常公子 2019-3-21 09:30:05 【106回：大清亡國關 #奪命書生 蛋牛治】

😃奪命書生孫文由開始推翻滿清政權到成功，如果我哋由1895年計起，佢足足用咗16年時間。中間經過無數起伏，經歷過無數波折，但孫文始終從一而終，冇改變到立場，冇轉軚、冇退縮。所以最後叫佢做國父，其實都冇錯。做咗咁多年，無功都有勞吧？

🙄姑勿論佢喺革命事業上邊有幾大貢獻，但係佢明顯係中國革命嘅icon，講開中國革命，推翻帝制，你就會諗起佢，唔會諗起黃興。講真，辛亥革命成功同孫文其實冇乜關係，滿清王朝肯和平退位係因為袁世凱，實牙實齒上戰場衝嘅革命黨人係黃興，當然孫文嘅海外籌款能力都非常重要。以前嘅世界冇KOL，但係孫文就係KOL；好似之後嘅毛澤東同朱德，亦成為咗中國農民革命嘅KOL，終極大佬史太林其實好唔鍾意毛澤東，覺得毛澤東嘅馬克思理論水平完全唔夠，只係鄉巴佬土佬一個，但係毛澤東響中國嘅名氣實在太響，有太多人支持，到最後連史太林亦不得不屈服，將中國共產主義革命嘅大權交畀佢……

😜當年朱德個名其實同毛澤東並排，人稱「朱毛」，不過建國之後，icon只可以有一個，一山不能藏二虎，朱德個名就被搣咗落嚟，降格做十大元帥之一，從此以後得番一個紅太陽照耀萬民。政治宣傳其實好重要，玩得好，可以化腐朽為神奇。只要你讀得多歷史，你就會非常明白，icon宣傳手法嘅重要性，凡事凡物，其實最係都係講Marketing，係講條街有冇魚。

♎【#常公子近代史】語音導航！請大家幫手「#訂閱」我條常公子YoutubeChannel！同埋介紹多啲人睇睇！好快！好快！衝上2000訂戶！

🍳https://user35103.pics.ee/F9UWH

🍛https://youtu.be/1doCBnGxJf0

【常威近代史】第二部《中國一百年前第一次開放改革》
https://play.google.com/store/books/details?id=_6KMDwAAQBAJ

【常威近代史】第一部《大清亡國關慈禧蛋牛治》
https://play.google.com/store/books/details?id=C3hjDwAAQBAJ

【常威近代史】第一部《大清亡國關慈禧蛋牛治》實體購買
https://www.382now.com/product?id=87

follow my instagram @historysandwich

Facebook 專頁：https://www.facebook.com/historysandwich/

FKL 2019-3-21 12:53:41 好彩合邦唔成功咋
如果唔係呢個世界就再冇日本人,得返中國人
日本島係中國不可分裂O既一部份,日本變左偽日本國
日本天王要走去公園掃地,收入場票

常公子 2019-3-21 19:29:00

:^(

:^(

:^(

突發性交易 2019-3-22 13:23:53 如果合邦成功，對中國會係一次啟蒙運動，整個東亞都會唔同，好可能冇第二次世界大戰添

常公子 2019-3-22 17:38:17 absolutly

常公子 2019-3-22 21:42:59


【常威中史】慈禧平反系列（一百八十回）

1908年，豆斗頒布「憲法大綱」後，就快死得，今日我哋回帶，睇睇反對派革命黨點樣活動？

回帶時間，孫民口裡面所謂「十次革命」，第一次係1895年嘅廣州起義（徐克黃飛鴻第二集），第二次係1900年鄭士良指揮嘅惠州起義（陳可辛十月圍域）。第三次要去到1907年先發生，中間1905年孫文同黃興喺東京組成同盟會。所以十次革命中，剩低嘅八次，其實大多數係由真國父黃興親自指揮同策劃。

從軍事行動層面嚟睇，1906年至1908年係革命最活躍時期，六次主要起義發生喺呢段時間，同一期間，仲有三次以上嘅起義活動唔係由同盟會發動，但同盟會某啲成員都係其中起到重要作用，1909年係平靜無事嘅一年，1910年亦都只係出現過一次起義咁大把，但去到1911年嘅廣州起義（黃花崗七十二烈士）就係極其英勇同震撼人心嘅壯舉，影響遍及全國，終於促成辛亥革命發生，推翻滿清皇朝。

1905年後，孫文同黃興都知道，要革命能夠成功，一定要加強意識形態工作，加強「中華民族」建構嘅宣傳。之後佢哋兩位穿梭世界各地籌款同做串連工作。1905年底，黃興更加用假名返番清帝國（孫文冇，自從1895年離開中國，孫文要到1911年先正式回歸祖國），聯絡清帝國內軍人警察參與革命及宣傳活動，真係夠沙pop，完全係搵命搏。

同時期，喺日本嘅中國留學生亦遭受到日本政府嘅打壓。出 外留學搞革命活動，清朝政府睇唔過眼，向日本政府施加壓力，於是日本文部省1905年11月起，想嚴格規管中國留學生活動。事實上當時日本亦有大量私立學校接待中國留學生，佢哋去到日本當然唔係讀書，除咗搞革命仲有搞其他不法活動，呢個都算係中國人留學嘅傳統，到咗今時今日都冇變過，留學就留學啦，你去做間諜做雞走水貨，又係冇理由嘅。

日本政府嘅行動傷害咗中國留學生嘅自尊心，數以千計留學生罷課，抗議日本當局規管措施。對於呢個問題，同盟會內部亦有分歧，以胡瑛、田桐、宋教仁為首一派，主張全部留學生歸國，自己建立學校或從事革命活動（講就易）；而胡漢民汪精衛一派，則認為應該忍辱負重留響日本完成學業，「堅忍奉公，力學愛國」。

呢單野吹吓吹吓，最後和稀泥咗冇咗下文。日本當局回應咗清政府嘅訴求，搞咗一輪就冇搞，學生嘅激動情緒亦都跟住緩和落嚟。畢竟大家心知肚明，日本係全力支持中國革命推翻滿清嘅。日本政府非常明白，假若革命黨能夠推翻滿清，日本一定成為新政權下最大嘅得益者，呢啲事之後亦成為現實，中華民國袁世凱喪權辱國嘅21條就係由此而嚟，呢啲事之後再講。

1906年12月2號，同盟會喺東京舉行大會慶祝《民報》出版一周年，會上孫中山同黃興先後發言，孫文更加第一次公開提出佢嘅「三民主義」、「五權憲法」理論，獲得大部份人認同。到咗呢個時候，孫文同黃興之間嘅分工已經好清楚，孫文負責意識形態宣傳活動，而黃興則負責軍事指揮革命活動，兩者一陰一陽，互補不足，終於最後成就大事。

期間大清已經提出君主立憲嘅可能性，但係身處於日本同國外嘅中國人大部份唔相信大清會咁做。我之前已經講過，以梁啟超為首、支持君主立憲嘅立憲派中間派，亦係呢段時間開始失勢。

香港都發生過相同情況，政治光譜上，以中間派最不得人心。早幾年佔中前香港曾經出現過一個知識份子，要求理性思考當前中港之間嘅深層矛盾，唔好逢中必反，提倡以對話達到共識，提出「敵人都是鄰舍」概念，希望以理性團結港人，唔好再盲目二分建制派同反對派，非黑即白嘅政治局面。可惜提出上述概念嘅公知，之後俾人鬧到隻狗咁，由一個頗受人歡迎嘅公知，被抹黑成為中共講好說話嘅內奸，最後更加淡出香港文化界。

呢個公知叫梁文道，我識佢，佢（曾經）係我好朋友，佢係劉曉波《零八憲章》嘅其中一個簽署人。今日寫佢，我係為佢平反，其實佢提出嘅嘢冇錯，只不過大家唔buy啫，梁文道提出嘅觀點，首先佢唔希望香港人內部分裂，因為團結就係力量，山頭大多，就可以輕易逐個擊破；其次佢心知肚明中共係受軟唔受硬，你越硬，對方只會比你更硬，要同佢玩，要玩返佢嗰套和稀泥，當然佢講嘅嘢我亦都唔係100%認同。但梁文道嘅遭遇講咗畀我知，香港並唔係一個可以容納理性討論嘅地方，我亦好明白。畢竟一個地方要敗壞，一定有其敗壞嘅元素存在在先……冇蛋，點會有雞？

#常威 #大清亡國關慈禧蛋牛治 #慈禧太后 #晚清歷史 #辛亥革命

:^(

【常威近代史】第二部《中國一百年前的第一次改革開放》電子書
https://play.google.com/store/books/details?id=_6KMDwAAQBAJ

:^(

【常威近代史】第一部《大清亡國關慈禧蛋牛治》電子書
https://play.google.com/store/books/details?id=C3hjDwAAQBAJ

:^(

【常威近代史】第一部《大清亡國關慈禧蛋牛治》實體購買
https://www.382now.com/product?id=87

【大清亡國關慈禧蛋牛治】全集，請支持常公子頻道
https://www.youtube.com/playlist?list=PL0RVUAILQUOvTo8JJrayjrvd_Nbjc-0Me

follow my instagram @historysandwich

Facebook 專頁：https://www.facebook.com/historysandwich/

常公子 2019-3-23 10:52:20 【107回：大清亡國關 #孫文 蛋牛治】

😃我哋嘅國父孫文，其實係共產主義者。佢相信共產主義，平均地權一直係佢嘅理念。辛亥革命之後，聯俄容共，亦係孫民首先提出，後嚟臺灣蔣介石政權，將孫中山視作反共嘅icon，其實違背咗孫民先生生前嘅理念。孫文嘅老婆宋慶齡，我哋嘅國母，更加係共產黨放喺當時國民黨之內最大一條針，事後大家都相當清楚。

😄相信共產主義並唔係罪，共產主義本身嘅烏托邦理念，其實係人類社會結構最後嘅夢想。資源平均分佈，每個人過住平等嘅生活，再冇階級，再冇剝削，天下大同，其實邊可以話有錯呢？祇不過，夢想係一回事，實踐又係另一回事。人類喺20世紀，真真正正將共產主義實踐過，但係實驗講畀我哋知，完全唔work。唔單止唔work，仲帶嚟人類歷史上一場場巨大嘅災難。只可以講一句，以人類目前為止嘅水平同埋質素，共產主義冇辦法推行。

😄蘇聯1991年倒臺，中國亦都完全轉軚行資本主義市場經濟，現今世界，其實真正嘅共產主義國家得返一個，就係北韓。有冇興趣去生活呀？我就冇喇。共產主義係一個美麗嘅夢想，但係實行共產主義必須依靠極權政治，兩者密不可分。呢個係一個大範疇嘅問題，我希望響未來嘅常公子頻道我有機會可以詳細講。

😘哲學家牟宗三講過，40歲前相信共產主義係正常，而40歲後繼續相信共產主義就係一種錯誤；呢句說話好有深度，尤其是過咗40歲嘅年紀，睇見世間上人同事嘅運作，如果你再相信共產主義真係work，其實個腦筋好有問題。

♎【#常公子近代史】語音導航！請大家幫手「#訂閱」我條常公子YoutubeChannel！同埋介紹多啲人睇睇！好快！好快！衝上2000訂戶！

🍳http://yt1.piee.pw/FQ6JW

🍳https://youtu.be/e_HQwS8826Q

【常威近代史】第二部《中國一百年前第一次開放改革》
https://play.google.com/store/books/details?id=_6KMDwAAQBAJ

【常威近代史】第一部《大清亡國關慈禧蛋牛治》
https://play.google.com/store/books/details?id=C3hjDwAAQBAJ

【常威近代史】第一部《大清亡國關慈禧蛋牛治》實體購買
https://www.382now.com/product?id=87

常公子 2019-3-23 23:12:49

【常威中史】慈禧平反系列（一百八十一回）

星星之火可以燎原。

經過1906年嘅平靜，1907年起，清帝國內發生多宗起義事件，當中有同盟會參予嘅，亦有其他團體自發進行。06年12月，江西萍鄉，湖南醴陵、瀏陽都爆發咗小規模民衆起義活動，起義者都拎住「中華民國」或「新中華帝國」嘅名義做嘢。由此可見革命黨「中華民族」嘅意識形態宣傳活動已經收到一定成效。

呢幾場起義好快被地方政府震壓落嚟，之後各省政府亦都開始逮捕同埋殺害革命份子，結果長江流域、湖南一帶黃興班底嘅同盟會組織受到極大打擊，一時之間難以回復元氣。呢個時候，仲係湖廣總督嘅張之洞已經將黃興列為頭號通緝犯（湖南匪目），懸紅500兩黃金做花紅。大家睇到，清政府係將革命黨叫「匪」，唔係共產黨先係「匪」啊！

1907年夏天喺安徽發生咗另一次並非由同盟會發動嘅起義，呢次起義係光復會領導人之一浙江人徐錫麟發動嘅。點解要特別搦出嚟講呢？因為呢件事喺道德上好有爭議。徐鍚麟係1906年4月響日本留學返嚟，佢得到滿人安徽巡撫恩銘嘅賞識，得到提拔成為安徽巡警學堂會辦。1907年6月6號，巡警學堂舉行畢業禮，徐鍚麟竟然當埸槍殺恩銘，並且企圖逮捕所有到場官員，最後事敗被捕。

徐錫麟被捕後曾經咁樣講：「爾等言恩銘是好官，待我甚厚，但我既以排滿為宗旨，即不能問其人之好壞。」簡單啲講，就係唔理係好人定壞人，就係因為你係滿州人，所以就要殺，所謂「殺盡滿人」。

咁究竟係啱定錯呢？二次世界大戰，希特拉覺得猶太財閥係整個世界背後嘅金融黑手最大既得利益者，結果佢下令殺咗500萬猶太人，我哋冇辦法話佢做得啱掛？如果用呢個角度去睇，徐錫麟一定係做錯。因為我哋冇理由因為一個人嘅種族外貌或所屬嘅國家或團體而判佢死刑，當然歷史上大部分嘅大屠殺事件，都係用呢種理據做依歸。

野蠻國家裡，你殘忍，我比你更殘忍，徐錫麟被斬首後，恩銘嘅下屬挖咗佢個心出嚟祭恩銘。

徐石麟嘅安徽起義事件，仲牽連到一個人，佢叫秋瑾（1875-1907）。秋瑾有份同徐錫麟一齊策劃事件，佢曾經留學日本，係1905年加入同盟會嘅第一批日本留學生，佢亦曾經喺黃興設於橫濱製造炸彈嘅機構工作過。回國後，秋瑾喺女子學堂任教，佢係中國第一批女權先導者。秋瑾經常喺公眾場合著住男裝，提倡女權，佢創辦過《中國女報》，到處演講，極受民眾歡迎。1907年佢喺暴動基地大通學堂被捕，第二朝未正式經過法律程序審訊，喺紹興行刑處古亭軒被殺，終年三十六歲。

我想講，滿洲官員恩銘係好人，除錫鱗都係好人，秋瑾都係好人。但係大家因為政治立場嘅不同，最後自相殘殺統統走上絕路。道德有時候好難講，乜嘢係啱？乜嘢係錯？好多時候要睇你身處於乜嘢時代？乜嘢環境？做緊乜嘢事而決定。

我都好大個先知道，世界上面大部分恐怖份子其實都係好人。包括拉登，真正嘅壞人一定係鬼鬼鼠鼠，唔會拋個身出嚟對抗強權。響20世紀初，清帝國國內最大嘅恐怖分子就係孫文同黃興。如果冇辛亥革命，清帝國君主立憲可以走落去，佢哋就係拉登。

下次繼續……

#常威 #大清亡國關慈禧蛋牛治  #慈禧太后 #晚清歷史 #辛亥革命

:^(

【常威近代史】第二部《中國一百年前的第一次改革開放》電子書

https://play.google.com/store/books/details?id=_6KMDwAAQBAJ

:^(

【常威近代史】第一部《大清亡國關慈禧蛋牛治》電子書
https://play.google.com/store/books/details?id=C3hjDwAAQBAJ

:^(

【常威近代史】第一部《大清亡國關慈禧蛋牛治》實體購買
https://www.382now.com/product?id=87

常公子 2019-3-25 23:09:02

【常威中史】慈禧平反系列（一百八十二回）

二十世紀初，豆斗嘅敵人除咗一班滿腔熱血嘅革命黨人，仲有梁啟超同康有為嘅保皇黨。

（其實豆斗嘅敵人祇有一個，就係日本）

1899年戊戌政變發生之後，康有為同梁啟超流亡到日本。康有為逗留喺日本嘅時間並唔長，響清政府嘅壓力下，日本將康有為禮送出境，陪佢離開日本嘅仲有日本情報部門嘅中西重太郎，替康有為兼任翻譯同保護佢，之後康有為水鬼昇城隍，環遊世界各地籌款，繼續佢嘅自肥在先保皇任務。而能力比佢強、道德層次比佢高嘅梁啟超則繼續留喺日本，推動光緒復位寫作出版意識形態活動。寫到呢度，大家應該相當清楚，康有為同梁啟超其實係日本人嘅間諜，嚴格嚟講係賣國賊。日本從來冇放棄過佢哋，不斷在明在暗強烈支持，因為光緒如果能夠復位，就可以玩多劑「合邦」，合邦概念，本來就係吞拚大清嘅第一號捷徑。

日本人一面支持康梁保皇黨，另一面亦都支持孫黃革命黨（包埋中國留學生），之前已經寫過太多，大家有留心嘅話，都心知肚明日本人諗緊乜？總之一定要推翻你大清，明刀明槍唔得（甲午戰爭），就用間諜就用黑金培育反對派勢力引發籠裡雞作反等支爆。用今日嘅術語，就係「外國勢力干預中國內政」。日本文化同中國同宗同源，我常公仔講過，佢哋想吞併清國可能都係出於一番善意，當時，日本人真係覺得幫助中國人擺脱愚昧封建殘酷獨裁嘅滿清皇朝統治係做大好事，依一點我個人唔反對。或者早早合邦，建立大東亞共榮圈，到咗今時今日，個世界東風壓西風，已經係我哋東方人都未定。

所以政治上冇所謂黑同白、正同邪，你企喺白嗰邊睇，對方自然黑，同樣道理，相對地，你嘅敵人亦都覺得你係黑嗰面。

今日香港，好多香港人覺得建制派保皇黨係協助中共獨裁統治香港、抹殺香港人嘅民主自由；但係建制派眼中，反對勢力係勾結外國勢力破壞香港繁榮穩定。其實正反兩面，大前提都係「為香港好」。至於乜嘢係「香港好」？就各有各嘅睇法，正如你見到一個女人，你可以覺得佢靚，但係其他人可以覺得佢唔靚。咁究竟乜嘢叫靚呢？乜嘢叫好呢？咩先係正確呢？咩先係符合道德呢？呢啲係哲學問題，凡係哲學問題，基本上係冇答案。

回帶30年，1989年六四事件，中共官方定性天安門廣場發生嘅事，係有外國勢力參與、外國資金投入。係西方世界想推返中國共產黨一黨專政嘅一場政變陰謀。

我只係想指出一點，講得出西方世界背後策劃，矛頭當然直指美國人。6月4日血腥屠城，之後全世界一致譴責中國，對中國實施經濟制裁。但係我想話畀大家知，第一個替中國解除困局嘅，又係美國，喺1990年前美國總統老布殊帶頭宣佈撤銷對中國嘅制裁。亦有人話，對中國態度軟化，就係老布殊唔能夠響1992年總統大選連任嘅理由之一，當然雪茄佬克林頓嘅英俊外貌大家唔可以睇小。順帶一提，對中共好嘅美國總統，包括同中共建交嘅尼克遜，又或者替中共六四解圍嘅老布殊，佢哋都係共和黨人。但係今日想一棍打巢中國崛起嘅，亦都係共和黨總統龍貫天特朗普。

政治最高境界，係黑白不分，正邪難辨，一啖砂糖一啖屎。表面做一套，內裏有另一個計劃，瞻前顧後，凡事以利益行先，道德並唔係考慮範圍，只要能夠得到實際利益，其他嘢統統只係過眼雲煙、鏡花水月。上述所講嘅，就係所謂「馬基維利主義」。

下一回，我哋繼續講保皇黨康有為派刺客行刺慈禧太后，今日大除夕，恭祝大家團團圓圓，闔家平安送狗迎豬！

#常威 #大清亡國關慈禧蛋牛治  #慈禧太后 #晚清歷史 #辛亥革命

:^(

【常威近代史】第二部《中國一百年前的第一次改革開放》電子書
https://play.google.com/store/books/details?id=_6KMDwAAQBAJ

:^(

【常威近代史】第一部《大清亡國關慈禧蛋牛治》電子書
https://play.google.com/store/books/details?id=C3hjDwAAQBAJ

:^(

【常威近代史】第一部《大清亡國關慈禧蛋牛治》實體購買
https://www.382now.com/product?id=87

常公子 2019-3-26 10:49:56 【108回：大清亡國關 #袁世凱 蛋牛治】

😃正文寫緊袁世凱，袁世凱又喺Youtube Channel上出現，冇辦法，呢個人響中國近代史實在太重要。佢嘅重要性喺 #孫文 之上，但係兩者嘅聲明相差實在太遠，一個係偉人，一個係奸人；前者被賦予 #國父 之名，其實名過於實。後者俾人話係千古罪人，其實大錯特錯。

😚就響 #戊戌政變 一事上講，袁世凱選擇支持舊黨唔支持新黨，其實係合情合理嘅選擇，當時百日維新推出嘅新政，不得民心。#光緒皇帝 同佢班新黨成員其實冇治國執政嘅能力，如果唔及時刹停維新，後果可以好嚴重。最簡單一個後果，就係清帝國會雙手奉上比日本，成為日本 #大東亞共榮圈 政治格局中嘅一個殖民地。事後睇當然一清二楚，但係當時睇得穿個脈絡嘅人實在好少，#慈禧太后 係一個，袁世凱係另一個。

😄旁觀者清，當局者迷。係歷史嘅定律，後世人用綜覽全局嘅思維去討論當時嘅人，其實本身就係方法論上嘅一個錯誤。最簡單嘅方法，係應該將自己套入當事人嘅角色去思想，用「#演員自我修養」嘅方法去理解。所以如果我係袁世凱，我都唔會支持新黨，就係咁簡單。

😜放返入今日嘅政治格局，有人話 #習近平 獨裁，玩集權。用「演員自我修養」嘅方法去理解，我諗佢都唔想。佢一定明白走回頭路會被千夫所指，之前十年，#胡錦濤 嘅無為之治令到整個中國建立大量山頭主義，響中國嘅國格形態下，權力下放最後可能導致大分裂。#成龍 可能講得冇錯，「中國人係需要管嘅」，隻馬騮唔綁住，就會四圍屙屎屙尿。如果上述嘅思維無錯，咁袁世凱稱帝亦都冇錯。我哋仰慕西方嘅民主自由社會，好希望中國可以行美國嗰套真民主政黨政治，但係我想含淚講一樣嘢，我哋中國人真係唔X得，真係做唔X到。

😚未來，當然仍然充滿希望。期待有一日，中國民智大開之時，一切就會開花結果，今日似乎仍未係時候。

♎【#常公子近代史】語音導航！請大家幫手「#訂閱」我條常公子YoutubeChannel！同埋介紹多啲人睇睇！好快！好快！衝上2000訂戶！

🍳http://yt1.piee.pw/FSP2A

🌭https://youtu.be/0swu7WRbMQs


【常威近代史】第二部《中國一百年前第一次開放改革》
https://play.google.com/store/books/details?id=_6KMDwAAQBAJ

【常威近代史】第一部《大清亡國關慈禧蛋牛治》
https://play.google.com/store/books/details?id=C3hjDwAAQBAJ

【常威近代史】第一部《大清亡國關慈禧蛋牛治》實體購買
https://www.382now.com/product?id=87

follow my instagram @historysandwich

Facebook 專頁：https://www.facebook.com/historysandwich/

突發性交易 2019-3-27 17:31:10 推推

:^(

常公子 2019-3-27 21:15:00

【常威中史】慈禧平反系列（一百八十三回）


康有為係吹水大王，亦係造假大師，1899戊戌年間發生嘅事，由佢同佢位高徒梁啟超先生重新解讀，居然成為正史依據，中國近代史嘅墮落同造假風氣，亦由此而來。


之後嘅文人同歷史學家，見佢哋做假做得咁開心，紛紛效法，結果歷史越做越假，完全冇句真。造假文化，更深入民心，最後病入膏盲，到咗今日，身份可以係假、學歷可以係假、奶粉可以係假、疫苗可以係假、結婚可以係假、愛情可以係假、權鬥可以係假……既然全部都可以係假，咁你俾民眾睇嗰盤數，點會係真？


如果你識得內地嘅朋友，佢哋又肯同你講真心說話，你就會知道，響中國冇人會相信政府。簡單啲講，政府叫你行左你就行右，政府叫你入市你就沽貨，政府叫你沽貨你就入市，凡事同政策幹部對著幹，就包保冇死。一群造假嘅人活係一個造假嘅社會裡面，大家依從潛規則，且活得心安理得，就係今日中国社會嘅狀況。


講返保皇黨康有為，自從戊戌政變之後，康有為搵到日本做靠山，之後佢進行咗一系列暗殺慈禧嘅嘗試，殺手由日本派往北京，其中一個叫沈藎（1872－1903），1903年佢走漏風聲，比豆斗捉咗，即時被判死刑，用廷杖監生打死。沈藎被殺，又比康有為炒作成為中國史上第一個因新聞言論觸怒政府而被殺嘅記者，引發起國際社會聲討豆斗。事實上冇證據顯示沈藎係記者，亦冇跡象佢同任何刊物寫過任何文章，佢只係響日本報紙上發表過一篇關於「中俄密約」嘅文章。而且以豆斗嘅做事方式，佢亦唔會用咁嘅方法對付紙上談兵嘅唔文人，佢要即時殺死嘅人，一定相當重要同相當危險。


1904年，豆斗更大赦捲入康有為密謀反党嘅人，當然康有為同梁效超兩位主理人（日本間諜）並唔響特赦名單之内。

1904年11月，康有為再次派出以梁鐵君為首嘅暗殺小組出動，密謀行刺豆斗，其中一個叫羅璞士嘅刺客，打算潛入頤和園做昆明湖小輪司機，利用炸彈暗殺慈禧，1905年7月佢喺廣東被捕，隨即被處死。1906年8月，暗殺組頭目梁鐵君亦都落網，經袁世凱審訊後被處死。連番行刺慈禧嘅計劃相繼失敗，但係呢個時候風勢有變，慈禧已經將君主立憲嘅時間表擺上臺，保皇黨內轉移想同清政府合作搞君主立憲，我之前已經講過，佢哋想埋堆啫，但慈禧唔蘇佢哋。而梁啟超同康有為亦都因為路線唔同而開始分裂，保皇黨氣勢大跌，反對力量轉移傾向孫文同黃興嘅同盟會革命黨。


有一點我想提出，康有為嘅保皇黨一直想殺死豆斗、支持光緒重新執政，1899年戊戌政變後，劉晶光緒被軟禁於瀛台，咁究竟康有為之後嘅行動，光緒有冇份參與同背後支持呢？我個人認為，劉晶一定有繼續搞事，佢雖然被軟禁，但係仍保持皇帝名銜，佢亦唔係一般人想像咁長期被囚禁於四面環水嘅瀛台之內，佢身邊相信仍然有人可以同康有為秘密通信，保皇黨響海外嘅活動需要金主，劉晶一定係重要嘅水喉之一。我甚至認為，劉晶秘密聯絡嘅人唔單止係康有為梁啟超，應該仲有日本嘅特務。


冇劉晶背後繼續拾卜，康梁嘅保皇黨亦冇可能企得咁硬淨。1899年至1908年九年之間，豆斗同劉晶仍然喺檯底鬥個你死我活，豆斗冇放過劉晶，劉晶亦冇放過大姨媽。相信呢個亦係豆斗死後，拉埋劉晶落地獄嘅理由。


#常威 #大清亡國關慈禧蛋牛治  #慈禧太后 #晚清歷史 #辛亥革命

:^(

【常威近代史】第二部《中國一百年前的第一次改革開放》電子書
https://play.google.com/store/books/details?id=_6KMDwAAQBAJ

:^(

【常威近代史】第一部《大清亡國關慈禧蛋牛治》電子書
https://play.google.com/store/books/details?id=C3hjDwAAQBAJ

:^(

【常威近代史】第一部《大清亡國關慈禧蛋牛治》實體購買
https://www.382now.com/product?id=87

:^(

Facebook 專頁：https://www.facebook.com/historysandwich/

突發性交易 2019-3-27 22:09:53 以前讀書已經覺得邊有咁Q，慈禧死咁冇耐，光緒都死埋

:^(

常公子 2019-3-28 12:18:08 【109回：大清亡國關 #夜訪法華寺 蛋牛治】

😚譚嗣同夜訪法華寺，係中國近代史上面一場出名嘅戲劇性事件；一次夜訪，製造咗一個民族英雄，一個革命符號。亦都製造咗一個民族罪人，黑臉白臉，忠奸分明。內容唔寫喇，大家睇片，細心啲諗，真係有好多疑點。

😘呢個世界，唔係一個忠奸分明嘅世界，亦都唔係個黑白分明嘅世界。我講過，大部分人都係遊走於灰色地帶。有時做忠，有時做奸。上午捐錢資助非洲冇書讀嘅細路仔，下午返公司攞張全家去食飯嘅手寫單開公數，兩者並無衝突。大家都係搵食姐，大家都係為兩餐姐。近幾年，俾人話得最多嘅民主派，亦都係咁嘅情況，需知道立法局議員係高薪厚職，如果單純視為一個職業去睇，呢份工相當唔錯，底薪有七、八萬，仲有幾十萬公數畀你開銷，而且唔使日日返工，定時出糧，肯定冇拖糧；放眼今日香港社會，呢份工去邊處搵？所以為咗保住個飯碗，為咗有糧出繼續供樓繼續炒股票繼續玩外滙，份工一定要保住。

😄當然我咁樣講好mean，但係真相我諗距離唔係好遠。拋個身出嚟玩政治，都要有糧出！否則食風咩？人類唔可以靠吞食空氣生存，日常生活開銷需有真金白銀落袋，理想還理想，搵食還搵食。冇得食邊有理想？

😄所以打埋開口牌，我常公子都唔係可以靠食風生存，各位上我條youtube channel睇片，唔該同我睇吓啲廣告，或者click入去兜個圈，畀我賺多少少廣告費，畀啲甜頭我同阿潮繼續經營一條全球廣東話近代史粵語頻道！多謝大家！如果我有幾億身家，我一定唔會要求大家咁樣幫我，可惜我冇，我天生落嚟就係一個窮人，但我無怨無悔，四十而認命。

♎【#常公子近代史】語音導航！請大家幫手「#訂閱」我條常公子YoutubeChannel！同埋介紹多啲人睇睇！好快！好快！衝上2000訂戶！

🍳https://user35103.pics.ee/GLJ3U

🍳https://youtu.be/DL0oRMpt-iQ

【常威近代史】第二部《中國一百年前第一次開放改革》
https://play.google.com/store/books/details?id=_6KMDwAAQBAJ

【常威近代史】第一部《大清亡國關慈禧蛋牛治》
https://play.google.com/store/books/details?id=C3hjDwAAQBAJ

【常威近代史】第一部《大清亡國關慈禧蛋牛治》實體購買
https://www.382now.com/product?id=87

常公子 2019-3-28 22:12:59

【常威中史】慈禧平反系列（一百八十四回）

今日想叉開一筆，講講西藏問題，時間仍然停留喺1905年。

西藏問題到今日都係問題，其實所謂一個國家，必須由一群語言文化大致相同嘅人湊合而成。呢個係意識形態問題，亦係統戰問題，今日上頭要香港人唔講粵語講普通話，要培養一批「新香港人」，亦都係依個問題。

西藏，長期以來有別於漢本位中原文化，藏人有自己一套生活方式，佢哋用嘅係藏語，信奉嘅係藏傳佛教，1949年前，甚至政治制度都係另一套玩法，以玩投胎轉世宗教教主達賴喇嘛為最高政治領袖，以地主農奴制度做社會基本結構，以政教合一方法管治民眾。二十世紀前，名義上西藏係大清帝國一部份，但其實係自治特區，係特別行政區，係一國兩制，藏人治藏。

19世紀末期，大清帝國嘅好朋友0005大英帝國就曾經入侵西藏，當時西藏依塊亞洲腹地，係沙俄同大不列顛圍繞英屬印度同俄屬中亞之間嘅過渡地帶，大英帝國唔希望俄國勢力進入西藏，因為越過西藏，就會嚴重威脅大英帝國嘅罌粟花大寶藏--英屬印度。沙俄亡國之君尼古拉二世登位之後，不斷向外擴展勢力，之前已經講過西伯利亞鐵路伸手入遠東，同時沙俄亦開始滲透西藏高原，於是大英帝國決定先下手為強！（英國人醒目就係咁解囉）

1888年，由於英屬鍚金同西藏嘅邊界糾紛，英軍攻擊駐守爭議領土
隆吐山嘅藏軍，軍備武器有相當距離下，大獲全勝，史稱「第一次英國侵藏戰爭」，戰後清帝國派遣駐藏大臣前赴印度同英國簽訂咗《中英藏印條約》，承認鍚金係英國嘅保護國，從此以後，英國就不斷喺西藏玩嘢。

1904年，由於貿易通商糾紛，英國人榮赫鵬（Younghusband，1863-1942）帶印度兵攻陷拉薩，史稱「榮赫鵬遠征西藏」（Younghusband expedition to Tibet），或「第二次英國侵藏戰爭」，中間少不免又有大屠殺，跟住清政府同英國簽訂《中英續訂藏印條約》，條約都幾搞嘢，英國承諾撤軍並且唔再侵略西藏，但同時清帝國則要保證唔准其他國家侵佔西藏？言下之意，即係英國人玩曬。

同一時間，英國人最擔心嘅對手沙俄，亦都係1905年清帝國國內打輸日俄戰爭，元氣大傷，千萬唔好忘記，日俄戰爭，大英帝國同美國嘅猶太財閥係日本軍費嘅主要出資者！（英國人醒目就係咁解囉）

1911年辛亥革命之後，中華民國對西藏嘅管治更加鬆散，西藏嘅主權問題變得非常唔穩定，英國人就曾經鬼鬼鼠鼠，多次運用外交手段，呃呃氹氹，希望將西藏獨立出嚟，想西藏成為一個受佢哋控制嘅獨立國家，可惜一直未能成事。直至1949年底，我哋中國最偉大設計師鄧小平領軍進入西藏，中國共產黨稱之為解放西藏人民，從此以後，西藏再一次穩定落嚟，長久成為中華人民共和國嘅一部份至今。

宜家流亡國外嘅十四世達賴喇嘛丹增嘉措（Tenzin Gyatso，1935－），就係1949年支持中共和平解放西藏嘅重要人物，但喺1959年，佢同中共政權決裂（決裂原因簡單啲講，就係達賴喇嘛認為中共冇俾到承諾過嘅自治權俾藏人），流亡國外至今，1989年六四事件發生嗰年奪得諾貝爾和平獎。

今日叉開一筆講西藏問題，我只係想講一樣嘢，一個地區或一群人能否獨立，自己建立一個國家，其實係一樣非常之複雜嘅事情，我好相信現在西藏人民或海外藏民裡面，都有人都想西藏成為一個獨立政治個體。但民心取向係一回事，實際操作亦係一回事，一個地區要脫離一個巨大國家獨立出嚟，背後牽涉好多問題，亦絕對唔係人民高呼「獨立」，上街嗌吓口號就可以成事。軍事力量固然係一個大問題，國際社會嘅外交關係先至係更重要嘅問題。

有興趣獨立議題嘅朋友，可以睇睇近代亞洲歷史上一個最成功嘅例子，就係新加坡1965年獨立事件，當然，當中發揮最重要力量嘅，係一個雄才大略擁有高度智慧嘅人物，佢叫李光耀，如果有機會，我常公仔真係想講講佢，當然佢都係一個心狠手辣嘅獨裁者。

#常威 #大清亡國關慈禧蛋牛治  #慈禧太后 #晚清歷史 #辛亥革命

:^(

【常威近代史】第二部《中國一百年前的第一次改革開放》電子書
https://play.google.com/store/books/details?id=_6KMDwAAQBAJ

:^(

【常威近代史】第一部《大清亡國關慈禧蛋牛治》電子書
https://play.google.com/store/books/details?id=C3hjDwAAQBAJ

:^(

【常威近代史】第一部《大清亡國關慈禧蛋牛治》實體購買
https://www.382now.com/product?id=87

常公子 2019-3-29 19:23:13
【常威中史】慈禧平反系列（一百八十五回）

故事始終有講完嘅一日，關於慈禧嘅故事就快步向尾聲。但我常公子講嘅中國歷史故事，仲有漫長日子……

20世紀初期，整個世界都係欣欣向榮，人類無論喺科技、政治或工業上，都不斷邁步嚮前，冇人能夠估到1914年會發生毀滅性嘅第一次世界大戰。

響清帝國，現代化步伐更係一日千里。1905年係關鍵嘅一年，日俄戰爭中日本大獲全勝，殲滅整支俄國人波羅的海艦隊，當時清帝國人民絕對支持日本人，當日本戰勝後，清國子民欣喜若狂。呢場戰爭話畀全世界知，東風可以壓到西風，黃皮膚嘅東方人（當然唔係清國人朝鮮人）係有料到嘅。

帝國之內，雖然當時日本未有AV同動漫，但崇日風氣比今日更加熾熱，加上日本人好識玩手段，佢哋響清帝國國內出資或背後出資辦報搞出版，收埋文棍政府官員，玩傳媒手段玩意識形態操控，當時大清帝國真係識條鐵。於是，清國子民非常咁羡慕同崇拜日本，甚至將日本視之為學習嘅典範。但其實日本人從來無放棄過「合邦」呢個呃鳩整個大清嘅大戰略。

1899年嘅戊戌政變，就係因為日本人玩「合邦」燒到埋身，伊藤博文埋嚟埋北京想做顧問，先逼慈禧太后當機立斷，出手奪權，豆斗非常明白，一玩合邦，就即係將清帝國拱手相讓畀日本人。光緒條戇鳩仔就係合邦嘅忠實支持者，可能劉晶光緒會認為，合咗邦之後，佢仲有訂企，甚至可以同明治天皇平起平坐，一齊指點亞洲，最後侵略埋歐洲都未定。

但事實話比我哋知，「合邦制」唔係「聯邦制」。甲午戰爭之後朝鮮就係好例子，你以為朝鮮王朝（香港特別行政區）仲有自主權，其實係冇。1907年，戊戌年間未能成為劉晶顧問嘅伊藤博文，去咗朝鮮做「統監」，隨意廢立皇帝，同年簽訂《日韓新協約》，白紙黑字，最高權力歸於「統監」，朝鮮王朝名存實亡。從此以後，朝鮮只不過係日本嘅殖民地。兩年後韓國人安重根，喺哈爾濱行刺伊藤博文，乜仇都報曬。

「合邦」，其實就係日本人唔想用武力吞拼你大清國，日俄戰爭後，日本攞唔到任何戰爭賠款，純計場仗，日本經濟上輸凸，但係趕走俄國人後，日本確立咗自己喺滿洲東三省一帶勢力，喺日本人心目中，依啲土地已經係佢哋嘅，之後嘅滿洲國，就係咁樣出現。

馬基維利主義者豆斗心知肚明日本人啲衰嘢，日俄戰爭之後，佢亦都想用相同嘅辦法拉攏其他國家，抑壓日本人。佢曾經攏絡過德國人，但係希特拉只會更凶險，最後佢選擇拉攏同日本有世仇嘅美國，抑壓當時氣燄冲天嘅日本帝國，因為美國似乎係對清帝國最好嘅一個西方列強，起碼冇搶地，1907底，美國仲答應退還庚子賠款（嗱！要睇清楚呀！有錢唔要啊！），而美國艦隊亦駛入太平洋，開始干預遠東局勢。

當時豆斗派出特使到美國試探進一步關係嘅可能性，可惜美國人實在冇可能為清帝國而抗衡日本，果然日本人快佢一步，嗱嗱臨同美國簽訂協議，日本承認美國佔領夏威夷同菲律賓，而美國則默認日本喺滿洲嘅勢力。日本人從來唔鍾意美國佬，二次世界大戰，日本第一嘢就打夏威夷嘅珍珠港，之後仲佔領埋菲律賓添，哈哈。

日本從來冇放棄過侵略清國，當1906年慈禧太后籌備君主立憲嘅時候，日本人進一步加強動作，喺佢哋心目中（伊藤博文同犬養毅），合邦仍然有得玩，只要光緒帝條戇鳩仔一日未死，一切仲有可能。

1907年冬天，發生咗一件小事，話說有一日豆斗坐轎由頤和園去西苑，冰雨路滑，發生交通意外，轎伕跌倒，豆斗被拋出轎外，當時嘅豆斗已經係一個72歲嘅老人，大家都知道，老人家跌一跌，真係會好撚大鑊……

實際上亦都好撚大鑊。

#常威 #大清亡國關慈禧蛋牛治  #慈禧太后 #晚清歷史 #辛亥革命

:^(

【常威近代史】第二部《中國一百年前的第一次改革開放》電子書
https://play.google.com/store/books/details?id=_6KMDwAAQBAJ

:^(

【常威近代史】第一部《大清亡國關慈禧蛋牛治》電子書
https://play.google.com/store/books/details?id=C3hjDwAAQBAJ

:^(

【常威近代史】第一部《大清亡國關慈禧蛋牛治》實體購買
https://www.382now.com/product?id=87

常公子 2019-3-30 11:03:22 【110回：大清亡國關 #從來未發生 蛋牛治】

😚將一啲從來未發生過嘅嘢，當成歷史寫出嚟，係中國人做歷史嘅獨家專利。特別係響1911年辛亥革命之後中國近代史，到處都係老作，到處都有偏頗，就算真係發生過，後世做歷史嘅國民黨人共產黨人加鹽加醋加加減減，都會變咗另一件事。最佳嘅例子在所謂軍閥時代，今時今日大家都覺得成班各地稱皇嘅軍閥都係壞蛋（大帥哥），成班軍閥都有佢哋固定嘅邪惡形象，最佳例子莫過於民國初年處理廣東事務嘅陳炯明（1878-1933）。

😄陳先生曾經參與黃花崗72烈士嘅廣州起義，根正苗紅，革命後成為廣東省長，佢處理廣東嘅年代，將廣州市全面現代化，整個廣東省商業發達欣欣向榮，佢係無政府主義者，主張聯省自治（即係等於現今美國嘅聯邦制）。

😔但之後喺北方撈唔掂嘅孫文嚟到廣州，陳炯明曾經想驅逐佢，但最後孫文同蔣介石聯手、加埋蘇聯背後支持推翻咗陳炯明嘅軍統。將黨政合一呢個咁重要嘅概念帶比中國人同廣東人，從此之後廣州成為孫文蔣先生北伐嘅革命基地，亦成為聯俄容共嘅起點。陳炯明最後著草去香港安渡餘生。佢響廣東歷史上嘅貢獻亦都被人全部抹走，再冇人記起佢。

😄所以打埋開口牌，各位上我條youtube channel睇片，唔該同我睇吓啲廣告，或者click入去兜個圈，畀我賺多少少廣告費，畀啲甜頭我同阿潮繼續經營一條全球廣東話近代史粵語頻道！多謝大家！

♎【#常公子近代史】語音導航！請大家幫手「#訂閱」我條常公子YoutubeChannel！同埋介紹多啲人睇睇！好快！好快！衝上2000訂戶！

🍳http://yt1.piee.pw/FHV5W

🍳https://youtu.be/fxrSgJ_7Ito

【常威近代史】第二部《中國一百年前第一次開放改革》
https://play.google.com/store/books/details?id=_6KMDwAAQBAJ

【常威近代史】第一部《大清亡國關慈禧蛋牛治》
https://play.google.com/store/books/details?id=C3hjDwAAQBAJ

【常威近代史】第一部《大清亡國關慈禧蛋牛治》實體購買
https://www.382now.com/product?id=87

突發性交易 2019-3-30 15:56:48

:^(

常公子 2019-3-31 00:00:55

【常威中史】慈禧平反系列（一百八十六回）

豆斗慈禧一直係一個頭腦非常靈活、身體非常健康嘅老友記，但係從1908年開始，佢跌一跌後，身體狀況就不斷向下滑，佢打得贏所有人，就打唔贏個天。

踏入1908年，大清國內經濟欣欣向榮，君主立憲時間表出咗，1916年就有國會選舉誕生，冇人知如果慈禧捱多幾年，清帝國會變成點？個天真係有啲玩謝中國人，我有陣時諗，如果毛澤東早死十年，就應該冇文化大革命十年浩劫。

豆斗在世嘅最後日子，仍然努力捍衛清帝國主權，佢最大嘅敵人係鬼鬼鼠鼠嘅日本仔。之前已經講過，日本人早已經大力滲透清帝國，除咗收編傳媒玩意識形態，佢哋仲收賣咗唔小統治階層裡面嘅重要人物，其中一個叫岑春煊（1861-1933）。1901年豆斗西逃之時，岑春煊護駕有功，帶兵保護豆斗，於是得到豆斗信任留響北京辦事。岑春煊係一個正直嘅官員ICAC，經常彈劾貪官，當時嘅人送佢一個綽號，叫「官屠」，與「錢屠」張之洞、「士屠」袁世凱並稱「清末三屠」。

顧名思義，張之洞就對付有錢佬，袁世凱就負責對付革命黨人，分工都好清楚。

但之後，豆斗發現岑春煊同日本人眉來眼去，而且仲發現佢同康有為、梁啟超、犬養毅秘密通信。豆斗對佢嘅處置方法，亦都非常咁善良，只係將佢調出權力核心北京，仲畀個兩廣總督佢做。大家千萬唔好以為豆斗係個心狠手辣嘅女人，佢要殺一個人係逼不得以先殺，可以唔殺就儘量唔殺。論殺人率，同之後民國中共嘅當權者相比，豆斗尾燈都見唔到……

其時，豆斗亦改組大清最高權力核心軍機處，佢解除咗林紹年（1845-1916）嘅軍機大臣職務，因為林紹年係岑春煊保薦嘅，踏上君主立憲程序嘅新軍機處，主要由三位新任開明派軍機大臣處理，佢哋就係張之洞、袁世凱同載灃。之前已經講過，豆斗調張之洞同袁世凱入北京，其實係明升暗降嘅安排。

喺大清貴族階層裡面，日本嘅主要代理人係肅親王善耆（1866-1922），佢係中國警察制度嘅締造者，佢本身係個改革派開明牌，而且非常能幹，唔係一般只係識得食大煙玩女人嘅滿蒙大食懶。佢創立清帝國警察部隊嘅時候，有個顧問叫川島浪速。善耆仲將佢第14個女契咗比川島浪速做養女，呢個BB就係之後人人都識嘅川島芳子（1907-1948），大家都知道，川島芳子係漢奸，1948年佢畀國民政府以漢奸罪名响北京槍決。

睇返件事都好奇怪，川島芳子明明細細個已經係畀一個日本人養大，仲改埋日本名，佢成世人都係認為自己係日本人，咁，身為一個日本人替日本帝國做事其實又好正常，最後被打靶，都應該係以一個「戰犯」嘅身份被定罪and打靶，冇理由係一個「漢奸」。仲有死還死，死咗之後國民政府仲要將佢曝屍街上，供民眾欣賞同吐口水。仲有一點要提，川島芳子論血統都只係一個滿洲人，之後去滿洲國做嘢，佢從來冇認同過蔣介石嘅國民政府合法性，你夾硬話佢係漢奸，係中國人，其實就完全冇理據。不過我咁評論都係多嚿魚，喺中國人嘅世界，從來唔需要講理據嘅。

川島芳子被打靶火化後，骨灰一半葬於北京，另一半被日本僧人古川大航送回日本。連骨灰都要分開兩邊擺，你話身份認同嘅嘢，有時候幾重要呢？

講返肅親王善耆，當豆斗知道佢係日本嘅代理人，就即刻解除咗佢北京警察大佬嘅職務，改由袁世凱接手，但善耆並冇離開北京，唔玩警察局玩消防局，之後佢更加秘密串連日本人，趁住慈禧就快釘蓋，密謀營救光緒玩復辟……

衹要劉晶掌權，就可以合邦鳥........

下次繼續……

#常威 #大清亡國關慈禧蛋牛治  #慈禧太后 #晚清歷史 #辛亥革命

:^(

【常威近代史】第二部《中國一百年前的第一次改革開放》電子書
https://play.google.com/store/books/details?id=_6KMDwAAQBAJ

:^(

【常威近代史】第一部《大清亡國關慈禧蛋牛治》電子書
https://play.google.com/store/books/details?id=C3hjDwAAQBAJ

:^(

【常威近代史】第一部《大清亡國關慈禧蛋牛治》實體購買
https://www.382now.com/product?id=87

常公子 2019-4-1 22:49:30

【常威中史】慈禧平反系列（一百八十七回）

善耆係第十代肅親王，即係富十代（富二代富三代可以慳啲），但基本上唔係一個衰人，仲係一個大好人。其實如果你有機會識啲有錢人（真係有錢嗰啲（過億），唔係得一兩層太古康怡收租也文也武嗰隻暴發戶），你會發覺佢哋其實好好人，好Nice，好有修養，好有禮貌，冇他嘅，唔使憂，冇嘢好爭，生活冇乜憂愁，好食好住，個個人都會變好人，做衰人做賤人，其實都係一個窮字，男盜女娼，由窮出發，有錢嘅男人唔會做賊，有錢嘅女人亦唔駛做雞。

我識得有人以為會有女人為興趣做雞？條友一廂情願谷精上腦，唔通有男人會為興趣做賊，傻的嗎？

呢啲事中西方都屬常見，最近睇Netflix越戰紀錄片《越南戰爭》，當1966年越南戰事升級，詹森總統（Lyndon Baines Johnson，1908-1973）決定大力增兵到越南（20萬），軍方要招募大量年青人加入軍隊，為咗補充新血送去被越共屠宰，聯邦政府開始響大學裡面募兵，個節目講，當時美國政府都係向貧苦大眾就讀嘅一般社區大學、仲要向成績差嗰批學生埋手，當中拉丁裔同黑人就係主要嘅招募對象，有錢人同白人只佔少數，當時如果你有錢，就算服兵役，都唔使去越南嘅，相反去越南前線送死掘地雷嘅其實都係貧苦大眾勞工階層有色人種嘅仔女，世界係公平嘅咩？Bull你個Shit喇！

講返富十代肅親王善耆，佢歷任崇文門稅監、步軍統領、民政部尚書。佢最出名嘅事蹟，就係1908年宣統初年，親自審訊密謀刺行監國攝政王載灃、後來比蔣介石抹黑成為中國史上最大漢奸嘅汪兆銘，即係中華第一美男汪精衛，之後善耆欣賞汪精衛嘅愛國心，唔使佢人頭落地，其間仲默許汪精衛條女陳璧君探監，咁仲唔係好人？你試吓今日有人行刺習近平同李克強，我諗大家都冇機會響法庭見到佢個樣，佢已經被人間蒸發……

上回講過，善耆唔搞警察局搞消防局，其實佢都有一個諗法，佢曾經話畀個friend知，佢隊北京消防隊，其實係一支正式操練嘅小型軍隊，係諗住當豆斗差唔多嘅時候，借住救火為名，衝入瀛臺，擁護光緒帝復辟，劉晶呢條絕世Kai子，真係有好多人爭住要。

仲有一件事同大家講吓，1907年底，專搞小動作嘅日本送咗隻火輪（蒸汽船）畀豆斗，話等德高望重嘅豆斗可以響頤和園昆明湖遊吓船河咁話，如果大家今日去頤和園，都會見一隻石製嘅輪船泊喺湖邊，我諗就係隻火輪嘅重鑄模型。當年，慈禧太后冇辦法拒絕日本政府嘅一番「好意」，結果日本工程師技術員就進駐頤和園，全面考察昆明湖通往京城高粱河嘅距離，計吓水深、闊度同清除障礙物。火輪喺日本完成，部件於1908年5月底送往頤和園組裝，日本人仲請豆斗同隻船名命，豆斗叫佢做「永和」號。永和號上全部係日本船員，醒目嘅豆斗梗係推三推四，從來未上過船一次，有啲嘢，畫公仔唔使畫出腸嘅，大家心知肚明。

但明眼人都睇得出，呢單嘢又有陰謀，日本人遲唔送早唔送，等豆斗大病、就快歸西先送，擺到明係派間諜出入頤和園，選擇適當時候，第一時間知道豆斗幾時死，就第一時間聯合善耆等人，推返劉晶出嚟玩合邦。所以睇返歷史你就會知道，劉晶並唔係真正一個真Kai，佢其實一直有秘密聯絡佢嘅黨人，等待大姨媽到位佢就復出，可惜佢嘅政治對手係慈禧太后，佢最後都冇呢個機會斷送大清江山比日本。

豆斗真係就快死，我哋下次繼續。

#常威 #大清亡國關慈禧蛋牛治  #慈禧太后 #晚清歷史 #辛亥革命

:^(

【常威近代史】第二部《中國一百年前的第一次改革開放》電子書
https://play.google.com/store/books/details?id=_6KMDwAAQBAJ

:^(

【常威近代史】第一部《大清亡國關慈禧蛋牛治》電子書
https://play.google.com/store/books/details?id=C3hjDwAAQBAJ

:^(

【常威近代史】第一部《大清亡國關慈禧蛋牛治》實體購買
https://www.382now.com/product?id=87

常公子 2019-4-2 10:49:39 【111回：大清亡國關 #雨天 蛋牛治】

😚整場戊戌政變，慈禧太后完全係被動者。一切都係光緒帝燈蛾撲火，自取滅亡，與人無尤。由一開始北京大裁員禮部人事大地震，即「六堂官事件」；再不斷加新人入自已陣型，然後前後兩次向豆斗提出召開「懋勤殿」，另立中央建議；喺慈禧太后心目中，係前後兩次對佢赤裸裸嘅奪權。第一次推咗你已經唔同你計，你仲要嚟第二次，咁就真係冇辦法。

😃好多人認為百日維新係中國現代化改革嘅重要里程碑，但係我話畀大家知其實百日維新祇不過係一場宮廷政變；同60年代中國發生嘅文化大革命一樣，只係一場宮廷政變權力鬥爭。想奪權嘅人係光緒皇帝，搞事嘅人亦係佢，出賣國家嘅人亦係佢。到咗最後黑臉白臉調轉咗，捍衛大清帝國利益嘅慈禧太后變咗大奸角，反而一心要賣大清嘅光緒帝就流芳百世，真係打波先嚟落雨，冇計。

😄近一兩年好少聽人講政治，社會風氣又變咗。林鄭月娥上臺之後真係有辦法，技術官僚就有技術官員嘅好處。如無意外，下一任嘅特首張建宗（我估）都會沿用同一條管理路線，大家講少句，凡事和稀泥，引頸待斃，大限將臨，有本事就走，冇本事就留低，就係咁簡單。不過又可以走得去邊？世界好大，但其實又好細。早十幾年前有人同我講，移民英國好正；十年前又有人同我講，攞綠卡做美國人冇得頂；幾年前有人同我講，移民臺灣都係一個唔錯嘅選擇；我仲記得有人同我講過，與世無爭嘅人間樂土係新西蘭……

😄打埋開口牌，各位上我條youtube channel睇片，唔該同我睇吓啲廣告，或者click入去兜個圈，畀我賺多少少廣告費，畀啲甜頭我同阿潮繼續經營一條全球廣東話近代史粵語頻道！多謝大家！

♎【#常公子近代史】語音導航！請大家幫手「#訂閱」我條常公子YoutubeChannel！同埋介紹多啲人睇睇！好快！好快！衝上2000訂戶！

🍳http://yt1.piee.pw/FR52J

🍳https://youtu.be/OEhUcqhyW8w

【常威近代史】第二部《中國一百年前第一次開放改革》
https://play.google.com/store/books/details?id=_6KMDwAAQBAJ

【常威近代史】第一部《大清亡國關慈禧蛋牛治》
https://play.google.com/store/books/details?id=C3hjDwAAQBAJ

【常威近代史】第一部《大清亡國關慈禧蛋牛治》實體購買
https://www.382now.com/product?id=87

常公子 2019-4-3 11:25:58

【常威中史】慈禧平反系列（一百八十八回）

馬基維利主義者慈禧太后一生以捍衛滿清貴族同埋愛新覺羅家族皇權為己任，從來未有動搖過半分，身為滿洲鑲藍旗出身嘅葉赫那拉氏豆斗，從來未做過騎牆草，佢做嘅每一件事，都係不斷維護住愛新覺羅家族與及所有滿蒙貴族嘅利益，以及延續緊佢哋脆弱嘅生命。豆斗嘅性格同林鄭月娥都好似，林鄭作為一個高級公務員，其實努力捍衛緊老細嘅利益，當然佢老細唔係香港人亦唔係特區政府，係中央。至於佢份糧係香港納稅人俾嘅，又係另一回事。

你屌林鄭，冇理據嘅，搵得你做香港特首，第一樣嘢就係要忠心，宣誓效忠中華人民共和國，就要從一而終，至死不渝。一百年前豆斗都一樣，1905年後，佢積極培養佢嘅接班人軍機大臣載灃（1883-1951）承繼佢嘅政治遺產，載澧係開明派，年紀好輕，辦事能力一般，但係佢勝在夠忠心，忠於滿清皇族。豆斗死後，載灃個仔末代皇帝溥儀（1906-1967，中文名穆麟德，英文名Henry）承繼大統，載灃做咗攝政王，之後斷送大清江山。

之後有件事，民國期間日本人支持溥儀成立（偽）滿洲國，於是溥儀由北京紫禁城去咗滿州，戴起副溥儀眼鏡做現代滿洲國皇帝，但係當中十二年間，佢個親生老竇載灃只係去過滿州國探過佢一次，大家完全冇偈傾，明顯載灃並唔認同溥儀嘅做法，即係唔認同滿洲國嘅合法性，認為滿洲國只係日本人嘅傀儡政權，由依一點你就可以知道佢其實係一個忠於大清國嘅人。忠於一個政權，有時候唔係講吓愛國就得，身體力行先係最重要。

上集已經講過，到咗1908年中，日本方面已經響各方面蠢蠢欲動，隨時預備等豆斗歸天配合光緒帝劉晶條仆街仔復辟。七月，豆斗病情日趨嚴重，「背間忽涼忽熱，牽引臀部，兩目垂重，肢節軟倦，頭有微暈，耳有金聲」，史書冇記載佢有乜嘢病，但應該係1907年冬天跌一跌（拋出轎外）有關，豆斗嘅身體出現嚴重退化。

喺呢個時候，日本人亦都積極做嘢，佢哋響殖民地朝鮮建造碼頭，而且修建鐵路直達鴨綠江邊，仲藉口話，中朝邊境不時有反日嘅朝鮮武裝組織出現，「中國地方官對該暴徒等若怠於檢束，並萬一有煽動利用情事，在日本自不得不行適當之處置」，講到明，隨時會派兵入大清，當然係要配合北京宮廷嘅變化。

7月18號，日本「情報戰之父」福島安正（1852-1919）亦都嚟到清國國境，福島中將響日俄戰爭期間，擔任陸軍情報部門主管，熟悉清國事務同國際形勢，佢1908年入境，積極串聯清國國內同日本人有關係嘅高級官員同人物，你覺得佢想點呀？唔通咁好心同豆斗籌備白事咩？擺到明又有陰毛啦。

同一時間海外康有為嘅保皇黨亦都有所動作，佢哋加強宣傳君主立憲，籌集資金，康有為仲有打算喺慈禧死後返去清國，扶持光緒（自己做首相？），當然佢咁諗係佢自己嘅事，分分鐘又係用呢個藉口向佢嘅南洋華橋金主籌款掠水。

7月24號，係劉晶37歲生日，佢嘅身體狀態亦好唔得豆斗幾多，條友仔身體不嬲都好虛好弱，軟禁咗成九年，期間豆斗有冇同佢落藥冇人知道，但係三十七歲嘅佢肯定唔係一個正常男人體魄。生日前後，就傳出佢亦都患有重病，全國各地名醫被召集入京，同佢睇醫生，有啲嘢，大家應該心知肚明。

好地地突然之間死，就一定係落毒。但係你話畀人知佢都病咗一排，咁忽然之間暴斃，就情有可原。

下次繼續……

#常威 #大清亡國關慈禧蛋牛治  #慈禧太后 #晚清歷史 #辛亥革命

:^(

【常威近代史】第二部《中國一百年前的第一次改革開放》電子書
https://play.google.com/store/books/details?id=_6KMDwAAQBAJ

:^(

【常威近代史】第一部《大清亡國關慈禧蛋牛治》電子書
https://play.google.com/store/books/details?id=C3hjDwAAQBAJ

:^(

【常威近代史】第一部《大清亡國關慈禧蛋牛治》實體購買
https://www.382now.com/product?id=87

私補化學 2019-4-3 11:29:17 此回覆已被刪除

常公子 2019-4-3 11:43:51 有撚資格麼……

鈴華優子 2019-4-3 18:10:01 唔係用錢穆史觀答題肥撚硬啦