Ads
Ads
Ads
【153回：大清亡國關 #金錢戰爭 蛋牛治】
♋有6月頭開始，發生於香港嘅抗爭運動，至此遍地開花。今次抗爭運動主調係冇大台、冇領導、所有抗爭行動都係由民眾自發地組織參予，運動方向同目標自我調節，節目日日新鮮，方法來自民間智慧，無從捉摸，亦冇人能夠預計到效果，包括對弈一方。政府想撲滅火頭，搵人傾，都唔知搵邊個傾？一衆大學學生會亦並非運動領導者，泛民政客更加被群眾拒諸門外。
♉溫故知新，尋晚響Netflix重溫計2013年烏克蘭民主運動嘅紀錄片《Winter on fire》，如果大家未睇過就一定要睇下，記得兩三年前，第一次睇，睇見烏克蘭防暴警察毆打示威者打到頭破血流，自己心裏覺得呢啲事唔會喺香港出現，但轉眼間，一切如畫面重播響香港發生。最後烏克蘭人民能夠選擇自己行嘅路，香港人可唔可以做到？到這一刻我並唔知道，亦冇辦法預視。
♊但無論點都好，發生喺過去一個月嘅事情，已經反映咗一件事，就係香港民怨爆燈，《逃犯條例》只係一條導火線，群眾對執政者嘅不滿，排山倒海咁宣洩出嚟。我係一個好現實嘅人，要我講，民怨本身就係經濟問題，好食好住冇人會上街。香港過去嘅日子，不斷利用經濟數據掩飾民間疾苦，真相係普通平民生活成本無止境上昇，衣食住行樣樣貴（唔好同我講買樓），人工加幅追唔上通脹，生活質素逐年降低，工作時間同壓力不斷累積，你話唔嬲有鬼？特區政府同一班肚滿腸肥高官做過啲乜？其實係冇。
♈於是民眾睇唔到未來，就想用自己雙手創造一個可以睇到嘅未來。香港人係聰明人，亦係世界上最優秀嘅族群之一，我哋一定諗到方法突破困局，正如獅子山下，同舟人誓相隨，無畏更無懼，攜手踏平崎嶇，共勉之大家！
♎【#常公子近代史】語音導航！請大家幫手「#訂閱」我條常公子YoutubeChannel！同埋介紹多啲人睇睇！衝上2000訂戶！
🍳https://youtu.be/BvCaw4snd-c
【常威近代史】第二部《中國一百年前第一次開放改革》
https://play.google.com/store/books/details?id=_6KMDwAAQBAJ
【常威近代史】第一部《大清亡國關慈禧蛋牛治》
https://play.google.com/store/books/details?id=C3hjDwAAQBAJ
【常威近代史】第一部《大清亡國關慈禧蛋牛治》實體購買
https://www.382now.com/product?id=87
【常威近代史】第二部《中國一百年前的第一次改革開放》實體購買
https://www.382now.com/product?id=151
【常威近代史】（二百零四回）
袁世凱平反系列
軍事演習，古往今來有兩個作用。第一向外界宣示國威，話畀你聽我有幾咁巴撚閉；第二向國內民眾展示武力，邊個想作反就隊鳩邊個。
1905年10月嘅河間會操，喺中國第一次大型現代化軍事演習，冠蓋雲集，仲有好多外國記者採訪。演習嘅主角係袁世凱控制嘅北洋六鎮軍隊，演習由10月21號開始，到28日結束舉行閱兵儀式，為期7日，總計參與演習嘅官兵46000人，馬匹5800匹，車輛1500架，戰線總長度20公里。歷史記載：
「此次回操非第以整步伐、演技擊、肆威容、壯觀瞻而已；蓋欲以飾戒備、嫻戰術，增長將士之識力，發揮軍人之精神，熟悉於進退攻守之方，神明於操縱變化之用…此一役也，仿列邦之成規，創中國所未有…積健為雄，以暢皇威，而展張國力。」（註）
一年之後，1906年，再搞多次《彰德會操》，仍然由袁世凱同兵部尚書鐵良揸旗，參觀嘅外國人，有英國、美國、日本、俄國、法國、德國、意大利、奧地利同比利時軍官，仲有大量外國記者採訪，兩次清國大型陸軍演習，上曬國際頭條。依兩次演習，亦都係慈禧1902年開始新政後嘅具體表現，亦話俾全世界知，清帝國已經喺辛丑條約後，從廢墟中企返起身，正式以一個現代化國家嘅身份融入國際大舞臺。依一段時間，係大清帝國迴光返照期，講多次唔怕厭，畀多慈禧幾年命，個世界絕對會唔同咗。
同時間，慈禧亦開始部署清帝國君主立憲時間表。（有性趣嘅朋友可以睇返之前嘅帖，我已經講過）。袁世凱建立北洋六鎮，經過兩次大型軍事演習，權勢之重，可以同操縱整個南方政局嘅張之洞相提並論。講開又講，陰陽兩面嘅張之洞，後世人又話佢係忠臣，袁世凱係奸臣，其實睇返兩個人做嘅嘢，又係調X轉咗。張之洞最叻嘅就係不斷製造自己嘅儒吏清流形象，寫吓文章撚吓詩，製造一塊咩咩羊皮披上自己豺狼身上，講cap水，講擦鞋，袁世凱邊係佢果皮？慳D啦。
不過話時話，李鴻章、曾國藩、張之洞、劉坤一依亭西人，所謂晚清四大名臣「撚人」，其實全部都好識搞形象工程，清帝國嘅仆街，依班儒家哲學發燒友西人難辭其咎，成日話係佢哋頂住大清帝國，我就話就係呢班撚樣不斷出賣大清帝國嘅利益，先搞到大清最後亡党亡国。今時今日佢哋嗰套做官模式，俾後世西人不斷模仿，表面乾淨，內裡汙糟邋遢。形象貪污第一，實力政績包尾。某前朝大官次次出鏡著同一對破舊嘅New Balance，就係玩形象囉，佢同佢家族成員加埋嘅身家，買起晒New Balance、Nike同Adidas都得喇。
袁世凱同首席軍機大臣慶親王奕劻（1838-1917）一黨，當年軍隊袁世凱玩曬，警察佢都玩埋。當時全清帝國開始設立警察制度，袁世凱就推薦佢老死徐世昌、趙秉鈞任尚書侍郎。控制咗軍隊，控制埋警察，咁仲唔係玩曬？不過，個世界邊有咁簡單？班滿清權貴睇見袁世凱不斷坐大，知道一定要抑壓佢嘅權勢（馬基維利主義者豆斗一定會咁諗囉）。1906年11月6日，《彰德會操》完畢後，由軍機大臣瞿鴻機（1850-1918）提出，將北洋六鎮新軍嘅統率權收歸中央。杯酒釋兵權，自古如是，今日都如是。因為邊個有兵喺手，就係一個政權最危險嘅敵人。
提一提你，瞿鴻機係漢人，亦係湖南人。
註：《練兵大臣袁世凱為陳校閱陸軍會操情形時奏折》，中國第一歷史檔案館藏軍機外檔，見《中國近代史資料叢刊，北洋軍閥（一）》，來新廈主編，上海人民出版社，1988，P564-569
https://play.google.com/store/books/details?id=_6KMDwAAQBAJ
https://play.google.com/store/books/details?id=C3hjDwAAQBAJ
https://www.382now.com/product?id=87