《好地地,我做乜鬼無啦啦帶個港女Friend嚟台灣特訓?》
第 1 頁
下一頁
趕故書生
2018-7-28 04:21:27
「喂?」一把懶洋洋嘅聲線慢慢激起我內心熊熊嘅怒火。
「小姐!依家幾點啊?」我努力壓制住啲火種。
「依家9點咋嘛,急咩喎。」
「你知唔知我哋搭10點45嘅飛機啊?」條友仲要一啲都唔驚嗰下先好嘢……
「我住東涌,過嚟好快咋嘛,催咩姐!」喱個Kiki啲態度呢,真係差到呢,點解我當初會應承佢㗎?
話說件事就係咁嘅……
我本身就係台灣讀書嘅,唉……嚟得台灣讀書都唔方勁得去邊啦,除咗垃圾,我搵唔到第二個詞嚟形容自己。
咁我中學個班不嬲都係女多男少,意味住你會除咗同男仔fd之餘,都會同女仔fd嘅。
咁班中有啲女仔係好嘅,但當中亦都有港女格,甚至係難相處。
咁Kiki佢係港女啲,但又未至於難相處,有時某啲位係難頂啲,但佢對朋友都好好嘅。
所以就算畢咗業之後,我哋都仲有keep住聯絡。
Ads
趕故書生
2018-7-28 04:22:27
講下Kiki感情背景先:
Kiki樣貌中上,稍稍化妝可說是女神級別,所以年中追求佢嘅男仔好多。
同時間佢都係成日換畫嗰種人,男朋友一個唔啱,就分手。
有時佢同我講佢啲感情煩惱,已經複雜到我唔知點講好。
被分手就怨天怨地,po曬嘢等全世界知,自己飛人就理所當然咁,咁自己覺得事不關己,咪己不勞心囉。
咁佢都會搵我傾下嘅,啊咁我之前都苦口婆心咁同佢講,同佢分析,曬我唔少口水。
到最後佢都係有自己嗰一套,咁咪由鳩佢囉。
跟住呢,成件事就咁嘅:
佢同最新嗰個男朋友就分咗手,不過今次慘啲,被分手之餘,佢男朋友送咗頂高級帽俾佢戴。
免費㗎,唔洗錢。
咁平時佢都有搵開我傾佢嘅感情事,所以事情發生咗唔係好耐,佢就打電話嚟啦。
「鳴…鳴鳴……鳴鳴鳴……。」我一接電話,就聽到陣陣低嗚聲。
當時我仲好開心咁係廳到睇緊愛回家,一睇電話,知道係Kiki打嚟,我就心諗:碌柒啦。
打得嚟都唔方好嘢,唔打嚟反而無嘢,古語亦云:好事唔會自己嚟搵你,你要自己去搵;但正常人係唔會去搵衰嘢,但點解會有衰事呢?就正正係衰嘢會自己搵上門。
死啦,唔記得嗰句嘢係咩添,不過大概係咁嘅意思啦!
「做咩事啊?」我一接到電話,就返咗入房,鎖埋門傾,打開一級戒備信號。
每年暑假都會返香港,但好巧合,佢偏偏係我臨返去台灣前幾日打俾我。
「無……我同佢分咗手……」Kiki係電話裡頭嘅低泣聲不曾斷過。
「又分手啊?」我毫不意外,佢幾乎用曬我啲同理心。
「係啊……佢好衰啊,俾帽我戴!!!」佢開始嚟料啦,所以都係等佢講完先到我講。
趕故書生
2018-7-28 04:22:42
「點解佢要俾帽我戴啊……點解啊!?」Kiki揭斯底里地哭喊著,佢一次過爆曬佢所有情緒出嚟。
「咁唔洗錢就可以睇清楚一個人,知道佢配唔上你,你都好應該明瞭自己要放手啦?」
「但我仲係好鐘意佢……」KiKi不死心地說。
「你之前都鐘意過其他人啦?你講緊嘅係鐘意……而唔係愛喎。」我平心靜氣地同佢講,儘管我知道佢想我講嘅並唔係喱啲。
其實Kiki只不過係我想慰藉佢心靈,講一啲佢想聽嘅說話姐。
「今次真係好唔同……好 難 受。」佢花好大力氣先講出喱兩隻字。
「咁今次點樣唔同啊?」Kiki令我感到好奇。
究竟係邊個令佢咁難過呢?佢之前都係有難過嘅,但佢之前係打電話嚟鬼哭狼嚎,鳩叫幾鑊咁樣㗎嘛。
依家反而好平靜,不過平靜背後,我感受到佢情緒嘅起伏。佢收埋咗不一樣嘅傷心係心入面。
「今次我對佢好認真,佢就好似一塊磁鐵咁,不斷咁吸我過去,我個心就咁樣俾佢吸走咗。」
「我對佢,有著好多不一樣嘅未來,我亦希望我同佢會一路走落去。」
「喱種感覺就好似返返去初戀咁。」
「你知道嗎?當你拍咗好多次拖,遇過好多次愛情、好多個男人,你要搵返一個擁有初戀感覺嘅愛情……真係好難。」
「就算你幾愛嗰個男仔都好,依家佢變心,你再愛都唔會有用。」我老實咁同佢講。
「所以我好想搵個好男仔啊!!!!好想變得更加好。」
趕故書生
2018-7-28 04:22:58
唉,Kiki同我嘅感情觀真係差好遠,如果我好似Kiki咁,我會攰鬼死囉。
「係喎!你過幾日係咪返台灣啊?」Kiki忽熱間由消沈嘅聲線轉為熱情。
「係啊,做咩啊?」我有種不詳嘅預感。
「我可唔可以過去搵你啊?」佢溫柔地說。
「你係咪又諗到啲咩奇奇怪怪嘅嘢啊?」我試探地問道。
「我頭先係到諗啊,啲台妹又識絞又識爹人,簡直可以將男人玩弄係掌心之中。」Kiki講到頭頭是道咁。
「我想去學嘢,去學做一個女人,順便睇下有無好仔!嘻嘻。」
「你講真㗎?」我半信半疑地問道。
「你當我流㗎!?痴線。」
咁突然?
「下?我係去讀書,要上堂喎姐姐。」我好怕佢嚟真,佢痴起上嚟可以好痴線。
「你唔洗理我㗎,我可以自己一個出去㗎!無問題㗎。」佢講到咁樣,我一時之間都諗唔到咩嘢嚟反駁佢。
「但你機票又未買,入台證又未搞……」
「我今晚即刻買機票,聽日搞一搞個入台證,後日可以出發添。」Kiki好似下定決心咁,搞到我都唔知點做好。
「下?」我求其俾啲反應佢先,再思考下跟住落嚟應該點。
「你唔想我過去咩?」Kiki一句打沈咗我。
「唔係……」
趕故書生
2018-7-28 04:23:11
「只係怕你一時衝動咁過嚟會後悔姐。」喱個反應已經盡咗我腦入面嘅極限啦。
「到時後悔咪買返張機票返嚟囉,有幾閒姐?」
「咁你唔洗返學咩?」
「我Ive畢業好耐啦,依家都未搵到工,當去玩下都好姐。」
我屌!係喎,我都唔記得咗有喱一回事。
就係咁,Kiki就諗住嚟台灣進行特訓啦。咁唔通佢有錢我唔俾佢嚟咩?
估唔到佢連坐飛機都可以遲到姐,仲要施施然咁行過嚟,我真係睇在一場朋友份上,無當場扯火咋。
「下次早啲啦。」我洗盡千方百計先拖住櫃枱,叫佢唔好閘住個行李通道。
「好對唔住!」我死死氣咁認錯,最後搞到原本幾好態嘅櫃枱小姐唔好老脾。
我睥咗Kiki一眼,佢仲毫無悔改之心,真係嬲到我啊。
「下次我唔會再等你!」我老實不客氣。
「好啦,對唔住啦。」係要人嬲先安落。
喱件事我就當算數,我唔想咁小氣成日記住記住。
不過Kiki個行李都幾重下,睇嚟帶咗唔少嘢,佢手上仲拎住唔少嘢。
「你帶咁多嘢,你諗住去幾耐啊?」我以為佢係去短短十幾日到,但我依家見到咁多嘢,睇怕唔止十幾日喎……
「張證可以俾我留幾耐咪幾耐囉!」Kiki理直氣壯地說,眼神沒有絲毫懷疑,佢喱份自信係點樣嚟㗎?
「好啦,你鐘意啦!」反正我都係自己一個人住,我又無咩所謂。
趕故書生
2018-7-28 04:23:27
我哋好快就到咗台中,一落機場,即刻同佢買悠遊卡同埋電話卡。
「你們想要預付卡嗎?」櫃枱小姐用佢無比溫柔嘅聲線問我。
「嗯…你等我一下喔。」我拉住Kiki去遠少少嘅地方,用返廣東話同佢講。
「咁你想唔想係度買啊?」我問Kiki。
「咩係預付卡啊?」
雖說台灣好近,但其實兩地文化、語言上都有差異,你唔係長期係度生活,唔清楚都好正常。
「姐係儲值卡。」我見慣不怪。
「咁我買唔買好呢?!」Kiki漠不經心地道。
我真係……又再次俾佢吹到睥一聲。
「係我問你買唔買喎小姐,你依家問我返轉頭都得嘅?」
「咁人哋真係唔知買唔買好啊嘛……」Kiki扮可憐嚟搏男仔心軟。
如果個男仔係對佢有意思嘅話,我諗喱招好有用,但可惜啊,我唔係。
「你買咗預付卡,你可以去7-11增值,如果唔係你用咩上網啊?」
「仲有啊,我覺得台灣啲網速快過香港。」
「好啦,咁我買啦!」
「咁你自己同人講啦。」我叫佢用普通話同服務員講。
「下?我唔識講喎,你幫我講啦。」有乜嘢好淆啊?
聽到喱句,我真係再也頂唔住了。
我捉住Kiki,行埋一邊,鄭重咁同佢講。
「我同你講,你嚟喱度係學點樣獨立!咩都要靠男人,咩都俾男人食住,仲得了嘅?」我好認真咁同佢講,我諗今次真係咁耐以嚟,第一次咁認真同佢講。
佢愕然,嘴巴一開一合咁,似乎有嘢想講又講唔出口咁。
委屈。
「自己去問啦,你自己唔學下普通話,你想溝台仔都溝唔到啦。」
事實證明,換個心態係唔同啲,心境都唔同啲。
你睇下,睇下條八婆!即刻幾撚有動力啊。
趕故書生
2018-7-28 04:28:57
最近開始寫返故,原來耐無寫文係會生疏,同埋會越嚟越懶,越嚟越唔想寫。
但我唔想俾自己再咁樣落去,所以開始逼返自己去寫,本身自己寫嘅量已經唔多,仲要越嚟越懶
:^(
我想慢慢搵返以前嘅熱誠!唔想因為懶, 而俾心入面團火熄滅
:^(
天久(L259)
2018-7-28 07:49:07
上個故都未寫完又開新故
:^(
點解唔係我
2018-7-28 08:15:16
巴打係咪漏咗啲嘢未做
:^(
趕故書生
2018-7-28 22:42:45
我哋搞掂曬啲嘢,跟住就搭車去我住嗰個地方,我係學校附近嘅地方租咗間房住,因為抽宿舍好難抽,好多人都直接搬出嚟住。
一路上,Kiki就不停玩手機,係咁影ig story。
其實我都知嘅,佢story唔係俾其他人睇,而係俾嗰一個令佢上心嘅男仔睇。
Po完無耐,Kiki好似無咩興奮嘅心情,反而雙眸無神。
「做咩事啊?佢無睇到你story?」我猜測,不過我覺得自己9成估中㗎啦。
「係啊,成分鐘都無睇到。」Kiki好是失望。
「明明佢之前係我po完一分鐘之內一定會睇㗎嘛!」Kiki佢病得好誇張。
我正想解答佢個問題,但架的士已經到咗。
事關我住嗰度距離機場只不過係我短短5分鐘嘅車程。
「落車先,今晚再傾啦,一陣仲有排執啊啲嘢,無咁多時間俾你係度傷春悲秋。」
雖然我對佢好惡死,但我真係為佢好,我依家諗返起,如果中學嗰陣有人狠狠咁樣鬧醒我,我諗我唔會浪費咁多時間。
趕故書生
2018-7-28 22:43:06
Kiki拖住沈重嘅行李,心情都係一樣咁沈重。
我幫手拎佢個行李上去,台灣啲樓唔似得香港咁高,所以有啲係無電梯㗎,咁啱我嗰度就要行樓梯,唯有認命。
我住3樓,高就唔係好高,但抬啲行李上去都幾攞命。
我搬完自己啲行李上去仲要幫埋Kiki搬,全部搬曬上去之後,我已經出撚曬汗,自己又唔係做開運動,瘦骨嶙峋咁款,成個人散曬。
「哇!你住喱度都幾大喎!」
「OK啦,台中租地方住都幾大,又平喎。」
「仲要雙人床,正啊!」Kiki毫不客氣咁坐咗落去,「你間房好整齊喎。」
「我男人老狗一個,可以有啲咩啊?」係佢同閒聊期間,我已經開始整理緊啲嘢,因為經驗話我俾知,如果依家唔整,今晚唔洗瞓都似。
搬完嘢,拉住疲倦嘅軀殼係度執嘢。
「你嚟台灣兩年都無女朋友?」Kiki好奇地問我一下。
「係喱度生活咁正,有返個女朋友就真係美滿啦。」Kiki感概地說,正正說中了我心聲。
「鬼唔知咩?我夠想啦,有先得㗎。」我有啲嬲,同時都有無奈。
嬲,係因為俾佢講中,自己又無面;無奈,係因為佢講嘅係事實。
「咁姐係你有鐘意嘅人啦?」
「係啊。」我燥燥地,我開始留意到,條友仔好似咩都無做,坐係張床度……
「話俾我知啦,台灣人定香港人?好似都無咩點聽過你啲感情事咁。」
我知道佢係一番好意,但我執緊嘢真係無咁嘅心情係度講愛情經。
Ads
伽藍
2018-7-28 23:22:49
:^(
趕故書生
2018-7-30 01:49:09
「執完嘢同你講啦,你都執下嘢啦。」
「唔想執啊……聽日先啦!」啊,條友真係懶得就懶。
之前同隔離班啲男仔fd去旅行真係無乜嘢,男仔通常都無乜所謂,大家都好識做。
喱次算係第一次同女仔去「旅行」,嗰啲不為人知嘅一面開始好似雞蛋殻咁,一敲就開始慢慢碎落。
「我唔會幫你執㗎,你自己搞掂啦。」既然你都老實不客氣,咁我都唔客氣啦!
「得啦。」Kiki冷冷地回我一句之後,繼續坐係張床度,問題係……張床都未鋪床單。
「晏啲你想食咩啊?」因為依家都差唔多中午啦,食完再返嚟執。
「我想食夜市啊!」有時真係唔知應該話佢可愛定無腦好……
「呀大姐,知唔知咩叫『夜市』啊?」
「咪掃街囉!」
「你無嚟過台灣?」我不禁開始察覺到,嚟緊啲日子慢慢恐怖了。
「有啊,我都有掃過街啊。」
「街市淨係夜晚開㗎咋,講到明夜市,夜~~市啊!」
「哦,原來係咁!」謝天謝地啊,佢終於開始醒覺啦。
「咁我哋食咩啊?」佢甜笑地同我講,那抹天真爛漫嘅笑容,真係無任何雜質,純到不行。
「我頭先就係問你食咩,你依家問返我轉頭,真係……叻!」
「算啦,我哋出去睇下有咩食先啦。」
基本上,香港同台灣嘅飲食文化好唔同,香港真係周街好嘢食。雖然台灣都好多,但相對上選擇好少,而且重複性都好大。
簡單嚟講,係喱度搵唔到咩好嘢食,我指……學校附近,要去食好嘢,要用半個鐘至一個鐘出市區。
「行啦?」Kiki仲玩緊手機。
「係啊,車你去搵嘢食。」我自以爲型咁轉下個鎖匙,點知轉轉下條鎖匙跌咗落地下。
喱個時候梗係若無其事咁彎低身執返上嚟,再問句嘢分散佢嘅注意力。
「行未啊你?」
趕故書生
2018-7-30 01:49:42
我兩邊都會keep住寫㗎
:^(
nahaha
2018-8-3 16:22:37
想打佢一鑊
:^(
趕故書生
2018-8-9 01:40:23
「行啦!」嗰條咁嘅軟皮蛇,真係踢佢先會郁。
Kiki求其踢對拖鞋,露出條長而白滑嘅美腿,我真係第一次同個女仔係同一個空間入面。
我覺得自己會係忍唔住嗰一方。
我落樓下開定㗎機車,然後等Kiki落嚟上車。
又要等,等成5分鐘先落嚟,但奇怪嘅係佢個look無咩點變到喎,究竟佢嗰5分鐘做咗啲咩呢?無人知道喱個祕密。
「哇!估唔到你有車喎。」Kiki投以欣羨嘅目光,雖然無咩值得自豪,但心入而係爽嘅,呃唔到自己。
「好平常姐有摩托車,又唔係有私家車。」
「摩托車洗唔洗牌㗎?」基本上我提親自己有㗎摩托車,個個香港fd都問洗唔沈牌,好似係佢哋心目中,係台灣揸摩托車好似揸電動車咁,因為電動車係唔洗牌。
「梗係要啦,但考好簡單咋嘛,通街都係。」
「我有啲驚喎……」Kiki抖顫地說。
「唔洗驚,信我啦,都揸咗咁耐。」我鼓勵下佢,因為台中係有摩托車比較方便。
Kiki好似安心咗啲,跟住佢慢慢捉住我膊頭,一嘢跨咗上嚟。
「得未啊?」我柔聲問道。
「得啦。」Kiki努力抑壓自己,見到佢咁驚,我有股莫名嘅興奮感。
唔知係咪男仔嘅天性,係鐘意恰下啲女仔。
我一摧油門,嗰一下衝咗出去,Kiki係後面坐唔穩,用力咁捉實我條腰。
「哇!」跟住尖叫咗一聲。
趕故書生
2018-8-9 01:42:00
聽日更新兩篇
:^(
識人真係好過識字
2018-8-9 01:47:31
等你
:^(
:^(
波係圓架
2018-8-9 21:10:31
見到係書生留條毛先
:^(
趕故書生
2018-8-10 04:29:11
「做咩啊?」跟住我又急煞車。
本來向後仰嘅Kiki因為我嘅急煞,然後成個人向前傾,佢嘅重心俾我食曬,包括波餅。
儘管Kiki唔係好大,目測有大B細C,但通常男人嘅目測並唔係咁準。
「哇!」佢又再尖叫多次。
我坐係前面,可以清楚感受到Kiki個波壓落嚟,喱種成個壓落嚟嘅感覺係不同於你偷偷地掂人哋個波邊。
喱一下係更有成功感,各位女士不妨多啲試下。
我唔會將喱種興奮喜形於色,我粗聲粗聲地問佢:「搞咩啊?」
「我第一次坐,好驚啊!」
「驚個鬼咩?坐坐下就唔驚㗎啦。」
「我可唔可以攬住你條腰啊?」Kiki係咪驚到盡頭,反而變得無所畏懼?
「是但你啦。」
然後我感覺到Kiki真係一手攬落嚟,我從後背深深感受到Kiki嘅秀髮啦,係靠係我身後,同埋大B細C嘅波路。
我忍唔住望一望佢環抱住我嘅雙手,我相信係旁人睇落,我哋猶如一對情侶。
所以話,台灣喱個地方真係充滿奇蹟。
當初我買摩托車都係因為人哋平平地賣俾我,貪佢方便。點知依家,可以車到女仔。
不過到最後呢,係成功驗證咗我嗰句說話。
食完飯返嚟之後,Kiki就無再攬過我了。
趕故書生
2018-8-10 04:58:08
其實上車真係好普通一個動作嚟,我都試過坐人車,但無咩特別嘢。
但原來車女仔係可以咁刺激,仲要係短短嘅電光火石之間。
紅綠燈停低嘅時候,Kiki先稍稍放鬆到。
我頭先仲要專登揸快車㗎,等佢爽啲,體驗下坐摩托車開快車嗰種奔馳感。
「點啊?仲驚唔驚啊?」我從倒後鏡望到Kiki頂安全帽越戴越低,於是問埋佢咩事。
「無啊,頭先用嚟擋風,我睇唔睇到前面都無問題。」
「洗唔洗啊……」
Kiki驚起上嚟,確實係無咁港女,無咁黑人憎。
「咁頭先真係揸得好快啊嘛…我仲未驚完啊!」
我側邊都停咗好幾架摩托車,我唔明顯地指住人哋架摩托車,「人哋啲女仔坐後面會好似你咁驚?人哋會好似你咁咩?」
我無非都係想鼓勵佢,等佢放鬆下,因為人哋都係坐慣無乜嘢。
啊點知俾我見到有個肥肥地嘅女仔坐係後面都瞓得著,「你睇下人啊,坐後面都瞓得著……」
我後面未講得曬,頭頂上嘅紅燈神不知鬼不覺地轉撚咗綠燈,俾後面啲人「咇」我。
我一摧油門,感覺到Kiki嗰一下攬得我好實,係用力地攬實。
Ads
為女死為女亡
2018-8-10 10:10:49
有興趣睇
:^(
寂寞芳心
2018-8-10 11:49:25
加速
:^(
:^(
趕故書生
2018-8-10 18:45:28
見有返啲人氣,今晚照舊更新兩篇
:^(
趕故書生
2018-8-11 02:31:55
坦白講啊,全程我都揸得唔係好專心,精神難以集中。
咁坦白講,Kiki算係中上樣嘅,身材雖然唔係特別好,但都OK,一路上都惹來唔少旁人嘅目光。
不過咁耐朋友,我對佢一路以嚟都無其他非分之想。
因為佢唔係我鐘意嗰類型,佢始終太港女,而我係鐘意得意type,而唔係女神feel。
我同佢出去求其食咗啲嘢,車佢返嚟嘅時候,佢好似已經習慣咗,無頭先咁緊張。
所以話,第一次喱啲嘢,一閃即逝,多麼惹人回味?
尤其「第一次」對男人嚟講幾咁重要。
返到屋企之後,我繼續執嘢,咁Kiki呢?
繼續玩手機。
佢話佢今日唔想執,無動力喎。跟手係度hea,忽然間又話無心情,好sad,話想夜晚去飲酒。
女人變幻莫測得有點恐怖……
咁我話「好啦,一陣晏啲陪你去啦」,但去到夜晚我就後悔了,因為呀叔我好撚攰,好想瞓。
只不過我後尾真係見佢有啲sad味,幫佢鋪好床單,佢就㩒足成日都手機,不停咁轉嚟轉去。
好彩嘅係,我學校附近就有間酒吧,唔洗再走去市區。
第 1 頁
下一頁
「小姐!依家幾點啊?」我努力壓制住啲火種。
「依家9點咋嘛,急咩喎。」
「你知唔知我哋搭10點45嘅飛機啊?」條友仲要一啲都唔驚嗰下先好嘢……
「我住東涌,過嚟好快咋嘛,催咩姐!」喱個Kiki啲態度呢,真係差到呢,點解我當初會應承佢㗎?
話說件事就係咁嘅……
我本身就係台灣讀書嘅,唉……嚟得台灣讀書都唔方勁得去邊啦,除咗垃圾,我搵唔到第二個詞嚟形容自己。
咁我中學個班不嬲都係女多男少,意味住你會除咗同男仔fd之餘,都會同女仔fd嘅。
咁班中有啲女仔係好嘅,但當中亦都有港女格,甚至係難相處。
咁Kiki佢係港女啲,但又未至於難相處,有時某啲位係難頂啲,但佢對朋友都好好嘅。
所以就算畢咗業之後,我哋都仲有keep住聯絡。