常公子 2021-9-8 13:04:50 陳濟棠反蔣前，5月1日勞動節，各路托洛斯基派組織18名代表喺上海召開聯合大會，成立以陳獨秀為書記嘅「中國共產黨左派反對派」，真係黨內有黨，反對派內都有反對派，真正矛盾論精神。陳獨秀於1929年8月至10月，多次去信中共中央，根據托洛斯基觀點，認為現在階段係「資產階級得到了勝利」，南京中央政府係資產階級所領導嘅政府，中國已經走上資本主義和平發展嘅道路，無產階級應該等待資本主義高度發展之後，再進行社會主義革命，一句到尾，就係反對你王明嘅路線。陳獨秀嘅觀點，亦係傳統馬克思主義嘅觀點，係歷史唯物論嘅發展方向，你可以話係紙上談兵，陳獨秀將佢嘅托派觀點喺黨內散發。而響成立「左派反對派」前，陳獨秀亦發表咗《告全黨同志書》同《我們的政治意見書》等等文宣，終於喺不久嘅將來，依位曾經係中國最高領導人嘅陳獨秀亦被逐出黨。陳獨秀係「托派」大將，但托洛斯基本人已經響權力鬥爭中敗於史太林，完全失勢，離開莫斯科流亡墨西哥。世界好現實，人在權在，水凍茶涼，又係嗰句，呢個世界冇所謂正確同唔正確，祇有輸同贏嘅分別，贏咗就正確，輸咗就唔正確，相當簡單。事情亦唔需要睇得太複雜，總之一切同權力分佈有關，一切同金錢有關，世界本來就係庸俗嘅，大家不得不承認。

1931年5月4號，國民政府公佈《管轄在華外國人實施條例》，鬼佬再唔可以也文也武，同日班禪活佛抵達南京出席國民會議；5月5號，江南造船廠建造嘅第五艘軍艦「民生」號下水，噸位為505噸，同日，籌備咗差唔多近半年嘅國民會議喺南京開幕，一切從頭開始。5月9號，中共中央號召白區黨組織發動群眾於「五卅」 當日喺上海南京等大城市舉行示威集會，白區，即係未解放區，紅區就代表解放區。5月9號，行政院公佈領海界線，領海範圍定為距離陸地三海里。

5月10號，南京中央體育館舉行奠基儀式。5月11號，粵桂第四集團軍總司令李宗仁、白崇禧、張發奎等通電討蔣，搞唔掂喎，仲有人拖後腿，唔好唔記得，廣西隔離個廣東，仲有個南天王陳濟棠話事，蔣Sir頭痛。5月12號，根據《大公報》報導，四川省7000萬人口中，有鴉片癮者大約係4000萬人以上！嘩！到底係真定假先？咁多人有毒癮？全省一半人有毒癮喎，即係大部份男人都係道友，就連女人細路都會食鴉片煙？究竟係唔係真呢？不過無論如何展現出一個真相，禁煙工作做咗咁多年，但係中國嘅毒禍問題仍然未解決，而且不斷蔓延擴大，相當得人驚。

#常威💀 #蔣介石平反系列 #黃金十年 #民國歷史

常公子 2021-9-8 13:05:00 😎【碌葛男人嫁得過】

https://play.google.com/store/books/details?id=e1N7DwAAQBAJ

❤download電子書，可以救地球

常公子 2021-9-9 12:47:08 【常公子歷史頻道412回：替大軍閥平反系列之 曹錕除咗賄選之外 仲做過啲乜】

♊ 近一兩年香港及世界發生嘅事情，令我對歷史有咗全新嘅了解，尤其是最近塔利班回朝，本來嘅我，已經係唔相信歷史記述嘅完全真確性，之前，我大概相信所閱讀歷史文本及書藉，會有70％至80%真確性，即係話有70%至80%能夠描述真相，但現在，我將70%下調到50%以下，一切大家所閱讀歷史，如果有一半係真相，已屬萬幸，應該要開香檳慶祝。依一個係一個不能不承認嘅事實，真相雖然殘酷，但始終是真相，比殘酷真相仲要殘酷嘅係——永遠睇唔到殘酷真相為何？

♈ 於是我重新檢視我所認識的歷史，尤其是近代史，一個冇聲音冇錄像記錄嘅時代，大概100多年前以前嘅歷史，其實可以通通係假係虛構係杜撰，因為有聲音有錄像記錄嘅時代，都冇辦法辨清真相，何況係冇？更更遠古嘅歷史，單靠幾個人幾本官方文本嘅記載，咁，真確性又可以有幾高？例如司馬遷所寫嘅【史記】，大家點解一口咬定佢所寫下嘅東西全部係真？但係偏偏，我哋就依靠【史記】去搭建二千多年前嘅中國圖像，有一句說話講得冇錯，所謂世界，其實只係人類大腦幻想建構出來嘅東西—— 喺呢度所指嘅，並非純粹唯心主義虛無主義嗰類描述，而係想講，每一個人響腦中所建構出來嘅「世界」同其他人都完全唔同，甚至係千差萬別，有人睇到個世界係美好、充滿正能量； 亦有人只係睇到一個悲慘世界，正在步向終結的路途上。

♑ 其實，亦不單止係唔同人所見嘅世界完全唔同，就算係同一個人，響生命路途嘅不同位置上，對世界都有唔同嘅體會，以我自己為例，我年青時代感覺世界充滿高尚同詩意，但到咗一定年紀，世界比我嘅感覺其實相當庸俗，甚至有點不知所謂，不外乎係權力同埋金錢嘅遊戲，而且遊戲本身總係符合剃刀原理—— 即每一件事總係會向最壞嘅方向發展。當然我告誡自己唔可以對世界失去期望，畢竟同舟共濟，冇理由想自己乘搭隻船船底穿個大窿嘅，對世界同未來抱有嘅唯一希望，大概亦祇有依個，因為如果隻船穿窿入水，船上面嘅人就會一齊浸死，無一倖免。原理亦都係，有人買股票就會升，冇人買嘅股票就會跌，至於股票本身是優質還是劣質，其實完全冇關係吧？

✅https://youtu.be/RakiGjVnzIQ

💚【我奮鬥不奮鬥】 常公子 楊熙合著

電子書下載⬇ https://play.google.com/store/books/details?id=CVo3EAAAQBAJ
Amazon Kindle版下⬇
https://www.amazon.com/dp/B098XHWTDK
實體書訂購⬇
https://www.382now.com/product?id=325

💙最新上線，請課金支持
【常威近代史】第十部《蔣Sir狼死開拖》
▶https://play.google.com/store/books/details?id=SgE8EAAAQBAJ
Kindle版
▶https://www.amazon.com/dp/B09C2FJD3S

常公子 2021-9-9 20:58:33 ［常威近代史］第五百八十五回 南天王陳濟棠（高清錄音版）

#唔鍾意睇字可以聽

https://www.facebook.com/129055447762576/posts/803951450272969/

常公子 2021-9-10 00:30:47


❤【常威近代史】第一部《大清亡國關慈禧蛋牛治》，全面開放，免費下載， #freedownload！

Free下載連結🔽

https://play.google.com/store/books/details?id=C3hjDwAAQBAJ

常公子 2021-9-10 12:18:52


【常威近代史】（五百八十六回）
邊個攞住把老牛殺入尖東先

1931年嘅5月，財政部長宋子文向行政院呈交報告，稱已委託中央銀行發行海關用金單位兌換券，即係關金券，而且聲明呢個動作純粹為咗便利關稅交收，並非改革幣制。1930年1月，國民政府以金價暴漲，銀價低落，海關收入大為減少，不足以償付外債為由，規定海關進口稅自2月1號起改徵金單位。規定每一金為淨值60.1866公厘純金，折合外幣等於美金0.4元。白銀時代結束，全地球進入黃金時代，而當年，美金大概未成為國際唯一通用結算貨幣，要到二次世界大戰之後，美金先至大曬。有一點大家應該要明白，所有政治問題其實都係經濟問題，而所有經濟問題，其實都係貨幣問題，貨幣問題係淩駕其他所有政治經濟條件之上，瞭解貨幣流通問題，比瞭解其他嘢更為重要，今日大家21世紀面對嘅世界局面，未必純粹係意識形態嘅二元對立，亦未必係中美兩大強權嘅權力競爭，好有可能，只係兩隻貨幣嘅爭霸戰，即係美元同人民幣，究竟係沿用過去數十年美元主導嘅世界結構？抑或不再只有美元一種貨幣獨大？

大家可以諗諗，美國幾時紮馬要開拖先？就係中國幾年前要搞亞投行，想唔侵美元玩，自己締做一個以亞洲東方為中心、以人民幣作為主要交易貨幣嘅經濟結算體系開始—— 不過歸根究底，其實所有問題都祇不過係一個問題—— 就係瘋狂印銀紙嘅問題。嚟緊幾年，因為covid-19疫情，美國會繼續瘋狂印銀紙解決問題，或叫做維持國勢，一萬億一萬億美金印出嚟，如果唔停止（睇情況亦冇可能停止），情況可以去到好惡劣、非常惡劣，就算真係有戰爭發生，我都一啲都唔奇怪，如果印銀紙可以解決問題，世界上根本沒有問題。印銀紙會令貨幣貶值，製造通脹，而美國冇可能自己承受曬印銀紙所帶來嘅通脹壓力，所以要將通脹輸出比全世界一齊受。

做個比喻，就係大佬借錢揮霍，但係條數就要啲細嘅攤分一齊還，基本格局就係咁，但係退一萬步嚟講，有一個問題就係，點解你係大佬？唔係我係大佬？所以大佬會同你講，當年係我攞住兩把老牛殺入尖東揚名立萬，而唔係你，所以我係大佬你唔係。

常公子 2021-9-10 12:19:06 1931年5月13號，中國佛教主席太虛和尚（1890-1947）等致電達賴喇嘛前赴南京，同班禪喇嘛冰釋前嫌，攜手合作。釋太虛俗名呂沛林，法名唯心，法字太虛，出生於浙江海寧縣長安鎮，著名佛教臨濟宗禪師、哲學家，是印順導師、東初法師、大勇法師、慈航法師嘅入門師父，被推崇為人間佛教嘅創始人（人間佛教，簡單啲嚟講即係入世嘅佛教），太虛和尚喺近代中國佛教嘅奠基者，受到佛教後學們崇敬。早年太虛和尚，同革命黨關係密切，甚至傳說佢有參予過革命工作，民國建立之後，太虛喺宗教界嘅地位冇人可以代替。1922年，太虛任武昌佛學院院長，次年創建世界佛教聯合會。1928年，出訪歐洲，向全世界人傳播佛教教義。抗日戰爭爆發後，太虛前往東南亞各地組織當地華僑募捐，支持抗戰。抗戰勝利後，被國民政府授予抗戰勝利勳章。
1947年3月17日，太虛大師在上海玉佛寺因腦中風圓寂，葬於浙江奉化雪竇山。太虛大師遺體火化後留下三百多顆舍利子，佢同印光（1862-1940）、虛雲（1840-1959）、弘一大師（1880-1942）合稱佛教民初四大師。

5月19號，國民黨中央執委會發表《告全國同胞書》，宣稱對內方面要剷除紅軍，防止赤化； 對外則要全力廢除不平等條約，此為執政兩大主要任務。

5月28號，國際兒童節喺上海舉行，中國首次加入。但係同日，廣州國民政府宣佈成立，繼汪精衛之後，再有另一股勢力另起爐灶，之前叫寧漢分裂，今次叫寧粵分裂。蔣Sir軟禁國民黨元老級人馬胡漢民，令到蔣胡矛盾演變成寧粵矛盾。4月30號，國民黨中央監委鄧澤如（1869-1934）、林森（1868-1943）、蕭佛成（1862-1940）、古應芬（1873-1931）喺廣州通電彈劾蔣介石。5月3號，南天王陳濟棠（1890-1954）為首嘅粵軍將領聯名通電響應，要求蔣Sir下臺。5月11號，蔣Sir宣佈粵方企圖叛變中央，係陳炯明第二號，扣你帽子大大頂，5月25號，德高望重嘅唐昭儀（1862-1938）、古應芬、林森、孫中山嗰仔孫科（1891-1973）、革命元老許崇智（1887-1965）、南天王陳濟棠、桂系李宗仁喺廣州聯名通電全國，要求蔣Sir喺48小時之內下野！

國民黨內部分裂問題，始終無法解決。蔣Sir搞一人獨大，集黨政軍大權於一身，其實有好多人不滿，始終都係嗰個老問題：點解你係大佬？唔係我係大佬？問題嘅答案亦都係嗰個：當年係我攞住兩把老牛殺入尖東揚名立萬，而唔係你，所以我係大佬你唔係。但係國民黨嘅問題就係，但係當年我都有份攞住把老牛殺入尖東喎，冇我桂系李宗仁，你北伐點會成功呢？大家互相猜疑，冇辦法共享權力，所以問題始終冇辦法得到完滿解決。

嚟到今時今日，仲係有好多人（特別係知識份子讀書人）相信，認為敵我雙方可以坐埋枱傾解決「權力鬥爭」問題，其實係冇得傾，邊個好打邊個話事，打到你頭破血流，咪可以埋台傾囉。而且所謂談判傾偈，好多時候只係雙方為咗拖延時間嘅戰略嚟。

#常威💀 #蔣介石平反系列 #黃金十年 #民國歷史

常公子 2021-9-11 12:16:21 【常公子歷史頻道413回：替大軍閥平反系列之 孫中山做大元帥】

♊ 今日係9月11號星期六，塔利班選擇今日建國，明顯有特別意義，今朝打開外國傳媒，鋪天蓋地都係關於九一一事件。21世紀最大嘅變局，無可否認就是911，911之後，小布什總統發動反恐戰爭，先後推翻伊拉克候賽因政權，漣漪效應下發生阿拉伯之春，多個國家政權易手，中東大國敘利亞分裂，出現咗伊斯蘭國，歐洲難民潮，仲有烏克蘭分裂，前後20年，最後以塔利班回朝告終，好難相信事情會告一段落。加上中國強大的崛起，未來會發生乜嘢事，真係冇人可以預測得到。尋日拜登同國家主席習近平第二次直接通話，大概係唔想真正嘅大型衝突出現，希望彼此保持剋制。

♊ 911之後，最大嘅變局當然係新型冠狀病毒疫情，前後騰折咗全地球兩年多，所帶來嘅整體經濟損失應該超越第二次世界大戰。疫苗出現，但係似乎能夠抑制疫情嘅擴散，各種數字表明，疫苗本身係一種心理安慰劑，係一個藉口，告訴大家要與病毒共存。西方國家口徑一致，要當病毒冇到，全面重啟經濟活動，全未回復人口交流。而響亞洲，好多國家仍然全力抗疫，當中包括香港，目前香港一方面冇辦法與內地通關，另一方面相信亦唔打算同西方國家一樣與病毒共存，有小小兩頭唔到岸，成爲咗孤島上邊嘅一個孤兒，情況非常唔樂觀。

⛎ 除咗疫情之外，香港亦都面臨一次自1997回歸以來嘅政經大轉型，最近移民潮出現，好多人離開，個人感覺如果疫情能夠完全平伏，大概會有更多人選擇走。香港似乎無論如何都唔能夠逃避「過客港口」依個獨特嘅地緣命運，人來又人往，有人離開，亦有人會嚟重新開始，原來一個人有一個人嘅命運，一個地方都有一個地方嘅命運，但我始終相信，如果呢個世界真係有宿命嘅話，香港始終都係一個福地，唔會咁容易玩完。

✅https://youtu.be/V1zqEBPK_k0

💚【我奮鬥不奮鬥】 常公子 楊熙合著

電子書下載⬇ https://play.google.com/store/books/details?id=CVo3EAAAQBAJ
Amazon Kindle版下⬇
https://www.amazon.com/dp/B098XHWTDK
實體書訂購⬇
https://www.382now.com/product?id=325

💙最新上線，請課金支持
【常威近代史】第十部《蔣Sir狼死開拖》
▶https://play.google.com/store/books/details?id=SgE8EAAAQBAJ
Kindle版
▶https://www.amazon.com/dp/B09C2FJD3S

常公子 2021-9-12 23:27:50 ［常威近代史］第五百八十六回 邊個攞住把老牛殺入尖東先（高清錄音版）

#唔鍾意睇字可以聽

https://www.facebook.com/129055447762576/posts/805779326756848/

常公子 2021-9-13 00:11:08 【常威近代史】第十部《蔣Sir狼死開拖》
▶https://play.google.com/store/books/details?id=SgE8EAAAQBAJ

Kindle版
▶https://www.amazon.com/dp/B09C2FJD3S

常公子 2021-9-13 12:35:17


【常威近代史】（五百八十七回）
投資者須自行承擔風險

粵寧分裂，廣州另起爐灶，蔣Sir周身唔得閒，1931年5月30號，國立清華大學學生召開全體大會，驅逐校長吳南軒（1893-1980），請教授會維持校務，學生會嘅勢力竟然大到可以驅逐校長，認真唔可以講笑！真係實踐民主精神！同日，《鹽法》公佈，私鹽販賣，古往今來，從來都係大生意，到咗今時今日當然唔係，因為代替鹽嘅產品，己經有千萬種。1931年嘅5月，江西工農民主政府規定，土地分配一律以「鄉」為單位，以人口為標準，徹底平分，大搞公平主義，貧中下農可以擁有屬於自己嘅耕地，我諗佢哋真係想都未想過，而且唔係呢一代未想過，係幾代人，甚至早十幾代人都未想過，一下子夢想成真，當然會全程投入，支持中共。另外，工農紅軍第二軍團政治委員、湘鄂西革命根據地同湘鄂西紅軍的創始人之一嘅周逸群（1896-1931），響岳陽賈家涼亭附近畀國民黨軍伏擊身亡。

時間線進入1931年6月，6月1號，中國同德國嘅無線電正式通電，國民政府公佈《中華民國訓政時期約法》，同一日，國民政府以補助國庫名義，發行民國20年統稅短期庫券8000萬元，就即係發債印銀紙，所謂統稅短期庫券，就係以稅署（即係稅務局）微收卷烟稅餘款及棉紗等稅作擔保，實行月息8厘，九八折實收，並規定每月還利息一次，由中央、交通、中國銀行責負發行銷售，到1937年11月償還全部本金加利息。大家睇唔睇到？月息8厘，個個月有息收？六年後本利歸還？真係有冇咁大隻蛤乸隨街跳？今時今日21世紀，存款入銀行接近零利息，但係有個同曹查理有八分相似嘅西裝友同你講，買我隻基金就有月息8厘收！咁正？問題係你信唔信？所謂信者得救，你信嘅話，就大家開心，我實收咗你嘅真金白銀渡過難關，你就買咗一個希望心安理得，其實都算係公平交易。1931年依一劑8000萬元短期庫券，講到明1937年11月全部償還本息，但係去到1936年又規定延長償付限期，由統一公債換上，自換上之日起，又攤分18年還清，月息由8厘變6厘，原來6年短期債券，變咗24年長期債券，哈哈！好好笑咩？一啲都唔好笑，橋唔怕舊，最緊要受。今時今日大把金融產品、保險產品有類似嘅上述情況，買嘅時候係一套好優惠你嘅條款，到你買咗之後供得幾年，所謂洗濕咗個頭，條款就會改變，搏你唔記得初心，所以，投資者必須自行承擔風險，借錢總要還，咪畀錢中介。

其實世間上凡事凡物都係一樣，虎頭蛇尾，十單有九單，亦包括做生意、人際關係、政治、愛情同婚姻關係在內，邊有話可以輕易白頭到老？大團圓結局？激情過後，就係平淡無奇，唔惡化已經perfect池！所以我個人，唔係好鍾意做長期投資，都係鍾意跑吓馬仔多啲，買落去，幾分鐘後有結果，唔係贏就係輸，又下一場又嚟過，唔使磨爛蓆，亦唔使等。與其都係要死要輸，不如引刀成一快，不負少年頭，唔好要我等到白髮蒼蒼，先話畀我知本金輸曬。

常公子 2021-9-13 12:35:28 1931年6月7號，中央銀行將金條152箱，每箱125磅，運往紐約作中央銀行在海外之存金，涉及金額係美金510萬元。由呢個舉動可以睇得出，當時嘅中華民國同美國政府關係非比尋常，點解唔運去東京呢？點解唔運去倫敦呢？或者點解唔運去瑞士？我成日講，睇歷史要睇小事，由小事先可以見大局。

6月8號，華商保險聯合組織集20間保險公司財力，承受各界巨額保險，喺當時嘅亂世，做保險業真係刀口上嘅生意，相信唔易做，亦唔好做。同日，國內唯一研究漫畫嘅團體「中國漫畫研究會」喺上海成立，30年代，中國開始有漫畫出現，當時嘅漫畫，主要係刊登喺報紙刊物上諷刺時弊，當然其中最重要嘅人，中國漫畫之父豐子愷（1898-1975），亦有人講過，香港漫畫《老夫子》，老夫子個形象就係抄30年代上海某漫畫家嘅作品咁講。

6月10號，上海灘大亨杜月笙（1888-1951）家祠喺上海舉行盛大的落成典禮；同日，中共元老、中國共產黨早期著名領導人之一，毛澤東青年時代同學同戰友蔡和森（1895-1931），喺英國殖民地香港被捕，之後被引渡返廣州被殺。中國共產黨方面對其評價為：「中國共產黨早期的重要領導人，傑出的共產主義戰士，無產階級革命家、理論家和宣傳家。」

6月11號，內政部統計全國人口為474487000，4億7000萬，依個數據亦都非常重要，4億7000萬人，當然未必精確，但亦都唔會相差得太遠，1930年代，中國嘅人口估計大概係4-5億之間，當然以人口數目計算，當時嘅中國係世界上第一大國，唯一比得上中國嘅，可能係大英帝國（不過係計曬所有殖民地人口）。去到1949年後，中華人民共和國建立，國家領導人毛澤東話中國有四萬萬人，咁即係話，由30年代起計，去到50年代，中國人口不但冇增長，而且出現負增長狀態，理由亦都好簡單，因為中間發生過中日全面戰爭同國共內戰，相信死咗唔少人。今日21世紀中國嘅人口係14億5000萬，比起建國初期，翻咗四倍。目前中國人口已經渡過正增長高峰期，之後又會負增長，不過唔係因為戰爭，而係因為生仔成本太高，大家唔想生啫。

#常威💀 #蔣介石平反系列 #黃金十年 #民國歷史

常公子 2021-9-14 18:53:26 ［常威近代史］第五百八十七回 投資者需自行承擔風險（高清錄音版）

#唔鍾意睇字可以聽

https://www.facebook.com/129055447762576/posts/806793289988785/

常公子 2021-9-15 14:03:09

【常威近代史】（五百八十八回）
唯物辯證法思維模式

1931年6月12號，廣州「國民政府」 舉行北伐誓師大會，又要北伐?大概今次嘅北伐目標並唔係北京，而係南京。不過誓師還誓師，出兵還出兵，兩回事嚟嘅，有少少綜藝節目feel，從來政治集會，都係為咗團結民心，當然亦都係主要為咗籌款，歡樂滿東華啫，成班總理排排企，邊個捐錢捐得多就最威威！

6月17號，國民黨中央政治會議推選蔣Sir為政治會議主席。6月18號，寧夏綏遠民生渠完工，係一項重大嘅水利工程，渠長800里，可灌哋二萬頃，於6月22號開閘放水，中國嘅水利工程其實係國家之本，尤其是一個以農立國嘅國家嚟講，治水問題無比重要，再講多次都唔厭，直至21世紀2003年三峽工程全部竣工運作，中國嘅水利問題先有大幅度改善，真係長路漫漫，一講就有，你估睇電視劇咩？另外順帶一提，長江三峽工程，響1994年拍板上馬，到2003年葛洲壩同全球最大嘅水力發電站葛洲壩水力發電站完工，其實只係用咗十年時間，速度快到驚人，相信亦祇有社會主義國家先能夠做得到，整個三峽工程耗費1800億人民幣，折算260億美金，用今日嘅角度，又係平到驚人，真係好彩起得早，如果今時今日先搞，起碼過萬億，如果由香港人搞，要十萬億埋單。

諗返轉頭，三峽工程真係是非多多，首先傾就傾咗幾十年，有利有弊，究竟好處多於壞處？抑或壞處多於好處？曾經有段時間爭拗不休，大約兩年前，又有流言話葛洲壩會決堤？最後都冇。我唔係水利專家，我乜嘢都唔知。我淨係知道二十一世紀前年年有華東水災，年年電視有籌款，但去到21世紀，情況就好似改善咗。呢個世界嘅嘢，講係冇用，水可以吹，你話你老母識飛天都可以，但係必須瞭解實際情況，好似有人成日話有「支爆」，一講都講咗成20年，但係支那始終未爆，現在，似乎美爆仲會早過支爆，當然作為成年人，過咗40歲了，應該要成熟穩重一啲，要知道天下無不散之筵席，乜嘢最後都會爆！差在遲爆定早爆？又或者可以拖到幾時先爆？又或者，點樣先可以做到爆X咗你都覺得冇乜嘢？就好似日本咁，其實九十年代係爆咗，但係你又覺得冇乜問題，東京照去，壽司照食。咁爆同唔爆其實有乜嘢關係呢？如果你認同日本已經爆咗，咁其實英國七十年代已經爆咗，香港亦響2003年爆過一次，到2019年再爆一次，不過你唔多覺啫。

不過最後始終都一個哲學問題，衹要自己冇死，生活還是要繼續落去。馬照跑，舞照跳。

常公子 2021-9-15 14:03:26 6月19號，上海大地主，愛儷園及哈同洋行老闆英籍猶太人歐思哈同（Silas Aaron Hardoon，1851-1931）喺上海病逝，終年79歲，認真長命，哈同出生於今日伊拉克巴格達一個貧窮嘅猶太人家庭，1856年跟隨父母搬到咗印度孟買，入咗英國籍，佢喺當地入讀咗猶一亽沙遜家族資助嘅慈善學校。到1872年佢一個人去咗香港，第二年轉到去上海入職沙遜洋行，做收租員兼看門口。哈同喺地產界好快就展現咗佢嘅經營天份，喺1887年就成為咗上海法租界公董局董事，1898年又改任上海公共租界工部局董事。到咗1901年佢就離開咗沙遜洋行，自己開咗個哈同洋行專做地產生意。哈同喺開發經營「上海第五大道」，佢出咗60萬兩白銀，用鐵黎木鋪設咗部分嘅南京路，呢個做法唔單止提高咗佢喺上海嘅知名度，仲令佢名下南京路嘅地產項目大幅咁增值，成為咗上海最富有嘅地產大亨之一。因此大家必須相信，所有政治問題最後都係經濟問題，所有經濟問題最後都係地產。

6月21號，蔣Sir 組織對江西中央蘇區實行第三次圍剿，之前兩次大圍剿，都以失敗告終，仲俾後世人話佢「剿匪不力」？你估佢想咩？不過我哋都知道，中共嘅紅軍會係最後嘅軍事勝利者，佢哋嘅實力同韌力，其實非同小可，又係嗰句，呢個世界冇所謂好運存在，全部都係要靠實力，要實牙實齒拼搏，貼出事後飛，當然勁抽，但事前貼飛又中先係堅，大家究竟明唔明白？現代人可能已經非常習慣P圖，唔習慣看清楚事物真相，於是好喜歡憑空想像事物發展規律，因此作出錯誤判斷，都係理所當然。世界公平嘅地方，如果在於人最後都會死之外，仲有一樣嘢，就係叫「唯物辯証法」，唔識或者唔認同，其實好難去理解所謂真實世界，還是安心活著於你想像出來的那個世界吧？

正如2021年美軍撤出阿富汗一樣，點解唔繼續駐軍維持西方倫理秩序下嘅正義呢？美國國務卿布林肯喺聽證會上講得好好，過去20年美國花費數千億美元響阿富汗身上，但係完全冇作用，美軍一話走，阿富汗政府就喺一星期內火速倒臺，咁過去嗰幾千億美金使咗去邊呢？邊個袋咗呢？繼續駐軍多五年十年，繼續洗錢多幾千億，情況只會係一樣，三歲定八十，20年都不變嘅事物，難道未來20年會變？計好條數，唔參與冇把握嘅事，叫唯物辯証法，如果你相信正義站在自己一方要繼續維持正義，而又不惜一切嘅話，叫唯心主義；總括嚟講，前者唔會自相矛盾，後者經常會自相矛盾。

不過矛盾係推動事物及歷史發展嘅基本動力，又係唯物辯證法思維。

#常威💀 #蔣介石平反系列 #黃金十年 #民國歷史

常公子 2021-9-15 14:03:38

不要奮鬥了，【我奮鬥不要奮鬥】電子書限期HK$9.9 only！

https://play.google.com/store/books/details/%E5%B8%B8%E5%85%AC%E5%AD%90_%E6%88%91%E5%A5%AE%E9%AC%A5%E4%B8%8D%E8%A6%81%E5%A5%AE%E9%AC%A5?id=CVo3EAAAQBAJ&hl=zh_HK&gl=US

常公子 2021-9-16 11:57:39 【常公子歷史頻道414回：替大軍閥平反系列之 大軍閥的成本效益】

♊ 根據外媒報導，原來當日群眾闖入美國國會山莊時，總統特朗普曾經打算對華開戰，美國軍方高層兩次致電中國軍方通報情況，如果報導係真嘅話，如果報導唔係愛嚟抹黑前任總統Donald Trump嘅話，原來戰爭同我哋擦身而過，差少少就擦槍走火，情況真係非常之嚴重。不過無論如何，係真係假都好，起碼可以睇到一件事，就係戰爭其實比我哋想像中更容易發生，衹要特定條件配合，啱啱撞正剛剛，隨時隨地都可以爆大鑊！我哋必須明白一點，太平盛世嘅日子已經過去，目前整個世界正處於「戰爭狀態」邊緣，如果唔好好處理，下次就係真正發生之時。

♉ 世界格局正在不斷變幻中，原本我哋熟悉嘅世界，已經唔存在。美國要獨大落去，維持佢嘅非凡軍力，需要不斷印銀紙，但印銀紙係七傷拳，愈印得多，自己就暴露出更多弱點。阿富汗已經係一個好例子，二十年間使咗幾千億美金，到頭來一啲效果都冇。當然如果你想像美國完全撤手世界事務，唔再多事獨善其身嘅話，世界嘅混亂情況一定會加劇，中國能否取代美國嘅「世界警察」地位？或者中國是否願意做美國曾經做過嘅事？其實都好難講，當然每個人都想做大佬，但做大佬要付出代價，當「收入」同「支出」 條數計唔掂，亦冇人願意做大佬。

♏ 另一件更加尷尬嘅事，就係所謂全球防疫問題。「與病毒共存」，全面開通經濟，已經係西方世界嘅共識； 但係東方世界，仍然致力防疫清零，雙方嘅距離越拉越遠，究竟點收科？亦冇人可以睇到，當然要睇病毒仲有冇變種？殺傷力係咪不斷降低？疫苗有冇作用或副作用？民心點樣走向？個人認為，與病毒共存，當件事唔存在，大家習慣了會是最後嘅結局，一切要百份百回復正常。但係「防疫」同「開通」中間如何收窄距離？同埋點樣安置一個你OK我OK嘅下臺階先係問題，亦有可能係時間問題，再拖多一年半載先可以解決。但再搞多一年，就係三年，冇人能夠想像可以搞三年，難怪連我自己最近都開始相信「新型冠狀病」 整件事係一個陰謀論，目的係要製造整個世界嘅經濟衰退……

✅https://youtu.be/LcdtJglSbnk

💚【我奮鬥不奮鬥】 常公子 楊熙合著

電子書下載⬇ https://play.google.com/store/books/details?id=CVo3EAAAQBAJ
Amazon Kindle版下⬇
https://www.amazon.com/dp/B098XHWTDK
實體書訂購⬇
https://www.382now.com/product?id=325

常公子 2021-9-16 23:05:28 ［常威近代史］第五百八十八回 唯物辯證法思考模式（高清錄音版）

#唔鍾意睇字可以聽

https://www.facebook.com/129055447762576/posts/808082936526487/

常公子 2021-9-17 11:02:22


【常威近代史】（五百八十九回）
山雨欲來風滿樓

1931年6月21號，蔣Sir開始對紅軍嘅第三次大圍剿。6月22號，另一個中共高層遇害，佢就係當時嘅中共中央總書記、中央政治局主席向忠發（1879-1931），向忠發喺上海法租界靜安寺附近租車時被捕。向忠發隨即叛變，響善鐘路巡捕房供出中共大量機要，之後令更多中共地下黨員被捕，周恩來瞿秋白等中共高級幹部知道消息後，立刻嚮上海展開大規模轉移行動。第二日，向忠發被引導從凇滬備司令部，由於佢知道嘅嘢已經講曬，而且對於中共最內部最高層嘅秘密竟然知道唔係太多?於是響6月24號，就被送去處決。

中共六大1928年6月響蘇聯莫斯科舉行，共產國際要求必須由「工人成分」嘅人物擔任中共首腦，於是乎向忠發就成為咗中共名義上嘅最高領袖，即係當總書記。但係由於向忠發實際水平能力偏低，所以祇不過係一個名義上嘅領袖，當時中共中央嘅實際領導權，先後操縱於蔡和森、周恩來、李立三、瞿秋白同王明手中，而蔡和森已經係早前被殺。

向忠發出身貧窮家庭，幼年勉強讀咗5年卜卜齋，輟學後隨父母遷回湖北漢川。1894年14歲進入漢陽兵工廠做學徒。兩年後，佢因同上司頂撞而被工廠開除。響親友介紹下，向忠發進入武昌製錢局做工人。1901年底，武昌造幣廠執粒，向忠發跟隨王端陽學過拳術，經王端陽介紹，向忠發到江西九江，做過大宅僕人，辛亥革命後，佢做過揸船，兩年時間升為大副，掌管贛江商輪。因商船橫闖關卡、毆打官員、撞壞鹽道船隻，真係天生不羈放縱愛自由，江西政府通緝向忠發，之後佢返回湖北家鄉。三年後，又響江漢造船廠返工，之後進入大企業漢冶萍公司，因較強活動能力同較強嘅階級覺悟而被吸收參加當時嘅漢冶萍工人俱樂部。1921年，擔任漢冶萍工人俱樂部副委員長。1922年，由許白昊介紹加入中國共產黨。上述文字，我要話你知乜嘢叫做「工人成分」。

類似這種「成分」太好而扶搖直上嘅例子，近代就有「四人幫」嘅王洪文（1935-1992），曾經被形容為搭直升機直上中央道長； 另外喺毛澤東死後，掌權嘅華國峰（1921-2008），後世亦有相同評價。

6月23號，國民政府核定「忠、孝、仁、愛、信、義、和、平」八個字為訓民要則，要民衆學習以上八種美德，其實都係儒家哲學啲嘢，來來去去，就係要每個人做正人君子，做個守法交稅嘅好公民，咁就國家天下太平，社會欣欣向榮。香港從來唔搞美德，如果有八個字訓示香港人，咁應該會係「樓、股、錢、勢、吃、喝、波、馬」掛？應該係，除非唔係嘅啫。講吓笑，香港人點會咁膚淺呢？

常公子 2021-9-17 11:02:35 6月，馬仲英（1910-1936）首次率領部隊進入新疆，1931年，新疆省政府在哈密、伊吾、宜禾等地區實行改土歸流，強行遷徙當地民眾，呢個舉動激發咗哈密維吾爾族人嘅反抗情緒，發生暴動，暴動領袖鑒於自身力量難以同政府軍抗衡，於是向馬仲英求援，馬仲英趁機以「協助在新疆的與回族回教的維吾爾同胞兄弟」為名，親自率領騎兵部隊同直屬部隊進入新疆，7月3號開始圍攻哈密縣城。

6月26號，發生咗件驚世大事，東北興安屯墾軍第三團將向防區 進行間諜活動嘅日本現役軍官中村震太郎大尉同隨從三人拘捕，陸軍參謀中村震太郎等3人受命前往中國大興安嶺東側進行為繪製軍用地圖調查，但係依次調查係違反禁止進入區域條約，經過審訊，中村等人證據確鑿，晚上，團長關玉衡下令將中村等四人處死，並且焚屍滅跡。由於有人告密，呢件事畀日方知道咗，大約兩個月後，1931年嘅8月17號，日本政府隱瞞中村等人進行間諜活動嘅真相，並向外公佈佢哋比中國軍隊無理處決，藉此宣傳所謂「滿蒙危機」，煽動戰爭發生。9月上旬，中國政府承認中村等四人被處死嘅事實，並且希望通過和平外交手段解決問題，但係日本豈肯罷休？既然你比隻好牌我上，今日冇理由唔上喎。終於事態不斷擴大，9月中旬，日本亦用呢件事作為戰爭藉口，發動驚世嘅「918事變」，不過918事變，留返係9月18號先講。

時間線進入1936年7月，7月2號 ，日本軍警槍擊吉林省長春縣萬寶山中國農民，造成三人死亡，數十人受傷。1936年4月16號，長春稻田公司經理郝永德喺該地租得民地7500畝，轉租給朝鮮人李升董等耕種，呢啲朝鮮人強行從中國農民開墾嘅屬地中開挖一條長達20餘里嘅水渠，響伊通河上築壩引水，呢個行為破壞咗中國農民嘅農田，有三萬畝農田將會被河水淹沒，長春縣政府多次同日本朝鮮方面交涉，均無效果。7月1號，既然政府幫唔到自己，就自己靠自己，400幾個當地農民前往堤壩破壞，遭日警以實彈射擊，7月2號，日警增派40幾人前往萬寶山。與此同時，日方喺日本同朝鮮報紙上刊登歪曲事實嘅文章，煽動排華暴動。之後朝鮮仁川、漢城、平壤等地方先後後生排華暴動，有大量中國僑民被無辜殺害，死亡人數超過100人，受傷人數超過300人，中國僑民財產損失則難以估計。真係咁都得，都就快打仗了，其實又有乜嘢唔得？

#常威💀 #蔣介石平反系列 #黃金十年 #民國歷史

常公子 2021-9-17 11:02:46

不要奮鬥了，【我奮鬥不要奮鬥】電子書限期HK$9.9 only！

https://play.google.com/store/books/details/%E5%B8%B8%E5%85%AC%E5%AD%90_%E6%88%91%E5%A5%AE%E9%AC%A5%E4%B8%8D%E8%A6%81%E5%A5%AE%E9%AC%A5?id=CVo3EAAAQBAJ&hl=zh_HK&gl=US

常公子 2021-9-18 11:48:25 【常公子歷史頻道415回：替大軍閥平反系列之 貨幣信用】

♊ 根據報導，中央已經響香港地產商施壓，要求地產商維護北京利益，致力解決香港嘅住屋問題。對於2019年嘅亂局，中央似乎有咗定調，最後嘅深層次矛盾就係樓價太高，住屋問題長期困擾香港人，導致社會經濟發展停滯不前，民怨激增。對於上述觀點，我並不完全反對，畢竟住屋問題，的確係香港一個長期無法解決的困局，所有政治問題都係經濟問題，所有經濟問題都係地產問題，而地產問題就係土地問題，其實又無錯，根據馬克思主義，一切源於土地，解開死結，要由源頭著手，部署多年嘅行動，終於發生。

♑ 之後嘅局面會係點？我真係唔知道……有人講，香港「成也地産，敗也地産」，但究竟係唔係真相呢？如果冇樓炒，香港又會變成點？如果由現在開始，樓價下調一半以上，又會發生乜嘢事呢？真係冇人知，不過「摸著石頭過河」就一定，新局面需要新發展，過去嘅事亦唔好再提，凡事冇得返轉頭，懷緬昨日，下下九十年代點好點威，但畢竟已經係30年前嘅舊事，雖然30年前鹿鼎記梁朝偉今日都係尚氣梁朝偉，但係問題就係30年都係梁朝偉。不斷懷緬昨日嘅成就，只會拖著後腿不能向前行，經過一場新型冠狀病毒洗禮，世界已經變成完全不一樣，全部都係因果，昨日嘅因，成就今日嘅果。

♐ 好多政策之前唔能夠順利推行，因為香港有太多反對嘅聲音，爭拗不斷二十幾年，大家睇到嘅係，香港已經落後於世界潮流，甚至係大幅度落後於世界潮流，原本係行喺亞洲最尖端嘅大都會，一下子被周邊城市衝過頭，都係時候要重新考量中間究竟發生乜嘢問題？過去20年，我都喺個社會度碌來碌去，我亦都親眼睇到發生乜嘢事？有見人炒到發達，但好少見啊做生意發達。成日話周街機會，但那些機會不是我的，更不是窮人及低下階層的，那麼機會又在哪裏呢？變幻才是永恆，一切都需要改變，有可能變得更好，亦有可能變得更壞，當然選擇變同唔變，亦唔係由個人嘅意志所決定，我哋可以做嘅，就係調節心境，面對變化，千變萬化，都要保持一個不變嘅平常心，衹要人仍沒有死，仍然需要活下去。

✅https://youtu.be/8I9HG6k7rmc

常公子 2021-9-19 22:14:30 ［常威近代史］第五百八十九回 山雨欲來風滿樓（高清錄音版）

#唔鍾意睇字可以聽

https://www.facebook.com/129055447762576/posts/809764059691708/

常公子 2021-9-20 12:53:09


【常威近代史】（五百九十回）
人人抽後腿

俗語有話，趁你病攞你命，打仗嘅嘢，梗係瞄準敵人嘅弱點而進攻，唔通對手如日方中，你冚個頭埋牆咩？梗係睇見敵人開始唔妥，弱點暴露，咁就有位入鳥，舉個例子，以前TVB如日方中，ATV多次發動進攻搶收視，結果都係徒勞無功，仲搞到損手爛腳，你試下如果發生喺今日會點？場仗應該易打啲。做人嘅嘢，「機會窗口」好重要，低買高賣，講邊個唔識啊？係真正做得到，又有幾多個呢？

1931年7月，蔣Sir向紅軍發動第三次大圍剿，之前兩次失敗，蔣Sir面目無光，誓要百倍歸還！7月1號，集結在江西南昌一帶嘅30萬國民黨軍隊，你冇聽錯，真係30萬！絕對唔係講笑，30萬軍隊喺蔣Sir親自指揮下，組織成以何應欽（1890-1987）同陳銘樞（1889-1965）分別任總司令嘅左右兩翼集團軍，從今日開始，向贛南同閩西嘅中共中央蘇區推進，採取長驅直入嘅直接戰略部署，開始轟轟烈烈嘅第三次圍剿紅軍行動！上集講過，中共最高領導人向忠發已經遇害，配合大圍剿，誓要將中共連根拔起！當然件事唔會咁簡單。

當時紅一方面軍共有30000多人，以3萬大戰30萬，可能對方都有水分，不過以兵力同裝備計算，始終都係強弱懸殊。7月中，面對敵人主逼近，紅軍主力部隊秘密轉移至贛南嘅興國，國民黨軍隊發現後，分多路進攻包圍，計畫將紅軍圍殲喺贛江邊。但係紅軍隨之高速移動，發揮遊擊戰術最高境界，於8月5號，隱蔽地穿過興國、崇賢兩地國軍之間嘅20里空隙地帶，即係從敵人中路突破離開，真係講你都唔信，紅軍固然大膽，但係國軍嘅所謂圍殲包圍網，其實有個窿漏水！8月7號，紅軍喺蓮塘、良村殲滅國軍第47師一個旅同埋第54師部隊，8月11號，又喺寧都北面嘅黃坡殲滅第8師四個團。之後，紅軍以少量部隊吸引國軍四圍撲，其主力部隊則潛回興國地區休整補給。8月底，喺蘇區內四處撲空嘅國軍先至發現紅軍主力所在，此時，廣東作反，寧粵開始軍事對峙，蔣Sir 再一次被人抽後腿，需要將部分參予大圍剿嘅國軍調去湖南戒備，9月7號，紅軍喺老營盤追殲國軍第9師1個旅，9月15號，又係方石嶺以南殲滅第52師，冇錯，係9月15號，仲有3日，就係9月18號，咁你覺得會點呢？比南天王陳濟棠抽你後腿之後，又有日本人抽後腿，人祇有兩條腿，抽乾了！

常公子 2021-9-20 12:53:20 打仗，要天時地利人和就你，天時即命運，7月開打，9月918事變爆發，仲圍剿紅軍？自己都差啲畀日本人圍剿緊； 地利唔使講，江西天險，窮山惡水，100%啱打遊擊戰運動戰，真係一條似樣啲嘅公路都冇嘅山區地帶，任你軍備幾精良，都係嘥氣，正如美國喺中東打反恐戰爭，或者喺越南打越共，情況都係一樣，明刀明槍梗係唔夠你砌，但係亦冇需要明刀明槍公平決鬥，打仗啫，又唔係送頭？而且經過第一次世界大戰嘅血腥洗禮，打仗並唔係榮耀嘅事情，而係生死嘅事情，牽涉到生死，就乜都冇面俾。至於人和，就更加唔需要講，如果蔣Sir一早搞好同自己友嘅人際關係，相信歷史會徹底改寫。不過時也命也，好多嘢冇得咁樣講，條路唔咁樣行，亦都行唔到今時今日嘅位置。每個人都想勝利，每個人都想面面俱圓唔得罪人，最好大家相親相愛，但係又可以肚滿腸肥，但係人在江湖，往往身不由己。你唔去害人，但人哋會害你？個餅唔夠大，人多就唔夠分，咁點算？聰明嘅統治者會做大個餅，減少分餅的人數； 愚蠢嘅統治者會做細個餅，同時不斷增加分餅嘅人數。技巧在於，人多做大個餅好易，人少做大個餅就好困難。

去返7月先，7月5號，山東坊子由日本人經營嘅磨局煤礦積水爆發，浸死華工28人。7月6號，中國第一輛機車由唐山試駛北平成功，中國擁有製造汽車嘅工業能力了，不過要大量生產投入國際市場競爭，係100年後嘅事。7月12號，蔣Sir 秘密致電張學良，要張大少忍讓日本人響東北嘅挑釁。7月13號，上海各界代表召開反日援橋大會，因為上集講過，朝鮮出現大規模排華暴力事件。7月14號，行政院下令禁止中法學術考察團繼續考察，呢件事，亦都可以反映出所謂學術考察團，好多時候裡面好多賊，以考察為名，偷運文物為實。7月15號，全國第一屆高等考試喺南京開幕，參加嘅考生一共有2100人，祇不過係區區2100人，實在少得可憐，全國有4億7000萬人，大概亦都可以估計，當時能夠接受所謂中等教育嘅學生（中學程度），只係佔一個極少嘅百分比，就算喺大城市，都可能係萬中無一，鄉村地區，更加可以直接了當歸「零」！

同日，長春日本駐軍宣佈，廢除過往喺鐵路兩旁進行軍事演習需於10天前通知中方嘅慣例，今後日本軍隊一切軍事演習自由實施，無分晝夜，亦都唔需要話比中國知。情況亦都非常明顯，直情係攤牌前嘅先兆，好快日本就會進行大規模軍事行動。與此同時，馮玉祥手下13太保之一，軍閥石友三（1891-1940）等27人聯名通電廣州國民政府，聲明公開反蔣，有句成語講得冇錯，叫「易如反蔣」，人人抽後腿，個個趁你病攞你命，時也，命也。

#常威💀 #蔣介石平反系列 #黃金十年 #民國歷史