其實我自細都好鍾意寫嘢,讀書嘅時候我都有玩玩下咁寫過啲散文同短篇,題材都係以愛情為主題,直到投身咗社會就日忙夜忙,以為到退休之前都未必再有機會攞返起枝筆,趁呢次無 plan 過嘅「長假」竟然可以有機會寫起長篇小說嚟,所以我成日話寫小說嘅初心係希望打開一扇可以畀大家暫時將現實忘卻嘅天窗,其實呢一扇天窗,說穿了,都係我為正處於困境嘅自己而開。
我一直以最謙卑嘅心去寫文同發表,慢慢得到唔少正面嘅迴響,大家嘅鼓勵為我帶嚟嗰種血脈沸騰嘅感覺,頓然令我忘記我其實係正值人生嘅低潮,亦驅使極相信 go with the flow 嘅我開始懷疑係咪個天都想我轉過另一條跑道?
公司始終唔係善堂,我嘅「長假」隨住一個新部門主管(下稱「食屎狗」)就位而結束,食屎狗肯定係我職場生捱中遇過最仆街嘅仆街,無其一,我一方面要出文,另一方面要應酬食屎狗啲無謂、無聊兼無知嘅要求,仲要時刻防範佢啲陰招,我終於都深切體會到乜嘢係「低處未算低」,疫情下要轉工都唔容易,喺要兼顧餬口嘅前題下,老實講放棄呢個「作家夢」我都唔知諗過幾多次,因為放棄真係比繼續簡單得多千萬倍,正如《海闊天空》嘅一句:「背棄了理想,誰人都可以,哪會怕有一天只你共我。」喺香港地講夢想,根本就有先天性嘅矛盾,網絡化嘅盛行,就連「懷才不遇」嘅擋箭牌都無埋,就算我曾經好努力好努力咁嘗試過,number never lies,事實係始終都搵唔到一條可以繼續走落去嘅路,最後選擇放棄,我都只係順應返呢個高度商業化嘅社會而做嘅一個應該做嘅商業決定啫。
"背棄了理想,誰人都可以,哪會怕有一天只你共我。"
- 黃家駒《海闊天空》
喺最絕望嘅時候,我係咁諗。
直到無出 po 都好耐好耐,依然有唔少讀者話仲係好期待新一季實在令我非常感動,創作由頭到尾都係我最大嘅興趣,所以就算我被食屎狗不斷蹂躪同折磨,我亦決定要同時間競賽,以一有空檔就寫、寫好一段就 po 一段嘅方式,主動出擊咁開始第五季嘅連載。
失敗的結果不用多說亦知是不好受,但我沒想過竟難受到如此地步,我由比賽一開始時的大冷門變成一匹黑馬,之後被對手大幅度拋離後又因一口氣反超前而成為大熱門,繼而被霍奧斯列進 Hall of Fame,最後的總分卻諷刺地以七分之微輸掉,我的一顆心由平地衝上半空再瞬間墮進地獄,這種感覺讓我以為自己真的已經粉身碎骨了。