大清亡國關慈禧蛋牛治
上一頁
第 39 頁
下一頁
常公子
2019-7-15 18:54:43
:^(
【常威近代史】（二百三十七回）
袁世凱平反系列
香港人加油！香港人加油！香港人加油！
1912年9月，四巨頭，袁世凱、孫文、黃興、黎元洪雲集北京，共商國事，一片和諧（河蟹）氣氛，政治同權力如何分贓，從來都唔會係一件和諧嘅事，但係表面冇嘢照傾，亦都係政治人物常用嘅姿態，大家一啲都唔需要奇怪。
事實上，當時中華民國草創第二年，要由一個行咗幾千年嘅封建皇權極權帝國，一下子改變為自由民主、行政黨政治、議會制度嘅新現代國家，難度極高，無可避免會出現大量混亂同埋扭曲，老實講，中國人行憲政之路，第一步已經起步得唔錯，依一點要同中國人平反。
從來要走上真正自由民主之路，都極唔容易。歐洲「雙元革命」之一嘅「法國大革命」，田1789年7月14日，民衆攻佔巴斯底監獄計起，革命導致各界對立，共和派同保皇派嘅政治鬥爭，於往後搞咗成半個世紀，最後先至得到暫時性解決（法蘭西第三共和），期間，耗用咗整整一代人嘅青春同鮮血，亦造就咗拿破崙響成個歐洲嘅戰火延綿。
要得到真正嘅自由，非要付出巨大代價不可！亦需要巨大犧牲不可！如果你心裡面以為，烈日當空行幾個鐘頭路，就可以達到目標，我話你知，呢個係一個好天真好傻嘅想法。
四巨頭響9月25號發表聯合聲明，即所謂「八大政綱」：
1.確立全國統一制度。
2.主持是非善惡之真公道，以正民俗。
3.暫時收束武備，先儲備海陸軍人才。
4.開放門戶，輸入外資，興辦鐵路礦山，設置鋼鐵工廠，以厚民生。
5.提倡資助國民實業，先著手於農林工商。
6.軍事、外交、財政、司法、交通皆取中央集團主義；其餘斟酌各省情形，兼採取地方分權主義。
7.迅速整理財政。
8.竭力調和黨政，維持政治秩序，為各國承認之根本。
所謂八大政綱，其實講咗等於冇講，非常虛無縹緲，實際效果欠奉，純屬政治言詞，用作安撫民心。會面期間，袁世凱授予黃興、黎元洪陸軍上將軍銜。國父孫文，則被授權籌畫督辦全國鐵路計劃。表面上睇，袁世凱將三人正式收編，好似大局已定，但實際上當然完全唔係嗰回事。
補充一則史料，9月11號，大清皇室於北京金魚胡同設宴招待孫文同黃興。宴會之上皇室致辭咁講「孫黃二君，皆今日中國非常之人，故能建非常之業。」，黃興亦都發表演辭講「非裕隆皇太后之明哲及諸公之輔助，成功絕不能如此之神速。」畀面派對上大家非常畀面，中國歷史上嘅改朝換代，從未有過咁和諧嘅情況，依一點大家要注意。
事實上，推翻滿清，建立中華民國。過程係非常之順利同埋成功，與全世界唔同時代每一次革命比較，所付出嘅代價同鮮血其實相當之少。中國人行民主自由憲政之路，第一步其實非常成功，之後嘅失敗，葬送共和，係自己攞嚟，係籠裏雞作反，亦係權力鬥爭引發。
袁世凱北京政府，運作亦都非常唔順暢，國務總理唐紹儀辭職後，陸征祥頂上，陸征祥做唔夠三個月，畀參議院彈劾，亦都喺9月22號辭職，接任嘅人係趙秉鈞（1859-1914），同時兼任內務總長，趙秉鈞係中國現代警察制度嘅始創人。
之前嘅唐紹儀同埋陸征祥都係真西人，反而趙秉鈞冇浸過鹹水，只係高級華人陀地。其實要行西方制度，用真西人處理係理所當然，唐昭儀同陸征祥冇辦法留低，其實亦都註定咗中華民國冇辦法行上西方自由民主議會制度憲政之路。
大家仲記唔記得，當時1912年3月中華民國內閣中央，有四個同盟會成員，佢哋係王寵惠、蔡元培、宋教仁同陳其美。但佢哋喺內閣運作咗幾周之後，已經全部辭職，原因好簡單，佢哋唔妥袁世凱，唔妥當時嘅北京政府，覺得佢哋獨裁唔民主。革命派第三號人物宋教仁，深深明白要繼續同袁世凱鬥爭，就必須重整各方政治勢力，於是8月聯合其他政黨，成立「國民黨」。
1912年3頒布嘅臨時約法規定1912年底，舉行中華民國國會大選，宋教仁嘅打算係響呢次大選之中設法贏得大部份國會議席，從而以民主手段重新奪取中華民國中央政府嘅控制權，抑壓袁世凱北洋勢力一人獨大。
孫文黃興革命兩大巨頭被袁世凱暫時收編，反對派主導力量落喺年輕宋教仁身上。依一次中國歷史有史以來嘅第一次國會選舉，將會開天闢地，我哋下節再講。
#常威 #斷送共和關袁世凱蛋牛治 #袁世凱 #民國歷史
:^(
lm【常威近代史】第二部《中國一百年前第一次開放改革》
https://play.google.com/store/books/details?id=_6KMDwAAQBAJ
:^(
lm【常威近代史】第一部《大清亡國關慈禧蛋牛治》
https://play.google.com/store/books/details?id=C3hjDwAAQBAJ
:^(
lm【常威近代史】第一部《大清亡國關慈禧蛋牛治》實體購買
https://www.382now.com/product?id=87
:^(
lm【常威近代史】第二部《中國一百年前的第一次改革開放》實體購買
https://www.382now.com/product?id=151
Ads
常公子
2019-7-16 10:56:19
【155回：大清亡國關 #肉彈敢死隊 蛋牛治】
❤今集講「肉彈敢死隊」，大日本帝國最精采嘅製作，以年青肉體作武器，以不畏死的武士道精神火拚鋼鐵機關槍，血肉橫飛，以死殉國，從而得到精神上最後的昇華。以我嘅角度，係極權呃細路上路，日俄戰爭嘅「白樺決死隊」只是前奏曲，仲有二次世界大戰太平洋戰爭嘅「神風突擊隊」，用零式戰鬥機撞向美帝軍艦艦橋，實在是展現了人類勇武之極限。
❤日本軍人之「太勇武」，亦係1945年美帝最後投下原子彈結束戰爭嘅原因，因為美國知道唔用原子彈，要登陸日本作戰逼便日本投降，需要付出巨大嘅人命損失，而且分分鐘打兩三年都唔出奇，麥克阿瑟更加唔想嘅係，蘇聯紅軍會從北方插手瓜分日本，而兩個原子彈卻令日本響48小時內宣佈投降而結束戰爭，其實反過嚟講，係拯救咗更多人嘅生命。
❤無論如何，原子彈固然唔應該投擲，根本戰爭都係唔應該發生。因為戰爭爆發，受苦受難嘅都係平民百姓，當年長崎同廣島好多平民，佢哋仲過住日常生活、返工返學嘅時候，忽然聽見一聲巨響，眼裡見到一陣強光，在短短幾秒內身上出現一陣火燒灼熱，然後化成白骨灰飛煙滅，又有冇人諗過佢哋嘅感受？成日都講，碎肉機一經開動，任何人都難以獨善其身，無論你想抑或不想。
😍明日2019年7月17日書展開幕，我常公子同賭Sir，仲有Rios、劉殿下會響1:30pm-2:15pm，3F-G大堂，舉行《#YouTuber從新手到網紅》新書發佈會，邀請大家來捧場，交個朋友！
♎【#常公子近代史】語音導航！請大家幫手「#訂閱」我條常公子YoutubeChannel！同埋介紹多啲人睇睇！衝上2000訂戶！
🍳
https://youtu.be/DY_al-qM09w
【常威近代史】第二部《中國一百年前第一次開放改革》
https://play.google.com/store/books/details?id=_6KMDwAAQBAJ
【常威近代史】第一部《大清亡國關慈禧蛋牛治》
https://play.google.com/store/books/details?id=C3hjDwAAQBAJ
【常威近代史】第一部《大清亡國關慈禧蛋牛治》實體購買
https://www.382now.com/product?id=87
【常威近代史】第二部《中國一百年前的第一次改革開放》實體購買
https://www.382now.com/product?id=151
常公子
2019-7-16 19:29:52
:^(
明日2019年7月17日書展開幕，我常公子同賭Sir，仲有Rios、劉殿下會響1:30pm-2:15pm，3F-G大堂，舉行《#YouTuber從新手到網紅》新書發佈會，邀請大家來捧場，交個朋友！
常公子
2019-7-17 20:07:30
:^(
【常威近代史】（二百三十八回）
袁世凱平反系列
1912年3月8號，南京臨時參議院通過《中華民國臨時約法》，內裡規定：「本約法施行後限十個月內，由臨時大總統召集國會，其國會之組織及選舉法由參議院定之。」
一錘定音，大家要跟住憲法走，1912年底，國會大選展開。
推翻滿清建立中華民國，其實所有人都想國家走上憲政之路（我諗當時袁世凱亦都唔反對），摒棄極權，由「人治」改為「法治」。呢個想法，就係所謂「法統」概念，而「法統」亦都係五色旗中華民國立國嘅理念。
點解我要強調五色旗？因為之後用青天白日旗嘅中華民國，已經係黨政合一，法統早已經玩完。
當時中華民國國會參照美國行兩院制，分為「參議院」及「衆議院」。參眾兩院制度，係歐洲世界沿用二百幾年嘅議會傳統，簡單啲講，參議院代表上層貴族資產階級利益；而衆議院則代表普羅大衆嘅聲音。
借鑒西方國會選舉原則，中華民國參議院議席，經由間接選舉產生，即由各省議會推選出參議員，當時全國22個行省，每省各有十名參議員進入參議會，加上其他名額，全國參議員席位共有274個。
而衆議院議員，則採取全民普選產生。名額依照全國各地區人口多少而決定，大概每80萬人口選出眾議員一人，以當時中華民國人口大概四億人推算，全國一共有衆議員名額596個。
你冇睇錯，係全民直接普選產生衆議員。110年前，中國真係曾經出現過一場民主國會選舉。當然，當時「普選」的概念同現在唔同，選民要經過特別篩選。其中只限21歲以上男性，仲要有一定知識水平、教育程度同資產先可以成為選民，當時中國四億人口，選民人數係4300萬，約占總人口10%左右。大家唔好奇怪，當時中國90%以上嘅人係文盲，比張選票佢，佢可能以為可以愛嚟抆屎或者透火。
唔使多講，中華民國民主選舉嘅第一步梗係困難重重，一來制度未成熟，純屬試驗性質，二來所謂選舉觀念對好多人嚟講，係天方夜譚，見都未見過，聽都未聽過。因此依一場選舉，出現咗形形式式唔同嘅問題。到咗今時今日嘅香港選舉，仲有人賄選種票，蛇齋餅粽，呃阿婆阿公去投票都成日見，咁你話110年前嘅中國，情況會係點，我諗都不難想像？
1912年底舉行嘅國會選舉，其實係中華民國組織向心力同團結性嘅好時機當時嘅中華民國，除咗南北分治，其實整個各省各地都係各有各做，中華民國其實只係一個非常鬆散嘅政治聯盟，建立國會，有助統一國家，施行真正嘅國家統治。
法治講完，講返人治。1912年，袁世凱大權在握，借住北京會面，收編革命兩大巨頭。國父孫文同真國父黃興，分別接受袁世凱委派去搞鐵路項目。講真，其實搞就冇搞。籌辦鐵路，只不過係袁世凱畀佢兩位嘅下臺階，等兩大革命巨頭退出政治舞臺。亦有可能，袁世凱委派佢哋搞鐵路項目，係一心俾佢哋掠水賺取退休金。孫文同黃興嘅妥協，其實並冇做錯。我講過，推翻滿清換來最高權力，係袁世凱嘅政治報酬，革命派同盟會係認同呢個做法，亦係合約精神。否則袁世凱可以繼續以清國官員身份發動保衛清帝國戰爭，繼續生靈塗炭。而且以當時袁世凱北洋系統嘅軍事實力，如果打落去，完全摧毁革命力量，清帝國繼續經營落去一啲都唔奇怪。
政權和平交替，係一件好事。我諗當時孫文同黃興，亦都有相同感覺。未講孫文，先談黃興，真國父黃興選擇急流勇退，從此退出激烈嘅政治鬥爭漩渦，其實係大智慧表現，佢要做嘅事已經做到，下下響最前線衝，如今滿清已經被成功推翻，中華民國建立，老實講，佢嘅做法係功成身退唔磨爛席。我有陣時諗，如果每一個參予革命嘅人，都有黃興嘅氣度同修養，之後點會天下大亂？
孫文做啲乜，我哋下次再講。但黃興同孫文嘅政治妥協，就引發革命內部激進派嘅反對，同盟會第三號人物宋教仁唔贊成佢哋嘅做法，唔認為要將權力交畀袁世凱履行合約精神，宋教人係後生仔（當時剛剛30歲），佢覺得孫文同黃兄已經成為老屎忽，係明日黃花，燦爛已過。
宋教仁連同其他政黨，組成「國民黨」一刻，其實已經同孫文黃興上一輩割斷，孫文黃興嘅妥協，喺宋教仁心目中係投降主義。你哋唔玩我玩，宋教仁成為革命力量新興真正話事人，佢要喺1912年底嘅國會選舉中，用選民手中嘅選票，用自由民主嘅力量，挑戰袁世凱嘅絕對權威、挑戰袁世凱嘅北洋槍桿子系統。
你有警棍催淚彈同槍，我有民主自由同選票，睇下邊個堅啲？
#常威 #斷送共和關袁世凱蛋牛治 #袁世凱 #民國歷史
:^(
【常威近代史】第二部《中國一百年前第一次開放改革》
https://play.google.com/store/books/details?id=_6KMDwAAQBAJ
:^(
【常威近代史】第一部《大清亡國關慈禧蛋牛治》
https://play.google.com/store/books/details?id=C3hjDwAAQBAJ
:^(
【常威近代史】第一部《大清亡國關慈禧蛋牛治》實體購買
https://www.382now.com/product?id=87
:^(
【常威近代史】第二部《中國一百年前的第一次改革開放》實體購買
https://www.382now.com/product?id=151
常公子
2019-7-18 11:03:05
【156回：大清亡國關 #腳氣病 蛋牛治】
♋日俄戰爭中大量日本士兵死於腳氣病，有傳聞死於腳氣病嘅人數，甚至多於真實戰死嘅人數。腳氣病嘅成因係營養不良，亦可能同當時東北嘅嚴寒天氣、以及士兵嘅巨大心理壓力有關。一句到尾，係日本軍方後勤支援嚴重不足，十九世紀中葉開始，日本國民為咗自己國家同民族嘅強大崛起，曾經不顧性命，發揚武士道精神，以身殉國。以我常公仔嘅角度，係無產階級「被」資產階級呃上戰場，前者曝屍荒野，後者肚滿腸肥。
♊日本人對國家嘅熱忱，佢哋唔叫「愛國」，佢哋叫「憂國」，「愛」不足以殉道，只有「憂」先可以到達殉道嘅層次。現今香港年青人，亦已經超越「愛港」嘅層次，到達「憂港」嘅悲情。（包括我在內），我哋眼見一個我哋長大嘅地方，一日一日墮落，一日比一日變質，從前嗰個美麗公平多元化、機遇處處、充滿道德理性嘅和諧社會，好似變成咗第二個陌生嘅地方。我諗，呢個係我對社會不滿嘅原因，呢個亦都係出現「憂港」情緒嘅理由。
♑土生土長嘅香港人，好似我常公子一樣，早已經將香港視作故鄉，視作自己的根。試問我哋點忍心睇見香港逐漸變質？我熱愛呢度，熱愛呢度嘅人和事，熱愛呢度嘅文化，熱愛呢度嘅語言。作為一個香港人，我永遠感覺自豪，我會堅守我嘅崗位，做我可以做嘅嘢，捍衛香港，捍衛香港人，同時捍衛自己嘅愛。我亦都好開心我冇銀收，因爲我真係冇錢收。響我嘅背後，並冇資本家推我上去，在我背後只有我自己，仲有無數同我有一樣諗法嘅「香港人」。
♎【#常公子近代史】語音導航！請大家幫手「#訂閱」我條常公子YoutubeChannel！同埋介紹多啲人睇睇！衝上2000訂戶！
🍳
https://youtu.be/9BlbTjcawFM
【常威近代史】第二部《中國一百年前第一次開放改革》
https://play.google.com/store/books/details?id=_6KMDwAAQBAJ
【常威近代史】第一部《大清亡國關慈禧蛋牛治》
https://play.google.com/store/books/details?id=C3hjDwAAQBAJ
【常威近代史】第一部《大清亡國關慈禧蛋牛治》實體購買
https://www.382now.com/product?id=87
【常威近代史】第二部《中國一百年前的第一次改革開放》實體購買
https://www.382now.com/product?id=151
常公子
2019-7-19 13:01:36
:^(
🔥【常公子近代史】第一部《#大清亡國關慈禧蛋牛治》及第二部《#中國一百年前的第一次改革開放》實體書書展發售！
🔥請大家支持我常公子的近代史寫作計畫！一人一筆，誓要以廣東話母語寫出香港人眼中的中國近代史！
🔥2019書展常公子作品販賣點：1CD32 一代匯集 😍
#常威 #近代史 #歷史 #chinese #history #粵語 #廣東話
常公子
2019-7-19 14:53:56
:^(
【常威近代史】（二百三十九回）
袁世凱平反系列
中國第一次民主國會選戰開始，由於當時交通極不發達，資訊亦唔流通，一場牽涉全國22個行省嘅國會衆議院選舉，由1912年12月底開展，直到1913年3月先有最後結果，期間代表革命南方力量嘅「國民黨」真正揸Fit人宋教仁穿梭全國各地，身體力行要打出一場漂亮選戰，要用手中國會議席，達到責任內閣制目的，直接挑戰袁世凱嘅無尚權威。
中間，宋教仁嘅生命仲有三個月時間，同耶穌黃家駒張國榮一樣，美麗嘅花朵係最燦爛嘅一刻凋謝，總係能夠流芳百世。喺權力金錢世界中磨爛蓆，基本上冇人唔可以衰收尾。如果毛澤東喺1949年前死於內戰，佢註定會係中國最偉大嘅民族英雄之一；袁崇煥岳飛哲古華拉亦如是，不過急流勇退，又有幾個人可以做到？
宋教仁嘅事，遲啲再講。去到1913年嘅中華民國，其實內憂外患從未止息過，袁世凱體面地維持自由民主憲法嘅粗略框架，法統依然吊鹽水式存在。國家經濟仍然係一潭死水，袁世凱同佢嘅北京政府，依然不斷同外國銀行商討大規模借款問題，用作維持國家基本運作。
外國帝國主義勢力，仍然希望利用資本全面控制中華民國呢個貧窮落後嘅新興國家。睇返歷史，中華民國起步之初，袁世凱並無向任何一個西方強權撤底妥協或靠攏，佢希望利用國際間微妙嘅權力平衡同猜疑，維持中華民國嘅自主性，佢希望中國人能夠獨立自主自己國家嘅命運，喺依一點上，佢係值得尊敬。
當然你真係冇錢，就真係冇得惡。至於20世紀初期大清迴光返照期間留低嘅大量錢財，經過一場場轟轟烈烈嘅革命之後遺失大部份，依一個，又係另一個問題。
大英帝國插手西藏事務，袁世凱想揮軍入藏平亂，但被英國抑制，啞仔食黃蓮；同一時間中國人嘅好朋友俄國佬就明刀明槍，公然侵略中國領土。1912年11月，俄國派出密使，同外蒙古分裂主義庫倫當局代表簽訂《俄蒙協約》，沙俄正式向外蒙古大量殖民，協約中給予俄國人響蒙古各地自由居住遷徙、經營工商業、免稅貿易、買賣土地、開設銀行及郵政、及享有領事裁判權等權益，蒙古一片屬於中華民國管轄嘅廣大地區，亦出現咗「親中」同「親俄」兩大勢力，「親俄」勢力就係外蒙地區，最後嘅結果大家都知道。咩叫侵略？呢啲就叫侵略囉……
外蒙古分裂問題傳出，舉國譁然，矛頭又係直指袁世凱無撚用。咁又冇錯，你坐得最高嗰個位，有鑊梗係你揹。
去到1913年，仲有幾件重要嘅事會發生。首先1月1日，北京正式開放東西長安大街及天安門廣場，面對紫禁城入口嘅天安門原名中華門，響清代，只有皇室貴族先可以進入行走，普通平民百姓禁止入內，小個便都唔得。1月1日之後，天安門廣場成為中國人擺脱極權統治嘅象徵聖地，之後無數嘅政治事件喺廣場上發生，見證咗中國政治嘅起伏興衰。不過到咗今時今日，你響天安門廣場叫一聲「平反六四」或「打倒共產黨」，仍然毫無疑問係會俾公安拉。百年鳩做，就係咁解。
響香港，大家仍然可以上街高呼「林鄭下臺」同「打倒共產黨」，只要唔衝，警察唔可以用橡膠子彈射你或起訴你（遲少少，燒國旗或詆譭国歌就可以入你）。香港人擁有嘅言論自由權利，係邊個賦予？中華民國？中華人民共和國？l am so sorry，答案係大英帝國。
2月22號，前朝清帝國隆裕太后，清帝國表面最高領導人，光緒嗰個醜樣到爆燈、一腳想伸佢老母落床、毫無政治能力嘅老婆病死咗，終年46歲，袁世凱下令全國下半旗致哀，官員穿孝服27日紀念，做法同紀念日本帝國明治天皇駕崩非常相似。
今日最後補充一單史料，幫助大家綜覽全局。1913年2月，社會上出現咗一個叫「同志乞丐團」，即係武俠小說裡面嘅「丐幫」，呢班人話自己曾經參與武昌革命，但係革命成功之後未能得到一官半職，有份衝但冇份分錢，所以被迫乞食，宣傳單張講明「行乞決不騷擾民間，惟擇因革命而致富者與前清貪官污吏之家」。於是黎元洪為解決事件，送咗12000蚊（大洋）畀佢哋作為遣散費，但係丐幫有成5000人，平均除開每人三個大洋唔夠？你想用萬零蚊打發佢哋走？傻的嗎？而且《臨時約法》明文規定民間有結社自由，「同志乞丐團」無需解散。
改朝換代，有人快樂有人愁，有人一夜之間發財，亦有人被迫乞食。
大家可以睇到，其實我朋友周顯講得冇錯，世界上，只有兩種人存在，一係有錢人，二係窮人。如果你係一個窮人，咁無論你喺自由民主社會抑或極權社會裡面，你都係註定悲慘嘅。相反做到有錢人，響現今世代，其實就係世界公民，香港有乜冬瓜豆腐，咪飛返英國澳洲加拿大囉，你真係吹得我脹麼？
咁又啱，完全駁唔到。周顯好嘢！
#常威 #斷送共和關袁世凱蛋牛治 #袁世凱 #民國歷史
【常威近代史】第二部《中國一百年前第一次開放改革》
https://play.google.com/store/books/details?id=_6KMDwAAQBAJ
【常威近代史】第一部《大清亡國關慈禧蛋牛治》
https://play.google.com/store/books/details?id=C3hjDwAAQBAJ
【常威近代史】第一部《大清亡國關慈禧蛋牛治》實體購買
https://www.382now.com/product?id=87
【常威近代史】第二部《中國一百年前的第一次改革開放》實體購買
https://www.382now.com/product?id=151
突發性交易
2019-7-19 14:57:19
推
:^(
常公子
2019-7-20 11:06:11
【157回：大清亡國關 #兩敗俱傷 蛋牛治】
♒馬克思講，所有嘅政治問題，其實都係經濟問題。身處現在嘅香港，似乎每一個人都能夠感受到年青人嘅怒火，唔係怨氣，係怒火！一股可以燎原嘅怒火！再搞落去，真係會兩敗俱傷。
♐林鄭月娥口裏嘅「暴徒」，其實喺香港各所大學嘅精英分子，響最前線衝嘅，亦有好多三大門徒，連佢林鄭同班高官都唔夠膽講丫。大家只要睇返拘捕名單就一清二楚，咬斷警察手指嘅兩位年青人，分別喺香港大學同理工大學畢業。點解佢哋咁憤怒呢？明明響香港最高學府畢業，唔係應該有美好前途嘅咩？點解有咁大怒火？點解對社會咁不滿？要上前線衝擊警察？佢哋唔會腦袋有問題，否則唔會讀到HKU掛？今日香港嘅怪獸家長，千方百計書展打蛇餅買補充畀啲仔女暑假做，目的都係想子女他日考入三大，保證有美好嘅前途，保證搵到食。
♏但事實講比我哋知，真相並唔係咁樣。今時今日香港，就算你係三大畢業，亦都冇人保證你可以有美好嘅前景（或搵到一份高薪厚職），或者可以向上流動。咁就大撚鑊啦，三大畢業都要發愁都要衝，咁唔係三大或者讀唔到大學咪好撚頭痕？儲錢買樓？更加係遙不可及，我識得唔少年青人，根本連日常生活拍拖去街都唔夠錢，莫講話結婚生仔組織家庭，根本係冇可能。每日返工放工，上層啲死老鬼又死極都死唔去，冇人移民冇人退休，後生仔完全睇唔到前景，營營役役，生活成本急促上漲，人工永遠追唔到物價，於是捉襟見肘，個個月唔夠使，講真唔嬲就有鬼。
♎更加可笑嘅係，個個高官都話注重青年人政策，但係就去問幾十億身家劉鳴煒意見，年青人當選立法局議員想為後生仔發聲，你就當佢馬騮咁玩DQ佢，仲要成班老鬼群起而攻之抹黑班後生仔，要打到佢哋萬劫不復。前人種樹，後人乘涼；前人埋地雷，要後生仔踩；大家諗吓有冇道理？目前香港嘅亂局發展落去，冇人知道點收科。但係就算一旦俾你收到科，年青人嘅怒火亦唔可以被抹去，只要有下一條導火線出現，就會有另一場更大嘅抗爭會發生。
♎當然仲有一招叫集中營，Concentration Camp，可以用處理維吾爾族嘅手法，將所有年青人關入集中營再教育，灌輸佢哋忠君愛國嘅思想。不過如果啲集中營每間有四百零呎，獨立廚廁，有wifi唔使交租。一次性地解決香港年青人嘅居住問題，我諗又係有得搞。不過如果你敢搞，香港地產商一定唔會放過你，咁啲私樓邊個買呀？冇人買樓？點炒呀？又啱，所以大家放心，香港唔會有集中營，因為寸金尺土。人只係其次，托住個市先係最重要。
♎【#常公子近代史】語音導航！請大家幫手「#訂閱」我條常公子YoutubeChannel！同埋介紹多啲人睇睇！衝上2000訂戶！
🍳
https://youtu.be/bRfbcdR1Mzw
【常威近代史】第二部《中國一百年前第一次開放改革》
https://play.google.com/store/books/details?id=_6KMDwAAQBAJ
【常威近代史】第一部《大清亡國關慈禧蛋牛治》
https://play.google.com/store/books/details?id=C3hjDwAAQBAJ
【常威近代史】第一部《大清亡國關慈禧蛋牛治》實體購買
https://www.382now.com/product?id=87
【常威近代史】第二部《中國一百年前的第一次改革開放》實體購買
https://www.382now.com/product?id=151
常公子
2019-7-21 11:42:43
【星期日特別放送：香港關【中英聯合聲明】腿蛋治（一）】
😜其實識睇常公子頻道嘅朋友，都係聰明人，叻過我常公子嘅人應該占大多數，關於中英聯合聲明，我相信好多人瞭解比我更加深。但係我相信，收看本頻道嘅亦有一批年青人，佢哋未必太瞭解中英聯合聲明係乜春，所以我專登做條片，等大家加深瞭解，因為香港回歸，完全係因為一份中英聯合聲明。
😜香港人加油！在各自崗位發揮力量！
♎【#常公子近代史】語音導航！請大家幫手「#訂閱」我條常公子YoutubeChannel！同埋介紹多啲人睇睇！衝上2000訂戶！
🍳
https://youtu.be/AbM3IGyrETE
【常威近代史】第二部《中國一百年前第一次開放改革》
https://play.google.com/store/books/details?id=_6KMDwAAQBAJ
【常威近代史】第一部《大清亡國關慈禧蛋牛治》
https://play.google.com/store/books/details?id=C3hjDwAAQBAJ
【常威近代史】第一部《大清亡國關慈禧蛋牛治》實體購買
https://www.382now.com/product?id=87
【常威近代史】第二部《中國一百年前的第一次改革開放》實體購買
https://www.382now.com/product?id=151
常公子
2019-7-22 14:22:02
:^(
【常威近代史】（二百四十回）
袁世凱平反系列
1911至1913年，中華民國草創初期，國父孫文嘅實際影響力同能力一直被跨大。自從1905年起，孫文嘅革命活動同中國長江流域一帶嘅革命份子，基本上係完全割斷。係各有各做，孫文有份參與嘅1911年春天廣州黃花崗起義行動，其實規模同埋影響力，都係畀後世國民黨歷史撰稿人誇大咗。
真正推翻滿清政府嘅武昌起義，其實孫文並沒有參與其中，甚至係起義爆發之後佢先響美國收到風，加上佢長期留居海外，佢對中國內部革命事業嘅實際參與程度，其實相當之細，起碼遠遠唔及黃興、宋教仁。之後佢回國，被推舉為中華民國臨時大總統，係由於佢喺國際社會上嘅聲名同影響力，當然孫文響國際間嘅影響力（或借款能力），事後證明亦都係陀地革命黨人對佢嘅一個美麗誤會。
呢個亦都係好多香港怪獸家長，以為啲仔女「去過外國留學，啲英文就會勒勒聲」嘅美麗誤會。其實好多人去留學去讀野雞，都係吃喝玩樂，群埋成班香港人圍爐，食下大麻，溝吓女，溝吓你，父母使咗幾百萬棺材本畀你出去威，書就冇乜讀過，玩足四年，叫你好我好。
孫文本身，係革命嘅象徵符號，用今日嘅語言，係KOL同代言人，做代言人未必一定要用宣傳片段裡嘅護膚品。孫文嘅意識形態作用大於佢嘅實際政治作用，之後孫文禪讓佢個大總統位置比袁世凱，更加引起陀地革命黨人嘅極端不滿，佢哋覺得孫文對袁世凱妥協，係投降主義。最起碼宋教仁就係咁諗，宋教仁從來冇表面同孫文決裂，但係佢唔妥孫文就一定。
簡單啲講，宋教仁覺得自己係做實事係衝嗰個，而孫文係做虛事攞光環，1912年8月，當宋教仁籌辦「國民黨」參與國會大選時，佢將孫文個名排響第一位，純粹俾面國父個朵，其實佢完全冇侵孫文玩……
用政治意識形態，亦都有另一個解讀。
宋教仁深深信奉美國嗰套自由民主國會兩院責任內閣制，係堅定不移嘅Donald Trump支持者。相反，睇返孫文嘅三民主義，要求平均地權，重新分配社會財產。大家千祈唔好避，歷史事實話俾我哋知，孫文其實係一個100%社會主義者、馬克思主義者。當時俄國十月革命尚未發生，共產主義仍然未變成現實。但係列寧、托洛斯基同一群社會主義者，佢哋信奉馬克思主義嘅言論已經係歐陸廣泛蔓延。
當時身處中國嘅革命者，因為資訊不發達同唔識英文，可能完全唔知道左翼勢力響西方資本主義世界高速崛起嘅事實，但孫民長期居留海外，佢一定會知道，而且事後證明，佢亦比左翼思想同馬克思主義深深控制思想同行為模式。孫文之後同蘇共第一國際行埋，聯俄容共，坐埋一條船，堅信黨政合一，搞極權統治，斷送共和，大家一清二楚。
作為馬克思主義者，對美國嗰套自由民主制度，會視之為精英主義，係社會上嘅資產階級同上層建築利用議會同代議政制手段，操控同剝削普羅大眾無產階級。將窮人勞動力所產生嘅財富（資本），利用政治同制度，一步一步高度集中響少數上層建築精英階級手裡面，令富者越富，貧者越貧。
你問心嗰句，馬克思主義其實冇錯，係金科玉律，我自己都信，孫文又信又有幾咁奇怪？
孫文1912年去北京開完四巨頭會議，發表咗一堆摸不著邊際嘅說話後，佢就正式接受袁世凱收編，做其「鐵路督辦」，高薪厚職，每月可以領取三萬元經費，享有「籌畫全國鐵路全權」。實際上，呢個舉動，係孫文宣佈正式淡出政治舞臺，用香港人話講，「我而家唔撚玩喇，宋教仁你玩撚曬佢啦」。
我有一點想提出，孫文依個人，其實係一個非常之有毅力嘅追夢者，你睇佢由1895年玩革命開始，中間經歷無數波折，雖然有起有落，但係從來冇放棄過你就知道。佢唔係普通人，同時亦係一個聰明人，一個聰明人，同時又有堅定不移盲目追夢嘅意志力，依種人其實非常可怕。
袁世凱比個虛職你做，孫文亦都貫徹中國人個套和稀泥玩法，同你虛做。實事免問，佢乘坐慈禧太后嗰架專列，周遊北方諸省，發表佢嘅偉大鐵路藍圖，指手劃腳，亂講一通，搞到俾人叫做孫大炮，你估佢真係亂嚟？傻的嗎？上面講過孫文係聰明人，亦係馬基維利主義者候選者之一，做表面功夫，扮低能，扮弱智，無非都係想削弱政治對手嘅注意力，依一招難度好高。至於佢嘅政治對手係袁世凱？宋教仁？抑或兩個都係？大家自己諗。
政治本身係一個詭局，孫文究竟想點？我哋下次繼續……
#常威 #斷送共和關袁世凱蛋牛治 #袁世凱 #民國歷史
【常威近代史】第二部《中國一百年前第一次開放改革》
https://play.google.com/store/books/details?id=_6KMDwAAQBAJ
【常威近代史】第一部《大清亡國關慈禧蛋牛治》
https://play.google.com/store/books/details?id=C3hjDwAAQBAJ
【常威近代史】第一部《大清亡國關慈禧蛋牛治》實體購買
https://www.382now.com/product?id=87
【常威近代史】第二部《中國一百年前的第一次改革開放》實體購買
https://www.382now.com/product?id=151
Ads
常公子
2019-7-23 11:21:31
【158回：大清亡國關 #戰意 蛋牛治】
♒timing好重要，當你愛的人不在最好的時間出現，愛情是沒有結果的。
♑用呢個道理去分析，7月21日遊行，7月20號發現烈性炸藥同汽油彈，亦都相當夾timing，點解一定要係7月20日星期六發現巢穴？唔係星期五？又唔係星期四？線人提供嘅情報時間啱啱好，做得的確出色。不過仍然有破綻，而且有一個好大嘅破綻。
♉普羅市民對於件事有兩個睇法：🅰警方真係發現有恐怖分子製造烈性炸藥同汽油彈，成功搗破巢穴，並且即時引爆炸藥，解決危機，確保市民人身安全。🅱第二個睇法係，整件事件根本係一場戲，目的係為咗製造恐慌，令到721大遊行人數減少，從而減低市民對政府嘅施壓。
♐我個人對🅰或🅱答案並冇特別偏見。而且我傾向相信係🅰，因爲我都是相信政府的。但係如果係🅰嘅話，咁就好好笑。點解警方可以咁肯定製造烈性炸藥汽油彈嘅恐怖分子巢穴只有荃灣一個呢？如果你係恐怖分子，你會唔會將所有嘅反政府武器集中係一個地方儲存呢？咁即係話，若然真係有恐怖分子有組織製造汽油彈或炸藥，而警方又未能徹底證實所有危險品已經被搜出，咁響確保市民生命安全嘅大前題下，721游行就應該硬性地取消。因為如果真係有證據顯示恐怖分子帶住炸藥或汽油彈參與遊行搭地鐵，幾十萬人逼喺一齊，若然唔小心發生爆炸，將會係一件驚天大慘劇。點解警方同遊行主辦單位都會咁老定？認為件事已經過去咗，照常舉辦遊行呢？咁照推理，理由祇有一個，就係一場戲。
♏答案如果係🅱，就更加鬼。汽油彈同烈性炸藥，係插贓嫁禍？抑或係當事人根本就係鬼配合政權做戲？我真係諗唔明，所以冇可能係🅱，應該都係🅰。
♌同一個道理，721夜晚，元朗事件發生，點解timing又會咁準？嗰邊西鐵打人，呢邊防暴警察開槍，結果成功施展乾坤大挪移，民家視線忽然之間全部集中曬喺元朗，開槍事件又冇人提。普羅民眾仇視嘅對象，亦由「警察」，一夜之間轉移到「白衣人」身上，真係好奇怪？我上述嘅講法，完全係我發神經嘅想像，同真實情況無關，請大家見諒。不過統戰嘅嘢，我真係識條鐵？
♎【#常公子近代史】語音導航！請大家幫手「#訂閱」我條常公子YoutubeChannel！同埋介紹多啲人睇睇！衝上2000訂戶！
🍳
https://youtu.be/zrSJt9HLSBY
【常威近代史】第二部《中國一百年前第一次開放改革》
https://play.google.com/store/books/details?id=_6KMDwAAQBAJ
【常威近代史】第一部《大清亡國關慈禧蛋牛治》
https://play.google.com/store/books/details?id=C3hjDwAAQBAJ
【常威近代史】第一部《大清亡國關慈禧蛋牛治》實體購買
https://www.382now.com/product?id=87
【常威近代史】第二部《中國一百年前的第一次改革開放》實體購買
https://www.382now.com/product?id=151
常公子
2019-7-24 20:03:34
:^(
【常威近代史】（二百四十一回）
袁世凱平反系列
男人最怕，係中年危機。1912年嘅冬季，孫文明顯陷入佢嘅中年危機。表面比袁世凱收編搞「鐵路督辦」，革命事業長江後浪推前浪，陀地宋教仁新一代戴頭盔推鐵馬玩曬，作為革命第一代KOL，佢絕對唔會咁易放手。
乘坐慈嬉太后專列穿梭北方各省，招搖過市。響列車上面，有一個好重要嘅人，叫Charle，宋嘉澍（1863-1918），冇聽過？佢嘅仔女你應該聽過，有宋子文、宋藹玲、宋美齡同宋慶齡。Charle係上海一個牧師，亦係一個有錢佬，佢亦係孫文嘅好朋友。孫文任命佢管理鐵路嘅財務，當時Charle個大女宋藹齡都喺火車上，做孫文嘅英文秘書。
孫文這個傢伙，不愧為蘿莉控之首，佢喺旅途之上，愛上咗宋藹齡，當時孫文己經46歲，宋藹齡23歲，年紀相差足足一倍，但孫文覺得冇問題，佢就係鍾意食幼齒，孫文響曬朵迷戀佢，可惜最後佢溝唔到佢，宋藹齡第二年下嫁另一民國猛人孔祥熙。孫文就退而求其次，溝佢細妹宋慶齡，宋慶齡最後亦都成為咗我哋嘅國母，更加成為咗中國共產黨於國民黨內最大嘅一條針。宋家三姊妹，剩低嘅一個宋美齡，亦下嫁蔣介石，全部都係傳奇人物，全部都係傳奇故事。
宋家皇朝，梗係唔係講笑。首先書香世代，宋嘉澍是北宋三朝宰相韓琦的二十九代孫，N世代有錢人。另外有一個傳聞，話宋嘉澍身為牧師，其實係一個出版商，佢出版乜嘢書？嗰本書叫《Holy Bible》，中文叫《聖經》，有史以來全球最暢銷書籍（沒有之一）。總之宋嘉澍係自由城邦上海一個大財閥，因為教會條line，佢同英美兩國關係非常密切。宋嘉澍，令我諗起之前嘅一個大人物李提摩太牧師（1845-1919），我曾經講過李提摩太絕對唔係普通傳道人，佢應該係大英帝國軍情六處嘅人，係006。其實做間諜，有乜嘢好過以教會同埋學生嘅身份作為掩飾呢？
間諜，就係用嚟刺探他國情報。但係間諜呢個職業唔可以講畀人知，如果唔係就唔係間諜。所以間諜要用另一個身份掩飾自己，無端端進入另一個國家刺探情報，唔通你入境嗰陣喺職業欄上填「Spy」？所以從前，從外國而嚟嘅傳教士，就係間諜最好嘅掩飾。我個人相信，19世紀晚清至20世紀初活躍於中國嘅傳教士，有一半以上其實係間諜。今時今日，就係留學生。我朋友話我知，目前香港大學中文大學攻讀博士生嘅人，有七成以上係內地朋友。我常公仔聲明，我相信依群純粹研究學術啲內地朋友，絕對唔會係間諜！但響美國，早前美國總統特朗普就講過，十個中國留學生，十個都係間諜，偷情報？OutDate啦關二哥，偷科技呀懵撚！
孫文黐埋宋家，真正動機大概心知肚明，乜嘢蘿莉控啊戀愛啊要生要死啊，統統只係手段啫。搞革命要錢，任何嘢都要錢。而最快得到錢嘅方法，古往今來都係一招，就係姻親關係。嫁個有錢人，公屋妹可以住去山頂，飛黃騰達就在一夜之間。同樣道理，娶個有錢老婆，亦都係唔少有錢佬發達嘅理由，李嘉誠吳光正鄭裕彤，全部都係娶個有錢老婆發達，大家可以同朕上維基check check。
孫民詐傻扮懵，呢幾個月，一邊亂鳩咁吹鐵路大計，要鐵路軌鋪上海拔15000尺嘅高度（註一），分散敵人注意力，另一邊努力溝女，誓要搵到新水喉繼續玩落去。
去到1913年春天，國會大選嘅選情逐漸明朗化，由宋教仁領導嘅國民黨，勢必獲得大勝，取得壓倒性議席數目。有一點要提提大家，選戰過程中，宋教仁有去見過真國父黃興，但冇見過孫文。
1913年2月11號，國會選舉塵埃落定之前，孫文同黃興分別前後腳去咗日本。表面上，孫文去日本係傾借錢起鐵路事宜，但係真相我並唔係咁諗。日本人一向係孫文最大嘅靠山，難聽啲講，孫文係同日本人做事（當然唔係做間諜，堂堂國父點會係日本人間諜呢？），佢去日本，一定係有更重要嘅大計要傾。之後宋教仁被刺殺之時，其實孫文仍身在大日本帝國……
下一集，國會大選結果出爐……
註一：呢個講法，係袁世凱嘅顧問莫理循（G. E. Morrison）所收一封信內提及，孫文嘅鐵路藍圖，要響十年內修建20萬英里鐵路，粗略估算，至少需要動用160億法郎，完全亂嚟，幼稚得令人發笑。但我相信，孫民係故意咁做，分散敵人視線。
#常威 #斷送共和關袁世凱蛋牛治 #袁世凱 #民國歷史
:^(
【常威近代史】第二部《中國一百年前第一次開放改革》
https://play.google.com/store/books/details?id=_6KMDwAAQBAJ
:^(
【常威近代史】第一部《大清亡國關慈禧蛋牛治》
https://play.google.com/store/books/details?id=C3hjDwAAQBAJ
:^(
【常威近代史】第一部《大清亡國關慈禧蛋牛治》實體購買
https://www.382now.com/product?id=87
:^(
【常威近代史】第二部《中國一百年前的第一次改革開放》實體購買
https://www.382now.com/product?id=151
常公子
2019-7-25 10:51:32
【159回：大清亡國關 #六六艦隊 蛋牛治】
♒今集常公子頻道講嘅係日本聯合艦隊六六艦隊嘅基本構成，當時20世紀初期，日本依一支戰力位列世界前列嘅「六六艦隊」，12艘主力戰艦其中有10艘由英國製造。你去打仗，我提供軍備，即係生意一盤，冇仗打，就會冇生意做，就係咁簡單。由此可見，當時英國的確係海上霸主，甚至係世界霸主，幕後大玩家，賭檯大莊家。
♎如果你身處20世紀初年倫敦，有人同你講，不落日帝國大英帝國將會於未來江河日下、最後失去世界霸主地位，我諗你一定會唔相信，甚至會話嗰個人係黐線嘅。但係事實話比我哋知，一個超巨大帝國嘅崩潰，亦可以響短時間內發生，一場世界大戰，就足以將英國拉落神壇。第二次世界大戰後，世界霸主地位亦宣佈易手，由美國取代英國。前前後後，需要嘅時間只係40年，一代人都唔夠。
♊就算係大英帝國一個雄霸整個十九世紀、咁巨大咁屈機嘅世界強權，都有日落嘅一日（你睇吓今日）。咁一個普通霸權、或者某個普通政權，要維持佢嘅生命，真係並唔係咁容易，最近有啲人成日會覺得某個政權會永恆不倒，甚至冇人可以動搖佢嘅根基，好似上帝一樣自有永有，其實一定係錯嘅。
♌政權就同一個正常人類一樣，要繼續生存落去，一定要努力工作，努力提昇自己、改善自己、完善自己、或要將自己做得更好。作為一個政權，一個現代政權，最大嘅責任就係要服務人民，令國家內人民得到好嘅生活，無論物質上或精神上。吓吓用極權統治？愚民政策？迫害民眾？偷呃拐騙？背信棄義？咁都俾你捱過100年嘅話？講真，仲邊度有天理？
♎【#常公子近代史】語音導航！請大家幫手「#訂閱」我條常公子YoutubeChannel！同埋介紹多啲人睇睇！衝上2000訂戶！
🍳
https://youtu.be/dF0CkSj4ltY
【常威近代史】第二部《中國一百年前第一次開放改革》
https://play.google.com/store/books/details?id=_6KMDwAAQBAJ
【常威近代史】第一部《大清亡國關慈禧蛋牛治》
https://play.google.com/store/books/details?id=C3hjDwAAQBAJ
【常威近代史】第一部《大清亡國關慈禧蛋牛治》實體購買
https://www.382now.com/product?id=87
【常威近代史】第二部《中國一百年前的第一次改革開放》實體購買
https://www.382now.com/product?id=151
常公子
2019-7-26 16:58:07
:^(
【常威近代史】（二百四十二回）
袁世凱平反系列
去到1913年頭，國民黨喺國會選舉將會大勝嘅消息，其實全世界都知。當時，好多人想推舉真國父黃興做總理（唔係孫文），但黃興退位讓賢，將個位留畀後生宋教仁。
3月，正式選舉結果出爐，由宋教仁領導嘅國民黨，以絕對優勢成為國會中第一大黨。宋教仁打出咗一場最漂亮嘅選戰，為中華民國法統自由民主國會選舉之路，踏出最光輝嘅第一步，但係非常可惜，就只係得依一步……中國人命運的悲慘，由此可見。講真，如果呢個世界有天，有上帝嘅話，咁天同上帝從來冇幫過中國人，佢哋只係幫西方人。
響參眾議院合計嘅870個議席之中，國民黨取得392席，對手共和黨、統一黨、民主黨合計獲取223席。國會將被國民黨控制，作為國民黨黨魁宋教仁，根據臨時憲法，亦會代替時任嘅國務總理趙秉均出任國家總理。3月8號，宋教仁響北京發表勝利演說，提出政策大方針，主張全面效法英美，採用責任內閣制。宋教仁的政綱，無疑進一步削弱咗大總統即係袁世凱嘅權力。
而身在北京嘅袁世凱，亦都公開承認國會選舉國民黨大勝呢個事實，並且邀請宋教仁北上，主持召開中華民國國會同履任總理事宜，形勢的確一片大好。呢個時候嘅孫文，身在日本，3月11號，佢被日本朝日新聞社邀請，響大阪發表「大亞洲主義」演說，宣傳緊大日本帝國嘅大東亞共榮圈嘅理念。
3月20號，中國歷史上面好重要嘅一日，宋教仁應袁世凱嘅邀請北上，響上海滬寧車站畀黑社會槍手行刺，腰部中彈。佢被送到醫院接受手術，但係未能夠挽救佢嘅生命，3月22號朝早，宋教人死亡，享年30歲。
佢寫下嘅遺囑係咁：
「今以三事奉告：一、所有在南京、北京及東京寄存之書籍，悉捐入南京圖書館；二、我本寒家，老母尚在，如我死後，請克強與公及諸故人為我照料；三、諸公皆當勉力進行，勿以我為念，而放棄責任心。我為調和南北事費盡心力，造謠者及一班人民不知原委，每多誤解，我受痛苦也是應當，死亦何悔？」
臨死之前，宋教仁並無怨懟，一心都係渴望南北團結，渴望中華民國能夠走上自由民主法統之路。「我受痛苦也是應當，死亦何悔？」一句，錐我心蝕我骨。同時，佢亦拜託黃興，畀咗一份電報袁世凱。
「北京袁大總統鑒：仁本夜乘滬寧車赴京，敬謁鈞座。十時四十五分在車站突被奸人自背後施槍彈，由腰上部入腹下部，勢必至死。竊思仁自受教以來，即束身自愛，雖寡過之未獲，從未結怨於私人。清政不良，起任改革，亦重人道、守公理，不敢有毫權之見存。今國基未固，民福不增，遽爾撒手，死有餘恨。伏冀大總統開誠心、布公道，竭力保障民權；俾國家得確定不拔之憲法，則雖死之日，猶生之年。臨死哀言，尚祈見納。宋教仁。哿。」
最後心願，亦希望大總統袁世凱能夠尊重憲法，保障民權，維持法統，好可惜，隨住佢嘅死，佢嘅願望亦都唔會有實現嘅一日。
宋教仁之死，引起嘅震動係空前巨大，全國嘩然，人民悲憤莫名，尤其是革命黨人，似乎唔使諗，真正兇手就係袁世凱。響北京，輿論認為暗殺事件係國民黨內部爭奪領導權而發生，宋教仁之死，眾說紛紜，直到今日仍然冇一個定案，係一個千古謎團。
刺殺行動嘅直接教唆者江蘇駐滬巡查長應桂馨（1864-1914）響3月23日響上海公共租界被捕，佢係青幫成員，革命界知名人物，有錢仔，中過秀才仲識英文，佢係陳其美嘅手下。真正槍手武士英亦響第二日喺法租界落網，佢係一個失業軍人。響應桂馨屋企，上海巡捕抄查出佢同國務總理趙秉鈞、袁世凱國務院機要秘書洪述祖（1855-1919）之間策劃呢次暗殺嘅密碼電報同信件，不過，咁確鑿嘅證據會唔會太X明顯呢？但係證據顯示，行刺宋教仁嘅元兇，就係國務總理趙秉鈞，係袁世凱總統辦公室，行前一步，即係袁世凱本尊。
北京方面，當然完全唔認同上海當局搵出嘅所謂「真相」。4月24日，槍手武士英仲喺獄中神秘死亡。5月，上海地方審判廳發出傳票，要求國務總理趙秉鈞出庭應訊，但趙秉鈞當然唔會由北京去上海受審啦？結果拖吓拖吓，件事就不了了之。大家唔需要覺得奇怪，呢個唔係中國特有嘅情況，1963年，美國總統約翰甘迺迪被行刺，事後嘅處理亦都係差唔多，總之兇手搵到出嚟，佢認咗罪，之後神秘死亡，close file。
1968年6月6日，甘迺迪細佬羅伯特（Robert F. Kennedy）響勝出民主黨初選，決定出戰美國總統大選前，亦都被槍手行刺而死，件事亦都係求九其close file，不過要提一提，槍手約旦公民Sirhan Sirhan冇死，目前仍響美國服刑。
關於宋教仁行刺案，我哋下次繼續講。
#常威 #斷送共和關袁世凱蛋牛治 #袁世凱 #民國歷史
【常威近代史】第二部《中國一百年前第一次開放改革》
https://play.google.com/store/books/details?id=_6KMDwAAQBAJ
【常威近代史】第一部《大清亡國關慈禧蛋牛治》
https://play.google.com/store/books/details?id=C3hjDwAAQBAJ
【常威近代史】第一部《大清亡國關慈禧蛋牛治》實體購買
https://www.382now.com/product?id=87
【常威近代史】第二部《中國一百年前的第一次改革開放》實體購買
https://www.382now.com/product?id=151
常公子
2019-7-26 16:58:23
:^(
常公子
2019-7-27 11:20:23
【160回：大清亡國關 #天下無敵波羅的海艦隊 蛋牛治】
♒好開心能夠活於今天嘅香港，瞬息萬變，由6月開始發生嘅民眾抗爭，到咗今日，正正可以話比好多人知，冇人能夠遠離政治，冇人再可以對政治漠不關心，好人一生平安，並唔係一定。過去，香港有大量有政治潔癖嘅人，佢哋對政治性冷感，只係對樓價同股票有興趣，亦因為有太多這一類人，所以社會先會不斷累積怨氣，積積埋埋，終於到咗爆發一日。
♐年青人唔係暴徒，我絕對認同。佢哋只係對自身嘅惡劣處境，感到非常不滿而行出嚟抗爭，希望得到改變，逃犯條例只係引爆計時炸彈嘅導火線。認識我嘅朋友都知道，我一直都覺得現今香港社會向上流動機會太細，貧富極度懸殊，政府成日話失業率好低，有好多工作機會，但明眼人都睇到，香港所謂大量嘅工種職位空缺，全部都係無需學歷嘅地盤洗碗保安零售，中高階職位空缺根本極度唔夠。
♉但仆街嘅你一方面係咁推年青人讀書，讀呀讀，讀呀讀，就算讀唔到大學都要讀個副學士，但另一方面就無視佢哋完成高階教育之後嘅出路問題。一班庸官狗官，或者AOEO，淨係識出糧同炒樓炒股票，對社會經濟結構毫無洞察力同分析能力，完全離地。用最簡單嘅例子，你睇吓香港嘅教師職位數目（完全可以有數計），明明已經飽和咁滯，但係教育系統仲不斷每年train大量教師出嚟，冇人去諗作出調整（其實全港中小學推行小班教學就搞掂，能夠創造更多職位），好多讀完教育大學或教育文憑嘅大學生，根本搵唔到教師嘅工作做，我就認識唔少，佢哋被逼要做人工得萬二三蚊嘅教學助理（洗碗阿姐仲高人工過佢），畀著你係佢，唔嬲就有鬼。
♊香港今日嘅亂局，唔好將責任推喺年青人身上，完全係最高統治階層一手一腳做出嚟，四個特首董建華曾蔭權梁振英林鄭月娥，同嗰班完全離地、不知民間疾苦嘅垃圾行政會議成員立法會議員及一眾高薪厚職高級公務員責無旁貸。社會產業單一化，大量工種逐年消失，物價樓價瘋狂上昇，但冇人去問亦冇人去理，或者根本你哋唔撚知，亦冇咁嘅智慧去知，更加無能力去搞或冇能力去作出改變。如果真係咁，就唔該你哋集體辭職，返加拿大退休湊孫，再唔好毒害香港社會同香港年青人！
♎【#常公子近代史】語音導航！請大家幫手「#訂閱」我條常公子YoutubeChannel！同埋介紹多啲人睇睇！衝上2000訂戶！
🍳
https://youtu.be/keLnJRXH5qE
【常威近代史】第二部《中國一百年前第一次開放改革》
https://play.google.com/store/books/details?id=_6KMDwAAQBAJ
【常威近代史】第一部《大清亡國關慈禧蛋牛治》
https://play.google.com/store/books/details?id=C3hjDwAAQBAJ
【常威近代史】第一部《大清亡國關慈禧蛋牛治》實體購買
https://www.382now.com/product?id=87
【常威近代史】第二部《中國一百年前的第一次改革開放》實體購買
https://www.382now.com/product?id=151
展斌舟
2019-7-28 15:13:27
好同意
:^(
常公子
2019-7-28 15:23:01
Fight For Freedom, Stand With Hongkong.
To be or not to be. It is NOW or never.
https://youtu.be/MOpoMURo8pM
推！
常公子
2019-7-28 15:32:22
:^(
【常威近代史】（二百四十三回）
袁世凱平反系列
究竟邊個係殺死宋教仁嘅真兇？歷史上冇人講我哋知（其實講吐）。正史記載，宋教仁死於袁世凱之手，袁世凱係最大嘅嫌疑犯。但事後睇返，宋教仁嘅死對袁世凱不但無好處，而且傷害最大，因為宋被行刺，先至產生之後嘅第二次革命，搞到打仗，個個都知道打仗洗費最大，袁世凱當然唔會咁蠢X。
而且以袁世凱當時嘅勢力，直屬佢直接聽佢指揮嘅北洋軍隊接近十萬人，盤踞於首都北京華北一帶，三十歲嘅宋教仁北上，就算真係做到總理，難道佢又可以飛得出袁世凱嘅五指山？而且地緣政治，宋教仁要離開南方根據地，政治威力就會大減。加上第一屆中華民國國會召開，百廢待興，經驗又不足，係唔係好似後世咁理解可以制衡大總統袁世凱嘅絕對權力？亦都好難講。
如果我係袁世凱，我直情會捧起同收編宋教仁，因為論武力論年齡論資歷論社會經驗，袁先生都贏九條街，之前袁世凱已經收編咗孫中山同黃興，難道收編宋教仁會有問題嗎？所以，袁世凱無理由要殺宋教仁，後世歷史學者，都將當時宋教仁對聯世凱權力嘅威脅描繪得太大，亦即係講，對宋教仁如果唔死，之後所能夠做嘅事誇張咗幾倍。
劉仲敬講得好好，「在這個短暫的天真時代，很多人都相信事在人為」。
好，第二號嫌疑犯就係自己人孫文。宋教仁之死，到咗最後，得到最大益處嘅人就係奪命書生孫文，因為宋之死，令孫文一步一步重拾革命黨實際領導權，東山再起，打出人生最後光輝一役，為中國歷史寫下新一頁，即係「發動內戰、黨政合一、聯俄容共，推倒共和」。咁，奪命書生孫文究竟有冇奪宋教仁嘅命呢？理由似乎好充分，但係如果睇返當時形勢，孫文的確淡出政治圈子，佢手上面動用嘅籌碼亦唔多，而且暗殺手段亦都唔係讀書人孫文慣用嘅達成政治目的嘅手法。
作為一個日本代理人，又會唔會係日本人要佢去殺宋教仁呢？答案我亦唔認同，因為日本基本上就係行緊自由民主議會制度，宋教仁做嘅嘢係佢哋杯茶，而且宋可以制衡一直唔聽日本人話袁世凱，何樂而不為？加上冇日本嘅批准，孫文就算自己想亦都唔可以做。
第三號嫌疑犯係當時嘅國務總理趙秉鈞，歷史文本上正式嘅主謀，後世人所持嘅理由係，宋北上，就會取代趙秉鈞嘅總理位置。呢個說法亦唔成立，當時草創嘅中華民國，甚至到咗現在，都係人治領先法治，一個人嘅實際權力，並唔係因為佢擔當乜嘢職位，所謂官位，有時候虛衑嚟啫。可以肯定，以趙秉鈞橫跨清朝民國兩代盤根錯節嘅政治勢力，佢絕對無理由為咗「總理」呢個職位刺殺宋教仁。
有一個講法，係趙秉鈞摸錯咗袁世凱嘅心意，以為主子真係想殺宋，結果自把自為，惹火上身。呢個講法有可能，但係如果成立，袁世凱同趙秉鈞未免太蠢，但事後睇返，佢兩個都唔會係蠢人。袁世凱係軍人出身，尊崇德國人普魯士傳統練兵多年，好明白由上而下嘅軍紀重要性。所以呢種錯摸主子心意出事嘅推測，成立嘅可能性唔大。
最後一個嫌疑犯，當時上海青幫頭目陳其美。陳其美係乜野人，大家都一清二楚，作為一個黑社會，殺人佢當食生菜。之前革命同志陶成章就係死於陳世美手下。仲有暗殺陶駿保、夏瑞芳、鄭汝成等異己。當時陳世美嘅勢力盤鋸上海灘，控制中國國內呢個自由城邦嘅巨大金庫，權勢之大，甚至喺黃興孫文之上。
陳宋早已不和，宋教仁要行嘅自由民主國會制度，與其話會傷害袁世凱中央嘅勢力，不如講，對其他自立山頭盤踞一方嘅割據勢力影響仲大，陳其美就係其中一個好例子。假如畀你去到北京，召開國會，真係行法統，中華民國到咗之後真係確立強勢中央，咁我嘅上海咪註定俾你收編？
陳其美同其黨羽，亦曾經直斥宋教仁「叛黨」，北上去投靠袁世凱。所以我個人感覺，綜合種種條件，殺死宋教仁嘅，最大機會係陳其美。而且案中教唆犯應桂馨本來就係青幫成員，之後發現嘅所謂證據，全部喺陳其美勢力範圍之內出現。最大嘅可能性係，真兇係陳其美，而佢就將隻死貓質咗比趙秉鈞袁世凱食。
又有一個講法要補充，有人話就算係陳其美做，都係孫文係背後所指使。當時1913年頭的局面，孫文能否控制陳其美？我好有疑問，就算陳其美係聽order做嘢，都只會係聽當時身處上海嘅革命黨最高元老真國父黃興，但以黃興嘅仁厚性格，同埋佢與宋教仁嘅深厚交情，冇可能係黃興下手。
當然一切純屬我自己推測，同真實歷史真相無關。
最後呢個中國革命第一大功臣陳其美亦響1916年死於暗殺，行刺佢嘅幕後元兇，又話係袁世凱喎。
響宋教仁嘅葬禮上，真國父黃興送嚟嘅輓聯係「前年殺吳祿貞，去年殺張振武，今年殺宋教仁；你說是應桂馨，他說是洪述祖，我說確是袁世凱。」革命黨人統一口徑，矛頭直指中央袁世凱。
袁世凱派遣咗當時工商總長、同黃興宋教仁係老朋友嘅劉揆一（1878-1950）參加宋教仁喪禮，劉揆一帶咗袁世凱嘅密訊，嘗試同革命黨人修補關係，但係革命黨人拒絕咗呢個建議。劉揆一未能完成斡旋任務，返番北京後亦都向袁世凱辭職。
宋一死，火頭點著咗，袁世凱亦都知天下隨時大亂，4月頭，中華民國第一屆國會依舊響北京召開嘅同時，佢亦調動北洋軍隊，密令張勛同山東都督周自齊作軍事準備，隨時預備南方革命黨人嘅兇猛軍事報復行動。
#常威 #斷送共和關袁世凱蛋牛治 #袁世凱 #民國歷史
【常威近代史】第二部《中國一百年前第一次開放改革》
https://play.google.com/store/books/details?id=_6KMDwAAQBAJ
【常威近代史】第一部《大清亡國關慈禧蛋牛治》
https://play.google.com/store/books/details?id=C3hjDwAAQBAJ
【常威近代史】第一部《大清亡國關慈禧蛋牛治》實體購買
https://www.382now.com/product?id=87
【常威近代史】第二部《中國一百年前的第一次改革開放》實體購買
https://www.382now.com/product?id=151
常公子
2019-7-30 00:18:14
:^(
【常威近代史】（二百四十四回）
袁世凱平反系列
宋教仁之死，令第一場中國內戰無可避免要發生。中華民國建立唔夠兩年就要打第一次內戰，當然亦冇人估到內戰一開打，就打咗成40年。之後嘅日子，全國嘅人民就會喺無數嘅戰爭中過住顛沛流離、水深火熱嘅悲慘生活。
中國俗語有講先撩者賤，打死無怨。邊個開第一槍，就係要付最大責任嗰個。內戰係南方革命黨要打嘅，當然佢哋嘅抱住觀點係袁世凱殺死宋教仁，點火頭嘅人係佢。我常公子所持嘅論點係，宋教仁死於革命黨內內訌。所以if我啱，依場所謂討袁嘅內戰（或稱為第二次革命）係完全無厘頭嘅，當然歷史嘅真相已經冇辦法被還原。而且大家千萬唔好以現代人眼光去睇20世紀初期嘅世界，當時用戰爭或鮮血解決問題，係一個非常合理而且常用嘅做法，就好似一個汽車維修師傅袋裡有士巴拿一樣正常。
但係當時全國輿論一口咬定袁世凱就係真凶，袁世凱亦都百詞莫辯。社團話事人只有一個，要爭做話事，搵個藉口開拖，都經常見。
呢個時候，身在日本嘅奪命書生孫文亦都火速返番中國，重新加入革命黨做實事行列，彌補同埋收割宋教仁死後留低嘅豐厚政治遺產，革命KOL不概為KOL，有朵有名氣嘅人，做乜嘢都好容易。孫文同黃興兩大革命元老，響後起之秀後生仔宋教仁一死之後，輕易重新掌握整個南方革命勢力嘅領導權。
但係對待袁世凱，革命勢力就出現唔同路線。當時1913年4月，南方革命勢力分為三派意見：
第一派就係支持武裝起義，發動戰爭，以武力打倒袁世凱北京中央政府，以孫文，江西都督李烈鈞（1882-1946）為首。孫民特別提出「聯日」同「速決」兩個具體軍事策略。孫文作為日本代理人，「聯日」（合邦）都好合理，就好似一個汽車維修師傅袋裡有士巴拿一樣合理。至於用速戰速決先發制人手段出兵討袁，打佢老母一個措手不及，亦都相當符合国父一向嘅車大炮性格，凡事講X咗先算，最緊要個勢勁，宣傳效力永遠領先實際效果，革命KOL不概為革命KOL。
第二派就係所謂懷疑派，真國父黃興同真兇陳其美做代表。佢哋對革命勢力本身嘅分散武裝力量，表示極度懷疑。認為南方革命黨軍力無可能挑戰袁世凱嘅北洋部隊。夾硬衝只有死路一條，唔贊成發動內戰，即係實事求是嘅做法。但黃興嘅意見，當時就被革命黨內部視之為軟弱、話佢係投降主義，全部人buy孫文嗰套戰爭論。最慘嘅係黃興喺呢件事上，失去大量同僚支持，亦係對發動戰爭嘅猶疑，鋪下黃興英雄一生嘅最後落臺階。
第三派就係所謂國會派，就係指當時嗰啲去咗北京履任中華民國第一屆國會參眾兩院議員嘅國民黨代表。佢哋去得北京，當然唔贊成討伐袁世凱，當然會被國民黨同袍指為叛徒走狗。事實上，國民黨黨魁宋教仁當然永遠唔能夠到任，但係中華民國第一屆國會依然響1913年4月8號召開，到會嘅參議員179人，衆議員503人。投票選出參議院正副議長為國民黨張繼（1882-1947）、王正廷（1882-1961），佢兩位都係進步人士。至於眾議院，議長係立憲派巨頭民主黨湯化龍（1874-1918），共和黨陳國祥為副議長。
你可能會問，點解咁多國民黨人會做叛徒去履行國會議員職務？其實原因有兩個，第一個係國民黨內部亦都有好多人希望真正召開國會，希望用憲法議會力量制衡袁世凱北洋勢力、用正常法律途徑解決宋教仁案；第二，當時好多人其實都係跨黨派啲騎牆草，今日係國民黨，明日又可以係民主黨或統一黨，或者為咗選票，同時入咗幾個黨，有幾重身份，亦都係比較常見嘅事。所以之前嘅國會選舉最後結果，國民黨於兩會取得過半議席，其實又唔係表面睇咁簡單。
第一屆國會召開同時，袁世凱中央政府亦收到好消息，因為1913年4月2號，美國正式承認中華民國政治地位，隨住美國嘅承認，中華民國亦都正式以一個民主自由嘅國家，步入世界政壇。
革命勢力三派意見之中，以孫文暴力抗爭派最廣受黨內同埋民間歡迎。其實民眾都想發動戰爭，討伐袁世凱，人類流出嘅血液，嗰浸血腥味其實會令人性興奮。事實上，1913年4月亦都係一個不祥嘅日子，權力鬥爭不斷上演，南北雙方無數人被暗殺同毒死，月中桂林暴雨成災、湖南落雹，湘江沉船700幾艘，浸死成千人。連個天都喺度作出警示，唔好輕易發動戰爭，但係冇人理個天。
#常威 #斷送共和關袁世凱蛋牛治 #袁世凱 #民國歷史
【常威近代史】第二部《中國一百年前第一次開放改革》
https://play.google.com/store/books/details?id=_6KMDwAAQBAJ
【常威近代史】第一部《大清亡國關慈禧蛋牛治》
https://play.google.com/store/books/details?id=C3hjDwAAQBAJ
Ads
常公子
2019-7-30 11:22:49
【香港關 #中英聯合聲明 腿蛋治 第二回】
♒中英聯合聲明系列第二回，今集講講香港嘅前生今世，究竟香港係一個乜嘢嘅地方？大家捍衛嘅香港人價值，究竟又系乜嘢呢？點解香港咁特別呢？冇錯，香港由頭到尾，由1842年《南京條約》簽訂開始，就註定咗係一個特別嘅地方，世界上好難搵到其他例子同香港比較，香港一直以嚟都係行緊自己嘅路，未來點走？五個字：命運在我手！
♓最近心情好差，因為睇見727大量示威者被捕，我冇辦法掩飾無力感同悲傷，今年6月之前，每一次我睇見因為之前嘅抗爭運動被捕人仕被判入獄裁決時候，我都會好嬲，三年五年十年？一個個年青人嘅前途就係咁樣被毀滅，首先官司拖你三五年，再判你坐三五年，人生有幾多個十年？統治階層用心實在太狠毒，所有上街抗爭嘅年青人、示威者，無論如何佢哋嘅初心都係純潔，只係希望能夠改變現狀，佢哋對社會嘅不滿，係因為統治階層做得太差太惡劣。
♓民怨滿地，視而不見，既得利益者高薪厚職者繼續肚滿腸肥，一日到黑只懂向上頭搖尾乞憐，幫手粉飾太平，空話一堆，實事唔做。我唔同你講意識形態，你鍾意只講經濟我就同你只講經濟，自回歸以來香港嘅經濟真係好嗎？真實情況係香港經濟其實每況越下，社會中上階職位完全冇增加，但貧窮人口就不斷增長，對香港整體經濟結構，所有高官庸官狗官欠缺長期視野同佈署，只懂得任人擺佈任人剝削任人掏空庫房，自己個個月有糧出，關人撚事。
♌所謂發展經濟，淨係識得起公屋、搞大型基建，大家想辦法貪污分餅仔，製造造業？要地盤工人有工開，咁讀飽書嘅年青人呢？於是乎導致年青人向上流動機會劇烈萎縮，一日到黑，叫佢哋去大灣區發展，大家都睇唔到未來，最後只有賤命一條，衝出嚟同你死過，你就拉曬佢哋坐監，以為問題就可以解決。我常公子話你班狗官知，如果你覺得呢個係正確嘅解決辦法，件事永遠冇辦法收科，上次佔中佔旺，就係播吓今日大亂嘅種子，而事情發展落去，永劫回歸，下一Round，就係真正恐怖分子出場嘅時候。
♐我唔明白點解統治階層咁厚面皮，永遠唔覺得責任喺佢哋嗰度，卸膊文化，一日比一日嚴重。其實做得唔好咪辭職囉，比另一啲人試吓，死霸爛霸，二十年嚟都係同一班人人來人往，你唔肯走，後面嘅人點會有機會上？求吓你哋，集體辭職啦。上頭唔畀？你可以罷工吖嘛？唔通你連唔撈嘅權利都冇？咁你唔係一個人囉，你只係一頭狗。
🍳
https://youtu.be/zaNnqiP2Hdg
【常威近代史】第二部《中國一百年前第一次開放改革》
https://play.google.com/store/books/details?id=_6KMDwAAQBAJ
【常威近代史】第一部《大清亡國關慈禧蛋牛治》
https://play.google.com/store/books/details?id=C3hjDwAAQBAJ
【常威近代史】第一部《大清亡國關慈禧蛋牛治》實體購買
https://www.382now.com/product?id=87
【常威近代史】第二部《中國一百年前的第一次改革開放》實體購買
https://www.382now.com/product?id=151
常公子
2019-7-31 16:42:47
:^(
【常威近代史】（二百四十五回）
袁世凱平反系列
借！借！借！冇錢點算？唯有UA！
1913年4月，宋教仁案令全國風頭火勢。革命黨（即國民黨）同袁世凱中央政府正式決裂，呢個時候袁世凱做咗一個動作，就係同外國借錢，歷史上稱為北京「善後大借款」。之前講過，其實由中華民國建立第一日，全靠賒借度日，各大山頭割據自立，稅收唔肯上繳中央政府，袁世凱維持北京中央政府、行政費軍費開支龐大，冇全國稅收，實在難以支撐。
況且國民黨開咗聲要打內戰，同宋教仁報仇，袁世凱亦逼不得已要一筆龐大資金嚟周轉調動，維持中央政府正常運作。4月26日，佢委派趙秉鈞、陸征祥、周學熙（全部西人）等為全權代表，未經中華民國第一屆國會辯論及通過，與英國、法國、德國、俄國、日本五國銀行簽訂《事後借款合同》。
呢條數好大，借款總額係2500萬英鎊，其實係一個天文數字。1905年日本打日俄戰爭，發行嘅戰爭債卷都係1000萬英鎊左右。你常公子成日講天文數字，咁究竟係幾多錢？去到1913年，中國嘅貨幣系統仍然相當混亂，貴金屬如黃金白銀繼續流通，銀洋、外國紙幣同每個地方政府發行嘅紙幣同時出現，理由好簡單，政治都未統一，貨幣點有可能統一？1912年袁世凱主導嘅北京嘅中央銀行亦開始發行中華民國紙幣，但係南方就唔承認。中國貨幣嘅正式統一，要去到1949年，嗰種貨幣叫毛澤東（人民幣），毛澤東被整個世界所接納為正式貨幣，要去到1980年之後，你話條路幾漫長呢？
如果用今日嘅概念去計算，借2500萬英鎊究竟又係幾多呢？按照當時英國人嘅生活水平，一個英國人平均全年收入大概係100-120英鎊，用今日嘅匯率，100英鎊即係折算1000幣港紙。理性少少，今日一個普通香港人，以香港收入中位數月薪15000元計算，一年大概賺18萬，即18000英磅，同1913年比較，通貨膨脹咗180倍。用咁嘅方法推算，1913年嘅2500萬英鎊就大概等於今日40零億英磅，即400幾億港紙！你話係咪天文數字丫？
（當然我上述嘅講法有好多謬誤，大家唔好咁認真對待。）
世界上最兇猛嘅野獸從來都係銀行家同財閥，合同規定，借款總額2500萬英鎊，年息五厘，債券九折出售，八四折實收，限期47年；主要嘅用途係償還到期嘅各種賠款同埋借款，主要係庚子賠款同馬關條約。袁世凱北京政府響還清舊債後，實際到手只有760萬英鎊，如果計埋利息，規定47年還清嘅本金加利息，金額達到6789萬英鎊，乜叫喪權辱國？其實呢啲先算係喪權辱國。
仲有借錢畀你，要有抵押品。抵押品就係當時中華民國嘅鹽稅同埋關稅。其他附帶條件仲有，借款期內，中國不得向五國銀行團以外嘅銀行借錢；借款嘅領款憑單，需有外國會計師簽名方能生效；中華民國要聘用外國人參加鹽稅徵收事務等等。仆你個雞，辣到呢……鬼叫你窮呀？
依筆「事後大借款」，比南方革命黨人稱呼為100%賣國行為，矛頭又係直指袁世凱。中華民國建立係想自主於世界之上，希望擺脱滿清皇朝嗰種被外國人資本控制經濟嘅悽慘局面，可惜事與願違，一個窮人就只可以伸開四肢任由有錢佬強姦。
不過大家想深一層，既然中華民國承認清帝國留低嘅所有不平等條約同戰爭賠款，還錢亦都係好應該。但還錢嘅責任落咗喺袁世凱北京中央政府身上，佢又可以點做？南方革命黨人一日到黑屌屌屌，咁佢哋有冇人承擔起為中華民國償還國債嘅義務呢？
仲有一點，袁世凱北京中央政府同五國銀行國傾借錢嘅事，已經唔係一朝一夕，亦都可以講完全唔關宋教仁之死事。後世歷史，話袁世凱急急腳喪權辱國向外國人借錢，係為咗籌募軍費抵抗革命黨發動嘅「第二次革命」，其實係以偏概全，並非全部事實。
袁世凱做錯嘅嘢，當然係借款繞過國會，自把自為，有違「法統」觀念。但係當時整個中華民國第一屆國會由國民黨人仕把持，擺上去傾，你話通過嘅可能性有幾高？應該係0勒。咁通過唔到，冇錢返，冇錢還到期債項，債務違約，咁責任又邊個咩呢屌？
上述歷史亦都可以應用喺今日嘅香港，政治運動還政治運動，民生開銷、社會運作依然要如常進行，呢個亦係建制派成日攞住嘅尚方寶劍，「民生」應該同「政治」徹底分開，我哋不談「政治」談「民生」，我今日出嚟講嘅係「正義」並唔係「政治」。當然呢種係好低級嘅講法，係用嚟愚弄冇讀過書嘅人低下階層嘅口實，其實所有事情都同政治有關，政治本身亦都係社會經濟事務嘅具體體現。睇開常公仔嘅朋友應該都係聰明人，大家應該知道我講乜。
1913年，真正發生嘅事係，袁世凱竭力維持中央政府嘅運作同中華民國嘅國家尊嚴。而南方革命黨人，則想將成個國家拉向內戰局面，邊個啱邊個唔著，大家要認真諗諗。
寫完，出發，街上見。
#常威 #斷送共和關袁世凱蛋牛治 #袁世凱 #民國歷史
【常威近代史】第二部《中國一百年前第一次開放改革》
https://play.google.com/store/books/details?id=_6KMDwAAQBAJ
【常威近代史】第一部《大清亡國關慈禧蛋牛治》
https://play.google.com/store/books/details?id=C3hjDwAAQBAJ
常公子
2019-7-31 17:48:19
:^(
🔥【常威近代史】第二部《中國一百年前的第一次改革開放》實體書正式上架！
🔥請大家支持我常公子的近代史寫作計畫，Facebook專頁、Youtube、電子書、實體書，我希望用唔同嘅新媒體，令香港人或用粵語為母語嘅朋友認識或加深對近代史嘅認識，過程會好艱辛，但係我唔撚怕，我會努力落去，直至寫到王光美接劉少奇骨灰為止，我會用我嘅母語廣東話，寫下香港人眼中嘅近代史，為香港人響歷史上留下一個小小腳印。
🔥請大家支持我，到書局買本實體書！download咗電子書嘅朋友，亦請多買幾本實體書，送禮自奉，大家一齊推廣香港人保存粵語文化運動！有你有我！高山流水，沒齒難忘！
常公子
2019-8-1 11:12:36
【161回：大清亡國關 #傷兵 蛋牛治】
♒似乎除咗威嚇，除咗 #鎮壓，特區政府真係冇其他手段解決今日香港嘅亂局，人民提出訴求上街示威，你唔聽之餘倒行逆施，6月9號香港人第一次過百萬人上街示威要求撤回逃犯條例，和平理性，結果林鄭你同成班建制喺當晚嘅11點就衝出嚟，話一定要響下星期三通過條例（至多俾多幾日你哋咨詢啦），完全當市民反對嘅聲音冇到，結果一嘢篤爆個大炸彈，引發之後嘅連串事件，雪球越滾越大，暴力一日一日升級，加埋豬隊友嘅幫手，黑白攜手，打壓逆權聲音，睇返轉頭，完全係統治階層嘅連番出錯。
♑727上環大搜捕，警察拘捕咗49人，之後決定以「#暴動罪」控告其中44個，佢哋大部份係年青人同專業人士，律政司 #安樂工程 老闆娘 #鄭若驊 嘅決定快過打針，相反元朗黑夜施行恐怖襲擊嘅白衣人，政府仍未落案起訴佢哋乜嘢罪，咁究竟係乜嘢玩法？我自己就興過辣雞，種種跡象，完全與民為敵，完全不可原諒。
♓暴動罪係一條嚴重罪行，最高可判監十年，2016年旺角事件，有多人因暴動罪被判入獄多年，本土派人士 #梁天琦 就因暴動罪判監六年；另一被告 #盧建民 同樣裁定暴動罪成立，被判七年。睇嚟特區政府亦唔會放過727班後生仔，但我想忠告特區政府，種下嘅仇怨越大，只會越冇辦法返轉頭，情況只會越演越烈。
♎最近同一個朋友傾偈，佢籌備緊全家移民去臺灣發展。佢提出一個意見，佢話我知，其實特區政府唔介意有更多香港人移民離開，最好我哋快啲走，咁就可以加快換血同溝淡嘅程序，你找一個有錢佬，我補充一個；你走一個醫生，我就補充一個；你走一個大學教授，我補充兩個；你走三個大學生，我補充三十個；中國最多嘅就係人，既然香港人咁難搞，乾脆換一批「#新香港人」就得。朋友嘅「#大換血」藍圖，相當殘酷，但亦非常有見地，真相可能如此，而且好有機會如此。
♎【#常公子近代史】語音導航！請大家幫手「#訂閱」我條常公子YoutubeChannel！同埋介紹多啲人睇睇！衝上2000訂戶！
🍳
https://youtu.be/4pD2uwzszzQ
【常威近代史】第二部《中國一百年前第一次開放改革》
https://play.google.com/store/books/details?id=_6KMDwAAQBAJ
【常威近代史】第一部《大清亡國關慈禧蛋牛治》
https://play.google.com/store/books/details?id=C3hjDwAAQBAJ
【常威近代史】第一部《大清亡國關慈禧蛋牛治》實體購買
https://www.382now.com/product?id=87
【常威近代史】第二部《中國一百年前的第一次改革開放》實體購買
https://www.382now.com/product?id=151
上一頁
第 39 頁
下一頁
【常威近代史】（二百三十七回）
袁世凱平反系列
香港人加油！香港人加油！香港人加油！
1912年9月，四巨頭，袁世凱、孫文、黃興、黎元洪雲集北京，共商國事，一片和諧（河蟹）氣氛，政治同權力如何分贓，從來都唔會係一件和諧嘅事，但係表面冇嘢照傾，亦都係政治人物常用嘅姿態，大家一啲都唔需要奇怪。
事實上，當時中華民國草創第二年，要由一個行咗幾千年嘅封建皇權極權帝國，一下子改變為自由民主、行政黨政治、議會制度嘅新現代國家，難度極高，無可避免會出現大量混亂同埋扭曲，老實講，中國人行憲政之路，第一步已經起步得唔錯，依一點要同中國人平反。
從來要走上真正自由民主之路，都極唔容易。歐洲「雙元革命」之一嘅「法國大革命」，田1789年7月14日，民衆攻佔巴斯底監獄計起，革命導致各界對立，共和派同保皇派嘅政治鬥爭，於往後搞咗成半個世紀，最後先至得到暫時性解決（法蘭西第三共和），期間，耗用咗整整一代人嘅青春同鮮血，亦造就咗拿破崙響成個歐洲嘅戰火延綿。
要得到真正嘅自由，非要付出巨大代價不可！亦需要巨大犧牲不可！如果你心裡面以為，烈日當空行幾個鐘頭路，就可以達到目標，我話你知，呢個係一個好天真好傻嘅想法。
四巨頭響9月25號發表聯合聲明，即所謂「八大政綱」：
1.確立全國統一制度。
2.主持是非善惡之真公道，以正民俗。
3.暫時收束武備，先儲備海陸軍人才。
4.開放門戶，輸入外資，興辦鐵路礦山，設置鋼鐵工廠，以厚民生。
5.提倡資助國民實業，先著手於農林工商。
6.軍事、外交、財政、司法、交通皆取中央集團主義；其餘斟酌各省情形，兼採取地方分權主義。
7.迅速整理財政。
8.竭力調和黨政，維持政治秩序，為各國承認之根本。
所謂八大政綱，其實講咗等於冇講，非常虛無縹緲，實際效果欠奉，純屬政治言詞，用作安撫民心。會面期間，袁世凱授予黃興、黎元洪陸軍上將軍銜。國父孫文，則被授權籌畫督辦全國鐵路計劃。表面上睇，袁世凱將三人正式收編，好似大局已定，但實際上當然完全唔係嗰回事。
補充一則史料，9月11號，大清皇室於北京金魚胡同設宴招待孫文同黃興。宴會之上皇室致辭咁講「孫黃二君，皆今日中國非常之人，故能建非常之業。」，黃興亦都發表演辭講「非裕隆皇太后之明哲及諸公之輔助，成功絕不能如此之神速。」畀面派對上大家非常畀面，中國歷史上嘅改朝換代，從未有過咁和諧嘅情況，依一點大家要注意。
事實上，推翻滿清，建立中華民國。過程係非常之順利同埋成功，與全世界唔同時代每一次革命比較，所付出嘅代價同鮮血其實相當之少。中國人行民主自由憲政之路，第一步其實非常成功，之後嘅失敗，葬送共和，係自己攞嚟，係籠裏雞作反，亦係權力鬥爭引發。
袁世凱北京政府，運作亦都非常唔順暢，國務總理唐紹儀辭職後，陸征祥頂上，陸征祥做唔夠三個月，畀參議院彈劾，亦都喺9月22號辭職，接任嘅人係趙秉鈞（1859-1914），同時兼任內務總長，趙秉鈞係中國現代警察制度嘅始創人。
之前嘅唐紹儀同埋陸征祥都係真西人，反而趙秉鈞冇浸過鹹水，只係高級華人陀地。其實要行西方制度，用真西人處理係理所當然，唐昭儀同陸征祥冇辦法留低，其實亦都註定咗中華民國冇辦法行上西方自由民主議會制度憲政之路。
大家仲記唔記得，當時1912年3月中華民國內閣中央，有四個同盟會成員，佢哋係王寵惠、蔡元培、宋教仁同陳其美。但佢哋喺內閣運作咗幾周之後，已經全部辭職，原因好簡單，佢哋唔妥袁世凱，唔妥當時嘅北京政府，覺得佢哋獨裁唔民主。革命派第三號人物宋教仁，深深明白要繼續同袁世凱鬥爭，就必須重整各方政治勢力，於是8月聯合其他政黨，成立「國民黨」。
1912年3頒布嘅臨時約法規定1912年底，舉行中華民國國會大選，宋教仁嘅打算係響呢次大選之中設法贏得大部份國會議席，從而以民主手段重新奪取中華民國中央政府嘅控制權，抑壓袁世凱北洋勢力一人獨大。
孫文黃興革命兩大巨頭被袁世凱暫時收編，反對派主導力量落喺年輕宋教仁身上。依一次中國歷史有史以來嘅第一次國會選舉，將會開天闢地，我哋下節再講。
#常威 #斷送共和關袁世凱蛋牛治 #袁世凱 #民國歷史
https://play.google.com/store/books/details?id=_6KMDwAAQBAJ
https://play.google.com/store/books/details?id=C3hjDwAAQBAJ
https://www.382now.com/product?id=87
https://www.382now.com/product?id=151