最後一位亦係最重要嘅一位，佢叫古德諾（Goodnow Frank Johnson，1859-1939），佢係一位國際知名嘅法律專家，1906-07年擔任哥倫比亞大學政治學院代理院長，袁世凱身邊嘅重要人物，例如唐昭儀同顧維鈞都係佢嘅門生，可能就係呢條「黑」線，1913年，古德諾佢離開美國，來到呢個野蠻落後嘅國家加入袁世凱幕府，以佢嘅學歷、聲望同資歷，加埋張綠卡，當然成為袁世凱身過最具權威性嘅法律代表人物。
從此以後亦一帆風順，1903年被保薦入京參加新開嘅「經濟特科」進士考試，取得第二名，第一名係梁士詒。以為飛黃騰達有官做之際，點知言論過火，被扣上革命黨帽子，得罪朝廷被通緝，所以只有又返番湖南。第二年又飛去日本再留學，認識埋梁啟超，成為朋友。1904年入讀日本法政大學速成科（not a degree），集中研究各國憲政制度，同大漢奸汪精衛係同學，響東京楊度亦都認識孫文。睇到呢度，你會發現，其實當時知識分子功能組別個世界都幾細，人來人往，湖南東京兩邊飛，大家都相識，有啲人會成為朋友，有啲人會成為敵人。當時中國有四億人，只有依班身處頂尖頂裡嘅知識分子，有權左右大局。
【常威近代史】（二百六十八回）
袁世凱平反系列
香港人加油！
你的班底是什麼，決定你是什麼。你睇林鄭月娥嗰垃圾班底，甩皮甩骨，地中海陳帆，應聲蟲楊潤雄，安樂老闆娘鄭若嬅，加理個囤地波做財爺，最似樣會講小小人話個張建宗就快七張嘢，結果成班蛋散搞到一鑊泡。當然又唔可以怪曬佢哋，只係全部無自由意志嘅扯線公仔一堆。不過財神揾陳茂波做，就真係睇出一件事：蜀中無大將。現今香港人成日懷念上任財爺二撇雞曾俊華，五十步笑百步，曾生嘅一嘢「快餐車」振興香港經濟計畫，就已經知道呢條友係乜嘢料子，扮民主自由閪，得啖笑。
袁世凱北洋系統嘅財政司究竟係邊個呢？同袁生做大掌櫃嘅人有兩個，分別叫周學熙（1866-1947）同梁士詒（1869-1933），兩個都係猛人。周學熙係安徽人、官宦子弟太子黨，老豆係頂頂大名嘅周馥（1837-1921），周馥係李鴻章首席文膽，鎮壓太平天國暴徒有功，經李鴻章提拔，官運亨通，最後撈到兩江、兩廣總督做封疆大吏，周學熙係佢個仔，自然打跛雙腳都唔使憂，二十歲仔，老豆就捐個大官佢做，做有錢人嘅好處就係，可以行少好多冤枉路。
不過佢雖然係太子黨，但並唔係冇料到，亦唔係一個仆街仔。
周學熙1894年中舉人（進士就考唔X到），1900年為山東候補道員（官職後補生），於是加入袁世凱幕府，隨後跟隨袁世凱去天津發展，主理袁生身邊經濟事務，高速上位。大清迴光反照時期天津現代化重要推手，創辦過不少實業，當中天津造幣廠建成，亦係中國開展貨幣統一概念嘅重要里程碑，周學熙亦係中國自來水之父，1910年任京師自來水公司總理，正式向北京城開始供應自來水。
辛亥革命之後，1912年出任中華民國北京政府陸徵祥內閣財政總長，主持過北洋政府向五國銀行團嘅「善後大借款」工作，與一衆國際金融大鱷周旋，仍勉強保得住袁世凱中央政府財務獨立，都算係豐功偉績。1915年，行洪憲帝制，周生唔buy老闆稱帝，藉口有病退場，就算袁世凱再三挽留都係要走，表達出當時做官仲有某程度自主性，你試吓今日林鄭月娥中央政府叫佢行左佢唔敢行右呀。1916年復出，履任第一次徐世昌內閣財政總長。多年以嚟，為袁世凱處理財務，擔屎唔偷食，深得袁生信任，周財神作風穩打穩扎，有「中華第一理財家」嘅稱號。當然，袁生中央政府財政亦不是什麼好材料，副牌實在太爛，比個超人打，都係冇糊食就係真嘅。
1916年大班周脫離政界，安享晚年到1947年80歲先響北京死，等唔到共產黨入城招呼佢跪玻璃。
第二號財神梁士詒係廣東三水人，廣東佬，當然冇周生咁馨香，氣質上亦無周學熙正氣。籍貫問題，一直喺中國政治發揮著非常重要嘅影響因素，同鄉兄弟，同聲同氣，當然有計傾。如果你覺得好X老土，你就大錯特錯。藉貫問題亦即係身份認同，今時今日，香港人強調要香港人當家作主，大陸人過注，有鄉音過注，其實又係藉貫嘅問題！
梁士詒老豆都係進士出身，書香世代，年少時同梁啟超係同學，1894年上京考試中進士，授翰林院庶吉士，兩榜正途出身，之後跟隨唐紹儀做事，事業蒸蒸日上，1905年唐紹儀出任滬寧鐵路大臣，梁士詒亦進入交通部門工作，之後成為交通系重要領袖人物。有傳聞講，滿清覆滅前，梁士詒響交通部搞獨立王國，條數唔使畀中央睇，於是乎佢同袁世凱互相勾結，每月為袁世凱北洋系統注入大量資金，係袁世凱係晚清時候北洋系統壯大嘅最主要財政來源。
梁士詒由晚清到民國，一直執掌交通財務大權，時人叫佢做交通系龍頭大佬，辛亥革命之後，佢全力支持袁世凱，好多重要嘅政治事件，例如孫文讓出臨時大總統予袁世凱；以及之後五大巨頭北京會面，都係由梁士詒一手安排策動，佢最後做到總統府秘書長，位高權重，掌握所有國家秘密，當時人叫過佢做「二總統」，認真巴閉。
對於洪憲帝制，梁士詒起初採取觀望態度，後嚟成為推動帝制嘅主要中堅，帝制失敗，佢自然要承受政治後果，佢唔係水晶狐狸徐世昌，好少人可以似徐生咁百毒不侵。佢去香港退隱咗一段時間，飲酒跳舞，優哉遊哉。之後重出江湖，繼續響每個北洋軍閥政府中呼風喚雨，畢竟係有錢人、交通銀行大佬，唔會咁易死得去，佢嘅政治生涯，直至去到蔣介石1926年北伐，先至結束。睇嚟佢好明白，蔣介石先係真真正正嘅黨國合一冷血獨裁者，為咗保命梁生宣佈收皮，將財產全部帶住香港，要用大英法律保護錢罌，1933年病死於香港。
寫到呢度，我自己有一個好大嘅疑問，原來當年洪憲帝制袁世凱要做皇帝，原來佢身邊好多幕僚、唔小文官武將都係唔百分百支持佢，我絕對唔明白袁世凱點解會有稱帝嘅決定？因為睇返歷史，佢唔係習近平，唔係一個真正嘅獨裁者。佢嘅政治成功，其實係一個團隊嘅成功。既然身邊咁多人唔想佢做皇帝，點解佢要一意孤行？到底中間發生咗乜嘢事？袁世凱一生人，就係因為成為中國最後一個皇帝而遺臭萬年，如果冇洪憲帝制呢件事，我諗歷史對佢有另一番評價。
稱帝背後，到底仲有乜嘢人喺度作用呢？我哋下次繼續。
【常威近代史】第三部《東方維多利亞女王之死》
https://play.google.com/store/books/details?id=GaGrDwAAQBAJ
【常威近代史】第二部《中國一百年前第一次開放改革》
https://play.google.com/store/books/details?id=_6KMDwAAQBAJ
【常威近代史】第一部《大清亡國關慈禧蛋牛治》
https://play.google.com/store/books/details?id=C3hjDwAAQBAJ
【常威近代史】第一部《大清亡國關慈禧蛋牛治》實體購買
https://www.382now.com/product?id=87
【常威近代史】第二部《中國一百年前的第一次改革開放》實體購買
https://www.382now.com/product?id=151
【常威近代史】第三部《東方維多利亞女王之死》實體購買
https://www.382now.com/product?id=165