認識自己做好自己 2022-4-2 00:58:27 推

趕故書生 2022-4-2 17:01:10 「係嘅係嘅！」認低威係我本份。

「咁依定去啦！」我忽然興起，決定就同呀詩坐返轉摩天輪，雖然會洗唔少錢，但當係一個補償，我覺得值得。

「吓？去邊啊？」呀詩一臉茫然，眼仔碌碌咁望住我，瞪大隻眼。

「上去囉！」我指一指個摩天輪。

佢好驚訝咁「吓」咗出嚟，「唔係話貴咩？仲上去？」

「難得嚟一次，而且你都未嚟過，一次半次咪去囉！」我解釋道。

「頭先你先話貴，又話咁樣好唔抵⋯⋯唔係可以去轉海洋公園玩成日摩天輪咩？」呀詩揶揄我，用蔑視嘅眼神對住我。

「超！你真係呢⋯⋯難得同你去一次恩愛下係咪唔得啊？」

我唔俾呀詩再講廢話，攬住佢行去摩天輪嗰度排隊。

呀詩咁樣俾我半推半就先肯同我嚟排隊。

喺臨到我哋入去摩天輪嗰陣，呀詩忽然講起：「我哋好似拍咁耐拖，都無一齊坐過摩天輪喎。」

「你咁講又好似係。」俾佢咁樣講一講，我回憶返我哋以前拍拖嘅事，諗下諗下，我哋渡過我好多甜蜜嘅瞬間，不過又真係無一齊搭過摩天輪。

「依家第一次一齊去搭，唔好咩？」

呀詩微笑著，我以為咁樣甜蜜下，可以尋回呀詩嘅笑顏，但我依家仍然見到呀詩憂傷嘅神色。

我好想知呀詩依家係點諗⋯⋯

唔通我哋真係搵唔返以前嘅感覺？即使我大老遠過嚟都無幫助？可以嘗試嘅我都會去做。

「好啊。」呀詩嘅笑容，唔似得以前咁開懷，以前呀詩笑起上嚟，對眼會眯成一條線，雖然我有時都會笑佢成日將自己隻眼收埋，但我真係百看不厭，次次都覺得咁樣嘅佢，好可愛。

呀詩佢笑起上嚟，雙眼無乜點變化，好似只係擠出一個笑容咁。

所以話，一段感情嘅變化，身邊嗰個只要用心，一定可以感受得到。

趕故書生 2022-4-2 18:01:52 坐上去摩天輪，啲英國姐姐好鬼nice，而且身材真係好豐滿，有前有後，凹凸分明，香港見得多嘅都係好瘦嘅，直線為主。

頭先有個靚女鬼妹姐姐安排我哋坐邊一卡，我承認我有望多兩眼。

但就咁樣仆街啦⋯⋯

「頭先個姐姐好索啊呵？」呀詩咬住嘴唇，用平淡但極具殺傷力嘅語氣同我講。

「吓？還好啦。」我意識到唔對路，死啦，次次呢啲位都好鬼刺激，你要好快地拆解呢個危機，只要你有幾秒嘅停頓，佢就會識穿你。

然後問你：做咩諗咁耐嘅？

到時你仲死，更加唔知點答。

「係咩？你望咗人哋好耐喎。」呀詩斜視住我，眼神無比兇狠。

「我⋯⋯哦！我頭先望緊後面啲卡位咋嘛，其實我想揀後面嗰啲，唔想前面有人係度，好似會成日望到我哋咁嘅感覺，所以先咁樣咋嘛，你會唔會諗多咗啊？」我真係出盡奶力咁兜。

「係啊？係啊？」呀詩搞怪地笑了笑。

屌⋯⋯我都俾佢搞到笑咗，係狂笑停唔到嗰隻，然後攬住佢，講：「梗係啦！我係想我哋可以上到去無乜人，可以恩愛下姐。」

呢句係出自真心嘅，我想透過呢種方式搵返我哋以前拍拖嘅感覺，尤其是依定我哋都係異地，係一次難得嘅旅行，我都想好好地享受。

摩天輪緩緩升過，地面嘅人漸漸遠去，遼闊嘅景色開始呈現係我哋眼前，英國嘅風景真係好靚，我攬住呀詩欣賞呢個片刻嘅風景。

呀詩亦都依偎係我心中度，係呢一刻之前，佢回應咗句：「邊鬼個要同你恩愛！」

然後就俾個風景吸引住咗，趴咗係我心口度，一齊睇住出面嘅景，而我輕輕咁撫摸呀詩柔順嘅頭髮。

幸福嘅感覺嚟得好突然，亦係我期待好耐嘅嘢，每次有呢啲時刻，我都想佢可以一直一直一直咁停留。

「原來上嚟嘅感覺係咁樣。」呀詩淡淡地講咗呢一句。

「你之前無坐過摩天輪咩？」我問到，對於呢點，我真係唔係咁清楚。

「無啊，你幾時有同我坐過啊？」呀詩反問我。

「海洋公園都無坐過？」雖然我都好似無坐過海洋公園嘅，因為見到嗰陣覺得吸引力唔大，去到梗係要玩啲刺激嘅遊戲嘛。

「我都無去過海洋公園⋯⋯我淨係同你去過迪士尼咋嘛。」呀詩咁樣講一講，又好似係。

「Sorry啊，係我做得唔好⋯⋯我竟然咁耐都無同你坐過一次摩天輪。」心入面內疚起上嚟，原來仲有好多嘢，我係未同呀詩一齊做過⋯⋯

內疚係因為覺得自己做得未夠好；
同時亦有種心痛嘅感覺，想日後同佢經歷更加多嘅嘢，帶佢去體驗更加多美好嘅嘢；

漸漸大個，我哋兩個嘅腳步都急促起嚟，為咗想快啲向前奔跑，只不過，有陣時我哋都唔知為乜而奔跑，只係唔想不安嘅將來，降臨係我哋身上，為咗咁而想自己做更加多嘅保障。

我哋少咗好多呢啲，可以暫停一下腳步，靜靜地停係度，享受屬於兩個人嘅時間。

至愚至樂 2022-4-2 23:07:44

:^(

調理農務系一姐 2022-4-3 01:10:18 輕輕一推

:^(

:^(

趕故書生 2022-4-3 12:37:15 愚人節快樂

:^(

:^(

至愚至樂 2022-4-3 19:55:28 推

:^(

認識自己做好自己 2022-4-3 20:57:30 推

至愚至樂 2022-4-4 07:34:24 推

:^(

刺鎖友次子 2022-4-4 12:48:28 推

至愚至樂 2022-4-4 18:29:01 推

:^(

BL131 2022-4-4 21:05:47 要happy end 唔該

認識自己做好自己 2022-4-5 01:25:41 當知道佢地最後會分手 然後而家睇返佢哋就會覺得好心痛

:^(

不了狗也不 2022-4-5 05:15:17

:^(

趕故書生 2022-4-5 18:05:47 今晚更新

:^(

鐵拳無敵鍾培生 2022-4-5 20:46:06 推

凍檸茶濃茶多檸 2022-4-6 00:46:30 第二日喇喎

趕故書生 2022-4-6 01:52:17 而且，我做咗一樣自己一路以嚟都想做嘅事，就係喺摩天輪嘅最高點，同自己心愛嘅人擁吻。

係好偶像劇嘅嘢，呢啲係畫面睇好唯美，但現實入面，其實唔係啲咩咁特別嘅嘢。

不⋯不過⋯⋯如果身邊有一個你想同佢經歷好多嘢嘅人，你就會心癢癢想同佢體會下各種情節，會係咩一回事。

呢種習慣，我一路都有同呀詩做緊，可能因為有呢啲事，我哋先會keep住有趣，keep住有啲新鮮嘢。

摩天輪不急不慢地升到最高點，倫敦嘅一大片景色盡收眼底，縱然天色不佳，但唔影響呢個壯觀嘅景色。

我都忍唔住會想望多幾眼，因為摩天輪嘅時間，其實好短暫。

我輕輕扭轉一下頭部，呀詩嘅臉龐就係我左近，我同佢嘅距離只需要轉一下個頭，可以kiss到。

呢個角度輕鬆得嚟，附帶點曖昧嘅空氣。

輕輕一個kiss，我覺得就足夠。打茄輪同埋蜻蜓點水都需要分場合，咩場合就用咩方式應對，呢個係成熟嘅人應有嘅表現。

我原以為呢個甜蜜嘅時刻，呀詩嘅心情會同我相仿，但我觀察唔到佢表情有咩變化，可能係因為佢嘅抑鬱症？可能係因為頭先嘅說話？可能係因為食藥嘅後遺症？

定還是真係已經無感覺？

對我所做嘅嘢再無感覺？

無論幾多年嘅感情都好，10年、結咗婚定未結婚，就算拍拖幾個月都好，遇到呢啲事情嘅時候，都會有一種好強嘅無力感係度。

意識到好似自己做咩，都挽回唔到咩，都徒勞無功咁。

呢個就係我嚟英國，最大嘅感受。

可以體諒嘅我都有體諒，我明白呀詩嘅處境，我會係佢身邊陪佢，扶持佢。

但係呢個難關，最終都係需要呀詩去克服同埋衝破，旁人做嘅好有限。

我唔知需要等幾耐⋯⋯

鐵拳無敵鍾培生 2022-4-6 01:58:01 有好多嘢，始終係本人先可以解決

BL131 2022-4-6 07:13:32 真係病左
就直接帶佢返香港啦
有咩野緊要得個人無事

至愚至樂 2022-4-6 11:07:31 推

:^(

認識自己做好自己 2022-4-8 02:34:16 推

趕故書生 2022-4-10 14:57:47 係呢個唔知點樣形容嘅氣氛，呀詩趁摩天輪下降緊，回到原點嘅時候，好似忽然想起某樣嘢。

然後係書包度搵，拎咗樣嘢出嚟。

即影即有。

「哇，呢樣嘢都好耐歷史啦喎，依家好似越嚟越少人用。」我取笑佢，瞬間個氛圍變得輕鬆。

因為啲回憶瞬間出返曬嚟。

呢部即影即有，係中學畢業嗰陣，呀詩自己買嘅嘢嚟。

Last day嗰日，我哋仍然冷戰緊，其他人爭先恐後咁搵人寫字係件校服度，然後同好朋友影即影即有留念。

而我係無同到呀詩影過即影即有，我後尾先至知。呀詩淨係同某幾個好朋友有影到即影即有，而嗰陣時呀詩只係同我用手機影咗張合照。

『你嗰陣做咩唔同我影即影即有喎！你睇下，都無我哋啲相嘅！』嗰陣時係呀詩屋企，忽然見到佢為數唔多嘅即影即有相片，擺咗係間房嘅一小角牆度。

但呢堆相入面，無我哋兩個。

暫時係得呀詩著住校服，清純嘅模樣，想像唔到佢曾經係有咁MK嘅一面。

『嗰陣時覺得同你未必會再見，先無同你影，你都知啲底片貴㗎啦，嗰一刻真係無諗咁多，一路嘅思想係自己放低咗，先無影掛？如果嗰陣時真係用咁珍貴嘅即影即有同你影，我就連自己都呃唔到自己。』

『依家同你影返咪得囉，我都估唔到最後都係會同你一齊返，嘻嘻！』

『你話㗎！要影好多喎！補返中學嗰啲喎！』

『好啊，反正大把機會！』呀詩笑容滿面咁講。

後來我哋好多相都貼咗係嗰個角落，連我同呀詩用手機影嘅last day相，都用部機打印咁打印咗出嚟變做即影即有。

嗰張相擺咗落我銀包，一路保存到依家，已經變到有啲乜色，邊位都染上黑色。

對於中學禮物嘅回憶，手繩同埋條頸巾，手繩已經通過我哋嘅同意，爛爛地之後就一齊換成戒指，係一對平平地嘅情侶對戒嚟，有時會將佢整成頸鏈，有時會戴係手上。

將個意義，換成其他形式存在著。

而條頸巾，一路陪住我好多個冬天，都已經有啲歷史嘅味道係度添啦。

Jadon_Sancho 2022-4-11 00:22:57

:^(

:^(

:^(

鐵拳無敵鍾培生 2022-4-11 00:30:56 睇嚟會true end咁喎