正所謂「風水佬呃你十年八載」，蘇民峰今年股市預測倒是有幾成準，本料11月見底，勢成「先跌後升」，持有10個鋪位物業的他自言是個較為保守的投資者，早於去年年尾將半個倉變現轉定期，現持有收息股領展（823），低位吸納美麗華酒店（071），預計樓價今明兩年稍跌，他又稱香港地運在2024年一轉，2021年最好賣資產，如目前買唔到樓，可等2024年。

蘇民峰批香港股、樓、經濟於2016年起是上行周期，至2021年見頂，樓市開始今年呈現跌勢，他料明年難有起色，但總5年埋單計算仍會有升，故這兩年不會大跌，惟「豬年都賺唔到大錢」。堪輿部分取材統計學，他道多年前幫期交所看風水，暗自躊躇不諳股市投資要點睇，對方將多年的股市走勢圖放在他面前，他計算了一次，發現單數年份先升後跌，雙數則調轉，之後建立這套理論，他道十年有七年準。

蘇民峰指出，地運每20年轉一次，過去地運轉變交界年份，包括1984年、2004年，下一次轉運是2024年，屆時北區當旺，但目前不宜買北區樓，因為樓市將會下跌。他續稱，目前講咩地運都無用，因為2004至2024年旺西南區，一個地運去到十年就見頂，所以2014年已見頂，2014年後買乜都無用，全世界都貴。

他續稱，樓價一定會跌一轉，睇下1984年、2004年樓價幾衰，衰到無人要，2024年是下一個地運的交界，所以2021年個時會否考慮沽少少貨呢，「我係計到2024年如果衰點算，所以2021年攞錢呀!(而家買唔到樓點算?)等2024年囉，實有循環，唔會一路咁升，經濟、社會都有循環。香港同大陸都係，地運行到2024年，2024年回啦，經濟發展無咁快，樓價自然無升得咁快。但香港大跌機會難，因為香港等於美國紐約，周圍跌紐約唔跌，因為每人都想係紐約買層樓，度假都好。香港的情況就似美國，咁多內地富豪，一個省一個巴仙買來(香港樓)度假，跌唔落啦!」

蘇民峰本料股市去年11月見頂，當時沽了一半倉轉至銀行做定期，「都唔知原來有兩厘息」，現時還持有領展收息，今年於藍籌中算是表現理想，本年至今微升1.2%，跑贏恒指今年跌近3,800點。另外看中的美麗華，每逢價位見回就買入，他指情有獨鍾的原因是該股持有大量現金，該股現時市值93億元，截至6月銀行存款則有47億元，「一係買野（收購）、一係派特別股息」，雖然逢跌必入，但成交疏落，「唔係想買就買到」，另外較為實際的理據是，「每日去食飯見到越做越好」，相信業務可帶動業績，不然則收息「鬥長命」。

他稱9成半的人2017年賺錢，2018年則大部分人也蝕，整個倉看，他今年蝕了5%，仍算是贏大市，明年則「五行平均」，只有火略勝一籌，即與電相關的行業較為理想，包括電動車公司比亞迪（1211），他指明年屬於較為難看透的年份，不會有大錢賺。

2024年轉地運，香港及中國屆時將會經濟都會向下，蘇民峰稱這種情況每逢約20年出現一次，2003年沙士、1983年草擬中英聯合聲明，但他又指港人不需過分擔心，香港「好似紐約、倫敦」，過往累積一定資本，意思是跌極也有個譜。