吾幹汝娘 2019-1-7 21:45:33 有排先到八國聯軍

若然屬實 2019-1-7 21:49:16 英法聯軍又入嚟大清洗劫一次，仲打到去北京火燒圓明園，姦淫擄掠無所不為 ?

有無 source ?

常公子 2019-1-8 10:40:57 【大清亡國關 #下關條約 蛋牛治】

😄今集講李鴻章去日本傾馬關條約，日本人叫做下關條約。商量甲午戰爭慘敗之後嘅賠償問題。國際社會上，國家與國家之間嘅談判其實非常重要。今日中美爆發貿易戰，雙方已經進行咗多輪嘅談判，拉拉扯扯，仲未有一個定案。但係談判嘅過程中，世界經濟就因為依場中美貿易談判而不斷起伏。香港有堆人，成日講政治同經濟係互相分開，呢種人嘅知識水平其實低到爆。根本政治同埋經濟就係同一件事，人可以蠢，但唔可以太蠢。

😝講開談判，我諗起80年代中國同英國就香港前途問題展開談判。當時英國原本嘅方案係希望中國放棄香港主權，但鄧小平一步不讓，寧願玉石俱焚，都要響1997年收回香港主權。因此構思咗「一國兩制，高度自治」嘅劃時代巨獻拋畀英方，最後英國基於國勢江河日下，只有讓步，答應1997年交還香港主權，戴卓爾夫人響人民大會堂前仆街一幕，瀝瀝在目。依一仆，亦代表咗大英帝國嘅輝煌歷史告一段落，從此以後世界大舞臺轉換角色。

😚到咗今日，英國成為世界舞臺嘅二打六，只係做美國嘅附庸同應聲蟲，其實都幾心酸。英國國勢急轉直下，因為第一次世界大戰同第二次世界大戰，歷史話比我哋知，凡事真係唔可以去得咁盡，保留實力，唔揭開自己最後一張底牌，先係上策。呃呃騙騙，本來就係人間常態。

♎【#大清亡國關慈禧蛋牛治】語音導航！請大家幫手「#訂閱」我條YoutubeChannel！同埋介紹多啲人睇睇！衝上1000訂戶！💪

🍳https://youtu.be/eMTdsjHfGLg

【大清亡國關慈禧蛋牛治】https://play.google.com/store/books/details?id=C3hjDwAAQBAJ

【大清亡國關慈禧蛋牛治】實體購買
https://www.382now.com/product?id=87

follow my instagram @historysandwich

Facebook 專頁：https://www.facebook.com/historysandwich/

常公子 2019-1-8 23:04:35

【常威中史】為慈禧平反系列（七十四）

對歷史瞭解不足嘅人經常有種錯覺，就係硬係覺得知識份子可以改變世界，孫中山一腔熱血推翻帝制，康有為梁啟超滿腔熱情會還救大清，於是就會認為零八憲章可以改變共產黨思維，每年去維多利亞公園舉起蠟燭就可以平反六四，佔中可以得到真普選，和理非非就可以守住自己嘅金庫……以上種種純屬幻想，同你幻想同波多野結衣上床係同一回事，Sor，用錯比喻，因為後者可能會easy啲。

返去19世紀，既然講咗Siant有為，就唔可以唔講梁啟超一門雙傑一條連贏位。

梁啟超（1873-1929）廣東新會人，佢就真係一個名副其實嘅「神童」。因為佢17歲就考中舉人，有為考到36歲先考到呀陰公，佢哋兩位相識於1890年，當時有為33歲，隊冰超18歲。兩個人一見如故，經過11個小時吹水後，隊冰超如當頭棒喝，有禪宗頓悟味道，覺得自己從前所學嘅嘢都係冇用嘅，於是佢拋棄曬一切八股文舊學，跟隨有為從頭學起。

Siant有為得到呢個名滿天下嘅星級高徒，熱血上腦，加埋其他擁躉支持，1891年去廣州開咗間「長興學舍」，兩年後改名「萬木草堂」，正式上市，講道聚人，宣傳佢嘅維新政見，好多之後參予戊戌變法嘅好朋友好兄弟，就響依處聚集埋一齊。「萬木草堂」亦係康梁變法理論嘅發源地，亦係戊戌變法嘅幹部育成所。

文人論政，紙上談兵。康梁提出嘅所謂利用「西學」深度改革國家，其實亦唔係乜嘢新鮮事物。不外乎係將解決清國當下面對嘅問題分成三段論，推演為從「據亂世」（當前劣境），到「升平世」（即小康，既21世紀現代中國境況），再到「太平世」（即儒家思想裏邊嘅大同世界，或馬克思嘅共產主義烏托邦。），呢個循序漸進嘅過程喺康梁口中，強調只有變法，就能好快達到。佢哋仲講過「西歐行新法，三百年而治；日本行維新，三十年而強；中國只要變法，三年就可自立。」

寫到呢度，睇到呢度，其實上述嘅口號，同1958年大躍進期間毛澤東講「十五年超英，二十年趕美」又有咩分別？一樣係咁浮誇，一樣係咁堅離地。毛澤東講20年超英趕美，梁啟超同康有為就講三年OK，其實堅似寶藥黨呃婆仔積蓄。但係你吹佢唔脹，當時大把人信，大把人覺得好有道理，訓身All In攞埋條命去支持幫手。

1979年中國最偉大嘅設計師鄧小平就曾經講過，中國人真正要到達英國同美國嘅生活水平，大概需要100年時間，100年比較合理，1979年開放改革至今，經過咗差唔多40年，大家嘅感覺又係點呢？我常千戶中肯少少，事實歸事實，中國的確強大起來，起碼已有自家制航母同小米華為，問心，冇咗中國共產黨嘅強勢領導，我相信亦都冇辦法做得到。我咁樣講，五毛唔該加我分。

過去嘅中國歷史，有名嘅急功近利冒進變法都係失敗收場，北宋有王安石的熙寧變法，明朝有張居正嘅政革，清代有百日維新，五十年代有三面紅旗大躍進運動，統統兩三年貨仔，全部冇好收場。但同足球一樣，數據係愛嚟破嘅，鄧小平1979年嘅「開放改革」大變法就取得空前成功。所以你話三起三落嘅鄧小平唔係中國近代史上最聰明嘅人，係唔得囉。

下次，大清公知公車上書！

#常威 #慈禧太后 #晚清歷史 #戊戌政變 #康有為 #梁啟超

【大清亡國關慈禧蛋牛治】https://play.google.com/store/books/details?id=C3hjDwAAQBAJ

【大清亡國關慈禧蛋牛治】實體購買https://www.382now.com/product?id=87

【大清亡國關慈禧蛋牛治】全集，請支持常公子頻道
https://www.youtube.com/playlist?list=PL0RVUAILQUOvTo8JJrayjrvd_Nbjc-0Me

follow my instagram @historysandwich

Facebook 專頁：https://www.facebook.com/historysandwich/

伊藤かりん 2019-1-8 23:55:42 張居正早死
如果唔係 改革未必會停
明朝亦未必又倒退

:^(

常公子 2019-1-9 20:02:08

【常威中史】為慈禧平反系列（七十五）

六四近了，繼續講大清公共知識份子如何改變世界嘅美夢。其實1989年發生嘅六四事件，亦都係一場知識份子想改革國家、想國家邁向更美好嘅美夢，可惜最後好夢成空。但係無論佢哋當時做嘅嘢得出乜嘢效果都好，我哋千萬唔可以抹黑佢哋嘅高尚動機，否則三個字，不是人。

就早響1888年，當有為赴京考鄉試嘅時候，佢已經嘗試上書中央，一篇六千字《上皇帝書》想比光緒睇到，你當你自己係邊位呀？石沉大海就係理所當然。之後有為四圍擴充人脈，成為咗「聖人」，返廣州開宗立派，俗語所謂響咗朵插咗支食神旗仔，加埋隊冰超，一門雙傑，靠兩枝健筆打江山，揚名立萬。

1895年春天，當時已經頗有星味嘅有為再次入京參加會試，當時大清打輸甲午戰爭，日本同李鴻章訂立《馬關條約》，割地賠款，喪權辱國。消息傳出之後，雲集於北京嘅一衆舉人群情洶湧。有為作為牽頭人，聯絡十八省舉人共1300幾人，於北京市郊松筠庵起草一份萬言書，要求大清進行深刻改革救黨救國，並於五月初一遞呈都察院，上書中央。

呢一件事件就係晚清歷史上出名嘅「公車上書」，但最後察院官員都冇將有為嘅萬言書呈遞比劉晶睇，但係萬言書就從此流傳天下，對整個社會產生廣泛影響，改革思潮亦開始氾濫起嚟，聖人有為個朵亦開始個個都識。

有時候行起運嚟，真係擋都擋唔住，公車上書嘅第二日，有為就高中進士（應該係同公車上書無關嘅），並授予工部主事一職，但有為唔去打呢份公務員嘅厚職，反而留響北京，第三第四次上書光緒帝，陳述佢嘅改革主張。終於響當時已經開始靠邊站嘅翁同龢（冇錯，又係佢呀）嘅幫手之下，劉晶睇到佢嘅第三份上書，而且一睇仲非常咁鍾意佢，仲叫人抄錄三份（冇印影機），一份比豆斗、一份比軍機處、一份致各省督撫。

有為有皇帝劉晶撐，心雄鳥，乾脆大力將改革宣言深化為政治運動，6月佢響北京創立《萬國公報》，7月組織《強學會》，繼續聚人，而且仲響其他城市開分會，一時間聲勢浩大。但可能講嘢過咗火位，終於得罪滿清權貴，好快又俾人查禁封舖，但有為冇畀公安拉，唔使去秦城監獄坐，只係返歸廣州繼續佢嘅政治運動。睇到呢度，你就明白當時嘅大清，其實言論自由嘅風氣都幾開放，同今時今日完全冇得比（陰公豬）。

好喇，大家轉入直路。

相信好多人都會覺得1889戊戌年發生嘅事情，就係劉晶最終採用咗有為隊冰超等人嘅改革意見進行可歌可泣嘅「百日維新」，最後俾豆斗血腥鎮壓，其實時間線上大錯特錯，晚清歷史上有一件事叫做「戊戍變法」，個個人淨係知道咩叫「百日維新」、「戊戌政變」，但就冇乜人題「戊戍變法」，典解？質慈禧死食貓囉。

其實戊戌年嘅變法唔係劉晶發動嘅，佢亦冇咁嘅power，而係由大清一路落嚟堅定不移嘅帝國捍衞者慈禧太后首先發動。

下次keep on clam…….

#常威 #慈禧太后 #晚清歷史 #戊戌政變 #康有為 #公車上書 #戊戌變法

【大清亡國關慈禧蛋牛治】https://play.google.com/store/books/details?id=C3hjDwAAQBAJ

【大清亡國關慈禧蛋牛治】實體購買https://www.382now.com/product?id=87

【大清亡國關慈禧蛋牛治】全集，請支持常公子頻道
https://www.youtube.com/playlist?list=PL0RVUAILQUOvTo8JJrayjrvd_Nbjc-0Me

follow my instagram @historysandwich

Facebook 專頁：https://www.facebook.com/historysandwich/

常公子 2019-1-10 11:20:53 【大清亡國關 #刺客 蛋牛治】

😄李鴻章到日本談判，期間遭受刺客小山豐太郎行刺，小山豐太郎係日本嘅極右人士，有人話佢係黑龍會頭山滿派出嘅刺客，子彈射咗入李鴻章塊面度，以一個72歲嘅老人，唔死都算係奇跡。但事後睇返，把槍嘅威力明顯好細（否則正面打頭李鴻章冇可能唔死），但成件事冇可能係假，因為打頭，應該真係想堅攞李鴻章命。但係呢個刺客最後幫咗大清國一個大忙，歷史上發生嘅事，真係好奇怪。

😚發生響歷史上嘅重要行刺事件，好多都好奇怪。最轟動嘅就係60年代約翰甘迺迪被殺，背後嘅真相到今日都唔清唔楚（唔通真係磁力王Magneto令子彈轉彎），要記得幾年後佢細佬羅伯特甘迺迪（'Bobby' Kennedy）響宣佈競選總統之前，同樣死於刺殺，兩兄弟不明不白被行刺，背後究竟係一個乜嘢嘅陰謀呢？到咗今日都係冇人知道嘅。

😱美國貴為世界上言論最自由，政治透明度頗高的國家（同中國比簡直一個天一個地），內裡仍然充斥著不少驚人秘密。有人話我呢種人叫做「陰謀論者」，只係響處不停幻想政治背後嘅連串黑幕。但我想講一句，真正嘅態度係唔係官方講乜我哋就要信乜先？我哋冇權懷疑官方嘅講法？政治正確係一種先進道德觀？對唔住，我永遠無辦法認同呢類觀點。

🙄香港現今嘅情況，就係大家都朝住政治正確嘅方向進發，反對嘅聲音、懷疑嘅聲音、抗爭嘅聲音越嚟越細，我諗到咗有一日，全個香港消音mute咗，大家就會安樂曬，唔再諗咁多嘢，快快樂樂個安定繁榮富俗無憂嘅日子，直到永遠，阿門。

♎【#大清亡國關慈禧蛋牛治】語音導航！請大家幫手「#訂閱」我條YoutubeChannel！同埋介紹多啲人睇睇！衝上1000訂戶！💪

🍳https://user35103.pics.ee/DKB8Q

🍳https://youtu.be/k-bgqYFBDaI

【大清亡國關慈禧蛋牛治】https://play.google.com/store/books/details?id=C3hjDwAAQBAJ

【大清亡國關慈禧蛋牛治】實體購買
https://www.382now.com/product?id=87

follow my instagram @historysandwich

Facebook 專頁：https://www.facebook.com/historysandwich/

常公子 2019-1-10 22:50:24

【常威中史】為慈禧平反系列（七十六）

百幾年前嘅世界並冇智能電話，冇互聯網，資訊嘅流通主要係靠文字，甚至所謂傳媒體系亦未喺清國正式出現。文人枝筆嘅力量比今日強大千萬倍。有為同隊冰超二人嘅角色，其實係為改革變法製造輿論效果同民意基礎。係啊，百幾年前嘅清國非常重視民心取向，同今日唔同。

如果要講分工，有為同隊冰超係隸屬整個porject嘅宣傳部marketing，戊戌變法實際操作嘅內容，佢哋嘅角色並冇後來佢哋口裡面講得咁鬼大。食事後煙，抬高自己身價理所當然，揸筆搵食聲名最重要，呢一點我非常體諒，搵食啫。

由1897年到1889年間，清國比列強一忽忽肉咁割出去，而劉晶能力所限，一籌莫展。喺呢段時間，其實豆斗已經係頤和園策劃緊成個戊戌變法嘅內容。1898戊戌年6月11號，劉晶向軍機大臣宣佈咗慈禧嘅諭旨，確立咗國家發展嘅新方向，一句到尾，就係全盤向西方學習。事實上，豆斗搞洋務運動搞開放改革已經搞咗三十年，一早已經向西方學習緊啦，只不過1889年慈禧退休之後，光緒接班後先搞到一鑊粥。清楚歷史嘅人就會知道，問題係全部發生係劉晶身上。

6月底，翁同龢根據豆斗意思，用劉晶名義頒發著名嘅《明定國是詔》，裡面咁寫：「博采西學之切於時務者，實力講求，以救空疏迂謬之弊，專心致志，精益求精，毋徒襲其皮毛，毋競騰其口說，總期化無用為有用，以成通經濟變之才。」呢篇詔書拉開咗戊戌變法嘅大幕，劉晶只係傳話人，真正發動變化嘅人係豆斗。

詔書亦講得好清楚，過去幾年，國家流於「空疏迂謬」，凡事得個講字，嘢就冇人做過，矛頭直指國家最高領導人劉晶先生，既然交咗個權比你，而你乜都做唔到，咁做老母嘅又係時候出嚟撐住個局囉。

其實慈禧嘅角色，好似《楊門女將》的「佘太君」，又似《紅樓夢》嘅王熙鳳。當男人頂唔住頭家，做女人嘅，就要出嚟撐起半邊天，功勞可以比晒男人，要鬧就隨便鬧個女人，最緊要係撐住個牌頭，唔好比人除牌，豆斗同劉晶之間嘅關係，就一個咁嘅邏輯結構。

仲有一件事要講，揸筆寫《明定國是詔》嘅契弟翁，依篇嘢亦係佢漫長四十年政治生涯嘅終點，幾日後，佢就正式離開紫禁城，開缺回藉（退休返鄉下）。響全盤向西化學習嘅戊戌變法大環境裡面，己經冇依位保守派三朝帝師嘅位置。

你係佢，你甘唔甘心丫？如果你係佢，你玩唔玩嘢呢？

#常威 #慈禧太后 #晚清歷史 #戊戌政變 #戊戌變法 #翁同龢

【大清亡國關慈禧蛋牛治】https://play.google.com/store/books/details?id=C3hjDwAAQBAJ

【大清亡國關慈禧蛋牛治】實體購買https://www.382now.com/product?id=87

【大清亡國關慈禧蛋牛治】全集，請支持常公子頻道
https://www.youtube.com/playlist?list=PL0RVUAILQUOvTo8JJrayjrvd_Nbjc-0Me

follow my instagram @historysandwich

Facebook 專頁：https://www.facebook.com/historysandwich/

伊藤かりん 2019-1-10 23:24:11

:^(

常公子 2019-1-11 23:43:01

【常威中史】為慈禧平反系列（七十七）

去愛一個人，好多時候需要時間去觀察佢係一個咩人？如果個世界可以離婚，冇問題嘅，但係如果冇離婚呢樣嘢，要揀自己嘅終身伴侶就真係要好小心。又如果你出世指腹為婚，冇得揀。成世人需要同佢喺埋一齊，如果佢係個衰人，個情況都幾X悲慘。路遙知馬力，日久見人心，回想起當日咁愛佢，佢今日變成咁嘅西樣，真係好X難堪好X心噏……

1898年戊戌變法由6月11日劉晶頒發《明定國是詔》開始，亦即係晚清歷史上嘅「百日維新」運動，依一場由慈禧率先起動，牽涉整個大清嘅教育、經濟、軍事及官僚制度嘅政治改革運動，最後點解會演變到光緒軟禁慈禧奪權、六君子人頭落地嘅政變悲劇？由今日開始，我常公子就同大家深入分析一下。

首先，我講講康有為依個聖人嘅角色，好多人覺得百日維新係由有為領頭發動，係履行佢嘅政治理念（起碼佢自己事後就係咁講），其實真相並唔係咁樣。由剛剛被朝廷炒魷嘅翁同龢推薦，劉晶於1898年6月16號接見康有為，其時戊戌變法已經開始咗五日鳥，並唔係劉晶見咗有為先攪變法，只不過變法開始咗，劉晶想接觸多啲想法先進嘅知識份子聽取意見，有為只係其中一個。

事後有為周圍同人講，佢嗰日同皇帝傾咗四粒鐘，大家非常投契互相欣賞咁話，又係一招自抬身價嘅吹水伎倆，其實當日劉晶接見咗好多人，聖人只係其中一個，照時間推斷，皇帝同有為嘅傾計時間唔會超過一粒鐘。而且有為係廣東佬，普通話叻極有限（大家可以睇返youtube廣東佬孫中山嘅普通話演說片段，就會一清二楚，直情係崔世安曹仁超古天樂同張家輝嘅境界），佢能唔能夠同操正宗京腔嘅劉晶正常溝通亦都係一個大問題？好有可能，佢只係喺劉晶面前present咗一堆嘢，劉晶聽完就打發佢走，情況就係咁。

真係！唔通我同成龍影過相又話你知咩？情況都係一樣，見過皇帝嘅有為自抬身價自我感覺非常良好，皇帝亦比咗個「總理衙門章京上行走」職位佢，其實就係「跑腿」，根本冇官位，佢連官都唔係，又點有可能參與戊戌變法嘅高層決策呢？

但係6月之前，佢同隊冰超已經響北京組織「保國會」搞政治文宣，人氣好盛，係一個有朵嘅政治KOL，劉晶好欣賞佢依方面嘅才華，於是下詔叫佢去上海辦報，配合朝廷宣傳戊戌變法。但有另一個講法，劉晶專登調走佢同隊冰超，係唔想佢哋繼續留響北京吹水刺激京城裏邊嘅權貴保守派。有為同隊冰超魯莽多咀，其實已經引起好多人不滿，劉晶身邊幕僚六君子之一嘅楊銳（1857-1898）就建議皇帝儘快同康有為脫離關係，楊銳講過「康不得去，禍不得息」，亦係呢個緣故，劉晶為咗息事寧人，於是即刻調走有為去上海辦報。

有為嘅吹水嘢，下次先繼續。但藉住一場政治運動自抬身價，並唔係乜嘢新鮮事，古代有今時今日都大把。有時候真相係乜嘢其實唔重要，最重要係，你講出嚟嘅嘢有冇人相信你。你想用講大話去攻擊一個專係講大話嘅政權，其實大家都喺度講緊大話。康有為同梁啟超之後係食緊戊戌六君子嘅人血饅頭壯茁成長，呢一點絕對不可以原諒。


#常威 #慈禧太后 #晚清歷史 #戊戌政變 #百日維新 #康有為 #六四

常公子 2019-1-12 11:11:12 【大清亡國關 #馬關條約 蛋牛治】

😚馬關條約天文數字嘅賠款事實上冇拖垮到大清帝國，甲午戰爭戰敗，最重要係表現咗清帝國幾十年來所做嘅洋務運動徹底失敗，有人話日本有明治維新，清帝國冇。但其實兩個國家嘅現代化步伐差唔多響1865左右同一時間開始，清帝國叫「洋務運動」，30年後，兩個國家嘅現代化最後變成一場「黃海海戰」去分高下，四個小時嘅驚天大海戰中，最後決定咗彼此嘅命運同去向。

🙃最近有朋友同我傾，割讓香港嘅《南京條約》同埋《北京條約》係由清帝國統治者愛新覺羅家族所簽下，而兩份條約嘅正本，現存於臺灣故宮博物院（不知資料是否有誤請指正），所以朋友唔明點解英國係同中華人民共和國去談判香港前途問題，而最後香港嘅主權係歸於中華人民共和國？要答呢個問題，其實好複雜，會牽涉一大堆國際法，我其實都唔識，但我知道世界上只有一個中國政權係被聯合國正式承認，1972年前係中華民國，1972年後就係中華人民共和國。而所謂中國政權就係清帝國嘅延續體，馬關條約賠款亦喺1911年中華民國成立後繼續繳付畀日本，亦都係相同道理。

🙄1972年，尼克遜訪問中國，同周恩來握手一刻，世界嘅格局從此大變，同一年尼克遜取消金本位，從此以後世界貨幣利用國家信用去backup，其實兩者息息相關。

♎【#大清亡國關慈禧蛋牛治】語音導航！請大家幫手「#訂閱」我條YoutubeChannel！同埋介紹多啲人睇睇！衝上1000訂戶！💪

🍳http://yt1.piee.pw/EVKDE

🍟https://youtu.be/CCuLusKmPb0

【大清亡國關慈禧蛋牛治】https://play.google.com/store/books/details?id=C3hjDwAAQBAJ

【大清亡國關慈禧蛋牛治】實體購買
https://www.382now.com/product?id=87

follow my instagram @historysandwich

Facebook 專頁：https://www.facebook.com/historysandwich/

常公子 2019-1-13 00:03:57

【常威中史】為慈禧平反系列（七十八）

世界踏入二十世紀初期，其實係一個作故仔嘅年代。

因為普羅民眾識字率上昇，油墨印刷技術成熟，閱讀階層人數激增。無論響西方世界定東方世界，民眾開始靠著閱讀報紙刋物書籍小說，增加對時局同世界嘅認識，世界進入真正嘅「媒體主導意識形態時代」。當然，文人多大話，寫出嚟嘅嘢有真亦有假（我常瘋子就係好例子），有政治宣傳成份，同時亦有老作吹水，加鹽加醋。

有歷史學家分析，發生響1914年第一次世界大戰嘅部份成因，亦係媒體同埋小說不斷炒作英法德三國之間嘅仇恨而引發，英國嘅大量廉價小說作家paperback writer為咗爭取讀者同銷量，不斷推出德國要征服大英帝國為主軸嘅戰爭間諜小說作品，民衆睇到上晒腦，自然對德國心生怨恨，結果戰爭一爆發，大量英國民眾主動參軍對付德國人保家衛國，最終被送入戰壕直達西方極樂。

寫得出嚟嘅嘢、講得出嚟嘅嘢就係真？咪玩啦Baby。

響大清國亦有兩個作故大師名滿天下，佢哋就係有為同隊冰超兩師徒，有為畀劉晶調咗去上海辦報，繼續吹水。之後戊戌政變爆發，豆斗反撲劉晶（詳情遲啲再講），維新派人士遭到朝廷搜捕，有為去咗英國大使館要求政治庇護，隊冰超則入咗日本領事館。

有為嘅造假去到乜層次？大家可以睇睇，1898年9月15號，當時慈禧見百日維新變法運動岌岌可危，外國勢力嚴重介入，諗住煞停改革。依個時候，劉晶比咗封密詔楊銳，內容大致係「要想辦法既唔得罪慈禧，又能夠讓變法繼續行落去」之類，9月18號，有為響上海得知密詔內容，其後偽造出另一份密詔，內容係劉晶叫佢設法相救，並要求大英帝國介入，仲加入「圍園殺后」光緒企圖行刺豆斗嘅攞命情節！

過咗幾日，戊戌政變發生。

10月6號，經英國幕後軍情六署間諜李提摩太牧師（Timothy Richard，1845-1919）協助，有為逃亡去咗顛覆基地香港，接受當時英文報紙《德臣報》訪問，就將呢份偽做嘅密詔公佈全世界，攻擊抹黑慈禧太后粉碎百日維新，同一時間抬高自己喺戊戌變法中嘅影響力（你老母你只係一個跑腿呀冚家鏟），有為真係咁都做得出？響北京嘅豆斗睇到份報紙，仲以為江緒真係想謀害自己，激到差啲想殺咗劉晶。直到1909年，楊鋭個仔將密詔原件上交都察院，有為嘅驚天造假行為先至被揭穿。

我好明白有為諗乜，一個考科舉考到30幾歲嘅男人，懷才不遇，做唔成公務員，半生鬱鬱不得志，一有機會，自然不擇手段向上爬，自己高估咗自己嘅角色同埋能力，亦都係一般讀書人嘅通病，洪秀全已經係一個好例子，當然有為冇洪秀全嘅膽色同能力，但有為嘅造假行為，亦足以令佢載入史冊。流芳百世？遺臭萬年？咁就要睇吓大家點睇？但係無論係點，佢都係成功嘅，依一點可以肯定！

#常威 #慈禧太后 #晚清歷史 #戊戌政變 #百日維新 #康有為

【大清亡國關慈禧蛋牛治】https://play.google.com/store/books/details?id=C3hjDwAAQBAJ

【大清亡國關慈禧蛋牛治】實體購買https://www.382now.com/product?id=87

【大清亡國關慈禧蛋牛治】全集，請支持常公子頻道
https://www.youtube.com/playlist?list=PL0RVUAILQUOvTo8JJrayjrvd_Nbjc-0Me

follow my instagram @historysandwich

Facebook 專頁：https://www.facebook.com/historysandwich/

常公子 2019-1-13 00:10:51 【誰搬走了我們的半塊芝士】實體書本星期六1月12見街！全球發售！香港首站！

伊藤かりん 2019-1-13 09:15:08

:^(

常公子 2019-1-13 13:00:29
星期日特別放送【哲學上嘅歧義（唔係奇異）問題】

哲學講求語理清晰，當你講一個概念，人哋都唔知你「指謂」啲乜，或者你「指謂」嘅嘢同人地「指謂」嘅野根本係風馬牛不相及兩樣嘢嘅時候，咁根本大家唔駛講嘢。舉個近年大家好貼身嘅例子説明。

A君話：「我係中國人！」

咁B君問佢：「你係中華人民共和國居民？」

A君：「唔係，我係蔣公中華民國定義下嘅中國人。」

B君：「咁你即係台灣人？」

A君：「唔係，我係香港中國人。」

B君：「如果你係香港人，咁即係中華人民共和國居民，因為香港係中華人民共和國內一個城市。」

A君：「唔係，我主觀上唔承認中華人民共和國共產黨政權，所以我唔係你口中嘅中國人，我係一個居住響香港，中華民國定義下嘅中國人。」

B君：「咁你究竟係咩人？」

A君：「總之，我係中國人。」

上述例子周不時會發生，關於「中國人」嘅定義，其實非常有趣。「中國人」三個字，內含住民族、政治、血源、語言、地域、毛澤東、蔣介石、生活習慣和主觀意愿等種種內容……你口中嘅中國人同其他人口中嘅中國人，可能根本係兩個範疇嘅事物，依個係邏輯學嘅「歧義」問題(Ambiguity)，同一指稱，指稱不同事物或內容，就會造成含混，含混就會令概念不清晰，概念不清晰就會產生謬誤，於是問題就會出現。

所以話，好多哲學問題其實係語言問題，就係咁解。

好多時候，講自己係中國人、或唔承認自己係中國人，衝突就係咁樣發生，交亦係咁樣會嗌，交亦係咁樣會打。下次想穩陣小小，可以叫自己做「地球人」、或者係「生活響銀河系中嘅生物」，相信歧義就冇咁多。

哲學佬話，語言一定要清晰同明確，否則咩都唔好講。分析哲學家維根斯坦(Ludwig Wittgenstein)曾經講過：

「What we cannot speak about we must pass over into silence.」

(我們不能說的東西，必需在沉默中渡過。)

好多嘢唔可以講就唔好講，點解？港女可能會話：「把口生響我度，我鍾意講乜就講乜喇」，冇錯，任何嘢都可以講，但講出來嘅嘢有冇意義係另一回事。維根斯坦講，大概意思想表達「語言其實有其侷限性」，語言作為一種工具，並唔可以描述宇宙間嘅一切事物或其意義和內容。

深？又舉個唔離地既例子：

A君：「你做乜唔開心？」

B君：「我都唔知點解？硬係就唔開心……」

A君：「你可唔可以講出來分享吓？我試吓為你分憂。」

B君：「我真係唔知點講……總之就唔開心喇！」

A君：「你唔講出來，我冇辦法幫你喎。」

B君：「我真係唔知點講呀！而且我都唔想你幫……」

上述情形，相信一般人一定遇過，你有時係A君，亦會係B君。但係好多嘢就係冇辦法去表述，大概就係語言既侷限性。真嘅，有啲嘢真係唔可以講，好似現在香港，就唔可以講「港獨」兩個字，「港獨」就一定要pass over into silence！下次有人同你講「港獨」，你就沉默，或者笑一笑，伸一伸脷，一切盡在不言中。當然，港獨例子係政治問題，係暴力問題，唔係純粹語言同哲學問題。

節錄-【碌葛男人嫁得過】

#碌葛男人嫁得過 #嫁得過系列 #賭Sir #常威 #數學 #哲學 #mathematics #philosophy #生命 #風險管理 #新香港人 #意識形態

線上購閱
https://play.google.com/store/books/details?id=e1N7DwAAQBAJ

常公子 2019-1-14 19:57:09

【常威中史】為慈禧平反系列（七十九）

戊戌政變真相仲神秘過美國50年代羅玆威爾（Roswell）事件，究竟有冇外星人嚟過地球？喂！亞視當年播放解剖外星人嘅片段又係唔X係真？真係冇人知？

政治真係有好多秘密，行刺甘乃迺嘅真相又係乜？戴安娜同佢個埃及裔未婚夫真係死於車禍？如果真係純粹交通意外？點解跟住白金漢宮內有人要自殺嘅？赫魯曉夫當年又點樣比布里茲尼夫逼宮成功？甚至1971年林彪點樣發動政變推翻毛澤東？到依家都係冇人知，嫌遠？近小小，王立軍點解要走入美國大使館？劉慧卿同何俊仁當年入中聯辨同李剛傾過啲乜，亦從來冇人知道。

眾說紛紜下，好多政治神秘事件最後都會有一個官方版本叫你去信，當然官方版本大部分都係假嘅。好似林彪事件，最後就定性為反革命反黨叛變，咁到底點樣反呢？具體嘅政變內容係乜嘢呢？都係冇解嘅，只係知道佢最後要坐架飛機飛去蘇聯，飛機中途響蒙古人民共和國肯特省溫都爾汗撞山解體，最搞笑嘅係，一架飛機喺幾千公尺上空爆炸，中共官方發佈嘅照片裡面，竟然可以見到個樣可以變依稀辨認到、冇粉身碎骨嘅林彪、葉群同林立果遺體？

仲有仲有，更加唔可以唔提嘅係馬航MH370，飛機呢？去咗邊呀？大佬我哋係生活響一個三萬呎高空上人造衛星可以辨認人類身份嘅世界裡面，你同我講搵唔到一架失事飛機嘅殘骸？我真係點相信你好呢？飛機上大部份都係中國公民喎。

但係戊戌政變就連一個官方版本都冇，呢個係大清帝國嘅特色，佢哋係唔鍾意發表官方檔案嘅，一方面係愚民政策，另一方面響一個文盲率達到99%嘅國家，呢啲嘢唔係太重要囉。如果唔係日本人同外國媒體將甲午戰爭發生嘅經過詳盡記錄落嚟，我哋今日根本唔知道當日發生過乜嘢事？戊戌政變，究竟有冇「圍園殺后」件事呢？抑或係有為齋吹水？但係20世紀80年代，又有日本人搵到當年行刺慈禧個殺手畢永年嘅証據喎。又係嗰句，寫出嚟就係真架？冇嘢吖嘛BB？

其實成個戊戌政變嘅過程，有好多事仲係一個謎。

其中康有為嘅參予度同埋佢同皇帝嘅關係，就有幾個唔同嘅版本。有版本認為一切都係有為之後嘅吹水技倆、自抬身價、純粹造假。亦有版本認為康有為一直lead光緒鼻子走，百日維新，根本係康有為作為幕後玩家，主導光緒嘅一場現代化奪權政變。康有為可以重要到有機會成為大清嘅首相，但係亦有人覺得佢只係一條説謊的文棍。因為官方從來冇正式嘅版本公佈，後世人認識百日維新或戊戌政變嘅史料，其實好多都係由康有為，梁啟超及其門人子弟寫出嚟嘅資料。甚至專門研究中國歷史嘅外國專著，好多嘅原始材料都係嚟自有為一方。

但進入互聯網世代後，潮流興拆大台。越嚟越多人鍾意挖出一啲我哋以為係英雄人物嘅臭事。奪命書生孫中山就係其中嘅好例子，康有為嘅驚世騙局，亦一步一步被揭穿。同樣道理，魔鬼慈禧，亦根本唔係嗰回事，整個近代史，要平反嘅嘢，實在太多。

太多太多……愈接近20世紀就更多更多更多，或者呢個亦係歷史本身最有趣嘅地方。

#常威 #慈禧太后 #晚清歷史 #戊戌政變 #百日維新 #康有為

【大清亡國關慈禧蛋牛治】https://play.google.com/store/books/details?id=C3hjDwAAQBAJ

【大清亡國關慈禧蛋牛治】實體購買https://www.382now.com/product?id=87

【大清亡國關慈禧蛋牛治】全集，請支持常公子頻道
https://www.youtube.com/playlist?list=PL0RVUAILQUOvTo8JJrayjrvd_Nbjc-0Me

follow my instagram @historysandwich

Facebook 專頁：https://www.facebook.com/historysandwich/

殊途同歸於盡 2019-1-15 07:56:40

:^(

:^(

:^(

常公子 2019-1-15 10:57:41 【大清亡國關 #遼東半島 蛋牛治】

😚今日同大家講吓日本，現代日本。日本係香港人最鍾意去嘅地方，有唔少香港人視日本為家鄉，當然要成為一個日本人好難，大和民族有高度嘅排外性，佢哋亦都充分瞭解，如果大規模接納外來移民（尤其是中國人），日本呢個國家好快唔存在。日本當前遇到嘅問題，係人口急劇減少，新一代普遍唔願意生育，甚至去到唔願意結婚唔願意拍拖，其實都好大件事。因為唔繁殖，係違反人類嘅生物天性。未來二三十年嘅日本，將會係一個超級老人國家，我相信國策上，佢哋一定要吸納外國移民以增加本地人口，我知道佢哋好唔想咁做，但一定要咁做。

🙃中國人口龐大，係中國發展最大嘅劣勢，同時亦都係最大嘅優勢，生物學上，物競天擇，數量多永遠有優勢存在。如果用呢個講法去分析，共產主義反而更符合生物學定義上嘅人性，因為喺共產（社會）主義世界，因為資源分佈比較平均同計劃經濟，人口數目好容易會上昇。相反喺高度資本主義世界，先進工業社會，人口下跌亦係一種常態。

🙄當然現今地球，人類數目已經太多，多到地球不能夠承受，人口減少應該係正面嘅事，如果咁樣講，日本又有優勢喎。

😄咁究竟係有優勢？抑或劣勢？好亂呀…………

♎【#大清亡國關慈禧蛋牛治】語音導航！請大家幫手「#訂閱」我條YoutubeChannel！同埋介紹多啲人睇睇！衝上1000訂戶！💪

🍳https://user35103.pics.ee/EES3E

🍔https://youtu.be/o56_g2T3zvo

【大清亡國關慈禧蛋牛治】https://play.google.com/store/books/details?id=C3hjDwAAQBAJ

【大清亡國關慈禧蛋牛治】實體購買
https://www.382now.com/product?id=87

follow my instagram @historysandwich

Facebook 專頁：https://www.facebook.com/historysandwich/

常公子 2019-1-15 23:19:33

【常威中史】為慈禧平反系列（八十）

80回了…………滾動！多謝大家支持厲鬼寫歷史！

故事係咁樣開始嘅，1898年6月11日劉晶頒發《明定國是詔》開始戊戌變法，到9月14號深夜發生政變結束，史稱「百日維新」！

戊戌變法，後世人認為係新思想（新黨）同舊思想（舊黨）嘅鬥爭，又係嗰種呃細路嘅正邪二分法。其實內裡係劉晶同豆斗嘅權力鬥爭，亦係滿人同漢人之間嘅鬥爭，係南方同北方嘅終極對決，錯綜複雜縱橫交錯，絕對唔係非黑即白，更加唔係丹布朗嘅天使與魔鬼，加上之後仲有康有為集團響大英帝國同日本人控制下嘅一連串造假論述，更加令單嘢複雜化。

當時嘅清朝打輸甲午戰爭，李鴻章落馬，恭親王同軍機重臣李鴻藻瓜埋，加埋契弟翁被炒魷，權力中心呈現真空狀態，大家都知道爭產就係好時機。中國人就係鍾意鬥鍾意爭權，外國勢力乘機插手，民生嘅嘢，一向唔係政治嘅考慮範圍。

至於戊戌變法嘅具體內容，如下：

政治方面一句講曬就係裁員，精簡架構提高效率，大量辭去多餘職位，以及提拔新人上位。至於具體嘅政治體制改革，例如佈署君主立憲，其實係冇講過嘅。有為之後加上去嘅嘢，全部係吹水。

最受人爭議嘅係教育方面，戊戌變法廢除八股取士，考試唔再考八股文，一律改考策論。籌辦京師大學堂同醫學院，彷效西方學制，於全國設立中小學校，教學內容大量加入西學，傳統卜卜齋專教儒家哲學嘅私墊從業員被一舗打殘，而且鼓勵官紳辦報，開放言論自由之路。

經濟方面包括興辦鐵路，翻譯西方技術書籍，認真講求工藝製作，鼓勵發明創造，而且第一次提出「專利權」概念，鼓勵私人資金創辦企業，亦開始模仿西方編制政府財政預算案。其實以上嘅嘢響戊戌變法之前，慈禧一手推動嘅洋務運動一路做緊，成個清國亦一步一步邁向緊現代化，只不過一場甲午戰爭將所有嘢推倒重來。

上述三項就係戊戌變法嘅主要內容，其他措施包括整頓北京市容，派出大臣去外國考察，改良傳統司法制度貼近西方，以及命令各省保護外國教士及清國教民，防止宗教衝突（教案）再次發生，提高國家文明形象（又有邊個估到年零後整單義和拳排外暴動事件？）。

有一派人覺得上述嘅維新政策都係康有為一個人提出，一定係錯啦。因為除咗大刀闊斧廢除八股文改革教育制度之外，其餘嘅事都係炒舊餸，豆斗當政嘅時候其實一路講緊do緊。所謂維新，只不過係將啲嘢再鳩講多次。但係百幾年前嘅中國同今日一樣，中央有中央講，地方有地方做，中央講嘅嘢，地方政府不一定要執行，而且執行上亦可以五折執行，甚至一折執行都得，甚至唔執行李亦都吹我唔漲。戊戌變法期間，除咗北京天津、同一路對中央政府忠心耿耿曾國藩李鴻章代表嘅軍事大省湖南認真對待之外（毛澤東同劉少奇就係湖南人，當時就以學生嘅身份接受新思維）。其他省份都係採取「聽咗就算」嘅積極態度。所謂維新其實從來冇維新過。

山高皇帝遠，地方政府嘅陽奉陰違，亦係中國官員嘅傳統政治智慧。今時今日中央政府盤滿缽滿，地方政府債台高築亦可以反映出當中嘅關鍵。要知道，地方政府唔可以比中央管得太緊，否則邊有位上下其手？借返嚟嘅錢自己偷咗移民美加，債項留番畀地方政府，最後想中央政府同你埋單？大家係咪發緊夢呀？

下次carry on……

#常威 #慈禧太后 #晚清歷史 #戊戌政變 #百日維新

【大清亡國關慈禧蛋牛治】https://play.google.com/store/books/details?id=C3hjDwAAQBAJ

【大清亡國關慈禧蛋牛治】實體購買https://www.382now.com/product?id=87

【大清亡國關慈禧蛋牛治】全集，請支持常公子頻道
https://www.youtube.com/playlist?list=PL0RVUAILQUOvTo8JJrayjrvd_Nbjc-0Me

follow my instagram @historysandwich

Facebook 專頁：https://www.facebook.com/historysandwich/

伊藤かりん 2019-1-16 00:09:55 其實會講到邊？
慈禧瓜柴？定清亡？

澤尻英龍華 2019-1-16 00:16:21

:^(

常公子 2019-1-16 10:44:31 沒完沒了

常公子 2019-1-16 10:44:41

:^(

:^(

:^(

常公子 2019-1-16 21:34:51

【常威中史】為慈禧平反系列（八十一）

好多人有一個錯誤嘅感覺，覺得劉晶一生一世都係豆斗嘅扯線公仔。上述嘅講法基本上冇錯，豆斗係劉晶嘅大姨媽，大家都知道大姨媽有好大威力，大姨媽到，就算你幾強壯都要請假。但自從豆斗1889年退休之後，佢真係將權力交畀劉晶，自己搬去頤和園遠離紫禁城權力核心唸佛睇戲。之前我講過，豆斗有時候仲會睇奏摺，但只睇heading，略知大概就算，佢只係保留一項權力，就係決定重要官員（例如李鴻章級數）嘅昇降同去留。

打甲午戰爭時，豆斗基本上唔知道戰況嘅具體發展，劉晶同李鴻章多次向佢隱瞞軍情，之後大清徹底地仆街，佢先逼不得已出返嚟震住個局面，講真真係唔似想同劉晶爭權，而且1898年時，豆斗已經63歲，聞到棺材香，爭嚟托？相反，豆斗復出，最唔開心嘅係27歲嘅劉晶，好多屎尿（史料）都講畀我哋知，劉晶嗰幾年好唔開心。呢種廢青，能力有限，讀書唔成，但偏偏又想改變世界大展拳腳。唔畀你玩你就搞事掟磚，畀你玩又玩到一Pad屎，老人家出嚟幫佢收拾殘局，佢就話人老屎忽霸住個位。呢啲事大家都見唔少囉（忽然變咗愛港力上身）。

戊戌變法初期，豆斗劉晶合作順利，頭果60日，可以話係佢哋嘅蜜月期，朝廷嘅變法意志全國上下都感受得到，當然做唔做係另一回事。

其實喺呢段時間，反對嘅聲音已經開始出現。裁減官員，精簡架構，改革教育。表面好好聽，但另一面就係大量人失業。呢個世界上有兩樣嘢千祈唔好做，第一樣係著紅鞋勾二嫂；第二樣係打爛人哋飯碗，青幫規條三刀六洞嘢！變法繼續行落去，好多老屎忽官員同八股文舊式教育工作者都預計到自己即將乞食。北京城內，既得利益者食長糧者收租佬加滿蒙貴族聯埋一線，反對一系列冒進嘅改革措施，呢啲就係守舊派，就係所謂「舊黨」，後世人成日將呢種人講成反面教材，其實佢哋都係為咗想保住個飯兜啫？港豬話齋搵食大曬，邊有話啱定錯？相反所謂一班「新黨」，急於改革，藥石亂投，完全冇理過人哋感受嘅，呢班人又可以被稱呼為正義嗎？

舊未必係錯嘅，新亦未必啱曬，世界冇所謂非黑即白。大部份人為咗搵食供樓都係遊走於灰色地帶之間，要明白呢個道理相信要40歲後……孔子話「四十而不惑，五十知天命」，我就話「四十而知灰，五十要認命」。

或者開頭變法進行順利，劉晶條廢青開始鬆毛鬆翼，組織自己班底，任用大批新派官員佔據朝廷有利位置，呢班人即係後來講嘅所謂「新黨」，問心嗰句，劉晶咁樣做真係為咗改革？真係想為廣大人民謀幸福？咁樣諗，就將佢諗得太高鳥。佢組織自己嘅班底，無非都係想同大姨媽奪權。如果劉晶冇搞搞震，變法真係可以行落去，或者過多幾年，搞埋君主立憲都仲得。但係劉晶同林彪一樣，冇辦法等多幾年，等最高領導人過身，個世界咪係你咯囉。林彪仲情有可原，因為佢自己年紀大身體又好差（傳說有鋪煙癮），分分鐘仲早死過仲響花叢中游走嘅毛澤東。但係劉晶當年只係27歲，要同一個63歲嘅女人鬥長命，我諗佢嘅勝算都幾高。佢連依點都諗唔明白，我差不多可以肯定講一句，佢係：

低B嘅！

劉晶點樣玩嘢？佢側邊D屎忽鬼點送佢上路？下次繼續。


#常威 #慈禧太后 #晚清歷史 #戊戌政變 #百日維新 #光緒

【大清亡國關慈禧蛋牛治】https://play.google.com/store/books/details?id=C3hjDwAAQBAJ

【大清亡國關慈禧蛋牛治】實體購買https://www.382now.com/product?id=87

【大清亡國關慈禧蛋牛治】全集，請支持常公子頻道
https://www.youtube.com/playlist?list=PL0RVUAILQUOvTo8JJrayjrvd_Nbjc-0Me

follow my instagram @historysandwich

Facebook 專頁：https://www.facebook.com/historysandwich/

常公子 2019-1-17 11:44:13 【大清亡國關 #勸降書 蛋牛治】

🐷今集我講由日本海軍大將伊東佑亨寫畀丁汝昌嘅一封勸降書，由日本人嘅眼光去睇下當時大清嘅弊病。一句到尾，伊東就係覺得清帝國已經落後於世界大潮流，再唔作出改革，一定亡國。人類係非常之有智慧嘅生物，我哋好多時候都知道結局係點，但係我哋好多時候又做唔到啲乜嘢去改寫個結局，百幾年前如是，今日都如是。

🐷今日人類面對最大嘅問題，一定係環境污染。發達工業同科技將我哋帶到一個舒適無比嘅新世代，但係凡事冇免費午餐，人類必須付出極大代價去得到今天嘅享受。未來世界，資源會極度缺乏，生態環境會日漸惡化，呢啲事大家都一清二楚。但係要去改變，就似乎冇一個人有能力可以做到。

🐷對於保護環境問題，目前人類仍然停留喺玩game嘅階段，統治階層教我哋，用少個膠袋用少支飲管就可以挽救地球，但係單就塑膠污染海洋而言，我哋面對最大嘅敵人唔係膠袋亦唔係膠飲管，而係會浮、會佔用更大空間嘅膠樽，但係販賣式飲料，係一個龐大嘅工業貿易。你叫我用少個膠袋唔好同人攞飲管，不如你先禁止咗用膠樽先啦。

🐷早兩日去麥當勞，佢冇畀支飲管我，嗰一刻我好嬲。我問自己，我哋全人類究竟做緊啲乜嘢？如果你以為用少一支膠飲管，個地球就有得救，我就更嬲，人類嘅智慧幾時低到咁樣🐽？個世界的確好有問題。

♎【#大清亡國關慈禧蛋牛治】語音導航！請大家幫手「#訂閱」我條YoutubeChannel！同埋介紹多啲人睇睇！衝上1000訂戶！💪

🍳https://user35103.pics.ee/DY8YK

🍳https://youtu.be/1kK9_S5ORbo

【大清亡國關慈禧蛋牛治】https://play.google.com/store/books/details?id=C3hjDwAAQBAJ

【大清亡國關慈禧蛋牛治】實體購買
https://www.382now.com/product?id=87

follow my instagram @historysandwich

Facebook 專頁：https://www.facebook.com/historysandwich/