人類都希望追求快樂，逃避痛苦

逃避痛苦嘅極致就係死亡

尋死嘅念頭開始喺我心底萌芽

佢吸收絕望、悲傷同空虛，茁壯成長

我每日好似一念無明嘅余文樂咁，訓喺床上

衫又唔換、涼又唔沖、鬚又唔剃

唔同嘅係，余文樂仲有曾志偉，我無

如果唔係李星同浩然日日夜晚買飯上我屋企，仲逼我食飯飲水，我諗我一早餓死咗

我久唔久會睇下電話，有一堆新客人搵我，但而家嘅我無能力成為任何人嘅止痛藥

阿文亦有搵我，佢話好擔心我，不過我都無覆

嗤嗤嗤！！！

皮肉被刺穿嘅聲音不停喺我面前響起

血花飛濺喺紅燈籠嘅背景之上，鮮血隨住老豆悲痛嘅呻吟流出嘴角

幾個強壯嘅鬼佬衝過嚟，將不停用刀插我老豆背脊嘅男人推開，打落佢染血嘅凶器，將男人制伏

「放開我！我要殺咗隻臭鴨！」我大腦一片空白，完全無辦法理解點解阿潤會喺度出現

我亦理解唔到點解阿螢都喺依度，佢擔心咁衝過嚟

老豆無力咁依靠我，重力令我跪咗喺地上

血腥刺鼻

我雙手抓住老豆嘅背脊，托住佢，手中拎住嘅袋因此跌落地下，幪面超人v3模型因爲老舊嘅外盒受到衝擊，跌咗出嚟，斷咗隻手

我記起喇⋯⋯

「你個死仔！夠膽唔做功課！？」老豆喺我好細個好細個嗰陣，因為我唔做功課火滾，所以掟爛咗佢買比我嘅幪面超人v3模型，左手斷咗，砌唔翻

我雖然用膠紙痴翻好佢隻左手，但成個模型已經變哂形

「變唔翻以前咁喇！嗚呀呀呀！」我失望咁掉咗個模型，不停揼老豆大髀，用盡全力發洩

老豆淨係望住我，一句野都無講

後來老豆有一次帶我行咗好多手辦模型舖，都搵唔翻同一個模型

已經連我自己都忘記咗，細個失去咗一個心愛嘅手辦模型嘅回憶⋯⋯

但係⋯⋯

要送的話，你就送依個比我啦

點解係依個？

無咩，純粹想要啫

「係鬼⋯⋯純粹想要呀⋯⋯死老野⋯⋯」

我嘅手因爲血水變得滑潤

老豆無力咁將下巴枕喺我膊頭

背上嘅傷口⋯⋯一⋯⋯二⋯⋯三⋯⋯四⋯⋯比人插咗九刀⋯⋯個個傷口都好深，一齊標緊血

「啊⋯⋯你⋯⋯記起喇？嗰陣⋯⋯對唔住呀⋯⋯掟爛咗你個⋯⋯v3模型⋯⋯」

眼淚不停湧出眼眶

「死老野！唔好出聲！慳翻啖氣呀！頂住⋯⋯頂住呀！」

「嘿、嘿⋯⋯結果⋯⋯最後⋯⋯我最重要嘅人⋯⋯原來⋯⋯唔係自己啵⋯⋯」

我兩隻手喺佢背上兩個傷口施加壓力，希望止血，但其餘七個傷口不停流血

阿螢喊哂口走到過嚟跪低，用兩手㩒住我老豆另外兩個傷口，但仲有五個傷口流血

「收聲呀收聲呀！叫你咪出聲係咪唔識聽廣東話！！！！」

「原來⋯⋯最重要⋯⋯嘅人係⋯⋯你啵⋯⋯」

我不停點頭：「我知！我知喇！等救護車⋯⋯好無？唔好出聲⋯⋯」

「你⋯⋯翻屋企⋯⋯推起我張床褥⋯⋯拎翻⋯⋯下面嘅野⋯⋯出嚟睇下⋯⋯」

床褥下面⋯⋯有暗格？

所謂體溫，就係生命，老豆慢慢失去體溫，生命隨每一度流失

大腦依舊無辦法運轉

「點可以咁⋯⋯我地嘅時間啱啱先開始前進⋯⋯我仲有好多戲想同你睇⋯⋯我仲要等你技術純熟翻再整餐蛋飯我食架⋯⋯我仲要同你講⋯⋯以後咪再叫雞⋯⋯寂寞的話就搵我⋯⋯等我陪你⋯⋯」


一切都未夠，點可以咁樣突如其來就結束

老豆嘅手吃力咁爬上我嘅背脊，輕輕咁掃

身體嘅記憶，刺激我嘅淚腺

喺我分手嗰段飲到一翻屋企就摟住廁所嘔嘅日子，有一隻手喺我背脊輕掃

係你⋯⋯

係你每一晚，將我抱翻入房，抱我上床架⋯⋯

「爸爸！！！！」

「哈⋯⋯叫咗你⋯⋯唔好重視⋯⋯任何人架啦⋯⋯而家又⋯⋯喊⋯⋯又⋯⋯傷心⋯⋯喇⋯⋯」

感覺到生命嘅消逝，就好似燃燒到盡頭，左搖右擺嘅燭火

為人父母總有天會成為子女的鬼

「拜喇⋯⋯仔⋯⋯」

輕掃背脊嘅手，好似突然斷電咁，落下