Ads
55.
「嘩!正啊!」阿文打開房入面既雪櫃,見到有一大堆汽水,即刻開咗罐飲起上黎。
阿恆扶我地梳化度訓底之後,都去雪櫃度拎咗罐芬達,不過唔係拎黎飲,而係行埋黎放喺我額頭上面幫我降溫。
「Don,其實呢度都幾好丫,有水有電有野食又安全,不如我地接哂Auntie佢地過黎呢邊長住啦。」呢個阿文,好似真係已經當張叔張嬸死咗咁。
「我地出唔出到去都仲係未知之數。」我瞇埋眼講。
郭江龍、娜姐、皓榮、阿虎、阿力、仲有個醫生,再加埋觀眾席上面嗰二十幾個人,話唔定泳池周邊仲有安排人手巡邏,呢度好有可能有成四五十人。
如果佢地真係咩危險人物,就真係有十個我都未必走得甩。
「Don,不如我地唔好呃佢地啦,好地地做咩要呃人呢?」阿文擔咗張凳坐喺我隔離。
「你呃人,最多可能傷吓和氣,你唔呃,到時真係出咗啲咩事,可能連命都冇。」
「你講到佢地好似殺人犯咁,佢地地明明就好好人。咩都冇問過就俾我地入黎,個個都笑容滿面幾鬼nice啊,呢度有幾十個人,一個都未走過啊,證明有幾值得留喺度,話唔定呢度就係重建文明社會既第一步!」阿文講到對眼發哂光,好似準備起革命咁認真。
「你覺得要點先可以喺四日之內召集到幾十個人?」
「嗯……」阿文嘗試思考。
「我地呢四日入面,淨係遇到湯豪、阿恆、晞儀同家明四個活人,佢定竟然可以召集到十倍既人,仲要全部都黎到沙田呢度,你唔覺得奇怪架咩?」我刻意忽略已經死咗既林生同埋發叔,為免阿文再次病發。
「嗯…咁話唔定佢地一開頭就幾十個人一齊行動呢!」
阿文呢個講法其實已經同阿榮講既有好多〝新居民〞相違背,不過我選擇繼續回話,引導阿文思考,畢竟最容易說服一個人既方法,就係令佢地自己說服自己。
「咁你覺得,通常咩情況下,先會幾十個人一齊行動?」
「學生放學?」阿文舉手回答。
「佢地點睇都唔似學生下嘛…?」我翻一翻白眼,泳池入面既每個人都起碼廿幾三十歲,甚至令我不禁懷疑阿恆係咪唯一倖存既青少年。
「啊啊啊我知啦!黑社會劈友!」阿文終於回答出我想要既答案。
「咁你而家仲覺唔覺得佢地nice?」
「嘩,你咁樣係歧視喎!黑社會都未必衰架啫。」阿文打咗我一下。
冇錯,黑社會都可以係好人。
但係刻意隱瞞事實既黑社會,就好極有限。
任何事情只要太理所當然,就意昧住一定有野被隱藏起來。
咯咯咯——
傳來一陣敲門聲。
「阿文,到你啦!」皓榮打開門,伸咗個頭入黎。
「冇問題!咦,家明呢?」阿文好快就行咗出去。
「佢去咗陪晞儀,我地行啦。」皓榮講完就順手栓埋咗度門。
阿文走咗之後,阿恆就行咗埋黎我身邊,坐喺地下,眼金金咁望住訓喺梳化既我,瞇埋眼都感受到佢既視線。
「係咪好靚仔呢?」佢望咗十幾秒之後我就忍唔住。
「等緊你同我講下一步要做啲咩啊。」阿恆笑咗一聲,然後好認真咁講。
「等。」
「吓?」阿恆聽唔明,但係好似好好奇。
「朝早既狀況我地已經觀察過,而家,就要等夜晚,佢地一定會露出馬腳。」
「好!」阿恆一向都好敬重我,聽教聽話,如果真係有個咁既細佬都幾好。
「不過有樣野要你幫手。」我講完之後阿恆點一點頭,等我下達指令。
「我估佢地會安排我最後一個先去見個醫生,所以等陣皓榮帶你出去,見完醫生之後,你就話你肚痛要去廁所,然後幫我觀察吓呢度既環境,有幾仔細得幾仔細,記得唔好俾人發現。」因為我地頭先入黎既時候,只有見到皓榮介紹既地方,其實仲有大概半個泳池既地方我地都未去過,要熟悉地形,萬一有咩事先走得切,阿恆身手敏捷,最啱去探路。
阿恆聽完之後點點頭,講咗聲okay。
之後,我就同阿恆傾起計上黎,講吓各自既家庭,講吓我喺澳洲遇到既奇聞奇事,講吓十年前同而家中學生活既差別。
咯咯咯——
阿恆,到你啦。
留名對一次睇已經係16章到 仲以為會爛尾冇得睇 :^(
but我自己幾中意泳茹 感覺幾真實 :^(
其實呢隻故我舊年暑假就開始寫
嗰陣post係舊登冇乜人睇
開始覺得呢隻故其實冇咩意思 唔係咁好睇 個人又好頹
所以寫到16就冇寫落去
到今年暑假又無啦啦有諗法
就決定寫完佢
希望我地可以一齊迎接一個唔爛既尾 :^( :^(
Ads
Ads
即刻出俾你地