《因為前世一個承諾，令我今世三十歲都仲係青頭仔》
上一頁
第 10 頁
下一頁
孤憤
2022-1-29 21:24:13
琴日個3篇 仲有今日個3篇 總共6篇
Ads
佐治戰車
2022-1-29 22:22:29
（26）
破解左力場，救左垂死嘅Lily，令我得罪上天，招來命運嘅報復。
「你地走唔甩架啦！受死啦！」
欣欣喺後面追住我地，並一路發射致命嘅黑色激光。
佢全身散發出一股強烈嘅敵意，簡直就想將我地置諸死地。
命運將可怕嘅力量寄予喺佢身上，將佢變成恐怖嘅復仇者。
我地三個博曬老命，起曬咁跑，由繁忙嘅大街轉入海濱長廊。
受傷嘅我一路跑，個膊頭就一路流血。
唯一慶幸嘅係，幾下激光都射唔中我地，只係射穿海旁嘅圍欄石壆。
迎面路過嘅途人嚇到紛紛四散逃跑。
「呼呼—呼！」
欣欣突然使出第二招，召喚出強烈嘅龍捲風，將我地卷到上幾米高。
我地三人好似入左洗衣機咁，不由自控猛咁轉，猛咁fing。
轉左一陣，嗰陣風就狠狠咁撻我地落地下，好在我地捉到一條燈柱，跌落地嗰陣先無咁傷。
「大師救命！依家點算好呀？」
倒臥地上嘅我問大師，但大師卻失去聯絡，無任何回音。
「傑傑！殺到嚟啦！快啲走啦！」Samuel企起身之後，第一時間埋嚟扶起我。
可能係因為失血太多，我個人變得虛弱，雙腳發軟，要人扶住先起得返身。
「哈哈哈！依家感受到命運嘅可怕未呀？」欣欣步步進逼，臉上流露得人驚嘅表情。
Samuel扶住我行左幾步，見我腳步太慢，於是就打算孭起我跑。
只不過，欣欣已經殺到埋身，距離我地不足兩米。
佢怒睥住我，啪一下手指，射出激光：「林嘉傑，背叛命運嘅下場，就係死！」
「唔好呀！」
千鈞一髮間，Samuel撲埋嚟，以背脊嚟阻擋。
隨即佢倒在我懷裡，望住我講：「傑傑…快啲走…唔洗理我…」
「Sam…Samuel你…你無事呀嘛…」我實在估唔到，對方竟然會捨身救自己。
「我諗我就嚟唔得架啦…」Samuel露出苦澀嘅笑容，「一路以嚟…我嘅心意係點…我諗你都好明白…」
「咳咳…」佢咳左兩聲繼續講，「我知我地今世有緣無份…無得喺埋一齊…假如有下世…你可唔可以應承我…同我一齊？」
換喺平時嘅我一定say no，但見到對方犧牲自己救我，內心一時感動：「可…」
「喂！睇住啊！」Lily突然從後拉我地兩個退後。
下一秒，旁邊嗰碌燈柱，砰一聲跌落面前。
「你兩個搞咩嘢呀！快啲走啦！」Lily催促。
「但係Samuel佢…」呢個時候，我睄到Samuel背脊，完全一啲傷痕都無。
「點解會咁嘅？你唔係中左激光架咩？」
「嘻…我諗欣欣佢啱先應該射歪左…」Samuel笑一笑。
再望返欣欣嗰邊，佢依家正俾兩條差佬捉住。
如果無估錯嘅話，剛才條友射出激光一瞬間，咁啱兩條差佬趕到嚟想制服佢，所以搞到佢瞄準失敗，一下射歪左。
激光射中我地隔籬燈柱嘅底部，導致燈柱搖搖欲墜，最後成碌墜埋落嚟。
佐治戰車
2022-1-29 22:51:02
「哎呀你條友，居然呃鳩我！」
「開個玩笑啫，爭啲我地就做下世情人架啦，哈哈。」
「仲講咁多，趁機會快啲走啦！」Lily講得無錯，趁欣欣俾兩條差佬搞緊，拿拿臨快啲走。
Samuel負荊請罪，孭起我，全力狂奔。
「想走！唔洗旨意！」
欣欣使出狠勁，幾下手腳，用激光射爆兩條差佬個頭。
「Lily，家下道真氣喺你度，得你有機會對付欣欣，你快啲運氣，谷道真氣出嚟，使出氣形合意功。」我對Lily講。
「運氣？點運氣？」
「先吸氣八秒，再閉氣十秒，然後吸氣五秒，最後閉氣二十秒。」
Lily照住我咁講去做，問題係大家跑緊步，個個都索曬氣，根本好難控制氣息。
「唔得，我閉唔到氣！」Lily扯曬蝦。
擰轉頭一望，欣欣正喺一百米外處追緊過嚟，作勢想再射出黑色激光。
「轉彎！快啲轉彎！」我指住前面嘅轉彎位。
Samuel照指示孭住我，同Lily一齊轉入一條無人嘅內街，然後匿喺一部大貨車背後。
我地盡量壓抑自己嘅呼吸聲，唔敢發出任何聲音。
「踏踏…」
好快遠處就傳嚟腳步聲。
雖然睇唔到個樣，但離遠已經感受到嗰一股陰森嘅氣息。
我細細聲對住Lily講，並示範點樣運氣：「你跟住我…運氣…」
Lily調整過呼吸後，跟住我一步一步咁吸氣、閉氣。
「點呀？feel唔feel到道氣？」我壓低聲音問佢。
對方搖搖頭，但之後重複試多幾次，卒之就成功。
同一時間，欣欣嘅腳步聲漸漸接近。
「用你嘅想象力，出招啦。」
Lily就話：「出招？我唔識架喎。」
欣欣就大聲出言恐嚇：「我感應到你喺呢度架！所以唔好匿埋啦，快出嚟受死啦！」
我保持住冷靜，指教Lily：「你記唔記得我之前係點出炎殺黑龍波？你試下keep住咁運氣，然後學我咁，將啲氣聚集喺一個位，再喺腦入面幻想飛影出招嘅畫面。」
「真係得？」Lily有啲猶豫。
「得唔得都要試架啦！」我話。
「踏踏—」
腳步聲已經非常接近，估計欣欣再行多二十米，就會行到嚟我地匿埋嘅位置。
呢一刻，Lily瞇埋眼，極力回想並模仿我之前係點樣出招。
我地家下所有希望都落喺對方身上。
聽住啲腳步聲，我個心跳得好快，精神十分緊張。
結果生死一刻間，Lily不負所望，成功召喚出魔界之火。
黑色火焰逐啲逐啲，聚積喺佢嘅下身。
我忍住痛，用埋僅餘嘅體力同Samuel合力抬起佢，一人一邊擘開佢對腳。
喺佢個裙底之下，黑暗烈焰熾熱燃燒，火舌化成兇惡嘅火龍，張牙舞爪。
未等欣欣行到過嚟，我地就衝出去主動出擊。
「死八婆，受死啦！」
我地三個一齊大嗌：「邪王！炎殺黑龍波！」
黑色嘅邪龍火焰喺Lily裙下洶湧噴射，兇殘嘅火龍向住欣欣直衝過去！
「砰！」
好嘢！黑龍波成功命中欣欣，我心諗今次佢一定渣都無！
點不知，當爆炸嘅煙霧慢慢散去，欣欣卻絲毫無損，屹立不倒。
「哈哈哈哈哈！」佢仰天大笑，「以為呢啲咁嘅招就可以傷到我，太天真啦！」
大笑過後，佢隔空揮出一掌，強勁嘅掌風將架大貨車直推埋嚟，撞向我地。
我地及時反應，慌忙跳開躲避。
手軟腳軟嘅我倒在一間粥鋪門口，門前放左一罐石油氣。
我忽然靈機一觸，一腳踢個石油氣罐到欣欣面前：「Lily！出招啦！」
倒臥喺旁邊嘅Lily立即意會，訓低擘開雙髀，再次發射出炎殺黑龍波。
「砰！！！」
炎殺黑龍波威力加埋石油氣罐，造成比剛才更犀利嘅爆炸。
爆炸所產生嘅衝擊力，將我地直接彈開到幾米咁遠。
「應該死左啦掛？」Samuel企起身扶起我。
我跳上佢個膊頭：「唔好理啦，走吧啦！」
「講得啱，離開先係最安全！」Lily附和。
我地跑出馬路截到的士，坐上車離開現場，幾經辛苦終於先擺脫欣欣。
佐治戰車
2022-1-29 22:55:07
待續
:^(
:^(
:^(
:^(
:^(
:^(
龍力蓮
2022-1-29 23:00:07
推一推
:^(
孤憤
2022-1-29 23:40:51
仲差四篇
試下搞我後面
2022-1-30 02:19:07
好正
:^(
裸體殺手
2022-1-30 02:42:21
輕鬆估中lily爆大技
:^(
macncheese
2022-1-30 08:47:11
推
:^(
佐治戰車
2022-1-30 23:57:44
（27）
「傑傑，你快啲止下血先！」
Samuel問的士司機拎左盒紙巾，抹走我膊頭上嘅鮮血。
「喂喂喂，唔好咁大力啦你…」
Lily探頭望一望車後：「睇嚟你個前世情人已經無再追嚟。」
好唔容易擺脫到欣欣，我地暫時可以鬆返一口氣。
「你們沒事吧？」
呢個時候，慧真大師再用千里傳音向我地傳話。
「大師，點解頭先你突然無左回音嘅？」我問。
「大概是因為剛才你的宿前世情人，切斷了千里傳音的訊號，所以你們接收不了我的傳話，不過現在看來，你們應該是暫時脫身了。」
「我諗都算係勉強賣甩左佢。」
「現在你們最好找個地方躲起來，有多遠就躲多遠。」
「但係我地匿得一時，匿唔到一世架喎，無理由成世要做縮頭烏龜嚟避佢，大師求下你諗下辦法，教下我地點樣對付佢。」我回應話。
「……」
殊不知，大師再次失去聯絡。
與此同時，一股寒意突襲，全身不禁起曬雞皮。
「呠！呠呠！」司機對住前面大聲響咹。
乍眼一看，欣欣正擋住喺路中間。
可惡！條友果然未死！
佢手指一啪，黑色激光穿過玻璃，射穿左司機個頭。
架的士一瞬間失控，頭搖尾擺亂咁撞，撞爛馬路安全島嘅欄杆，再咁落去遲早炒車。
「哈哈哈！」欣欣冷眼望住架失控嘅的士，放聲大笑。
眼見的士就嚟要撞落去一架停喺路邊嘅運油車，咁樣撞埋去隨時大爆炸。
好在Samuel挺身而出，檻前坐去司機隔籬嘅乘客位，及時軚盤轉向，先勉強避過一劫。
「砰！」
頭頂傳嚟一下響聲，抬頭一望，成架的士嘅車頂無左。
從倒後鏡見到欣欣行緊過嚟，實係佢用激光射爛左個車頂。
「走呀！快啲俾油！」我極力催促。
Samuel推走司機條屍，坐上司機位，「dum」行油加速。
「哈哈！即管走啦！反正走到天涯海角都會揾到你地架！哈哈哈—」
欣欣無第一時間追嚟上，只係企喺原地，發出威懾嘅笑聲。
Samuel踩盡油門，高速駕駛前進。
隨住的士駛遠，嗰啲笑聲先至慢慢消失。
啱先大師提議我地有咁遠就走咁遠，於是我地嚟到中環碼頭，再搭船匿去長洲，只求匿得一時得一時。
佐治戰車
2022-1-31 00:16:30
天色已黑，我地先去藥房買左啲紗布同繃帶，然後入住到沙灘附近嘅旅館。
Samuel同Lily一齊為我包紮傷口，而我地三個心有餘悸，猶如受驚嘅雀仔，間房啲燈眨一下都會驚一驚。
「你個宿世情人睇嚟無咁易放過我地。」Lily喺繃帶上打個結。
「睇怕係啦，我估佢好快就會揾到嚟呢度，」
我飲一啖水繼續對Lily講：「我地三個之中得你有真氣，我諗今鋪要靠你先得啦。」
「但係都已經出到炎殺黑龍波，依然傷唔到佢半分，你話仲有咩辦法對付到佢？」
「唉…呢層我都唔知…」
我無奈歎息，然後嘗試運氣，發現體內原來仲剩餘少量真氣，大概就得原本嘅十分之一度。
不過斷估我加埋Lily，都未必係欣欣嘅對手，尤其係我得返咁少真氣。
「氣形合意功不在於『氣』，而在於『意』。」
「嘩頂！嚇死人咩！」
慧真大師突然千里傳音，嚇到我地心都離埋。
「不好意思，是我冒昧嚇到你們了。」
「大師，你頭先講咩話？」我問。
「我說，氣形合意功的真正威力，並不是視乎真氣有多強，而是靠意想的力量，也就想象力。」
「想象力？」
「沒錯，而且真氣是可以隨意在身體流動。」
「咁即係我唔洗下下擘大髀出招？」Lily問。
「是的，其實你們可以使用身體任何一部位出招，你的真氣比較強，可以隨意將氣分佈在身體各位置，真氣少的話就只能用在一處。」慧真大師解釋。
「問題係欣欣咁犀利，我實在諗唔到有咩方法，能夠對付到佢？」我十分困惑。
「放心，一定會有辦法的。」
大師堅信我地會諗到辦法對付欣欣。
現在夜已深，滾搞左成日，Lily同 Samuel攰得滯訓著左。
至於我就擔心欣欣會隨時出現，所以訓唔著。
我坐出露台打坐運氣，並按大師教路，將僅餘嘅少量真氣，積累喺拳頭之中，然後再一拳揮出去。
拳風激起遠處沙灘上嘅沙石，就以咁嘅威力根本對付唔到欣欣。
我歎一口氣，心諗命運要將我地趕盡殺絕，唔通今次真係難逃一死？
Ads
佐治戰車
2022-1-31 00:18:04
聽日埋尾
:^(
龍力蓮
2022-1-31 00:23:18
推推推
:^(
椒鹽蝦米
2022-1-31 00:49:41
推
三碗細牛腩河
2022-1-31 01:25:31
推
好撚癲
Happy corner咁款
孤憤
2022-1-31 01:51:53
今次係短篇？
solly!
2022-1-31 01:57:42
甜故變左猎奇
:^(
:^(
:^(
試下搞我後面
2022-1-31 02:18:20
推
:^(
佐治戰車
2022-1-31 13:30:45
老漢推po
:^(
你想我點樣
2022-1-31 13:36:26
成日諗起大師係劉以達
佐治戰車
2022-1-31 13:43:54
:^(
:^(
:^(
Ads
macncheese
2022-1-31 15:26:44
新年之前完故
:^(
佐治戰車
2022-1-31 23:14:57
（28）
「咕姑固~~~」
天啱啱光，煩人嘅雀仔喺度嘈生曬。
太陽從海平線升起，溫暖嘅陽光照射過嚟，而我卻只感受到一股寒意。
一股令人心寒嘅敵意。
欣欣殺到嚟！
Samuel同Lily都俾呢股突如其來嘅殺氣嚇到扎醒。
晃眼間，遠處嘅沙灘出現一個熟悉嘅人影，正一步一步行緊過嚟。
「快啲走！條八婆殺到埋身！」
我帶頭衝出房門，直奔出旅館，另外二人則跟隨身後。
然而，正所謂「是福不是禍，是禍躲不過」，走到嚟長洲大街，遇正欣欣攔喺前面。
「哈哈！我地又見面啦！唔怕依家就話你知，長洲呢度就係你嘅葬身之地！哈哈哈！」欣欣肆意大笑。
長洲四面環海，就算再走都走唔到去邊。既然如此，倒不如放手一搏。
反正繼續匿埋都無意思，匿得一時匿唔到一世，乾脆就堂堂正正嚟個了斷。
欣欣率先發難，先捲起一陣烈風，吹起街邊嘅雜物襲擊我地，跟手再狂啪手指，係咁射出致命嘅黑色激光。
喺猛烈嘅攻勢下，我地只能左閃右避。
「哈哈！感受到命運嘅可怕未？」
欣欣射出嘅黑色激光，猶如AK47般密集開火，大街上嘅鋪頭門口、招牌以及路邊大樹，都一一被摧毀。
好在家下天蒙光，條街無人，否則肯定傷亡慘重。
喺我嘅掩護之下，Lily卒之召喚出真氣。
經過大師提點，今次佢學精左，直接用手射出炎殺黑龍波。
可惜效果都係一樣，對欣欣幾乎零傷害。
至於無任何真氣嘅Samuel，就擸起路邊一舊大石飛埋去攻擊。
結果舊石都未埋到身，欣欣就一掌將大石，反彈撼落Samuel額頭度。
Samuel堂當訓低左，前額爆曬缸。
「哼！不自量力！」欣欣語氣極度不屑。
「喂！晨早流流咪嘈住曬啦！」「咪就係！靜啲啦…」打鬥所發出嘅聲響，令樓上嘅街坊相當不滿。
不過欣欣點會理咁多，佢向住暈低嘅Samuel，作勢想射出激光。
呢個時候，我將真氣傳到雙腳上，激發最快嘅速度，衝埋去抱走Samuel。
「嘩！傑傑你好型…」懷內迷迷糊糊嘅Samuel講完呢句，就徹底昏迷過去。
好彩佢只係受左皮外傷，應該無乜大礙。
另一邊廂，Lily將真氣貫通全身，再配合想象力，令到自己化身一部比例1:1嘅初號機。
佐治戰車
2022-1-31 23:26:03
「乜玩到咁大？不過你唔係以為，咁樣就對付到我下話？哈哈哈哈！」欣欣望住眼前巨大嘅初號機，放聲大笑。
就趁條八婆嘅注意力去曬Lily身上，我嚟一招埋身突擊，將體內僅餘少量真氣，聚積喺拳頭之上。
隨即我意想出星鬥士星矢嘅絕招「天馬流星拳」，以超越音速嘅速度，一秒擊出幾十拳。
殊不知欣欣眼尾都唔洗睄，一手就捉實我嘅拳頭：「搲痕都嫌細力啦！」
「啪啦！」
對方揸住我拳頭，出盡力捏爆我啲手指骨。
好在呢個時刻，變成初號機嘅Lily出手攻擊，條八婆為左閃避先肯放開手。
巨型嘅初號機拎住高振動粒子刀，向住欣欣不停揮斬。
但係欣欣閃避速度極快，輕而易舉就避開曬每一下嘅斬擊。
跟住條八婆縱身一躍，跳得半空幾乎九樓咁高：「就等我俾你地見識下我嘅真功夫！」
欣欣伸出右手食指，有深灰色嘅光慢慢積聚喺手指前。
佢指向初號機個頭，一邊出招一邊大嗌：「厄命絕運衝擊波！」
深灰色嘅光束以肉眼睇唔到嘅速度，一擊命中初號機個頭。
「砰！！！」
一下劇烈嘅爆炸，令Lily被逼解除意形化。
Lily全身傷痕累累，趴喺地下，失去戰鬥能力。
「依家就得返你一個啦，林嘉傑！」居高臨下嘅欣欣啪一下手指，射出激光。
處於下風嘅我，無法還擊，唯有到處閃避。
目前就得返我一個，勢孤力弱之下，若果要絕處逢生，或者就只有嗰一個辦法。
「你依家後悔未呀？本來乖乖地接受命運嘅安排，同我一齊咪好好地囉！點係都要咁犯賤，破壞上一世嘅誓約？」欣欣不停射出黑色激光。
我一邊閃避一邊回答：「我再講一次，無論上一世嘅我講過啲咩，都與今世嘅我無關！同埋命運嘅安排唔係大曬，唔通命運註定我要食屎，咁我都要照食呀？」
「咩話？咁你即係話我係屎啫！」
「我無咁講呀，係你自認喳！」
「可惡！死到臨頭仲咁串嘴！」
震怒嘅欣欣伸出食指，作勢要使出剛才嗰招衝擊波：「我要你死無全屍！！！」
旦夕之間，我再次運氣，將真氣谷到去雙腳下，然後極速逃跑。
「砰！！！」強勁嘅衝擊波射到碼頭岸邊，激起幾層高水花。
「死八婆！有本事就嚟殺我啦！」我一邊走佬，一邊出言挑釁對方。
欣欣怒髮衝冠，嬲到個樣揦埋一舊，極度兇狠猙獰。
我一路逃走，對方就一路從後緊貼追趕。
直至跑到去張保仔洞口，前路被幾塊巨型大岩石包圍住，再無路可走。
「哎喲！無埞走啦？橫掂都死路一條，不如直接跳海啦！哈哈哈！」欣欣逼到埋身。
「呵！你以為我唔敢呀！」我動身想衝去跳海。
下一個瞬間，欣欣閃現眼前，單手叉住我條頸，將我成個人壓喺大岩石上：「講下笑渣，我點會俾你跳海死，咁豈不是益左你？你係死都係要死喺我手上！」
佢隻手緊緊咁捏住我條頸，令我幾乎抖唔到氣：「要殺就好快啲郁手，否則俾我走得甩，我一定會嚟反咬你一啖！」
「哈哈哈哈！反咬我一啖？乜你呢隻喪家之犬，仲有能力反擊咩？」欣欣啲指甲插入我啲肉度，搞到我條頸流血。
我呢刻保持冷靜，不懂聲色咁運氣。
「好啦！廢話就唔多講，係時候送你上西天！」
對方一隻手捏住我條頸，另一隻手就用嚟出招。
車里龜頭很硬
2022-1-31 23:32:22
又話埋尾？
上一頁
第 10 頁
下一頁