常公子 2019-8-23 12:56:50

【七不思議：歸來借宿】實體版本周上架
https://bit.ly/2HimOr9

【七不思議：歸來借宿】電子書現已上架
https://bit.ly/2HaPWAv

*available on android and ios

常公子 2019-8-24 18:08:55

【常威近代史】（二百三十三回）
袁世凱平反系列

1912年草創嘅中華民國，係一個政治不穩定、啱啱開始工業化嘅第三世界發展中國家，國內文盲人口仍然超過九成，大部份人居住鄉村，從事低水平低效率嘅農業生產。情況同今日嘅非洲好相似，國內嘅先進工業生產，超過一半以上由外資控制。

由18世紀開始，中國主要嘅出口產品係絲綢同茶葉，去到20世紀初，絲綢茶葉兩者嘅出口數字，仍然占整體出口嘅一半以上（註一）。1902年慈禧新政創立後，帶動國內工業化，出口產品亦開始多樣化，除咗絲同茶，新嘅主要出口貨係大豆及其製品。

其中最重要，大豆主要生產於滿洲地區，中國亦向日本出口大量鐵礦石同埋煤炭，仲有日本人喺中國嘅紗廠生產嘅錦紗，日本帝國係一個嚴重缺乏天然資源嘅島國，佢哋國力同經濟嘅巨大崛起，一定需要有一間大工廠同無數廉價勞工喺背後backup，而中國嘅東三省同埋滿州地區，正正就係日本嘅生存命脈所在。明白這一點，你就會明白日本點解長期插手中國事務，點解要資助孫文同黃興搞革命？你亦會明白（偽）滿洲國點解會建立？你亦會明白之後中日戰爭點解會發生？

馬克思講，政治就係經濟，經濟就係政治本身。

當時日本同中華民國嘅關係，就係日本當X咗中國嘅東三省係一間附屬大工廠，幫佢哋生產所需商品同坐大國力。到咗今時今日，情況都係一樣。美國點解要發動貿易戰？並唔係純粹貿易逆差嘅問題，貿易逆差，用美元資助中國發展，已經係1989年64事件後，老布殊總統（喬治布殊老豆）率先打破國際禁制中國所制定嘅基本國策（註二）。之後，中國成為咗美國嘅大工廠，生產美國人所需要嘅低端產品，記住，只係低端產品，其實大家互惠互利。

情況改變，一來係中國（或中共）變得越嚟越有錢，到處收購美元資產。最重要嘅係，中國開始生產高科技產品，美國只需要你生產低端產品，因為高端產品係由美國專利製造，而今日中國開始掌握「技術」同「科技」。呢個係美國唔願意發生嘅事情，你老母你做就做鞋，學乜撚嘢人做5G手機？全世界人用嘅手機，只可以食我個蘋果，同埋玩我附庸國南韓生產條三叔。小米華為，no way啊。

我上述講嘅嘢有冇依據？單就智能手機市場而言，你睇吓，以日本作為世上第三大經濟體系強大嘅科技技術力量，都唔可以創造一個手機品牌加入國際市場一齊玩，你就知道其實成個局係美國人背後完全操縱。我常公子以前都唔明，但年紀大咗，真係好清楚。智能手機係目前主宰天下嘅絕世武器，點解南韓三叔可以做到？日本唔可以做到？原因就係，日本同南韓都係美國嘅附庸國，大家要收老細order做嘢，捧起南韓，亦有抑壓日本嘅作用。

大家又記唔記得，幾年前當你三叔條J玩到夠大，超越apple嘅時候，就整單碌七爆炸你嘆吓。最後蝴蝶效應，搞到三叔總裁同南韓總統朴槿惠要坐監你就知道，一切都唔係表面咁簡單。

今日發神經，越扯越遠，仲有一單屎料要同大家補充。中華人民共和國嘅崛起，有一個好重要嘅因素，叫大慶油田。中國一直冇石油生產，工業當然唔能夠起飛。但係1949年中共建國以後，有一個傳說，就係中國有一個地方有豐富嘅石油資源，美國人千方百計想知道呢件事係真係假，佢哋國內反動嘅麥卡錫主義者甚至認為中國響度吹水，但中國就一直隱藏大慶油田嘅秘密，有傳說話，當時西方世界嘅中國地圖，係冇「大慶」呢笪地方，直至1960年，中國順利響大慶開採石油，年產量達到4000-5000萬噸，仲係世界十大油田之一，美國人同全世界先嚇一跳。

中國能夠生產石油，亦都係中國完全脫離蘇聯制肘、真正自力更生嘅最重要原因，大慶油田響邊？喺黑龍江省，即係東三省，亦即係滿洲地區，亦即係之前滿洲國內。點解所有嘢都咁巧合嘅？我大膽去推測，20世紀初期，好有可能響東三省經營多年嘅日本人一早已經知道咗呢個驚世秘密，所以全力support溥儀建立滿洲國，不惜一切死咬住東三省唔肯放，甚至同你蔣介石發動戰爭亦都在所不惜。

我讀馬克思主義，最重要讀到一樣嘢，就係講政治唔能夠唔講經濟，唔講生產。純粹嘅政治表述，有時候同鳩噏完全冇分別。

註一：費正清編，《劍橋中華民國史1912-1949上冊》，北京，中國社會科學出版社，P145。

註二：1989年六四事件發生後，全世界杯葛中國，向中國實施貿易禁運同經濟制裁，但同年9月先行打破禁令，卻係美國總統老布殊。由於美國決定唔再制裁中國，於是全世界跟隨。

#常威 #斷送共和關袁世凱蛋牛治  #袁世凱 #民國歷史

【常威近代史】第二部《中國一百年前的第一次改革開放》電子書
https://play.google.com/store/books/details?id=_6KMDwAAQBAJ

【常威近代史】第一部《大清亡國關慈禧蛋牛治》電子書
https://play.google.com/store/books/details?id=C3hjDwAAQBAJ

【常威近代史】第一部《大清亡國關慈禧蛋牛治》實體購買
https://www.382now.com/product?id=87




【常威近代史】第二部《中國一百年前的第一次改革開放》實體書正式上架！

常公子 2019-8-25 11:04:06 【❤香港關 #中英聯合聲明 腿蛋治 第五回】

♒香港政治發展史，最重要嘅一件事係發生係1967年既「六七暴動」。延綿接近半年嘅暴動，波及到社會唔同嘅階層，每一個香港市民都受到唔同程度影響同衝擊。六七暴動由一場發生於觀塘膠花廠勞資糾紛開始，起初冇人會諗到事件會一發不可收拾。

♋六七暴動，左派人仕又稱呼為「反英抗暴運動」，主要針對港英殖民地政府戴麟趾港督嘅高壓統治，暴動主要參與者，都係擁護中華人民共和國、擁有左派背景嘅「左仔」，策動連番暴動嘅組織，係背後有中共資金支持及直接指揮嘅香港工會聯合會，簡稱「工聯會」。背後嘅意識形態，係共產主義反對資本主義，係普羅大眾工人階級反對資本家對工人嘅長期剝削。

♐我經常抱住一個論點，就係今個夏天（2019）發生喺香港嘅事情，其實同1967年非常相似，當然歷史條件、物質條件同意識形態條件已經完全唔同，但係市民上街，甚至暴力衝擊政府統治階層，其實內裡就係對日常生活嘅極端不滿。無法否認，香港嘅經濟風光，由60年代一直延綿至90年代中期，30年風光如畫，其實響1997年之後，經過一場亞洲金融風暴已經從高峰滑落。加上2003年一場沙士，更加暴露咗香港經濟嘅脆弱性。

♈當時挽救香港經濟嘅方法，係開放自由行同內地資金到港，之後十年，香港經濟產業模式大轉型，簡單啲講，香港由一個外向性國際化嘅經貿模式，變成單一產業化服務內地資金湧港嘅畸型經濟結構，內地資金全面取代香港本地資金同外資，商家全面服侍大陸，忽視香港本土市場。當然商家嘅做法無話啱定錯，資本主義從來就冇道德可言，況且風擺邊邊向邊邊，邊度有錢搵去邊度，亦都係香港一直落嚟嘅成功之道，「靈活變通」就係咁嘅意思，香港人最叻就精面，永遠想左手交右手，低買高沽，從中取利，亦係我哋嘅本性。

♐但係，世事嘅嘢，就係有咁耐風流有咁耐折墮，凡事都係雙面刃，加上炒賣風氣從來未停止，大家非常樂意大量製造泡沫，但求表面好睇，不理會內裡腐化枯朽。普羅階級嘅人工，畀通脹同樓價遠遠拋離，生活水準急速下降，用連登這一句說話最啱：「千幾二千一晚酒店、成百蚊一個餐、牛雜都50蚊碗」（加一句，60蚊一包煙），就係大家面對嘅實際生活問題。

♑人工中位數仍然係萬零蚊，但係一層400呎市區樓，已經要去到800萬。仲未夠，香港嘅統治階層似乎一啲都睇唔到，仍然容許香港經濟產業繼續單一化大陸化，職位係好多出現（洗碗清潔保安地盤），但係工種就少得可憐，結果香港人覺得向上流動嘅機會大幅減少，怨氣不斷累積，仲未夠……統治階層成日叫唔好將香港政治化，但係佢哋做嘅每一件事就係搞政治，民生經濟一籌莫展，淨係識得用儲備搞大白象基建，討好中央，搞利益輸送，在位者尸位素餐，今日發生嘅動盪，真係唔可以怪曬林鄭月娥，之前兩屆政府責無旁貸，我成日屌今日想出嚟撈政治油水嘅曾俊華，就係咁解。

♉示威者一句口號叫「光復香港」，其實就係想香港作出轉變，從而走出之前所建立的困局同獸籠束縛。香港過去嘅成功，係我哋能夠擁抱世界、擁抱多元化展示出嘅巨大能量；今天我哋嘅頽落，就係固步自封，主動放棄一籃子貨幣政策，為求舒服就手，全力傾倒單一市場所引發。

♎有人驚變，死得更快。其實唔去變，又係一樣死，做人要有希望，而且人類嘅命運本來就係處於不斷變化之中，佛經有云：「人於此生，為愛欲驅使，隨欲所之，沉醉諸樂，輪迴生死，永為愛欲之奴，隨波逐流。」

🍳https://youtu.be/Aaa8CPzobr8

【常威近代史】第二部《中國一百年前第一次開放改革》
https://play.google.com/store/books/details?id=_6KMDwAAQBAJ

【常威近代史】第一部《大清亡國關慈禧蛋牛治》
https://play.google.com/store/books/details?id=C3hjDwAAQBAJ

【常威近代史】第一部《大清亡國關慈禧蛋牛治》實體購買
https://www.382now.com/product?id=87

【常威近代史】第二部《中國一百年前的第一次改革開放》實體購買
https://www.382now.com/product?id=151

常公子 2019-8-26 20:16:49

【常威近代史】（二百三十四回）
袁世凱平反系列

1912年6月，成個中華民國仲係立立亂，袁世凱主導嘅北京政府總理唐紹儀，拒絕咗西方銀行家集團嘅貸款協議，中華民國中央政府仍然冇水。另一方面，由於唐紹儀係一個留學美國嘅真西人，佢真係想搞完全西化嘅「責任內閣制」，佢採取與同盟會合作態度，提議喺內閣中多用南方人，但袁世凱堅持喺每個重要部門安插北洋舊人，嚡…又係南北之爭，加上佢同外國銀行鬧僵，最後好人唐紹儀頂唔順袁世凱，15號憤然辭職。

所謂「責任內閣制」，其實從來冇喺中國政治出現過。仲記唔記得香港早十幾年講過三屍十一局，要每位司長部長（話要）承擔政治責任，但係你睇吓，從來冇高級公務員因為行政過失而辭職或下臺，即係從來冇人肯承擔過任何政治責任，就算彈出嚟認吓錯都好撚少。中國人搞政治，係我嚟管你，我並唔係嚟serve你。永遠我係大你係細，我叻過你有權力過你，所以從來只有我玩你，冇你玩我，領導永遠是對的，有事領導要走先，呢種心態唔改，中國人嘅政治格局就永遠只有走向極權一面。

改？邊有得改架？DNA嚟架大佬！

唐紹儀辭職，換上陸徴祥（1871-1949）做總理，陸徵祥都係一個真西人，佢係一個神父，又有一個比利時籍老婆。同日，袁世凱亦都取消咗真國父黄興「南京留守」嘅職位，同同盟會嘅分裂，再升一級。

國父孫文，好多人叫佢做「孫大炮」，今日同佢平反吓。

孫大炮個名，係因為好多人話孫文辭去臨時大總統下野、去咗廣州避風頭後，袁世凱叫佢搞鐵路項目，於是乎佢就吹大個波，講出一啲無可能實現嘅鐵路大計，唔小心露咗隻階磚3底牌，所以俾人唱佢孫大炮。

查實真相係，孫文從來冇參與過乜嘢實質鐵路計劃。孫文只不過喺1912年6月25號接受《大陸報》記者採訪，提出咗中國鐵路嘅建設構想，個構想好簡單，就係響成個中國建立一個巨大嘅鐵路網。佢只係發表佢嘅意見，記者採訪，大家吹下水，你又講我又講冇責任架，個個都係咁做架啦。孫文亦從來無實際參與過任何鐵路建設計劃，當其時中國鐵路項目揸Fit人仍然係詹天祐。

但係呢篇花邊新聞報導，就令到後世人將佢叫做「孫大炮」，其實孫文都幾無辜。呢件事，亦都反映咗好多人對近代史嘅認知程度，其實都係一pat屎……想屌國父，都揾錯料呀你……

而且講真，孫文點會有興趣搞鐵路項目呢？佢嘅抱負、佢嘅目標係政治，係至高無上嘅權力，鐵路呢啲濕碎嘢，佢一定唔會放係眼內。佢支大炮，只會用嚟射政敵鳩袁世凱！

陸徵祥上臺，即刻同六國銀行講掂數，簽訂巨額借款協議，卑躬屈膝就卑躬屈膝，鬼叫你冇錢咩？統一時間，沙俄同大英帝國繼續玩嘢，6月尾，流亡印度兩年幾嘅13世達賴喇嘛圖登嘉措（1876-1933）重返西藏，英帝國印度殖民地當局，認為時機成熟，鼓勵圖登嘉措號召西藏各地嘅上層建築（即親英分子）發動叛亂，驅逐漢人，插雪山獅子旗仔，要玩「西藏獨立」。

中華民國建立咗都未夠一年，就有人要搞分裂活動？咁唔X得嘅，於是乎，7月頭，袁世凱任命四川都督尹昌衡為川軍西征軍總司令，並致電風流英俊嘅雲南都督蔡鍔全力支援，與川軍聯合，入藏平亂！

個結果唔駛諗都知，袁世凱你啱啱先響北京同大英帝國猶太人銀行家借咗錢，爭咗人人情喇屌……又窮又要威，又唔想戴頭盔，個世界邊有咁著數？

:^(

【常威近代史】第二部《中國一百年前的第一次改革開放》電子書
https://play.google.com/store/books/details?id=_6KMDwAAQBAJ

:^(

【常威近代史】第一部《大清亡國關慈禧蛋牛治》電子書
https://play.google.com/store/books/details?id=C3hjDwAAQBAJ

:^(

【常威近代史】第一部《大清亡國關慈禧蛋牛治》實體購買
https://www.382now.com/product?id=87

Carrick_16 2019-8-28 19:09:27 y no update ?

常公子 2019-8-28 19:45:34 【169回：大清亡國關 #同盟會 蛋牛治】

♉今集講到真國父 #黃興 同 #孫文 終於喺日本碰頭，海外嘅反動勢力同國內嘅反動勢力正式合流，成立「同盟會」。大清帝國最大嘅敵人係1905年開始出現。亦喺同盟會成立當日，所有游離嘅反動力量終於俾一個組織、一種意識形態統合起嚟，形成一股更大嘅力量，對抗滿清政府嘅極權統治。

♐世界在變，其實當年同盟會嘅角色，就係「#大台」，潮流興拆大台，今時今日逆權運動遍地開花，好多人就覺得最主要嘅原因就係無大台，因為如果「大台」存在，大家其實散咗水好耐。呢個講法我唔否認，「大台」令大家散水，係三番四次歷史教訓。但係冇大台有一個問題，就係件事好難收科，兄弟各自爬山，各有各做，你唔代表我，同時我唔代表你，前線兄弟有前線兄弟嘅立場，政客有政客立場，和理非非可以和你飛飛，有人反對共產黨，有人仇警，有人當打WarGame亦有鬼，真正萬物離散，要重新搵到共識或找尋一個大家認同嘅方向發展運動，實在好難，或者需要一段好長嘅時間醞釀同統合。

♉時間係大家嘅敵人，因為時間拖得越來越，大家只會越疲倦，社會大眾日常生活受到騷擾嘅時間太耐，亦會失去民心。香港上一次世紀政治大動盪，係1967年嘅「#六七暴動」。如果以時限計算，由新蒲崗香港人造花廠勞資糾紛嘅5月頭開始，直至去到同年12月，社會先至回復完全平靜，整個六七暴動經歷咗大約半年時間，前前後後一共有51條人命失去，有警察亦有平民，大家都付出沉重代價。但係歷史大災難之後就係歷史大補償，70年代香港，終於因為呢一場政治大洗牌，確認目標，重新起步，一躍成為亞洲金融中心。

⛎提一提大家，星期日我嘅channel，會繼續有香港近代史系列第六回，正正就係講六七暴動細說從頭，請大家捧場。

♎【#常公子近代史】語音導航！請大家幫手「#訂閱」我條常公子YoutubeChannel！同埋介紹多啲人睇睇！衝上2000訂戶！

🍳https://youtu.be/5Lfvk87jSzI

【常威近代史】第二部《中國一百年前第一次開放改革》
https://play.google.com/store/books/details?id=_6KMDwAAQBAJ

【常威近代史】第一部《大清亡國關慈禧蛋牛治》
https://play.google.com/store/books/details?id=C3hjDwAAQBAJ

【常威近代史】第一部《大清亡國關慈禧蛋牛治》實體購買
https://www.382now.com/product?id=87

【常威近代史】第二部《中國一百年前的第一次改革開放》實體購買
https://www.382now.com/product?id=151

常公子 2019-8-28 19:47:50


【常威近代史】（二百三十五回）
袁世凱平反系列

國家分裂可以好大件事，尤其是對啱啱建立、冇錢又冇勢嘅中華民國袁世凱北京中央政府嚟講，西藏一旦分裂出去，開咗個頭，「中國」好容易變成好多個細小嘅國家，事實上之後嘅日子，呢件事亦都一直發生緊。

1927年蔣介石北伐之前，中華民國大部份地區的確完全處於分裂分治狀態，依一點大家要好清楚，每個省（甚至更細嘅單位）各有各做，每個勢力都有自己嘅軍隊、有唔同嘅法律司法制度、有徵收稅款嘅能力，亦有任免省當地官員嘅權力，無需知會中央政府，更加無義務將稅款上繳中央政府。

1912年7月中，西藏由達賴十四世領導下，打算脫離中華民國控制，袁世凱下令組成西征軍入西藏平亂，8月底，大軍到達西藏邊緣，隨時預備入藏，但呢個時候，大英帝國北京駐華公使朱邇典（Sir John Newell Jordan，1852-1925），向北京政府提出嚴正抗議，聲稱中華民國不得干涉「西藏內政」，否則大英帝國將不承認中華民國政治身份，袁世凱迫於英國壓力，9月下令入藏軍隊停止前進，川滇軍人入藏平叛功虧一簣..........

但係大英帝國亦都唔再堅持將西藏當印度咁，吸納為完全殖民地，件事就咁拖咗落嚟，英國一方面唔想同中華民國鬧僵，另一方面西藏嘅經濟價值亦都唔值得大英帝國長期駐軍及泵水支持，西藏冇正式獨立過，中華民國仍然好似前朝清帝國一樣，對依啲邊陲地區保持非常微弱嘅宗主權。當然實際上，西藏亦處於完全獨立狀態，中華民國完全冇權管，佢自己有自己玩。西藏主權最終歸於大一統，要等到1950年中共鄧小平帶解放軍攻入拉薩……

蒙古問題都係一樣，俄國人協助蒙古人一邊分裂一邊傾，拖拖拉拉，一邊自己不斷攞著數，蠶食中華民國領土。但係同西藏唔同，最後蒙古真係獨立咗，世界上出現咗一個國家叫蒙古國，直到今日仍然係一個獨立嘅政治實體，蒙古問題，遲啲仲有大把機會講，就此停低。

1912年7月，仲有兩件重要嘅事要講講，第一，係中華民國第一次召開全國臨時教育會議，由我哋中國現代教育之父蔡元培先生主持，會議進行咗一個月，開咗19次會，制定咗各項教育政策同埋措施，包括學校系統、教育宗旨、教育法令同教職人員薪酬，會議確定全國統一學制：分別為小學4年，高小3年，中學4年、大學預科3年，大學本科3至4年，中華民國學制大致敲定，由於1912年係壬子年，故史稱「壬子學制」。

教育制度係一個國家同民族建立嘅基礎，對當時仍有99%以上係文盲嘅中華民國嚟講，「壬子學制」係一個重要嘅里程碑，而蔡元培嘅貢獻，以及佢所做一切實事，其實係非常偉大，好值得大家去敬重，我講咗好多次，中國並唔係冇人，只不過亦同樣有太多門能門九同門西人。

另一件發生係1912年嘅國際大事，就係日本明治天皇去世，明治天皇由1867年1月30日至1912年7月30日掌握權力，在位45年182日，佢徹底改寫咗日本呢個國家嘅命運，亦將日本由一個弱小嘅島國，搖身一變，變成亞洲大佬，蛻變成整個世界裡一個超級強權，佢嘅成就，真係幾十層樓咁高。隨住佢嘅死，日本亦進入咗意識形態大衝突嘅大正時代，大正天皇本身亦都係一個悲劇，活在巨人陰影之下，唔痛苦就假。日本大正時代，遲啲亦有機會講吓。

明治天皇去世，中華民國政府決定哀悼27日。睇到呢段歷史，我都打咗個凸？吓？乜日本人唔係中國人最大嘅敵人咩？點解咁friend嘅？睇嚟我哋用現代人嘅眼光去睇中華民國初期歷史，一定錯鳩曬。

中華民國同日本，其實息息相關。孫文同盟會嘅革命事業，日本人出力最大，但係日本究竟係為咗自己？抑或為咗中國？真係有理說不清，但中華民國建立初期，中日的確係鐵一般嘅兄弟關係（之後中共同蘇聯，又再將相同嘅故事發生多一次），不過呢段中日友好關係好快就會break，最後演變成中日戰爭，南京大屠殺，生靈塗炭，其實響1912年7月30號明治去世當日，真係冇人會諗到。


#常威 #斷送共和關袁世凱蛋牛治  #袁世凱 #民國歷史

:^(

【常威近代史】第二部《中國一百年前第一次開放改革》
https://play.google.com/store/books/details?id=_6KMDwAAQBAJ

:^(

【常威近代史】第一部《大清亡國關慈禧蛋牛治》
https://play.google.com/store/books/details?id=C3hjDwAAQBAJ

:^(

【常威近代史】第一部《大清亡國關慈禧蛋牛治》實體購買
https://www.382now.com/product?id=87

:^(

【常威近代史】第二部《中國一百年前的第一次改革開放》實體購買
https://www.382now.com/product?id=151

常公子 2019-8-29 10:49:47 【170回：大清亡國關 #三民主義 蛋牛治】

♉孫文提出嘅建國大綱，就係三民主義，我們稱呼為孫學，或者叫國父遺訓，三民主義中嘅三民，就係「民族」、「民權」同「民生」，其實三民主義，喺唔同時間有唔同嘅解讀，例如「民族」一詞，起初在推動推翻滿清革命嘅時候，指謂嘅只係「漢族」，後嚟建國之後，民族就等於「五族共和」，侵埋你滿州人玩。

♉「民權」嘅意義，亦都一直在變。革命前，就係民主自由議會法統，建國之後，就係穩定民心嘅權力所在，所謂民權，未必一定有民，而且為大局著想，為大部份人嘅福祉利益行事，民權亦都可以變成極權，亦都可以指謂黨國合一，總之唔亂就可以。

♐「民生」部份，喺孫文初初立説嘅時候，其實有極重嘅社會主義色彩，一句「平均地權」就統統體現曬，就算唔係社會主義，都一定係中間偏左路線，我講過，孫文同佢老婆宋慶玲其實係百分百嘅社會主義者，係史太林嘅朋友。當然作為後來蔣介石國民黨意識形態思想中嘅「民生」演釋，已經完全冇曬左膠元素。

♎政治只係為咗解決當前問題，並非要解決長遠問題。

♈因此意識形態會因為要解決唔同嘅當前問題，而作出相應嘅唔同變化，世界上沒有事物是永恆，「活在當下」先至重要，只要能夠解決眼前嘅問題，他日洪水滔天，又同我有咩嘢關係？類似嘅脈絡，唔單止喺政治上，今時今日21世紀，人類面對嘅問題應該係環保問題，全球氣溫不斷逐年上昇，溫室效應下，南北兩極冰塊大量溶解，一場史無前例嘅生態大災難已經逼近眉睫，到時就算係自由民主國家也好、極權國家都好，大家都無法避免洪水滔天。全球人類減放碳排放量，其實要立刻開始進行，但係環保問題幾十年後先發生嘅事，屬於長遠問題，放喺人類眼前嘅難題真係太多太多……

⛎提一提大家，星期日我嘅YouTube channel，會繼續有香港近代史系列第六回，講六七暴動細說從頭，請大家捧場。

♎【#常公子近代史】語音導航！請大家幫手「#訂閱」我條常公子YoutubeChannel！同埋介紹多啲人睇睇！衝上2000訂戶！

🍳https://youtu.be/6paqUMh3r5k

【常威近代史】第三部《東方維多利亞女王之死》
https://play.google.com/store/books/details?id=GaGrDwAAQBAJ

【常威近代史】第二部《中國一百年前第一次開放改革》
https://play.google.com/store/books/details?id=_6KMDwAAQBAJ

【常威近代史】第一部《大清亡國關慈禧蛋牛治》
https://play.google.com/store/books/details?id=C3hjDwAAQBAJ

【常威近代史】第一部《大清亡國關慈禧蛋牛治》實體購買
https://www.382now.com/product?id=87

【常威近代史】第二部《中國一百年前的第一次改革開放》實體購買
https://www.382now.com/product?id=151

常公子 2019-8-30 19:28:03

【常威近代史】（二百三十六回）
袁世凱平反系列

香港人加油！

時間去到1912年8月，中華民國袁世凱北京政府順利同外國銀行團借到錢，勉強可以Run落去，中華民國中央銀行響北京成立，但係外國銀行借款嘅條件亦都好撚辣，簡單啲講，就係唔係就咁X樣借筆錢俾你任你洗，而係政府洗每一筆錢，每一筆開銷，都要得到銀行團嘅批准先可以洗，而且帳目要好清楚交待，外國銀行就係太清楚中國人壠嘢，講一套做一套，而且完全冇賬目概念（只有貪污概念，數簿從來不在抬頭，而在心裡），當然外國銀行咁樣做，亦等同於變相操控中華民國銀根。中國從大清帝國走到中華民國，仍然冇辦法擺脱到外國勢力對經濟嘅操縱。

講開借錢，叉開一筆，最近認識一個地產朋友，佢講畀我知點解內地人會大手大手購入香港豪宅，毫不手軟，樓價升破頂放手套利，即炒樓固然係其中一個因素。但原來佢哋仲有一招，就係響香港買咗樓之後、或者畀咗首期，樓契或相關文件到手，佢哋就會拎住張香港張樓契（影印？），返到內地銀行作為抵押品，不斷借錢套現。一層5000萬嘅香港樓，分分鐘喺大陸可以借幾億，翻幾翻，現金到手可以冚煲蓋，亦可以走佬移民美加。當然點解內地銀行嘅貸款可以咁鬆手？當中有冇內鬼收回佣？又係另一個故事喇。總之呢啲easy money，香港人冇資格搵。

（補充一點，我個人好相信逃犯條例，中國政府可能係主力針對呢種經濟犯。）

我諗1912年外國銀行做嘅嘢，某程度上亦都係唔畀你中國人亂嚟，成龍講得冇錯，「中國人係需要管嘅」，放隻馬騮出籠，就會搞到亂曬大籠。

1912年8月，有幾件重要嘅事發生，第一，袁世凱聘用咗英國人莫理循（George Ernest Morrison，1862-1920）為政治顧問，莫理循係一個傳奇人物，佢係一位醫生，亦都係一位記者。有興趣嘅朋友可以搵吓佢嘅資料讀讀，之後袁世凱洪憲稱帝，亦將「王府井大街」改名為「莫理循大街」，你就知道呢個洋人對袁世凱有幾咁重要。

其實袁世凱中華民國執政初期，所聘用嘅人物，一係真西人，一係真真西人，佢大部份手下，都接受過西方文明教育；反觀佢嘅對手革命黨人，則大部份係「陀地」，依一點大家要清楚。

第二，8月15號，1911年10月武昌起義嘅重要將領兼主力策劃者張振武（1877-1912），一個被尊為共和元勛，同孫武、蔣翊武並稱「辛亥三武」嘅人，響北京被袁世凱拉去後巷打靶，罪名係貪污同圖謀不軌。但真正嘅死因係革命黨籠裏雞作反，原因係佢同黎元洪不和，佢曾經想殺黎元洪，於是同黎元洪結下恩怨，袁世凱係應黎元洪要求下殺手。

總括而言，「辛亥三武」最後都冇好收場，孫武被同盟會排擠，張振武被殺，蔣翊武亦響1913年響桂林被處決。前面衝嗰批，真正發動武昌起義嘅人，下場相當悽慘。所以阿媽打電話畀你叫你唔好喺前面衝，要留響人群裡面保留實力，等待缺口出現，先去前線執人血饅頭食，就係有一定道理。

第三，8月24號，孫文、黃興、黎元洪三人被袁世凱邀請到達北京，共商國事，亦即係中華民國歷史上「四巨頭會議」，三人到達北京，袁世凱以迎接國家元首嘅禮節隆重歡迎。講好聽啲，叫共商國事，大家坐埋一齊解決南北分裂問題。難聽啲講，就係袁世凱要同革命黨人攤牌，睇下政治點分贓？

第四，8月25號，同盟會、統一共和黨、國民公黨、國民共進會、公和實進會，響北京召開大會，宣佈五黨合併，成立一個新政黨，叫做「國民黨」，依一日，亦係玩到今時今日嘅「國民黨」誕生嘅大日子，當中主要推手係宋教仁，新政黨國民黨選舉孫文為理事長。國民黨嘅出現，意味南方革命勢力，進一步加以統一鞏固，合作對付共同敵人，他媽的袁世凱！

叉開小小，8月25號仲有一個人死咗，佢叫馮如（1883-1912），佢係美國留學生，對機械工程好有興趣，1907年佢得到華僑資助，響美國設廠研製中國第一架飛機，1909年試飛成功，1911年回國，之後被廣州軍政府委任為飛行隊長，佢係中國飛上天空第一人，係中國航空史嘅先軀，8月25號佢喺廣州飛行表演，因飛機失事下墜而死，死嘅時候，未夠30歲。

其實歷史，係有好多人參予其中，大部分人只睇到主軸發展，冇睇到旁枝，辛亥革命之後嘅中華民國，政治鬥爭不斷發生，但同時歷史亦都不斷嚮前邁進緊。我有陣時諗，如果少啲爭拗，大家多啲包容，唔好輕易發動戰爭.......中國人行嘅路會easy好多。可惜由辛亥革命打響第一槍開始，似乎所有人都認同槍桿子出政權，武力同戰爭先係唯一解決紛爭嘅辦法，其實到咗今日，世界都冇變過。

#常威 #斷送共和關袁世凱蛋牛治  #袁世凱 #民國歷史

【常威近代史】第三部《東方維多利亞女王之死》
https://play.google.com/store/books/details?id=GaGrDwAAQBAJ

【常威近代史】第二部《中國一百年前第一次開放改革》
https://play.google.com/store/books/details?id=_6KMDwAAQBAJ

【常威近代史】第一部《大清亡國關慈禧蛋牛治》
https://play.google.com/store/books/details?id=C3hjDwAAQBAJ

【常威近代史】第一部《大清亡國關慈禧蛋牛治》實體購買
https://www.382now.com/product?id=87

【常威近代史】第二部《中國一百年前的第一次改革開放》實體購買
https://www.382now.com/product?id=151

常公子 2019-8-31 11:14:52 【💣香港關 #中英聯合聲明 腿蛋治 第七回】

♒今集真真正正開始講六七暴動，六七暴動又名「反英抗暴運動」，係香港工人階級連結中共一次嚴重向港英殖民地政府統治權嘅巨大挑戰，整體時間延續咗半年，死了六十一條人命（官方數字），依場暴動可以講話完全改變咗香港嘅社會、政治同經濟結構，而港英政府事後採取嘅一連串補救措施，亦都將香港呢個小小嘅地方帶入咗真正光輝燦爛嘅時代。

♐我最喜愛嘅歷史學家之一，中共黨員楊繼繩先生，提出一個理論，就係逢社會發生大劫難之後，都有歷史嘅大補償發生。佢舉嘅例子就係中國喺上世紀60年代發生嘅十年浩劫、即係文化大革命，造就咗80年代後中國開放改革經濟高速發展崛起嘅奇蹟30年；呢個例子套喺香港六七暴動事件亦都非常適合；仲有一個更加大嘅例子，就係1945年二次世界大戰結束之後，人類整體步向真正物質豐盛嘅黃金時代（Golden Era）。

♊原因何在呢？因為社會發生巨大劫難，亦意味住發生大洗牌，原本堅實牢不可破壁壘分明嘅階級結構開始出現動搖，用人話佢講，就係有人會離開（甚至有人死），好似今個夏天，我身邊已經有朋友搞緊移民臺灣馬來西亞，亦有朋友決定舉家返加拿大暫離是非圈。我講過今日年青人嘅怒火，其實某程度上係嚟自階級唔能夠向上流動，中高階職位嚴重不足，根本無辦法疏導過去十幾年大量因爲普及大專教育畢業嘅大專生大軍，唔通你真係想搦住個學位撈地盤揸的士咩？但係有人選擇離開，就意味住有空間比新一代向上流動，呢啲情況我哋喺67暴動、89六四事件、97年金融風暴、2003沙士見過幾次，社會需要大洗牌，某程度上亦都係自我調節，某程度上亦都唔係一件壞事。

🔯另外一件事不得不提，三番四次去提——樓價問題——樓價問題的確不斷困擾香港人，97年前港英殖民地政府為咗補貼民間公共福開銷而創立嘅高地價政策，註定香港人從此以後要被樓市呢個緊箍咒緊緊箍死，嚟到2019年頭，香港樓價（泡沫）升至世界第一（真係有冇搞撚錯），同一般市民嘅收入同承受力已經唔成正比或者完全冇關係，簡單啲講，就係如果你或你家人無層樓在手打底，你根本冇可能買得起樓，又如果你冇資格申請公共房屋，咁你就註定被居住問題困擾一生。

♌但係居住問題，並唔係中共或特區政府為香港人帶嚟嘅問題，反而係香港地產霸權多年盤踞香港而留低嘅計時核彈。好朋友財經大師周顯就曾經講過，其實97年一到，中央政府已經想打擊香港地產霸權，所以先至有董建華八萬五出現，但情況發展落嚟，香港地產霸權盤根錯節嘅力量實在太巨大，就算中央想喐佢哋，都係冇辦法做得到…你可以唔認同呢個講法，但係我想請你，從頭到尾重新將件事思考一次…

♐相信經過今個夏天，大家都會知道世界上任何事情都有機會發生，放喺眼前運行如常嘅現實，可以響一夜之間崩潰。或者有一日，支爆之前，香港地產霸權會率先收皮，香港人真正被解放，大家不再被居住問題困擾，人人有屋住，但係可能付出嘅代價就係要接受極權統治、扼殺言論自由。凡事凡物都有upside同downside，上帝創造天地萬物嘅時候，一早擺好咗機制，世界上並無完美的事物存在，所以亞當夏娃喺伊甸園過住愉快美好嘅生活時，就會無厘頭出現一條蛇同佢哋講：

♐「你夠唔夠膽食咗樹上面嘅禁果？」

🍣https://youtu.be/YVDA7JuPVCQ

【常公子近代史】第三部《東方維多利亞女王之死》
https://play.google.com/store/books/details?id=GaGrDwAAQBAJ

【常威近代史】第二部《中國一百年前第一次開放改革》
https://play.google.com/store/books/details?id=_6KMDwAAQBAJ

【常威近代史】第一部《大清亡國關慈禧蛋牛治》
https://play.google.com/store/books/details?id=C3hjDwAAQBAJ

【常威近代史】第一部《大清亡國關慈禧蛋牛治》實體購買
https://www.382now.com/product?id=87

【常威近代史】第二部《中國一百年前的第一次改革開放》實體購買
https://www.382now.com/product?id=151

平行線を辿る 2019-8-31 11:17:39 為慈禧呢個賤人平反，係咪腦殘

常公子 2019-9-2 22:42:23

【常威近代史】（二百三十七回）
袁世凱平反系列

香港人加油！香港人加油！香港人加油！

1912年9月，四巨頭，袁世凱、孫文、黃興、黎元洪雲集北京，共商國事，一片和諧（河蟹）氣氛，政治同權力如何分贓，從來都唔會係一件和諧嘅事，但係表面冇嘢照傾，亦都係政治人物常用嘅姿態，大家一啲都唔需要奇怪。

事實上，當時中華民國草創第二年，要由一個行咗幾千年嘅封建皇權極權帝國，一下子改變為自由民主、行政黨政治、議會制度嘅新現代國家，難度極高，無可避免會出現大量混亂同埋扭曲，老實講，中國人行憲政之路，第一步已經起步得唔錯，依一點要同中國人平反。

從來要走上真正自由民主之路，都極唔容易。歐洲「雙元革命」之一嘅「法國大革命」，田1789年7月14日，民衆攻佔巴斯底監獄計起，革命導致各界對立，共和派同保皇派嘅政治鬥爭，於往後搞咗成半個世紀，最後先至得到暫時性解決（法蘭西第三共和），期間，耗用咗整整一代人嘅青春同鮮血，亦造就咗拿破崙響成個歐洲嘅戰火延綿。

要得到真正嘅自由，非要付出巨大代價不可！亦需要巨大犧牲不可！如果你心裡面以為，烈日當空行幾個鐘頭路，就可以達到目標，我話你知，呢個係一個好天真好傻嘅想法。

四巨頭響9月25號發表聯合聲明，即所謂「八大政綱」：

1.確立全國統一制度。

2.主持是非善惡之真公道，以正民俗。

3.暫時收束武備，先儲備海陸軍人才。

4.開放門戶，輸入外資，興辦鐵路礦山，設置鋼鐵工廠，以厚民生。

5.提倡資助國民實業，先著手於農林工商。

6.軍事、外交、財政、司法、交通皆取中央集團主義；其餘斟酌各省情形，兼採取地方分權主義。

7.迅速整理財政。

8.竭力調和黨政，維持政治秩序，為各國承認之根本。

所謂八大政綱，其實講咗等於冇講，非常虛無縹緲，實際效果欠奉，純屬政治言詞，用作安撫民心。會面期間，袁世凱授予黃興、黎元洪陸軍上將軍銜。國父孫文，則被授權籌畫督辦全國鐵路計劃。表面上睇，袁世凱將三人正式收編，好似大局已定，但實際上當然完全唔係嗰回事。

補充一則史料，9月11號，大清皇室於北京金魚胡同設宴招待孫文同黃興。宴會之上皇室致辭咁講「孫黃二君，皆今日中國非常之人，故能建非常之業。」，黃興亦都發表演辭講「非裕隆皇太后之明哲及諸公之輔助，成功絕不能如此之神速。」畀面派對上大家非常畀面，中國歷史上嘅改朝換代，從未有過咁和諧嘅情況，依一點大家要注意。

事實上，推翻滿清，建立中華民國。過程係非常之順利同埋成功，與全世界唔同時代每一次革命比較，所付出嘅代價同鮮血其實相當之少。中國人行民主自由憲政之路，第一步其實非常成功，之後嘅失敗，葬送共和，係自己攞嚟，係籠裏雞作反，亦係權力鬥爭引發。

袁世凱北京政府，運作亦都非常唔順暢，國務總理唐紹儀辭職後，陸征祥頂上，陸征祥做唔夠三個月，畀參議院彈劾，亦都喺9月22號辭職，接任嘅人係趙秉鈞（1859-1914），同時兼任內務總長，趙秉鈞係中國現代警察制度嘅始創人。

之前嘅唐紹儀同埋陸征祥都係真西人，反而趙秉鈞冇浸過鹹水，只係高級華人陀地。其實要行西方制度，用真西人處理係理所當然，唐昭儀同陸征祥冇辦法留低，其實亦都註定咗中華民國冇辦法行上西方自由民主議會制度憲政之路。

大家仲記唔記得，當時1912年3月中華民國內閣中央，有四個同盟會成員，佢哋係王寵惠、蔡元培、宋教仁同陳其美。但佢哋喺內閣運作咗幾周之後，已經全部辭職，原因好簡單，佢哋唔妥袁世凱，唔妥當時嘅北京政府，覺得佢哋獨裁唔民主。革命派第三號人物宋教仁，深深明白要繼續同袁世凱鬥爭，就必須重整各方政治勢力，於是8月聯合其他政黨，成立「國民黨」。

1912年3頒布嘅臨時約法規定1912年底，舉行中華民國國會大選，宋教仁嘅打算係響呢次大選之中設法贏得大部份國會議席，從而以民主手段重新奪取中華民國中央政府嘅控制權，抑壓袁世凱北洋勢力一人獨大。

孫文黃興革命兩大巨頭被袁世凱暫時收編，反對派主導力量落喺年輕宋教仁身上。依一次中國歷史有史以來嘅第一次國會選舉，將會開天闢地，我哋下節再講。

#常威 #斷送共和關袁世凱蛋牛治  #袁世凱 #民國歷史

:^(

lm【常威近代史】第二部《中國一百年前第一次開放改革》
https://play.google.com/store/books/details?id=_6KMDwAAQBAJ

:^(

lm【常威近代史】第一部《大清亡國關慈禧蛋牛治》
https://play.google.com/store/books/details?id=C3hjDwAAQBAJ

:^(

lm【常威近代史】第一部《大清亡國關慈禧蛋牛治》實體購買
https://www.382now.com/product?id=87

:^(

lm【常威近代史】第二部《中國一百年前的第一次改革開放》實體購買
https://www.382now.com/product?id=151

光子 2019-9-2 23:03:49 此回覆已被刪除

常公子 2019-9-3 10:42:04 【171回：大清亡國關 #革命行動 蛋牛治】

♉個人相信，#辛亥革命 的發生，並非大部份中國民眾的意願，相信當時，除了少數高級知識分子，大部分平民百姓對所謂自由民主法統議會代議政制，其實一無所知。對佢哋嚟講，只係換咗皇帝，由 #溥儀 換咗 #孫中山，再由孫中山換咗 #袁世凱……然後過咗一段時間冇皇帝，後嚟有一個叫 #蔣介石 嘅人做咗皇帝，跟住打仗，打咗好耐，死咗好多人，最後由一個叫 #毛澤東 嘅人做皇帝，對當時好多人嚟講，情況就係咁。

♐有一個故事我講過，#中華人民共和國 建立之後，佢哋嘅宣傳隊去山區農村宣傳共和國政權，好多人都唔明白what happen，於是乎佢哋就話畀農民知「毛澤東坐殿了」，即是毛主席做了皇帝，於是農民就明白發生乜嘢事，原來改朝換代了。

♎其實一個社會，或者個國家，沉默嘅群衆佔大多數。佢哋冇政見，對政治亦都冇乜嘢睇法，我身邊就有唔少人係咁諗，表面扮黃扮藍，其實只係投其所好，沉默大多數只係想安安樂樂過日子，日出而作，日入而息，努力工作改善自己生活，組織家庭，生兒育女，安安份份過一世人。抱住依種想法嘅人，係社會嘅大多數，佢哋冇錯，任何人唔可以因為佢哋唔支持任何一方而責駡佢哋，畢竟，人係有自己嘅選擇權，如果呢個世界真係有民主自由嘅話，咁人去選擇「唔選擇」嘅中立狀態，其實完全冇錯。

♑當然有人會話，「#沉默」就係極權嘅幫兇，就係因為大多數人選擇沉默，逆來順受，所以極權先會橫行無忌，張牙舞爪。今日嘅香港就開始進入依種大是大非嘅思考狀態，不過我始終想提出一點，所謂自由，即係代表有選擇嘅權利；更深層次嘅理解，所謂自由，其實表示有絕對獨立思考嘅能力，否則所得到嘅自由或某些信仰，只係其他人控縱你 #意識形態 後，所畀你嘅「舒服感覺」啫。

♎【#常公子近代史】語音導航！請大家幫手「#訂閱」我條常公子YoutubeChannel！同埋介紹多啲人睇睇！衝上2000訂戶！

🍳https://youtu.be/9dNRWqfcl5s

【常威近代史】第三部《東方維多利亞女王之死》
https://play.google.com/store/books/details?id=GaGrDwAAQBAJ

【常威近代史】第二部《中國一百年前第一次開放改革》
https://play.google.com/store/books/details?id=_6KMDwAAQBAJ

【常威近代史】第一部《大清亡國關慈禧蛋牛治》
https://play.google.com/store/books/details?id=C3hjDwAAQBAJ

【常威近代史】第一部《大清亡國關慈禧蛋牛治》實體購買
https://www.382now.com/product?id=87

【常威近代史】第二部《中國一百年前的第一次改革開放》實體購買
https://www.382now.com/product?id=151

常公子 2019-9-4 17:34:25

【常威近代史】（二百三十八回）
袁世凱平反系列

1912年3月8號，南京臨時參議院通過《中華民國臨時約法》，內裡規定：「本約法施行後限十個月內，由臨時大總統召集國會，其國會之組織及選舉法由參議院定之。」

一錘定音，大家要跟住憲法走，1912年底，國會大選展開。

推翻滿清建立中華民國，其實所有人都想國家走上憲政之路（我諗當時袁世凱亦都唔反對），摒棄極權，由「人治」改為「法治」。呢個想法，就係所謂「法統」概念，而「法統」亦都係五色旗中華民國立國嘅理念。

點解我要強調五色旗？因為之後用青天白日旗嘅中華民國，已經係黨政合一，法統早已經玩完。

當時中華民國國會參照美國行兩院制，分為「參議院」及「衆議院」。參眾兩院制度，係歐洲世界沿用二百幾年嘅議會傳統，簡單啲講，參議院代表上層貴族資產階級利益；而衆議院則代表普羅大衆嘅聲音。

借鑒西方國會選舉原則，中華民國參議院議席，經由間接選舉產生，即由各省議會推選出參議員，當時全國22個行省，每省各有十名參議員進入參議會，加上其他名額，全國參議員席位共有274個。

而衆議院議員，則採取全民普選產生。名額依照全國各地區人口多少而決定，大概每80萬人口選出眾議員一人，以當時中華民國人口大概四億人推算，全國一共有衆議員名額596個。

你冇睇錯，係全民直接普選產生衆議員。110年前，中國真係曾經出現過一場民主國會選舉。當然，當時「普選」的概念同現在唔同，選民要經過特別篩選。其中只限21歲以上男性，仲要有一定知識水平、教育程度同資產先可以成為選民，當時中國四億人口，選民人數係4300萬，約占總人口10%左右。大家唔好奇怪，當時中國90%以上嘅人係文盲，比張選票佢，佢可能以為可以愛嚟抆屎或者透火。

唔使多講，中華民國民主選舉嘅第一步梗係困難重重，一來制度未成熟，純屬試驗性質，二來所謂選舉觀念對好多人嚟講，係天方夜譚，見都未見過，聽都未聽過。因此依一場選舉，出現咗形形式式唔同嘅問題。到咗今時今日嘅香港選舉，仲有人賄選種票，蛇齋餅粽，呃阿婆阿公去投票都成日見，咁你話110年前嘅中國，情況會係點，我諗都不難想像？

1912年底舉行嘅國會選舉，其實係中華民國組織向心力同團結性嘅好時機當時嘅中華民國，除咗南北分治，其實整個各省各地都係各有各做，中華民國其實只係一個非常鬆散嘅政治聯盟，建立國會，有助統一國家，施行真正嘅國家統治。

法治講完，講返人治。1912年，袁世凱大權在握，借住北京會面，收編革命兩大巨頭。國父孫文同真國父黃興，分別接受袁世凱委派去搞鐵路項目。講真，其實搞就冇搞。籌辦鐵路，只不過係袁世凱畀佢兩位嘅下臺階，等兩大革命巨頭退出政治舞臺。亦有可能，袁世凱委派佢哋搞鐵路項目，係一心俾佢哋掠水賺取退休金。孫文同黃興嘅妥協，其實並冇做錯。我講過，推翻滿清換來最高權力，係袁世凱嘅政治報酬，革命派同盟會係認同呢個做法，亦係合約精神。否則袁世凱可以繼續以清國官員身份發動保衛清帝國戰爭，繼續生靈塗炭。而且以當時袁世凱北洋系統嘅軍事實力，如果打落去，完全摧毁革命力量，清帝國繼續經營落去一啲都唔奇怪。

政權和平交替，係一件好事。我諗當時孫文同黃興，亦都有相同感覺。未講孫文，先談黃興，真國父黃興選擇急流勇退，從此退出激烈嘅政治鬥爭漩渦，其實係大智慧表現，佢要做嘅事已經做到，下下響最前線衝，如今滿清已經被成功推翻，中華民國建立，老實講，佢嘅做法係功成身退唔磨爛席。我有陣時諗，如果每一個參予革命嘅人，都有黃興嘅氣度同修養，之後點會天下大亂？

孫文做啲乜，我哋下次再講。但黃興同孫文嘅政治妥協，就引發革命內部激進派嘅反對，同盟會第三號人物宋教仁唔贊成佢哋嘅做法，唔認為要將權力交畀袁世凱履行合約精神，宋教人係後生仔（當時剛剛30歲），佢覺得孫文同黃兄已經成為老屎忽，係明日黃花，燦爛已過。

宋教仁連同其他政黨，組成「國民黨」一刻，其實已經同孫文黃興上一輩割斷，孫文黃興嘅妥協，喺宋教仁心目中係投降主義。你哋唔玩我玩，宋教仁成為革命力量新興真正話事人，佢要喺1912年底嘅國會選舉中，用選民手中嘅選票，用自由民主嘅力量，挑戰袁世凱嘅絕對權威、挑戰袁世凱嘅北洋槍桿子系統。

你有警棍催淚彈同槍，我有民主自由同選票，睇下邊個堅啲？

【常威近代史】第三部《東方維多利亞女王之死》
https://play.google.com/store/books/details?id=GaGrDwAAQBAJ

【常威近代史】第二部《中國一百年前第一次開放改革》
https://play.google.com/store/books/details?id=_6KMDwAAQBAJ

【常威近代史】第一部《大清亡國關慈禧蛋牛治》
https://play.google.com/store/books/details?id=C3hjDwAAQBAJ

【常威近代史】第一部《大清亡國關慈禧蛋牛治》實體購買
https://www.382now.com/product?id=87

【常威近代史】第二部《中國一百年前的第一次改革開放》實體購買
https://www.382now.com/product?id=151

常公子 2019-9-5 09:53:09 【172回：大清亡國關 #意識形態 蛋牛治】

♉今集幾深吓，我講意識形態，意識形態對一個社會嘅管治相當重要，每一個人諗緊乜或者選擇啲乜，其實大部份並唔係純粹出於自由意志同獨立思考，反而係受社會大環境、自身背景、階級、或者佢能夠睇見同埋聽見嘅資訊和意見不要所影響。大題目係並非「意識決的存在」，而是「存在決定意識」。

♉片裡面我舉一個例子，有錢人永遠唔會明白窮人L諗緊啲乜，你同一個有幾棟物業揸手嘅人講居住問題係一個香港人嘅大煩惱，佢可能個口裡認同你同你吹，但係心裡面其實完全冇感覺，呢個就係意識形態最佳說明例子。上層建築永遠冇辦法體諒同了解低下層，施政者嘅手腕同平民百姓嘅訴求永遠總有段距離，原因就係呢度。

♉更有甚者，意識形態係可以被政權或某啲團體控制，呢個大題目要去到二次世界大戰結束先有比較詳細同系統性嘅描述（或者有人講出嚟），控制意識形態嘅手法，主要就係控制大眾媒體、操縱資訊，利用政策、在明在暗操控、審查、過濾或選擇媒體內容，從而控制普羅大眾所能夠接觸嘅資訊層面，所謂世界，其實就係人類腦裡面嘅想像，你能夠接觸乜嘢資訊，代表你能夠想像個世界係乜嘢。所以現代先有啲人，口口聲聲話某極權大國最強大，新聞最自由，互聯網無審查，人民生活質素世界前列等等嘅謊言。

♊所謂意識形態操控技術，基本上就係要你將「謊言」當成「真實」；以「想像」取代「真相」。對於謊言，仲有幾個層次。真正以爲謊言是真相的人，係真心膠，係腦殘，基本上冇得救。但其實大部份說謊嘅人，都知道謊言係謊言，祇不過佢哋因為某啲政治目的或既得利益、或者純粹出於恐懼，所以先至說謊，蘇聯作家索忍尼辛講得好有趣，極權國度裡，人們明知謊言是謊言，卻把謊言當成真相說出來，但聽你說話的人也知道你說的是謊言，於是他就用謊言回應你，結果到最後，大家都活在謊言世界，冇樣嘢係真，由於明白每樣事物都係假，每一種講法都只不過係謊言，所以到最後做假冇問題，道德唔存在，男可盜而女可娼，做和尚可以召妓，做醫生可以呃錢，撈政治更加可以殺人。一脈相承，其實係由一個謊言開始。

♉不過，無論身處何地，謊言總是存在，問題係謊度大小，無論身處乜嘢社會，總有人千方百計想控制你嘅意識形態，希望你做順民，易於管治。衹要權力關係一旦被建立下來，就係主人同豬圈裏的豬嘅關係，無論係極權國家抑或自由國度，每個人嘅意識形態總會被政權或既得利益階層操控，問題只係你覺定唔覺？或者只係，操控得你舒服抑或唔舒服？

♎【#常公子近代史】語音導航！請大家幫手「#訂閱」我條常公子YoutubeChannel！同埋介紹多啲人睇睇！衝上2000訂戶！

🍳https://youtu.be/Wvh1iyZ8NsI

【常威近代史】第三部《東方維多利亞女王之死》
https://play.google.com/store/books/details?id=GaGrDwAAQBAJ

【常威近代史】第二部《中國一百年前第一次開放改革》
https://play.google.com/store/books/details?id=_6KMDwAAQBAJ

【常威近代史】第一部《大清亡國關慈禧蛋牛治》
https://play.google.com/store/books/details?id=C3hjDwAAQBAJ

【常威近代史】第一部《大清亡國關慈禧蛋牛治》實體購買
https://www.382now.com/product?id=87

【常威近代史】第二部《中國一百年前的第一次改革開放》實體購買
https://www.382now.com/product?id=151

常公子 2019-9-6 15:43:23

【常威近代史】（二百三十九回）
袁世凱平反系列

中國第一次民主國會選戰開始，由於當時交通極不發達，資訊亦唔流通，一場牽涉全國22個行省嘅國會衆議院選舉，由1912年12月底開展，直到1913年3月先有最後結果，期間代表革命南方力量嘅「國民黨」真正揸Fit人宋教仁穿梭全國各地，身體力行要打出一場漂亮選戰，要用手中國會議席，達到責任內閣制目的，直接挑戰袁世凱嘅無尚權威。

中間，宋教仁嘅生命仲有三個月時間，同耶穌黃家駒張國榮一樣，美麗嘅花朵係最燦爛嘅一刻凋謝，總係能夠流芳百世。喺權力金錢世界中磨爛蓆，基本上冇人唔可以衰收尾。如果毛澤東喺1949年前死於內戰，佢註定會係中國最偉大嘅民族英雄之一；袁崇煥岳飛哲古華拉亦如是，不過急流勇退，又有幾個人可以做到？

宋教仁嘅事，遲啲再講。去到1913年嘅中華民國，其實內憂外患從未止息過，袁世凱體面地維持自由民主憲法嘅粗略框架，法統依然吊鹽水式存在。國家經濟仍然係一潭死水，袁世凱同佢嘅北京政府，依然不斷同外國銀行商討大規模借款問題，用作維持國家基本運作。

外國帝國主義勢力，仍然希望利用資本全面控制中華民國呢個貧窮落後嘅新興國家。睇返歷史，中華民國起步之初，袁世凱並無向任何一個西方強權撤底妥協或靠攏，佢希望利用國際間微妙嘅權力平衡同猜疑，維持中華民國嘅自主性，佢希望中國人能夠獨立自主自己國家嘅命運，喺依一點上，佢係值得尊敬。

當然你真係冇錢，就真係冇得惡。至於20世紀初期大清迴光返照期間留低嘅大量錢財，經過一場場轟轟烈烈嘅革命之後遺失大部份，依一個，又係另一個問題。

大英帝國插手西藏事務，袁世凱想揮軍入藏平亂，但被英國抑制，啞仔食黃蓮；同一時間中國人嘅好朋友俄國佬就明刀明槍，公然侵略中國領土。1912年11月，俄國派出密使，同外蒙古分裂主義庫倫當局代表簽訂《俄蒙協約》，沙俄正式向外蒙古大量殖民，協約中給予俄國人響蒙古各地自由居住遷徙、經營工商業、免稅貿易、買賣土地、開設銀行及郵政、及享有領事裁判權等權益，蒙古一片屬於中華民國管轄嘅廣大地區，亦出現咗「親中」同「親俄」兩大勢力，「親俄」勢力就係外蒙地區，最後嘅結果大家都知道。咩叫侵略？呢啲就叫侵略囉……

外蒙古分裂問題傳出，舉國譁然，矛頭又係直指袁世凱無撚用。咁又冇錯，你坐得最高嗰個位，有鑊梗係你揹。

去到1913年，仲有幾件重要嘅事會發生。首先1月1日，北京正式開放東西長安大街及天安門廣場，面對紫禁城入口嘅天安門原名中華門，響清代，只有皇室貴族先可以進入行走，普通平民百姓禁止入內，小個便都唔得。1月1日之後，天安門廣場成為中國人擺脱極權統治嘅象徵聖地，之後無數嘅政治事件喺廣場上發生，見證咗中國政治嘅起伏興衰。不過到咗今時今日，你響天安門廣場叫一聲「平反六四」或「打倒共產黨」，仍然毫無疑問係會俾公安拉。百年鳩做，就係咁解。

響香港，大家仍然可以上街高呼「林鄭下臺」同「打倒共產黨」，只要唔衝，警察唔可以用橡膠子彈射你或起訴你（遲少少，燒國旗或詆譭国歌就可以入你）。香港人擁有嘅言論自由權利，係邊個賦予？中華民國？中華人民共和國？l am so sorry，答案係大英帝國。

2月22號，前朝清帝國隆裕太后，清帝國表面最高領導人，光緒嗰個醜樣到爆燈、一腳想伸佢老母落床、毫無政治能力嘅老婆病死咗，終年46歲，袁世凱下令全國下半旗致哀，官員穿孝服27日紀念，做法同紀念日本帝國明治天皇駕崩非常相似。

今日最後補充一單史料，幫助大家綜覽全局。1913年2月，社會上出現咗一個叫「同志乞丐團」，即係武俠小說裡面嘅「丐幫」，呢班人話自己曾經參與武昌革命，但係革命成功之後未能得到一官半職，有份衝但冇份分錢，所以被迫乞食，宣傳單張講明「行乞決不騷擾民間，惟擇因革命而致富者與前清貪官污吏之家」。於是黎元洪為解決事件，送咗12000蚊（大洋）畀佢哋作為遣散費，但係丐幫有成5000人，平均除開每人三個大洋唔夠？你想用萬零蚊打發佢哋走？傻的嗎？而且《臨時約法》明文規定民間有結社自由，「同志乞丐團」無需解散。

改朝換代，有人快樂有人愁，有人一夜之間發財，亦有人被迫乞食。

大家可以睇到，其實我朋友周顯講得冇錯，世界上，只有兩種人存在，一係有錢人，二係窮人。如果你係一個窮人，咁無論你喺自由民主社會抑或極權社會裡面，你都係註定悲慘嘅。相反做到有錢人，響現今世代，其實就係世界公民，香港有乜冬瓜豆腐，咪飛返英國澳洲加拿大囉，你真係吹得我脹麼？

咁又啱，完全駁唔到。周顯好嘢！

#常威 #斷送共和關袁世凱蛋牛治  #袁世凱 #民國歷史

【常威近代史】第三部《東方維多利亞女王之死》
https://play.google.com/store/books/details?id=GaGrDwAAQBAJ

【常威近代史】第二部《中國一百年前第一次開放改革》
https://play.google.com/store/books/details?id=_6KMDwAAQBAJ

【常威近代史】第一部《大清亡國關慈禧蛋牛治》
https://play.google.com/store/books/details?id=C3hjDwAAQBAJ

【常威近代史】第一部《大清亡國關慈禧蛋牛治》實體購買
https://www.382now.com/product?id=87

【常威近代史】第二部《中國一百年前的第一次改革開放》實體購買
https://www.382now.com/product?id=151

常公子 2019-9-7 11:52:42 【💣香港關 #中英聯合聲明 腿蛋治 第八回】

♒今集繼續講 #六七暴動，「#反英抗暴運動」，喺現今時勢，認清六七暴動歷史事實，有助理解今天發生響香港嘅問題，亦都可以幫助大家思考，如何突破今天的困局？世間上凡事凡物，有始必有終，任何亂局，都唔可以無休止咁延續落去，既然問題已經發生，就要想辦法解決問題，現今香港的確係行去一個好危險嘅方向，警察同示威者嘅暴力不斷升級，而且升級嘅速度非常快。

♉發生響半個世紀前嘅六七暴動，情況亦都係一樣，統治階層，當時以港督 #戴麟趾 為首嘅港英殖民地政府，響運動初期，施行強硬措施鎮壓民眾，以硬碰硬，結果帶嚟咗一場香港有歷史以嚟最大嘅精緻動盪。用時間去推斷，成場六七暴動延綿咗接近半年，直接去到1968年初，先至有緩和同平靜嘅跡象。

♉由6月12號起計，香港嘅亂局不經不覺已經進入第三個月，情況不但冇緩和嘅跡象，反而越演越烈。碎肉機真的已經開動了，任何人想獨善其身亦都唔可以，社會上出現嚴重嘅撕裂，各執己見，開始出現民眾鬥民眾，窮人鬥窮人現象，甚至連一般嘅中學生都被牽涉入內。依一個唔係一個理想嘅局面，我想提出兩點。第一，心情未成熟同 知識水平未夠嘅中學生，事實上係唔應該參與任何政治活動，你可以唔認同我，但係法定投票年齡係18歲，投票或政治需要心智成熟嘅人先能夠參與，我唔係扼殺年青人嘅自由同政治取向，我只係想保護佢哋。必須要明白，喺社交媒體做冷氣軍師講兩句宣洩自己情緒或煽動他人好容易，但係如果有人因為咁樣而要面對十年有期徒刑，係毀掉別人一生，一定要小心。所謂「#良知」，呢個係其中一個面向。

♏第二點，我想大家清楚大家追求嘅係乜嘢？做任何事情都要有目的，擦亮眼睛，清楚目標同方向係好重要。仲有一點要注意，世間上不如意事十常八九，你想去做嘅嘢，可能要負上好大嘅代價或者好長嘅時間先可以做到，我哋唔可以將事情簡單化，世間上從來都冇容易嘅事情，喺政治上更加沒有，有時候你想要十分，但係其實爭取到四分已經係大勝利，廣東人有句俗語「開天殺價，落地還錢」，其實係人間大道理，希望大家明白。

🍣 https://youtu.be/plE0FhgsXR4

【常公子近代史】第三部《東方維多利亞女王之死》
https://play.google.com/store/books/details?id=GaGrDwAAQBAJ

【常威近代史】第二部《中國一百年前第一次開放改革》
https://play.google.com/store/books/details?id=_6KMDwAAQBAJ

【常威近代史】第一部《大清亡國關慈禧蛋牛治》
https://play.google.com/store/books/details?id=C3hjDwAAQBAJ

【常威近代史】第一部《大清亡國關慈禧蛋牛治》實體購買
https://www.382now.com/product?id=87

【常威近代史】第二部《中國一百年前的第一次改革開放》實體購買
https://www.382now.com/product?id=151

常公子 2019-9-9 18:28:02

【常威近代史】（二百四十回）
袁世凱平反系列

1911至1913年，中華民國草創初期，國父孫文嘅實際影響力同能力一直被跨大。自從1905年起，孫文嘅革命活動同中國長江流域一帶嘅革命份子，基本上係完全割斷。係各有各做，孫文有份參與嘅1911年春天廣州黃花崗起義行動，其實規模同埋影響力，都係畀後世國民黨歷史撰稿人誇大咗。

真正推翻滿清政府嘅武昌起義，其實孫文並沒有參與其中，甚至係起義爆發之後佢先響美國收到風，加上佢長期留居海外，佢對中國內部革命事業嘅實際參與程度，其實相當之細，起碼遠遠唔及黃興、宋教仁。之後佢回國，被推舉為中華民國臨時大總統，係由於佢喺國際社會上嘅聲名同影響力，當然孫文響國際間嘅影響力（或借款能力），事後證明亦都係陀地革命黨人對佢嘅一個美麗誤會。

呢個亦都係好多香港怪獸家長，以為啲仔女「去過外國留學，啲英文就會勒勒聲」嘅美麗誤會。其實好多人去留學去讀野雞，都係吃喝玩樂，群埋成班香港人圍爐，食下大麻，溝吓女，溝吓你，父母使咗幾百萬棺材本畀你出去威，書就冇乜讀過，玩足四年，叫你好我好。

孫文本身，係革命嘅象徵符號，用今日嘅語言，係KOL同代言人，做代言人未必一定要用宣傳片段裡嘅護膚品。孫文嘅意識形態作用大於佢嘅實際政治作用，之後孫文禪讓佢個大總統位置比袁世凱，更加引起陀地革命黨人嘅極端不滿，佢哋覺得孫文對袁世凱妥協，係投降主義。最起碼宋教仁就係咁諗，宋教仁從來冇表面同孫文決裂，但係佢唔妥孫文就一定。

簡單啲講，宋教仁覺得自己係做實事係衝嗰個，而孫文係做虛事攞光環，1912年8月，當宋教仁籌辦「國民黨」參與國會大選時，佢將孫文個名排響第一位，純粹俾面國父個朵，其實佢完全冇侵孫文玩……

用政治意識形態，亦都有另一個解讀。

宋教仁深深信奉美國嗰套自由民主國會兩院責任內閣制，係堅定不移嘅Donald Trump支持者。相反，睇返孫文嘅三民主義，要求平均地權，重新分配社會財產。大家千祈唔好避，歷史事實話俾我哋知，孫文其實係一個100%社會主義者、馬克思主義者。當時俄國十月革命尚未發生，共產主義仍然未變成現實。但係列寧、托洛斯基同一群社會主義者，佢哋信奉馬克思主義嘅言論已經係歐陸廣泛蔓延。

當時身處中國嘅革命者，因為資訊不發達同唔識英文，可能完全唔知道左翼勢力響西方資本主義世界高速崛起嘅事實，但孫民長期居留海外，佢一定會知道，而且事後證明，佢亦比左翼思想同馬克思主義深深控制思想同行為模式。孫文之後同蘇共第一國際行埋，聯俄容共，坐埋一條船，堅信黨政合一，搞極權統治，斷送共和，大家一清二楚。

作為馬克思主義者，對美國嗰套自由民主制度，會視之為精英主義，係社會上嘅資產階級同上層建築利用議會同代議政制手段，操控同剝削普羅大眾無產階級。將窮人勞動力所產生嘅財富（資本），利用政治同制度，一步一步高度集中響少數上層建築精英階級手裡面，令富者越富，貧者越貧。

你問心嗰句，馬克思主義其實冇錯，係金科玉律，我自己都信，孫文又信又有幾咁奇怪？

孫文1912年去北京開完四巨頭會議，發表咗一堆摸不著邊際嘅說話後，佢就正式接受袁世凱收編，做其「鐵路督辦」，高薪厚職，每月可以領取三萬元經費，享有「籌畫全國鐵路全權」。實際上，呢個舉動，係孫文宣佈正式淡出政治舞臺，用香港人話講，「我而家唔撚玩喇，宋教仁你玩撚曬佢啦」。

我有一點想提出，孫文依個人，其實係一個非常之有毅力嘅追夢者，你睇佢由1895年玩革命開始，中間經歷無數波折，雖然有起有落，但係從來冇放棄過你就知道。佢唔係普通人，同時亦係一個聰明人，一個聰明人，同時又有堅定不移盲目追夢嘅意志力，依種人其實非常可怕。

袁世凱比個虛職你做，孫文亦都貫徹中國人個套和稀泥玩法，同你虛做。實事免問，佢乘坐慈禧太后嗰架專列，周遊北方諸省，發表佢嘅偉大鐵路藍圖，指手劃腳，亂講一通，搞到俾人叫做孫大炮，你估佢真係亂嚟？傻的嗎？上面講過孫文係聰明人，亦係馬基維利主義者候選者之一，做表面功夫，扮低能，扮弱智，無非都係想削弱政治對手嘅注意力，依一招難度好高。至於佢嘅政治對手係袁世凱？宋教仁？抑或兩個都係？大家自己諗。

政治本身係一個詭局，孫文究竟想點？我哋下次繼續……

【常威近代史】第三部《東方維多利亞女王之死》
https://play.google.com/store/books/details?id=GaGrDwAAQBAJ

【常威近代史】第二部《中國一百年前第一次開放改革》
https://play.google.com/store/books/details?id=_6KMDwAAQBAJ

【常威近代史】第一部《大清亡國關慈禧蛋牛治》
https://play.google.com/store/books/details?id=C3hjDwAAQBAJ

【常威近代史】第一部《大清亡國關慈禧蛋牛治》實體購買
https://www.382now.com/product?id=87

【常威近代史】第二部《中國一百年前的第一次改革開放》實體購買
https://www.382now.com/product?id=151

常公子 2019-9-10 12:25:15 【173回：大清亡國關 #大公報 蛋牛治】

♉今集Youtube，繼續講意識形態操控技術，要發動一場政變，或者展開一次革命，或者好似孫文咁樣改朝換代，必須由意識形態開始，意識形態喺一切實際行動嘅基建。用我嘅講法，即係有一個「口實」，做任何事情必須有一個「口實」或「動機」，而「動機」本身係概念化，唔係實質嘅，所以係可以被隨意塑造出嚟。

♉20世紀之前，「中華民族」呢個概念根本唔存在，當時嘅清國人，只係覺得自己係尊貴慈禧太后統治下嘅蟻民百姓，覺得冇乜嘢唔妥。直至中華民族被創造出來，廣大貧苦勞動大眾先感覺到需要一個新嘅身份認同，要做「中國人」，唔做「清國人」；要成為獨立自主自力更生中華民族一員，再唔要做外族滿清權貴極權統治下嘅奴隸。呢個轉變就係意識形態嘅轉變，用另一個詞去形容，叫「開啟民智」。

♈而創造意識形態，必須透過語言文字，20世紀初，控制文字出版，取得最大話語權，基本上就係「有可能」控制意識形態；到咗今日，文字語言嘅傳播，唔再侷限於報紙書籍，所以就要控制所有媒體。社會不斷在進步，早二三十年，只要控制電視台電台就搞掂，今日進入互聯網世界，資訊澎湃洶湧，講真，除咗採用極權手段強硬過濾或封鎖之外，根本冇辦法控制所有媒體。

⛎意識形態操縱技術又被稱為「洗腦」，呢個講法好有問題，如果人類嘅大腦係定義作為收集資訊而作思考嘅器官，咁你可以想像佢本身係一張白紙，可以任意寫上任何內容，意識形態就係內容，至於邊個首先填上內容（應該係父母同老師）或之後內容用乜嘢技術被修改或重設，其實係一個相當之複雜嘅機制，到咗今時今日，並未有任何科學嘅方法可以充分掌握依種修改或重設意識形態嘅機制。用人話去講，個腦唔係話洗就洗，要洗人個腦相當困難，當然你話「其他人俾人洗咗腦」就好容易，你試下搵個人企喺你面前，唔該你幫佢洗腦，請問你點洗呢？用洗潔精洗？抑或用百潔布洗？

♌如果洗人哋個腦係咁簡單，又或者講，控制媒體就可以進行大規模洗腦活動，咁統治世界或整個銀河系應該好容易，但係偏偏，意識形態本身其實唔能夠百分百被操縱，有時你太刻意去做，反而得到嘅反效果（特區政府推通識教育就係最佳例子），有時無心插柳，又有可能掀起一次社會革命，講真其實冇人知。上述一大堆說話其實係廢話，講咗等於冇講。

♎【#常公子近代史】語音導航！請大家幫手「#訂閱」我條常公子YoutubeChannel！同埋介紹多啲人睇睇！衝上2000訂戶！

🍳https://youtu.be/t4Ew9pBJ07s

【常威近代史】第三部《東方維多利亞女王之死》
https://play.google.com/store/books/details?id=GaGrDwAAQBAJ

【常威近代史】第二部《中國一百年前第一次開放改革》
https://play.google.com/store/books/details?id=_6KMDwAAQBAJ

【常威近代史】第一部《大清亡國關慈禧蛋牛治》
https://play.google.com/store/books/details?id=C3hjDwAAQBAJ

【常威近代史】第一部《大清亡國關慈禧蛋牛治》實體購買
https://www.382now.com/product?id=87

【常威近代史】第二部《中國一百年前的第一次改革開放》實體購買
https://www.382now.com/product?id=151

常公子 2019-9-11 13:12:46


【常威近代史】（二百四十一回）
袁世凱平反系列

男人最怕，係中年危機。1912年嘅冬季，孫文明顯陷入佢嘅中年危機。表面比袁世凱收編搞「鐵路督辦」，革命事業長江後浪推前浪，陀地宋教仁新一代戴頭盔推鐵馬玩曬，作為革命第一代KOL，佢絕對唔會咁易放手。

乘坐慈嬉太后專列穿梭北方各省，招搖過市。響列車上面，有一個好重要嘅人，叫Charle，宋嘉澍（1863-1918），冇聽過？佢嘅仔女你應該聽過，有宋子文、宋藹玲、宋美齡同宋慶齡。Charle係上海一個牧師，亦係一個有錢佬，佢亦係孫文嘅好朋友。孫文任命佢管理鐵路嘅財務，當時Charle個大女宋藹齡都喺火車上，做孫文嘅英文秘書。

孫文這個傢伙，不愧為蘿莉控之首，佢喺旅途之上，愛上咗宋藹齡，當時孫文己經46歲，宋藹齡23歲，年紀相差足足一倍，但孫文覺得冇問題，佢就係鍾意食幼齒，孫文響曬朵迷戀佢，可惜最後佢溝唔到佢，宋藹齡第二年下嫁另一民國猛人孔祥熙。孫文就退而求其次，溝佢細妹宋慶齡，宋慶齡最後亦都成為咗我哋嘅國母，更加成為咗中國共產黨於國民黨內最大嘅一條針。宋家三姊妹，剩低嘅一個宋美齡，亦下嫁蔣介石，全部都係傳奇人物，全部都係傳奇故事。

宋家皇朝，梗係唔係講笑。首先書香世代，宋嘉澍是北宋三朝宰相韓琦的二十九代孫，N世代有錢人。另外有一個傳聞，話宋嘉澍身為牧師，其實係一個出版商，佢出版乜嘢書？嗰本書叫《Holy Bible》，中文叫《聖經》，有史以來全球最暢銷書籍（沒有之一）。總之宋嘉澍係自由城邦上海一個大財閥，因為教會條line，佢同英美兩國關係非常密切。宋嘉澍，令我諗起之前嘅一個大人物李提摩太牧師（1845-1919），我曾經講過李提摩太絕對唔係普通傳道人，佢應該係大英帝國軍情六處嘅人，係006。其實做間諜，有乜嘢好過以教會同埋學生嘅身份作為掩飾呢？

間諜，就係用嚟刺探他國情報。但係間諜呢個職業唔可以講畀人知，如果唔係就唔係間諜。所以間諜要用另一個身份掩飾自己，無端端進入另一個國家刺探情報，唔通你入境嗰陣喺職業欄上填「Spy」？所以從前，從外國而嚟嘅傳教士，就係間諜最好嘅掩飾。我個人相信，19世紀晚清至20世紀初活躍於中國嘅傳教士，有一半以上其實係間諜。今時今日，就係留學生。我朋友話我知，目前香港大學中文大學攻讀博士生嘅人，有七成以上係內地朋友。我常公仔聲明，我相信依群純粹研究學術啲內地朋友，絕對唔會係間諜！但響美國，早前美國總統特朗普就講過，十個中國留學生，十個都係間諜，偷情報？OutDate啦關二哥，偷科技呀懵撚！

孫文黐埋宋家，真正動機大概心知肚明，乜嘢蘿莉控啊戀愛啊要生要死啊，統統只係手段啫。搞革命要錢，任何嘢都要錢。而最快得到錢嘅方法，古往今來都係一招，就係姻親關係。嫁個有錢人，公屋妹可以住去山頂，飛黃騰達就在一夜之間。同樣道理，娶個有錢老婆，亦都係唔少有錢佬發達嘅理由，李嘉誠吳光正鄭裕彤，全部都係娶個有錢老婆發達，大家可以同朕上維基check check。

孫民詐傻扮懵，呢幾個月，一邊亂鳩咁吹鐵路大計，要鐵路軌鋪上海拔15000尺嘅高度（註一），分散敵人注意力，另一邊努力溝女，誓要搵到新水喉繼續玩落去。

去到1913年春天，國會大選嘅選情逐漸明朗化，由宋教仁領導嘅國民黨，勢必獲得大勝，取得壓倒性議席數目。有一點要提提大家，選戰過程中，宋教仁有去見過真國父黃興，但冇見過孫文。

1913年2月11號，國會選舉塵埃落定之前，孫文同黃興分別前後腳去咗日本。表面上，孫文去日本係傾借錢起鐵路事宜，但係真相我並唔係咁諗。日本人一向係孫文最大嘅靠山，難聽啲講，孫文係同日本人做事（當然唔係做間諜，堂堂國父點會係日本人間諜呢？），佢去日本，一定係有更重要嘅大計要傾。之後宋教仁被刺殺之時，其實孫文仍身在大日本帝國……

下一集，國會大選結果出爐……

註一：呢個講法，係袁世凱嘅顧問莫理循（G. E. Morrison）所收一封信內提及，孫文嘅鐵路藍圖，要響十年內修建20萬英里鐵路，粗略估算，至少需要動用160億法郎，完全亂嚟，幼稚得令人發笑。但我相信，孫民係故意咁做，分散敵人視線。

#常威 #斷送共和關袁世凱蛋牛治  #袁世凱 #民國歷史

【常威近代史】第三部《東方維多利亞女王之死》
https://play.google.com/store/books/details?id=GaGrDwAAQBAJ

【常威近代史】第二部《中國一百年前第一次開放改革》
https://play.google.com/store/books/details?id=_6KMDwAAQBAJ

【常威近代史】第一部《大清亡國關慈禧蛋牛治》
https://play.google.com/store/books/details?id=C3hjDwAAQBAJ

【常威近代史】第一部《大清亡國關慈禧蛋牛治》實體購買
https://www.382now.com/product?id=87

【常威近代史】第二部《中國一百年前的第一次改革開放》實體購買
https://www.382now.com/product?id=151

常公子 2019-9-12 11:24:16 【174回：大清亡國關 #共業 蛋牛治】

♉「共業」是一個佛家名辭，佛學講因果，世間一切現象，背後都是無數因緣和合而產生呈現。眼前出現嘅果，係之前無需條件交錯綜合而製造出來，並非無緣無故產生（沒有無緣無故的愛，也沒有無緣無故的恨）。這是佛學「緣起法」中，「此生故彼生，此滅故彼滅」對世界萬象嘅基本認知。但由於任何哲學和宗教必須為世間道德立法，於是放到日常生活中，就產生咗「果報」的概念，奉勸世人遵守「種善因，得善果」嘅基本道德法則。

♉再簡單啲講，即係好心會有好報，而做得壞事多（作業），一定會有報應。但係問題來了，平生不作虧心事（業），循規蹈矩依從道德規條做人，即係做一個好人，正人君子，點解最後災難都會燒到埋身？碎肉機明明唔係自己開動，點解最後會碎埋自己？如果係咁？佛教中嘅道德規條如何立法？如何成立？為咗解決呢個我哋日常面對嘅道德困境，佛家提出共業理論，業雖然不是由自己所作，是他人所作，但一群人組成社會及國家一同生活，喺一個共同體裏結成一張因緣巨網，每個人所作的輕微之業，總是會累積起來，到最後不但報應自身，更會株連他人。

♑睇過劉德華主演嘅「大隻佬」未？張柏芝畀癲佬殺死，割下人頭掛喺樹上，係枉死。劉德華飾演嘅大隻佬冇辦法接受呢個現實，千里追兇，到最後，知道張柏芝嘅前世係殺人嘅日本兵，結果報應於現世，係一種因果相續。但係背後更深層嘅意義係，今世嘅張柏芝冇做過壞事，悲慘命運係因為前世所作嘅業而來？輪迴果報呢個唔係最後嘅答案，最後嘅答案係因共業而生，換句話說，殺死張柏芝並非一個顛佬，而係隱藏於眾人心裏面嘅仇恨同怒火。

♈今日香港，仇恨大爆發。唔少人冷眼旁觀，覺得所有責任出於年青人身上，但我真心想問，點解年青人會對香港社會有咁大嘅怨恨？呢個社會恰恰就係上幾代人共同所建立出來。如果香港社會，係一個公平合理美麗仁愛嘅世界，活響內中嘅年青人，又點會有咁大嘅怨恨？當上岸嘅一輩，不斷炫耀自己嘅財富同能力，不斷穩住自己嘅既有利益橋頭堡，唔願意體諒關懷同幫助提攜年輕一輩接棒，仍然義無反顧將貧富懸殊嘅鴻溝越拉越開，現在年青人對現狀表示抗議，你就藤條打仔，希望打到佢貼貼服服，但我好想講畀大家知，每一次打仔，係累積一次共業，如果仇恨冇辦法褪卻同疏導，共業只會不斷累積下去……而下一次嘅爆炸，可能就係真正嘅炸彈（菠蘿）。

♎【#常公子近代史】語音導航！請大家幫手「#訂閱」我條常公子YoutubeChannel！同埋介紹多啲人睇睇！衝上2000訂戶！

🍳https://youtu.be/DXv4-xkTWlo

【常威近代史】第三部《東方維多利亞女王之死》
https://play.google.com/store/books/details?id=GaGrDwAAQBAJ

【常威近代史】第二部《中國一百年前第一次開放改革》
https://play.google.com/store/books/details?id=_6KMDwAAQBAJ

【常威近代史】第一部《大清亡國關慈禧蛋牛治》
https://play.google.com/store/books/details?id=C3hjDwAAQBAJ

【常威近代史】第一部《大清亡國關慈禧蛋牛治》實體購買
https://www.382now.com/product?id=87

【常威近代史】第二部《中國一百年前的第一次改革開放》實體購買
https://www.382now.com/product?id=151

常公子 2019-9-13 19:22:24

【常威近代史】（二百四十二回）
袁世凱平反系列

去到1913年頭，國民黨喺國會選舉將會大勝嘅消息，其實全世界都知。當時，好多人想推舉真國父黃興做總理（唔係孫文），但黃興退位讓賢，將個位留畀後生宋教仁。

3月，正式選舉結果出爐，由宋教仁領導嘅國民黨，以絕對優勢成為國會中第一大黨。宋教仁打出咗一場最漂亮嘅選戰，為中華民國法統自由民主國會選舉之路，踏出最光輝嘅第一步，但係非常可惜，就只係得依一步……中國人命運的悲慘，由此可見。講真，如果呢個世界有天，有上帝嘅話，咁天同上帝從來冇幫過中國人，佢哋只係幫西方人。

響參眾議院合計嘅870個議席之中，國民黨取得392席，對手共和黨、統一黨、民主黨合計獲取223席。國會將被國民黨控制，作為國民黨黨魁宋教仁，根據臨時憲法，亦會代替時任嘅國務總理趙秉均出任國家總理。3月8號，宋教仁響北京發表勝利演說，提出政策大方針，主張全面效法英美，採用責任內閣制。宋教仁的政綱，無疑進一步削弱咗大總統即係袁世凱嘅權力。

而身在北京嘅袁世凱，亦都公開承認國會選舉國民黨大勝呢個事實，並且邀請宋教仁北上，主持召開中華民國國會同履任總理事宜，形勢的確一片大好。呢個時候嘅孫文，身在日本，3月11號，佢被日本朝日新聞社邀請，響大阪發表「大亞洲主義」演說，宣傳緊大日本帝國嘅大東亞共榮圈嘅理念。

3月20號，中國歷史上面好重要嘅一日，宋教仁應袁世凱嘅邀請北上，響上海滬寧車站畀黑社會槍手行刺，腰部中彈。佢被送到醫院接受手術，但係未能夠挽救佢嘅生命，3月22號朝早，宋教人死亡，享年30歲。

佢寫下嘅遺囑係咁：

「今以三事奉告：一、所有在南京、北京及東京寄存之書籍，悉捐入南京圖書館；二、我本寒家，老母尚在，如我死後，請克強與公及諸故人為我照料；三、諸公皆當勉力進行，勿以我為念，而放棄責任心。我為調和南北事費盡心力，造謠者及一班人民不知原委，每多誤解，我受痛苦也是應當，死亦何悔？」

臨死之前，宋教仁並無怨懟，一心都係渴望南北團結，渴望中華民國能夠走上自由民主法統之路。「我受痛苦也是應當，死亦何悔？」一句，錐我心蝕我骨。同時，佢亦拜託黃興，畀咗一份電報袁世凱。

「北京袁大總統鑒：仁本夜乘滬寧車赴京，敬謁鈞座。十時四十五分在車站突被奸人自背後施槍彈，由腰上部入腹下部，勢必至死。竊思仁自受教以來，即束身自愛，雖寡過之未獲，從未結怨於私人。清政不良，起任改革，亦重人道、守公理，不敢有毫權之見存。今國基未固，民福不增，遽爾撒手，死有餘恨。伏冀大總統開誠心、布公道，竭力保障民權；俾國家得確定不拔之憲法，則雖死之日，猶生之年。臨死哀言，尚祈見納。宋教仁。哿。」

最後心願，亦希望大總統袁世凱能夠尊重憲法，保障民權，維持法統，好可惜，隨住佢嘅死，佢嘅願望亦都唔會有實現嘅一日。

宋教仁之死，引起嘅震動係空前巨大，全國嘩然，人民悲憤莫名，尤其是革命黨人，似乎唔使諗，真正兇手就係袁世凱。響北京，輿論認為暗殺事件係國民黨內部爭奪領導權而發生，宋教仁之死，眾說紛紜，直到今日仍然冇一個定案，係一個千古謎團。

刺殺行動嘅直接教唆者江蘇駐滬巡查長應桂馨（1864-1914）響3月23日響上海公共租界被捕，佢係青幫成員，革命界知名人物，有錢仔，中過秀才仲識英文，佢係陳其美嘅手下。真正槍手武士英亦響第二日喺法租界落網，佢係一個失業軍人。響應桂馨屋企，上海巡捕抄查出佢同國務總理趙秉鈞、袁世凱國務院機要秘書洪述祖（1855-1919）之間策劃呢次暗殺嘅密碼電報同信件，不過，咁確鑿嘅證據會唔會太X明顯呢？但係證據顯示，行刺宋教仁嘅元兇，就係國務總理趙秉鈞，係袁世凱總統辦公室，行前一步，即係袁世凱本尊。

北京方面，當然完全唔認同上海當局搵出嘅所謂「真相」。4月24日，槍手武士英仲喺獄中神秘死亡。5月，上海地方審判廳發出傳票，要求國務總理趙秉鈞出庭應訊，但趙秉鈞當然唔會由北京去上海受審啦？結果拖吓拖吓，件事就不了了之。大家唔需要覺得奇怪，呢個唔係中國特有嘅情況，1963年，美國總統約翰甘迺迪被行刺，事後嘅處理亦都係差唔多，總之兇手搵到出嚟，佢認咗罪，之後神秘死亡，close file。

1968年6月6日，甘迺迪細佬羅伯特（Robert F. Kennedy）響勝出民主黨初選，決定出戰美國總統大選前，亦都被槍手行刺而死，件事亦都係求九其close file，不過要提一提，槍手約旦公民Sirhan Sirhan冇死，目前仍響美國服刑。

關於宋教仁行刺案，我哋下次繼續講。

#常威 #斷送共和關袁世凱蛋牛治  #袁世凱 #民國歷史

【常威近代史】第三部《東方維多利亞女王之死》
https://play.google.com/store/books/details?id=GaGrDwAAQBAJ

【常威近代史】第二部《中國一百年前第一次開放改革》
https://play.google.com/store/books/details?id=_6KMDwAAQBAJ

【常威近代史】第一部《大清亡國關慈禧蛋牛治》
https://play.google.com/store/books/details?id=C3hjDwAAQBAJ

【常威近代史】第一部《大清亡國關慈禧蛋牛治》實體購買
https://www.382now.com/product?id=87

【常威近代史】第二部《中國一百年前的第一次改革開放》實體購買
https://www.382now.com/product?id=151

常公子 2019-9-14 11:02:28 【💣香港關 #中英聯合聲明 腿蛋治 第八回】

♒昨日月滿香江中秋節，社會氣氛有緩和落嚟嘅跡象，「榮光歸香港」各區唱到遍地開花，眼看未來，香港人會更加團結，香港人加油！同樣，經過今次嘅亂局，統治階層亦都非常明白，再唔改善社會現況，下一鑊只會更大鑊。

♍特區政府除咗撤回逃犯條例同派糖之外，呢兩日仲有大動作，就係大力向地產商開刀，首先部署通過物業空置稅，想起十多年前，「空置稅」係香港一個禁忌話題，同「港獨」兩個字有得揮，任何文人只要係文章裏面寫過空置稅三個字，就會即刻冇得撈，其恐怖程度只有局內人先至會清楚，一般人根本唔知道發生乜嘢事，香港地產霸權嘅威力，就係咁可怕。

♊除咗用空置稅向地產商開刀，逼佢哋唔可以再囤積居奇外，特區政府亦會響可見將來，提高香港土地供應，第二招就係逼啲地產商交還一早囤積落嚟嘅大量新界農地，香港樓價高企，就係一直求過於供，如果能夠大刀闊斧增加土地供應，樓價回落應該係正常反應。

♑李嘉誠早兩日出嚟講要寬大處理示威者（拋出大和解方案，我個人非常欣賞），城哥搶曬光環，民建聯翌日發表文章，指責香港物價樓價高企，民怨爆燈，各大地產商先至係罪魁禍首。似乎中央政府借力打力，要將矛頭直指向地產霸權，我作為一個社會主義信徒，亦信奉經濟同政治直接掛鉤，我當然認同上述講法，地產霸權過去喺香港賺easy money賺到盡，令香港樓價位處世界第一，深入理解的確係香港矛盾嘅最大根源。你當然可以唔認同我嘅講法，可以認為香港人嘅怨恨，大部份係嚟自中央嘅極權統治，呢個係大家觀點與角度嘅問題。

🔯政冶本身，係一個非常之複雜嘅技術性問題，將一切問題歸咎於「地產霸權」，其實亦都係一個過度簡化嘅講法。不過今個夏天發生喺香港嘅事情，至少可以得到一個清晰嘅答案：「就係香港本身的確充滿住嚴重問題」，用小學生嘅語言，「個社會病咗」，人有病要搵醫生救，社會有病，亦都要對症下藥。至於如何用藥？大概已經超出我呢個讀書唔多、廉價文人能夠處理嘅範疇。

🍣 https://youtu.be/V6SuV-D_9Yw

【常公子近代史】第三部《東方維多利亞女王之死》
https://play.google.com/store/books/details?id=GaGrDwAAQBAJ

【常威近代史】第二部《中國一百年前第一次開放改革》
https://play.google.com/store/books/details?id=_6KMDwAAQBAJ

【常威近代史】第一部《大清亡國關慈禧蛋牛治》
https://play.google.com/store/books/details?id=C3hjDwAAQBAJ

【常威近代史】第一部《大清亡國關慈禧蛋牛治》實體購買
https://www.382now.com/product?id=87

【常威近代史】第二部《中國一百年前的第一次改革開放》實體購買
https://www.382now.com/product?id=151

常公子 2019-9-16 10:00:50

【常威近代史】（二百四十三回）
袁世凱平反系列

究竟邊個係殺死宋教仁嘅真兇？歷史上冇人講我哋知（其實講吐）。正史記載，宋教仁死於袁世凱之手，袁世凱係最大嘅嫌疑犯。但事後睇返，宋教仁嘅死對袁世凱不但無好處，而且傷害最大，因為宋被行刺，先至產生之後嘅第二次革命，搞到打仗，個個都知道打仗洗費最大，袁世凱當然唔會咁蠢X。

而且以袁世凱當時嘅勢力，直屬佢直接聽佢指揮嘅北洋軍隊接近十萬人，盤踞於首都北京華北一帶，三十歲嘅宋教仁北上，就算真係做到總理，難道佢又可以飛得出袁世凱嘅五指山？而且地緣政治，宋教仁要離開南方根據地，政治威力就會大減。加上第一屆中華民國國會召開，百廢待興，經驗又不足，係唔係好似後世咁理解可以制衡大總統袁世凱嘅絕對權力？亦都好難講。

如果我係袁世凱，我直情會捧起同收編宋教仁，因為論武力論年齡論資歷論社會經驗，袁先生都贏九條街，之前袁世凱已經收編咗孫中山同黃興，難道收編宋教仁會有問題嗎？所以，袁世凱無理由要殺宋教仁，後世歷史學者，都將當時宋教仁對聯世凱權力嘅威脅描繪得太大，亦即係講，對宋教仁如果唔死，之後所能夠做嘅事誇張咗幾倍。

劉仲敬講得好好，「在這個短暫的天真時代，很多人都相信事在人為」。

好，第二號嫌疑犯就係自己人孫文。宋教仁之死，到咗最後，得到最大益處嘅人就係奪命書生孫文，因為宋之死，令孫文一步一步重拾革命黨實際領導權，東山再起，打出人生最後光輝一役，為中國歷史寫下新一頁，即係「發動內戰、黨政合一、聯俄容共，推倒共和」。咁，奪命書生孫文究竟有冇奪宋教仁嘅命呢？理由似乎好充分，但係如果睇返當時形勢，孫文的確淡出政治圈子，佢手上面動用嘅籌碼亦唔多，而且暗殺手段亦都唔係讀書人孫文慣用嘅達成政治目的嘅手法。

作為一個日本代理人，又會唔會係日本人要佢去殺宋教仁呢？答案我亦唔認同，因為日本基本上就係行緊自由民主議會制度，宋教仁做嘅嘢係佢哋杯茶，而且宋可以制衡一直唔聽日本人話袁世凱，何樂而不為？加上冇日本嘅批准，孫文就算自己想亦都唔可以做。

第三號嫌疑犯係當時嘅國務總理趙秉鈞，歷史文本上正式嘅主謀，後世人所持嘅理由係，宋北上，就會取代趙秉鈞嘅總理位置。呢個說法亦唔成立，當時草創嘅中華民國，甚至到咗現在，都係人治領先法治，一個人嘅實際權力，並唔係因為佢擔當乜嘢職位，所謂官位，有時候虛衑嚟啫。可以肯定，以趙秉鈞橫跨清朝民國兩代盤根錯節嘅政治勢力，佢絕對無理由為咗「總理」呢個職位刺殺宋教仁。

有一個講法，係趙秉鈞摸錯咗袁世凱嘅心意，以為主子真係想殺宋，結果自把自為，惹火上身。呢個講法有可能，但係如果成立，袁世凱同趙秉鈞未免太蠢，但事後睇返，佢兩個都唔會係蠢人。袁世凱係軍人出身，尊崇德國人普魯士傳統練兵多年，好明白由上而下嘅軍紀重要性。所以呢種錯摸主子心意出事嘅推測，成立嘅可能性唔大。

最後一個嫌疑犯，當時上海青幫頭目陳其美。陳其美係乜野人，大家都一清二楚，作為一個黑社會，殺人佢當食生菜。之前革命同志陶成章就係死於陳世美手下。仲有暗殺陶駿保、夏瑞芳、鄭汝成等異己。當時陳世美嘅勢力盤鋸上海灘，控制中國國內呢個自由城邦嘅巨大金庫，權勢之大，甚至喺黃興孫文之上。

陳宋早已不和，宋教仁要行嘅自由民主國會制度，與其話會傷害袁世凱中央嘅勢力，不如講，對其他自立山頭盤踞一方嘅割據勢力影響仲大，陳其美就係其中一個好例子。假如畀你去到北京，召開國會，真係行法統，中華民國到咗之後真係確立強勢中央，咁我嘅上海咪註定俾你收編？

陳其美同其黨羽，亦曾經直斥宋教仁「叛黨」，北上去投靠袁世凱。所以我個人感覺，綜合種種條件，殺死宋教仁嘅，最大機會係陳其美。而且案中教唆犯應桂馨本來就係青幫成員，之後發現嘅所謂證據，全部喺陳其美勢力範圍之內出現。最大嘅可能性係，真兇係陳其美，而佢就將隻死貓質咗比趙秉鈞袁世凱食。

又有一個講法要補充，有人話就算係陳其美做，都係孫文係背後所指使。當時1913年頭的局面，孫文能否控制陳其美？我好有疑問，就算陳其美係聽order做嘢，都只會係聽當時身處上海嘅革命黨最高元老真國父黃興，但以黃興嘅仁厚性格，同埋佢與宋教仁嘅深厚交情，冇可能係黃興下手。

當然一切純屬我自己推測，同真實歷史真相無關。

最後呢個中國革命第一大功臣陳其美亦響1916年死於暗殺，行刺佢嘅幕後元兇，又話係袁世凱喎。

響宋教仁嘅葬禮上，真國父黃興送嚟嘅輓聯係「前年殺吳祿貞，去年殺張振武，今年殺宋教仁；你說是應桂馨，他說是洪述祖，我說確是袁世凱。」革命黨人統一口徑，矛頭直指中央袁世凱。

袁世凱派遣咗當時工商總長、同黃興宋教仁係老朋友嘅劉揆一（1878-1950）參加宋教仁喪禮，劉揆一帶咗袁世凱嘅密訊，嘗試同革命黨人修補關係，但係革命黨人拒絕咗呢個建議。劉揆一未能完成斡旋任務，返番北京後亦都向袁世凱辭職。

宋一死，火頭點著咗，袁世凱亦都知天下隨時大亂，4月頭，中華民國第一屆國會依舊響北京召開嘅同時，佢亦調動北洋軍隊，密令張勛同山東都督周自齊作軍事準備，隨時預備南方革命黨人嘅兇猛軍事報復行動。

#常威 #斷送共和關袁世凱蛋牛治  #袁世凱 #民國歷史

【常威近代史】第三部《東方維多利亞女王之死》
https://play.google.com/store/books/details?id=GaGrDwAAQBAJ

【常威近代史】第二部《中國一百年前第一次開放改革》
https://play.google.com/store/books/details?id=_6KMDwAAQBAJ

【常威近代史】第一部《大清亡國關慈禧蛋牛治》
https://play.google.com/store/books/details?id=C3hjDwAAQBAJ

【常威近代史】第一部《大清亡國關慈禧蛋牛治》實體購買
https://www.382now.com/product?id=87

【常威近代史】第二部《中國一百年前的第一次改革開放》實體購買
https://www.382now.com/product?id=151