深夜甜品 2022-10-18 11:13:56 私心自己推到去第三頁先

:^(

香江第一淫棍 2022-10-20 02:42:31

:^(

鐵拳無敵鍾培生 2022-10-20 05:35:07 哩啲咸濕啊叔死撚咗佢算啦

深夜甜品 2022-10-20 11:20:35 慘在現實中最後判到罪嘅只係佔少部份

深夜甜品 2022-10-20 11:28:40 4. 留一天與喘息

｛留一天與你喘息—陳卓賢｝


「無論世界有幾咁黑暗，我都會一直拖住你，迎接晨曦來臨。」

呢句說話係尋晚我同佢困喺學校儲物室嘅時候，佢拖住我隻手，望著我雙眼對住我講。雖然漆黑之中我睇唔清楚佢嘅表情，但係從聲線可以聽得出佢係誠懇發自內心的。

而家佢隔住電話，問我記唔記得尋晚佢講過呢番說話。

「我記得吖…」我哭著說。

「你唔會呃我㗎可？」我內心，希望可以聽到佢親口講唔會。

「傻瓜，我點會捨得呃你，我應承過你㗎嘛。」

「無論發生咩事都好，我都唔會放開你隻手，我會拖實你同你一齊面對。」佢再補充道。

我無諗過，佢俾我嘅答案，會遠超過我心中所期望嘅。雖然唔係面對面聽到呢番說話，但係我都覺得好窩心，一種甜絲絲嘅感覺，慢慢衝破緊我內心嘅苦澀。

或者佢同曾皓賢最大嘅分別，係在於我可以感受到郭家朗嗰份認真同坦率，唔會隨便口甜舌滑，雖然只係識咗佢好短時間，但佢就以橫空出世嘅姿態，直接闖入我嘅世界，一次又一次咁將我從深淵扯返出嚟。

「你而家肚唔肚餓？我陪你食啲嘢好唔好？」而佢嘅嗰份溫柔，我無辦法抗拒到。

「嗯…」我想見到佢。

「我哋喺邊度等…？」雖然我唔係好肚餓。

「你打開門，就會見到我。」佢唔至溫柔，有時仲會有種霸氣隊長嘅感覺，搞到我個心係度小鹿亂撞。

其實嗰一晚，佢除咗坦白同我解釋佢出現喺排球隊儲物室嘅原因，同埋向我表白之外，佢仲同我講，前日我哋俾訓導主任罰完留堂之後，佢見我俾我叔叔拖住，感覺到我好似有啲唔妥，於是就喺後面偷偷地跟蹤我哋，最終發現原來我哋係住響同一幢大廈，跟住我問佢你住邊層吖，我先知道原來我哋係上下層嘅鄰居。

之後佢好奇問返我，既然係上下層嘅鄰居，點解咁多年返學放學都冇見過我，我同佢講，其實我媽咪前年同我爹哋離咗婚，之後我哋一直冇地方住，只可以暫時喺親戚屋企寄人籬下。

直至上年暑假，我媽咪同我講，佢終於搵到個地方可以住得舒服啲，就係搬入嚟同呢個叔叔一齊住，點知原來呢個係我惡夢嘅開始，我為咗避開呢個人，平時好早就出門口返學，放學又好晏先返屋企，所以應該係咁嘅原因，即使我哋係鄰居，但從來未相遇過。

就係因為咁，佢知道我住邊度，可以直接出現喺我屋企門口等我。我怔一怔，然後即刻起身落床，用濕紙巾抹乾臉頰上嘅眼淚，同埋痴喺大髀上面嘅污糟嘢，再著返好條校裙，簡單咁梳返好啲頭髮，不過就冇時間紥返好佢哋喇，最後拎埋電話銀包同鎖匙，踢住對人字拖就衝咗出房，直奔向屋企大門。

一打開門，就見到一個高我成個頭嘅男仔，著住排球隊校隊波衫，孭住黑色運動背囊，企喺我面前同我揮手打招呼。

其實，喺我入校隊之前，我已經覺得男子隊呢套海軍藍配金色邊嘅波衫真係好有型，佢哋著住呢套咁靚嘅波衫出去同其他學校打比賽，士氣都肯定會勝人一籌，只係呢剎那我覺得，郭家朗佢著呢件波衫，比任何人更加有型。

我一面靦腆咁望住佢，同佢四目相望，佢向我露出一個陽光笑容，一時之間，我忍唔住噗通一聲跌咗入佢懷抱之內，佢伸手輕輕咁接住咗我。唔通呢種就係小鹿亂撞嘅感覺？我誤打誤撞，俾我遇上咗呢個男仔，總係可以喺我最唔開心嘅時候，俾到適時嘅溫暖我。

呢一刻，我可以近距離，確切咁感覺到佢嘅心跳，佢個心好似越跳越快吖。然後，我都感覺到我個心，都跳得好快，但我唔想俾佢知我心跳加快，於是乎即刻退後一步，脫離佢嘅懷抱，誰不知原來自己成塊面已經一早紅晒。

「佢仲喺入面？」郭家朗細細聲問我。

我點點頭。

果然佢真係估到我頭先遭遇嘅經歷，但係我好感激佢能夠只係用簡單一個問題，就可以確認到我嘅狀況，但係又唔使我主動講發生咩事，呢點完全顧及到我嘅感受。

「我哋走？」佢以平時隊長嘅語氣，再配搭對我嗰種嘅溫柔地說。然後，緩緩向我伸出右手。

「嗯～」我接住佢隻手，你去邊，我就跟住你去邊。

佢知道我唔夠膽擰轉身閂返屋企度門，於是幫我輕輕閂好，佢連呢一點都可以貼心照顧到我感受，郭家朗你再係咁，我呢隻小鹿就會亂撞撞到暈底㗎喇。

就係咁，佢拖住我隻手，行喺我面前，我就喺佢後面跟住佢。一前一後咁經過走廊，行到電梯大堂。雖然我睇唔到佢個樣，佢亦都睇唔到我個樣，但係咁都好吖，至少我唔想俾佢睇到我怕醜個樣吖。

搭緊𨋢嘅時候，我忽然諗起一樣嘢，於是問郭家朗：「你頭先入𨋢嗰陣，電話咪會收唔到囉？」佢笑笑口咁答我：「傻瓜，我點會捨得收線啊，我直接跑樓梯衝上嚟搵你㗎！」

我聽到佢咁講，個心又一陣甜意湧至，情不自禁地捉實佢隻手，輕聲細語地說：「你先傻～練完波咁攰仲要跑廿幾層樓梯。」

即使，佢知道我唔係一個純潔嘅女仔，但係佢都依然肯對我咁好，我可唔可以自私啲請求你，帶我永遠離開呢片充滿傷感嘅地方。

深夜甜品 2022-10-20 11:43:43 感謝巴打一直支持住個POST

:^(

深夜甜品 2022-10-21 11:04:56 5.我心中的未崩壞的部份

｛我心中的未崩壞的部份—黃妍｝


我哋由屋企門口，一直行到屋苑商場，都係緊緊拖住對方對手，但當經過一間藥房嗰陣，我問佢可唔可以喺鋪頭外面等我一陣，我想入去買啲嘢好快出返嚟。

「你想買啲咩？」佢側頭疑惑咁問我。

「總之你喺度等我喇～」我唔想俾佢知道，甩開隻手衝入藥房。

入到藥房之後再轉個彎，熟練地埋到櫃枱同個老闆細聲講咗兩句，然後佢叫我喺門口貨架攞支樽裝水過嚟，我跟住佢吩咐拎住支水，行返埋去俾埋錢之後，老闆就拆開包裝紙拎咗粒圓形藥丸出嚟，同我講而家即刻食埋佢。

「咕嚕」一聲吞咗落肚之後，跟住老闆就長嘆一聲，我都明吖，因為我都唔係第一次搵佢，亦都係因為咁，所以佢先會對我放下戒心，就算我冇醫生紙都肯幫我。

「老闆我可唔可以同你買包紙巾吖。」我唔可以入嚟藥房但係兩手空空咁離開，會俾郭家朗懷疑。

「你自己喺個架度攞一包喇！送俾你喇！」其實老闆佢好好人，起碼唔會好似其他鋪頭啲老闆咁趁機笑我兩句，我成日都喺度諗如果佢係我爹哋就好。

「唔好喇，呢度兩蚊～」我放低兩蚊俾佢就同佢揮揮手講再見，只係聽到佢喺我離開嗰陣又長嘆一聲，隱約聽到佢講：「唉！呢個傻妹！咁細個就…」

我行返出去搵郭家朗喺邊，見到佢企咗喺隔離鋪頭門口等緊我，我拎住包紙巾喺佢面前攘咗兩下：「我唔記得帶紙巾吖，所以先要買一包。」我始終有啲心虛，所以先要專登解釋。

不過郭家朗未等我講完，已經幫我袋咗支水喺背囊，然後拖返實我隻手，根本就冇懷疑過我入藥房係咪有其他原因。或者可能佢心裡面都覺得奇怪啩，但只少佢冇講出口問我，咁我就可以繼續埋藏呢個秘密。

我同佢講，其實我未係好肚餓，佢話咁不如我哋沿住海傍散下步。跟住我哋就開始漫無目的咁行，我同佢都冇理過要行去邊，一個著住校隊波衫嘅男仔，同一個著住校裙但踢住拖鞋嘅女仔，如果俾其他同學或老師撞到都唔知點算好，但係兩個人喺夕陽光暉同海浪聲嘅陪伴之下，手拖手咁一齊散步，都幾浪漫吖。

我耐唔耐就會忍唔住偷偷地望佢，不過好快又會俾佢發現，搞到我即刻擰返轉面，然後就會感覺到自己對耳仔紅晒。無幾耐，我發覺唔知係因為佢高我太多，定係我自己姿勢唔啱，拖得耐咗我隻手臂好似有少少攰，所以我輕輕鬆開了手，再翹住佢隻手臂，身體微微咁挨落佢度。

嗯，咁樣好似舒服啲。但係我始終覺得當下發生緊嘅事好似發緊夢咁，明明前一個鐘我俾一個大叔蹂躪，但呢一刻我居然可以同我哋學校排球隊隊長拖住手散步。

我默默享受緊佢對我嘅溫柔嘅同時，我又響度諗，雖然我哋互相向對方表咗白，但係我哋表完白就冇再進一步確認男女朋友嘅關係，或者可能只係我一廂情願，我好擔心呢種曖昧關係，會隨時突然之間消失得無影無蹤。

但係如果佢唔開口問我，我更加唔敢主動開口確認我哋嘅關係，我只係覺得，我又唔係一個冰清玉潔嘅女仔，咁我有咩資格去要求佢愛我，做我男朋友。雖然呢一刻我依然仲可以拖實佢隻手，但呢個身體觸碰嘅感覺好似既真實，又唔真實，越諗就越覺得矛盾。

「我可唔可以做你女朋友吖？」我好想問佢吖，但係開口到去嘴唇邊，我又格硬塞返呢個說話落肚。

咁… 如果佢突然間問我呢？「你不如做我女朋友喇！」我又應該要點答佢好？


「嗯，好吖！」咁答好似太過平淡喇！

「你係認真嘅？」傻咗咩王樂兒，你咁即係質疑佢？

「我想做你女朋友好耐㗎喇！（誠懇樣子另加雀躍小跳步）」嗯，王樂兒你咁樣會唔會有啲假？


不如直接撲入佢懷抱算喇？吓，咁如果喺餐廳面對面坐嗰陣佢先嚟問呢？唔通我要跨過枱面啲食物，飛入去佢懷抱？

點算吖，我諗唔到吖，最衰平時自己睇開嗰啲動漫都係啲懸疑、推理、咒術同暗殺，再唔係就係主角天生有超能力然後日日喺度中二病發作，而家想借橋參考吓人哋愛情故事入面啲女主角係點樣接受男主角求愛都唔得。

我哋會唔會永遠只係維持喺呢種曖昧關係㗎？即係嗰種咩友達以上，戀人未滿嘅關係，但係我哋拖緊手喎，吓咁會唔會其實我只係佢嘅偷情對象？

我開始覺得自己響度鑽緊牛角尖，仲要越諗越離譜，於是乎我猛咁敲自己腦袋，逼自己唔好諗咁多。

郭家朗見我突然間響度打自己個頭，停低腳步，正面咁望住我。

哇好樣衰啊。俾佢發現咗我啲小動作…

點知佢伸手摸摸我個頭，安慰我說：「小妹妹，再打就會有老人癡呆症㗎喇。」我嘟起嘴回道：「邊有咁誇張吖！」講完我先發覺自己把聲好嬌嗲，同平時嘅我一啲都唔同，耳仔應該又紅晒㗎喇我估。

忽然靈光一閃，我感覺到而家係一個機會，要把握追問佢：「咁如果我真係有老人癡呆症，你係咪會唔要我？」言下之意即係我哋成為情侶，甚至結成夫妻，經過咗金婚同鑽禧之後，某一日發現我有咗絕症，唔記得咗佢，佢會唔會唔要我。

王樂兒你內心小劇場會唔會演得太遠喇！？你想人點答你啫？

點知郭家朗收起原本笑咪咪嘅表情，擺出一副認真嘅模樣，雙手拖住我對手，然後對住我講：

…

…

…

「如果有一日你有老人癡呆症唔記得咗我，我會再追多你一次做我女朋友。」


啫係，你一早已經當咗我係你嘅女朋友？

搞錯吖，唔早啲講。

搞到我亂咁諗嘢。

隨即我腦海一片空白，身體不由自主咁撲向佢懷抱，伸出臂彎緊緊抱住佢。

「衰人！你唔早啲講嘅？」我塊面貼住佢胸膛，細細聲咁問佢。

「吓？講咩？」佢一面疑惑咁反問返我。

「你專登嘅！講我係你女朋友吖…」我向佢撒嬌道。原來，撒嬌係唔使專登扮出嚟，當情到濃時就會控制唔到自己聲線。

「咁…你願唔願意做我女朋友？」可能因為我挨咗喺佢胸口度，所以我感覺到佢呢句說話嘅聲線有一種好性感嘅磁性，顯得格外動聽。

我諗都唔諗，即刻應承佢：「願意！」瞇埋眼猛咁點頭，一下一下咁撞咗落佢心口度。

…

…

我諗，小鹿亂撞應該就係咁解？

香江第一淫棍 2022-10-21 19:19:23

:^(

深夜甜品 2022-10-21 20:49:32 啱啱吸收咗某位前輩嘅意見，需要啲時間去做修改，所以下星期更新可能會慢少少，希望大家唔好介意

:^(

大家鐘意睇嘅話不妨俾個like，啊唔係，係正評同回覆先啱

:^(

Thanks thanks

:^(

鐵拳無敵鍾培生 2022-10-22 01:33:57 好sweet

:^(

:^(

深夜甜品 2022-10-24 12:51:26 6. 難道我還未夠難

｛難道我還未夠難—葉巧琳｝


「聽朝一齊返學，早啲出門口買埋早餐返去食？」返到屋企之後無耐，郭家朗打俾我，佢話要傾到我瞓覺為止，因為佢擔心我又會遇到啲唔開心嘅事。

「嗯，好吖。」雖然我哋隔住電話，但佢只係住喺我下面嗰層，我哋睡房個間隔又係一樣，感覺上就好似住喺同一間複式單位咁。佢同我講，只要我伸手掂落地板，佢又同時伸手掂上天花板，我哋就可以拖住手。

「我瞓覺喇～早抖。」

「聽日見。」

＊＊＊＊＊＊＊＊＊＊＊＊

第二日朝早，我比平時更加早起身，梳好個頭，落足心機紥好條孖辮，化咗少少淡妝，搽好唇膏之後，換埋條校裙就出發，一開門差啲嚇親我，見到郭家朗粒聲唔出咁，擺晒甫士挨住咗喺我門口對面幅牆度，搞到我忍唔住笑，有冇必要咁型吖你。

我哋買咗一人一份三文治做早晨，郭家朗問我想唔想喺學校Canteen一齊食埋先上班房，但係我擔心如果比其他同學見到會唔係咁好，於是乎我哋去到走廊就講拜拜，各自番返自己班房入面。

行到去班房門口嗰陣，我已經聽到班房入面傳出一陣陣嘈吵聲音，原來係班同學圍住黑板上面幾張相喺度議論紛紛，我一頭霧水咁探頭望吓有咩好睇，仔細一望發現總共有六張相用磁石貼痴住響度，全部都係影住嘅係排球隊儲物室正門。

第一張係保安叔叔開門嘅畫面，第二張係一個著住校服嘅男仔推開度門四圍張望嘅模樣，第三張就係個男仔轉身入返儲物室，最後三張都係個男仔拖住個著住校裙嘅女仔喺儲物室走出嚟。雖然啲相唔算好清，但都足夠認得出相入面嘅女主角就係我，因為全班得我一個係紥孖辮，而且全部都係菲林相有晒日期時間做註腳。

「張相個女仔咪就係王樂兒？」戴住眼鏡嘅男仔接住講。

「似係喇！我之前都話，早兩日咪俾訓導捉過佢夜晚匿喺學校...」一個著住背心冷衫嘅男仔手舞足蹈咁分享緊佢嘅見聞。

「睇唔出原來王樂兒係咁淫，咁係咪啫係佢同呢個男仔喺學校過夜？」另一個生得矮啲肥啲嘅男仔插嘴。

我聽到佢哋講嘅嘢開始越嚟越難聽，突然之間控制唔到情緒向住佢哋大嗌：「我冇吖！！！」跟住衝入人堆將啲相搣晒落嚟，直接扔喺最近嘅垃圾桶裡面，當大家發現原來我喺度之後，就各自扮冇事散開。

扔完啲相，我擰返轉頭見到啲磁石貼因為我頭先搣相太大力，搞到佢哋跌到一地都係，我望住佢哋喺地下覺得好內疚，於是就踎低身，逐塊逐塊咁執返起佢哋，執執下我發現，我隻手一直喺度顫抖，地下亦都多咗一滴又一滴嘅眼淚。

我強忍住眼淚，執好啲磁石貼痴返喺黑板之後，就耷低頭行返埋位，僕低頭喺張枱度喊，但係我唔想俾啲同學知道我喊緊，我用盡力壓低自己身體抽搐嘅幅度。

我冇？我點會冇吖，根本上就係完全俾人揭發咗件事出嚟。我諗返起，嗰晚區嘉桐同訓導主任入到嚟儲物室，雖然我同郭家朗匿咗入更衣櫃裡面，冇俾佢哋當場發現，但始終我個書包漏咗喺外面俾區嘉桐見到，所以佢更加肯定當時我係在場，只係好彩最終訓導主任放棄繼續搜索，我哋先至逃過一劫。

嗰晚家朗同我講過，佢估道木門係區嘉桐故意閂埋，佢亦都擔心區嘉桐會喺第二朝專登埋伏喺儲物室正門等我哋行出嚟，假如佢真係咁做，其實我哋都冇任何對策可以破解，唯一方法係家朗先行出儲物室，確認四周無人再叫我出嚟，最後分開各自行返自己班房。

我哋慶幸嘅係，嗰朝早區嘉桐並冇出現，我哋以為喺無人發現之下成功走得甩，但原來我哋錯了，仲要係徹底咁錯。所以，影呢幾張相嘅應該就係區嘉桐。

「若要人不知，除非己莫為！」我聽到前面有把女聲字字鏗鏘咁嘲諷緊我，抬高頭一望，就係區嘉桐本人，我俾佢見到晒我喊緊個樣，跟住佢好得戚咁行返埋佢個位坐。然後又見到曾皓賢孭住背囊行入班房，佢察覺到我唔妥，就即刻衝埋嚟我前面個位坐底問我發生咩事。

我只係擰擰頭講：「我冇事。」

佢再追問我：「冇事做咩喊到對眼紅晒？」俾佢咁講我先知道原來我喊到好明顯，正當想拎部電話出嚟照吓自己個樣嘅時候，學校大鐘就響起。

曾皓賢留低一句：「一陣再搵你講。」之後就即刻飛奔返佢個位度。

呢刻我只想盡快平伏返自己個情緒，同時希望越少人知道越好。不過我都清楚紙係包唔住火，遲早全級都會知道，而且上緊堂嗰陣，我依然可以聽到啲男同學仲喺背後講緊我。

小息嗰陣，我行出去走廊，諗住吸下新鮮空氣，點知道區嘉桐走過嚟同我講：「我而家就去教員室將條片交俾訓導主任！等佢知道上一次唔係我屈你，係你真係有匿咗喺入面，仲要匿咗成晚！」區小姐啊，其實我都冇得罪過你，點解你成日都針對我，喺排球隊又係咁，喺班上面又係咁。

而我本能反應只係慌張咁衝上去，求佢唔好咁做，縱然呢個可能就係區嘉桐想見到咁嘅場面。

「區嘉桐！你同我企喺度！」就喺呢刻，郭家朗唔知響邊度走出嚟，擋喺區嘉桐面前喝住咗佢。

「做咩吖郭家朗？唔通你想打我吖？王樂兒佢冇做過嘅怕咩人知？」區嘉桐理直氣狀咁頂撞返郭家朗。

走廊啲同學開始望住我哋，我未見過郭家朗個樣咁嬲，就連上次頂撞訓導主任嘅時候都冇咁嬲，我好驚佢會衝動做錯事。我睇得出其實區嘉桐由頭到尾都係針對我一個，所以我唔想拖埋郭家朗落水，我唔想因為咁而令到區嘉桐討厭佢，我唔想因為咁而俾班同學估到相入面個男仔就係佢，然後對佢指指點點。

我用我僅餘嘅氣力扯一扯區嘉桐衣袖，細聲咁求佢：「我去自首吖，你可唔可以唔好交條片出嚟。」只見郭家朗瞪大眼睛望住我，意思係問我係咪傻咗？

咁呢一刻我都冇得揀㗎喇。

呢個時候，曾皓賢走埋嚟我哋度，喺區嘉桐耳邊淡淡然講咗幾句，然後就繼續行去廁所方向，跟住區嘉桐眼神向我閃過一下怒光，之後就氣沖沖咁急步行返入課室，當下我同郭家朗四目交投，大家都摸不著頭腦，但估到應該係曾皓賢唔知講咗啲咩，令到區嘉桐收手。我細細聲同郭家朗講：「你返去先喇，我冇事㗎喇。」佢應該都知道咗再留喺度只會製造更多花生，於是聽我話擰轉頭入返班房。

第二次小息嗰陣，我捉住曾皓賢行出走廊，搵咗個冇咩人經過嘅角落，問佢究竟同區嘉桐講咗啲咩，佢擺出一副笑瞇瞇嘅表情望住我講：「因為我知道區嘉桐嘅秘密，但係呢個秘密幾乎冇人知道，所以我威脅佢如果交片嘅話，就會將呢個秘密話晒俾全班知。」

我好奇地追問：「咁係咩秘密？我可唔可以知㗎？」

佢左右張望查看四下確實無人之後，再哄埋喺我耳邊細細講：「佢暗戀郭家朗。」然後佢再補充：「因為王樂兒你啊，係公認全班第二靚啊嘛，而且你係行清純可愛路線，佢妒忌你搶緊佢鍾意嘅人。」

啊，原來曾皓賢都睇得出我同郭家朗有嘢，咁又係嘅，佢識咗我咁耐，點會估唔到我諗咩吖。不過我內心好感激可以有曾皓賢呢個朋友幫我哋解圍，就算我而家同緊郭家朗拍拖，我都希望可以繼續同佢保持住好好好好朋友嘅關係。只不過就算今次唔使驚動到訓導主任，但係班同學已經知道咗我匿喺學校過夜，呢樣嘢就冇人幫到我解決㗎啦，只能夠透過時間慢慢沖淡。

深夜甜品 2022-10-24 13:20:58 俾佢哋sweet多一陣喇

:^(

深夜甜品 2022-10-24 16:35:12 發現自己將「早餐」手殘打錯咗做「早晨」

:^(

鐵拳無敵鍾培生 2022-10-25 01:15:13 腎仔有腦過朗哥好多

:^(

:^(

深夜甜品 2022-10-25 12:42:36 其實副校長都有話過佢㗎

:^(

「但又讚我心腸好，肯幫同學，只是出發點正確但方法用錯blablabla一大堆人生哲理...」。———副校長語錄

希望佢日後會有進步喇

深夜甜品 2022-10-26 16:31:50 7. 所有遺失的東西

｛所有遺失的東西—泳兒｝


我曲膝挨住床邊坐底：「你今朝做咩咁嬲吖？」

「因為我一知道區嘉桐咁樣恰你，我就無名火起，我唔會俾佢得逞。」從郭家朗嘅語氣，可以聽得出佢仲未消到啖氣。

「唔可以吖。」我嘆道。

「...同埋我哋喺學校嘅時候，可能都要見少啲，如果唔係啲人就會估，相入面個男仔係你。」發生咗呢件事已成定局，我更加唔敢講，上次佢頂撞訓導主任嗰件事鬧到咁大，已經引起班上面一啲揣測。

「不過好彩啲相唔夠清咋，影唔到你個樣。」所以點都好，我唔想連累佢。

「影到咪又由佢影到，我寧願同我呢個咁可愛嘅女朋友一齊承擔後果，都唔想你下下都要自己一個攬晒啲痛苦喺身。」佢語氣帶點不忿，雖然我哋喺呢件事上面達成唔到共識，不過佢都有遷就我嘅意願，盡量喺學校嘅時候少咗見面。


於是時間就係咁，一日一日咁過。

喺屋企，佢每晚會主動陪我傾電話，所以即使屋企得返我同叔叔兩個人獨處，佢都可以知道我嘅安全。不過就算叔叔偶爾對我做啲咩，我都寧願呃住佢，因為我始終好驚佢會覺得我好污糟，然後揼低我。再加上，以佢衝動嘅性格，可能會直接衝入嚟同叔叔當面對質，我唔希望俾媽咪知道呢啲事，我唔想搞到媽咪再次失去依靠。

我好理解媽咪佢好需要呢個叔叔嘅經濟支持，如果唔係我哋依然仲屈居喺親戚屋企，至少而家我叫做可以有自己間睡房，所以我選擇繼續啞忍，喺佢面前做返一個正常可愛嘅女朋友。

但喺學校，我唔敢同佢走得太近，而間唔中我仲會聽到啲男同學喺我背後講啲好難聽嘅說話，我有聽過啲人話我係PTGF，又討論我係唔係處女，最過份嘅試過有人問我今晚放學又要同邊個男仔過夜，我以為時間可以沖淡呢啲閒言閒語，但原來每次聽到都仲係會好難受。

有時候，當啲同學講緊我是非嗰陣，曾皓賢會故意拉走我，同我講啲無厘頭嘅笑話，我問佢：「你咁樣做，唔怕啲同學喺背後講你咩？」佢嘅反應係…

「怕咩啊？王樂兒你唔好次次都諗住自己一個人承受晒所有嘢啦。」曾皓賢揚一揚眉，笑著對我說。

點解佢同郭家朗講嘅嘢咁似。

＊＊＊＊＊＊＊＊＊＊＊＊

轉眼間踏入十二月，校際排球比賽響呢段時間進行得如火如荼，但自從我哋女子組喺八強出咗局之後，就剩返男子組繼續向住爭冠目標邁進。

當其他年級已經開始放緊聖誕假嘅時候，係得我哋中六生今日仲要返學補課，我諗住趁小息行出走廊透吓氣嘅時候，陳柏希急步行過嚟拍拍我膊頭：「王樂兒，終於搵到你！你聽日真係諗住唔嚟睇我哋比賽？」

「嗯，要溫書吖，過埋聖誕假就要考MOCK。」男子組決賽喺聽日平安夜嘅中午十二點舉行，之前淘汰賽嗰陣我已經冇去到，我怕我會影響佢表現，但係我更加怕要同觀眾席啲同學或者隊友一齊坐，所以我婉拒咗陳柏希嘅好意。

「咁啊？但係…如果你嚟嘅話，家朗落到場會更加有衝勁。」陳柏希個樣明顯係有啲失望，我知佢係想幫郭家朗說服我嚟睇比賽，但我之前已經同咗郭家朗講好咗，比賽嗰日我想留返喺屋企多啲。

「你再考慮吓啦，希望聽日見到你。」陳柏希見我喺度沉思冇出聲，就冇再強逼我應承佢去睇比賽。

唉，我都係唔去喇，我去到又咪係自己一個人孤伶伶咁坐喺觀眾席，曾皓賢又唔鐘意睇運動比賽，一諗到要同旁邊啲同學相處，甚至乎可能又喺我背後講我點點點，我寧願留喺屋企自己溫書。

呢晚我同郭家朗講唔使傾電話喇，我想佢早啲瞓，抖足精神聽日比賽。

而既然難得聽朝唔使返學，我喺度諗不如唔好較鬧鐘，瞓到自然醒算，但係唔知聽日比賽會點呢，諗吓諗吓就迷迷糊糊咁瞓著咗。

第二朝，我俾窗邊隻雀仔吱吱渣渣唱歌咁整醒咗，我擘大對眼第一件事係摸吓部手機擺咗喺邊，然後睇吓而家幾點。

—11:41 AM—

喔，原來已經係十一點幾喇，比賽十二點正開始，咁即係佢哋已經喺體育館入面熱緊身喇，我再望下排球隊同6A班個Whatsapp群組，有成三四十條未讀訊息，啲新訊息仲喺度不停咁彈緊出嚟。

我㩒入去睇吓佢哋講緊咩，首先過濾咗一堆「未起床啊」、「仲搭緊車啊」、「我到喇！你哋喺邊啊」等等嘅報到式對話之後，再碌落去就開始見到體育館場內嘅相，同埋班同學喺觀眾席合照嘅相，然後終於到班男仔賽前熱身嘅相。

只要張相入面有佢，我都會放大嚟睇。

我攤喺張床度睇住佢啲相，過咗一陣，我發覺自己竟然睇到入晒神，明明今日應該係要做返啲正經野，就係溫書！呢刻我好似聽到心入面有把聲同我講：「喂！起身啦王樂兒。」

「好囉！唔睇囉。」於是乎我扔低部電話，然後出盡全身氣力掙脫綿被嘅包圍，行去廁所刷牙洗面同梳返好啲頭髮，喺塊鏡面前，我望住自己個樣，剩係見到一個面容憔悴嘅女仔，我雙手拍拍自己臉頰。

嗯，振作啲啦，王樂兒。

我行返去睡房，閂埋房門，拎返張綿被包住自己，坐低開始溫書，但係對住枱面本中文書，掀起掀去都唔知溫咩好，掀掀吓去到《出師表》嗰頁，我又諗返起嗰日郭家朗喺操場度幫我包紮傷口，然後叫我send個默書範圍俾佢當做補償，跟住我就忍唔住望吓手機睇吓有冇佢嘅新相分享出嚟。

唉，咁樣溫書都唔係辦法，不如攞啲Past Paper出嚟做吓算啦，但做做吓我又停低支筆，左手托住個腮長嘆一聲，我諗起曾皓賢之前同我講，唔好咩都自己一個承受晒。我望住啲短訊，可以想像得到佢哋而家個比賽氣氛肯定好熱鬧，但再望吓自己面前份Past Paper。乜...我真係想溫書咩？

時鐘上面嘅秒針，滴答滴答咁移到十二點鐘方向，比賽終於開始啦，你要加油啊知唔知。

我索性熄咗電話個熒幕，嘗試逼自己集中返精神落份Past Paper度，不過做唔夠兩題又攞返出嚟睇，我對住個熒幕唔知等咗幾耐，仍然都係冇新訊息或者新相彈出嚟，我不自覺咁又長嘆一聲。

唉，王樂兒你喺度做緊咩啊。

算啦，既然集中唔到溫書，不如去廚房搵啲嘢食填下肚，妨且我由起身到而家都仲未食過嘢，個肚都開始有啲餓餓地。我著返對白色毛毛拖鞋行返出睡房，但隱約聽到收音機喺度播緊天氣新聞：「受到東北季候風影響，天文台預料本港氣溫將會顯著下降，預料市區氣溫最低為十二度...」

頭先喺睡房溫書嘅時候，我一直用張綿被包住自己個身，但係而家我剩係著住件Hoodie同短褲，行出廳嗰陣已經覺得有啲寒寒地，頭先梳洗嗰陣都冇咁凍㗎，點解突然間凍咗咁多㗎。

但咪住先，明明今朝屋企應該剩係得我一個人，媽咪同叔叔理應一早出咗門口返工，點解無啦啦會有收音機響嘅？我望一望叔叔間房係閂埋咗，再確認埋廁所門都係閂埋咗，客廳一眼望晒冇人喺度，仔細一聽，收音機聲正正喺廚房傳出嚟，我戰戰競競咁向住廚房方向，一步一步咁探路，但因為廚房位處於客廳左面嘅轉角位，呢一刻我冇辦法望到入面係咩狀況。

當我越行越近嘅同時，收音機聲亦都越嚟越響。

直至我行到轉角位，正準備轉入廚房之際，收音機就喺呢一瞬間靜止咗。

而我眼前見到嘅，係一個著住白色長袖底衫，灰色綿質長褲嘅中年大叔，企咗喺廚房裡面摵緊香蕉皮。

同埋笑瞇瞇咁望住我。

深夜甜品 2022-10-26 16:34:45 希望星期五可以再出多一篇，然後維持到逢星期一、三、五出文，感謝各位賞面支持

:^(

:^(

深夜甜品 2022-10-26 16:57:51 趁冇咩人經過，順便整理多次啲傳送門先

:^(

紙言
殘酷暗戀物語
https://www.shikoto.com/i/bfD7
殘酷暗戀物語（二部曲）
https://www.shikoto.com/i/bfFW
殘酷暗戀物語【最終部曲】
https://www.shikoto.com/i/bfUY

Penana
殘酷暗戀物語
https://www.penana.com/article/914550
殘酷暗戀物語（二部曲）
https://www.penana.com/article/915961
殘酷暗戀物語【最終部曲】
https://www.penana.com/article/930287

Instagram（係啊我連IG都開咗喇，遲啲會放啲感想文上去）
https://www.instagram.com/midnightdessertstory/

鐵拳無敵鍾培生 2022-10-27 00:07:25 仆街喇

:^(

:^(

樂兒走呀！

深夜甜品 2022-10-27 16:30:23 由於第八章字數太多，我決定將佢斬開上下部份，今晚凌晨出咗一篇先，聽日晏晝再出埋下一篇

:^(

大家可以聽住歌先啦。

https://youtu.be/cWQ99uzuqJ8

深夜甜品 2022-10-27 23:45:52 8. 人類群星閃耀時（上集）

｛人類群星閃耀時—柳應廷｝


「叔叔...？」我聽到自己聲線原來抖震得好緊要。

「做咩啊，見到我咁驚嘅下？」佢一路講，一路摵香蕉皮，同時一步一步咁向我逼近。

「冇...我冇吖...」我下意識跟住佢步伐，慢慢咁向後退開，右手扶住牆邊確保自己唔會絆倒。

「今日凍成咁，但你就著咁少衫...」佢由上而下咁打量我全身，眼光停留喺我對腳，又去返我塊面度，我連忙用雙手將我件hoodie盡量扯低啲。

「一早都話你係淫蕩㗎啦！！！！」突如其來嘅大聲呼喝，嚇到我腳步錯亂，前腳絆倒後腳，一下子身體失去平衡，屁股重重咁墜落喺地板上。

「啊，好痛！」我感覺到盤骨落地嘅瞬間好似碎裂咗咁痛。

我仲未嚟得切去反應係咪真係跌親盤骨，佢已經快步上前，㩒住我個頭，將嗰條摵好咗嘅香蕉，夾硬塞入我個口度。嗰個感覺既熟悉但又好難受，當條香蕉闖入我口腔嗰陣，我啲牙好確切咁刮咗落去，同時間伴隨住非常濃重嘅腐臭味道。

／／啊…好核突嘅感覺啊！

我抬起頭望到佢嗰下面有難色，隨即眼神轉為凌厲，然後出力扯住我啲頭髮，將條香蕉強行塞到最入，直接頂住我喉嚨碇。嗯唔...每次去到呢個位，都會有種好強烈嘅反胃感覺，直情想嘔出嚟咁，今次亦都唔例外。

跟住佢扯住我啲頭髮，身體前後前後咁連續擺動，我本能反應係用雙手不停拍打同推開佢大髀，但係完全冇任何作用，我再嘗試不停用雙腳踩實地下向後撐，希望可以擺脫到佢，不過換嚟嘅只係佢更加用力咁扯實我啲頭髮，我好幾次以為啲頭髮會就咁俾佢扯斷咗落嚟。

唔通我真係只可以咁樣任由佢為所欲為？呢一年我已經忍咗好多次，但係佢就一次比一次更加變態同粗暴。我試圖偷睇佢月曆表上面嘅記號去判斷佢邊日要返工，係返日更定係夜更，再諗辦法點樣專登晏啲返屋企去避開佢，但係似乎呢種方法已經俾佢察覺到，有好幾次我以為佢返咗工點知原來仲喺屋企，仲要係靜雞雞咁匿喺屋企等我毫無防備之下先嚟…

「你估王樂兒仲係唔係處女啊啦？」

「我估就唔係啦。」

「嘿！我都係咁話。」

係吖，我係冇咗第一次，就係因為佢，我先會冇咗我嘅第一次，我永遠都冇機會留我嘅第一次俾我男朋友，係永遠啊！！我同郭家朗拍拖以嚟，我都唔敢同佢太過親密，就係唔想俾佢確認到呢個事實，呢個永遠都冇辦法再改變到嘅事實。

「哈哈哈哈！死女包！今次冇人嚟救你㗎啦！」吓唔通佢呢次連郭家朗要打校際排球決賽都計算在內？點解佢可以變態到咁，密謀深算去靜待呢個機會，就係為咗要咁樣對我。

我唔想再俾自己麻木去接受呢種凌辱，我唔想自己習慣咗每次完事之後抹返乾淨就當冇事發生過，我唔想俾佢以為我好好恰可以任佢為所欲為，於是我，合埋眼，鼓起勇氣，用盡力豁出去一啖咬落去／／／／好噁心嘅感覺。

「嗚哇哇哇，你個死女包！！咬我竟然！？」終於成功掙脫咗呢件噁心嘅物體。但係隨之而嚟係一巴掌接住一巴掌咁刮落我塊面度，而且一下俾一下更加疼痛。突然間，我好似成個人俾佢凌空抽起咗，再重重咁撻咗喺牆邊，佢好似痴咗線咁對我拳打腳踢，越打越起勁，我開始感覺到有股熱騰騰嘅鮮血湧至我口裡。

／／／我係咪會俾佢打死？

我聽人講過，每個人死之前腦海都會閃過跑馬燈，回顧返人生遭遇過嘅經歷，如果可以嘅話，我想剩係要郭家朗同埋曾皓賢嘅片段得唔得？

忽然間我右手摸到地下有件硬物，我完全冇印象佢係咩嚟，更加唔知點解佢會出現喺地下，我執起佢，下一秒鐘直接用力揮向佢腳踭位置。我諗，呢個位應該係最脆弱嘅部位？隨即我聽到一聲慘叫，但我已經無暇理會係咪真係整傷到佢，就馬上連爬帶跑撲向大門，扭開門鎖拔足直奔至樓梯間。

推開防煙門後，我依稀仲聽到佢粗獷嘅呼喊聲，我唔敢回頭望返後面佢有冇追上嚟，只管沿住樓梯一級一級繼續向下衝，我發現原來自己隻右腳喺赤腳咁跑出嚟，隻右腳毛毛拖鞋一早唔知跌咗喺邊，但而家根本冇可能調轉頭上返去執返隻鞋，更莫講話我連銀包電話同鎖匙都冇帶喺身就衝咗出嚟。

我聽見樓梯間除咗我之外再冇其他腳步聲響，於是膽粗粗抬高頭望上去，只係得盤纏扭曲嘅樓梯欄杆，我再回頭望落下面，眼前影像亦只有一個深不見底嘅黑洞，如果呢刻有人喺我後面推我落去，我肯定跌到會粉身碎骨，但係相比之下，我寧願向住呢個黑洞繼續進發，因為我相信只要越近洞底，就只會越變得光明。

深夜甜品 2022-10-28 12:00:15 8. 人類群星閃耀時（下集）

／／／／終於見到底了。

再一次推開防煙門之後，已經落到嚟樓下電梯大堂，同時間有個表情呆滯嘅保安叔叔望住我，我唔敢喺大堂停留半步，我怕保安認得出我，或者隨時一開𨋢門就會見到佢衝過嚟捉返我上去。我冇奢望過會有任何人幫到我，於是我直接奪門而出，寒風隨即撲面而來，喺呢種冰冷刺骨嘅氣溫底下，如果我感覺到停低落嚟只會更加容易失溫，所以唯一辦法就係繼續向前跑，先至可以保持體溫，但係身邊嘅途人不斷向我投射怪異嘅目光，我唯有將hoodie頂帽笠住自己頭，耷低頭繼續向前跑，避開陌生人嘅視線。

但其實我冇可能改變到途人用咩目光去看待我，佢哋都只係轉瞬即逝咁出現喺我生命當中，何況大家只不過係冷眼旁觀咁用奇怪嘅表情望住我，根本上就冇一個人願意停留半步去了解我發生咩事，諗到呢點我索性停低落嚟，抬頭一望原來我已經喺體育館大門前面。

「好凍吖......」飢寒交逼之下，我將所有手指縮入衣袖裡面，雙手緊緊環抱住自己，盡可能將身體減少暴露喺凝結嘅空氣之中，但係當寒風吹落我大脾度嗰陣，就好似同時俾幾百支刺針穿透骨頭一樣咁痛，我怕自己真係會凍到暈底喺度，於是我唯有行入體育館避寒，跌跌撞撞咁走到去女更衣室，推開門之後，是但搵咗角落位置嘅板凳抱膝而坐，坐底咗先發覺自己發冷寒震得好緊要，同時間身體嘅痛楚亦都開始慢慢泛現......

／／／／／好辛苦...

更衣室四下無人，我希望呢刻唔會有人推門入嚟，咁我就可以安靜咁坐喺度逃避呢個世界。

唔得吖，因為我依然可以隱約咁聽到外面傳嚟一陣又一陣嘅歡呼聲，而且啲歡呼聲開始越演越激烈，我聯想起呢啲歡呼聲應該就係校際排球決賽，於是乎我默默咁坐低聽住佢哋嘅聲音，自己一個感受住比賽嘅高低起伏，又唔知隔咗幾耐，突然間一下笛聲長響過後，熟悉嘅打氣喊聲開始此起彼落，唔通…...佢哋已經贏咗？

我慢慢行出更衣室，順住聲音來源嚟到比賽場館，隔住木門上嘅玻璃窗偷偷地望入去，我見到班男仔衝埋去圍住佢，同佢互擁、擊掌、歡呼，佢呢刻嘅笑容應該係我見過笑得最燦爛嘅一次，跟住佢捧住個獎盃，開始同觀眾席嘅同學一齊影團體大合照，然後再到球隊合照，最後仲有同其他隊友、教練、評判、同學嘅個別合照，只係見佢全程不時四圍張望，唔知佢望緊啲咩。

再隔咗一陣，冷不防突然有人推開門，我嚇到縮埋貼喺牆邊，下意識耷低頭雙手掩面避開嗰個人嘅目光，跟住開始到班同學魚貫離場，喺我身旁逐一略過，我聽到佢哋喺度回顧返頭先比賽嘅精彩片段，有啲就喺度討論今晚平安夜要去邊度玩，即使我只係喺佢哋觸手可及嘅距離，但都冇人理會我嘅存在。

正當我諗住轉身離開人群嘅時候，我聽到一把熟悉嘅聲音喺我耳邊出現。

「王樂兒？你好啊～原來你今日有嚟到睇比賽...咦？你對鞋呢？做咩咁可愛著住毛毛鞋過嚟嘅？」係陳柏希認得出我。

「我...」我唔知可以點同佢解釋——其實我冇嚟到睇比賽，我一直留咗喺屋企溫書，直至叔叔逼我幫佢，我嘗試反抗，跟住佢打我，我再還手，然後離家出走，跑到嚟體育館匿咗喺更衣室，到比賽完結我先走出嚟偷偷望佢響度做緊咩，連自己幾時跌咗隻毛毛鞋都唔知道。

忽然間我面前出現咗一個高大嘅身影，將一對拖鞋輕輕放咗喺我面前，再踎底身幫我換走咗隻毛毛拖鞋，但對拖鞋明顯大過我著開嘅好幾個碼。然後呢個身影又喺背囊度摷咗一件長袖嘅校隊風褸出嚟，披喺我膊頭上面，成個過程一氣呵成之下完成。

「喂！你哋睇吓郭家朗隔離個女仔做緊咩？」

「嗰個女仔咁似王樂兒嘅？」

「喔！咪啫係隔離班匿喺學校陪仔過夜嗰條女？」

「啊…？但係你睇佢個嘴係咪流緊血？」

我冇講錯吖，我都話我嚟到就會聽到啲同學喺度講我咩咩咩，就係呢個時候佢好溫柔咁拖住我隻右手，轉身面向住班同學，將我擋喺佢背脊後面。

「收嗲喇你哋！你知道人哋遇過啲咩唔開心嘅事所以先要匿喺學校咩，你班友好心就唔好喺度自以為是，知得嗰少少就隨便惡意批評人，知唔知道咁樣對一個女仔造成幾大傷害！？」

「如果再有人想喺佢背後講佢壞話嘅，你直接過嚟搵我講。因為佢係我郭家朗嘅女朋友！」當佢講到女朋友呢三字嘅時候，明顯咁提高埋聲量。

「講完！」

我感覺到，頭先議論紛紛嘅聲音已經被郭家朗嘅氣場震懾到無影無蹤，有啲同學欲言又止，而有啲同學已經開始面有悔意，有啲用關心嘅眼神望住我，有啲只係頭耷耷咁轉身離開。

呢個時候，我顎高頭斜望住呢個拖實我隻手嘅男仔，佢回身望住我對眼，用埋隻左手拖住我剩低嗰隻手，我而家終於可以好清楚咁望到佢個樣，就好似一顆喺人群中閃耀緊嘅恆星一樣咁璀璨。

鐵拳無敵鍾培生 2022-10-29 11:54:01 樂兒

:^(

:^(

真係好勇敢

深夜甜品 2022-10-29 15:25:48 當日郭家朗跑樓梯搵佢
今次到王樂兒衝落樓梯

香江第一淫棍 2022-10-30 22:31:03 咁型，喺咁多人面前宣愛。

:^(