賈覓 2017-8-8 16:19:06 長篇故，覺得唔錯請輕輕一推。
歡迎留言指教。

:^(

Obscura 2017-8-8 16:19:38

:^(

賈覓 2017-8-8 16:21:57 1.

當年中學畢業，阿媽一點頭，我諗都唔諗，就飛咗過澳洲。

話就話係去讀書，但係嗰陣我真係好想趁自己未洗出黎搵錢，好好咁睇下呢個世界。

好快，三年就過去，我讀完個學位之後，跟住個Professor做咗幾個研究，佢好賞識我，於是介紹咗我去一間細菌培育中心度做，一做就做左五年。後來，因為一個特別既原因，我辭咗職。

咁就十年，我始終都係想番番黎香港，好好生活。

除咗當年大學畢業，成家人飛哂過黎參加畢業典禮之外，我好似都好耐冇見過佢地。
我呢幾年都冇番過黎，係因為我有我既忙碌，屋企人又有佢地既生活，所以番黎一陣真係冇咩意思。

咁耐冇番過黎，我決定俾屋企人一個驚喜，所以我淨係聯絡咗我個老死——阿文，佢一聽到我要番黎，就話要接機。

---------------------------------------------------------------------

「一個常餐A跟凍咖啡丫唔該，阿Don你食咩啊？」阿文未坐低就已經嗌到野食，好似成日黎呢間茶餐廳咁。

「呃…我要一杯熱奶茶得啦，唔該。」

「喂，你個死仔咁耐都冇番黎，係澳洲嗰邊搞咩啊？前幾年你明明同我講話辭職格，講完你就人間蒸發，完全搵你唔到喎，唔講真係以為你死鬼咗啊。」阿文一樣都仲係咁滔滔不絕。

「冇啊，後尾我識左個植物學家，跟佢學左兩年野。」呢個又係另一個故事。

「咁你都講聲丫嘛，你知唔知啊，呢幾年啲同學會冇你磅住我，個個都當我透明啊，又次次都食埋哂啲貴夾唔飽既野喎……」阿文佢有佢講，我有我嘆番杯熱奶茶。

「啊!!!!!!!」耳邊突然傳來一聲尖叫。

一名穿著純白短裙既女子，企係阿文身後，微微彎腰輕撫自己吹彈可破既大腿，可以隱若看出大腿上有一道淺薄既血痕。

「喂!咩事!」阿文一臉慌張，成個彈左一彈，好明顯係俾岩岩個聲尖叫嚇親。

「阿先生，你個喼界親我啊，好心就唔好擺咁出啦，條路你架咩！好鬼痛啊！」白衣女子係咁摸自己大脾。

「唔好意思啊，sorry，sorry，喂阿Don你有冇紙巾啊……」阿文轉頭向我求救。

「我自己有啊唔洗你咁好心……啊!!!!!!!」又一聲尖叫。

阿文掩一掩耳，露出一個好痛苦既表情。

「又咩事呢小姐？」

「你睇下你個喼丫，生鏽架！咦!!!!都唔知會唔會有愛滋架！唉呀！我要報警啊！」

生鏽？我個喼膠架喎！
話哂我個喼俾人討論左咁耐，我唔企起身睇下又好似唔係好負責任咁。

我起身行埋個喼度仔細望左望。
咦？我個喼幾時穿左個隆架？
有一塊碎金屬片係拉鍊個布位度捅左出黎，但係真係好細塊，唔仔細睇真係睇唔出上面有少少鏽跡。

「報咩警啊，好小事姐，痴塊膠布咪得囉……」阿文細細聲咁講。

「咩好小事啊！毀容啊而家！唔報警都得…賠錢丫！」白衣女子突然企到直一直，瞪大雙眼，攤大手板。

「毀容？你塊面生係隻大脾度架？我…我冇錢架喎…」阿文到而家咁大個人都仲係炒緊散，請我食茶記已經算好叻仔。

「小姐，唔好意思，其實個喼就我既，呢度有三千蚊，應該夠你去睇醫生架啦，就咁算啦好嗎。」我係銀包度拎出三千蚊，面帶微笑地交給白衣女子。

「咩啊，三千蚊就想打發我啊？」白衣女子向後退左退，拿拿聲將三千蚊收落袋。

「拿，一係咁啦，呢張係我既卡片，有咩事你再打俾我。」微笑依舊。

「侯永棟，好，一定打俾你。」白衣女子快步離開。

「拉埋啲個喼先，好彩你係度咋阿Don。」阿文笑到四萬咁口。

「食野啦，咁多野講。」我將熱奶茶一飲而盡。呢個時候，水吧個邊傳來一道熟悉既嘟嘟嘟嘟嘟嘟聲。

「特別新聞報導，岩岩收到消息，
一名係香港國際機場任職既地勤人員，
於工作期間突然發狂，襲擊四周既行人，
多名市民及海關人員被咬傷。
現場警員多次向天開槍示警，
該名地勤人員屢勸不聽，
最終由一名警員連開五槍將其壓制。
警方表示，現時場面已受控制，
受傷市民亦已送往醫院作進一步治療，大家無須驚慌。
呢一節特別新聞報導完畢。」

賈覓 2017-8-8 16:24:00 2.

「嘩，你睇下，而家香港人工作壓力幾大啊，做野做到發癲咬人喎。
我就話，做人最緊要開開心心，有餐飯落肚咪得囉，諗咁多做乜丫。」阿文將最後一啖多士擺落口。

其實阿文講得好岩，我曾經問過自己，做野夠究為左乜，爭取究竟為左乜。
可能到我儲夠錢買棟樓俾阿媽收租既時候，我就會知道答案。

同阿文傾多左陣之後，我就call左部的士番酒店。

我知道我去左澳洲冇幾耐，細佬就帶左佢女朋友番屋企住，完美咁霸佔左我地兩兄弟以前間房，所以為免尷尬，我決定住酒店。

「侯先生，923號房，呢邊。」

一入到房，我隨即訓落潔白既雙人床上，深深地吸左一口氣。

雖然香港空氣質素真係好差，但係始終有一股熟悉既味道。

休息左一陣，我坐番起身，諗住拎衫沖涼既時候，又望到拉鍊附近個細隆。

我個喼入面應該得幾套衫，兩本書，冇理由有金屬。

應該係機場啲人太暴力，亂掟我個喼，俾其他野整穿。

我拉開拉鍊，打開個喼，拎起左面頭件白色T-shirt。

「喀呤——」數塊金屬碎片掉落。

嗯？點解會有金屬既？其中一細片上面刻住PD-251，係我地實驗室特制既培養皿編號。
唔通係博士偷偷地放落個喼度，想俾我留為紀念？
但係又冇理由丫，呢隻培養皿以鋁合金特制而成，仲要用件衫包住，冇理由咁易碎……

「鈴鈴鈴鈴鈴—————」呢個時候，電話突然響起。

「喂？」

「喂？係咪阿Don啊？你到左酒店啦？」又係阿文……

「到左啦。」

「唔係叫你到左要打電話俾我咩？」

「唉，我又唔係細路仔。」

「間房係咪好靚呢，佢個浴室好犀利架，可以較時間，時間一到就會自動放水。跟住呢，仲有五星級自助早餐，樓下又有泳池喎，係咪好正呢。」

「聽落唔錯，唔該哂你。」間房係阿文幫我訂既。

「咁唔阻你休息啦，我有事會再打俾你架啦，byebye。」除左長氣左少少之外，阿文真係一個好好既朋友。

話時話，有鏽跡個塊唔見左既？

「鈴鈴鈴鈴鈴—————」電話又再響起，唉奪命追魂Call。

「點啊，文哥仔，又有咩指教啊。」

「咩咩哥仔啊，你講咩啊。」話筒既另一頭，傳黎一陣尖銳既女聲。

「啊…唔好意思，請問小姐有咩事呢？」

「係咪侯永棟啊…我係今日茶餐廳個女仔啊…」唔知點解，硬係覺得把聲聽落冇今朝咁霸氣，好似有啲虛弱。

「係，我係，小姐你點啊，隻腳好番未呢？」

「緊係未啦……我而家又發熱又發冷咁……個頭…仲好痛…」

「咁嚴重？小姐你有冇睇醫生啊，係咪凍親啊？」冇理由丫，佢今朝明明仲龍精虎猛。

「睇就睇左架啦…我話你聽啊…三千蚊…就…一定唔夠…唔該你入多二千…落我個…戶口…」白衣小姐把聲好似越黎越冇力。

「小姐，你聽落好似唔太ok喎，你住邊啊，不如我幫你call白車先啦。」

「唔…唔…唔洗…我媽咪俾左藥我食…你…快啲俾錢…」

「好好好，咁小姐你講低你戶口number，講完就快啲休息。」

「你係入先好…055…6…3…7…啊…啊…呃…」佢開始發出一啲低沉既怪聲。咁大個人仲玩啲咁既野？

「小姐，你講清楚啲，055637跟住咩話？」

「咚！啊…呃…啊…」一聲巨響之後，佢發出既怪聲感覺越黎越遠。

「啊…啊…啊！阿女，你做咩啊！唔好啊！好痛啊！啊！救命啊！」伴隨住怪聲既係另一把尖叫聲。

「小姐小姐，你做咩啊？發生咩事啊？洗唔洗幫你報警啊？」係電話呢邊既我都緊張埋一份。

「啊…呃…噁……」

尖叫聲漸漸消失，取而代之既好似係，兩把怪聲……

日日上高登 2017-8-8 16:38:09 之前好似睇過.....但爛尾

:^(

賈覓 2017-8-8 16:40:48

之前好似睇過.....但爛尾

:^(

係未寫完姐

:^(

賈覓 2017-8-8 16:42:24 3.

我喂多左幾聲，都冇人應，我就收左線。

放低個電話既時候，我發現我對手係度震緊。

雖然唔係話好靚，但係點解一個正正常常既女仔，可以發出野獸般既低鳴？

唔通真係燒壞腦？一定係一定係。
但係點解，股不安感咁強烈？
啊！時差！一定係因為時差！
沖個涼，訓個教就冇事，一定係一定係。

【隔日清晨，七點】

唉，臨訓前唔記得拉番埋個窗簾。
我個人好淺眠，除左聽到少少聲就會醒之外，仲好易訓唔番。
既然都醒左，落樓下buffet嘆番個靚早餐先。

嫩滑炒蛋、烘厚多士、新鮮蘋果、熱奶茶，perfect！
享受完美早餐之際，電話突然震一震。

『起左身未？(淫笑樣)』原來係阿文send whatsapp黎，當堂打一打冷震。

『食緊早餐』

『你睇下呢個新聞 又有人發癲啦(吶喊樣)
http://hk.pineapple.backmedia.com/faketime/breaking/64742123/』

反正冇野做，打開睇下。

【壓力爆煲？】(圖)屋邨母女突發狂 苦父受傷照番工
警方今晨接報大角咀海富苑發生突發事件，
一名中年男子報案稱家中電話徹夜未有人接聽，
凌晨下班後急返家檢查，竟發現家門不但被反鎖，
更以重物從內堵塞，男子深感不妥，於是報警。
警方及消防人員到場後將木門撞開，
未料男子之妻女竟突然跳出，襲擊現場警員及消防員，
就連該名男子亦不慎被女兒咬傷。
現場消息指出，兩名女士力大無比，竟出動16名警員始將其壓制，
現時二人正被進至醫院檢查精神狀況。

報案中年男子表示︰「阿女平時好乖架，
聽老婆講話佢琴晚發燒得好嚴重，
叫佢去睇急症又唔肯睇，話睇醫生哂錢喎，
唉，都係我窮，先搞到個女咁。
(你好似都受左傷？)
小事姐，岩岩俾個女咬左一下，
唉佢一定係好辛苦，成面眼淚，唉唔講啦，
我要去番工先，如果唔係就冇錢俾佢地睇醫生架啦。
點解連老婆都病埋架……」

賈覓 2017-8-8 16:42:58 幅相……點解事主個女，咁似琴日個女仔既…?

『Don，你覺唔覺新聞入面個女仔，好似琴日個潑婦？』

『港女個個都一樣樣架啦』但係其實，我心入面唔係咁諗。

隨著甜夢消逝既不安感，又番番黎。

「鈴鈴鈴鈴鈴—————」來電顯示——媽。

「喂？」我閉上雙眼。

「……」電話另一端無比寂靜，相處左廿八年，我點會唔知咩叫暴風雨前既寧靜？

「Sorry……」道歉唔係解決問題最好既方法，但一定係免死既方法。

「Sor咩ry啊！你個死仔，你心入面仲有冇我呢個老母架下！
唔番屋企都算啦，竟然連電話都唔打個番黎！？
寧願住酒店都唔番屋企？而家屋企係咪好唔見得人啊！」嗯，八號波。

「你冷靜啲先，我諗住俾你驚喜你丫嘛。」

「驚咩喜啊！」

「我之前託個朋友幫我買你最鐘意既鳳梨酥，我諗住拎埋先番去搵你。」

「咁就差唔多，算你啦，今晚記得番黎食飯，小心啲啊。」

「知啦，今晚見。」

鳳梨酥周街都係，好彩我夠醒。
話時話，一定係個衰仔爆大鑊，打個電話俾佢先。

「喂，張立文。」
「Don？做咩嗌我全名。」
「你自己諗下你做左啲咩好事。」
「下？喔……哈哈……Auntie咁岩打電話黎叫我過去食飯喎，跟住又話好掛住你喎，咁我咪同佢分享下囉，哈哈哈……」由細到大做錯野都係笑得咁心虛。
「我唔理，你要負責，拿拿聲過黎車我入深井買燒鵝，今晚加餸。」
「收到﹗」

賈覓 2017-8-8 16:48:03 4.

阿文未到之前，我係附近行左陣諗住搵下有冇鳳梨酥。

城龍大藥房——小熊餅乾。

搵唔到鳳梨酥，買兩盒餅頂住當都好。

「老細，兩餅小熊餅乾唔該。」
「好既，哥仔買唔買把萬用刀啊？40蚊把好洗好用，剪刀、開瓶器、生果刀、螺絲批多合一，買黎旁身都好丫。」
「喔…好……」

平時我絕對唔會俾呢啲不入流既行銷動搖，但係今日，都唔知係咪未訓醒，唉。

「鈴鈴鈴鈴鈴—————」

「Don，我到左尖沙咀啦，你係邊？」
「加連威老道。」

上左車之後，阿文一邊開上西九龍公路，一邊話我俾人呃，100蚊盒餅都買。

但係我既思緒始終都係俾路面狀況所吸引。
星期三朝早九點幾，點解會咁塞車？
開左車成三十分鐘，終於經過荔枝角公園。

呢個時候，係我身邊既阿文打左個喊怒，一問之下，原來佢琴晚成晚開工冇番過屋企。

車外突然越黎越吵鬧，我抬頭一望，發現原來前方廿幾部車既司機都紛紛落哂車，好似前面有咩事發生咁。
一個著住粉紅色POLO衫既少年由駕駛座爬上車頂，似乎想睇清楚前面發生咩事。

「咦，好似有大單野喎，Don，不如出去睇下？」阿文解開安全帶。
「坐好啦你，好奇害死貓，冇聽過？開個收音機聽下好過啦。」
「又好。」
「嗞——嗞——昨日於機場突襲民眾之地勤人員經已掙脫醫護人員的壓制，曾被該名地勤人員咬傷之市民及海關人員均先後相繼發狂，瑪嘉列醫院現場相當混亂，建議民眾勿於附近聚集，盡快返家以保安全——嗞——嗞——」

瑪嘉列醫院？前面咪瑪嘉列醫院囉？咁塞車，唔通真係有事……？

「DonDonDon！你快啲睇下前面！」

我抬頭一望，只見粉紅衣少年一邊拍手叫好，我循著佢既視線望過去，見到兩個人係地下打鬥，其中一個人似乎越加虛弱，無力反擊，而另一個人好似係度……食緊佢……？

我幾乎唔敢相信我既雙眼，我竟然親眼見到一個人食緊另一個人，食人族幾時黎左香港？
更令我唔敢相信既係，個粉紅衣少年竟然係車頂度拍手叫好都唔落去幫手。

我即刻解開安全帶，打開車門。

咦？打唔開既？

「做咩啊阿文，你做咩鎖門啊，要落車救人啊。」

阿文粒聲唔出，眼定定望住前面，好用力咁咬實棚牙，用力到額頭爆滿青筋。
由細到大，只要阿文受到驚嚇，就會咁……

原來我淨係掛住望地下個兩個人，完全冇留意到身邊發狂既人越黎越多，
被咬傷既人亦越黎越多，遍地哀號。

係我發呆之際，我感覺到部車緩緩向後退，
阿文嘗試離開現場，我落車救人的想法亦都逐漸消失，
因為場面已經失控，如果我落車，命運只有一個，就係被茹毛飲血、肚破腸流。

部車越退越後，失控既場面逐漸消失於視線範圍。
我最後見到既一幕，係一隻狂屍跳上車頂，
抱住粉紅色少年，一口咬落佢高挺既鼻樑、面頰、肩膀。

少年既粉紅色POLO衫漸被染紅，佢全身抽搐，驚惶的眼眸往上翻，僅剩下泛紅的眼白……

平手 2017-8-8 18:17:22 此回覆已被刪除

日日上高登 2017-8-9 15:31:29

:^(

賈覓 2017-8-9 17:36:24 5.

呼、呼、呼……

我同阿文不約而同地一齊喘氣。

「究…究竟發生咩事…？點…點解...佢地會食人…？」阿文把聲好震。

我後背不停飆冷汗，成件衫濕哂。

深呼吸，嘗試整理思緒。

「我地而家點算啊…去邊啊…Don你講野啦…」

我拎起電話，打開聯絡人資訊，不斷向下掃。

「Don…你覺唔覺得啱啱啲人好似喪屍？Walking dead入面嗰啲啊…」

搵到啦，施泳茹。

「嘟嘟——嘟嘟——嘟嘟——嘟嘟——」

聽啦…快啲聽電話啦……

「嘟嘟——嘟嘟——喂？」一把甜美既聲線猶然入耳。

「喂，泳茹？我啊。」唔知道過左咁耐，佢仲認唔認得我把聲。

一旁既阿文細細聲講左句，個個都癲哂你仲掛住溝女。
我睥左佢一眼。

「阿棟？你番左黎香港？」佢把聲聽落好驚訝。

「係啊，你而家忙唔忙？其實我有樣好重要既野想問你，你仲有冇喺醫院度做？」

當年畢業，泳茹一邊做part-time一邊讀護專，立志要做個好護士。

「有，我仲喺伊莉沙伯度做緊。琴晚我地有好多姑娘都調咗過瑪嘉列，而家有啲踢腳。」

「瑪嘉列醫院究竟發生咩事？我啱啱先係嗰頭出黎，情況好混亂，
聽講係琴日喺機場受傷既人出哂黎亂咬人，我好似仲見到最先發狂嗰位地勤，佢唔係連中五槍死左啦咩？」

「咩話!?佢地…佢地…行出街…？」

「嗯，係咪有咩問題？」

「琴晚我同啲同事傾計既時候有講起，個地勤被送到醫院既時候的確係已經冇生命跡象，
但過咗冇耐，佢又突然醒番，仲咬傷咗唔少醫護人員，所以我地調咗好多人過去。
佢地仲話，被咬傷既市民送到瑪嘉列之後相繼發燒、發冷、抽搐，
大部份都喺琴晚停哂心跳，停咗心跳…又點行出街…？」

「……」一時之間，腦中一片空白。

「棟，我聯絡下嗰邊啲同事先，你小心啲。」

收咗線之後，我呆咗陣。

停咗心跳仲可以行動？唔通真係有喪屍？唔好講笑啦，拍戲咩。

到我回過神來，發現我竟然喺酒店樓下。

「點解番黎酒店？」

「Don，我啱啱打極電話番屋企都冇人聽，我琴晚成晚都冇番去，
我驚我老豆老母阿公阿嫲有事，你上去避下先，轉頭番黎兜你。」阿文滿臉愁容。

我都明阿文架貨VAN唔夠位坐咁多人，但係都唔洗專登車我番黎酒店架，求其搵個地方放低我搭的士咪得。

唉，橫掂都番咗黎，上去換件衫都好。


我行到大堂門口，就停低咗。
唔單止平時幫客人開門嗰兩個靚仔唔見咗，連度玻璃門都唔見埋。
睇真啲，原來度玻璃門冇唔見到，只不過碎哂。

放眼望去，成個大堂，一個人都冇。

我吞一吞口水，跨過玻璃碎，步入大堂。

我慢慢行到大堂其中兩部lift之間，螢幕上顯示兩部lift都喺地下。

我舉起右手按下「↑」。

唔知點解硬係覺得怪怪地。

兩部lift既lift門同時打開，我直覺地行入右邊部lift，

行入去既時候，我望到左手邊部lift門地下，好似有兩條黃色封條。

一陣寒意由腳底直逼腦門。

我迅速地按了好幾下關門鍵。

lift門關上之際，我喺縫隙中見到一個人影緩緩步過，佢突然轉身，
泛紅既眼白與我對眼，頭微微一側，深深吸了一口氣，發出浪犬般既低鳴。

「嗚……」

Lift門隨即關上。

「碰—碰———碰—碰！」

賈覓 2017-8-9 17:37:48 6.

如果度門遲一秒關上，會發生咩事？

【１、２、３、４、５……】

隨住樓層上升，我個心跳得越黎越快。
萬一，一到九樓，打開lift門……
啊！萬用刀！
好彩俾藥房個阿叔呃我買左把萬用刀，總算有把武器旁身。
咪住…我袋餅…我把萬用刀…係阿文架車度……

【９】

Lift門打開，一陣陰風竄入。
我吞一吞口水，邁開腳步行出去，lift門無情地關上。

九樓大廳，此時顯得無比空曠。
明明琴晚番黎嗰陣都係冇乜人，點解今日突然咁怯……
我仔細望一望，確定附近一個人都冇之後，就向右轉身。
呢度距離間房，只有短短四十米，冇事既。

雖然我不斷同自己講冇事，雖然我好心急想快啲番房，
但係我依然放輕腳步，為免發出任何聲音。

再行多步，就係轉角位。
只要向右轉，行多十幾步，就到923。

呢個時候，一道怪風吹來，一陣腐屍味傳入鼻腔。

兩年前係庫蘭達做研究既時候，我遇過一隻屍身腐爛，被蟲蟻佈滿既黑熊，
陣味，同我而家聞到既一模一樣。

「嗚……」

記得細個嗰陣阿媽講過，夜晚聽到背後有人嗌你全名，千祈唔好另轉頭，因為會有鬼斬斷個頭。
大個諗番起，邊有可能唔另？聽到有聲，另轉頭望下係自然反應。

就好似而家咁。

我機械式地將頭轉向聲音來源，果然……
西裝筆挺，但動作扭曲；五官端正，但滿口鮮血……

「噁……」

佢定眼望住我，突然聳肩，似乎要向前暴衝。
呢個時候我先驚覺有幾危險！

我調頭拔腿就跑，眼見923就喺前面不遠，我伸手入褲袋拎出小巧既房卡。

「嗚啊!!!!!!」

佢把聲越黎越近，手指喺我背上擦過，我後頸上既汗毛即刻全部豎起，用盡全力加速。

佢追得咁貼，就算真係俾我入到房，又有咩用？

「嗶———」

房門打開後，我用力向後推想將房門關上，
但係佢竟然用佢既身軀擋住，呈現上半身喺房內，下半身喺房外既姿態。
平時細細力夾親手指都咁痛，我而家咁大力推度門，點解佢都可以冇反應？

「啊!!!!啊!!!!啊!!!!」

佢既動作越黎越激烈，好似一個餓左十日既人，見到一隻肥美既火雞一樣。
點算，佢好大力，我就快頂唔住……

冷靜…冷靜…

呢個時候，一個好離譜既想法突然出現。

Sorry……

我拎起鞋櫃上面既熱水壺，狠狠咁向佢個頭扑落去。
果然唔怕痛。
但係只要我夠大力，佢一定會俾我打出去，只要夠快，就可以栓埋門。

「碰—碰—碰—」

由於距離太近，鮮血不斷濺到我臉上，我只好緊閉嘴巴，以防污血入口。

佢既上身已經成功俾我逼左出去，但係雙手尚在掙扎。

我既體力不斷流逝，而佢既力量好似不減反增，越加劇烈。
咁落去唔係辦法，佢一定會再衝入黎。

我真係冇力啦……點算……

呢個時候，出現喺我眼前既，係一條閃亮既門鍊。
仲有毫無隱私既玻璃門浴室！！！！

唯有博一博啦！

我伸手鎖上門鍊，企圖為自己爭取少少時間。

佢同力向前撞，裝嵌於門框上既門鍊隨時會被撞爛。

我即刻跑入浴室，跳入正方形既水療浴缸。
今朝諗住食完早餐，沖個靚涼先出門口，所以較咗時間十點鐘自動放水。
但係啲水放咗咁耐，真係好凍。

「碰———！」

佢果然撞破左條鍊，入咗黎！

佢周圍聞咗幾下，突然轉頭，用銳利既眼神望住浴室入面既我，我即刻潛入水底，閉氣。

喺水中，我隱約聽到撞破玻璃既聲音，佢緩緩走近，企喺浴缸邊，望住我……

賈覓 2017-8-10 00:37:14 7.

呯呯…呯呯…呯呯…

我個心跳得越黎越快。

唔理啲水入眼有幾痛，我都瞪大對眼，望實佢。
佢望左一陣，就行開左。
腳步聲越黎越遠，佢好似，行左去床嗰邊。

就快抖唔到氣，我將個頭伸出水面，深呼吸。
「嗚......」熟悉既低鳴。
我聽到急速既腳步聲向浴室邁進，我即刻縮番個頭入水底。
今次，佢冇行近浴缸，而係喺浴室門口外停左一陣，就離開左間房。

我唔敢輕舉妄動。
一直重複將個口浮出水面呼吸，再匿番入水底既動作，直至十幾分鐘過去。

我攝手攝腳地離開浴缸，用顫抖既雙腳行近房門，輕輕地將其關上。

好凍。

我轉身，見到地上向雙人床延伸既一道血痕，正確啲黎講，係一道屍水既痕跡，啱啱驚心動魄既場景再次浮現。

好得人驚。

我避過屍水，無力地走向床邊，除低身上濕哂既衫褲。

頂...我部電話...

換上乾淨既衣物之後，我無力地癱軟在床上。

唔得，而家唔係休息既時候。

我打開衣櫃拎起風筒，一手吹乾部電話，一手拎起房入面既電話打街線。

「喂？」

「喂，媽！你喺邊？」

「買緊餸囉，我買左隻鴨啊，今晚炆俾你食。」

「唔好買啦！快啲番屋企啦！你係咪冇睇新聞啊！出面好危險啊！」我真係好緊張，我好驚尖沙咀唔係唯一出事既地方。

「你講咩啊，都話買緊餸咯，邊有新聞睇啫。」

「媽你聽我講，而家即係番屋企，叫埋老豆細佬，鎖實哂啲門窗，拉埋窗簾布，搬啲重野擋實度門，唔好出聲。」

「懵咗啊你？」

「你聽我講啦！！！乖乖地番屋企，咩都準備好哂之後開電視，你就明架啦！」

「喔...咁好啦...」

「你記得小心啲啊！我陣間就入去搵你架啦！」

日日上高登 2017-8-10 08:20:52

:^(

賈覓 2017-8-10 15:42:59 收左線之後，我即刻打俾阿文。
換黎既係，我所打既電話未能接通。
無論打幾多次，都係一樣。

濕左既iPhone依舊打唔開。

1083。

「唔該，我想打去伊莉沙伯醫院。」

我唔記得泳茹個電話，部iPhone又濕左，唯有搏一搏。

「嘟——嘟——」
「喂，伊莉莎伯醫院。」
「泳茹？係咪泳茹啊？」
「你講施姑娘？佢而家準備過其他醫院幫手，先生如果冇咩事既話......」
佢未講完我已經打斷左佢。
「有事啊！叫佢唔好去啊，你快啲叫佢聽電話啦！」
「先生你冷靜啲，我地唔會隨便幫陌生人聯絡我地既同事......」
「而家尖沙咀咩事你唔係唔知，我係佢老豆啊你快手啦！」咁講係咪誇張左少少？唉，唔理得咁多。
「呃...咁先生你等等...泳茹泳茹！」

「喂？」泳茹把聲聽起黎好急。
「泳茹？我係阿Don啊！」
「Don！而家醫院好亂啊！琴晚啲同事幾乎全部傷哂，有啲送左番黎，有啲失蹤左，原來你琴日講既野係真架，佢地真係會死過番生，仲會周圍咬人，上頭而家想派我地過瑪嘉烈治療受左傷冇辦法過黎既傷者。」

「痴線架，唔好去啊！你唔好去瑪嘉烈，即刻離開伊莉莎伯，番屋企避下。」

「唔得，我唔可以丟低佢地唔理。Don你記得小心啲......啊！嘟——嘟——嘟——」

「泳茹？泳茹？你唔好嚇我啊，泳茹！」

呢一通電話，係泳茹既尖叫聲下結束。

我一定要去救佢。

賈覓 2017-8-10 15:44:05 8.

冷靜，諗吓下一步要點做。

點解阿文呢個時候先唔聽電話。

香港既酒店真係安全，搵哂成間房都搵唔到可以充當武器既野。
雖然我冇信仰，但係呢個時刻，我突然想雙膝跪地，雙手合十，祈禱。

上帝又好，玉帝又好，觀音又好，咩都好啦，雖然我一直都唔相信神既存在，但係原來人喺脆弱既時候，真係會需要精神上既寄託同依靠。
神，如果你真係存在，希望你可以保佑香港度過難關。接下來，我相信我好有可能會出手傷人，希望你能夠俾我勇氣同力量，亦希望你可以引領死去既人到一個更完美的地方，Amen。

我行近門邊，由防盜眼望出去。
出面唔知由幾時開始，又多咗好幾個「人」。
睇黎此路不通，唯由行第二條路。

我走向房門對住既窗口，向下望落去。
下面一個人都冇，只有幾架紅的停泊。

我伸手出去，搖一搖窗邊既水管，嗯，夠堅固。
我將所有枕頭套、被袋、床單、窗簾全部拆哂落黎，再全部駁埋一齊，一邊綁喺床腳，一邊綁喺我條腰上面。

呼…出發！
咪住！都係拎埋個熱水壺先……
將熱水壺條電線綁喺手腕之後，我就爬出窗，捉住水管，慢慢爬落去。
原來每一層都有「人」。

究竟發生咩事……
為咗加快速度，我索性放開水管，游繩下降，好似以前喺雨林度由五十米高既樹上面降落一樣。

淨低最後兩層，條繩竟然唔夠長，我唯有喺半空中解開腰上面既結，跳落車頂。

「碰——」

好痛……

呢個時候，身下傳黎一道咆哮。

「嚇……嚇……」

唔係啊嘛……
果然，駕駛座爬出一個「人」，想爬上車頂攻擊我。可幸既係，呢個「人」只係得番上半身。
可幸？定係可悲？

我即刻由另一邊跳落車，打開車門坐入副駕，伸手栓埋駕駛座度門。
佢喺出面係咁用個頭撞個窗。
好彩條匙仲喺度，我即刻撻匙，踩衡油，將佢甩落地，離開現場。
.
.
.
.
就到伊莉莎伯。
我一手揸住駄盤，一手拎出iPhone，想試吓開到未。
「叮———叮—叮—叮—」
YES!終於開到。
「叮———叮—叮—叮—」
咁多whatsapp既？
我將架車停喺路邊。
『Don，你唔好黎搵我啊，呢度好危險。』
『Don，你做咩唔聽電話？』
『Don，你唔好有事啊……』
『Don，你喺邊啊？』
『Don……』
『Don，我係咪會死啊……』
『Don，我好驚啊……』

泳茹……

雖然我同泳茹唔係青梅竹馬，但係都算識咗幾耐，以前我地成日一齊溫書，一齊做功課，佢有咩唔識都一定死頂，唔肯問我，嗰陣以為佢唔抵得我醒過佢，但係之後有次傾計，佢話係唔想我哂時間黎教佢。

就好似而家咁，明明好驚，點解唔叫我去救你？

我即刻開車，全速趕去伊莉莎伯。

賈覓 2017-8-10 15:45:19 9.

而家亂停車應該唔會俾人抄牌？

我將架紅的停喺路邊之後就打電話俾泳茹。

「喂？泳茹？」

「Don！你快啲番屋企啊！出面好危險架嗚嗚嗚嗚……」泳茹一路講一路喊。

「泳茹，你唔好喊住先，你喺邊啊？我到咗伊莉沙伯啦。」

「唔...唔好啊！你唔好入黎啊！佢地好恐怖架......」

「你信我啦，我唔會有事架，話我聽你喺邊。」

「嗚……我困咗自己喺地下個lounge room，但係你唔好入黎啊，出面好恐怖，個個都發哂癲啊……嗚嗚嗚……」泳茹喊得越黎越犀利。

「醫院入面大概有幾多人？」

「我都唔知啊，上上下下加埋可能都有百幾人，如果……如果全部都發哂癲既話……」

「……」我一時語塞。

睇黎冇辦法硬碰。

「泳茹，你睇吓間房入面有冇窗？」

「有啊有啊！但係個窗好高，我爬唔到出去。」

「唔緊要，你等我一陣。」

我沿住醫院兜咗一圈，終於搵到一排窗，我喺地下執咗十幾粒石仔，由第一個窗開始，逐粒掟落啲窗度。

「Don！係咪你啊，我喺入面啊！」泳茹又驚又喜。
「嘻嘻，係啊，我收線先，你等多一陣，我就快救到你架啦。」我忍唔住笑咗一笑，搵到泳茹，突然覺得好安心。

我將紅的開到窗口下方，爬上車頂之後，用熱水壺打爆咗個窗，爬入去。

「Don！你小心啊！」聽得出泳茹又開心又緊張。

我望黎望去都搵唔到落腳點，泳茹即刻推咗張檯過黎俾我跳落去。

落到去之後，泳茹即刻攬住我，攬得好實，好實，係咁喊。

「唔洗驚，冇事啦，冇事啦。」我唯有摸住佢個頭，安慰佢。

「佢地啱啱係咁拍度門，好得人驚……」

「嗯，呢度太危險，我地準備好就快啲走啦。」

我放開泳茹，仔細咁環顧四周，想睇下有咩可以帶走。我叫泳茹拎咗個大袋，將Lounge room入面所有食物裝起，我就將消毒酒精、生理食鹽水、繃帶、紗布等等醫療用品放入醫藥箱，準備帶走。

「點解呢度會有砧板同生果刀既？」洗手盆旁邊既砧板同生果刀非常格格不入。

「喔…因為呢排有個同事話要減肥，所以會喺呢度自己煮野食。」

正合我意，我將生果刀攝落皮帶。

我將Locker、梳化等等既重物輕力地移到門前，雖然好似冇「人」發現我地喺入面，但係都係安全啲好。

我將一張細茶几搬上檯，方便比較矮細既泳茹等陣爬出去。

我先將食物袋掟出去，然後咩住醫療箱一躍跳出窗外，將物資全部放入後座之後，就去接泳茹出黎。

我企喺車頂，望住泳茹腳震震咁爬上黎。

「……」泳茹發哂呆咁望住窗外面，佢不嬲都有啲愄高。

「唔洗驚，我會接住你，唔會俾你有事。」我向泳茹展開雙臂。

佢深呼吸咗一下，露出堅定既眼神。

我將泳茹安置喺副架駛座之後，突然醒起漏左啲野。

「唔好抌低我……」泳茹拉住我隻手。

「好快番。」我摸一摸佢個頭，露出溫暖既微笑。

我爬番入間lounge room，喺梳化上面拎咗兩個cushion。

「你做咩特登番入去拎兩個cushion……」泳茹望住我手上兩個cushion，好不解。

「你向前挨一挨。」

我將一個cushion攝去佢背脊後面，一個俾佢攬住。

「咁樣舒服啲，好訓啲。」

「……」泳茹眼光泛淚地望住我。

雖然我覺得咁既情況下冇咩可能訓得著。

「Don，我地…去邊？」

我撻匙，出發。

係囉，我地…應該去邊？

賈覓 2017-8-10 16:15:49 10.

開車冇耐，泳茹就訓著咗。
又係既，佢係醫院忙咗兩日，一定好攰、好煎熬。
我禁著部CD機，裡頭悠然播出張學友溫柔既聲線。

「一路上有你
苦一點也願意
就算是為了分離與我相遇」

打咗通電話番屋企，知道成家都冇事，我安心咗好多。阿媽睇完新聞之後喊哂口咁叫我快啲番屋企。除咗話我好快番，唔洗擔心之外，我都唔知仲可以講啲咩。交代好細佬好好照顧爸媽，唔好出街之後，我就收咗線。

阿文都仲係唔聽電話，究竟咩事……
都係去搵一搵佢好啲。
就快冇油，都係去一轉油站先。

泳茹訓得好霖。
到咗油站，放眼望去一個staff都冇，唔通連呢度都……
唯有自己落手。

入完油之後，我入左隔離間Select度，拎左一個蛋糕仔、一枝果同一罐咖啡。

行近收銀機，喺櫃檯放底50蚊之後，諗住轉身走人。

「喀喇——」轉身既時候，唔覺意踩到個汽水罐，我低頭一望，見到地上有一攤好唔自然既顏料。

我將覆蓋喺上面髒亂既報紙、鋁罐通通踢開之後，終於睇清楚顏料所呈現既圖案。

「X」

一陣寒風從背後竄起，我急步離開。
喺走出門口之際，一個龐大既身影突然出現，擋住去路。
眼前係一位穿著黃色制服既男子，制服早已破爛不勘，露出油膩既大肚腩，而肚皮上，懸掛住汁液四溢既大小腸……

睇你滿口鮮血，應該啱啱食飽冇耐，不如放過我啦……

佢完全冇理會我內心既吶喊，怒吼一聲就向我衝埋黎！
我一個轉身避開佢既攻勢，佢同成架礦泉水一齊跌落地，正當我以為有機會可以逃走，佢竟然非常迅速地跳起身，又再向我衝埋黎！
我一拳打落佢個鼻樑，點知佢郁都唔郁，反而不斷向我逼近，佢張大個口，一排沾滿口水、血漿既牙齒離我左眼眼球只剩低幾厘米，佢越靠近，我既重心就越唔穩，佢用力一推，我成個人跌咗落地下。

就喺佢飛撲上黎嗰一刻，我右手向腰際一掃，將生果刀抽出，以雙手握刀，刀刃朝上，瞄準佢個額頭。

「撲嚓——」疑似腦漿既汁液沿住刀柄流到手腕。

肥大既屍體重壓在我身上，我難以呼吸，屍臭味不斷傳入鼻腔，一陣吐意湧上喉頭。

唔得，唔好嘔住，泳茹仲喺出面！

我用力推開屍體，給生果刀從佢額頭拔出，全速跑出門口。

離遠我已經見到兩個人影向紅的靠近，一定係俾我啱啱入油造成既噪音吸引到。

我即刻跑過去，一腳將其中一隻踢開，手起刀落將生果刀插入另一隻既太陽穴，再抆番出黎。
俾我踢開既行屍趁我唔為意向我衝埋黎，我轉身滾上車頭，佢反應唔切，成個人撞落玻璃窗。

「啊！！！！！！！」我高舉生果刀，用力跳起，凌空插入行屍既天靈蓋。

「呼…呼…呼…」我挨落車門抖左兩啖氣，就即刻開門入駕駛座。
要快啲離開現場，萬一引左其他行屍過黎就麻煩。

撻匙，踩行油，駛上公主道。

「Don…?」泳茹終於醒，睇黎佢真係好攰。

「Don…點解你成身都係血既…?個窗，上面好多血…」泳茹望一望我，再望一望個車窗，一臉驚恐。

「啱啱出左啲狀況，不過而家冇事啦，你食啲野先啦。」我將袋入面既蛋糕同果汁遞俾泳茹。

「係咪又有人出黎咬人？」

「唔係…佢地已經唔係人啦，佢地係行屍，識行識走既屍體。」

講到呢度，啱啱同行屍近距離接觸既畫面又再出現，我終於忍唔住，喺公路旁停低部車，狠狠咁將今朝食既早餐，全部嘔哂出黎。

日日上高登 2017-8-10 18:39:58 番屋企啦，仲周圍去

:^(

賈覓 2017-8-11 10:59:16

番屋企啦，仲周圍去

:^(

哈哈哈
要入油先番到屋企架嘛

:^(

賈覓 2017-8-11 11:01:40 11.

「Don！你做咩啊！你唔好嚇我啦！」泳茹一路拍我背脊，一路喊。

「我…冇事……咳咳咳…」我挨喺欄杆度想抖順條氣。

泳茹突然用佢水汪汪既眼睛怒睥我。

「啪——」然後一巴打落黎。

我右手扶住熱辣辣既「面豬燈」，一臉疑惑咁望住佢。我咁大個仔，淨係俾人兜巴星過兩次，冇錯，第一次都係佢。

「咩都死頂！咩都收收埋埋好好玩咩而家！如果你有咩事，咁點算啊！你有冇諗過我都好擔心你架！咩都唔講！」正當泳茹又想一巴星落黎既時候，我捉住佢隻手，給佢成個人拉近我既胸膛，佢即刻收哂聲。

我將下巴挨落泳茹個膊頭度，深深咁呼吸左一下，傳黎陣陣髮香。

「我唔知我頭先做既野究竟啱唔啱啊…我淨係知我想盡快帶你離快嗰度，我好驚你有危險，我好驚我地有危險，我都唔想架……」

「你頭先，做咗啲咩？」

「泳茹，我諗深一層先發現，我殺咗人啊…我殺咗人啊！我頭先殺咗兩個人啊！」我望住沾滿血既雙手，不停震抖。

「係，佢地係有主動攻擊我，但係都未至於要殺死佢地丫係咪？但係佢地係咁衝埋黎…想咬我…」我跌坐落高速公路旁，開始自然自語。

「Don…Don…你聽我講。」

「我有咩資格結束人地既生命？我點解要殺佢地？就係因為佢地攻擊我？我為咗保住自己條命就殺人…？」

「侯永棟！你望住我，你冇殺到人啊。」

「吓？我一刀一刀…」

「唔係，你聽我講，琴晚醫院啲人全部停哂心跳架啦，但係唔知點解個個都死而復生，我一路都冇講係以為機器失靈，直到你啱啱話佢地係行屍，我先敢相信。佢地無論生理上定心理上都已經唔似係人類，我諗，一定係因為某啲原因令屍體有活動能力同攻擊性。」

「我真係，冇殺到人？」

「冇啊，佢地一早已經死左，咁仲點算殺人？最多咪…算鞭屍？」泳茹越講越心虛，發出心虛既笑聲。

「泳茹，點解…你突然可以咁冷靜？」

「我需要你既時候，你永遠都喺我身邊，到你需要我既時候，我一定唔會放手。」泳茹既笑容，好明顯係為左安慰我格硬擠出黎。

呢個時候，我點可以咁懦弱？

「好，我一定會好好保護你，唔會俾你有事。」

「講到我好需要人保護咁，我都好犀利架！」泳茹用拳頭細細力咁打落我心口。

「好啦，唔玩啦。我去搵你之前都有遇過一隻行屍，我發現佢好似係靠嗅覺發現我，雖然唔知係咪隻隻都係咁，但係我驚啲嘔吐物會引佢地過黎，我地都係快啲走啦。」

「嗯，咁我地而家應該去邊？警署？」

「通常有咩大型事故，一定最多人去差館同醫院，而家咁既環境，越多人既地方實越危險，我諗，我地淨係可以靠自己。」

「咁點算…？去搵Auntie、Uncle？」

泳茹既Daddy、Mommy一早移民左過英國，喺醫院既時候佢一早就確認咗英國嗰邊冇事，仲好似同雙親交代好哂身後事，唉，呢個傻妹。所以，佢而家最擔心既反而係我既父母。

「佢地而家喺屋企，我每半個鐘就會打電話check下佢地安唔安全，而家我最擔心既係阿文，由今朝分開到而家，我一路都搵佢唔到。」

「咁行啦。」泳茹伸手幫我扣好安全帶，俾左我一個充滿信心既微笑。

好。

下一站，九龍灣。

賈覓 2017-8-11 14:32:17 12.

天色昏暗。
漸漸駛近啟德隧道，喺隧道口前停低。
「Don…點解好似好暗咁既…」

我睇睇隻錶，18︰07。
點解咁晏啲街燈仲未著？

「嗞——嗞——」我伸手打開收音機，回應我既係毫無溫度既電波聲。
打開電話，連網絡新聞都只停留喺13︰25。

前面係無止盡既黑暗。
「Don，入面唔會有野架可..？」

答案，要靠自己去搵。
我吞一吞口水，開著車頭燈。
「呼……」
我右手揸實駄盤，左手牽住泳茹，右腳一伸，去馬！

前半段都仲相安無事，於是我放慢速度，想睇清楚啲前面既路，但係繼續向前冇幾耐，開始隱約聽到窗外傳黎嘈吵聲，而且仲好似越黎越大聲。

「碰！」
「啊！！！！！！！！！」

一隻行屍跳上車頭同我地對望，泳茹既尖叫聲幾乎震穿我耳膜。
我向窗外一望，原來早已經有數十隻行屍跟上我地跟速度，不斷敲打車廂。

「捉實啊泳茹！」

100，110，120，130……
唔知架紅的可以撐到咩程度。

好快，我地就衝左出隧道，呢邊同尖沙咀嗰邊唔同，竟然有路燈。

我不斷向前駛，到megabox附近，停左落黎。

「做咩停低既？」

「我驚衝得太勁，架車會死火。佢地應該冇追黎啦可？」

泳茹靜左一陣，確定聽唔到聲，點一點頭。

正當我想拎部電話出黎睇下幾點既時候，先發現部電話冇電，過左一分鐘，連泳茹嗰部都熄埋。

大鑊，咁樣爸媽會搵我唔到。

「泳茹，呢度離瑪嘉列咁遠，你估，會唔會冇事？megabox仲著住燈，話唔定入面有人？」

「Don，你唔係諗住……」

「我地部電話都冇哂電，而家咁既情況，唔okay。咁近，不如行落去睇吓囉？」我都唔知點解自己會有咁既諗法。

「行落去？呢度高速公路黎架喎……做咩唔開車過去？」

其實我停車，唔止係因為驚架車死火。
我打開車頭燈，只見前路被堆車輛堵塞。

「你望下，前面俾車塞死哂。」

泳茹認為離開架紅的係好危險既事，但係我就認為萬一入面有人孤立無援，或者有人可以救到我地，我地就咁錯過左既話，好唔抵。於是，我地決定落去睇下。

我將把生果刀俾咗泳茹，自己就拎住個熱水壺。

一定要好靜，唔可以發出任何聲響，我地沿路都唔敢講野，唔敢出聲，連吞口水都就住就住。

終於行到megabox門口。

我向大門靠近，自動門徐徐打開，我下意識地將泳茹拉近。

「Don，呢度有個袋……」泳茹指住地下。

對唔住都要做架啦，差電大過天。
我放低熱水壺，跪喺地下，打開拉鍊，諗住摷吓。

呢個時候，一聲極大聲既咆哮喺耳邊響起，我嚇得倒抽一口涼氣，結果一股屍臭味就深深咁俾我吸入鼻腔。

頂，哩喺轉角位咁陰濕既﹗

我一手拎住個袋，一手捉住泳茹，轉身就跑。

「啊！！！！！！！」泳茹忍唔住尖叫咗一聲。

而呢一下尖叫聲，似乎喚醒咗更多沉睡中既屍體。

「嗚啊！！！！！！！」

佢地越追越近，點解我覺得佢地既速度，好似快過今朝好多咁既？

車門就喺前面！

「泳茹快啲上車！」

撻極都撻唔著既！！！！

「碰！碰！碰！碰！碰！」我地架車一瞬間就俾行屍包圍，佢地不斷敲打車窗。

「Don﹗快啲﹗」泳茹嚇到係咁縮向我呢邊。

「碰！喀喇！」泳茹嗰邊塊玻璃俾啲行屍打碎咗！

「Don！！！！！！！！」泳茹把聲幾乎嘶啞。

終於撻得著啦！

我咩都唔理，踩衡油，向前衝。

我一手揸住駄盤，一路向後望一路向前衝，想撇甩所有行屍，以致聽唔到泳茹既提醒。

「Don，小心啊！」

「碰———」

「嗡———」耳鳴聲佔據我既思緒。

眼前一黑……

日日上高登 2017-8-11 15:32:32

:^(

賈覓 2017-8-12 15:05:15 13.

海鷗的叫聲自遠方傳來，微風輕撫我漸顯疲乏的臉龐，彷彿要將我喚醒。
我睜開雙眼，印入眼簾的是淨藍的天空，純潔的白雲。
冰涼的海水偶爾淺到身上，原來躺在木板，漂洋於大海之上的感覺是這麼舒適、寫意。
忽爾，聲音的主人終於出現，披著白毛的海鷗落在我的身旁。
我看著牠，牠也看著我。
我舉起手，輕輕順著牠柔軟的羽毛，牠溫馴的站著，任我撫摸。
一陣海風吹來，我眼睛一閉，再次睜開眼時，海鷗身上的羽毛不知道何時被染成了鮮紅色。
我著急的查看，以為是受了傷。
牠的肌肉不斷抽搐，眼睛逐漸向上翻，露出了泛紅的眼白，牠張開大口，露出一排不自然的利齒，向我撲過來。
我想掙扎脫逃，這才發現，我被綑綁於木板之上，無處可逃……

「……D……Don……Don!」

咩聲…?好模糊……

「Don！起身啊！侯永棟你同我起身啊！」

Anna…?Anna點會喺度?
我冇哂力，完全控制唔到自己，我好想張開雙眼，見下Anna。

「你快啲起身啊！侯永棟！」

Anna你快啲走！呢度好危險！
我用盡全力張開雙眼，迎面而來既係泳茹焦急既神情。

「你嚇死我啦！嗌極都唔醒！」泳茹又開始喊。

我摸一摸自己發燙既面豬登。
「你…又打我？」
「咁人地以為你死咗丫嘛……」
「我暈咗幾耐？」
「都有十幾分鐘。」

我從泳茹大脾上起身。
奇怪，暈左咁耐，點解我地會冇事…？啲行屍呢？

「嘩！咩事啊！」
我抬頭一望，俾圍住我地既火圈嚇親。
「啱啱我地一撞車你就暈咗，我怕啲行屍會追上黎，所以拿拿聲將啲食物同醫療用品塞入個背囊度，諗住拍聲你一齊走，點知我一落車，就見到部車開始漏油，我驚會爆炸所以即刻拖你出黎，點知我地一離開架車，真係爆炸喎！最神奇既係，啲行屍好似唔敢靠近我地。」

我望住泳茹對手，又紅又震，一個弱質纖纖既女子臨危不亂拖我一個大男人出黎，真係辛苦哂。

「Don，我地而家點？」

出面啲行屍，睇落好似好想衝入黎，又唔敢衝咁，睇黎佢地唔係唔敢靠近我地，係唔敢靠近啲火。

我除咗面頭件衫，撕開兩半。將其中一半捲成一球，行近火源，將衣球點著，變成火球。我將火球掟向其中一隻行屍，果然，佢避都避唔切。

「我諗佢地應該驚火，啲火應該可以捱多個幾鐘，冇咁快熄。我地…休息吓？」我喺火圈既中心坐底。

「但係班行屍就喺出面咋喎，而家休息會唔會恐怖咗啲？」泳茹一路講一路試圖將我拉起身。

「橫掂我地而家都衝唔到出去架啦，不如抖吓補充體力，諗吓下一步應該點做仲好啦。」我拍一拍地下，示意泳茹埋黎坐。

突然醒起未同屋企人報平安，我即刻拎出背囊入面既差電器出黎差電。

「喂？」電話好快就接通，另一頭傳黎一把熟悉既男聲。
「喂？侯永亮？」
「哥？你做咩仲唔番黎啊！」阿亮驚慌地回話。
「屋企情況點？」
「我地冇事啊，你快啲番黎啦，出面好危險啊！」
「我知，我番緊架啦……」
其實，我連出唔出到呢條公路都唔敢肯定……
「你快啲番黎啦，我好驚啊……」聽得出細佬喊緊。
「喊咩啊你，男人老狗，我話俾你聽，而家老豆老母靠你架啦，我未番到之前，你一定要好好撐住，知嗎！」

我安慰咗佢一陣，就收左線。

泳茹挨咗落我膊頭度。
「你攰就訓陣先啦，我會睇住。」

「我唔想訓。」

「你都攰咗幾日啦。」

「我驚訓醒你就唔見咗，我驚你又好似啱啱咁抌低我……」

「唔會啦，我啱啱訓夠啦，我唔會走，我應承你。」

「你以前夠應承過咯，結果咪又係去左澳洲！」泳茹好哀傷咁講。

「鈴鈴鈴鈴鈴———」
呢個時候，電話突然響起。
來電顯示︰阿文。