Elevens 2017-7-31 13:40:24 放下手機，又不想睡，於是我拿起一個啞鈴，站到窗前，做一些簡單的運動。

從我家的窗戶望出去，可以看到鐵路和河流。

微風吹送，河水靜靜流動，漣漪泛著燈光的倒影。有時鐵路要進行通宵檢查或維修，就整晚都會聽到隱約的機器聲，偶爾夾雜著交談的人聲。

年輕時，我很喜歡在深夜的河畔流連，有時和朋友一起，有時自己一個，在便利店買一罐飲品，邊走邊喝。

我今年廿八歲，回想起來，已經係十年前既事。

我放下啞鈴，然後拎左隻香蕉黎食。看看鐘：現在是五時半左右。

我知道已經訓唔返，於是我沖左個涼，然後躺在沙發上，用iPad打開Youtube看一些足球影片。

或者你覺得我應該繼續做資料搜集，例如：Simon話日本都有類似既失蹤個案，咁到底堅定流？係咪應該上網search下呢？

既然Simon話失蹤者身邊既人會逐一遇害，咁可能依張死亡名單上都有我個名，而排第一位既Michelle已經遇到不測……

但基於咩原因，一個人失左蹤，佢身邊既人竟然會逐一遇害？

我諗到既就只有仇殺……唔係！如果樂仔真係一個特務，而佢連累到身邊既人成為目標，咁就真係金翅仆街鳥……

假設樂仔真係一個特務，佢既神秘消失係出於戰術考慮，令到對頭人搵佢唔到，於是唔知點解，目標轉移左去樂仔身邊既人嗰度。

真係愈諗，愈覺得似電影既橋段……

Elevens 2017-7-31 13:40:50 不過依家只有Michelle遇害，我地大部份人重係安然無恙，咁其實都唔洗咁悲觀……可能Simon講既野係流呢！

雖然單野可能係同我生死攸關，但一來Simon講既野實在係太荒誕，都唔知真定假，二來好似都未殺到埋身，所以我暫時都未feel到有太大壓力。

到左第二朝既上班時間。果然尋晚唔覺得攰，朝早就一定會覺得攰。我拿著一杯Starbucks咖啡進入辦公室，覺得個頭好赤。一坐低，挨落椅背，已經忍唔住打左個呵欠。

「朱老闆單野跟成點，張報價單出左未？」

「啱啱JPL打左電話黎，話個model過唔到佢地既screening，要我地十七號之前send個新既過去。」

四周響著同事努力工作的聲音。我知道自己也要加把勁，返工唔可以無精神！我立刻坐直身子，飲完最後一口咖啡，開始檢查今早新入的電郵。

我地既團隊無左樂仔同Michelle，今個星期郭Sir又請假去旅行，所以人手非常緊絀，上頭已經放左風話會派人過黎，但一直都係只聞樓梯聲。

正當我全神貫注咁工作既時候，忽視對面傳出一句好大聲：「屌你老母！」

我當堂一呆，但我認得依把聲音係屬於TT既，於是我抬頭望前，見到Felix同TT企左喺部fax機隔離，二人立足對峙，起晒鋼咁唔知傾緊d咩。

「我已經講撚左！」TT對著Felix大聲怒吼。「我要跟JPL單野已經好撚忙！我邊撚度重有時間跟你嗰邊d野呀？」

「你都知JPL班仆街幾撚煩架啦！今朝又話我地個model唔pass！你話佢地肥左個model幾多次吖？前後夾埋都起碼三次啦！」

TT愈講愈嬲，一手扔左個file落張檯度。

「你聽我講，阿添……」Felix盡量心平氣和地說。「JPL單野，我知你係好煩，我都知佢地班人係好PK，」

「或者咁啦，」Felix思前想後。「JPL單野，我會主動搵production嗰邊傾下，希望個model可以盡量符合個客既要求，」

「如果production嗰邊話有難處，咁我地就試埋今次，如果JPL都係話唔滿意，咁就睇下郭Sir返黎點決定，最後可能同JPL攤牌，話我地唔接依單deal。」

Felix一邊觀察著TT的反應，一邊耐心地說。

Elevens 2017-7-31 13:41:11 「但你都知啦，以我地依家既人手，如果你淨係做JPL個project，咁我地肯定唔夠人做野。」

「我地之前都講好左，每個月既例會個presentation，係由你同Jason輪流負責，咁上個月你做左，今個月就由Jason做。」

「咁Jason既然負責得個present，依兩日都無多餘時間，所以希望你幫幫手……」

Felix說到這裡，TT忽視擰歪面，輕蔑地說一聲：「屌！」

「我唔該你，唔好再同我講依d野啦Felix！」TT說。「之前講好左？喂，之前我地隊team既人腳都唔係咁啦！」

「重有呀，郭Sir又話上面會派新member落黎，講左咁耐，依家人呢？」TT續道。「講到尾咪又係唔肯派人落黎！係咪郭Sir江湖地位唔夠，上面班大佬當佢無到呀？」

Felix低頭默默聽著TT的控訴。我諗Felix知道再講落去都無意思，反而可能火上加油，影響整體既工作情緒。

我意識到Felix想打退堂鼓，於是我走左過去做和事佬。

「咁好啦，TT，你跟返JPL單野先啦，」我對TT說，然後轉身拍一拍Felix的肩頭，示意同佢密傾一陣。

Felix和我走進郭Sir的房間，關上門。「喂～坐低先啦～」我以輕鬆的口氣說，然後與Felix一起於客席上坐下。

「點呀～你嗰邊d野趕唔趕呀？」我說。

「幾啦，」Felix說。「依排條team少左兩個人做野，搞到失左預算。」

我們對望著，我用右手半托著頭，食指和中指輕輕地在額角揉來揉去。

「一係咁啦，」我說。「今日我既工作量都okay既，一係我晏d抽時間幫下你啦。」

「好呀Karson，唔該晒，」Felix說。「Thank you！」

Elevens 2017-7-31 13:41:36 我看著郭Sir放在檯頭的家庭照片，又看了看整齊排列在牆邊的高爾夫球桿。

「話時話，頭先TT真係幾燥喎，」我以打趣的口吻試著說。「條友搞咩呀？谷到行晒咁撚樣，係咪成個月無扑野呀？」

「哈哈，真係唔知佢喎，」Felix說。「你見我都係用正常態度同佢講野，但唔知點解佢嗰下咁撚興。」

「我自問無得罪過佢，」Felix續道。「不過JPL單野係難搞既，所以佢咁撚燥，其實我基本上都可以理解。」

Felix同我都知道，TT雖然係一名身高六尺一吋既大隻肥仔，睇落去好powerful，但其實日常代人接物都幾順得人，好少見佢會同人嗌交，但今次就唔知點解，竟然會吵獲大既。

今次TT眾目睽睽之下咁樣硬爆Felix，恐怕之後都好難相處，可能Felix會同郭Sir講……不過我地條team已經無咩人，所謂用人之際，應該暫時都唔會踢人走住。

「近期真係發生左好多事……」Felix說。「其實如果係依個情況，你覺得可唔可以搵Jason幫手？」

「我諗唔好搞Jason喇，始終例會既野要present畀班大佬睇，如果有咩差錯就麻撚煩。」

Jason既工作能力雖然高，但佢似係騎牛搵馬，唔似係想博上位，所以自己既份內事通常做得好好，但就好少肯做extra duties。

「咁好啦，」Felix說。「咁今次真係唔該晒你，Karson。」

「哦～依d野，okay嘅～」我笑說。「但係上面又話派人落黎嘅？你有無打聽到d咩最新消息？」

「無喎，人事部嗰邊，我都八唔到d咩喎，」他說。

「或者等郭Sir返黎，由郭Sir親自出面去問下，」他續道。「始終人手既野，以我地既level，真係急都無用。」

Felix的說法正確。雖然郭Sir近排成日掛住玩，荒廢朝政，但講到要同上大人溝通，都係要郭Sir出馬，先至比較上有把握。

Elevens 2017-7-31 13:41:52 我認為都傾得七七八八。正當我想離開房間既時候，Felix說：「Karson，你會唔會去Michelle既喪禮？」

「我會去呀，」我說。「好似係聽晚吖嘛？」

「係，」他說著微微一笑。「我重以為得我一個會去添。」

「傻啦～」我說。「我同Michelle都叫做左兩三年同事，而且Michelle不留份人都幾好吖，我覺得係應該要去嘅～」

「Karson，我代表Michelle多謝你。」Felix有點過於鄭重地說。

「哈哈，傻啦～」我笑說。「我都係出去搞埋d野先，你出去未？」

「我想喺度坐多一陣先。」

我打開門離開房間。關上門的一刻，我瞥見Felix垂著頭，望著地毯發呆，個樣好似好迷茫。

我認識既Felix，係一個硬淨既男子漢，從來唔會輕易示弱，就算佢受到不同既問題困擾，外表睇落都好似無乜野咁，其他人根本唔會知道，原來佢係畀咁多野煩擾住。

不知為何，我忽然想到：Felix會唔會就係Michelle既情夫？

依家諗返轉頭，Felix好似成日都對Michelle特別細心，例如佢會記得Michelle有敏感，唔可以食海鮮……

Michelle死左之後嗰日，Felix無端端請左日假，所以我先有機會去見W商人……

我在此截停自己的思路——Michelle係一個已經逝世既人，死者已矣，於現實的人世，生者先係最重要既，所以Michelle既情夫究竟係邊個，我決定唔再諗落去。

我回到自己既座位，摒除雜念，專心工作，因為今日喺office最大既，就係Felix同我，所以我地兩個唔可以冧，我地一定要堅持住，直至郭Sir返黎！

第二日，我地收到消息，郭Sir喺泰國死左。

(第八章完)

給黃家欣 2017-7-31 13:50:15 正故

Elevens 2017-7-31 13:52:30

正故

Thanks

:^(

希望你可以給予正皮支持

:^(

Elevens 2017-7-31 13:54:26 (第九章：人妖殺人)

「一名香港人喺泰國既酒店遭人勒死，泰國警方拘捕一名變性人，懷疑與案件有關。」

「被殺既香港男子姓郭，四十三歲。據泰國警方指，死者於當晚邀請一位變性性工作者去自己下榻既酒店進行性交易，其間懷疑兩人因為收費問題而起爭執，最終死者被人以皮帶勒死，泰國警方已經於事後拘捕嗰名涉案既變性人。」

我在辦公室用iPhone重覆看著郭Sir被殺的新聞報導，內心百感交離。

首先，郭Sir係一個帶大我既老細，平日都算幾關照我，如今客死異鄉，我當然覺得傷心。

其次，喺我心目中，郭Sir一直都係正人君子，雖然無話正人君子唔可以叫雞，但郭Sir竟然會玩人妖，真係令我意想不到，而且因為玩人妖，竟然連條命都無埋……

最後，亦都係眼前最重要既，就係Simon講既野，似乎慢慢開始應驗。

如果正如我之前所諗，失蹤者身邊既人係被特務所殺，咁就好難講得通，因為之前Michelle係被男朋友所殺，而今次郭Sir係被人妖所殺，唔通依兩個兇手會係特務咩？

我因為Simon講既野而心緒不靈，而Felix同Jason同樣表現不安，一來團隊之中又有人死，感覺就好似中左魔咒咁，二來office又少個人，但工作量不變，真係做到人都癲。

「仆街！又send email黎講埋d廢話！」TT對著自己的電腦自言自語，一邊用手拍打在keyboard上。

「屌佢老母！咁撚多要求，去叫雞都比人彈鐘啦！」他繼續說。「仆佢個街！要我幫佢做咁多野，咪即係我連做雞都不如？」

TT仍然係比JPL個project搞到一頭煙，不過佢雖然爆晒粗，但今日既語氣好似特別爽。

郭Sir既死，對佢黎講，簡直好似開心多過唔開心……

Elevens 2017-7-31 13:54:58 由於郭Sir已經唔會再返黎，上頭會安排一個新老細接管我地既團隊，同時亦會派兩個member過黎，填補Michelle同樂仔既空缺。

「今次應該係堅既，」Felix說。「我問過人事部個friend，佢話安排緊，同埋priority都set得幾高，照咁睇應該好快會有人黎。」

雖然援軍應該就快到，但office始終彌漫住一股沉重既感覺，工作氣氛真係好差。

同事失蹤，上司死埋，加上排山倒海既工作量，我自問都就快頂唔住。

「Felix，我下奏要出去見一見客。」我說。

「哦，好吖，」Felix說，然後他猶豫了一下，欲言又止，但他還是說：「Karson，你下奏有客要見咩？」

「有呀，」我若無其事地說。「我應該好快搞店返黎～」

Felix知道我根本無客要見，但佢無再問落去。

雖然喺團隊忙到甩騼既時候，一個人走左去做自己野，係好無人性既事，但有d野，我一定要去搞清楚。

我按照約定，下奏再到牛角餐廳與Simon見面。同上次一樣，由於係落場時間，室內有一半燈熄左。

「我地睇到新聞報導，」Simon說。「喺泰國死左嗰個，應該係你既上司黎？」

「係，無錯。」我說。

Simon果然唔簡單，佢應該掌握住我地成team人既資料，並且一直都留意住我地既情況。

可以有咁大既監察力，唔通Simon既真正身份係一個便衣警察？但如果警方想聯絡我，點解唔用正式渠道，而要通過兩位隱藏身份既警員同我溝通？

Elevens 2017-7-31 13:55:17 「正如我所講，失蹤者身邊既人，會一個個咁死去，」Simon說。

「可能你覺得好難接受，但今次對我地黎講，只不過係歷史重演，所以都係我地預期之內既事。」

「你話日本都發生過類似既失蹤個案，」我說。「咁你可唔可以畀d資料我睇下？」

「我地有資料喺度，不過係日文既。」Simon望著我，見我無表示自己識日文，於是他轉而望一望Yumi。

「或者可以由Yumi口述，同你講下喺日本發生嗰幾單cases既情況。」

Yumi向Simon點了點頭，開始說：

日本總共發生過四單類似既失蹤個案，地點分別係廣島、神戶、福岡同埋佐賀。

第一單發生於二零一二年既廣島。

一名年約三十歲既男子與公司同事在居酒屋聚餐，之後無返到屋企，一直失蹤，而同佢一齊食飯既五位同事，全部於一個月內，由於各種原因而死去。

第二單發生於二零一三年既神戶。

同樣係公司聚餐，今次既失蹤者係一位女士，三十四歲，食飯食到一半既時候，突然收到電話，然後就話屋企有事要走先。

依位女士失蹤之後，同佢一齊食飯既八位同事，陸續因為各種原因而全部死去。

第三單發生於二零一四年既福岡。

失蹤者屬男性，二十五歲，於福岡牛角東比壽店與同事聚餐，中途有事離開。同佢一齊食飯既兩位同事，於兩個星期內相繼身亡。

第四單發生於二零一五年既佐賀。

失蹤者屬女性，與同事一起進食Shabu Shabu之後，與所有人失去聯絡。共餐既三位同事，其中兩位於事發後一星期內死去。

「咁重有一個呢？」我問。

「第四單發生於佐賀既失蹤事件，有一位生還者。」Yumi說。「但我地無太多佢既資料，只知道佢係一名男性。我地並唔清楚佢依家既去向。」

Elevens 2017-7-31 13:56:16 我一邊用iPhone的記事簿功能mark低資料，一邊在內心分析：四單都係同事聚餐。每隔一年就爆一單，到二零一六年就停左。

「簡單黎講，所謂身邊人死去，即係共餐既人都會死啦？」我說。

「無錯，你可以咁講。」Simon說。

「咁最直接既原因，就係佢地食既野有問題，可能係食物中毒。」我說。「你地有無調查過佢地食左d咩？」

「佢地光顧既餐廳，全部都係屬Kabu Japan旗下，」Simon說。

「如果你講緊一般既食物中毒，基本上無咩可能，因為中毒既徵狀應該好快出現，最遲一星期內已經會見到。」

「再講，死者既死因各有不同，不過無一單係毒發而死。」

「根據合理推論，失蹤者及死者都曾經進食過Kabu Japan供應既食物，所以我地懷疑事件係同mancow有關。」他續道。

「但我地無實質證據，亦都establish唔到任何邏輯關係，點解進食者會因為咁而死亡。」

「全部都係同事聚餐……」我細心地想著。「你知唔知道，死者係屬於咩公司既？」

「我地查過，佢地既公司業務不外乎金融及科技業，但搵唔到當中有咩邏輯關係。」

「……會唔會係商業謀殺？」

「遇害人士既重要性，遠遠不足以構成商業謀殺既條件，」他說。「我諗起碼要係管理層或者董事中招，先有機會係商業謀殺。」

Elevens 2017-7-31 13:56:40 我聽著Simon否定各種可能性，不禁覺得有點氣餒。

「其實Yumi重有少少統計資料，或者你可以聽埋佢講先。」

Yumi與Simon交換一個眼神後，又再開始說：

「四宗個案夾埋，死者一共有十七位，」Yumi一邊看著手機上的資料一邊說。

「其中九位被他殺，三位自殺身亡，兩位死於交通事故，一位死於心臟病發，餘外兩位死於其他原因。」

「咩其他原因？」我問。

「一位係畀鄰居所養既土佐犬活活咬死，」Yumi說。「另一位係暴雨警告下堅持行山，結果遇上山洪暴發身故。」

「九位被他殺的個案中，兩位被男女朋友所殺，兩位被同事所殺，被親戚和鄰居所殺的各一位，其餘三位分別被不認識的人殺害。」

「上述十七位死者當中，最早喺失蹤事件發生之後第一日就已經死去，而最遲就係四十六日之後。」

說著，Yumi以一種有點抱歉，又有點擔心的眼神望著我。

計起上黎，距離樂仔失蹤，已經過左差不多一個月。

即係話，如果再搵唔到解決方法，根據過往經驗，當日曾經與失蹤者共餐既我，就可能只剩返十幾日命……

「我地手頭上既資料大概係咁多，已經講晒畀你知，」Simon說。「剩低落黎就要靠你自己努力，如果有需要幫手既話，你可以嘗試聯絡我地。」

「大佬，我可以點樣自己努力呀？」我不禁問。

Simon想了一想。

「坦白講，我都唔知，」他說。「但關鍵應該在於你嗰位失左蹤既朋友，如果你有辦法搵到佢既話，就可能解開到目前既困局。」

(第九章完)

長期長旗 2017-7-31 14:19:53 好正, 加油

Elevens 2017-7-31 14:50:34

好正, 加油

Thanks，我會繼續寫落去

:^(

Elevens 2017-7-31 14:51:20 (第十章：某君的癖好)

如果你既人生只剩返十幾日命，你會選擇用僅餘既時間做咩？

旅行？與愛人共渡時光？約老朋友聚舊？說出心底裡從來不敢說的話？

而我離開牛角之後，選擇回到公司繼續搏殺……

始終Yumi講既資料，只係一種簡單既統計，並無任何科學根據，都唔知信唔信好。

但正如Simon所講，成件事既關鍵係樂仔失蹤，而只有一個人曾經同我講過佢知道樂仔去左邊，依個人就係已經死去既Michelle。

咁其他人呢？會唔會有人收到料，但無share出黎？正如我知道筆槍同埋mancow既事，但一直都無同任何人講。

次日，我搵左Felix入房密傾，希望探下口風，睇佢知唔知道樂仔既下落。

「我有單野想同你講返，問一問你既意見。」我說。

「咁啱既，我都有單野想同你講喎，」Felix說。「咁不如你講先啦。」

於是我將Michelle被性騷擾既事，同埋佢臨死前打電話比我既野講畀Felix聽。

但我始終無將筆槍同埋mancow既事講出黎，因為太過匪夷所思，我驚Felix會唔信我。

Elevens 2017-7-31 14:51:47 「原來嗰日Michelle係畀郭Sir性騷擾……」Felix說。「我見佢行出郭Sir間房，個樣好似好驚咁，問佢咩事又唔答，跟住佢就行左出office……」

「先旨聲明，我並唔知道依單野係咪真有其事，因為一切都係Michelle單方面講，」我說。「如今兩位當事人已經去世，我唔想誣捏佢地當中任何一位。」

然後我將Michelle當日既電話錄音播放畀Felix聽。

「我接到依個電話嗰陣，都覺得十分之莫名其妙，」我說。「我聽到Michelle既語氣好惶恐，以為佢比郭Sir搞，點知佢無端端提到樂仔。」

「我唔清楚Michelle話我同佢有罪到底係咩意思，」我主動澄清。「我同Michelle一直都只係普通同事，並無任何超友誼關係。」

我見Felix無回應，於是我繼續說：「其實樂仔失蹤左咁耐……你有無收過任何關於樂仔去向既消息？」

原本一直沉思著的Felix，此刻好像忽然醒過來。

「點解你覺得我會知道樂仔去左邊？」他說。

「我絕對唔係懷疑你，Felix，」我認真說。「樂仔既失蹤係一單奇案，因為連閉路電視都影唔到佢行出洗手間。」

「但你覺得唔覺，自從樂仔失蹤之後，我地office好似發生左好多事？」

「Sorry……我完全唔明你想講咩……」他說。「你係咪想話，Michelle既死係同樂仔有關？」

「Karson，你係咪知道d咩呀？」他接著問。

「我覺得，依家我地就好似跌左入一個迷陣咁，」我說。「我唔想講得太神怪，但最近有好多野太難解釋……」

「例如，我地隊team短時間之內死左兩個人，咁啱就喺樂仔失蹤之後發生，點解會咁巧恰呢？」

「我覺得成單野，關鍵就喺樂仔身上……我知道你會覺得好奇怪……但我覺得一定要盡快搵到樂仔，如果唔係，情況可能會繼續落去……」

「咩情況繼續落去呀？」他說。「你意思係，重會有人死？」

我答唔出。

「邊個會死？」他說。「我同你？」

我繼續沈默。

「Karson……你係咪睇得《死神來了》太多呀？」

Elevens 2017-7-31 14:52:11 如果說出筆槍同埋mancow既事，應該可以令Felix對成個情況有更清晰既理解，不過經考慮後，我仍然決定守口如瓶。

「Felix，你可唔可以簡單d答我，你知唔知道樂仔既下落，或者你諗唔諗到佢會去左邊度？」我正式道。

Felix睇得出我係認真既，於是他說：「我可以好簡單直接咁答你，我唔知樂仔去左邊。」

「樂仔失左蹤之後，我同Michelle都試過打電話比佢，但係都無人聽。」

「我完全無收過樂仔既回電，或者……我係話或者，樂仔有回電畀Michelle，」他說。「可能就係因為咁，所以Michelle知道樂仔既下落都唔出奇。」

我覺得Felix的分析頗有道理，但Michelle點解無端端話我有罪？莫非……樂仔之所以失蹤，其實係同我有關？

「不過話時話，有一次喺條街度，我重以為見到樂仔……」Felix說。「我見到個背影好似，於是我上前拍佢膊頭，先知原來係認錯人。」

「又有一次，我喺office以為聽到樂仔講野。」他續道。「我好肯定係樂仔把聲，但唔知點解當我擰轉頭，又唔見有人喺度……」

「總之，雖然樂仔已經失左蹤，但我硬係覺得佢好似重有喺office行出行入咁。」

我一邊聽著Felix說，漸漸開始覺得背脊發毛。雖然四周燈火通明，但氣氛好似突然陰森起黎。

我向來相信靈體既存在，而靈體同人類係兩條平衡線，基本上永遠不會相交，除了一些特殊情況，例如靈體有訊息想傳達畀人類知……

但我趕緊在腦海中排除靈體的想法，因為我直覺覺得樂仔未死。我地要搵既，係一個活生生既樂仔。

「Sorry，我唔知道樂仔既下落，所以你嗰邊，我真係幫唔到手……」Felix說。「我嗰邊就最近發現到d野，雖然同樂仔無關，但都想畀你睇下。」

Elevens 2017-7-31 14:52:40 Felix拿出一隻俗稱「手指」既USB儲存器，再用電腦檢視「手指」內的資料。只見螢幕上頓時出現大量相片的縮圖。

縮圖雖小，但都睇得出好多係偷影女性行街既相片。有些相片係影胸，但大部份都係影腳，當中有幾張好似重係偷拍裙底。

「依度只係其中一少部份。」Felix說著用滑鼠將scrollbar往下拉，螢幕上繼續顯示出海量的相片縮圖。

Felix打開其中一張偷拍女性的街相，說：「你知唔知依度係咩地方？」

我睇得出背景係日本街道，因為有好多日文字。

「依度係大板既天神橋，」他指著相片中的餐廳說。「我認得依間壽司舖，全日本只此一間，個地址就係喺大板既天神橋入面。」

說著，他又打開了另一張偷拍女性的街相，再問我一遍同樣的問題。

我認得圖中既蜘蛛雕塑。「依度係六本木。」我說。

「無錯，依個位就係東京既六本木之丘。」

「Karson，你記唔記得我地條team入面，有邊個經常去日本玩呢？」

我諗起Happy Friday當晚傾計，好似有傾過TT去日本旅行既野。

「TT囉，佢好似啱啱先去完大阪黎。」我說。

「無錯，佢年頭去完東京，啱啱去完大阪，」他說。「依隻手指就係屬於阿添既。」

「尋日阿添用依隻手指將JPL既資料交畀我，但佢應該唔記得左，自己影落咁多唔見得光既相，擺左喺隻手指入面。」

我懷疑依d相只係從網上download落黎，於是我問：「d相會唔會唔係佢自己影架？」

「你睇埋落去就明。」他說著再將scrollbar往下拉，然後打開其中一張偷拍女性的街相。

「依度係我地公司樓下，」他說。「你應該認得d招牌啦。」

然後他又再將scrollbar往下拉，打開相片，說：「你睇下依張相。」

Elevens 2017-7-31 14:53:04 相片的背景是辦公室檯和灰色地毯。一位穿著短裙的女性坐在椅上，右腳在鏡頭以外，左腳小腿往後屈，腳尖觸地，足踝從半鬆著的平底鞋露了出來，從拍攝的角度，甚至可以睇到小小腳趾。

Felix按下鍵盤上的右鍵，螢幕出現下一張相片，是該位女性的側身照……我不禁抽了一口氣：係Michelle！

「嗱，你都睇到啦，」Felix說。「依度係我地office，佢居然連Michelle都影埋。」

他繼續按下右鍵，螢幕交接出現著更多Michelle的偷拍照。

「依d相擺明係阿添影架啦。」他說。「條友又咁啱去完東京同大阪，照我估計，頭先嗰d日本既偷拍相，同埋公司樓下既相，全部都係佢影既。」

我一時有點怔著，答不上Felix的話。

「d相未睇完架，」他說。「睇埋先，重有架。」

他關上載著偷拍照的資料夾後，打開旁邊另一個載有其他相片的資料夾。

我看到相片縮圖內有一個半裸既女仔，但依個女仔既臉部輪廓好似怪怪哋，表情太過呆滯，身體既姿勢亦都唔係好自然。

當Felix打開相片時，我才看清楚，依個女仔並非真人，而係一個像真度甚高既充氣娃娃！

他將scrollbar一路拉落去，只見依個充氣娃娃著住唔同既衫，有水手服、日本女僕服飾、比堅尼泳裝。攝影者將充氣娃娃擺放成不同姿態，再從不同角度將充氣娃娃影下來。

「你睇下依張。」Felix說著又打開了一張相片，只見充氣娃娃口中被放進了一個紅色球狀口塞，兩邊連住一條帶，綁到頭後面，使口塞不會跌下來。

在他打開的另一張相片中，可以見到充氣娃娃不單戴了口塞，還戴上了黑色眼罩，SM味甚濃。

「依個充氣娃娃應該喺日本買既，」他說。「拉落下面可以見到張收據，你可以睇下。」

Felix打開一張影了收據的相片，只看到收據的item欄位寫了一行日文字，price欄位則寫了78，後面跟左幾個零。

最初我以為係七萬八，睇清楚之後發覺，竟然係七十八萬！如果以「七算」的日元匯率計算，折合港幣五萬五千元左右！

「痴撚線……」我不禁說。「原來依d吹氣公仔咁差貴架？」

Felix繼續將scrollbar拉落去，睇到重有其他「玩具」，不過就再無咩特別野。

估唔到TT原來中意玩充氣娃娃，但依樣野係人地既私事，屬於人地既自由選擇，與旁人無關。

反而嗰d偷拍相，如果真係TT本人影既話，咁佢可能已經犯左法。

據我所知，香港並無針對偷拍既法例，一般會控以遊蕩罪、在公眾地方內擾亂秩序行為罪或者係有違公德罪，全部都係刑事，當中以有違公德罪刑責最重，一旦罪成，最高可以判監七年。

「Karson，睇完d相之後，你覺得應唔應該報警？」

其實我做人向來都係多一事不如少一事，既然人不犯人，我亦無必要去干犯其他人。有時d野，真係睇到當睇唔到算數。

但既然Felix咁樣搵得我，似乎佢已經預左要搞大佢，所以我決定唔正面回應Felix既問題。

「咁你打算點做？」我反問Felix。

Felix向來係一個雙目有神既男人，我唔知此刻佢係心存公義，定係因為Michelle被偷拍而感到憤怒，甚至係因為上次畀TT原爆而懷恨在心，總之他說：

「我打算報警。」

(第十章完)

長期長旗 2017-7-31 15:25:17 會有幾多章到

:^(

你冇鳥好好笑 2017-7-31 15:26:33

有無巴打覆下我呀

:^(

:^(

:^(

可以繼續

:^(

你係第一個應我既人，多謝你

:^(

:^(

:^(

創作係需要鼓勵

:^(

加油

❚•‿•❚ 2017-7-31 15:30:46 睇哂 應該仲有一章？

Elevens 2017-7-31 15:33:23

會有幾多章到

:^(

大約會有25至30章

:^(

Elevens 2017-7-31 15:33:57

有無巴打覆下我呀

:^(

:^(

:^(

可以繼續

:^(

你係第一個應我既人，多謝你

:^(

:^(

:^(

創作係需要鼓勵

:^(

加油

:^(

:^(

Elevens 2017-7-31 15:35:58

睇哂 應該仲有一章？

重有，現在post埋，或者你都可以去facebook專頁睇

https://www.facebook.com/一場公司飯局，我們的命運從此改寫-1867399503524286/