當時管理租界嘅行政機搆,叫上海公共租界工部局(Shanghai Municipal Council,簡稱SMC),起初SMC祇不過係租界納稅人會議嘅執行機構,但它逐漸擴大權限,最後取得租界行政管理嘅具體權力,其中包括向租界內中外居民徵稅同埋維持治安嘅警察權力,順帶一提,工部局唔可以徵收「土地稅」同「關稅」,因為土地仍然屬於中國,依兩項稅款要由中國自己徵收番,但除此以外,SMC差唔多完全話曬事,我哋睇CCTVB民初劇,租界內嘅「巡捕房」,即差館警局,就係由SMC直接管轄(唔關中國政府事)。
1914年6月28號,塞爾維亞學生 #普林西普(Gavrilo Princip)響波士尼亞首府薩拉熱窩,開槍打死奧匈帝國皇儲 #費迪南大公 (Franz Ferdinand von Österreich-Este,1863-1914)。觸發 #第一次世界大戰,呢單槍殺案疑點重重,有興趣嘅朋友可以深究,你絕對發現會係大陰謀。其實火藥庫已經擺滿火藥好耐,只係等邊個點打火機啫。
【常威近代史】(二百五十六回)
袁世凱平反系列
由開始進入中華民國歷史,我採用咗「編年史」嘅手法寫作,因爲我發現大部份人對歷史嘅錯誤理解同混亂,好多時候都係嚟自時間線嘅錯亂,普遍犯嘅毛病係走得太快,缺乏對中間細節嘅理解,因此造成錯誤判斷。
用1911年辛亥革命後袁世凱為例子,喺普羅印象裡面,係袁電筒一手粉碎共和,稱帝洪憲(1916年1月1月至3月22日),斷送中華民國民主自由法統之路,好多人根本冇理會到1911年到1916年依四年之間裡面發生嘅事。某程度上,袁世凱要走上鐵踠獨裁之路,係被客觀環境所迫。如果佢一心稱帝,1911年都可以,或者1902年已經可以,佢根本無需要同革命黨玩法統,但後世人用「袁世凱想做皇帝」鬧足佢一百年,其實對佢非常唔公平,亦都係一種「歷史跳格」所造成的錯誤解讀。
歷史需要細讀,需要理解小事件去睇大局,尤其是係事件發生嘅先後次序,因為歷史本身就係由無數小事件所構成嘅一條大時間線。唔好叉太遠講歷史哲學嘞。去返編年史1914年,上次講到袁世凱做實事,嘗試統一幣制,並研究將儒教列成國教,唔知道袁世凱如果成功做到,配合帝制立憲,中國係咪會有一番「華夏文明」復興新氣象呢?但我哋已經冇可能知道。因為袁世凱死後,軍閥時代玩軍統主義;蔣介石時代玩蘇维埃式黨國合一獨裁;去到毛澤東時代,更加唔使講嘢,直接玩馬克思主義共產主義極權主義。所謂華夏文化儒教文明一早已經被一衆獨裁者拋諸腦後,講真,近代史上儒教最後一個承繼者,應該係袁世凱!
另外,北京政府內務部,亦舉行首屆「縣知事」考試,其時袁世凱已經解散各省地區議會,新任地方行政長官希望透過公平考試制度產生,不過投考門檻相當高,需要有實際做官工作經驗三年以上,並且要響國內外大學或專門學校學習法律、政治、經濟學三年以上者,先有資格參加考核。其實袁世凱冇錯,招聘政府重要官員當然要有高學歷,中華人民共和國今日嘅田地,處處造假貪污,其實就係由一群文革期間上位冇學歷牛屎佬中層幹部一手搞成。
袁世凱亦同時希望解決北京一帶旗人(滿人)嘅生計問題,改朝換代後,依群大食懶富九代地主階級,一方面財產已經被新政權用不同方法掏空及搶掠,另一方面佢哋真係冇任何謀生能力(食大煙玩女人聚賭鬥蟋蟀並非謀生技能),所以袁世凱打算將佢哋移居返祖家東三省各地開墾做開荒牛,老實講其實即係要趕走低端人口啫,但自力更新啲咁撚hard嘅嘢,梗係冇可能實現啦!呢班旗人,要等多十零年,先可以堂堂正正回歸東三省,堂堂正正做「偽滿州國」嘅日本皇民。
你個勢弱成咁,外國勢力當然會放過你。之前袁世凱中央政府已經承認咗外蒙古半獨立自治狀態。西藏問題上,大英帝國再出手,1914年3月24號,英國政府代表麥克馬洪同西藏政府代表喺印度德里以秘密換文方式,擅自劃定中印邊界線,即所謂麥克馬洪線(McMahon Line),將西藏嘅門隅、洛渝及下察隅地區約90000平方公里領土劃入印度版圖,亦即大英帝國手上。中華民國政府當然唔承認麥克馬洪線,呢個亦都係種下中印邊界紛爭嘅歷史遠因。
人生於世上有幾多個知己?友誼萬歲,大英帝國固然係我哋中國人嘅好朋友,但法國人都係,4月,為咗順利接手陳世美離開後嘅大錢罌上海,中央政府特派員與法國駐上海總領事喺上海簽訂《上海法租界推廣條約》,上海法租界面積劇增20倍。於是乎,大名鼎鼎嘅「法租界」,就成為咗中國民初劇上海灘一個不可缺少嘅舞臺。
仲有一樣嘢想提,曾經被袁世凱任命為國務總理,中國警察之父趙秉鈞(1859-1914),其後因為宋教仁遇刺案,被輿論評擊,被迫辭職(吓?原來官員被輿論評擊可以被逼辭職?呢啲野蠻行為真係發生喺古代民國先有,現今文明法治社會香港絕對不會發生),佢之後調任直隸都督,於1914年2月26號,被發現被人下毒暗殺,七孔流血暴斃,死時50歲咋。嚟到呢度,所有同宋教仁案有關嘅證人兇手全部死9曬,(另一要犯應夔丞於1913年11月9號喺京津線火車上被行刺),當然所有血案全部入曬袁世凱數,而袁世凱成為行刺宋教仁元兇,再冇人有異議,至此亦變成唯一歷史事實。
#常威 #斷送共和關袁世凱蛋牛治 #袁世凱 #民國歷史
【常威近代史】第二部《中國一百年前第一次開放改革》
https://play.google.com/store/books/details?id=_6KMDwAAQBAJ
【常威近代史】第一部《大清亡國關慈禧蛋牛治》
https://play.google.com/store/books/details?id=C3hjDwAAQBAJ
【常威近代史】第一部《大清亡國關慈禧蛋牛治》實體購買
https://www.382now.com/product?id=87
【常威近代史】第二部《中國一百年前的第一次改革開放》實體購買
https://www.382now.com/product?id=151