白卡佬A.K.A叛龍 2022-9-23 09:14:48 Er…，啱啱先上大專開到AC，喺隔離PNN過離。
Penana會同步更新。
https://www.penana.com/user/103219/%E5%8F%9B%E9%BE%8D
自介
癡線佬一個，想睇癡線野可以嚟睇下。
故事簡介
是咁的，我係中五嗰年識左班豬朋狗友，仲有埋寫野鋪癮，自此就無心向學，每日返到學校就係瞓，之後班主任都睇唔過眼，於是就安排左個女仔叫我起身，而我竟然…鍾意左叫我起身個女生。
PNN加更設定
---->[預設隔日更新，每5讚會即刻多更一篇(或者你留言敲一下讓我知道有人在看也可以，我這人很心軟)。
幫手share嘅我會好愛你。]
IG

:^(

an.Dragon.0221

白卡佬A.K.A叛龍 2022-9-23 09:18:39 IG係Pan.Dragon.0221
唔識用

:^(

Lets start
開學日
老實講，我對開學禮嘅睇法就係坐係個禮堂到聽個六十幾歲嘅阿伯講一堆廢話，返到課室再聽兩個班主任講一個幾鐘嘅廢話，簡直就係一種煎熬。

不過好彩，至少仲有一件事令我覺得好恩惠，就係開學禮嘅放學時間係十二點，而唔係平日嘅三點半，雖然COVID-19開始冇耐之後平日嘅放學時間就變成咗一點半，不過始終開學禮早咗一個幾鐘，總括而言都係唔錯嘅。

「叮噹！」

鐘聲響起歸家的信號，我一手將頭先派嘅所有野全部塞入櫃桶，順手孭埋書包，用凡人雙眼無可能跟上嘅速度向門口狂奔。

我將隻手伸向門鎖，係手指觸碰到門鎖嘅個一剎那，我好似感受到嗰種超越一切嘅自由。

但係下一秒，一切都化為烏有。

我個男班主任一野插隻手埋嚟撳住道門，用手指住坐係我隔離個女仔。

我轉身望過去，事實上係唔錯嘅，但就唔係我鍾意嗰一Type。

「你聽日開始，唔準睡覺，你一瞓，佢就會叫你起身。」

唔撚係呀，你認真架？

我O曬嘴咁望住男班主任，但係從佢堅定嘅扤頭，我可以知道佢係認真嘅。

唉，點解我會淪落到呢個地步。

原本嘅我係幾咁開心，但係聽完呢個消息，我個頭不自覺地垂咗落嚟。

白卡佬A.K.A叛龍 2022-9-23 09:19:38 First Day
因為疫情關係，而家唔洗係操場排隊同點名就可以直接上課室，我嚟到課室門口已經估到佢一定會黑曬面咁睥住我。

我好細力咁推開道門，希望唔好再刺激到佢，但係事實話比我聽我做嘅野係冇任何作用，佢望住我個眼神就好似想殺咗我一樣。

以前嘅我會一野扯張櫈出嚟，理得佢會撞到人定撞爛塊牆。

而家？我拉櫈嘅時間擦到塊地都會比佢鄙視，要將張櫈完全抽離地面佢先滿意。

終於可以坐低，我以為終於可以放鬆，點知下一秒佢就一手將我扯去佢耳邊。

「你最好唔好瞓着，小心我將你下面剪落嚟，再…塞返落你個嘴到。」

雖然講完佢就放咗我返去，但係佢就仲拎把鉸剪出嚟隔空剪咗幾下。

我係極度驚慌之下，靠住我對生存的意志保持清醒，不過只有…兩節。

始終琴晚我去酒吧飲到一、兩點先走，三點先返到屋企，邊有可能唔攰。

放小息嘅時候我瞓着咗，所以小息完嘅時候就係佢第一次叫醒我。

我仲以為佢會用力咁拍醒我，但係佢竟然出乎意料地好溫柔咁摸我個頭，雖然一擘大眼見到佢都仲係黑口黑面。

因為我同佢讀同一科，所以佢就順便等我一齊行落去地下上課。

都撐咗一個鐘，真係撐唔到落去，原本佢都有拍醒我幾次，但係經過我強大嘅口才發揮，我終於可以瞓一堂。

落堂之後佢冇即刻叫醒我，反而係等小息過咗五分鐘先叫醒我，話係一時唔記得咗我嘅存在，仲話我咁樣真係唔掂，之後就走咗去幫我買咗杯咖啡。

就係因為咖啡裡面嘅咖啡因加上佢一啲都唔好飲，我好成功地保持清醒直到放學。

我就肯定被佢搞到我有心理陰影架啦，不過好彩佢都仲有人性，比我瞓咗一堂，仲請我飲咖啡，呢個叫床服務點都有返五十分。

白卡佬A.K.A叛龍 2022-9-23 09:20:46 Second Day
今日嘅我比平日早咗少少起身，見有時間多咗，就係返學嘅途中買咗個包，仲係廁所裡面食咗枝煙，結果差啲遲到。

係我坐低果一瞬間，鐘聲就響咗，真係險過剃頭。

雖然避過咗遲到嘅留堂，但係包就應該食唔到。

我睇住隔離一直撳住個肚嘅佢，我估佢應該冇食早餐，就順手將個包遞咗比佢。

我原本以為佢唔會接，但係佢竟然出奇地接咗，仲兩啖就食曬個包，而佢都因為咁樣而一改以往嘅黑口黑面，笑笑口咁望住我。

原來，賄賂女仔係咁容易。

但我仲未嚟得切得戚，就已經比周公拉走咗，趴係張枱度瞓着咗。

唔知過咗幾耐，我Feel到有人輕輕力咁拍我個膊頭。

我抬起頭，周圍望咗一下，但係就完全冇任何人，剩返佢企咗係我側邊。

瞓到眼矇矇嘅我原本諗住問佢而家幾點，但係把口就問咗個唔同嘅問題。

「你叫咩名？」

老實講，我真係冇了解過班裡面啲人叫咩名。

「都同班咗六年，仲唔知我叫咩名，我係向晴啊。」佢反咗下白眼。

我捽咗捽眼：「而家幾點？」

「放咗學啦，on9仔。」佢將我果個同羽毛一樣輕嘅書包放上枱：「幫你執咗野啦，行啦。」

我拎起書包同佢一齊行出校門，之後佢就行咗去搭車，而我打咗個喊路之後都開始慢慢行返屋企。

雖然已經瞓咗成日，但我返到屋企之後都係瞓咗個晏教。

比鬧鐘叫醒嘅時候，我下意識環顧四周，不過屋企同平日一樣咩人都冇，因為大家都仲未放工，但係我總係覺得少咗啲野。

「我唔撚係鍾意咗佢呀嘛？」我係到自言自語。

我搖咗搖頭，話比自己聽呢件事無可能發生，之後就坐咗係電腦前面開始打機。

白卡佬A.K.A叛龍 2022-9-23 09:21:23 影相日
嚟到第三日，都係每年一度嘅影相日，每一班都會空兩堂去禮堂影班相，而因為中六係最後一年嘅中學生涯，都係最後一次係中學時期影班照。

雖然我無心向學，但唔知點解都係入咗成績最好嗰班，所以就被安排做第一班落去影相，即係第一同第二堂要落去禮堂。

我都唔知學校到底係用咗咩方式嚟分班，先會將我呢個每科都係啱啱合格嘅垃圾擺入去呢一班。

睇住周圍嘅同學唔係一對就係一堆，我忍唔住嘆咗啖氣，唔單止係因為我冇朋友，仲有就係因為呢個影相嘅過程剝削咗我成個鐘嘅睡眠時間。

攝影師終於整好部相機，同學們都唔知點解突然變得好興奮，跳下跳下咁跳咗上嗰個用嚟影班相嘅樓梯，唯獨我係後面滋滋悠悠咁漫步過去。

唔知係驚我阻住攝影師收工，定係嫌我行得太慢，原本已經企好咗嘅向晴由樓梯跑咗落嚟，一野將我拉咗去最前面果排嘅正中央。

佢就好似兄弟咁搭住我膊頭，我原本想反抗，但係呢一切都嚟得太遲，攝影師已經撳咗快門。

跟住班主任要我地做各種手勢同姿勢，老實講我係拒絕嘅，畢竟我都唔識做呢啲奇奇怪怪嘅事，但係佢就一直陪係我身邊，好細心咁教我。

以往我對影班相嘅睇法就只是例行公事，但唔知點解今次感覺開心過之前。

終於影完相，班主任即刻行到相機前面欣賞成品。

「啊晴，你同啊武好有夫妻相喎！」班主任講咗個笑。

我有啲唔份氣，就行咗去佢側邊一齊睇。

第一眼睇冇咩特別，但係再睇多眼就覺得佢真係冇講錯。

屌，冇可能，冇可能會鍾意佢，呢個一定係果啲叫既視感嘅野。

白卡佬A.K.A叛龍 2022-9-23 09:22:20 Day Four-湯
你老味，琴日朋友生日飲到朝早先完場，返到屋企換返套校服，瞓都未瞓就返咗學校。

啱啱返到課室坐低，我個胃就掀起驚濤駭浪，我撳住個肚，表情扭曲到好似異形一樣。

係我側邊啱啱做完功課擺低枝筆嘅啊晴望咗過嚟：「你做咩呀？」

「我想嘔。」我好虛弱咁講。

仲未等我反應到，佢已經拉住我跑咗出課室。

我扶住幅牆行咗入廁格，跪咗係地下，雙手撳住馬桶。

明明好想嘔，但係就跪咗十分鐘都嘔唔出。

突然間，有人打開咗我廁格道門，我回頭一望，唔見有人，再擰返轉頭已經見到向晴踎咗係我隔離。

「你點入嚟架？」

「用學生證爆門架。」佢係裙套拎咗張學生證出嚟。

係喎，只要用張學生證放落個坑到，轉一轉就開到。

佢一掌拍落我背脊到，我啲內臟就好似被震碎咗一樣。

雖然內臟差啲被震碎，但我總算係嘔咗出嚟。

我諗我應該將啲胃酸都嘔埋出嚟，成個口都是酸味，連飲嘅水都酸到好似檸檬咁。

返到課室之後，佢就將張枱拉得更近，對我嘅擔心全部擺曬係塊面到。

即使係換課室，平時同朋友坐嘅佢都選擇咗坐係我側邊，只要我一撳個肚，佢就會挨過嚟問我做咩。

老實講，雖然只係一句說話，但係真係好窩心。

放學嘅時候，佢甚至送咗我上的士先走。

簡單四個字形容佢，賢妻良母，唔係，係良好女友，都唔係，係良好朋友先啱。

差啲以為佢係我女朋友，畢竟從來冇人會咁關心我，不過就算我追佢，佢都唔會接受我呢個廢物掛？

冇錢，又唔識讀書，又唔肯返工，一個名符其實嘅社會垃圾兼廢人。

白卡佬A.K.A叛龍 2022-9-23 09:23:45 Day Five生涯規劃
嚟到第五日，因為校長對成績最好嘅班別有極大期望，所以就係第五日幫我地安排咗各種講座，仲有生涯規劃嘅討論，而且係全日都係做呢件事。

老實講，講座嘅時間唔算難熬，因為我仲可以瞓，而老師都默默咗呢件事，唔止係對我，係對所有人，因為呢種講座真係太悶。

但嚟到生涯規劃討論嘅環節，我就真係冇地方可以避，就算我想瞓，導師都會拍醒我，然後一直問我問題。

前面四個同學都已經講過，導師準備開始問我。

「要繼續讀書？定係做野？」

「你有冇諗過未來條路點行？」

「沒有。」我有啲唔耐煩。

佢面色一變，準備開口大鬧我唔配留係呢班。

我早就有咗心理準備，但就有人開口幫我解咗圍。

「你寫野唔係幾叻咩？」

我望過去，講野嘅係向晴。

「還好吧。」我搲咗搲頭。

「咁你就試下向嗰方面發展啦。」

就咁，導師好唔甘心地放過咗我。

啱啱行出會議室，我就同向晴講咗句「多謝」，而佢就好認真地開始同我講野。

「你啊，識寫野就寫野啦，咁廢，連我都唔受你追啦。」

雖然我知道佢很有可能只係講緊笑，但我聽到佢咁講嗰下，我真係有少少想即刻發憤圖強，一日寫五萬字。

我梗係覺得，佢好似話中有話。

我又唔係佢邊個，佢咁為我未來着想，係為咗咩？我唔明，都唔知。

白卡佬A.K.A叛龍 2022-9-23 09:24:15 Day5.1酒吧
由於今日係星期五，都係我每個星期裡面一定會去酒吧嘅一日。

正當我係酒吧門口等緊我啲朋友嘅時候，有人Send咗個Message過嚟。

我打開電話，以為係我啲朋友搵我，點知竟然係一個冇set聯絡人嘅電話號碼。

「呢個電話號碼係咪比我叫醒嗰個睡魔架？」

雖然睡魔講嘅唔一定係我，但同我一樣係班群，又要叫醒我嘅，就只得向晴一個。

「係呀，叫床專員。」

「我有啲唔開心，你要唔要嚟陪我？」

「我準備要去飲酒，你都可以嚟。」

「好啊。」

就咁半個鐘過去，佢嚟到酒吧門口。

我行咗出嚟接佢，我原本以為佢會着得好保守，畢竟佢應該係第一次嚟酒店，但事實上就有啲唔同。

平日清純嘅佢，今天着得有啲性感，仲化埋妝。

吊帶背心加埋真理褲，簡直就同AV裡面啲女優着得一模一樣。

我吞咗啖口水，冇過問太多就拉住佢行咗入酒吧。

我同我啲兄弟飲到忘曬形，啊晴突然行過嚟拉走咗我。

我跟住佢一直行，嚟到酒吧側邊嘅後巷。

飲到面都紅曬嘅佢，挨埋我耳邊：「你知唔知我係着比你睇架？」

我好肯定佢係醉咗，因為呢啲咁挑逗嘅說話，我經已聽過無數個飲醉咗嘅女仔同我講

但係聽到佢講呢句說話，我感受到佢係呢到同係學校嘅極大反差，反而令我顯得有啲尷尬。

不久後我便先行告遲，仲帶埋佢走，畢竟佢係我叫過嚟嘅，送佢返屋企都係應該。

但係前腳未企穩，後腳啱啱先踏出嚟，佢就將我壁咚咗係酒吧門口隔離幅牆到。

「啱啱我夠唔夠你起機？」佢貼住我耳仔講。

我冇回應佢，淨係擰轉面，唔望住佢。

過咗一陣，佢就「噗」一聲咁笑咗出嚟。

「你笑咩？」我問道。

「笑你啊，勾引下你就變到咁，小心比人食咗你啊。」

講完，佢就轉身走咗，得返我一個呆咗係原地。

呢個女人嘅操作，都唔知係高端，定毫無意思，純粹玩我，老實講我真係睇唔透。

白卡佬A.K.A叛龍 2022-9-23 09:24:53 Day7筆記
再次返到課室，佢淨係睥咗我一眼，就擰返轉頭。

我同平時一樣行返去個位到，趴係張枱上面。

係我就瞓入眼嘅呢一剎那，我嘅好奇心將我拉返現實。

我好好奇，佢仲記唔記得星期五發生左咩事？

我將張櫈轉一轉，面向住佢：「星期五嘅事，你仲記唔記得？」

係到做緊功課嘅佢轉過嚟望住我，扤咗扤頭。

我諗住開口問落去，但佢仲早過我開口。

「我只係當咗你係我前仔，唔好諗多咗。」佢擰返轉頭繼續做功課。

雖然我唔肯定自己鍾唔鍾意佢，但聽到佢咁講，我都有少少失落。

我都冇再問落去，再一次趴返落張枱到。

唔知點解，我好快就瞓咗入眼。

我發左個夢，夢入面嘅向晴係我身邊好溫柔咁掃我背脊，用一把好輕柔嘅聲線叫我起身。

我慢慢咁爬咗起身，而佢就踎低左。

佢塊面慢慢咁向我靠近，輕輕咁錫左落我塊面到。

跟住我眼前嘅畫面全黑，個夢完左，我都醒咗。

都唔知瞓咗幾耐，我捽咗捽眼，望咗下周圍，成個課室都冇人，得返向晴企咗係我身邊。

「你又瞓到放學啦，睡魔。」佢摸住我個頭。

我拎起書包，啱啱想起身，就比佢撳左落嚟。

「呢份係今日嘅中文作文筆記，我抄左多左份比你，今日教咗抒情文，你同我好好地溫書，我要見到你啲好作品。」佢將份筆記擺係我枱面。

講完，佢就轉身走咗。

我打開份筆記，淨係見到上面密密麻麻全部都係字，全部都係佢嘅字跡。

老實講我有啲意外，同時都更加迷惑。

咁樣…又係咩意思？

媽咪做社工 2022-9-23 09:55:18 無人理樓主

:^(

媽咪做社工 2022-9-23 09:55:28

:^(

白卡佬A.K.A叛龍 2022-9-23 10:00:04 新嚟嘅無人理，應該係正常？我係咁諗。
同埋連登好多大佬

:^(

週末打網球 2022-9-23 10:34:29 幫推

白卡佬A.K.A叛龍 2022-9-23 10:44:28 愛你啾咪

:^(

香江第一淫棍 2022-9-23 18:34:21

:^(

白卡佬A.K.A叛龍 2022-9-23 19:40:50 Day8煙
啱啱返到課室，我就即刻放低書包，直接跑去廁所。

真係就快賴屎，好彩我跑我快。

啱啱坐低諗住開始解放，點知道門又比人轉開左。

我抬頭一望，有啲意外但又唔係好意外，係向晴。

「你又嚟做咩？」我有啲無奈。

「你包煙呢？」佢伸咗隻手出嚟。

「想食煙就直接講啦。」我拎包煙出嚟。

「先唔係。」

講完，佢就走左出去。

幾分鐘之後，解放完嘅我起身行返課室。

啱啱開門，我就見到所有人都將個書包擺咗上枱，而訓導老師就企咗左黑板前面。

我應該冇估錯，佢搜緊書包。

「同學，你拎個書包上嚟。」

我都唔洗反抗，直接將成個書包反轉，得一本書同幾枝筆跌左出嚟。

搜下搜下，訓導老師就搜到嚟向晴個位。

訓導老師摸咗下佢個裙袋，之後就伸手入去拎左包煙出嚟，仆街了。

我仲可以做啲咩？冇，我咩都做唔到。

之後，佢就比人帶咗落靜思室。

然後，我就點都瞓唔着。

除左係因為擔心，仲有就係內疚。

到咗放學時間，我用最快嘅速度跑落靜思室。

訓導老師企咗係靜思室門口，而靜思室裡面就淨返成面都係淚印嘅向晴，而佢面前張枱上面有一張大過紙。

訓導老師行返教員室嘅時候係我身邊經過，仲講低咗句野…

「你唔好害人啦。」

我直接撳佢落幅牆到：「屌你老母，你明知包野係我架！」

係我準備郁手打佢嘅一剎，我聽到向晴把聲。

「唔好。」

以前每個人叫我，我都唔會聽，因為我唔驚打落去會有咩後果。

但係呢句野係向晴把口到講出嚟，我竟然停左手。

白卡佬A.K.A叛龍 2022-9-23 20:05:17 Day9籃球比賽(第一日上連登就有人幫推，開心加更)
啱啱返到課室，我就已經見到張缺點紙擺咗係我枱面，同我預期嘅一樣。

我拎起果張藍色嘅紙嚟睇，記缺點嘅原因再一次同我嘅預期一樣，就係「對老師不禮貌」。

老實講老師對學生唔禮貌我每日都睇緊，但係就從來冇老師比人警告，呢一點我到而家都係唔明。

我曾經見過果啲好學生因為比人老屈而記左缺點，然後拎住張缺點紙係到喊。

雖然我以前都會同啲老師理論，因為以前嘅我只係想不顧一切咁追求公義，但係而家嘅我先唔會好似嗰啲傻仔咁拎住張缺點紙係到喊，睇完就會掟落垃圾桶，笑下當冇事發生。

返到我個位之後，我就開始瞓教，但係今日因為向晴已經放過左我太多日，所以佢每一堂完咗都會叫醒我一次，但係我都會好快就瞓返，懵下懵下就過左成日。

當我諗住走嘅時候，向晴拉住左我。

我即刻心跳加速，吞左啖口水：「做咩呀？」

「佢地話今日有班際籃球比賽，佢地唔夠人，你一定要去。」

等佢講完，我嘅心跳先回復正常。

我跟住佢嚟到操場，係我面前嘅對手全部都係米八嘅巨人，而我就只係一個得米六嘅矮仔。

雖然我都唔係唔識打波，但係面對住呢班一米八嘅巨人，我嘅內心都係充滿恐懼。

但係既然我都已經嚟到呢到，想走都走唔到，咁就唯有面對佢。

我拎起咗個波，開始試下做啲基本嘅運球。

打波唔係一個問題，但係就希望…我唔會比人撞死。

白卡佬A.K.A叛龍 2022-9-23 21:02:58 BTW 可唔可以自推架？

缺氧了 2022-9-25 14:18:20 好睇😹，但P牌推唔到😹

白卡佬A.K.A叛龍 2022-9-25 20:34:07 Sad 我都唔清楚 加上我呢兩日都係酒場 冇時間更新

白卡佬A.K.A叛龍 2022-9-25 20:36:23 籃球比賽(二)
熱完身之後，基本嘅運球動作都已經做熟曬。
我放低練習用嘅籃球，一步一步向拎號碼衫嘅長枱行過去。
我行到長枱嘅時候，枱上面就淨返一件號碼衫，而呢個號碼都好明顯係到詛咒緊我。
「67」
雖然我已經預左輸，只係希望唔好輸我太難睇，畢竟我地只不過係臨時湊出嚟嘅雜牌軍。
不過，呢個號碼會唔會邪得濟。
我着上號碼衫，行到我嘅隊友身邊。
而家就係等比賽開始，應該係話…等死。
只要我有入波，我就唔算係戰犯。
我企係後排，如果個波拍嚟我呢邊，我就算係要撲過去，我都要搶到個波，因為呢個好有可能係我哋呢邊唯一可以拎到波嘅時機。

白卡佬A.K.A叛龍 2022-9-25 20:48:59 BTW多謝你🙏

白卡佬A.K.A叛龍 2022-9-26 19:10:30 籃球比賽(三)(連登有人推 加更)
球證吹哨，雖然話我嘅四個隊友都同樣有米六，但係負責跳波嗰個嘅彈跳力堪比NBA選手，就算對手係一米八嘅巨人，都只能任由佢拎走呢個係半空嘅籃球。

前腳啱啱落地，佢就好似開咗引擎咁，向住對面個籃勁快咁衝過去。

佢跑嘅速度無野可以挑剔，根本冇人可以追到佢，但喺佢嚟到籃底，準備上籃嘅時候…

「呯！」

個波比人攔左落嚟，即使佢跳得好高，但係佢本身生得唔高，呢一跳都係無辦法離開班巨人嘅攔截範圍。

搶到波嘅係陶鎧，一架無人能擋嘅坦克，力大，身型都大。

佢係籃底一掟，將個波傳左比係中線嘅三分神射手-黃日言。

黃日言踏出兩步，就係三分線前面起手。

因為黃日言係一個高射砲，所以佢射嘅波嘅滯空時間會長過其他人好多。

個波去到最高點之後就開始跌返落嚟，好準確咁穿過球籃。

佢地拎到三分，同時拎到個波，亦即係代表我地今場輸硬，因為我地根本冇可能係佢地手上搶到波。

正當我係到自暴自棄嘅時候，我眼尾望到係看台度幫我地打氣嘅向晴，雖然我聽唔到佢講緊咩，但我可以透過佢個嘴型知道佢係叫緊我個名。

唔得，我唔可以令他失望。

我再一次跑咗起嚟，嚟到控緊球嘅球員面前。

香江第一淫棍 2022-9-27 17:50:09

:^(

白卡佬A.K.A叛龍 2022-9-27 21:08:56 愛你秋米，你推返上去啦

:^(