仔行得好快,佢只係見到佢行入宿舍二樓嘅201號房。個男仔問管理員到底邊個住係到,管理員只係答,無—人—住。」
「201號房?咪姐係呢到?啊!」整班女生都在尖叫,包括熊若水。
「佢擺明係老作架啦!你地咪比佢咁易嚇窒先得架!」Emily 冷靜地安撫他們。
「少少嘢就嚇到你地咁。咁我繼續啦,個男仔覺得好奇怪啦,就去左大學圖書館搵新聞,點知...原來個間房真係死過人。」
「嗱,都話係鬼黎架啦!」若水又嚷道。
「之後個晚,個男仔又見到個女仔。佢唔心息,再次跟住佢,到佢入左房門之後,個男仔透過鎖匙洞望入去,見到嘅係
紅
黑
紅
。
不如我地互動啲呀,大家估下佢到底見到啲咩?」
「紅黑紅,咩黎架,藥丸?」
「唔係。」
「熊本熊? 佢有齊紅黑色!」
「唔係。」
「唔係血呀嘛…」
「近近地啦。」
「我想問下個女仔點死架…」有位新生好奇地問。
「佢…係被人吊死嘅。」David 用一把陰森恐怖的聲音回答。
「下…好恐怖啊,我唔想再估落去啦。」那位新生用力抱住攬枕,瑟縮在牆角。
「你地真係冇人估啦?」
房間鴉雀無聲。
「喂呀龔,既然你知,不如你開估啦。」
「好啦。其實…個女仔係比人倒吊死嘅,個腦充哂血,所以個男仔望到嘅係…同樣望住佢嘅眼球啊!」龔燁藉機抓緊若水的手臂,再用盡全力撐大眼球瞪著若水,嚇得她花容失色。
眾人幻想到那血腥真實的畫面,再配合龔燁七情上面又傳神的演繹,整間房頓時尖叫聲四起。
「你個死人龔燁!駛唔駛咁大力捉住我啊!嚇死我啦!」回神過來的若水隨手拿起枕頭,猛地向他拍打。
「喂媽呢空你係咪痴線架!你仲恐怖過隻女鬼啊!」龔燁一路迴避若水的窮追猛打,他們倆就跑出房外了。
(待續)
Ads
夢非夢
2019-1-15 21:40:58
好睇!
:^(
魚柳包加蛋
2019-1-15 21:48:51
樓主加油繼續寫
:^(
Channelno6
2019-1-16 18:59:06
第十章 <真心話大冒險>
龔燁與若水一直追逐著,就跑回自己的房間了。
「喂好啦下…你追夠未?」龔燁身軀倚著牆壁,喘得上氣不接下氣。
「你唔走我咪唔追囉!鬼叫你瞪到隻眼咁大黎嚇我啊!」
「小姐啊,講鬼故緊係咁先好玩架啦!係你生人唔生膽姐。」
「邊有!」
「係咩?你唔驚嘅而家番去嗰邊聽囉。David 話佢仲有大把貨。」
「我先唔番啊,頭先佢話呢個已經冇咁驚,之後個啲仲得了嘅?」
「其實你都係喺到讀架啦,呢個咁經典嘅鬼故,你有咩可能未聽過?」
「我個陣唔興講鬼故架喎。」
「咁成晚流流長,做咩?」
「玩下真心話大冒險囉,再唔係就傾偈傾通宵。」
「依家冇野做,我地又玩囉!」
「兩個人點玩啊?無癮。訓啦。」若水掀起被子,準備倒頭大睡,遺下沒癮的龔燁,只好去關燈睡覺。
過了一陣子,燈突然亮起,若水行到龔燁的床邊拍醒他。
「喂,醒啊。」
「又點啊媽呢空?又話訓?」半夢半醒的龔燁揉揉雙眼問道。
「最衰都係你啦。我一合埋眼就見到紅黑紅嘅眼球啦,點訓姐。」若水一臉煩燥。
「真係神又係你,鬼又係你。咁你想點啊?」
「好似有啲餓。禮品包咪有杯面嘅,不如淥黎食囉?」
「三更半夜食杯面,肥死你啊。」
「唔理啦,反正我都唔會訓到。你要唔要,淥埋比你啦?」
「好啊。」
三分鐘後
「熱辣辣嘅杯面到啦。」若水小心翼翼地捧著兩杯杯面,拿到龔燁床邊。
「唔該哂喎。」
若水不顧儀態地狼吞杯面,發出「雪雪雪」的聲響。眼前的人兒顯得更加可愛。
「橫掂起左身,搵啲野玩啦。」龔燁又逗若水玩。
「你想玩咩?」
「我哋攞個水樽喺地下到轉。轉中就要答問題,唔答嘅話就要食一包wasabi。」龔燁順便拿起剛才用來玩遊戲的wasabi,露出奸險的笑容說道。
「一包?即係迫人答姐。」若水皺皺眉頭。
「咁你唔係玩唔起呀嘛?唔想食咪答囉。」
「玩咪玩囉。」
「你轉先啦。」
若水轉了一轉,水樽就轉中自己。
「你有咩就快啲問。」若水反反白眼。
「好…我想問…點解當初會同魚蛋基一齊?」龔燁又再次展現他的「八龔」本色。
「點啊一嚟就問我最憎嗰個。」
「你可以唔答㗎,食囉。」龔燁為若水遞上一包wasabi。
「我答!啱feel咪一齊囉。Next. 」
「答咁少?」
「你都冇規定要答幾多!到你轉啦!」
龔燁轉一轉,水樽又指向若水。
「點啊又係我。問啦八公!」
「佢同我講你對佢求愛不遂喎,咁你點追佢先?要詳細答呀吓講明先,唔係都要食。」
「痴線!佢真係咁講?用下個腦諗下都知係佢追我啦。真係過份將啲野調轉黎講,死人魚蛋基比我見番你我見一次打一次啊!」
「冇講大話?」
「冇啊!」
「咁佢點追到你?」
「咪都係嗰啲等我放學又送下花咁囉。」
「咁你都幾易追架喎,係咁意做下啲門面野就得。」龔燁笑笑道。
「關你咩事姐。你對我啲情史咁有興趣做乜姐!」
「咁唔問呢啲唔通問你返工返成點咩。到你。」
若水轉了轉,這次終於輪到龔燁。
「仲唔到你!等我諗下問咩先……初戀係點樣發生嘅?要詳細啲講架下,時、地、人都要!」
「你咪又係咁關心我啲情史。」龔燁揚起嘴角,沾沾自喜。
「我呢啲叫唔執輸!我講左咁多比你聽啦。」
「Okay fine. 我初戀呢係中四係學校發生嘅,對象係…女仔黎嘅。」
「就係得咁多?」
「係啊,時、地、人呀嘛,答哂你啦。」
「咁拍左幾耐?」
「新一條問題唔該留番下一輪。」
「頭先我都照答你啦。」
「係你戇居姐。」
「搞錯啊。我要再轉…」
如是者,他們就這樣聊著聊著,聊足一個通宵。那一堆撒在地上的wasabi,一包也沒有開過。過了今夜,龔燁對若水的認識,又加深了一點點;而通往她心房的那一扇窗,似乎又為他敞開了一點點。
天剛亮了,一抹微弱的晨光從鏤空細花的窗紗外透進來,光被篩成一點點,像閃爍的細石灑在剛睡著的若水臉龐上。
龔燁凝眸看著她,柔聲地道: 「呢場黑雨真係天公造美,來得合時。」
(待續)
Channelno6
2019-1-17 22:12:18
第十一章 <雙下巴天使>
星期一早上,彈珠臺市場部。
「Mary 早晨!」Mandy 正在茶水間沖泡咖啡。
「早晨啊!」
「係喎,你地星期六去ocamp 宣傳成點啊?」
「唉好黑仔啊,撞正黑雨,搞到琴日先走到。」
「係喎個日超大雨。咦,咁你咪即係同呀龔過左一晚夜?」
「講左去邊啊,我地成班人…一齊玩通宵咋。」說罷,若水都有點心虛,明明就是她與龔燁單獨聊個通宵。
「咁青春?其實呀龔都幾好啊,大好前途,你可以諗諗佢喎。」Mandy撞了撞若水的手肘。
「諗咩啊,佢係我老細咋。」
「辦公室戀情好平常姐!佢都幾暖男啊。」
「暖咩男,佢呢啲叫做暖氣,仲要係中央嗰隻,暖哂全部人架。」
「我硬係覺得佢特別照顧你。」
「咁係因為佢...」若水想了一想,都是把「欠左我」三隻字吞回去。
「因為佢咩啊?」
「因為佢係世界仔囉!你覺得佢好,你咪去馬囉。」
「佢呢type唔啱我架。話時話,我見有個男仔成日車你番工架喎,你條仔黎架?」
「緊係唔係啦。佢叫博士,我地由細識到大架啦,好朋友黎,唔好誤會。」
「乜好朋友會管接管送架咩,我都想要番個啊!」
「邊個管接管送啊?」龔燁拿著水杯走到茶水間沖咖啡。
「早晨呀龔!冇啊,講緊Mary 朝朝有人車佢番工咋嘛。」
「係咩?邊個黎架?」龔燁定睛望著若水問道,心中感到不是味兒。
「唔好聽佢亂噏啦,係我呀爸公司嘅員工,順便車我咋。」若水對Mandy的誤會一笑置之,但沒想到龔燁卻很在意。
「Mary, 陣間入黎我房傾傾個project。」
「好啊。」
龔燁辦公室
「呀龔。」若水叩叩房門。
「坐啊。嘩!」
「做咩?」
「你對熊貓眼好勁吓喎!仲未訓番夠咩?」龔燁用手指在若水面前打圈圈。
「唔係啊嘛。我琴日番去已經訓左成日架啦喎。」
「睇黎你已經唔再青春啦,區區通個頂就咁。」
「唉,以前我上完一日堂,再唱通宵K都當食生菜,之後直落飲早茶都難我唔到架。」若水對自己一投身社會就急速衰老感到唏噓。
「算啦,呢啲青蔥歲月已經過去架啦。講番個project, 我知道黎緊十一月商學院會搞個福利日,又係需要大量禮品包。其實我地初步已經傾好會合作,我想你幫我問下佢地個確實日子,等我地過去宣傳下。」
「好啊冇問題,咁我番出去做野先。」
下午,若水就去聯絡商學院的幹事,他們回覆福利日訂於11月5日舉行。
「11月5...呢個日子好熟,有咩要做呢。」若水翻了翻案頭的月曆,揭到十一月的那頁,看見被圈起了的5號。
「啊!係畢業禮啊!咁遲搞我都差啲唔記得添!仲要遞假紙啊。」
若水趕忙填寫請假紙,準備交給龔燁。
「點啊媽呢空,問到未?」龔燁敲敲若水的桌面。
「佢地話11月5號搞啊,不過我個日要請假,黎唔到。」說罷,若水就將請假紙遞給龔燁。
「點解?」
「我個日要行畢業禮啊。」
「係喎,我地學校一向都係咁遲先搞。」
「係囉,所以我黎唔到宣傳啦。」
「唔緊要,我搵其他同事替你啦。話時話,呢隻咩黎架?」龔燁拿起若水桌上的緣份天使瞧瞧。
「係我隻守護天使黎架。」
「守護天使?咁大個人仲信呢啲野?」
「係我媽咪嘅遺物黎架,會為我帶黎好運。我諗我入到黎呢到做,都係因為佢。」
「唔怪得咁似你啦,有雙下巴嘅,物似主人形。」
「我邊有啊。你快啲係到簽個名,我交落去人事部。」
「Okay. 」
龔燁簽過名後,若水便拿著請假紙走了。
龔燁再拿起緣份天使細看,若有所思。
「雙下巴天使,多謝你將媽呢空帶黎我身邊。」
(待續)
Channelno6
2019-1-18 17:45:08
第十二章 <畢業禮的天使>
11月5日
「終於到我畢業,大學生涯要完結啦。」若水看著鏡子,今天她雖然只是淡掃蛾眉,薄施脂粉,但妝容明顯比平日化得更精緻講究,配襯起一條純白色絲質露肩裙及一雙裸色高跟鞋,更顯出眾氣質。
「二家姐,你今日好索啊,簡直艷壓全場。」心如稱讚道。
「咁賣口乖。」若水挰挰心如的下巴。
「二妹,真係好耐都冇見過你咁悉心打扮。你應該咁樣著番工啦,先可以快啲脫離單身行列架嘛。」樹仁不禁為自從與魚蛋基甩拖之後幾年未有著落的若水擔心。
「呀叔,我先啱啱出黎做野,駛唔駛咁緊張啊。」
「你地唔好掛住講啦,快啲過黎幫下眼我套西裝,點啊我條呔有冇咩?」
「冇啊呀爸,今日最有型係你啦。」若水細心地幫樹根整理領帶。
「緊係啦,我個寶貝女畢業喎。」
「差唔多夠鐘行啦!香港島大學有好多景可以影架,早啲番去啦!」樹仁催促他們趕快出門。
熊家上下整裝待發,準備前往香港島大學。
大學的紅磚牆是著名拍照景點,一早已經人頭湧湧。
「Mary 你終於黎啦!等你好耐啦。」這是若水最要好的大學同學 Jessie,身旁還有她的跟得男友。
「係啊,冇諗過呢到咁早就咁多人。」若水驚訝地說。
「咪係,想搵個少啲人影相嘅地方都難。」
「我地不如去個邊影先啊,好似會少人啲。」若水指著遠處的荷花池道。
「唔好過去住啊,頭先我見到魚蛋基同Candy 係個到影緊,你過去盞尷尬。」
若水遠遠眺望,確實看到魚蛋基和Candy 在忘形地拍照。過去幾年,即使他們唸同一科目,但幾乎沒有碰面。不知這可算是一種憐憫,連上天也不忍心再次觸及她內心痛處。她再四處張望,的而且確,畢業就是炫耀情人的季節,四周都是一雙一對的年輕情侶,互相幫對方留影放閃,甚至連Jessie 都無獨有偶,只剩若水形單隻影。曾經,若水也幻想過跟魚蛋基手牽著手,一起穿起畢業袍,穿梭大學每一角落的畫面,可惜這舊夢早已粉碎。
「佢地仲一齊緊咩。」若水酸溜溜地問。
「係啊,你一早block哂佢地,緊係唔知啦。」
「呀水,呀叔今日唔話得啦,幫你做全日攝影師!就算你冇男朋友都唔緊要啦。」
若水瞪一瞪樹仁,說 :「係咪影架,快啲啦。呀爸,快啲過黎啦。」
「呀叔你係咪未死過,崩口人忌崩口碗啊!」心如輕聲在樹仁耳邊說。
「我怕咩姐,呀水幾惡我都見過啦!係喎話時話,仲未見博士嘅?」
「就講就到!」心如指著從遠處行近的身影。
「嗰個真係博士黎架?我有冇眼花啊!」一臉疑惑的樹仁托一托眼鏡。他沒有眼花,眼前的博士換上了一身筆挺西裝,一改以往衛衣,牛仔褲的頹廢裝扮,還以髮膠gel頭,令人眼前一亮。重點是,他手上還拿著一大束鮮花。
「嘩博士,著到咁行啊!」
「咁呀水畢業呀嘛,緊係著好啲啦,廢事比佢鬧我頹。」
「你快啲過去,扮住呀水男朋友先啦,等佢唔駛咁冇面!」樹仁推著博士到若水身旁。
「咦博士,你到啦!」若水咧嘴而笑。
「係啊,嗱送比你,賀你畢業,咪話我姑寒啦!」博士從身後拿出一大束鮮花送給若水,總共有十一枝粉紅色玫瑰花。
「嘩真花黎架喎,咁揼本,多謝!」若水收到香氣撲鼻的玫瑰花,滿心歡喜。
「快啲影張相啦趁少人!」樹仁催促道。
博士鼓起勇氣,行近若水身旁,一下摟住她的胳膊,雖然彼此還隔著一丁點距離,但已足夠讓博士心如鹿撞。
「喂博士,笑得自然啲啦!隻眼擘大啲啦睇唔到啊。」
就這樣,姿勢生硬的博士就與若水拍下了合照。雖然他們青梅竹馬,經常在一塊玩,但這樣盛裝打扮,手握鮮花地拍照卻是第一次,對博士別具意義。
「搞掂!博士到你渣機,幫我同呀水影!」
擾擾攘攘了一個多小時,熊家上下終於拍完照了。雖然大家都笑到面容僵硬,雙腿都站酸了,但這畢竟是熊家出產的第一個大學生,大家都為若水感到自豪,小小倦意又何足掛齒。當年大家姐尚善為了賺錢幫補家計,不惜忍辱負重,為報章風月版寫文章,埋沒了天賦,錯失了讀大學的機會。現在二妹終於出人頭地,還覓得一份前途無可限量的工作,樹根也可算是老懷安慰了。
「呀水,你仲有十分鐘就要入埸行禮啦,要準備行啦。」
「係喎,等我去補補個妝先!」
正當若水準備補妝的時候,電話就響起。
「喂。」
「媽呢空,你係邊?」電話裡頭傳來熟悉的聲線。
「龔燁?我咪係大學影緊畢業相囉。」
「我知啊,我啱啱都係大學做完宣傳啦,你係咩位置?」
「我係新翼荷花池個邊啊。」
「我係舊翼圖書館個邊,我過黎搵你啊。」
「但係我仲有十分鐘就要入場行禮啦,你趕唔趕到?」
「一定得,你等我。唔好行開。」
掛線後,龔燁以飛快的速度,從舊翼跑到新翼,跑到氣吁吁的。
看到在荷花池旁四處張望的若水,龔燁立即減慢腳步,裝作氣定神閒似的。
「媽呢空!」
「龔燁,你做咩過黎嘅?宣傳個邊有問題?」
「冇問題。咁我話哂都係你上司兼師兄兼上上上莊,好應該過黎賀下你嘅。嗱送比你。」
若水打開盒子,是一隻緣份天使。
「嘩係緣份天使啊!」
「中意呢?我見你枱面個隻咁孤獨啦,所以咪買多隻黎陪下佢囉。」
「你唔係笑我低B嘅咩信埋哂呢啲野。」
「咁我一見佢個雙下巴,就忍唔住買比你啦。」
「好囉!我同你介紹,呢個係我呀爸,呀叔,大家姐,三妹,姨甥同埋我好朋友,博士。呀爸,呢個就係我上司呀龔。」
「世伯你好!恭喜哂!」
「呀龔你好!咁有心黎賀我二妹畢業,真係多謝哂。之後麻煩你係公司幫我好好教佢啦。」樹根看到龔燁相貌堂堂,一表人才,又有禮貌,還特地買禮物賀若水畢業,不禁眉開眼笑。
「冇問題!」
龔燁逐一與樹根、樹仁、尚善、心如和安仔握手,直到最後一個—博士。
龔燁一看到博士,便認出他是經常送若水上班的男人,手不自覺地握得更緊。
「Hi, 我係龔燁,Mary 上司。」
「叫我博士,Mary 好朋友。」
兩位西裝筆挺的男士四目交投,空氣中像要迸發出激烈火花,他倆手愈握愈緊,如臨大敵似的。
「呀水,你快啲同呀龔影張相就夠鐘入去啦!」
龔燁自然地將手擱在若水的胳膊上,若水都被這突如其來的身體接觸嚇了一嚇,她偷偷瞥了一眼龔燁的側面,腦海驀然閃過一個念頭: 「佢做男朋友都唔錯啊。」
「好啦準備,一、二、三。」
若水向鏡頭靦腆一笑。
同樣的姿勢動作,博士剛才都做過了,但明顯龔燁表現自然得多。二人外形相當合襯,男的帥女的美,旁邊的女同學都向若水投下艷羨的目光。
「二姨同呢個長毛都幾襯喎。」安仔不禁說道。
「係啊,呀哥,你杯女婿茶可能有著落啦!」樹仁向樹根說道。
轉眼間十分鐘又過去,是時侯行禮了。
「好啦,咁我同啊爸入會場先啦!」若水向龔燁道別。
「聽日公司見。」
會場外
「呀水,你啲花同公仔比哂呀叔幫你拎,你就咁入去啦!」樹根提議道。
「哦好。啊咪住先。」若水從盒中取出龔燁送她的天使。
「呢隻細細隻,我攞埋入去啦!」
若水手握著緣份天使,徐徐步進會場。
「畢業禮有緣份天使伴我行,真好。」
(待續)
市場部禮品包
2019-1-18 18:24:49
覺得越嚟越好睇
:^(
支持支持
:^(
Channelno6
2019-1-18 18:45:50
多謝
:^(
龔老爺與熊妹仔
2019-1-18 18:57:31
我成日都𥄫實更新咗未,真係好好睇,加油
:^(
Channelno6
2019-1-18 19:04:17
因為佢地性格好鮮明 帶到我入戲先寫到
:^(
好pure好true
2019-1-18 19:56:08
好甜
:^(
Ads
大胃小食家
2019-1-18 23:20:45
好正啊
:^(
成個故都有聲
:^(
樓主加油啊!我晚晚都等你出post
:^(
Channelno6
2019-1-19 00:04:25
多謝
:^(
聽晚見
聖劍之騎士王
2019-1-19 00:45:25
push
魚柳包加蛋
2019-1-19 01:17:30
好有畫面
:^(
上一頁
第 2 頁
下一頁