[賀歲故]有咩癲得過年三十晚跌咗入搶頭炷香嘅輪迴
第 1 頁
下一頁
黑犬風易
2023-1-24 22:41:03
序
香港傳統,每逢新年,總有瘋狂喜劇上映。
即使唔好笑,但至少貪個氣氛,熱鬧下都開心。
既然電影可以賀歲,點解文字唔得呢?
今年,同大家搞搞新意思,試下從文字之中尋找賀年氣氛。
上頭炷香乃是香港新年必備習俗,
而今年因應疫情放寬而開放嘅黃大仙廟,
就成為咗一眾善信再次投入搶頭炷香嘅戰場!
想要喺黃大仙廟搶頭炷香嘅主角,
喺神明幫助之下,
陷入一場明槍暗箭盡出,暗算奸計不惜工本,
周而復此生生不息的頭炷香爭奪戰之中!
故事單純胡鬧,劇情不講理只講氣氛,一切,都只不過是為了開心!
特別備註:故事所有人物地點純為創作之用,並無影射,唔好對號入座啊!
Ads
黑犬風易
2023-1-24 22:41:41
是咁的,我去咗黃大仙廟準備搶頭炷香。
我作為一個廿幾歲嘅有為青年,理論上,年三十當然應該喺屋企好好瞓一覺,然後第二日大年初一就可以去親戚屋企大殺四方逗利是同埋回應啲姨媽姑姐嘅靈魂拷問。
但係,呢一刻我居然並唔係喺溫暖嘅被袋入面,反而嚟到呢個煙霧迷漫、人頭湧湧嘅黃大仙廟門外準備搶頭炷香。
雖然辛苦,但係我一啲都唔後悔。
因為,我今日一定要搶到呢一炷頭炷香。
黑犬風易
2023-1-24 22:41:57
黃大仙廟今年嘅上頭炷香安排,係要善信喺黃大仙廟外嘅廟宇廣場排隊,然後一到夠鐘就會敲鐘俾大家入廟上香。
往年上香都只不過係一班人排喺香爐前面,「鐺」一聲鐘聲響起,大家就鬥快手插枝香落去,一切就係咁簡單。
今年咁樣安排,嗱,聽落好似又為公眾好,又為防疫好咁,但其實我諗都諗到,講真,咪又係有成堆人迫喺廟入面。
只不過,呢個改動最重要嘅就係,所有人都出去廟宇廣場排隊等,咁即係上頭炷香呢件事就會由鬥快手插香,變成鬥快手跑步入廟。
即係話,呢場將會係一場短跑賽。
疫情三年嚟都無機會俾人搶插香,作為鍾意咩都爭一餐嘅香港人,我預咗今年一定爭崩頭,所以我一早已經做定哂準備。
早喺三個月前,我已經專登日日遲到出門口迫自己從追巴士嘅過程之中練短跑。
跟過參考保特嘅起跑、跑姿同埋動漫節嘅「反智轉身」,我已經幫自己練出一種速成嘅短跑能力。
唔好講笑,經過三個月之後,我嘅體能同爆發力明顯進步,甚至有時仲可以跑得快過架巴士。
只不過通常我都會因為嗰下「反智轉身」睇漏眼,結果都係伸唔切手截車所以上唔到車。
大Boss
2023-1-24 22:42:07
LmLM
:^(
矢久保美緒
2023-1-24 22:42:11
lm
黑犬風易
2023-1-24 22:42:11
正所謂「工欲善其事,必先利其器」,除咗跑步方法之外,我亦都為今日嘅頭炷香買好咗一套全新嘅跑步裝束。
喺我身上嘅,係最新推出嘅奧運一百米選手專用跑步套裝,「保特2023」。
流線形嘅背心、超級緊身嘅「現袋」貼身短褲,再加上一對符合腳型嘅跑鞋,一身嘅打扮可謂無往而不利。
跑步練習、裝束都準備好之後,另一個重要嘅事先工夫,就係搶頭位。
呢一點,對於我嚟講毫無困難。
我預早一個月已經見工入咗去黃大仙廟申請做Intern,職位係「廟務助理」,簡稱「打雜」。
所以,做足一個月,其實我目的就係方便自己可以身處喺廟內霸定頭位。
而喺呢一刻,我已經攝好咗喺用嚟攔住群眾嘅紅線後第一行,輕鬆咁從我背囊拎嘢食出嚟食住等。
天時、地利,基本上已經掌握在我手中。
當然,即使我有再好嘅準備,其實都係未夠嘅。
因為,呢場搶頭炷香嘅比賽,仲有一個決定性因素。
無錯,就係我在場嘅對手。
碼糕黃
2023-1-24 22:42:22
趺兩次
黑犬風易
2023-1-24 22:42:29
呢樣嘢因為無得準備,所以我只要靠大概仲有十五分鐘嘅時間去觀察一下其他我潛在嘅對手。
暫時睇落,同我同時企喺第一排嘅人有幾個,我係喺呢行嘅右二,而我右邊企咗一個著住風褸用帽笠住個頭,而且仲著住短褲嘅男仔。
左邊,就係企咗一個高我一個頭,而且好大隻,企得阻頭阻勢嘅。
而亦都因為呢個大舊衰,所以我唔係好望到其餘三個人到底係點樣。
只不過,就咁睇同一行呢幾條蛋散都應該唔會夠我跑。
而無論對手係邊個都好,我今日嘅目標都只係有一個,就係,搶到頭炷香。
我相信,憑我苦心修練嘅速度、再加上精心準備嘅裝束,我唔係針對邊個,不過我敢講,今日黃大仙廟內嘅各位都係垃圾,無人可以爭贏我!
「啪!」
我眼前一黑,一件衫突然笠住咗我個頭。
我一手拎開件衫,先發現喺嚟自我右邊嗰個男仔嘅風褸。
就喺我望向呢個露出咗樣貌嘅男仔嘅時候,我不禁成個下巴跌咗落地下。
因為我認得,呢個男仔就係香港奧運代表隊少有出現嘅一百米參賽運動員,楊家朗。
雖然佢喺奧運無得到咩成績,只不過佢算係香港少有可以有資格參加奧運田徑嘅選手。
除咗咁樣,我仲望到佢身上嘅衣著。
「保特 2023S」。
情迷巨石強森
2023-1-24 22:42:38
:^(
黑犬風易
2023-1-24 22:43:09
「保特 2023S」專為運動員而設,只有生產商提供先會著到,有錢都買唔到。
單單係佢嗰條比女人嘅瑜珈褲更緊身,差不多將屁股束到分成四份嘅流線型設計,我已經知道……佢急尿嘅話條褲一定除唔切,同埋呢條褲一定唔少嘢。
當我呆咗咁望住楊家朗嘅時候,佢都向我望咗一眼。
佢上下打量咗我幾秒,笑咗一聲,就將頭擰開咗,然後拎咗手中一罐Red Bull慢慢飲。
楊家朗嘅笑容,令我諗起小學坐我隔離枱嘅死肥仔。
想當年,作為窮苦學生嘅我日日都淨係可以拎住一個文具店十蚊個,印咗一隻好似中咗幅射嘅卡通狗嘅筆袋翻學。
但係某一日,死肥仔佢無啦啦拎咗一個筆盒出嚟。
呢個筆盒,有幾個制。
㩒其中一個制,成排鉛筆會好似導彈咁打斜升起;再㩒另一個制,鉛筆刨會自動彈出。
當我望住呢個筆盒望到呆咗嘅時候,死肥仔就對住我笑咗一下。
呢個笑容,exact7ly就係楊家朗頭先嘅笑容。
兩個笑容之中,同樣表達出佢哋對我呢啲貧苦人家嘅不屑。
雖然俾人睇低,雖然輸個下馬威,雖然實力懸殊,但係,我唔打算放棄。
我都係嗰句,我理得你楊家朗、楊貴妃定楊明,總之,我今年,一定一定要搶到呢個頭炷香翻嚟。
黑犬風易
2023-1-24 22:43:25
呢個時候,我望一望手錶,發現時間已經嚟到「23:59:40」。
仲有二十秒,呢場不足五十米嘅頭炷香短跑大賽就會開始。
我見到,廟祝已經拎定個鐘企咗出嚟門口,準備一夠鐘就敲。
我感受到,我自己嘅心跳跳得好快。
而呢個時候,我隔離嘅楊家朗都做緊熱身,仲將隻腳放咗上個頭,睇落信心十足咁。
而我唯一可以做嘅,就只有暗暗希望,佢隻腳會咁啱抽筋放唔翻落嚟,咁我嘅勝算就會大啲。
無謂嘅嘢已經唔到我諗,因為距離踏入年初一嘅時間已經不足十秒。
而我,亦都準備好我嘅起跑動作。
然後,望實手錶,靜靜地睇住佢倒數。
另一隻手,就揸實咗我準備要用嘅香。
放心啦,阿香,我一定會令你成為今年第一枝插入香爐嘅頭炷香!
Ads
黑犬風易
2023-1-24 22:43:43
5、4、3、2、1。
「鐺」!
鐘聲一響,我立即快步跑出。
但係,我同一時間感受到有一陣風喺我身邊吹過。
然後,下一刻我見到嘅,已經係楊家朗嘅背脊。
唔通,呢個就係凡人同運動員嘅分別?
我心志稍為受挫,速度亦都慢咗一啲。
結果,當我跑到香爐插入枝香嘅時候,已經有五枝香插咗入去。
而同時間,我聽到楊家朗已經企咗喺不遠處接受緊一擁而上嘅電視台訪問:「係啊,我希望今年我喺國際田徑比賽有更好成績,證明俾世界嘅人睇,香港田徑運動員係得嘅!」
係,香港運動員係值得支持,但如果只係靠插枝香就有好成績,C朗就唔洗去沙地阿拉伯搵食啦。
不過,呢刻講咩都無用,因為我真係失去咗呢枝頭炷香。
我望住我嗰枝已經俾後上嘅人埋沒咗嘅香,無奈咁嘆咗一口氣,然後擰轉身就走。
黑犬風易
2023-1-24 22:44:08
點知一擰轉身,我突然發現,本來好嘈好迫嘅廟入面竟然無哂人。
而我唯一望到嘅,就只係得一個留咗一執長鬍鬚嘅男人企咗喺度。
「啲人去哂邊啊?」我好驚訝咁問。
長鬍鬚佬無答我,只係一邊摸住自己啲鬚,一邊問我:「你知唔知我係邊個?」
我望一望佢一身嘅打扮,一身紅色長袍,仲有佢臉上完全唔係現代人會留嘅鬍鬚,再加上佢身上自然散發嘅一陣氣勢。
我諗,我知佢係邊個啦!
「關公!你係關公!」我好驚訝咁叫咗出嚟。
「豈有此理?」長鬍鬚佬反哂白眼叫咗出嚟,「你光臨我廟上香,卻竟然不認得我,實在係荒天下之大謬!」
聽到呢句,我望一望長鬍鬚佬個樣,再轉身一眼望入去廟內嗰一尊好大嘅黃大仙像度。
嘩,100% match,簡直仲似過何韻詩同盧巧音,又或者哈林同庾澄慶。
咁即係話,喺我眼前呢個男人,就係傳說中嘅黃大仙?
(故事待續)
定型水
2023-1-24 22:46:49
新故留名
:^(
黑犬風易
2023-1-24 22:46:54
咁多位巴打絲打大家好,我又翻嚟啦
:^(
今次其實係見新年,所以寫個短短地嘅故事賀下歲
:^(
預期每1、2日出一次,如果達到加更要求就出快啲~
不過慢慢出我都無所謂,反正都係一個輕鬆故,都係想大家笑下
:^(
寧靜海
2023-1-24 22:51:02
新故留名
:^(
:^(
黑犬風易
2023-1-24 22:51:31
加更目標:
200正評
達到加更,當日會立即加更一章
:^(
放低其他故嘅Link 俾新讀者慢慢追翻上個故
:^(
我放低link先 如果大家鍾意喺連登睇 起我底一樣搵到以前舊故㗎
:^(
【穿越/愛情】我同鍾意咗十一年嘅人表白,佢竟然跳海死咗
Penana:
https://www.penana.com/story/63218
【寫實/愛情】(出咗實體書啦!)我專門幫人擺分手和頭酒
Penana:
https://www.penana.com/story/66301
【科幻/懸疑】你以為Flycation呢件事真係咁簡單?
Penana:
https://www.penana.com/story/76137
【初戀/愛情】《副校長發現我寫甜故,竟然送一段初戀俾我》
Penana:
https://www.penana.com/article/635866
【暴走/搞笑】《求婚嗰日-我發現我女朋友鍾意食屎》
Penana:
https://www.penana.com/story/90310
【人性/鬥智】《尖東遊戲//坐上尖沙咀開出嘅列車之後,我被送咗入一場死亡遊戲》(出咗實體書,可見於各大書局!)
Penana:
https://www.penana.com/story/99588
【童年/二創】《我是出木杉,我要對大雄復仇》
Penana:
https://www.penana.com/story/99588
最後留低埋樓主IG,大家有興趣可以去嗰邊催迫樓主加更,仲有得睇埋呢個故嘅「作者前言」同埋其他故事相關嘅嘢,IG限定㗎
IG : windblowssilently
默颺讀者交流TG group:
https://t.me/+jD_eY63Yb5I0MmQ1
謝拉美利拉斯
2023-1-24 22:56:15
LM
:^(
:^(
:^(
:^(
:^(
寧靜海
2023-1-24 22:57:08
有無人同我一樣一開始覺得係恐怖故
:^(
:^(
:^(
救命鍾意呢個故
:^(
夠痴線,不過講真啲神像個個一擔擔~擺一堆神像喺我前面都唔知邊個打邊個
:^(
不過!天份真係講天份,有動漫轉身加持都輸
:^(
:^(
:^(
11315315
2023-1-24 23:10:18
:^(
尚下左友
2023-1-24 23:13:52
樓主好似冇抖過
:^(
:^(
btw 新故lm
:^(
Ads
舞淺
2023-1-24 23:21:19
:^(
頭炷香都比你寫到勁緊張嘅短跑比賽
唔比正皮都唔得啦
鐘出舞蘭道
2023-1-24 23:22:36
LM
:^(
:^(
:^(
:^(
dalekcann
2023-1-24 23:29:02
新故留名
:^(
連豬好得意
2023-1-24 23:29:09
留名支持
:^(
第 1 頁
下一頁
序
香港傳統,每逢新年,總有瘋狂喜劇上映。
即使唔好笑,但至少貪個氣氛,熱鬧下都開心。
既然電影可以賀歲,點解文字唔得呢?
今年,同大家搞搞新意思,試下從文字之中尋找賀年氣氛。
上頭炷香乃是香港新年必備習俗,
而今年因應疫情放寬而開放嘅黃大仙廟,
就成為咗一眾善信再次投入搶頭炷香嘅戰場!
想要喺黃大仙廟搶頭炷香嘅主角,
喺神明幫助之下,
陷入一場明槍暗箭盡出,暗算奸計不惜工本,
周而復此生生不息的頭炷香爭奪戰之中!
故事單純胡鬧,劇情不講理只講氣氛,一切,都只不過是為了開心!
特別備註:故事所有人物地點純為創作之用,並無影射,唔好對號入座啊!