【大清亡國關慈禧蛋牛治】第一回
上一頁
第 21 頁
下一頁
常公子
2019-8-2 21:11:02
:^(
【常威近代史】（二百二十三回）
袁世凱平反系列
當1911年12月18號，南北議和談判開始，孫文仍然未抵達中國。孫文響1911年嘅革命過程裡面，其實作用全無。推翻滿清，其實唔關孫文事。但係佢始終係整場中國革命嘅代表人物，起碼響西方傳媒世界，就冇人識真國父下下衝鋒陷陣嘅肥佬黃興，只有人識風度翩翩、一口流利英語同爛國語嘅孫文。現代世界我哋叫KOL或品牌代言人。用一個人嘅名字，囊括背後大堆人嘅行為同事蹟，亦係歷史上常見嘅解讀方法。
希特拉屠殺500萬猶太人，其實唔係淨係關希特拉事，更加唔係納粹黨班人一意孤行就可以成功，仲要成個國家（或其它國家）嘅人民配合同支持先可以成事，反猶主義唔係希特拉發明，但到咗最後，條罪就由希特拉同納粹黨小部份人受曬，好多有份殺人嘅殺人犯同幫兇都逍遙法外，個世界冇公平。同樣道理，二十世紀中葉中國領導人毛澤東引發嘅連串大災難，死幾千萬人，亦唔係由佢一個人嘅意志可以主宰。最高領導人發號施令，下面嘅人幫手執行，或者推波助瀾，唔通冇責任咩？
以前有套電影叫《暴劫梨花》，影后茱迪科士打做，內裡講嘅，就係要千方百計起訴喺側邊睇住件強姦案發生、純粹起閧叫囂嘅花生友。今時今日，香港有唔少政客或公務員（即叫官嘅物體或者叫特首），以打好呢份工、全力執行上頭指示為榮，全無個人意志，上頭話乜就做乜，完全冇理會香港人嘅感受，呢種西人同機械人冇分別，人工智能AI發展落去，依種角色遲早一定會被取代。
我成日講一個問題，如果冇心做教育或自己品行唔好（好似我常公仔咁戒唔到煙又鍾意賭馬），就唔好撈教師，因為會誤人子弟。同樣道理，如果你唔係真心為香港人好，如果你唔係真心捍衛香港人嘅權利，唔該你唔好做狗官或狗政客，個世界好X多嘢做，以你班官同政客嘅能力同埋學歷，其實求其去一間上市公司撈個高薪厚職，分分鐘仲搵得多個做官做議員。何必拋個身出來獻世？唔通你真係好鍾意日日俾市民X你老母？你哋其實有冇理會過家中老母嘅感受？
講返1911年，南北和談會議第一輪響自由城邦上海傾咗兩日（成個和談其實傾咗五輪，由1911年12月18日傾到1912年2月5日，傾咗成50日），12月20號，大家有咗初步共識同綱領，包括召開國民會議（即國會），確立共和政體，優待清室退位等等。由10月10號武昌打起第一槍開始，都12月中，前後兩個半月，改朝換代成為事實。其實響時間方面係非常之快。冇大規模內戰發生，真係要多謝袁世凱。局勢暫時緩和，12月25號聖誕節，紀念耶穌基督降生，同日救世主孫文亦都抵達上海。
保路運動嘅元兇，下令血腥鎮壓平民嘅四川總督趙爾豐，12月22號被斬首示眾大快人心。清國內部混亂，中國人嘅好朋友俄國佬亦有動作，12月頭，外蒙古部份王公僧侶喺沙俄支持下宣佈獨立，清帝國冇厘頭冇咗10%國土，俄國人亦順手將1400平方公里嘅清國領土佔去據為己有。你老母，你睇吓俄國人對我哋幾好？當然亡國之君尼古拉二世，佢當時並唔知道自己亦只有5、6年命仔……（抵X死）
當時放喺袁世凱面前嘅，係所謂「虛君共和」。但係形勢嘅發展已經大大刺激咗袁世凱嘅政治野心，挽救清帝國已經成為不可能。於是佢開始聯系革命內部嘅反革命派，希望得到敵人嘅支持，確保自己未來能夠奪取最高領導地位。另一方面，佢亦利用革命嘅聲勢，強迫北京清政府和平退位，讓出政權。有人話，袁世凱玩弄陰權術謀狼子野心，其實睇返轉頭，佢做嘅事都係合情合理，佢係當時中國國內擁有最大武力同權力嘅大人物，由佢當上新共和體制嘅最高領導人，亦都冇唔合理嘅地方。
當然袁世凱自己都有問題，佢基本上係一個古人，古人有古人嘅諗法，我諗喺佢心裡面，「皇帝」同「大總統」兩個角色其實冇乜分別，只不過係個名唔同咗啫。但係事後證明，所謂新共和政體裡面嘅大總統，其實約束多多，邊有得好似做皇帝咁過癮？1911年，共和、民主、自由、議會等西方政治概念降臨中國，其實冇人知道係啲乜嘢嚟，大家都係摸著石頭過河，之後搞到一鑊粥，其實都係正常嘅事。不過如果過咗100年，中國人仲未知道民主自由係啲乜嘢，咁就真係DNA有問題……
孫文返咗中國6日，1912年1月1號，佢就喺南京就任臨時大總統，並且宣告中華民國正式成立！邊個話中國人做嘢慢？
#常威 #斷送共和關袁世凱蛋牛治 #袁世凱 #民國歷史
【常威近代史】第二部《中國一百年前的第一次改革開放》電子書
https://play.google.com/store/books/details?id=_6KMDwAAQBAJ
【常威近代史】第一部《大清亡國關慈禧蛋牛治》電子書
https://play.google.com/store/books/details?id=C3hjDwAAQBAJ
【常威近代史】第一部《大清亡國關慈禧蛋牛治》實體購買
https://www.382now.com/product?id=87
Ads
常公子
2019-8-3 11:22:41
【162回：大清亡國關 #戰爭遊戲 蛋牛治】
♒經過有6月頭發生至今嘅一連串事件，相信令到好多人更加清楚政治究竟係甚麼一回事？過去幾十年香港人對政治嘅 #免疫力，其實係來自於一連串非常之獨特嘅政治條件所產生，或者好多人亦都係刻意迴避政治嘅結果，但係你唔理政治，並唔代表政治唔會燒到你身上，你可以冇立場，唔做黃屍藍屍做死屍，但係你仍然要喺個社會上面生存，你眼見嘅一切都係政治，政治嘅波動會影響你嘅生活，今個夏天，整個香港齊齊進化到2.0，3.0，沉默嘅大多數亦開始被歸邊，未來會發生乜嘢事？又要講多一次史學大師 #霍布斯邦 #EricHobsbawm 嘅說話，冇人能夠預知未來，只能夠知道，以人類嘅習性，好多時候都係向壞嘅方向走……
♑YouTube嘅內容，繼續講緊1905年 #日俄戰爭 最後階段。戰爭係一種非常昂貴嘅遊戲，係政治最後嘅伸延，解決紛爭嘅最後一種手段。響核武未發明之前，人類的確係大量利用戰爭去解決政治問題。要多謝 #奧本海默 #愛因斯坦，係佢哋發明原子彈，再有之後嘅氫彈同埋核彈，有咗呢啲超巨大殺傷力武器之後，戰爭先唔喺人類歷史上面成為常態手段，因為冇人敢打第三次世界大戰，因為一打，就一定會玉石俱焚。
♐而好多時候，玉石俱焚，亦係戰爭嘅常態。步向玉石俱焚之前，大家要諗清楚，有冇可能返轉頭。8月5號星期一，係時候停一停、諗一諗，諗吓下一步應該點做？一個空閒嘅星期一，我亦響應罷工，唔會出文，敬請原諒。
♎【#常公子近代史】語音導航！請大家幫手「#訂閱」我條常公子YoutubeChannel！同埋介紹多啲人睇睇！衝上2000訂戶！
🍳
https://youtu.be/gy17vprDApE
【常威近代史】第二部《中國一百年前第一次開放改革》
https://play.google.com/store/books/details?id=_6KMDwAAQBAJ
【常威近代史】第一部《大清亡國關慈禧蛋牛治》
https://play.google.com/store/books/details?id=C3hjDwAAQBAJ
【常威近代史】第一部《大清亡國關慈禧蛋牛治》實體購買
https://www.382now.com/product?id=87
【常威近代史】第二部《中國一百年前的第一次改革開放》實體購買
https://www.382now.com/product?id=151
常公子
2019-8-4 21:50:02
:^(
【常威近代史】（二百二十四回）
袁世凱平反系列
中華民國由第一日成立開始，其實從來唔係一個統一、高度中央集權化嘅政權。如果你用今日嘅中華人民共和國概念去比較，所謂中華民國，或者講蔣介石退守臺灣前嘅「中華民國」，由1911年到1949年間，其實從來唔係一個單一領導嘅政治實體（蔣介石想咁樣做，但係未去臺灣之前，佢係從來冇辦法做到）。1912年1月1號草創嘅中華民國，更加只係一個鬆散圍威喂式嘅政治同盟組織。
獨立出滿清政權嘅每一個省，都祇不過需要用一個新嘅名號嚟維護自己武裝奪權嘅合法性。1911年12月29號，由已獨立嘅蘇、浙、鄂、川、湘、滇、晉、陝、皖、贛、閩、粵、桂、奉、直、豫、魯17省代表（其實17省代表，有好多個省嘅軍政府仲未取得全省實質控制權，不過就代表咗先算），一省一票，選出25號由國外返抵上海嘅革命KOL孫文為中華民國臨時大總統，中華民國正式立國，無論係點，都係一個新紀元嘅開始。
之後嘅日子，其實每個省各有各做，自己管自己（包括法律司法制度同稅收）。你可能會問，咁咪就即係美國嘅聯邦制囉？52個州各自為政，財政獨立、司法獨立，華盛頓特區中央聯邦政府做中心，專負美利堅合眾國國防同外交，咪幾好？但中華民國唔同嘅地方係，美國52個州，係要上繳中央，即係要畀錢華盛頓聯邦政府運作。而當時嘅中華民國，每個省都冇畀錢中央政府嘅義務，我表面承認你愛你，但係我唔畀錢你養你，咁係冇用嘅。
赤裸裸嘅表述係，於是乎發生嘅情況係，你唔X肯畀錢中央，就打X到你畀錢中央為止。當然仲有個問題，究竟邊個先係中央？
呢個亦都係中華民國1912年建立之後，長期財政困難同冇力有效管理全國嘅原因。直接啲講，其實推翻滿清之後，成個中國係進入一個大分裂狀態。之後要經過無數次戰爭，又合又分，又合又分，差唔多經過30幾年嘅戰爭狀態，最後先由中國共產黨1949年統一全中國，建立一個我哋現代人定義下嘅「中國」存在。
閱讀近代史，通常犯上一個嚴重嘅毛病，就係將1949年前「中華民國」當成一個實際存在嘅政治整體去論述。就算去到1927年，蔣介石北伐成功（兼出賣共產黨成功），由佢統治嘅中華民國中央政府，都唔係中國國內唯一一個合法政權。難聽啲講，蔣介石只係一個打敗咗其他軍閥嘅軍閥，佢本身就一個軍閥，同樣道理，共產黨亦都係其中一個軍閥，軍閥呢個字好負面，但其實每一股勢力都係一股軍閥勢力，最後打贏哂其他軍閥嘅軍閥，先唔係軍閥，先係代表正義嘅國家政權！
歷史永遠由勝利者所寫，同勝利者政治立場對立嘅，都係邪惡代表。其實凡事都係相對性，冇所謂正義，亦冇所謂邪惡（個人認為希特拉納粹黨屠殺500萬猶太人同集中營政策例外）。閱讀歷史，要知道本來冇黑白、本來冇正邪、一切都係「槍桿子出政權」，一切要講錢，要從經濟角度去考慮歷史問題，最起碼要有咁嘅覺悟。如果你連呢幾點都讀唔到，咁唔X好讀歷史，睇返八卦雜誌算撚數，因為你係冇讀歷史嘅慧根。
「天雨雖寬，不潤無根之草；佛門廣大， 難度無緣之人。」就係咁解。
講返1912年1月1號，上午孫文由上海出發前赴南京，去到夜晚11點，先舉行就職典禮（其實點解搞到咁夜呢？），佢宣讀誓詞：
『顛覆滿清政府，鞏固中華民國，圖謀民生幸福，此國民之公意，文實遵之。以忠心於國，為衆服務。至專制政府既倒，國內無變亂，民國卓立於世界，為列邦公認，斯時文當解臨時大總統之職，謹以此誓於國民。』
1月2號，中華民國採用陽曆，3號，選出副總統黎元洪，5號，臨時政府各個部長任命，分別如下：陸軍部長黃興，海軍部長黃鐘瑛、外交部長王寵惠、內務部長程德全、財政部長陳錦濤、司法部長伍廷芳、教育部長蔡元培、實業部長張謇、交通部長湯壽潛。同日孫文發佈《告友邦書》，表示承認清政府一切「恥辱遺產」，即係承認債項賠款同所有清政府與其他國家曾經簽訂嘅不平等條約，包括香港。
新紀元開始，齊齊剪辮！
#常威 #斷送共和關袁世凱蛋牛治 #袁世凱 #民國歷史
:^(
【常威近代史】第二部《中國一百年前的第一次改革開放》電子書
https://play.google.com/store/books/details?id=_6KMDwAAQBAJ
:^(
【常威近代史】第一部《大清亡國關慈禧蛋牛治》電子書
https://play.google.com/store/books/details?id=C3hjDwAAQBAJ
:^(
【常威近代史】第一部《大清亡國關慈禧蛋牛治》實體購買
https://www.382now.com/product?id=87
常公子
2019-8-6 11:59:52
【163回：大清亡國關 #朴茨茅夫條約 蛋牛治】
♒凡係戰爭，都唔可以無限期打落去。因為戰爭代價高昂，敵我雙方都會蒙受巨大損失，發生響1905年嘅日俄戰爭，最後就係兩個國家打到筋疲力盡，金錢同埋人命已經冇得再補充投入戰場，所以喺美國 #老羅斯福總統 斡旋下，雙方響英國 #朴茨茅夫 舉行和談，商討停戰。呢場和談，係畀俄國同埋日本有一個合理嘅下臺階。和談結果，日本重奪清國東三省控制權，但要放棄戰爭賠款。俄國亦並非戰敗國，保留國際面子，當然俄國嘅損失都無比巨大，換嚟嘅代價係300年羅曼諾夫王朝1917年倒臺嘅前因。
♐執筆之際，香港人嘅逆權運動到達高潮。8月5號大把罷工早上，#林鄭月娥 再行出嚟柒，話俾全香港市民知，一場民主運動已經變質，佢刻意迴避咗佢喺「#逃犯條例」引爆政治大炸彈嘅責任，龍門搬咗，將造成今日亂局嘅責任推曬喺班勇武派後生仔身上，喺佢口中嘅「#暴徒」，有幾咁可怕得幾可怕，係牛鬼蛇神，佢甚至講呢場亂局發展落去，係班年青人將香港700萬人嘅繁榮安定押做注碼？非常奇怪，佢自己好似置身事外咁，由點火引爆炸彈嗰個人，忽然之間變咗個冷眼旁觀嘅旁觀者。我非常欽敬，呢位港英政府留低落嚟嘅「#能幹技術官僚」，佢卸膊打官腔搬龍門嘅功夫，其實天下無敵。
♊當然成班狗官亦唔會忘記打經濟牌，佢哋成日掛口邊，再亂落去香港就會冧，將會萬劫不復，好多人會無飯食。#陳茂波 條粉腸，尋日甚至用 #貿易戰 同 #英國脫歐 凶阿叔阿婆。呢班撚樣，似乎唔明一個道理，首先香港冇咁易冧，百幾年嚟幾經風雨，面對挑戰今日亦唔係第一次，#沙士 冇事，#97 都捱得過，香港如果要冧，一早冧咗好耐。香港人甚至擁有世界上最強的「自癒」能力，邊有咁易被打巢？小小風波，大家當食生菜。
♍而且仲有一件事，香港經濟好，普通中產階級低下階層市民嘅生活就會好？依一點我完全唔覺喎，之前所謂經濟最火熱嘅時候，就係樓價生活指數不斷飆升失控嘅時候，今日年青人嘅怒火，其實源於對往日日常生活嘅諸多不滿，而對日常生活嘅不滿、完全係來自你班狗官口裡面所謂經濟旺盛時期所累積落嚟，你同佢哋講再玩落去佢哋有嘢會「lose」，佢哋會答你「We are nothing to lose！」。
♓當然我唔係鼓吹暴力蔓延，我都好想停戰，想有人搵下臺階俾大家，但係我想懇請特區政府，你唔好以為你哋係戰勝者，民衆係戰敗者，就算最後事件平息，你哋覺得最後取得勝利，都係源於你哋嘅無恥同失職，同埋如果冇辦法平息民怨，回應民眾響政治制度結構上嘅改革訴求，只係以強硬高壓手段回復秩序，你哋只係埋下更多炸彈喺日後爆發。當然你林鄭月娥諗乜我心知肚明，以後爆炸係以後嘅事，反正我已經離職，而且會剪咗張香港身份證，同家人喺美國加拿大或者倫敦過自由民主世界美好嘅富裕退休生活，香港曾經發生過嘅事，關我撚事？
♎【#常公子近代史】語音導航！請大家幫手「#訂閱」我條常公子YoutubeChannel！同埋介紹多啲人睇睇！衝上2000訂戶！
🍳
https://youtu.be/qixMLY07hxA
【常威近代史】第二部《中國一百年前第一次開放改革》
https://play.google.com/store/books/details?id=_6KMDwAAQBAJ
【常威近代史】第一部《大清亡國關慈禧蛋牛治》
https://play.google.com/store/books/details?id=C3hjDwAAQBAJ
【常威近代史】第一部《大清亡國關慈禧蛋牛治》實體購買
https://www.382now.com/product?id=87
【常威近代史】第二部《中國一百年前的第一次改革開放》實體購買
https://www.382now.com/product?id=151
常公子
2019-8-7 16:51:12
:^(
【常威近代史】（二百二十五回）
袁世凱平反系列
要建立一個國家唔係響apple shop買個app，其實過程非常複雜同艱辛，我重申一次，1912年1月1號建立嘅「中華民國」，其實只係一個非常鬆散嘅政治聯盟，並唔可以稱呼為一個國家。我諗所謂一個「國家」（或國家機器）嘅定義，係在於佢能唔能夠喺佢管轄嘅範圍之內作出「有效統治」，所謂有效統治，最重要包括兩個方面，就係法律嘅施行同埋收稅嘅能力。如果曡埋心水行聯邦制，中央政府最好有一支代表國家（或整個聯邦）嘅軍隊，最好係唯一一支嘅軍隊，其他聯邦最好冇軍隊；另外其他聯邦亦需要有將稅款上繳中央嘅義務。1912年成立嘅中華民國，上述所講嘅嘢完全冇發生。
臨時政府成立，頒佈第一波政府命令：包括要求人民剪辮，要求婦女唔再紮腳，禁止私刑殺戮，禁鴉片，禁賭博，廢除跪拜儀式，重視農業生產，保護華僑及外國人，而且承認所有滿清政府嘅債項同不平等條約。
1月20號，選出汪精衛為總理。1月28號，中華民國臨時參議院喺南京成立，參議員一共有38個，大部份係同盟會嘅成員，林森（1868-1943）當選為議長，王正廷（1882-1961）為副儀長。事實上，當時孫文同埋同盟會會員收割革命果實之後，一心係諗住行美國聯邦制，可惜事與願違，一路行嚟，始終唔得，唔得就係唔得。
中華民國臨時政府講唔可以行私刑，但係革命同志一於好少理，革命理念高一切，北方革命黨人高調響北京暗殺清廷高官，1月16號，袁世凱被行刺，炸彈炸死咗袁世凱嘅八名衛士，袁世凱冇事，佢立刻拘捕策劃人，即捕即殺，仇恨又加深一重！26號同盟會京津分會喺北京，以自殺式炸彈襲擊刺殺滿清立憲派重臣良弼（1877-1912），良弼冇袁世凱咁好命，兩日後死咗，但革命黨依一招亦都收到預期效果，堅持不愿清帝退位嘅皇宮貴族，分分鳥獸散保命離開北京。
你可能會話，刺殺滿清高官都係情有可原，因為大家係敵對關係。但係殺自己友，就真係唔啱啦！中華民國啱啱成立，內鬥就即刻發生，為咗爭權奪利，中國人就係唔鬥唔撚安樂！光復會主要領導人陶成章（1878-1912），多年來響浙江一帶領導革命工作，中華民國臨時政府成立後，陶成章被擁護為浙江都督嘅呼聲最高，但係佢威脅住滬軍（上海）都督陳其美嘅權位，陳其美係咩背景？大家心知肚明，於是陳其美派遣佢手下第一號猛將蔣介石，收買前光復會會員王竹卿於上海法租界廣慈醫院暗殺陶成章！
我講過，碎肉機一經開動，任何人難以獨善其身。要打第一槍之前，最好諗清楚。
1912年1月，成個中國，不斷有人行私刑玩喑殺，對外有對外殺，對內有對內殺。有識之士希望推翻滿清之後，中國能夠進入一個依法治國嘅法統民主議會年代，可惜由第一日開始，我哋已經無辦法做到。依法治國？乜撚嘢嚟架？Day one做唔到，120年後嘅今日亦都無辦法做到，咁你老母話唔係DNA問題又係乜撚嘢問題呢？（實在無辦法唔講粗口）
1912年1月，南北分裂，滿清王朝大勢已去。袁世凱不斷向紫禁城施壓，要求大清和平退位交出政權。袁世凱拋出清帝退位優待條款，但係一班皇親國戚依然唔肯就範。呢班仆街，就係唔見棺材唔流眼淚，1月26號，段祺瑞連同46名清軍將領（即係全部北洋系統）聯名要求清廷退位，其實又係另一場嘩變。1月30號，慶親王奕劻代表清廷接受條件……
下一集，我哋講吓呢個滿清和平退位優惠plan究竟有幾優惠？有冇有線電視咁優惠？
#常威 #斷送共和關袁世凱蛋牛治 #袁世凱 #民國歷史
:^(
【常威近代史】第二部《中國一百年前的第一次改革開放》電子書
https://play.google.com/store/books/details?id=_6KMDwAAQBAJ
:^(
【常威近代史】第一部《大清亡國關慈禧蛋牛治》電子書
https://play.google.com/store/books/details?id=C3hjDwAAQBAJ
:^(
【常威近代史】第一部《大清亡國關慈禧蛋牛治》實體購買
https://www.382now.com/product?id=87
請課金支持
常公子
2019-8-7 20:07:24
:^(
好朋友兼大恩人 周顯 新書【逆權之怒】！大家記得捧場，上網訂購
《逆權之怒》三中商書店要求審查，不知能否上架。歡迎讀者於網上訂購，香港免郵。
歡迎訂購：
https://www.382now.com/product?id=161
常公子
2019-8-8 11:18:32
【香港關 #中英聯合聲明 腿蛋治 第三回】
♒香港炎夏，一片逆權聲音之下，我們來到中英聯合聲明系列第三回，響依一集裡面，我常公子會講到香港係1945年重光之後，出現咗一場政制改革，即香港歷史上有名嘅「楊計劃」。你冇睇錯，香港嘅政制改革，香港邁向民主選舉嘅路途，其實由1945年「楊計劃」已經開始，當時英國人因為國際潮流重新修訂對遠更殖民地政策，簡單啲講就係放權，就係要殖民地獨立自主，找尋新出路，至於「楊計劃」點解會胎死腹中？請大家睇片！
♑中英聯合聲明系列，已經變咗香港政治發展史系列，大家要認識香港，要認識依笪地方如何行到九七？如何行到 今時今日嘅局面。好多人今日口中講熱愛香港，熱愛我哋土生土長嘅地方。但去愛之前，亦請你認清楚你愛嘅究竟係乜嘢？正如談戀愛一樣，相信冇人會去愛一個自己一無所知嘅人。
♒香港嘅問題，在於由始至終冇辦法同中國分割開嚟，兩者息息相關，整個香港歷史告訴我哋，其實響香港發生嘅一切，都係由於中國大陸嘅變化而發生。香港係由清帝國1842年割讓畀英國；香港嘅繁榮昌盛，亦係由於佢成為整個中國嘅貿易轉口金融中心；去到20世紀中葉，香港嘅人口增長其實來自中國大陸；香港六七十年代工業起飛，因為中國大陸發生一連串政治運動；去到80年代，香港人嘅富裕，亦係由一場改革開放開始。今時今日，我哋香港人嘅民怨，推根究底，都係因為中國大陸而來。
♏剪不斷，理還亂，就係香港同中國嘅最佳寫照。
♎孔子講四十而不惑，五十而知天命，何謂「不惑」？不惑即係沒有疑惑，亦即係認清真相。我常公仔已經過咗40歲，我所認清嘅真相係，其實所有社會運作或者所有嘅政治活動，都係經濟活動。金錢同經濟，先係當中最重要嘅元素。所謂政治同理念，其實只係包裝經濟活動嘅漂亮外衣，呢個係社會運作嘅基本原則，世界總是殘酷的，但做人需要認清真相，越早越好。
🍳
https://youtu.be/qP-IEZz2mOk
【常威近代史】第二部《中國一百年前第一次開放改革》
https://play.google.com/store/books/details?id=_6KMDwAAQBAJ
【常威近代史】第一部《大清亡國關慈禧蛋牛治》
https://play.google.com/store/books/details?id=C3hjDwAAQBAJ
【常威近代史】第一部《大清亡國關慈禧蛋牛治》實體購買
https://www.382now.com/product?id=87
【常威近代史】第二部《中國一百年前的第一次改革開放》實體購買
https://www.382now.com/product?id=151
常公子
2019-8-8 12:49:59
推
:^(
常公子
2019-8-9 18:46:26
:^(
【常威近代史】（二百二十六回）
袁世凱平反系列
講到明叫清室和平退位優惠條款，咁究竟有幾咁優惠呢？作為一個香港人，每日都會收到優惠嘅電話，真係聽到「優惠」兩個字都驚。
滿清王朝已經失去軍隊支持，其實經已收皮，俾個優惠條款你入土為安，叫做好好睇睇，袁世凱算係咁，否則帶兵殺入紫禁城，拉曬你班仆街去後巷打靶（好似俄國托洛斯基紅軍殺晒尼古拉二世一家咁），又有何難度？
1912年2月頭，大清帝國宣佈贊成共和國體，中華民國給予大清皇帝辭退之後優待條件如下：
第一，大清皇帝辭位之後，尊號保存不廢，中華民國要以對待外國君主之禮相待。
第二，中華民國撥出每年400萬兩白銀（折算港紙12億），畀大清皇室所開銷。
第三，退位之後，皇室人員暫時居住響紫禁城，之後移居頤和園，所有僕人侍衛照常留用。
第四，清帝國宗廟陵寢永遠奉祀，不得被破壞，由中華民國派衛兵保護。
第五，未起好嘅光緒皇帝陵墓，繼續興建，禮制如舊，費用一律由中華民國支付。
第六，官內所有人員照常留用出糧返工，唯獨唔可以再收太監做事。
第七，大清皇帝退位之後，原有財產由中華民國特別保護。（呢一點有啲鬼，咁啲錢究竟屬於清帝國？定係中華民國呢？）
第八，原有禁軍歸中華民國陸軍部編制，薪水依舊發放。
上述就係清室和平退位條款，講真都算合情合理，一係打靶，一係食肥雞餐，我諗佢哋都冇得揀。袁世凱逼宮26日後，1912年2月12號，由當時只有六歲嘅宣統皇帝漙儀穆麟德（1906-1967）宣佈退位詔書，詔書原文如下：
「今全國人民心理，多傾向共和，南中各省既倡議於前，北方諸將亦主張於後。人心所向，天命可知。予亦何忍因一姓之尊榮，拂兆民之好惡。是用外觀大勢，內審輿情，特率皇帝，將統治權公諸全國，定為共和立憲國體。
近慰海內厭亂望治之心，遠協古聖天下為公之義。袁世凱前經資政院選舉為總理大臣，當茲新舊代謝之際，宜有南北統一之方。即由袁世凱以全權組織臨時共和政府與民軍協商統一辦法。總期人民安堵，海宇乂安，仍合滿漢蒙回藏五族完全領土，為一大中華民國。」（註）
就係咁，統治咗中國268年嘅大清王朝宣佈同日結束，而中國行咗二千幾年嘅專制獨裁帝王制度，亦都喺同日宣佈玩完。補充一句，皇帝雖然冇咗，但係專制獨裁繼續存在，而且用其他方式變本加厲，玩到今時今日，虐待中國人虐待到今時今日，你老母你唔係DNA出問題係乜撚嘢！
退位詔書嘅內容都寫得一清二楚，係民心改變，南北分裂，冇得返轉頭。詔書第二段，寫到明清政府將最高權力交畀袁世凱。仲有一點，結尾部分，提出五族共和口號，滿漢一家，就係唔俾你班以「驅除韃虜，恢復中華」作口號嘅革命黨繼續報復清算滿洲人（因為大家係自己友），但係亦因為依句說話，令到滿洲人從此成為中華民國嘅一部份，之後滿洲人佢哋響祖家東北立嘅「滿洲國」，被稱為「偽滿洲國」就係咁解。
對於清室和平退位依單嘢，後世人又用嚟抹黑袁世凱，話佢狼子野心，話佢有政治動機，話佢古撚惑惑，謀奪最高權力，又話去過孫文一棟……（下刪十萬字）。肅靜迴避！我常公子現在替袁世凱嚴正平反，清室可以和平退位，係袁世凱人生一大功績，如果冇咗袁世凱威逼利誘清室和平退位，和平交出政權，咁建立共和政體，係名不正言不順，而且內戰會打落去，會死多幾百萬人都唔出奇。凡事唔該睇結果，結束中國二千幾年封建帝王統治嘅人，唔係你孫文，而係袁世凱。近代史呃人，亦都係咁解。
註：清內閣法制院檔案，《中華民國史檔案資料滙編》第一輯，江蘇古籍出版社，1911，頁217
#常威 #斷送共和關袁世凱蛋牛治 #袁世凱 #民國歷史
:^(
【常威近代史】第二部《中國一百年前的第一次改革開放》電子書
https://play.google.com/store/books/details?id=_6KMDwAAQBAJ
:^(
【常威近代史】第一部《大清亡國關慈禧蛋牛治》電子書
https://play.google.com/store/books/details?id=C3hjDwAAQBAJ
:^(
【常威近代史】第一部《大清亡國關慈禧蛋牛治》實體購買
https://www.382now.com/product?id=87
常公子
2019-8-9 18:46:40
:^(
好朋友兼大恩人 周顯 新書【逆權之怒】！大家記得捧場，上網訂購
《逆權之怒》三中商書店要求審查，不知能否上架。歡迎讀者於網上訂購，香港免郵。
歡迎訂購：
https://www.382now.com/product?id=161
常公子
2019-8-10 11:16:06
【164回：大清亡國關 #日比谷燒打事件 蛋牛治】
♒世界上有種人專係想做旁邊鶴，#日俄戰爭，清國做咗旁邊鶴，坐山觀虎鬥，諗住兩敗俱傷，坐收漁人之利。最後如願以償，日本打贏俄國，清國保得住東北東三省主權，但係亦都引狼入室，未來嘅日子，日本人勢力係東三省繼續坐大，當正係自己殖民地，最後搵末代皇帝 #溥儀 打造個 #滿洲國，滿洲國嘅出現，亦都係 #中日戰爭 嘅原因。近代史全力抹去呢個point，將中日戰爭，演譯成為一場純粹日本侵華戰爭，幾十億中國人，俾人呃咗幾代，都係時候認清歷史事實。
♈旁邊鶴其實幾好做，喺側邊吹兩句，立場又可以兩頭擺，有時候 #黃絲，又有時候 #藍絲，一邊支持示威者，又可以一邊支持警察，純粹睇熱鬧，邊邊有景行邊邊，其實冇錯。大部份人都係旁邊鶴，有嘢睇先係第一優先，拍嘢擺上網呃like更重要，真係要實際參與政治行動？咪搞亞叔，阿叔屋企仲有煲湯煲緊……但係呢班旁邊鶴，正正就係政治陣營中要爭取最重要嘅「#民意」所在，旁邊鶴冇實際政治作用，但係當旁邊鶴企喺你身邊，你就有機會贏，旁邊鶴又好實際，所以民意最實際。
♊我個人好鍾意 #YouTube 個機制，因為冇得呃like，FB，IG可以買like，有錢會大曬，但YouTube唔得，條片冇人睇就冇人睇，你睇過去幾多大明星想轉戰YouTube，最後死無葬身之地，就會一清二楚。民意亦係冇得呃like，亦唔係有錢會大曬，你條YouTube片有冇人睇，即有冇民意支持，要睇實際效果，view數會一清二楚。就算你背後嘅動機幾偉大都好，但係如果做嘅嘢出嚟得唔到民意嘅支持，條片冇人睇，最後都會失敗收場。
♐真正發生係眼前嘅事，係逆權運動發展至今，已經開始失去民意嘅支持。依一點大家唔可以唔承認，嚟緊條路點樣行落去，大家要諗得一清二楚。畢竟話說回頭，大家所做嘅一切最後都係為咗 #香港人 好，唔係純粹玩嘢攪局，而大部份香港人嘅意願就係所謂民意所在，要記住四個字：「#毋忘初衷」。
♎【#常公子近代史】語音導航！請大家幫手「#訂閱」我條常公子YoutubeChannel！同埋介紹多啲人睇睇！衝上2000訂戶！
🍳
https://youtu.be/9bphzdr13WM
【常威近代史】第二部《中國一百年前第一次開放改革》
https://play.google.com/store/books/details?id=_6KMDwAAQBAJ
【常威近代史】第一部《大清亡國關慈禧蛋牛治》
https://play.google.com/store/books/details?id=C3hjDwAAQBAJ
【常威近代史】第一部《大清亡國關慈禧蛋牛治》實體購買
https://www.382now.com/product?id=87
【常威近代史】第二部《中國一百年前的第一次改革開放》實體購買
https://www.382now.com/product?id=151
Ads
常公子
2019-8-11 19:51:30
🔥『皆因今天的真理，始終都跟我有段距離……』
🔥原來有啲歌，可以唱早25年，四分一個世紀，家駒，你是香港人！你當時看到的東西，其實很多人都看見，他們以為不會發生，結果都是發生了。
🔥1992年的夏天，我在屯門巴士廠做暑期工，收音機上傳來了你離開的消息，那年你33歲，是耶穌離世的同一個年齡。當時的香港人，有很多很鄙視你的音樂，鄙視你的歌詞。那些嘲笑你的人，到了現在只能為被嘲笑的對象，而你的歌，你寫下的音樂，卻流傳至今。歷史真是公平的，所以大家不要放棄，天地有正氣，只看你如何掌握正氣為何物？
🔥🔥🔥🔥🔥🔥🔥🔥🔥🔥🔥🔥
https://youtu.be/MEDxmS3ni6A
常公子
2019-8-12 18:11:06
:^(
【常威近代史】（二百二十七回）
袁世凱平反系列
清帝國宣佈收皮，我哋堂堂正正，開始論述中華民國史！
無疑係一個新嘅開始，對我常公子嚟講，亦都係一個新嘅挑戰。因為中華民國歷史比較複雜，響1949年中華人民共和國立國之前，無疑係一段大分裂史，整個中國（具體意義下嘅中國）基本上係四分五裂，軍閥割據，冇一個人或一個政權可以獨立話事，前期嘅袁世凱做唔到，後期嘅蔣介石亦都做唔到。
首先，簡單講講中華民國成立初期，中國究竟係一個乜嘢嘅境況？去到1911年，中國仍然係一個以農業生產為主嘅農業社會，晚清最後十年（1902-1911）嘅迴光返照期，雖然大刀闊斧進行現代化改革，但並冇足夠時間將中國帶入半工業化社會。有資料講，1913年成個中國有698間工廠，聘用27萬工人。（註）當時1911年中國人口數目估算係4.3至4.5億（但係呢個數字絕對唔準確，實際上應該更多），就算去到1933年，蔣介石主政中華民國嘅「黃金十年」期間，有比較精確嘅科學數據，中國嘅人口大概5億，當中2.6億就業人口中，有80%以上從事農業，只有20%從事非農業工作職位，事實上呢個82比，一直冇改變過，直至去到20世紀80年代中國開放改革四個現代化先至有明顯改變。
由此可見，雖然政治不斷變化，但係中國社會嘅生產結構模式，其實係處於一個非常穩定嘅狀態。中國社會進入半工業化，係1949年以後嘅事，進入全面工業化社會，其實係1980年之後嘅事，依一點大家要清楚。叉開一小筆，馬克思主義立説，主要係運用於工業化社會工人階級，並非農業社會同農民階級。
民國建立初期，中國嘅工業處於起步階段，而且大部份工業操縱喺外國人手上，外國資本主導嘅工業生產超過80%，要多謝李鴻章張之洞劉坤一盛宣懷等白手套……得出嘅結論係，其實1911年到1949年依四十年左右，民國期間，中國嘅經濟並冇任何顯著增長同改善，農村人口嘅收入同生活水平，更加因為戰亂頻繁而有下降跡象，呢個亦都係中國共產黨後期得到中國農民普遍支持嘅最重要理由。
中華民國由一開始已經好窮，之前講過，由於不同勢力各佔山頭，冇人有義務將稅收上繳中央政府，中華民國中央政府，基本上都係以借貸渡日。1911年尾中華民國臨時政府成立初期，我哋嘅真國父黃興就同日本三井銀行借咗30萬日元應急，孫文返國期間，亦有人認為響歐美浦咗咁多年嘅孫文會帶住大批金錢回國，但係佢冇，佢亦都冇同外國借到任何外債支持中華民國臨時政府，佢只係一人一喼隻身返嚟做KOL，收割革命果實。
之前講過，有好多人利用革命嚟籌款，甚至發行債券；之前亦都講過武漢三鎮清政府藩倉有大量白銀儲備，但係之後啲錢去咗邊？相信唔使我講明，中國人就係有辦法，政府窮係政府窮嘅問題，自己落袋係自己落袋嘅問題。中國人就係太聰明，到咗今日都一樣，不過生存在世，為咗自己牟取財富同最大利益，其實又冇錯。學香港人話齋：「大佬，搵食啫，搵食大曬架！」
講一套做一套，公器私用，上下其手，中國人世界第一！
1912月2月12日宣遜位，和平交出政權，正式改朝換代。身在南京嘅中華民國第一任臨時大總統孫文，遵守承諾，推薦袁世凱擔任臨時大總統，2月13號，孫文向臨時參議院提交請辭咨文，但係孫文有三個附帶條件：
第一，中華民國臨時政府設於南京，不得更改。
第二，新總統要親身到南京受任，孫文先至正式離任。
第三，新總統必須遵守臨時參議院所定立嘅臨時約法。
15號，發電報邀請袁世凱前來南京就職。大家簡單啲，畀你係袁世凱，會唔會離開自己嘅根據地北京，隻身飛去南京做中華民國嘅臨時大總統呢？孫文呢一招，叫「調虎離山」，如果袁世海真係去南京做大總統，就叫「深入虎穴」。你老母仲記唔記得，一個月前，革命黨同盟會仲響北京掟炸彈炸死袁世凱八個侍衛。如果袁世凱真係去南京，我諗渣都冇得剩。袁世凱如果真係去南京，帶住20萬左右北洋系統軍隊去就差唔多。
袁世凱係聰明人，佢當然唔會中計。但係佢唔肯出發去南京就任，道德光環就畀孫文同革命黨攞曬，後世歷史論述，堯舜境界嘅孫中山退位讓賢，係袁世凱自己唔肯做，自己搞南北分裂搞兩個中央。問心講句，邊個啱邊個唔啱，聰明嘅你一定會有答案。
今日嚟到呢度，最後補充一則小花邊，1912年2月29號，著名教育家當時嘅教育部長蔡元培，同總理汪精衛，響北京成立咗一個民間團體，叫做「留法儉學會」，即係勤工儉學，組織補貼少少，畀有志嘅年青人留學法國，點解要專登講呢個會呢？因為本世紀一個歷史巨人因為呢個會留學法國，佢叫鄧小平。當然佢去法國冇學法文，主要修讀共產主義同階級鬥爭，仲響法國加入埋共產黨……
我哋下次繼續……
註：陳真等編，《中國近代工業史資料》，第55-56頁
#常威 #斷送共和關袁世凱蛋牛治 #袁世凱 #民國歷史
:^(
【常威近代史】第二部《中國一百年前的第一次改革開放》電子書
https://play.google.com/store/books/details?id=_6KMDwAAQBAJ
:^(
【常威近代史】第一部《大清亡國關慈禧蛋牛治》電子書
https://play.google.com/store/books/details?id=C3hjDwAAQBAJ
:^(
【常威近代史】第一部《大清亡國關慈禧蛋牛治》實體購買
https://www.382now.com/product?id=87
常公子
2019-8-13 11:18:48
【165回：大清亡國關 #章太炎 蛋牛治】
♒章太炎係中國近代史上一個舉足輕重嘅人物，講過好多次，「中華民族」呢個劃時代嘅概念就係由佢發明。章太炎同當時好多同期嘅二十世紀初中國知識份子一樣，都有日本背景、國學根底深厚、言論大膽、文筆尖酸。佢曾經被清政府流放，民國初年，曾經衝入總統府大罵袁世凱撕毀共和，被軟禁兩年，當時嘅人稱呼佢做「章瘋子」。佢係癲嘅亦都好正常，因為只有唔正常嘅人，先會夠膽反政府，今日都一樣。
♉章太炎放喺今時今日嘅世界，就係所謂「公共知識份子」，公共知識份子代表咗一個社會嘅良知，大部份以和非理理姿態對抗極權同埋白色恐怖，近代中國最出名嘅公知當然就係諾貝爾獎得獎人劉曉波，但係劉曉波點收場大家有目共睹。活響帝王專政滿清王朝嘅章太炎尚可留下狗命一條，正面屌柒袁世凱亦只係軟禁兩年**，軟禁期間仲可以響佛寺開壇講學。話滿清極權統活？話袁世凱獨裁專政？睇嚟佢哋連中國共產黨盞尾燈都見唔到！香港人點解對內地政府咁反感？點解對內地嘅司法制度完全冇信心？點解一聽見逃犯條例就起義？因爲我哋見過劉曉波最後喺病床上邊嘅遭遇呀！共產黨！
♒將責任推喺他人身上嘅時候，唔該擦亮眼睛睇下自己有冇錯先？而家我每次見到林鄭月娥同班官上電視、或港澳辦發言人講嘢嘅時候我都想嘔，每次睇完show都非常不安，有口乾同腳震嘅反應，我大概因為佢哋患上咗輕微情緒病，呢啲事從來未發生，大概同我年紀有番咁上下有關，年紀太大嘅人，真係唔適合睇恐怖片或睇太多厭惡性嘅事物。以後我會避免見到佢哋，不過我知道佢哋永遠唔會喺我生命中消失，不知廉恥為何物的人，就有其強大的生命力，就好似佢哋口中嘅曱甴。
♈去返公共知識份子，公共知識份子仲有一個重要作用，當社會進入混亂或者嚴重撕裂嘅時候（好似而家2019年夏天咁），當所有人嘅意見都無所適從嘅時候，作為公共知識份子就企出嚟，扮演社會道德標準嘅一把量尺，重新釐定是非黑白，社會可以混亂，混亂本是常態，但唔可以是非不分，良知雖然在統治階層係冇，但係響民衆中間，仍然係相當重要嘅道德感召力量。黑白不分，是非不明，何來良知？沒有良知，雞蛋何有力量撼高牆？唔通真係好似林鄭月娥話齋，我哋只顧經濟，只睇樓價同股市，而不理良知和道德為何物？對唔住，我真係唔能夠成為嗰種西人。
♐今時今日嘅香港，又有邊個可以做到公共知識份子作為社會道德量尺嘅重任呢？其實極少，甚至可以話冇。冇辦法，前人種樹後人乘涼，因果相續，香港呢笪地方，冇適合嘅土壤能夠培養所謂公共知識份子生存，當了最危險的時候、每個人被迫著發出最後的吼聲的時候，冇人可以做到擔當或者調和嘅角色，確實徒嘆奈何。
♎【#常公子近代史】語音導航！請大家幫手「#訂閱」我條常公子YoutubeChannel！同埋介紹多啲人睇睇！衝上2000訂戶！
🍳
https://youtu.be/Zg_5eyHkDe0
【常威近代史】第二部《中國一百年前第一次開放改革》
https://play.google.com/store/books/details?id=_6KMDwAAQBAJ
【常威近代史】第一部《大清亡國關慈禧蛋牛治》
https://play.google.com/store/books/details?id=C3hjDwAAQBAJ
【常威近代史】第一部《大清亡國關慈禧蛋牛治》實體購買
https://www.382now.com/product?id=87
【常威近代史】第二部《中國一百年前的第一次改革開放》實體購買
https://www.382now.com/product?id=151
常公子
2019-8-14 18:47:14
:^(
【常威近代史】（二百二十八回）
袁世凱平反系列
辛亥革命成功、中華民國建立之後，就係權力遊戲（Game of Thrones）嘅開始。無數權力鬥爭陸續上演，邊個話事，真係好重要。今日中國，權力高度集中，由上而下，階級分明，香港特首一定要聽中央話事，權力集中好定唔好？請閣下自己判斷。
1912年2月5號，中國銀行成立，由前大清銀行副監督陳錦濤（1871-1939），即南京臨時政府財務總長揸旗，順帶提一提，陳錦濤都係廣東人。匆忙早產嘅中國銀行，其實就係原來大清銀行上海分行，暫時負擔中華民國中央銀行職能，其實當時中國所有金融操作，全部都係喺上海（同香港）發生，上海呢個自由城邦，會喺之後中華民國嘅故事裡面擔當最重要嘅位置。
2月頭，堯帝孫文退位讓賢，將大總統職位禪讓袁世凱，但條件係袁世凱必須去南京就職，袁生啋你生臭狐，堅決守響自己根據地北京，製造兩個中央。孫文見你唔嚟南京，於是派出專使教育部長蔡元培，連同宋教仁、汪精衛等八人前赴北京「專迎大駕」。2月25號，迎袁專使到達北京，袁世凱為佢哋舉行咗盛大嘅歡迎儀式，嚟張大合照。
同日，袁世凱同南京專使團茶聚，表示自己隨時可以動身前往南京就任大總統，大家表面功夫做到足，以禮相待。但係當晚，北京市內傳出大量槍聲？原來呢個時候，北京竟然發生兵變？之後兩日，保定、通州、天津相繼傳來兵變消息。哇哇哇！咩料先？原來統統祇係一場戲，係袁世凱下令得力助手曹錕（1862-1938）玩嘢，製造兵變大龍鳳。
於是袁世凱就同專使講，嗱！你睇，而家北方局勢咁混亂，我唔可以離開北京架，袁世凱製造拒絕南下條件，孫文收到風，亦都冇聲出。響呢件事上，袁世凱當然被抹黑為老奸巨猾，但係大家點解唔諗吓孫文一定要袁世凱前赴南京就任哩？呢個係南北之爭，情理上，清帝國剛剛宣佈交出政權，改朝換代，中華民國既然願意承繼清朝所有政治遺產，咁首都設立於北京亦都合情合理。革命黨人定都南京，為咗有效控制錢罌上海，當然係根據地嘅問題，各有各嘅道理，未必一定係袁世凱錯曬。
遷都問題，大家僵持不下，南北分裂已成定局，袁世凱決定於北京另組中華民國中央。
2月28號，仲有一件事發生。因為不滿南京臨時政府將大總統職位讓畀袁世凱，不滿黎元洪、孫武等人嘅妥協態度，武昌爆發「群英會暴動」，史稱武昌第二次革命，即係籠裏雞作反。參與暴動嘅數千人，大部分係革命黨人，佢哋佩帶「群英會」白布徽，包圍都督府軍務處，迅速控制武昌全城。大家要睇吓時間性，同時間北方曹錕策劃嘅假兵變事件發生，南北呼應，你亂我更亂，大家鬥亂，其實預示咗天地大亂嘅日子拉開序章。
黎元洪為求自保，將責任推曬喺手執兵權嘅軍務部長孫武（1879-1939）身上，孫武被迫著草，事件先至開始平息。其後孫武北上投靠袁世凱，孫武係1911年武昌起義嘅革命英雄同埋重要人物，手握長江流域一帶革命武裝力量。但係佢好唔妥孫文，似乎得罪方丈，都係冇好下場。
開天闢地，除咗權力鬥爭，仲有萬象更新。2月底，上海成立「女子同盟會」，要求中華民國發展女權，開放渠道比女性參與政治，中國女權運動展開歷史性嘅第一步。不過，要去到Captain Marvel嘅境界，到今日仍然未得。今日嘅中華人民共和國中央政府共產黨中央委員會，女性嘅數目仍然係一個好低嘅百分比。提提大家，1949年建國以來，歷來中共中央政治局中央常委成員中（最高權力機構），亦只有一個毛澤東老婆江青（1914-1991）彈出過。
追加花邊，中華民國成立之後，立法要求全國人民剪辮同放腳，但好多男人仍然繼續留辮，女人繼續紮腳，覺得咁先有型先至靚。民國政府甚至派出警察強行同人民剪辮，我諗當時，仍然有好多人記住老佛爺慈禧太后嘅統治，仍然有好多人懷念清帝國晚期迴光返照時候嘅國泰民安。呢個同蘇聯1991年解體嘅情況之後一樣，今時今日，我哋個個覺得戈巴卓夫（或叫戈爾巴喬夫，Mikhail Sergeyevich Gorbachev，1931-）係一個偉大人物，但係喺俄羅斯國內，或蘇聯解體後出現嘅其他小國家內，好多人好X憎佢，覺得佢一手解散咗一個超級大個，從此各自為政，搞到家無寧日。
凡事都有兩面睇，世界冇絕對嘅正義，同埋絕對嘅邪惡，就係咁解，研讀民國歷史，解構袁世凱，要抱住一個咁嘅心態。
#常威 #斷送共和關袁世凱蛋牛治 #袁世凱 #民國歷史
:^(
【常威近代史】第二部《中國一百年前的第一次改革開放》電子書
https://play.google.com/store/books/details?id=_6KMDwAAQBAJ
:^(
【常威近代史】第一部《大清亡國關慈禧蛋牛治》電子書
https://play.google.com/store/books/details?id=C3hjDwAAQBAJ
:^(
【常威近代史】第一部《大清亡國關慈禧蛋牛治》實體購買
https://www.382now.com/product?id=87
常公子
2019-8-15 11:19:12
【166回：大清亡國關 #黃興 蛋牛治】
♉清代嘅革命思潮，由1895年甲午戰爭戰敗之後開始。甲午戰爭嘅慘敗，令到民眾睇到國家嘅腐敗無能，之後一連串嘅日子，清帝國肉在砧板上，任人魚肉。內憂外患民不聊生，更加滋長咗革命嘅土壤，而革命嘅土壤卒之孕育咗擁有推翻滿清政權能量嘅義士，孫中山係一個，而湖南人黃興係更重要嘅一個。
♑響蔣介石主導嘅國民黨黨史，或之後中國共產黨編輯嘅中國近代史中，黃興嘅重要角色被顯著抹走，原因係大家只係需要一個孫文，只需要一個國父，只需要一個同政權意識形態合法性吻合嘅紙板人，孫文本身係一個共產主義者，而且喺佢生命嘅最後階段，認同黨國合一、鐵腕獨裁統治，正正就係國民黨同共產黨嗰杯茶。以作為孫文親密戰友嘅黃興，由頭到尾都係不羈放縱愛自由，佢信奉嘅共和政制、美國自由民主代議政制議會嗰套、堅決反對獨裁統治，黨國合一，到佢1916年死嗰日，都從未改變過立場。響我常公子之後嘅近代史論述中，我稱呼黃興做「真國父」，的確係發自於真心。
♒講返香港嘅局面，執筆之日（即今日），局面有緩和跡象，原因係特區政府縱容警隊濫暴濫捕，黑白兼容，響警權同暴力無限擴張鎮壓下，已經取得一定成效。響特區政府嘅思維裡面，佢哋會覺得極端暴力示威者只係大概一千人左右，只要拉X曬佢哋，用法律訴訟纏住佢哋，件事就會平息落嚟。不過我想提一提政府，如果佢真係一次過起訴幾百個、當中不少帶住美好善良動機嘅香港年青人，甚至過千人，將會係一場巨大嘅關公災難，訴訟過程中，亦都相對將香港嘅逆權運動戰線不斷拉長延後，可能拖吓拖吓，可以拖到2047。
♎而且件事最近已經引起國際關注，不能不承認，香港同全香港人已經成為中美貿易戰其中一個重要籌碼。不過唔使驚，香港從來係一個投機嘅世界，有危先有機，大家hongkongers都非常明白，唔怕個市大上大落，最怕個市一潭死水。年青人覺得缺乏機會，係因為社會上貧富懸殊，既得利益者守住嘅利益堡壘城牆，已經起到天高。年青人佢哋成日話攬炒，其實希望重新洗牌，反正風平浪靜國泰民安之時，亦係佢哋勞動力被剝削得最嚴重嘅日子。面對風波惡，無論乜嘢階層嘅人、所持乜嘢政治概念、都係時候要開始反省吓自己。
♏唔通個個都做啱？淨係班年青人做錯？如果黃興在世，佢一定say no。
♎【#常公子近代史】語音導航！請大家幫手「#訂閱」我條常公子YoutubeChannel！同埋介紹多啲人睇睇！衝上2000訂戶！
🍳
https://youtu.be/8nbEgvKwbI4
【常威近代史】第二部《中國一百年前第一次開放改革》
https://play.google.com/store/books/details?id=_6KMDwAAQBAJ
【常威近代史】第一部《大清亡國關慈禧蛋牛治》
https://play.google.com/store/books/details?id=C3hjDwAAQBAJ
【常威近代史】第一部《大清亡國關慈禧蛋牛治》實體購買
https://www.382now.com/product?id=87
【常威近代史】第二部《中國一百年前的第一次改革開放》實體購買
https://www.382now.com/product?id=151
常公子
2019-8-15 20:13:26
陳雲出山！！！
:^(
常公子
2019-8-16 18:23:08
:^(
【常威近代史】（二百二十九回）
袁世凱平反系列
袁世凱坐鎮北京，死都唔肯走，革命成功，中華民國存在已成為既定事實。但中華民國中央未必一定要喺南京，於是袁世凱另立中央，發揮一國兩制，北人治北，雙重認證功能，北洋軍隊在手，天下我有，槍桿子出政權，你真係吹得我漲麼？
1912年3月10日下晝三點，袁世凱響北京石大人胡同前嘅清外務部公署就任中華民國臨時大總統。當時佢身穿一身東洋軍服，佩戴長劍，從此「大軍閥」形象定型，註定係邪惡無恥嘅象徵。袁世凱喺中外賓客面前宣讀誓詞：
「世凱深願竭其能力，發揚共和精神，滌蕩專制之瑕穢。謹守約法，依國民之願望，祈達國家於安全強固之域，俾五大民族同臻樂利。」
蔡元培以參議院代表身份出席袁世凱就職儀式，並代表孫文致祝賀詞。既然大家開始玩嘢，南方嘅孫文亦都不甘示弱，就響袁世凱就職第二日，孫文喺南京公佈咗由南京參議院經過32日討論之後通過嘅《臨時約法》，依一部《臨時約法》，亦都係中華民國、中國人行民主自由嘅第一步憲法嘅雛形。
《臨時約法》規定「中華民國由中國人民組織之」、「中華民國之主權屬於國民全體」、「規定中國人民有人身、居住、財產、言論、出版、集會、信仰等自由；有選舉、被選舉、訴訟、請愿等權利」……睇到呢度，陰鳩公……大家係咪想喊呀？110年過去喇，上面所講嘅嘢，有幾多成為現實呢？真係你老母你唔係基因出問題係乜撚嘢？
《臨時約法》仲有針對袁世凱，規定改總統制為責任內閣制，擴大參議院權力，以防範同限制袁世凱大總統嘅獨裁專政。頒布《臨時約法》之後20日，孫文於4月1號正式解除臨時大總統職務，4月5號參議院通過遷到北京，南京臨時政府結束，兩個中央暫時變返一個中央。袁世凱於天下大亂第一round，勝出漂亮一仗。
又係時候叉開一筆，《臨時約法》要行內閣制，其實並唔係中華民國創立初期孫文嘅本意。中華民國草創時候，孫文係想模仿美國行總統制，「總統制」中，總統（President）擁有高度權力，你睇今日Donald Trump就明白；而「內閣制」，好似英國、法國同日本咁，係議會內閣話事，首相（Prime Minister）（或當時叫總理）先係最高權力擁有者，而總統某程度上只係虛銜同虛君。簡單啲講，「總統制」就係一人獨大；「內閣制」即係集體負責。當時嚟講，你自己做就行「總統制」，袁世凱做就行「內閣制」，究竟又係乜嘢道理呢？
革命同盟會內部，亦因為「總統制」同「內閣制」產生過分歧，孫文一心要行「總統制」，而同盟會另一大將「宋教仁」則支持「內閣制」，兩個人因此產生分裂，宋先生得罪方丈，自然之後亦都冇好下場。
其實當時，革命陣型內部亦有巨大權力鬥爭，唔係同盟會嘅自己人，就算喺辛亥革命中有幾大功績，好似陶成章，孫武等人，大家之前都睇到有乜嘢下場。同盟會內，亦都烽煙四起，當時社會上就流傳過下列一段說話：
「輪功應屬黃興，論材應屬宋教仁，倫德應屬汪精衛，論革命歷史海外聲望，建國學理，則屬孫文。」
歷史充滿諷刺，道德標準最高嘅汪精衛，後嚟成為中國歷史上最大嘅漢奸。才幹才華同能力普遍認為喺孫文之上嘅宋教仁，亦都冇幾耐命。我哋嘅真國父黃興，之後選擇急流勇退，唔同自己一班好兄弟、特別係孫文爭權，老實講，真係一個偉大人物，當然佢亦偉大到畀自己兄弟抹走佢響革命歷史上嘅貢獻同成就，搞到好多人唔知佢係乜水？中國人小氣，最鍾意玩權力鬥爭，最鍾意玩山頭主義，最鍾意玩派系，其實係DNA問題。
補充一則花邊，中華民國建立初期選咗一堆部長，其中資歷極度深厚、國際地位崇高嘅真正Hongkonger、中英文勒勒聲中國第一個國際認可嘅大律師伍延芳（1842-1922，當時69歲），理論上應該擔任外交部長最佳人選，但係外長一職，則由啱啱喺耶魯大學畢業、年僅三十歲王寵惠（1881-1958）出任。明眼人都知道，白手套嚟姐。孫文揀佢，要伍延芳做司法部長，就係要一手控制住外交事務，方丈其實唔係普通人。
上述所舉嘅只係個別例子，無數權力鬥爭不斷發生。1912年4月袁世凱就任中華民國大總統，坐鎮北京，以為坐定粒六，但係佢錯了，一切嘅鬥爭只係剛剛起步，得罪方丈，血流成河，天翻地覆亦都無可避免。
#常威 #斷送共和關袁世凱蛋牛治 #袁世凱 #民國歷史
:^(
【常威近代史】第二部《中國一百年前的第一次改革開放》電子書
https://play.google.com/store/books/details?id=_6KMDwAAQBAJ
:^(
【常威近代史】第一部《大清亡國關慈禧蛋牛治》電子書
https://play.google.com/store/books/details?id=C3hjDwAAQBAJ
:^(
【常威近代史】第一部《大清亡國關慈禧蛋牛治》實體購買
https://www.382now.com/product?id=87
常公子
2019-8-17 11:05:40
【❤香港關 #中英聯合聲明 腿蛋治 第四回】
♒第四回的中英聯合聲明其實亦都冇講中英聯合聲明，呢個系列已經變成香港近代政治史敍事。今集嘅內容我會講到五六十年代共產主義陣營向遠東輸出革命，香港亦都被波及。事實上，「資本主義」同「共產主義」兩種意識形態嘅爭端，從1917年開始蔓延到今日，足足維持咗100年。2019年夏天嘅香港，其實推根究底，亦都係上述意識形態之爭嘅後延體。反修例只係觸發點，反對中共極權統治其實先係主菜。
♐一個國家或一個政權要對人民施行管治，必須建立「權威」。如果要赤裸裸表述，所謂權威其實純粹嚟自暴力。但退一步嚟講，權威仍然係可以用暴力以外嘅手段獲得，中國儒家哲學就講「以德服眾」，一個國家大治，要以「仁德」為核心，「仁」都是正確和善良的心靈；而「德」即是正確嘅道德行為。當然何謂正確？什麼是正義？則是各有表述。除咗用道德感召建立威權，威權仲可以用血統建立，即係君主立憲。亦可用宗教建立，即係神權國家。但係無法否認，當一個國家或政權嘅威權出現動搖嘅時候，難免亦都係需要以暴力手段鎮壓。人性本身係矛盾嘅，於是政治本身亦都係矛盾，呢個就係人世間紛爭不斷嘅理由。l
♍好多人講，唔明白今日嘅香港人點解要向中共爭取民主自由？佢哋會話，當年英國殖民地統治你哋嘅時候，你哋咪一樣冇民主自由！呢種講法無錯，港英時代嘅香港的確一直冇民主。普選嘅概念，要去到1984年中英聯合聲明簽訂前後，先至喺香港啱啱誕生。但如果你將歷史拆開，你會發現，香港殖民地政府一直落嚟都致力解決民生問題，歷史嘅條件，令政制改革一直冇辦法順利發生。英國人早響1945年香港重光之後，就想放權。但接下來發生嘅事情一件接一件，要去到國泰民安係70年代麥理浩總督任內嘅事，我嘅中英聯合聲明系列，正正就係想表述呢件事。
♈況且時代不斷嚮前行，昨日嘅尺度唔可以量度今日，現代人嘅眼光亦唔可以批判古代人，物質條件已經顯著不同。過去輕易可以使用愚民政策，因為資訊唔發達唔流通。但今時今日，一部電話在手，天下我有。所有事情包括政治，由封閉變成赤裸透明，你想呃我都冇咁易。但係資訊無比發達嘅今日，除咗為我哋帶來真相，都為我地帶來太多嘅「真相」。今時今日，現代人面對的難題並唔係用乜嘢手段去得悉「真相」，反而係要從唔同嘅「真相」之中去選擇一個真正嘅「真相」去相信。
♐由2019年6月開始，香港人上咗重要一課政治課，我哋一直相信持之以恆嘅平靜社會狀態，原來可以在一夜之間完全崩潰。而大部份香港人一直以嚟都覺得我哋有能力有自由去得悉「真相」是什麽？但事實正正講畀我哋知，所謂真相，都可以滲透唔同嘅政治立場，使之變質或改變，或者變成另一種事物，變成採取下一步政治行動嘅口實和依據。上述講法，我冇任何政治或階級立場。反而我想提出一點，無論發生過乜嘢事，或者之後再會發生乜嘢事，香港人始終上咗重要嘅一課，人生需要不斷學習，世界先會更加清晰。好多謝呢個充滿暴力同紛爭嘅憤怒憂鬱炎夏，因為呢個夏天係一個歷練，令沉醉於紙醉金迷裡面嘅溫室花朵迷失靈魂，重新得到堅毅同謙卑。收埋問題，並能夠解決問題，勇敢面對，先係解決之道，要解決問題，需要佛家羅漢的精進勇猛，不能畏縮半寸。
🍳
https://youtu.be/KykBZl0O3FI
【常威近代史】第二部《中國一百年前第一次開放改革》
https://play.google.com/store/books/details?id=_6KMDwAAQBAJ
【常威近代史】第一部《大清亡國關慈禧蛋牛治》
https://play.google.com/store/books/details?id=C3hjDwAAQBAJ
【常威近代史】第一部《大清亡國關慈禧蛋牛治》實體購買
https://www.382now.com/product?id=87
【常威近代史】第二部《中國一百年前的第一次改革開放》實體購買
https://www.382now.com/product?id=151
常公子
2019-8-19 16:05:25
:^(
【常威近代史】（二百三十回）
袁世凱平反系列
塵埃暫時落定，袁世凱就任中華民國大總統，任命國務總理為真西人唐紹儀（1862-1938），作為中國第一批出洋留學學生、美國哥倫比亞大學畢業嘅唐超儀才華出眾，一直為袁世凱所重用。1938年9月30日，國民政府軍統特務為不讓唐紹儀為日本所利用，刺殺唐紹儀，享年76歲。（呢個殺人嘅藉口，真係冇得頂）
1912年3月29號，唐紹儀前往南京出席中華民國參議院會議，represent袁世凱提出10位總長人選，之前係臨時，現在係正式。外交部長由上一節提過嘅王寵惠改為陸征祥（1871-1949）、內務趙秉鈞（1859-1914）、財政熊希齡（1870-1937）、陸軍段祺瑞（1065-1936）、海軍劉冠雄（1861-1927）、教育蔡元培（1868-1940）、司法王寵惠（1881-1958）、農林宋教仁（1882-1913）、工商陳其美（1878-1916）、交通施肇基（1877-1958）。
睇返依張全新嘅內閣名單，同1912年1月3號臨時內閣比較，袁世凱當然加插咗大量自己人，最重要嘅軍部就段祺瑞代替黃興執掌，伍廷芳出局，值得留意嘅係，袁世凱專登將孫文嘅政敵，革命分子宋教仁同陳其美擺上臺，削弱孫文政治力量。10位總長裡，同盟會會員仍有四個，包括王寵惠、蔡元培、宋教仁同陳其美，歷史話袁世凱小氣，睇番其實唔係。
當中要提嘅係青幫雙花紅棍陳其美，當時陳其美係上海都督，控制住中國呢個最大嘅錢罌，剷除政敵，毫不手軟，先後暗殺了陶駿保、陶成章、夏瑞芳、鄭汝成等異己。之前講過，中華民國中央銀行，即係原本嘅大清銀行上海分行，都係由陳其美一手控制，陳其美嘅第一號手下蔣介石，之後佢會成為中國權力最大嘅人物，與陳其美仲有兩個細侄，叫做陳立夫同陳果夫，即係將來國民黨嘅CC系。
4月1號，孫文解除臨時大總統職位，黎元洪亦都解除大元帥職位，參議院議決中華民國政府遷往北京，整個國家表面上現實南北統一，但實際上南北分裂問題更加嚴重。
革命黨人唔X妥袁世凱，認為袁世凱借刀殺人，利用革命勢力推翻滿清，然後自己獨攬大權，冷手執個熱煎堆。革命黨人嘅睇法冇話唔啱，去到1912年，最大嘅既得利益者的確係袁世凱集團，孫文下野得個桔，真國父黃興被袁世凱任命為南京留守（都唔知係乜撚嘢職位），個Game點會咁快玩完？咁多兄弟死咗，流咗咁多血，冇理由將個革命果實白白送畀你嘅，你想收呢個果實都得，用血酬來償還吧。
呢個時候，孫文宣佈同盟會化身為公開在野政黨，而更多嘅「黨」，更多嘅政治組織亦都響南方（上海）紛紛成立，好似由劉松仁蔡鍔（1882-1916）為總幹事嘅「統一共和黨」、統一黨、民社、國民協進會、共和建設討論會、國民黨（唔係後來嗰個）……所有依啲黨同政治組織，都係以反對袁世凱執政為中心思想。正確嚟講，係南方唔妥北方，基本上仍然係南北之爭。
響北京，袁世凱努力建設由佢主導嘅中華民國政府，4月21號，中華民國國務院正式成立。但係4月20號，有個叫天津鐵血監督團首領嘅人，企圖行刺袁世凱失敗被捕，你真係唔好以為袁世凱呢啲位好好撈，畀我就唔撈，九死一生啊。4月29號，中華民國參議院響北京開院，議長係林森（1868-1943），同日，同盟會本部遷往北京，南京變成支，死都纏住你啊。
有一點要講清楚，我不斷敘述嘅事件，其實只係發生喺「南京」同「北京」（或者加埋上海）兩三個城市裡面嘅事。其實中國好卵大，當其時，每一個地方基本上都發生流血武裝衝突，因為清帝國已經解體，中華民國的控制力實在非常有限，好多地方根本變咗無政府狀態，無數嘅人被殺戮，歷史冇講唔代表冇發生。好似我哋廣東省，1912年3月，代理廣東都督陳炯明（1878-1933）就同惠州民軍首領黃和順發生激烈武裝衝突，之前兩個人係好兄弟，但權力面前，只有用流血方法解決。我講嘅天地大亂，就係咁解。
1912年，整個中國基本上係無政府狀態，南方革命黨人一心一意要推翻袁世凱，呢個時候，外國勢力亦都插手西藏同蒙古事務，企圖趁住天地大亂期間將蒙古同西藏獨立出嚟，袁世凱身處嘅環境，真係四面楚歌，大家點樣玩落去？下次繼續。
#常威 #斷送共和關袁世凱蛋牛治 #袁世凱 #民國歷史
【常威近代史】第二部《中國一百年前的第一次改革開放》電子書
https://play.google.com/store/books/details?id=_6KMDwAAQBAJ
【常威近代史】第一部《大清亡國關慈禧蛋牛治》電子書
https://play.google.com/store/books/details?id=C3hjDwAAQBAJ
【常威近代史】第一部《大清亡國關慈禧蛋牛治》實體購買
https://www.382now.com/product?id=87
常公子
2019-8-20 11:40:12
【167回：大清亡國關 #革命青年 蛋牛治】
♉今集繼續講一代革命大師真國父 #黃興，黃興嘅經歷亦係一個革命青年嘅經歷，一個革命青年如何被煉成？就只有喺戰鬥中不斷成長同鍛練，黃興亦都係一樣，早年響日本嘅經歷，令佢嘅思想轉向暴力革命推返滿清政權，但由佢立志一日開始，到1911年辛亥革命成功，中間足足有十年時間。
♐無論係邊種形式嘅革命，都需要長時間嘅醞釀，要有長時間嘅思想準備，革命者本身亦需要長時間嘅心理同肉體準備。#中國共產黨 於1921年成立，起初只有十幾兩友喺隻船上吹吓水，#毛澤東 係其中一個小角色，我諗當時，佢哋都覺得自己冇乜前途，或者大家都只不過係度發吓夢，講吓點樣改變世界點樣對付軍閥。冇人會相信，28年後，1949年中國共產黨會取得政權，統一全國江山，當年船上一個湖南年青人，會企響天安門城樓宣佈：「新中國成立了！」
♈中共嘅故事講畀我哋知，似乎凡是只要有夢想，就可以成真。中共49年成功建國背後有好多因素，當中 #第三國際（The Third International）嘅資助同 #中日戰爭 發生當然有決定性，但亦都有唔少幸運成分存在。但係縱觀整場建國史，個人感覺中共最成功嘅係紀律性，一個政黨、一個組織嚴守紀律，心態統一，意識形態堅定，齊上齊落，而且不怕犧牲，更加唔介意為咗達到打倒敵人嘅目的而不擇手段，結果喺好多場戰役裡面都以少數贏多數，下風贏上風。你可以話佢不擇手段，但係某程度上亦係目標鮮明、不怕艱辛同勇往直前！而且革命唔係請客食飯，要唱歌跳舞，又要開心又要良知又要達成政治目標？其實冇可能。
♓跪喺主人面前，要求得到施捨同體諒，並唔係革命。革命係一個階級推翻另一個階級嘅暴力行為，係打仗，要死人，同死好多人。所以懇請大家，未到一個地步，再唔好亂用「革命」兩個字。
♎【#常公子近代史】語音導航！請大家幫手「#訂閱」我條常公子YoutubeChannel！同埋介紹多啲人睇睇！衝上2000訂戶！
🍳
https://youtu.be/bvFeoE5XXlQ
【常威近代史】第二部《中國一百年前第一次開放改革》
https://play.google.com/store/books/details?id=_6KMDwAAQBAJ
【常威近代史】第一部《大清亡國關慈禧蛋牛治》
https://play.google.com/store/books/details?id=C3hjDwAAQBAJ
【常威近代史】第一部《大清亡國關慈禧蛋牛治》實體購買
https://www.382now.com/product?id=87
【常威近代史】第二部《中國一百年前的第一次改革開放》實體購買
https://www.382now.com/product?id=151
Ads
機界原種
2019-8-20 15:33:54
:^(
常公子
2019-8-21 14:25:20
:^(
【常威近代史】（二百三十一回）
袁世凱平反系列
袁世凱係軍事強人，四面楚歌之下，明白要鞏固權力，一定要壯大軍事實力。單講道德同理想，唔係政治嘅真正玩法，今日香港，太多人相信理想、道德同良知嘅力量，實際上喺政治唔成熟嘅表象，統治階層當然樂意見到反對勢力利用良知做武器，道德光環冇任何殺傷能力，任由你鳩做，我就係唔撚驚，而且鳩做得太耐，就有人想變節，乘機收編埋佢，再加多招分化，軟硬兼施，成班人本來已經鳩做，再變為一盤散沙，搞到數人頭入飛都唔夠數。所以我常公子成日講，玩統戰，玩意識形態，人哋領先你九條街以上。
當然反對派點會唔明？大部份人都係HKU讀過書，好明白玩反抗玩鬥爭玩推翻現行政權，係要坐監或者人頭落地。反而玩道德玩鳩做，粉墨登場做個反對派嘅角色，手牽手變成人肉鎖鏈抵抗水炮，作為極權同人民之間嘅Durex KY，政府每個月有糧出，何樂而不為？你睇吓，真係被反對派道德感召上街衝嘅年青人，現在有乜嘢下場？有冇人可憐過佢哋？（唔講喇，好心噏）
袁世凱就任中華民國臨時大總統後，立刻頒布《訓勉軍人令》，要求全國軍人，必須服從佢嘅統一命令。講係咁講，梗係冇人會照做。當其時1912年，中華民國全國嘅軍事實力約為30幾個師同50幾個旅，加埋各地方巡防營等雜項軍隊，軍人總人數大概120
萬。當中一半以上係袁世凱北洋嫡系軍隊同依附效忠袁世凱，大部份係北方軍人。亦即係話，袁世凱實際操縱中華民國一半以上軍事力量，係最惡個個。用食力去秤，佢做揸Fit人亦係理所當然，不過當時候長江以南嘅南方人，並唔係咁諗。
要瞭解中國近代史，一定要將南北問題放喺首位，王家衞一定明白。詳情請睇《一代宗師》。
袁世凱亦都第一時間統一民國軍制，清國沿嘅「鎮、協、標、營、隊」編制，一律改成「師、旅、團、營、連、排」編制。統一軍制，目的係要將軍政強化中央集權，希望能夠控制地方割據勢力蔓延，不過袁世凱死前，佢都係做唔到。
同時，袁世凱亦都喺響控制嘅範圍之內開設大量中小學軍校，當中最出名，就係保定陸軍軍官學校（即中國軍事大學），兩年制課程，教官大多數係留學日本嘅士官，畢業後學員可任少尉或中衛排長，軍校一共辦咗九期，總學員6523人，呢批人，亦成為民國軍史上嘅中流砥柱。
中華民國建立初期，最重要嘅事，同你同我都一樣，就係冇錢。其實我個人好唔明白，清帝國留低嘅錢去曬邊呢？不過唔再深究鳥，總之中華民國又開始第一日，就要借貸渡日，袁世凱當政之後，立即以中華民國名義同外國銀行商量大手借錢，亦打算響國內外發行債券，解決中央政府嚴重財政問題，唔使多講，乞衣伸手，梗係會困難重重。
而且呢個時候，俄國人插手蒙古事務，英國人想西藏獨立，兩個國家已經開始用不同藉口派遣軍隊進入蒙古同西藏。不過西方列強，對袁世凱執政，亦都表示支持。畢竟以邏輯思維計算，去玩一個敵人，比玩一大班敵人容易得多。
孫文解除臨時大總統職位後，嚟到廣東。上集已經提過，廣東臨時都督陳炯明鏟除異己黃和順後，仲有一個革命好兄弟叫黃世仲（1972-1913），佢係一個小說家同報人，亦係同盟會好兄弟，辛亥革命前，佢寫咗大量暢銷小說，鼓吹革命精神，推翻滿清。辛亥革命後，身為革命英雄嘅佢被任命為廣東民團總局局長，負責掌管各路民軍。但係革命已經成功，民兵亦要功成身退，瘦身裁兵，廣東一次裁軍九萬民兵，令黃世仲大表不滿，於是佢去都督府伸手要錢，要求找數。陳烱明有你冇你，收你入監先。
1912年5月，孫文空降老家廣東，同盟會胡漢文（1879-1936）上任正式廣東都督，佢上任嘅第一件事，就係將獄中嘅黃世仲拉去打靶。我講呢件事，因為喺廣東發生，我用廣東話寫近代史，必須以廣東人行先。但係大家睇到，黃世仲嘅經歷，正正亦都係革命發生時，響前排衝嗰班人嘅經歷，世事令人無力嘅地方，亦都響依處。革命內部其實血流成河，南方人要對付北佬袁世凱，必須有一條統一戰線，唔服從嘅人，就必須後巷見。
講多一次，如果有一日，「革命」個掣真係喺你面前嘅時候，你撳落去之前，真係要想清想楚……
:^(
【常威近代史】第二部《中國一百年前的第一次改革開放》電子書
https://play.google.com/store/books/details?id=_6KMDwAAQBAJ
#cn2# 【常威近代史】第一部《大清亡國關慈禧蛋牛治》電子書
https://play.google.com/store/books/details?id=C3hjDwAAQBAJ
[flowerface369] 【常威近代史】第一部《大清亡國關慈禧蛋牛治》實體購買
https://www.382now.com/product?id=87
常公子
2019-8-22 10:40:06
【168回：大清亡國關 #黑社會 蛋牛治】
♉今集繼續黃興嘅革命事業，推翻滿清，地下組織即係黑社會，一直擔當著非常重要嘅角色，孫文就係洪門嘅人。黃興係1903年發動嘅湖南革命，亦係同當時嘅黑社會「哥老會」合作發生，呢啲並不是什麼奇怪嘅事，黑社會本身就係愛國嘅，昨日如是，今日都如是。
♉地下社團，黑社會組織係每一個社會存在嘅事物，我諗，古往今來亦祇有高度極權嘅專制社會，例如希特拉嘅納粹，史太林同毛澤東當權嘅極左時代，黑社會先至唔存在。因為凡有商業活動，必有灰色地帶，一個資本主義社會嘅運作，亦有表面經濟同地下經濟兩個範疇，表面經濟就一般我哋面對嘅經濟數據，但地下經濟活動，同樣係一個資本主義社會金錢血液流動不可缺少嘅原動力。我記得，現在香港人懷緬香港最輝煌燦爛嘅日子，即上世紀八、九十年代，亦都係黑社會活動最活躍嘅時代。
♐霍布斯邦教我，自己親身經歷感受嘅歷史，先係真正嘅歷史。我成長嘅二十世紀八九十年代，黑社會係大潮流。我哋返學作做黑社會打扮，蝙蝠袖、窄腳褲、孖池頭、尖頭鞋，講粗口食紅萬，睇龍虎門，筆袋裏面經常有把十二吋大鐵尺，同其他同學有拗撬或講數，就匿喺手裡面做武器，我哋亦都好希望可以跟個大佬，正正式式食加入社團，做一個真真正正嘅黑社會會員。
⛎我常公仔嘅經歷，就同成班同學響上世紀80年代去過調景嶺（國民黨基地）拜大佬見阿公，每人預備咗一封36.6嘅老毛，入到一間破爛嘅石屋內見一個中年人，中年人收咗封老毛，就教我哋唸一首詩，之後同我哋講，以後有乜嘢事就可以撻佢個朵同社團個朵，而我哋嘅身份，亦正式成為社團嘅「藍燈籠」。於是我問中年人，「藍燈籠」仲有乜嘢記認？佢就叫我去女人街買一隻虎頭銀戒指，一定要係老虎頭，戴喺手指上，其他人就會知道你「有料到」。
♐因爲我當時好窮，成百蚊隻虎頭銀戒指實在買唔起。事後依件事亦冇乜人跟進，帶我哋去調景嶺見阿公嘅石硤尾南山村大佬，亦好似入咗冊，再冇出現過，於是成班同學發嘅黑社會夢，亦到此為止。而且升上高中，揀咗理科讀，功課多咗好多又要應付會考，做黑社會嘅事就咁不了了之。
⛎歷史實在太有趣，自己親身經歷嘅歷史，更加有趣！今個夏天，其實係一堂充實嘅歷史課。
♎【#常公子近代史】語音導航！請大家幫手「#訂閱」我條常公子YoutubeChannel！同埋介紹多啲人睇睇！衝上2000訂戶！
🍳
https://youtu.be/JIUhnhRvZ4Y
【常威近代史】第二部《中國一百年前第一次開放改革》
https://play.google.com/store/books/details?id=_6KMDwAAQBAJ
【常威近代史】第一部《大清亡國關慈禧蛋牛治》
https://play.google.com/store/books/details?id=C3hjDwAAQBAJ
【常威近代史】第一部《大清亡國關慈禧蛋牛治》實體購買
https://www.382now.com/product?id=87
【常威近代史】第二部《中國一百年前的第一次改革開放》實體購買
https://www.382now.com/product?id=151
常公子
2019-8-23 12:56:37
:^(
【常威近代史】（二百三十二回）
袁世凱平反系列
小説家黃世仲打靶同時，1912年5月，中華民國百廢待興，總理唐紹儀，繼續同外國銀行團商量借錢經營中央政府，但由西方列強組成嘅銀行團代表開出嘅條件係，借錢俾你都得，但係中華民國嘅財政金融必需由佢哋監督（即係管住你啲錢點使同埋點樣還債），西方銀行資本家想繼續用控制清帝國銀根嘅手段控制新生嘅中華民國，唐紹儀拒絕咗，佢同袁世凱深深明白，佢唔可以再做大英帝國白手套李鴻章，再唔可以再將中國嘅銀根俾外國人控制，一定要想辦法自力更生。
中國人行自力更生嘅路，其實非常漫長。到幾時先真真正正自己話曬事？我常公仔可以答你，係1960年之後，中華人民共和國完全還清曬蘇聯外債之後，從此中國先完全脫離蘇聯嘅掣肘，不過付出嘅代價係一場人類歷史上最大嘅饑荒，死餓幾千萬人，呢單嘢總有一日會講。
5月7號，中華民國決議模仿美國，行兩院制，除咗參議院，仲開埋眾議院。
5月10號係一個重要嘅日子，因為當日北京參議院正式統一全國國旗，因為之前各有各做，大家都明白要出嚟做嘢，就要插自己支旗仔。於是乎成個國家有好多支旗仔，每支旗代表一個武裝勢力。10號開始，中華民國統一用「五色旗」為國旗，大家要記住，中華民國國旗係五色旗，並唔係青天白日旗，青天白日旗某程度上係蔣介石自己支旗，青天白日旗取代五色旗嘅一日，亦係代表蔣家皇朝集團黨政合一、極權降臨嘅一日……
中華民國支五色旗，代表五族共和，漢、滿、蒙、回、藏五族，天下一家，同歸「中華民族」旗下，全部係「中國人」（Chinese），而歷史發展到呢處，就係「中國」依個民族國家主權觀念始創嘅一刻。
冇錯，有睇開我常公仔文嘅朋友都會知道，其實當時所謂「中國」（或中華民國、中華民族）嘅民族主權概念，先係啱啱出現（仲要promote）。其實1912年，主權民族國家概念啱啱建立，好多人都唔明白係乜嘢嚟。要記住，當時中華民國仲有98%以上嘅人係文盲，佢哋根本唔明白「共和」或「主權民族國家」係啲乜嘢來。大部分人只係知道，改朝換代了，好似二百幾年前咁，姓朱嘅，換咗姓愛新覺羅。
用另一個講法係，普羅民眾只係知道「皇帝」換咗人，即係統治自己嗰個人，換咗另一個人，由溥儀換咗孫文或者袁世凱。自己仍然係一個被管治嘅人、係「降虜」或者叫「奴隸」都成立。後來，換咗蔣介石做皇帝，1949年，共產黨宣傳隊去農村宣傳中華人民共和國建國了，有啲落後地方用嘅宣傳口號仲係「毛澤東坐殿了」（即係毛澤東坐上龍椅做皇帝了），你唔信，可以翻查歷史。
20世紀初期，對一群愚昧昏庸、知識水平接近零嘅蟻民，談論民族主權國家概念，談論共和政體、談論所謂民主自由議會制度代議政制，其實三個字：「嘥鳩氣」。普羅大眾冇人明發生乜嘢樹？亦都唔明「民族主權國家」同「封建專制王朝」嘅實際分別喺邊處？仲要話人民對國家要有權利同義務，人民係有權參與政治決策（即投票權）？講依啲嘢，就等於你對一個BB仔講牛熊證孖展一樣，佢一定唔撚明。
用咁嘅思路，你就會明白袁世凱點解係1915年玩稱帝，要做番皇帝行君主立憲，其實袁世凱嘅做法，係符合當時中華民國大部份人民嘅實際需要，簡單啲講，袁世凱係明白到中國人需要啲乜？中國人唔係需要民主自由，而係需要一個皇帝，需要有人管住自己，需要條鎖鏈，需要一個籠，需要一個威權！
要睇得明我上述講嘅嘢，要有相當豐富嘅歷史知識先得，一般人只係識得用現代嘅角度去睇過去嘅事物，好多時候會出錯。20年前，如果你同人講用部電話可以睇電視，我諗好多人會話你黐鳩線，情況都係一樣，要真正理解歷史，就要用當時人嘅諗法去代入當時嘅處境，咁先可以得出真相。
中國人永遠需要一個皇帝去管住自己唔好行差踏錯，其實已經根深蒂固喺我哋血液嘅DNA裡面，這種想法，就係叫「奴性」（西方人會明白，因為佢哋冇呢個概念）。今時今日，21世紀嘅香港，奴性嘅嘢，其實都無改變過，祇不過「皇帝」兩個字，變咗「上面」或「領導人」，甘愿為奴，周街都係，110年嘅民主自由教育，其實鳩做又係冇錯。
最後補充返少少所謂主權國家嘅概念：「主權國家必須具有以下結構：在確立個人權利正當性並形成民族認同後，兩者整合為國民觀念和國民權利，經過國民授權（即投票選舉）而合成為國家主權。」（註）
睇唔明？冇所謂，學術嘅嘢就係咁，補充啫。
註：金觀濤、劉青峰、邱偉雲著，【中國現代主權觀念形成的數位人文研究】，香港，原創於《二十一世紀》，香港中文大學出版社，2019年4月號第172期，P50。
#常威 #斷送共和關袁世凱蛋牛治 #袁世凱 #民國歷史
【常威近代史】第二部《中國一百年前的第一次改革開放》電子書
https://play.google.com/store/books/details?id=_6KMDwAAQBAJ
【常威近代史】第一部《大清亡國關慈禧蛋牛治》電子書
https://play.google.com/store/books/details?id=C3hjDwAAQBAJ
上一頁
第 21 頁
下一頁
【常威近代史】（二百二十三回）
袁世凱平反系列
當1911年12月18號，南北議和談判開始，孫文仍然未抵達中國。孫文響1911年嘅革命過程裡面，其實作用全無。推翻滿清，其實唔關孫文事。但係佢始終係整場中國革命嘅代表人物，起碼響西方傳媒世界，就冇人識真國父下下衝鋒陷陣嘅肥佬黃興，只有人識風度翩翩、一口流利英語同爛國語嘅孫文。現代世界我哋叫KOL或品牌代言人。用一個人嘅名字，囊括背後大堆人嘅行為同事蹟，亦係歷史上常見嘅解讀方法。
希特拉屠殺500萬猶太人，其實唔係淨係關希特拉事，更加唔係納粹黨班人一意孤行就可以成功，仲要成個國家（或其它國家）嘅人民配合同支持先可以成事，反猶主義唔係希特拉發明，但到咗最後，條罪就由希特拉同納粹黨小部份人受曬，好多有份殺人嘅殺人犯同幫兇都逍遙法外，個世界冇公平。同樣道理，二十世紀中葉中國領導人毛澤東引發嘅連串大災難，死幾千萬人，亦唔係由佢一個人嘅意志可以主宰。最高領導人發號施令，下面嘅人幫手執行，或者推波助瀾，唔通冇責任咩？
以前有套電影叫《暴劫梨花》，影后茱迪科士打做，內裡講嘅，就係要千方百計起訴喺側邊睇住件強姦案發生、純粹起閧叫囂嘅花生友。今時今日，香港有唔少政客或公務員（即叫官嘅物體或者叫特首），以打好呢份工、全力執行上頭指示為榮，全無個人意志，上頭話乜就做乜，完全冇理會香港人嘅感受，呢種西人同機械人冇分別，人工智能AI發展落去，依種角色遲早一定會被取代。
我成日講一個問題，如果冇心做教育或自己品行唔好（好似我常公仔咁戒唔到煙又鍾意賭馬），就唔好撈教師，因為會誤人子弟。同樣道理，如果你唔係真心為香港人好，如果你唔係真心捍衛香港人嘅權利，唔該你唔好做狗官或狗政客，個世界好X多嘢做，以你班官同政客嘅能力同埋學歷，其實求其去一間上市公司撈個高薪厚職，分分鐘仲搵得多個做官做議員。何必拋個身出來獻世？唔通你真係好鍾意日日俾市民X你老母？你哋其實有冇理會過家中老母嘅感受？
講返1911年，南北和談會議第一輪響自由城邦上海傾咗兩日（成個和談其實傾咗五輪，由1911年12月18日傾到1912年2月5日，傾咗成50日），12月20號，大家有咗初步共識同綱領，包括召開國民會議（即國會），確立共和政體，優待清室退位等等。由10月10號武昌打起第一槍開始，都12月中，前後兩個半月，改朝換代成為事實。其實響時間方面係非常之快。冇大規模內戰發生，真係要多謝袁世凱。局勢暫時緩和，12月25號聖誕節，紀念耶穌基督降生，同日救世主孫文亦都抵達上海。
保路運動嘅元兇，下令血腥鎮壓平民嘅四川總督趙爾豐，12月22號被斬首示眾大快人心。清國內部混亂，中國人嘅好朋友俄國佬亦有動作，12月頭，外蒙古部份王公僧侶喺沙俄支持下宣佈獨立，清帝國冇厘頭冇咗10%國土，俄國人亦順手將1400平方公里嘅清國領土佔去據為己有。你老母，你睇吓俄國人對我哋幾好？當然亡國之君尼古拉二世，佢當時並唔知道自己亦只有5、6年命仔……（抵X死）
當時放喺袁世凱面前嘅，係所謂「虛君共和」。但係形勢嘅發展已經大大刺激咗袁世凱嘅政治野心，挽救清帝國已經成為不可能。於是佢開始聯系革命內部嘅反革命派，希望得到敵人嘅支持，確保自己未來能夠奪取最高領導地位。另一方面，佢亦利用革命嘅聲勢，強迫北京清政府和平退位，讓出政權。有人話，袁世凱玩弄陰權術謀狼子野心，其實睇返轉頭，佢做嘅事都係合情合理，佢係當時中國國內擁有最大武力同權力嘅大人物，由佢當上新共和體制嘅最高領導人，亦都冇唔合理嘅地方。
當然袁世凱自己都有問題，佢基本上係一個古人，古人有古人嘅諗法，我諗喺佢心裡面，「皇帝」同「大總統」兩個角色其實冇乜分別，只不過係個名唔同咗啫。但係事後證明，所謂新共和政體裡面嘅大總統，其實約束多多，邊有得好似做皇帝咁過癮？1911年，共和、民主、自由、議會等西方政治概念降臨中國，其實冇人知道係啲乜嘢嚟，大家都係摸著石頭過河，之後搞到一鑊粥，其實都係正常嘅事。不過如果過咗100年，中國人仲未知道民主自由係啲乜嘢，咁就真係DNA有問題……
孫文返咗中國6日，1912年1月1號，佢就喺南京就任臨時大總統，並且宣告中華民國正式成立！邊個話中國人做嘢慢？
#常威 #斷送共和關袁世凱蛋牛治 #袁世凱 #民國歷史
【常威近代史】第二部《中國一百年前的第一次改革開放》電子書
https://play.google.com/store/books/details?id=_6KMDwAAQBAJ
【常威近代史】第一部《大清亡國關慈禧蛋牛治》電子書
https://play.google.com/store/books/details?id=C3hjDwAAQBAJ
【常威近代史】第一部《大清亡國關慈禧蛋牛治》實體購買
https://www.382now.com/product?id=87