😄八國聯軍統帥瓦德西迷戀京城名妓賽金花，當德國人愛上中國人，之後瓦德西減少殺燒搶掠，北京市民方能在聯軍佔領北京市安然渡過，最後重歸大清懷抱，言下之意，名妓用其肉體救國，非常符合中國人章回小說嗰種俠義精神，呢個故事，比起Ironman Tony Stark壯烈犧牲更加動人心弦，原因Tony係大有錢佬，而賽金花只是區區一個妓女。
革命本身就係浪漫嘅，斷咗兩隻手指負傷嘅黃興，響27號晚退到珠江南岸郊區一個秘密地點療傷，響嗰度，一位自1908年就係同盟會積極工作嘅女同志徐宗漢（1876-1944）替佢包紮傷口。3日後，4月30號，佢同徐宗漢脫險抵達香港，去到上環荷李活道雅麗氏紀念醫院（Alice Memorial Hospital），香港首間為貧苦華人提供西醫治療嘅醫院，亦即係那打素醫院前身接受治療，入院嘅時候徐宗漢以黃興妻子身份簽名，之後，黃興更加同徐宗漢真正結為夫妻，真係浪漫到了極點……順帶一提，黃興當時已經有老婆仔女，佢老婆叫廖淡如，住響湖南長沙。
【常威近代史】（二百一拾三回）
袁世凱平反系列
革命黨在出場之前，仲有單綴核嘢要同大家分享。話說1905年，北京開咗間叫「貴胄學堂」，由政府主辦專係俾滿洲權貴子弟入讀嘅「貴族大學」，佢嘅設備同規格都高於北京任何一間學堂，其建築設施可以同日本帝國大學媲美，我哋嘅攝政王載澧就係貴胄學堂第一屆62個王公子弟嘅其中一個學生，1909年載灃PHD畢業，就由佢個仔三歲嘅末代皇帝溥儀手中，接過畢業文憑。
可惜呢間貴族大學虛有其表，教師質素好低，學生質素更低，後世研究，佢嘅課本水平大概係小學三年班到六年班（！）。滿清皇朝嗰班貴族契弟，佢老母真係生出嚟獻世就係咁解。
1908年底，慈禧歸西，大清帝國失去中流砥柱，加上攝政王載灃1909年1月炒埋袁世凱，革命黨人見kai子當政，仲唔比力發爛咩？
其實由1907年開始，同盟會見慈禧就快瓜得，佢哋喺中國境內已經發動咗多場小規模農民起義。指揮軍事行動嘅係真國父黃興，我哋嘅第二號國父孫文仍然遊歷於歐洲美洲，努力發行債券，向全世界華橋籌募革命經費。其實佢唔係奪命書生，應該叫奪命籌款書生。
或者首先同大家講吓孫文口中嘅「十次革命」係乜？（其實好多都講過，舊事重提）
第一、第二次革命係同盟會成立之前，分別係1895年嘅廣州起義，同1900年嘅惠州起義。其餘嘅八次，分別係指1907年到1911年間發生嘅起義活動。
第三次革命係指1907年5月22號嘅潮州黃岡革命。
第四次革命係1907年6月6號，響惠州附近嘅七女湖革命。
第五次革命係指1907年9月17號發生喺廣西安南接壤嘅欽州地區。
第六次革命係1907年12月1號，地點亦都係廣西欽州，依一次革命係孫文唯一一次正式參與嘅革命，亦都係佢至1895年離開清國之後，第一次踏足清國國境，佢響廣西欽州境內逗留咗一晚，就返番河內（越南）；下一次佢返嚟嘅時候，已經係1911年辛亥革命發生之後。
第七次革命發生係1908年3月27號，黃興組織咗一支200人嘅武裝力量，由河內進入廣東省西南部，轉撲廣西省東南地區，黃興嘅武裝力量曾經由200人變成600人，但之後唔能夠維持，革命軍士氣低落後解散……
第八次革命發生喺1908年4月29號雲南省河口市，由於河口市同安南河內接壤，當時只有300個清兵（民兵）駐守，革命黨人唔使一日就佔領河口市，而且河口督辦被殺，附近各營清兵相繼投誠，呢次突如其來嘅勝利，令到革命黨增加咗3000多個士兵，亦出現咗前所未有嘅光明前途，當時負責指揮嘅胡漢民（1879-1936）戰略係，利用河口市作起點，攻佔整個雲南作為革命基地。好可惜當真國父王興嚟到現場嘅時候，發現所有人都唔撚係路，完全冇革命精神，只係一批烏合之眾，加上之後法國人干預（當時嘅安南，即今日嘅越南係法國殖民地），於是革命行動又無聲結束。
上述所講嘅八次革命，其實規模都好細，亦祇不過係喺幅員廣大清帝國邊陲地區所發動嘅短時間小型武裝起義，佢哋嘅重要性係比後來革命黨吹大咗幾千萬倍。你可以想像，如果清帝國係一個人，上述嘅八次革命事件，就好似一隻蟻咬嗰個人嘅腳趾尾八嘢一樣，實際上係冇關痛癢。孫民口中嘅八次革命，宣傳效力遠遠大於實際成果。
如果mean啲講句，上述嘅革命只不過係有人同金主收咗錢，要話比金主知我真係做咗啲嘢，間公司好快就可以響主板上市，唔該繼續泵水俾我。事實上，當時同盟會嘅財源已經枯竭，孫民同汪精衛喺世界各地嘅籌款活動亦都唔成功，我哋嘅真國父黃興，更加孭到一身債，要借貴利過活。
世事真係好奇怪，如果慈禧太后死遲幾年，或者攝政王載灃唔炒袁世凱，或者冇保路運動。所謂革命黨同盟會，其實響1909年中左右，已經宣佈全部玩完，孫文黃興胡漢文汪精衛等名字，亦都永遠唔會有人記得起。
下次繼續……
#常威 #斷送共和關袁世凱蛋牛治 #袁世凱 #民國歷史
【常威近代史】第二部《中國一百年前的第一次改革開放》實體書全城上架，請大家捧場！
https://play.google.com/store/books/details?id=_6KMDwAAQBAJ
https://play.google.com/store/books/details?id=C3hjDwAAQBAJ
https://www.382now.com/product?id=87