常公子 2019-5-6 15:33:41

🔥【常威近代史】第二部《中國一百年前的第一次改革開放》實體書正式上架！

🔥請大家支持我常公子的近代史寫作計畫，Facebook專頁、Youtube、電子書、實體書，我希望用唔同嘅新媒體，令香港人或用粵語為母語嘅朋友認識或加深對近代史嘅認識，過程會好艱辛，但係我唔撚怕，我會努力落去，直至寫到王光美接劉少奇骨灰為止，我會用我嘅母語廣東話，寫下香港人眼中嘅近代史，為香港人響歷史上留下一個小小腳印。

🔥請大家支持我，到書局買本實體書！download咗電子書嘅朋友，亦請多買幾本實體書，送禮自奉，大家一齊推廣香港人保存粵語文化運動！有你有我！高山流水，沒齒難忘！

突發性交易 2019-5-6 19:09:33 推

:^(

常公子 2019-5-7 11:39:57 【126回：大清亡國關 #鬥而不破 蛋牛治】

😄中國人鍾意鬥，天下皆知。點解要鬥？為咗錢為咗權力為咗啖氣。其實唔單止中國人，人類都鍾意鬥，否則點會有咁多戰爭同埋紛爭出現？冇辦法，人類並唔係啲乜嘢十分高尚嘅生物，我哋都只係由哺乳類動物進化而來，其實我哋係黑猩猩係恆河猴，為咗爭地盤，為咗爭食物，為咗爭交配嘅權力，可以鬥生鬥死，其實一啲都唔需要覺得奇怪。

😄人類同石梨貝水塘裡面嘅馬騮最大嘅分別，或者人類展現智慧嘅一面，就係我哋雖然鍾意鬥，但係我哋識得「鬥而不破」，鬥還鬥，千祈唔可以鬥死對方，否則冇咗對手，就冇人可以同你鬥。鬥而不破，你可以理解為：為鬥而鬥，唔著重結果，只在乎過程。用正能量嘅講法，就係人需要競爭對手，需要有競爭對手鞭策自己不斷向前。所以你嘅敵人亦都係你嘅朋友，你嘅同事亦都係你嘅敵人。

🤔近幾十年，無數內鬥喺中國共產黨內發生。好多人唔明白點解，但係我可以話比大家知，中共本身，就係以「階級鬥爭」為背後理念建立起嚟嘅一個組織，「鬥」呢個字，係重中之重。如果唔鬥，組織就會失去動力，冇辦法再膨脹再向前。所以太平盛世嘅日子，都要無風起浪，鬥生鬥死。但係大前提係鬥而不破，無論黨內人與人之間點鬥，組織嘅生存同埋擴張先至係最重要，因此無論如何，都要鬥而不破。明白依一點，你就會明白我哋國家好多事情。

♎【#常公子近代史】語音導航！請大家幫手「#訂閱」我條常公子YoutubeChannel！同埋介紹多啲人睇睇！衝上2000訂戶！

🍳https://youtu.be/2kKFkXcL5XI

【常威近代史】第二部《中國一百年前第一次開放改革》
https://play.google.com/store/books/details?id=_6KMDwAAQBAJ

【常威近代史】第一部《大清亡國關慈禧蛋牛治》
https://play.google.com/store/books/details?id=C3hjDwAAQBAJ

【常威近代史】第一部《大清亡國關慈禧蛋牛治》實體購買
https://www.382now.com/product?id=87

花旗參 2019-5-7 11:53:26 好似幾好睇，但太多野無quote source，如果無source同小說無分別。。

常公子 2019-5-8 21:53:41

【常威近代史】（二百零六回）
袁世凱平反系列

今集我驚會叉得好遠，大家小心。搖頭又尾擺，車頭凹曬…

講政治，成日會講邊個係好人邊個係壞人？毛澤東係好人？蔣介石係好人？習近平係好人？特朗普係壞人？林鄭月娥係好人？梁振英係壞人？其實大家有冇一個基準去分好同壞？

做政治，好少可以做好人。你想做好人可以去做社工或幼稚園教師，唔好撈政治；政治係妥協嘅藝術，管治嘅技巧，做好人好多時候好心做壞事。當然如果你執政嘅時候死好X多人，有大饑荒有文化大革命，咁你一定係個魔王唔會係一個好人；或者好似希特拉咁發動侵略戰爭屠殺500萬猶太人，就冇可能係一個好人。

所以我去評論一個政治人物好與壞，我只會睇佢做咗乜嘢實事或柒事出嚟，至於佢嘅政治立場同佢嘅性格，我覺得無關重要。自由民主投票選舉都可以選個納粹黨希特拉執政；法國大革命之後就有一個雅各賓民主政權殺人無數；共產主義極權社會亦都可能會有好人出現，當然你會話，後者出現好人嘅機率會細好多。

所以去到1907年調任返北京做軍機大臣嘅袁世凱，佢基本上一定係一個好人。因為佢為中國嘅軍隊改革投下咋改革嘅核彈，做咗大實事！從前嘅清國軍隊（除咗北洋艦隊），基本上係賊，去到邊殺到邊搶到邊姦到邊，毫無軍紀可言。對自己人張牙舞爪，對外敵收皮腳軟。所以清帝國打親仗都輸，仲輸到好難睇；袁世凱之後，中國（或清國）終於建立咗現代化嘅軍隊制度。袁世凱除咗建立軍隊制度，仲創建軍事教育系統。士兵再唔係入條村度求卵其其拉伕拉出嚟，要成為一個士兵或軍官，要識字要讀過書，要經過考核，甚至要出國留學，最好識英文。上述嘅描述喺袁世凱出現之前，基本上係天方夜譚。

慈禧1902年嘅新政之下，全國各地設立軍事學堂，大量培訓軍事技術人員。1903年，袁世凱喺保定同埋姚村開辦陸軍小學堂，補充下級軍官。好多後來大名鼎鼎嘅大軍閥，好似孫傳芳，就係響處小學畢業。1906年，袁世凱喺保定設立軍官學堂，更加係中國嘅軍事大學前身，要讀三年。1910年遷往北京，易名為陸軍大學，民國之後改名保定軍校，從1912年到1923年，一共辦咗九年，養咗大量民國時代軍事人才。

袁世凱仲創辦咗「北洋陸軍速成學堂」，讀年半就可以畢業。後嚟由大清陸軍部接手，大量培訓中級軍官，當中最大名鼎鼎嘅就係蔣介石先生，佢就係響北洋陸軍速成學堂讀完預備班後留學日本嘅。從1904年到1907年間，袁世凱轄下嘅各所北洋軍事學堂，一共培養咗3000多個軍官士兵同現代軍事技術人才。

如果讀到嚟呢度，你仲覺得袁世凱無料到或者佢係一個衰人，我諗你要book一book醫生去做個腦掃描，因為你個腦一定有問題。袁世凱的確係一個練兵大師同天才，高瞻遠矚，而且忠誠可靠，從來無諗過造反，呢點先係最重要。

1907年，袁世凱被削去兵權。但係成個北洋六鎮基本上都係袁世凱嘅嫡系部隊，每鎮嘅高級將領都係佢嘅忠僕或朋友，所以以袁世凱為軸心嘅北洋勢力係無法轉移嘅。1907年至1908年間，袁世凱亦冇乜嘢大動作，靜候時機再彈起，反正手牌響自己度，完全未撚驚過。

1908年11月14號15號，豆斗同劉晶前後腳去見努兒哈赤。攝政王載澧上臺，條不知天高地厚嘅卵樣一出場就搞9袁世凱，話佢響戊戌政變期間出賣佢嘅兄弟光緒帝，所以要秋後算賬，仲要斬要殺。但袁世凱嘅上線奕劻力保袁世凱，軍機大臣張之洞亦覺得唔可以殺。1909年1月4號，攝政王發佈罷黜袁世凱上諭：「袁世凱現患足疾，步履維艱，難勝職任，袁世凱著即開缺，回籍養疴。」將袁世凱炒魷，放回原籍。同2003年董建華一樣，宣佈腳痛下臺。撈政治，小心隻腳。

袁世凱佢老母又話點威點近？原來紙紮嘅，畀條kid仔載澧一嘢就轟咗落嚟？世事點會咁簡單？而且一個聰明人，絕對識得退一步海闊天空。仲有一年命嘅張之洞都算有料到，如果真係附和載澧斬殺袁世凱，袁世凱顛起上嚟，即刻發動軍事政變做皇帝都得啦。

慈禧太后入土未為安，佢嘅承繼人就一手要將佢建立起來嘅新政斷送，大清帝國嘅命運，亦正式走向滅亡。

#常威 #斷送共和關袁世凱蛋牛治  #袁世凱 #民國歷史


【常威近代史】第二部《中國一百年前的第一次改革開放》電子書
https://play.google.com/store/books/details?id=_6KMDwAAQBAJ

【常威近代史】第一部《大清亡國關慈禧蛋牛治》電子書
https://play.google.com/store/books/details?id=C3hjDwAAQBAJ

【常威近代史】第一部《大清亡國關慈禧蛋牛治》實體購買
https://www.382now.com/product?id=87

常公子 2019-5-8 21:53:54

🔥【常威近代史】第二部《中國一百年前的第一次改革開放》實體書正式上架！

常公子 2019-5-9 10:40:01 【127回：大清亡國關 #八國聯軍 蛋牛治】

😄20世紀第一年，1900年國際社會第一號大事，就係八國聯軍攻入北京拯救同胞。響西方人嘅角度，當時嘅清帝國係一個野蠻落後封建愚昧嘅低級世界。我諗個感覺，就好似我哋今日對印尼、菲律賓、孟加拉一樣。早幾年有朋友親口同我講，佢想請一個新嚟、冇工作經驗嘅印傭用，我問佢點解？佢話新嚟嘅、冇工作經驗就唔識得去玩，所以星期日可以唔使放假，一個星期就可以做足7日。我當時諗，點解可以咁樣對人？世界上竟然有員工可以唔使放假？如果你老細唔俾你放假，你又會點？

😄香港人點樣對待傭工，世界知名。2015年Erwiana 被殘酷虐打案，上曬國際頭條。冇錯，人係有階級之分，有高等人，亦有低等人，世界上有窮人有有錢人，雖然大部份人口裡面唔承認狗眼看人低，但係其實每一個人心裡面都有階級嘅分別，每個人都有對狗眼，用嚟看低人。就算係世界上最自由民主多種族共融嘅美國，入讀哈佛長春藤系大學嘅白人比率仲係高到得人驚。

😃我哋由細到大都被社會國家機器灌輸一個知識，或者叫一個信仰或意識形態。就係努力讀書，勤勤力力，克勤克儉，就會有美好嘅前途，就可以脫離原本嘅階級晉升另一個階級，簡單啲講，即係會發達，會成為有錢人。但係真相係唔咁？社會上嘅有錢人，有幾多真係靠住自己嘅實力同埋學識爭取返嚟？相信過咗35歲嘅你、響社會上碌咗十年以上嘅你，就會一清二楚，「資本」比「個人能力」遠遠來得重要，社會上，或者全世界存在住唔同嘅階級，階級由資本財富決定，並唔係用個人能力或道德文水平決定。依一點大家要清楚，弊傢伙，越拉越遠添……

♎【#常公子近代史】語音導航！請大家幫手「#訂閱」我條常公子YoutubeChannel！同埋介紹多啲人睇睇！衝上2000訂戶！

🍳https://youtu.be/R11q-5-FHxg

【常威近代史】第二部《中國一百年前第一次開放改革》

https://play.google.com/store/books/details?id=_6KMDwAAQBAJ

【常威近代史】第一部《大清亡國關慈禧蛋牛治》

https://play.google.com/store/books/details?id=C3hjDwAAQBAJ

【常威近代史】第一部《大清亡國關慈禧蛋牛治》實體購買

https://www.382now.com/product?id=87

常公子 2019-5-10 20:36:04

【常威近代史】（二百零七回）
袁世凱平反系列

袁世凱被載澧條kai子燉冬菇開缺回藉，佢返番去老家河南。隱居彰德北門外洹上村嘅養壽園，仲特登影咗幅相登報紙，披蓑戴笠乘小舟垂釣，名叫《蓑笠垂釣圖》，話畀全世界人知佢歸隱喇，正式脫離權力圈，不問世事，不過講就咁講，marketing嚟姐。

事實上佢仍然喺幕後操縱著整個北洋軍事系統，不但經常有人喺屋企出入，而且佢屋企仲設有電報機樓，同各地嘅下屬緊密聯絡。佢個仔袁克定（1878-1958）、徐世昌、段祺瑞、馮國璋、楊士琦等人，亦經常將京城嘅內部絕密情報講畀佢知，而且仲親自去到佢屋企傾密偈。袁世凱培養出嚟嘅政治勢力已經根深蒂固，佢完全未驚過，都唔撚驚。佢嘅下屬同埋好朋友不斷響社會上鼓吹袁世凱東山再起嘅輿論，袁世凱自己對於朝廷嘅舉動亦都瞭如指掌，佢一啲都唔心急，靜候時機。

慈禧死後，攝政王載灃上臺，但係佢只係個廿零歲、全無政治經驗嘅政治柒頭，喺咁嘅環境裡面，佢仲要罷黜埋國家棟樑袁世凱，真係低能到了一個點：柒點。（著埋套柒牌西裝就Fit曬）

大清帝國君主立憲嘅步伐，亦冇因為載灃上場而停落嚟，反而急速向前走。載澧蠢唔曬，同埋佢本身都算開明，祇不過佢唔想同袁世凱分享權力；1909年頭，清政府命令各省諮議局於同年9月成立，於是各省分別選舉省內代表、即議員。諮議局嘅角色係諮詢機構，協助各省督撫（即各省最高行政長官）管理省務。清帝國人民，終於可以名正言順涉足政治。

不過冇人諗X到，完全冇人諗過，1909年開始嘅民主進程，竟然行到去2019年，前後110年，中國人仍然未能夠一人一票選出最高領袖（除咗臺灣），似乎一切都係鳩做。中國人有幾悲哀？就係咁悲哀囉……

當然諮議局選嘅方式並非一人一票，我講過當時大清帝國99%人民都係文盲，你比張選票佢，佢可能會愛嚟抆屎或者吐痰。所謂嘅選舉方法，無非都係社會上面一班有頭有面嘅大地主、有錢人、生意佬或知識份子，大家圍威喂走埋一齊，推個帶頭人出嚟做議員，呢班社會賢達（或者共產黨叫佢哋做土豪劣紳），之後就成為咗每個省嘅代表性人物，佢哋喺辛亥革命前後，擔當住改朝換代嘅重要角色。

到咗1909年年底，除咗新疆之外，全國21個省諮議局同時開幕。清帝國嘅民主步伐，嚮前邁進一大步。如果按照慈禧生前嘅大計，七年之後，即1916年，清帝國就會正式召開國會，皇帝將正式國家行政權力交畀首相同議會裡嘅執政黨，正式推行君主立憲。

袁世凱垂釣（蟹）期間，除咗發生咨議會召開嘅大事；仲有，就係全國各地嘅鐵路融資計劃紛紛上馬。20世紀初期係一個鐵路嘅時代，鐵路可以去到邊，商品貿易同埋文明、或者管治就可以去到邊。所以當時清帝國急需於全國各地建立鐵路網絡，但大佬起鐵路要錢，仲要好多錢。當時清帝國只係算財政健全，要額外攞錢出嚟搞鐵路就真係冇可能，所以就要向民間集資融資，即係現代嘅股票概念；當時華爾街同倫敦巴黎已經有股票市場，但依啲咁高深嘅學問（到咗今日都係），中國人真係識條鐵咩！結果搞融資，搞股份制，最後搞到一鑊泡，搞到亡党亡国，真係失敗。

我哋下次繼續，轟轟烈烈嘅保路運動！

:^(

【常威近代史】第二部《中國一百年前的第一次改革開放》電子書
https://play.google.com/store/books/details?id=_6KMDwAAQBAJ

:^(

【常威近代史】第一部《大清亡國關慈禧蛋牛治》電子書
https://play.google.com/store/books/details?id=C3hjDwAAQBAJ

:^(

【常威近代史】第一部《大清亡國關慈禧蛋牛治》實體購買
https://www.382now.com/product?id=87

常公子 2019-5-10 20:36:23 推

常公子 2019-5-11 11:42:59 【128回：大清亡國關 #一路向西 蛋牛治】

😄1900年，慈禧狗向西奔走，一路向西，由北京去到西安。航空距離係900公里。但係慈禧領導嘅流亡政府，可以講得係近代史上一個最成功嘅流亡政府，雖然權力核心遠離北京，但係權力仍然牢牢操縱響慈禧太后手上，冇人敢反佢，亦都冇人敢代替佢，一年半之後，仲能夠風風光光、大搖大擺返番北京，重掌最高權力，為大清帝國開啟現代新政，進入最後迴光返照大興盛期。

🙄簡單啲講，就係慈禧太后魅力沒法擋。當時統治大清接近半個世紀嘅佢，其實已經成為清帝國嘅代名詞，與其話當時嘅人接受清帝國統治，不如講佢哋接受慈禧嘅統治。身為中國人，我哋非常明白，我哋從來對人不對事，人際關係係我哋DNA裡面最重要構成社會嘅意識紐帶，乜嘢民主自由、乜春法律制度、甚至乜柒憲法主義、通通響人之後。中國儒家哲學係講「天人合一」，係「人本主義」，凡事以仁為本，由人出發，所以將人放喺第一位，一啲都唔需要奇怪。

😄所以我哋嘅世界，從來都係「人治」，我哋口講「法治」，其實心裡面係相信「人治」，做奴隸永遠比做選民來得舒服，中國人要管，如果唔管，中國會爆炸，其實係一番語重心長嘅金石良言。1911年辛亥革命之後，袁世凱稱帝，想復辟帝制，其實佢又冇錯。「法統」「法治」呢啲嘢，根本唔啱我哋胃口。我哋需要嘅一個「皇帝」，一個「明君」，帶領我哋，邁向光輝燦爛嘅未來……

♎【#常公子近代史】語音導航！請大家幫手「#訂閱」我條常公子YoutubeChannel！同埋介紹多啲人睇睇！衝上2000訂戶！

🍳https://youtu.be/hmfbZ4ISn9A

【常威近代史】第二部《中國一百年前第一次開放改革》

https://play.google.com/store/books/details?id=_6KMDwAAQBAJ

【常威近代史】第一部《大清亡國關慈禧蛋牛治》

https://play.google.com/store/books/details?id=C3hjDwAAQBAJ

【常威近代史】第一部《大清亡國關慈禧蛋牛治》實體購買

https://www.382now.com/product?id=87

荒中人 2019-5-11 23:53:19 推👍🏻

常公子 2019-5-13 15:53:50
【常威近代史】（二百零八回）
袁世凱平反系列

袁世凱著雨褸釣住蟹先，我哋講保路運動。

19世紀係一個鐵路嘅時代，全世界每個國家紛紛興建鐵路。清帝國響19世紀60年代已經有人提出要響國內興建大型鐵路網絡配合大時代發展，但係因為國民白痴心理同埋排洋，左傾右傾，傾咗30年都未郁手，落後大時代就係咁解囉。

終於到咗1889年，清帝國先知道再唔搞就仆街，於是乎唔少鐵路項目相繼上馬，但係好容易理解，起鐵路嘅嘢清國人真係識條鐵，所以所有嘅鐵路項目都係由外國人同外國資金經手。洋鬼子就係識做生意，借錢畀你起鐵路，提供埋技術，但係就以債權人身份獲取鐵路經營權同利益。起條鐵路賺你一筆，之後經營條鐵路再賺多你幾十年。表面睇起上嚟合情合理，但係諗深一層，所謂經濟侵略就係咁嘅一回事。

經濟唔可以自主，就會成為水魚。

呢個係千古不變嘅定理，各位讀歷史，一定要讀埋經濟，否則就係知頭唔知尾，所謂「政治經濟學」就係咁解。當時日本帝國之所以強大，因為佢哋由頭到尾堅持經濟自主獨立，絕對唔會輕易向外國人借錢舉債做嘢，銀根唔可以落入外國人手上，銀紙都要自己印埋。坊間好多歷史書比較中國同日本，又話日本明治維新民主自由點威點威，清帝國就保守落後，日本人嘅質素秤先中國人幾十層樓咁高？其實都係鳩講；日本同清國最大嘅分別，或者之後產生嘅巨大國力距離，純粹源於經濟策略。邊個將中國嘅銀根出賣俾洋人，記住呢幾個人嘅大名：曾國藩、李鴻章、張之洞、劉坤一，之唔係就係晚清四大名臣囉。

整個清代，築建咗9,618公里鐵路，其中9,254公里係甲午戰爭之後起嘅，由1896年甲午戰爭之後，中國嘅鐵路興建里數每年平均544公里，絕大部分係由外國投資或者借外債建成。嗰陣時經營鐵路嘅利潤每年高達40%-70%毛利！好過炒股票同牛熊證！

但係進入20世紀，清國人卒之覺悟起嚟（遲咗50年啦屌），條鐵路響自己國家運行，運載嘅又係自己人同埋自己嘅貨物，但係點解權益同利潤要歸於外國人呢？於是由1902年慈禧新政開始，國人開始維護鐵路主權同埋分享利潤，掀起回收鐵路主權運動。

1905年8月，鄂（湖北）、湘（四川）、粵（廣東）三省以美國商人違反合同為理由，要求回收粵漢鐵路自辦，終於賠款675萬美元作為代價，廢除咗美商建設粵漢鐵路嘅合同。響呢件事嘅鼓舞下，浙江、江蘇、山東、直隸、吉林、雲南各省，回收路權嘅運動風起雲湧。1903年至1907年間，清國人自己響全國15個省設立咗18間鐵路公司，當中有純粹商辦、亦有官督商辦或官商合辦。

上面講過世間上有千古不變嘅定理，其實仲有一個，就係國企（官辦項目），只要一聽到有國家參與嘅商業活動，就即係代表有貪污有腐化有撈油水有走後門有枱底數有益自己友……而家香港都唔例外，前日睇報紙，睇見有的NGO（泛指非商業化政府慈善組織），啲高層幾百萬年薪，仲有花紅，屌你老母，你家陣同人做慈善抑或同自己做慈善呀？仆你個雞！

有政府參與，就即係表示可以開公數，開公數就一定有貪污一定有上下其手，當時大清帝國嘅官民合辦嘅鐵路公司，亦都唔例外。當時嘅鐵路同香港一樣，比洋鬼子搞就好地地，一落入中國人手上面，就變成咗另一回事……有啲嘢唔好成日賴人，唔該檢討下自己先。

下次繼續。

#常威 #斷送共和關袁世凱蛋牛治  #袁世凱 #民國歷史

【常威近代史】第二部《中國一百年前的第一次改革開放》電子書
https://play.google.com/store/books/details?id=_6KMDwAAQBAJ

【常威近代史】第一部《大清亡國關慈禧蛋牛治》電子書
https://play.google.com/store/books/details?id=C3hjDwAAQBAJ

【常威近代史】第一部《大清亡國關慈禧蛋牛治》實體購買
https://www.382now.com/product?id=87

常公子 2019-5-13 15:54:03

🔥【常威近代史】第二部《中國一百年前的第一次改革開放》實體書正式上架！

常公子 2019-5-14 10:41:34 【129回：大清亡國關 #張之洞 蛋牛治】

😄今集講張之洞，半個西人，陰陽兩面。佢大概就係今日年青人稱呼為「道德撚」嗰種人，攞曬光環，名垂千古，家財億萬。背後壞事做盡，我乜嘢都唔講，我淨係講1900年嘅唐才常，唐才常係張之洞門生，佢哋自立軍起義運動，其實張之洞一定背後有所支持或默許，但係佢係死於張之洞之手。對出賣自己友嘅人，我完全冇好感。

😄歷史學家劉仲敬對佢嘅評價係：既要名譽，又唔敢冒風險。即係我哋俗語講又要威，又要戴頭盔。其實東南互保期間，慈禧太后著草千里外嘅西安，李鴻章死埋，張之洞如果有其氣魄，同西方列強傾得掂數，建立一個全新嘅國家又有何難？可惜張之洞冇咁樣做，佢仍然選擇效忠大清，效忠慈禧太后。講真，就係唔敢冒險，唔想負上出賣主人嘅惡名，我叫佢係「奴性重」，現代人嘅講法可以係「理智嘅選擇」。

😄但係凡事太理智，並唔係一件好事。人生需要熱情，需要一團火去做嘢。如果我常公仔太理智，我亦唔會選擇寫近代史，件事就係咁解。

♎【#常公子近代史】語音導航！請大家幫手「#訂閱」我條常公子YoutubeChannel！同埋介紹多啲人睇睇！衝上2000訂戶！

🍳https://youtu.be/CqagS-N4gN4

【常威近代史】第二部《中國一百年前第一次開放改革》

https://play.google.com/store/books/details?id=_6KMDwAAQBAJ

【常威近代史】第一部《大清亡國關慈禧蛋牛治》

https://play.google.com/store/books/details?id=C3hjDwAAQBAJ

【常威近代史】第一部《大清亡國關慈禧蛋牛治》實體購買

https://www.382now.com/product?id=87

常公子 2019-5-15 23:47:35

【常威近代史】（二百零九回）
袁世凱平反系列

官商合辨（勾結）嘅鐵路公司中，規模最大嘅就係粵漢鐵路公司同埋川漢鐵路公司。川漢鐵路公司成立於1904年1月，到1907年轉為純粹商辦，大家都知道起鐵路要錢，川漢鐵路公司主要嘅資金來源係「租股」，按田租3%收取，即係話成個四川所有地主同鄉紳，都「被」成為鐵路公司嘅股東，至1910年為止，實際股本高達11,983,000兩，補充一點，當時大清帝國全年總收入都祇不過大概係一億兩。

一間鐵路公司，差唔多集中咗成個省嘅財富，你都咪話唔誇張。啱啱講過，公司股本嚟至全川地主田租收入，咁即係話，係間接向廣大農民徵稅得來；理論上應該係國企，但係佢又變成私營？你都咪話唔抵死？唔明我講乜？即係話今時今日響香港，李嘉誠想發射火箭去太空尋找新星球起樓賣，而所需要嘅費用就由香港市民稅項承擔，咁，係咪好得意呢？

唔好笑，其實上述所講嘅情況，利用廣大市民嘅錢補貼資本家做生意謀利，喺香港一直發生，只不過你唔覺啫。用資本主義嘅講法，叫做維持社會進步，共同向前發展（不過係你揸法拉利我坐巴士共同向前）；用馬克思主義嘅講法，叫做赤裸裸嘅剝削。凡事真係要睇你自己點睇。

中國農民（貧中下農）真係好悲慘，任何發展任何基建，基本上都係嚮佢哋身上邊壓榨出嚟。十幾年前，我睇過一本書叫《中國農民調查》，裡面就講得好清楚，現代中國農民要繳交大量唔同嘅稅項，濕濕碎碎，積少成多，條村起個狗公廁都關佢哋事，都會向佢哋收稅集資，而且你冇得唔俾，因為係公家法律規定嘅，唔畀就係犯法，就係逃稅。

革命時代，上最前線打仗堀地雷嘅亦都係農民子弟兵，係革命同志好兄弟，可以分田分地。到咗和平時期，一句人民公社，就將分咗比你嘅田地收歸返國有。中國第一期發展工業，所有嘅錢都係嚟自農民；為咗向蘇聯還錢，搞場大饑荒，死幾千萬嘅都係農民。一直以來，就係以鄉村補貼城市。到咗今時今日，城市居民富裕起來，唔玩共產主義改玩資本主義，耕田者，農民繼續係窮人，係社會上嘅最低下階層。咁樣嘅玩法，你都咪話唔抵死。早兩年，為咗整頓北京市容，仲將成班窮中下農民工強行逐出北京，情何以堪？

叉遠咗，講返鐵路。

川漢鐵路公司本身就係新舊社會遞嬗中產生嘅怪物。佢表面上係一間私人公司（風筒），但實際上佢係由政府官員控制（鬚刨）。全個四川人民係股東，但係又冇人開股東大會，出錢嘅人無話事權，亦冇詳盡嘅財政報告向民眾交待。於是乎，比著你都識玩，成間公司就變成咗一部貪污機器。1909年11月，公司成立咗差不多五年，四川半吋鐵路都未起過，但係錢就狂洗，顧問費呀、堪探費呀、飲茶食飯灌水、出差考察購物、包養情婦小三小四，大量自己友伸手出糧開公數，相關人士中飽私囊，上下其手，瘋狂偷錢。

前面講過，公司股本嚟自全省田租嘅3%，當時有份報告指出，從1905年到1910年，公司應該收到股本1200萬兩，但係實際入數嘅就得900萬兩，足足唔見咗300萬兩！

中國人貪污，真係貪到出神入化。大家仲記唔記得，十年前汶川大地震，之後香港人慷慨畀嘅40億捐款，亦係捐俾四川……

下次再繼續……

#常威 #斷送共和關袁世凱蛋牛治  #袁世凱 #民國歷史

:^(

【常威近代史】第二部《中國一百年前的第一次改革開放》電子書
https://play.google.com/store/books/details?id=_6KMDwAAQBAJ

:^(

【常威近代史】第一部《大清亡國關慈禧蛋牛治》電子書
https://play.google.com/store/books/details?id=C3hjDwAAQBAJ

:^(

【常威近代史】第一部《大清亡國關慈禧蛋牛治》實體購買
https://www.382now.com/product?id=87

常公子 2019-5-16 11:47:53 【130回：大清亡國關 #港督卜力 蛋牛治】

😄八國聯軍侵華嘅問題，講咗百幾年。實際上係冇一件咁嘅事，冇人侵略你清帝國，完全係幻想，完全係謠言。1900年當時清國天地大亂，義和團仇殺洋人，外國人組織軍隊救援同胞，理所當然。當然，當年希特拉入侵其他相鄰國家，都係用拯救區內德國人同胞為藉口。但係八國聯軍真係冇咁做，佢哋拯救完同胞，佔領咗北京差唔多兩年，小小殺燒搶掠，1902年頭，就將北京交返俾大清帝國慈禧太后，和平撤出，當然清國需要簽下天文數字賠款嘅《辛丑條約》。

🤔成件事，係清國人唔啱，義和團暴民嘅出現，同西方世界無關。義和團秩序嘅失控，亦都係清政府自己嘅問題。當然你可以話，大規模民變係貧窮嘅問題，做成清帝國普遍貧窮背後嘅元兇係西方列強控制咗清角嘅銀根，所以仇洋有道理咁話。但係如果你咁樣諗，就犯咗思考邏輯上嘅問題，我哋唔可以將問題無限伸延，否則最後嘅元兇應該係上帝，因為係由佢創造萬物。

😄最近有人同我討論「究竟讀書有冇用」呢個命題。同樣道理，我哋唔可以將個問題無限伸延……而且一開始，首先要搞清楚「有有用」到底係乜嘢意思？如果你認為「有用」等於發達，而發達嘅定義係有一億港幣身家以上，咁我可以同你講，讀書應該係冇用嘅，就算俾你響牛津讀到PHD，你想搵一億都好難。但另一方面，讀書其實係有用，因為讀書可以令人頭腦清晰，變得更加聰明，遇上惡劣環境有更大的適應能力同求生能力。而且仲有一點，「究竟讀書有冇用」呢個命題究竟有冇普遍性呢？每個人嘅經歷唔同、背景唔同、本質唔同、命運唔同，好難一概而論。因為你無論得出任何結論，都有其他個別例子顯示出相反嘅答案。

😃好似最近的熱門話題引導條例，有人話係為咗「正義」而立法，又有人講，立法會後有嚴重嘅政治動機。一個頭腦清晰嘅人，當然知道真相係乜嘢，尤其係讀過歷史近代史，知道大洪水要到，其實係避無可避。就算畀你守得住一時，亦守唔到2047。

♎【#常公子近代史】語音導航！請大家幫手「#訂閱」我條常公子YoutubeChannel！同埋介紹多啲人睇睇！衝上2000訂戶！

🍳https://youtu.be/TiF0gPDj0lQ

【常威近代史】第二部《中國一百年前第一次開放改革》

https://play.google.com/store/books/details?id=_6KMDwAAQBAJ

【常威近代史】第一部《大清亡國關慈禧蛋牛治》

https://play.google.com/store/books/details?id=C3hjDwAAQBAJ

【常威近代史】第一部《大清亡國關慈禧蛋牛治》實體購買

https://www.382now.com/product?id=87

常公子 2019-5-17 20:33:32

【常威近代史】（二百一拾回）
袁世凱平反系列

繼續講中國鐵路，上次講香港人捐嗰90億，當跌落鹹水海，當認清某人真面目，冇下次。補充少少，當年汶川地震有部份香港富豪冇捐錢，或者應承咗捐之後捐少好多，呢啲富豪從此以後就成為咗當權者嘅打壓對象，相信唔使我多講係邊個，大家心知肚明。

上次講川漢鐵路公司賬目混亂，有人偷錢。1909年中國鐵路之父詹天佑接手宜昌段先開工，到辛亥革命之前，只係起咗30公里，而錢，一早就分曬啦屌。

叉開少少講詹天佑（1861-1919），佢係我常公仔口裡面成日講嘅高等華人，係一個中國偉人，「近代工程之父」，「中國鐵路之父」，唔係國父。又係廣東佬，南海人，中國第一位鐵路工程師，平生最偉大嘅業績就係興建咗「京張鐵路」。佢除咗係中國鐵路之父，仲有一樣嘢令人津津樂道，就係佢嘅檢點私生活。佢行一夫一妻制，冇立妾，冇玩蘿莉控，敬業樂業，冇貪污醜聞纏身，對子女嘅教育做得好好，個個人都尊敬佢，詹天佑堪稱擁有一個完美人格，每個中國人好似佢咁，整個銀河系（早）已經是我們的了。

點解佢咁完美？原因好簡單，因為佢係清帝國第一批留洋嘅學童，12歲已經離開中國（離開大染缸），前赴美國讀書，以優異成績考入耶魯大學取得工程學位，佢係喺美國教育制度成長下嘅中國人。中國儒家成日強調道德，但係我就唔見儒家教到啲乜嘢道德佬出嚟，反而禽獸人渣貪污食錢獸就一大堆……當時世界，好多出洋留學真正受過英美高等教育嘅高等華人，好似唐紹儀、伍廷芳、顧維均，或者之後民國時代國民黨嘅陳果夫、陳立夫、宋子文、孔祥熙，其實好多都係好人（俾人抹黑唔計喇），又問一句點解？有陣時嘅嘢，高級就係高級，低等就係低等，千萬唔好比較。

之前已經講過，20世紀初期中國人開始起鐵路行蒸汽火車嘅時候，猶太人愛因斯坦已經發現咗相對論，倫敦嘅地下鐵已經通咗車40年，仲啱啱全面電氣化……

仲有一樣嘢要提，推薦擔保詹天佑起京張鐵路嘅人，就係慧眼識英雄嘅袁世凱，又係佢？冇錯！又係佢。

講返四川，鐵路公司賬目混亂早就引起民憤。正常嘅處理方法，係債務重組，由第三方清算賬目，保存資產，將賬目詳細向股東交代。但係白痴清帝國，所採用嘅方法就係將川漢鐵路公司全面國有化，俾人偷咗嘅錢又唔去追究（可能自己人有份掛？）。你老母咁就揦屎上身喇，明明民衆怨恨嘅係鐵路公司，但公司收歸國有之後，民家嘅怨恨對象就成為咗清帝國本身。咁白痴嘅政策邊個揸fit，之唔係當時嘅商務大臣，亞洲電視盛品儒嘅祖先盛孫懷先生（1844-1916）。

當時爆發鐵路貪污問題嘅唔單止喺四川，廣東、湖南、湖北同樣出事，清政府嘅處理辦法都係將各地嘅鐵路公司收歸國有，然後商討賠償嘅問題。四川民眾，或大地主鄉紳嘅要求好簡單，就係收回成本，「被」投資咗幾多，想收返幾多，其實亦都相當合理化。

民衆要求嘅只係維護自己嘅財產，要求通過法治同憲政嚟保護自己嘅財產同利益，但係政府就覺得佢哋係搞事，係反革命活動，由經濟問題上昇到政治問題……咦？同今日咁似嘅？今日中國，有唔少人維權。維權本身唔係政治問題，但係往往最後就用政治手法解決。有啲嘢，唔係會同時代一齊發展，100年前如是，100年後都如是。

去到1910年，雙方關係一直緊張，其時清政府已經走上君主立憲嘅步伐，四川民間諮詢機構咨議局都成立咗，北京嗰個白痴皇族內閣亦都出現咗（遲啲講）。四川咨議局代表四川人民同清政府繼續談判，如果清政府當時能夠理性回應，公佈有關賬目資訊，同民衆代表坦誠對話，化解矛盾並唔艱難，可惜佢哋冇咁樣做，反而以硬碰硬！

今時今日都係一樣，你有乜撚嘢資格同我坦誠對話呢？我係莊，你係閒；我有槍響手，你老母你得把口；對乜鳩話呀屌！當然你係強勢政府，民衆冇嘢講，強權面前祇有逆來順受；但係當時嘅大清政府已經係肺can三期、仲有心臟病同糖尿病，咁嘅身世，仲要擺款？你唔死就有鬼！

下回，川人保路運動轟轟烈烈上演！

#常威 #斷送共和關袁世凱蛋牛治  #袁世凱 #民國歷史

【常威近代史】第二部《中國一百年前的第一次改革開放》電子書
https://play.google.com/store/books/details?id=_6KMDwAAQBAJ

【常威近代史】第一部《大清亡國關慈禧蛋牛治》電子書
https://play.google.com/store/books/details?id=C3hjDwAAQBAJ

【常威近代史】第一部《大清亡國關慈禧蛋牛治》實體購買
https://www.382now.com/product?id=87

常公子 2019-5-18 10:40:45 推一推

常公子 2019-5-18 11:30:52 【131回：大清亡國關 #佔領北京 蛋牛治】

😄今年一個話題好heat，就係西方果套民主自由議會政治，其實唔適合中國國情，中國要發展自己一套嘅政治模式，大概就係「有中國特色嘅社會主義」。類似嘅講法，二三十年前全無市場，因為當時中國好窮，係第三世界發展中國家水平，但係隨住最近30年，中國經濟強勁崛起，到而家同美國平起平坐，大家打貿易戰。今時今日，中國要有自己一套符合自己國情政治模式嘅講法，大把擁躉，起碼喺香港就有唔少。

😄平心而論，中國近二三十年經濟嘅強大發展，的確係同鐵腕統治有關，冇咗中共森嚴制度下，強大嘅控制資源分配手段，中國經濟亦都冇可能響咁短嘅時間內高速向前。你唔認同都冇辦法，事實擺響眼前，冇得抵賴。好多人盲目相信自由市場經濟，覺得政府或者上層建築儘量減低干預、減少操控，任由市場發展，就會無往而不利。但事實上，資本主義嘅弊病亦都喺呢度，當整個社會由少數人嘅財富所操控，就會造成極度嘅貧富不均同不公平現象，你要例子，你就睇吓香港嘅樓價囉，最後，亦都要政府插手干預調控。

😜好！寫到呢度，咁我係咪認同現代中國嘅政治制度有其優越性？當然唔係。我只係想同大家講，分析事物，往往好難一概而論，針冇兩頭利，凡事有利亦有弊，有up side亦有down side，世界唔係只有黑色同白色，其實只有一種顏色，就係灰色。今時今日，中國經濟非常強橫，但係普羅民眾能夠分配到嘅實際利益又有幾多？普羅民眾係咪活喺一個快樂嘅社會裡面？我唔知道。讀歷史有一個結論，就係一個美好嘅世界，其實從來冇出現過。

♎【#常公子近代史】語音導航！請大家幫手「#訂閱」我條常公子YoutubeChannel！同埋介紹多啲人睇睇！衝上2000訂戶！

🍳https://youtu.be/2xz4HvoFLIQ

【常威近代史】第二部《中國一百年前第一次開放改革》

https://play.google.com/store/books/details?id=_6KMDwAAQBAJ

【常威近代史】第一部《大清亡國關慈禧蛋牛治》

https://play.google.com/store/books/details?id=C3hjDwAAQBAJ

【常威近代史】第一部《大清亡國關慈禧蛋牛治》實體購買

https://www.382now.com/product?id=87

突發性交易 2019-5-19 00:59:05 推

:^(

常公子 2019-5-19 23:24:36



【常威近代史】（二百一拾一回）

袁世凱平反系列


人點解會革命？走投無路就會革命！就快餓死就會革命！啲錢唔見咗或自身利益受到嚴重傷害嘅時候，先會革命！2003年7月50萬人上街老董腳痛下臺點解？因為人民追求民主自由？No lar！只不過係當時經濟環境實在太差。（咁當時中央政府亦回應咗香港市民要求，開動自由行政策boost番起香港經濟，之後發生乜嘢事，大家心知肚明啦）


1911年5月，清政府唔理四川人民嘅反對聲音，將鐵路公司收歸國有，終於犯衆憎，激發起革命之火。8月24號，保路運動開始！全省開始四罷，即罷市，罷課，罷工，罷耕。一呼百應，全省人民響應抗爭行動，希望以和平示威手法，逼令清政府收回國有化川漢鐵路公司嘅決定。


好可惜，白痴嘅清帝國政府，同現在嘅香港特區政府一樣，完全係冇理到民眾嘅訴求。你有你死，我有我返屋企，甚至上綱上線，將事件上昇到政治層面，於是情況更加火上加油！


令到整個四川全省總動員嘅，係民間團體嘅力量。踏入20世紀，中國開始文明化，各類型民間團體同社團相繼出現，好似同鄉會、宗親會、工會、商會、宗教組織、同各種慈善組織紛紛響中國社會建立。就係呢啲唔同嘅社會小單位，統合埋一齊，集腋成裘，產生巨大嘅動員能力做嘢！


所以今日嘅中國，最防範嘅就係民間組織嘅成立，你睇吓90年代嘅法輪功你就一清二楚。成立組織同民間團體都得，但一定要受黨嘅控制，團體做到有番咁上下規模，黨就會插個書記入嚟管住你睇實你，將你同你條數完全控制，唔俾你作反，更加唔畀你自主，其實某程度上，亦都係「國有化」嘅一種手段；但係大家都明白，團體一旦國有化，就會變成咗另一樣事物，唔需要奇怪！郭美美小姐「住大別墅，開瑪莎拉蒂」大家仲記唔記得？

四川人民見四罷，政府都冇反應，於是將行動升級。9月頭，宣佈不納稅……嘩 ！咁仲得了？唔撚交稅？反鳥！反鳥！與此同時，全國各地亦都有聲援四川人民嘅示威發生。所以我同你講，1911年發生嘅辛亥革命並唔係偶然，大清亡國嘅主因，係四川保路運動！今日嘅中學史觀，好少提及保路運動，灌輸俾年青人嘅意識係，辛亥革命本身就係推翻封建帝制，係人民渴求民主自由嘅一場理念式武裝革命，其實又係假，所以話近代史呃細路就係咁解。


對四川人民嘅抗爭，清政府採取乾隆爺中世紀嘅對策，一面新聞封鎖，一面繼續唔同你埋檯傾（其實咪同今日一樣）。而且當時，四川民間亦流出獨立嘅風聲。反鳥！反鳥！四川總督趙爾豐（1845-1911）決定鎮壓，1911年9月7號，趙爾豐以開會為名，誘騙「保路同志會」同埋「四川諮議局」嘅領導人到總督府，落閘放狗，拉人封艇！民眾收到風之後上街聲援，衝去總督府，四川政府就開槍鎮壓，死咗32個人！


趙爾豐條仆街仲講大話，上報皇族內閣，話有土匪進攻總督府所以開槍殺人！仆你個雞！仲成世界？（其實咪同今日一樣）佢老母佢事後咁樣講：


「該署督前奏川人抗糧抗捐等情，已屬目無法紀，玆復倡言自保，意在獨立，尤屬罪無可逭。著趙爾豐迅速查拏。如得有狂悖不法確據，實係形同叛逆，無論是否職官，即將首要大犯，即行正法，並妥速解散脅徒，毋任蔓延為患。」


文言文好難明？即係話，扣你頂「川獨」帽子，就唔需要經過法律程序將你就地正法。但趙爾豐嘅行為，終於觸怒咗7000萬四川人，你要「川獨」吖嘛，而家就「川獨」比你睇囉babe！川人紛紛揸起刀槍造反，加埋地下社團組織民間力量配合，組成「同志軍」（唔係基），到處擺開戰場，衝擊政府軍隊，四川大亂，一個月後配合武昌起義，同年11月22號，重慶宣佈獨立，成立蜀軍軍政府，11月27號，四川大漢軍政府成立，宣佈全省獨立，脫離大清帝國統治。


就係一場保路運動，斷送咗大清嘅江山。事後睇返，大清帝國真係自己攞嚟，其實件事用錢同和平對話就可以擺平，偏偏佢哋就唔做，係都要以硬碰硬，結果最後自己仆街，條路自己揀，唔好喊。


下次時光倒流，返番去1908年先……

:^(

【常威近代史】第二部《中國一百年前的第一次改革開放》電子書

https://play.google.com/store/books/details?id=_6KMDwAAQBAJ

:^(

【常威近代史】第一部《大清亡國關慈禧蛋牛治》電子書

https://play.google.com/store/books/details?id=C3hjDwAAQBAJ

:^(

【常威近代史】第一部《大清亡國關慈禧蛋牛治》實體購買

https://www.382now.com/product?id=87

突發性交易 2019-5-20 11:08:35 推

:^(

常公子 2019-5-20 23:38:43

【常威近代史】（二百一拾二回）
袁世凱平反系列

1908年慈禧死X咗，攝政王，即第二代醇親王載澧當權，載灃亦係末代皇帝溥儀嘅親生老竇。佢第一件做嘅事就係罷絀袁世凱，理由係袁世凱曾經出賣佢二哥載湉，即劉晶先生光緒皇帝。上一代醇親王奕譞生咗七個仔，載湉排第二，載灃排第五，佢哋全部都係1902年之後慈禧新政下嘅當權人物。

罷絀袁世凱，報仇係假嘅，最重要嘅係政治考慮。因為明眼人都睇得出，槍桿子出政權，其實大清江山已經落入袁世凱控制範圍之下。袁世凱唔反，係因為顧及一點情義，佢畀面慈禧太后屍骨未寒啫，你老母載灃係乜水？皇族紈絝子弟，廿零歲人仔，未見過世面，佢喺袁世凱眼中，載灃影響力仲細過粒戇豆！

1909年1月2號，袁世凱正式離開政府，成為平民返屋企釣蟹。大清經濟繼續現代化，貿易欣欣向榮。但巨大嘅債務問題，同外國資本蠶食銀根，令清帝國冇辦法嚮前行多一步。我常公子估計，如果袁世凱無走，大概都係五六年貨仔，清朝就會改朝換代，改由袁世凱做皇帝（國號周？），行君主立憲國會選舉。事實上，之後嘅發展亦都好相似，只不過中間多咗一場「辛亥革命」，同埋多咗一大班革命黨人搞寸個party。

宣統元年1909年，清政府命各省咨議局於同年9月成立，10月左右，全國21個省，除咗新疆之外，全部成立民間諮詢機構諮議局，局內嘅議員嘅選舉方法之前已經講過，佢哋全部係社會賢達或者著名知識份子，或者係省裡地主同資本家嘅代言人。佢哋不約而同有一個希望，就係儘快成立國會，真正邁向君主立憲體制，各省諮議局議員之後大規模三次上訪北京，要求加快君主立憲步伐。全國各地亦爆發多場大型和平示威，要求民主。而戴澧基於民意巨大壓力，下詔亦將原本1916年召開國會期限，縮短到1913年。（其實佢順應民情，所做嘅嘢已經比現今香港特區政府優勝）

載灃更加火速成立內閣，企圖提昇國家文明形象，抑壓洶湧民情，不過呢個內閣就笑死人，1911年4月10號，清廷頒佈內閣官制19條，任命慶親王奕劻為內閣總理大臣，那桐、徐世昌為內閣協理大臣，響13個內閣成員之中，滿人佔咗8個，蒙古人1個，漢人祇有4個，8個內閣成員之中，皇族又占咗5個，其中包括載灃兩個細佬載濤同載洵。所以民間機笑呢個「內閣」叫「皇族內閣」。好明顯，皇族內閣係一場召喚關雲長嘅關公大災難。

喺屋企釣緊蟹嘅袁世凱應該偷笑，載灃條kai子果然係kai，而整個社會民情，亦比皇族內閣呢單嘢一下子燃燒起來，大家都感覺到清帝國呢班新人kai子根本冇誠意搞民主，只係想敷衍民眾，拖延時間，儘可能獨攬權力，繼續以滿洲人身份統治大清江山，所以喺呢個時候，加埋喺全國各地爆發嘅保路運動，大部分群眾已經開始明白清帝國已經無藥可救，民衆醒覺過嚟，轉移視線，同情革命黨，亦希望儘快改朝換代！

其實講返載灃依個人，基本上係一個好人，飽讀詩書，性格仁厚，你見汪精衛行刺佢，最後佢都冇殺大漢奸你就知道，但係載灃做事就比較優柔寡斷，冇自己嘅主見。響和平盛世，佢會係一個會受人稱頌嘅貴族階級，東華三院總理，但生於亂世，佢只有做炮灰。

而且到咗20世紀初，好人已經冇運行，其實好人從來都冇運行！整個世界，唔單止中國，亦都好快進入咗天翻覆地嘅年代。十九世紀和平盛世嘅好日子已經過去，大亂世將會降臨，喺亂世裡面，好人係冇份喺舞臺上玩，只有陰謀家野心家冒險家先係主角！

下集，革命黨再登場，書生奪命劍！

#常威 #斷送共和關袁世凱蛋牛治  #袁世凱 #民國歷史

:^(

【常威近代史】第二部《中國一百年前的第一次改革開放》電子書
https://play.google.com/store/books/details?id=_6KMDwAAQBAJ

:^(

【常威近代史】第一部《大清亡國關慈禧蛋牛治》電子書
https://play.google.com/store/books/details?id=C3hjDwAAQBAJ

:^(

【常威近代史】第一部《大清亡國關慈禧蛋牛治》實體購買
https://www.382now.com/product?id=87

常公子 2019-5-21 10:48:57

❤《YouTuber重新手到網紅》實體書正式全城上架！

🔥請大家支持我常公子同其他三位年青作者合著的新書！Go！Go！Go！

常公子 2019-5-21 10:51:26 【132回：大清亡國關 #罪己詔 蛋牛治】

😄今集講罪己詔，清朝好多個皇帝都頒發過罪己詔，就係公開向人民道歉，表達自己唔啱，企圖挽回民意。1900年八國聯軍入京，搞到國破家亡咁滯，慈禧就用光緒嘅名義頒佈罪己詔，責備自己。似乎係中國古代，皇帝某程度上都需要民意支持。但係好奇怪，歷史行咗100年，今時今日嘅中國政府，從來唔會向人民道歉，你話奇怪唔奇怪？

🤓最近逃犯條例出場，霸王硬上弓，點都要通過。睇住件事發生，眼都直埋，民意從來唔係政府考慮嘅因素之一，現代政治嘅實踐，近二十年香港係一個非常之好嘅反面教材，自由民主、言論自由一日一日倒退，白色恐怖用唔同嘅方法同渠道殺埋身。97年前我哋擔心嘅問題，逐漸成為現實，更由現實變成習慣。目前香港有好多人已經唔再理會政治，唔再關心身邊發生嘅一切，一心只希望搵多啲錢，可以移民最好，如果唔係送仔女入國際學校，遠離制度對下一代嘅污染。依一點，我都好明白，甚至理解（甚至自己都想做，可惜冇錢）。

😳97年前，香港總督彭定康曾經講過，佢最擔心嘅事情，並非中共會扼殺香港人嘅自由，而係香港人自己本身心甘情願斷送自己嘅自由。一語成讖，彭定康的確好犀利，亦好有遠見，佢真係知道石梨貝水塘嘅馬騮係鍾意食香蕉、唔鍾意食橙。未來會係點？我真係唔知道，又借用我最喜愛歷史學家霍布斯邦嘅觀點：「人類總係選擇向最壞嘅方向走」。香港目前，正朝最壞嘅方向走緊。

♎【#常公子近代史】語音導航！請大家幫手「#訂閱」我條常公子YoutubeChannel！同埋介紹多啲人睇睇！衝上2000訂戶！

🍳https://youtu.be/wOapdDaMaB4

【常威近代史】第二部《中國一百年前第一次開放改革》

https://play.google.com/store/books/details?id=_6KMDwAAQBAJ

【常威近代史】第一部《大清亡國關慈禧蛋牛治》

https://play.google.com/store/books/details?id=C3hjDwAAQBAJ

【常威近代史】第一部《大清亡國關慈禧蛋牛治》實體購買

https://www.382now.com/product?id=87