常公子 2023-3-10 14:51:26 另外，今個月，集體創作嘅街頭劇《放下你的鞭子》亦在漢口出版，《放下你的鞭子》係中國抗日戰爭時期一部愛國主義街頭劇，最初是田漢（1898-1968，義勇軍進行曲作詞人）根據德國偉大作家歌德（1749-1832）嘅小說改編嘅獨幕劇，後來在抗日戰爭時期進一步被改編為街頭劇，到處表演，宣揚抗日意識。1939年，畫家徐悲鴻（1895-1953）響新加坡為此戲劇做同名油畫。此畫於2007年在香港以7200萬港幣成交，創下當時中國油畫拍賣最高紀錄。1938年1月，日本亦都組織「華中電氣公司」接收上海電力公司，統制華中電業，簡單啲嚟講，即係搶。

去到1938年嘅1月，隨著日本正式宣戰，蔣介石心知肚明這場毀滅性戰爭將會進行落去，民眾有冇決心以生命、空間換取時間，可能係呢場戰爭嘅重要決勝因素，幸好當時嘅桂系同共產黨全力支持佢，情況係加強咗民眾抗日嘅信心。桂系首領李宗仁將軍響會見記者嘅時候就曾經發表宣示決心嘅講話，全力要求所屬派遣部隊前往第五戰區參戰，大家都知道，桂系李宗仁同蔣介石口和心不和，共產黨亦都係，不過大敵臨門，如果再搞內鬨，大家只會一齊釘蓋，桂系另一大員白崇禧（1893-1966）響一場武漢嘅演講中，就咁樣講過：「死三幾十萬人算什麼數，歐戰時哪一個國家不死三幾千萬……」，老實講白崇禧並冇講錯，只係描述事實，不過大家都要有心理準備，如果要長期抗戰，每個人都要做好犧牲嘅準備。

呢個時候嘅中共，亦都奉行「一切都為了統一戰線」政策，一啲黨內嘅主要人物都身在武漢，例如代表團書記王明（1904-1974）同埋周恩來（1898-1976），佢哋出版《新華日報》，並且喺報上表達對國民黨同蔣介石嘅支持，其他好多左翼作家，例如冰心（謝冰瑩，1900-1999）同埋郭沫若（1892-1978）都掉轉槍頭，從前踩國民黨，現在讚國民黨。除咗桂系同埋中共全力支持蔣介石抗戰外，當其時好多國外嘅著名大愛人士都喺武漢現身，一樣振奮人心，佢哋都相信，南京失守之後，武漢會如同西班牙內戰時期馬德里一樣被堅定防守。

上海同南京相繼失守之後，保衛武漢成為國民政府嘅戰略重心，華北同華南嘅軍隊部署喺接近武漢嘅外圍地方，嚴陣以待。沿著長江三個戰略要地嘅防禦工事亦都加緊趕工，圍繞住武漢三鎮形成一圈又一圈嘅加強防線，負責第五戰區指揮官李宗仁將軍，封鎖咗日軍從華北同山東嚮武漢逼近嘅路徑，當1938年1月阻止日軍經山東往武漢移動嘅決心下達後，李宗仁部隊人數亦從80000人一下子增加到300,000之多，相信大家都明白點解？有時候打仗嘅嘢，目標並非單一只係取得勝利咁簡單嘅，明就明，唔明都冇辦法。

1938年1月於然結束。

#常威💀 #蔣介石平反系列  #佛經抄寫員 #中日戰爭 #民國歷史

常公子 2023-3-12 17:14:57 ［常威近代史］第七百六十九回 保衛武漢（高清錄音版）

#唔鍾意睇字可以聽

https://fb.watch/jdkp1olyKF/

常公子 2023-3-13 20:56:33

【常威近代史】（七百七十回）
老鼠俾老鼠膠黐住

時間線進入1938年嘅2月，2月1號，蔣介石以韓復榘為例，通電警告各級將領，唔可以不戰而退，亦唔可以輕易投降，否則拉去後巷打靶！軍令如山，打仗就係一件咁殘忍嘅事，自己友都冇面畀，當戰爭真正發生，上到戰場就係玩命，冇得縮架！

今日，八路軍總司令部與野戰政治部發出整軍訓令，中日戰爭進入白熱化，唔係講玩，每個人都要有犧牲嘅準備！2月2號，定遠、鳳陽、蚌埠相繼失陷，國際聯盟決議鼓勵會員國個別援華，鼓勵啫，冇任何法律效力及約束力。2月6號，軍委會政治部成立，陳誠（1898-1965）任部長，周恩來（1898-1976）、黃琪翔（1898-1970）任副部長，三個人都係抗日名將，三個人都係出生於1898，一個右兩個左。

今日，上海《社會晚報》被日本禁止發行，經理蔡鈞徒被害。2月7號，《中蘇軍事航空協定》簽字，蘇聯空軍已經全面參與抗日戰爭。2月8號，經濟部與江西省合辦天河煤礦投產，每日產煤700噸；同一日，國際慰勞團抵達18集團軍總部慰勞，勞軍，亦係戰爭中一個重要項目，未有原子彈之前，軍人士氣相當重要，軍人肯同你搏命，實力打高幾班，如果個個臨陣退縮，hea打hea做，個局面會相當難堪。軍紀，的確係當時蔣介石面對一個致命大難題。

2月10號，紡織麵粉界鉅子榮宗敬（1873-1938）今日五點，因肺炎病逝於香港南和醫院，享年66歲，榮宗敬侯江蘇省無錫榮巷人，是近代中國一位著名民族資本家。榮宗敬是榮德生（1875-1952）胞兄，亦係中華人民共和國前國家副主席榮毅仁（1916-2005）嘅伯父，榮毅仁有個仔，叫榮智健（1942-），榮宗敬1873年出生於江蘇無錫，早年從事錢莊生意，其後累積資本後開始紗廠同麵粉廠，對國民經濟貢獻良多，曾經擔任中央銀行理事、中國銀行董事、上海紗布交易所理事等職務，上海淪陷之後，佢就去咗香港避難，估唔到避到日本人，避唔到肺炎。

2月11號，北平偽臨時政府設立中國聯合預備銀行，佔領一個地方，最重要就係印銀紙掠水。北平偽政府由「財務總署」汪時璟（1887-1952）出面，創辦中國聯合預備銀行。去年12月23號，北平偽行政委員會委員王克敏（1879-1945），召集天津中國、交通、金城、中南、大陸、北京鹽業、偽河北省銀行、偽冀東亞銀行，八間銀行負責人開會，宣佈擬定嘅名銀行認購額（即係入股），強行令各行簽紙，並且要在2月1號前用現銀交納股款（即係打劫），天津中國銀行負責人卞（音便）白眉（1884-1968）就喺日記上書寫「卞白眉精神死亡」，以示懺悔。不過又唔好咁緊張，俾人用支槍指住個後尾枕，邊個惡得出樣呢？聯合預備銀行成立後，除咗處理調劑華北金融業之外，仲發行紙幣「銀聯券」，佢仲搜刮國民政府發行嘅「法幣」，套取外匯，用作購買戰略物資，統治華北貿易。

常公子 2023-3-13 20:56:48 2月12號，國際反侵略運動大會通過《援華決議案》，同一日，全國戰時教育學會喺漢口成立。2月14號，日本開始轟炸鄭州，伊斯蘭教徒喺漢口舉行反侵略祈禱大會。2月16號，日本確定夏季對話作戰方針，「確保佔領區，不擴大展區」。事實上中日戰爭爆發咗差唔多接近七個月時間，日本已經佔領咗中國接近三份一土地，整個北方差唔多全落入日本人控制範圍，南方重要城市上海及南京淪陷，中華民國退到武漢三鎮，日本全面占上風，不過中國實在太大，並唔係咁易食得落肚。

情況亦都一如所料，當時日本陸軍軍隊嘅地面行動，就下達咗「避免因作戰地區擴大遭遲滯，進而陷入泥淖」嘅命令，中國嘅戰線實在太大太長太闊，如果日軍想追擊國民政府嘅逃亡部隊，並且加以趕盡殺絕，基本上係冇可能，而且將主力部隊分割成多個部份響唔同嘅地方作戰，將戰線越拉越長，橫切面越拉越闊，正正亦中正蔣介石下懷，去到1938年春去夏來之際，隨著響中國嘅佔領區不斷擴大，日本亦都從國內源源不絕調撥士兵前往中國，人數已經超過40萬，去到1938年嘅秋天，更達到60萬之數，但係60萬人嘅軍隊，亦只能夠僅僅控制中國重要城市以及重要嘅鐵路據點，至於響城市以外、廣闊無邊嘅農村地帶，日本人根本冇能力做任何嘢，仲有，去到農村打遊擊，日本嘅正規部隊根本毫無優勢可言，先進嘅重型裝甲同大殺傷力武器，響農村遊擊戰中亦冇運行，點解叫蛇吞象？情況就係咁解。成圍餸，又翅又乳豬又雞又伊面，要食得曬落先得架。

自1930年代中期開始，日本一直有戰略家提出嚴重警告，日本不能夠分散其軍事力量，當中最有力嘅支持者就係石原莞爾（1889-1949），石原係918事變嘅發動者，但係佢亦係日本軍方高層中極力反對佔領（成個）中國、同發動全面中日戰爭嘅人，佢認為日本缺乏天然資源，而最大嘅敵人係蘇聯同埋西方列強（即美國），而並非中國。佢一直敦促日本政府應該集中力量建設東北同偽滿洲國，保持實力同主要敵人對抗，不過石原嘅觀點並沒有被接受，1937年嘅秋天，佢已經被調職送去守沙頭角，遠離核心，不過石原莞爾最驚嘅嘢終於發生咗，日本統治者源源不絕將軍隊派到中國依個大泥沼之中，最後是既無法全面擊潰敵人（蔣介石政權），亦無法撤退，進入全面膠著狀態，就好似隻老鼠俾老鼠膠（勝利成果）黐住一X樣。

#常威💀 #蔣介石平反系列  #佛經抄寫員 #中日戰爭 #民國歷史

常公子 2023-3-15 18:37:50 ［常威近代史］第七百十回 老鼠比老鼠膠黐住（高清錄音版）

#唔鍾意睇字可以聽

https://fb.watch/jhmntOwGTQ/

常公子 2023-3-17 17:25:13

【常威近代史】（七百七十一回）
中緬公路開始興建

1938年2月17號，蔣介石下令駐防河南嘅第8師炸毀鄭州黃河鐵橋，以阻止日軍南渡黃河，類似嘅焦土政策，之後會繼續發生，為阻止日軍推進，不擇手段，去到最盡，就係1938年6月蔣介石下令炸開花園口黃河大堤，結局黃河大決，浸死幾十萬中國平民百姓。打仗好多時候就係咁慘烈，好多時候唔係只係死係敵人手上，死喺自己人手上亦都係常見嘅事情，所以千萬唔可以打仗！一定要和平，一定要和平，一定要和平！

今個月初，土肥圓師團向豫北發動進攻，向南樂、清豐、濮陽一綫推進，守軍甫經接火就棄槍奔逃，大概係完全冇得打，又或者唔想打，保留實力，冇人知道。你嘅然唔守，日軍就唔客氣，長驅直進，去到2月12號，道清鐵路沿線，完全暴露喺日軍直接攻擊網下。2月14號，日軍向中國守軍道清鐵路沿線陣地發動全面進攻，軍閥宋哲元（1885-1940）下令守軍沿鐵路向西撤退，所謂兵敗如山倒，宋哲元部隊一直逃到濟源以西嘅王屋鎮，宋哲元嘅指揮部隊，差啲仲比日軍裝甲車追上，一鋪清袋。第一戰區長官程潛（1882-1968）對宋哲元不戰而退非常氣憤，即令第40軍嚴密戒備黃河沿岸，唔畀宋哲元嘅殘部渡河，同時炸為鄭州黃河鐵橋，與及花園口同榮澤口碼頭！

睇到呢度大家都相當清楚，之前曾經講過，軍閥宋哲元本來想聯合韓復榘（1890-1938）同劉湘（1890-1938）一齊響蔣介石進入四川前反蔣，可惜劉湘有手下告密爆大鑊，韓復榘被拉去後巷打靶，劉湘同時響武漢醫院歸西（真係病死掛？），剩低嘅宋哲元當然亦唔會有好收場，你估得罪方丈講笑嘅咩？炸咗條橋都唔俾你撤退，大家都明點解？曾經係馮玉祥手下五虎將之一嘅宋哲元係日本華北分離計畫中主要嘅拉攏對象，最後宋哲元不甘被日本人利用，任國民革命軍第1集團軍總司令，加入抗日陣線，經過1938年2月一役，宋哲元勢力瓦解，不過保留軍銜，亦冇被追究反蔣責任，投閒置散，1940年3月染上肝病辭職，改任國民政府軍事委員會委員，並回到其夫人常淑清故鄉四川綿陽療養，1940年4月5日病逝，享年54歳，葬於綿陽市富樂山山麓。其墓碑由馮玉祥（1882-1948）親書「宋上將明軒之墓」。宋哲元墓響1967年被紅衛兵搗毀，1978年重建，現為四川省文物保護單位。

常公子 2023-3-17 17:25:26 兩手準備，2月18號，中緬公路開始興建，中緬公路又名滇緬公路，前稱昆畹公路，起點雲南昆明，終點緬甸臘戍，全長1,453公里。早響1937年8月，當時雲南省主席龍雲（1884-1962）就向蔣介石提出「修改滇緬公路的計劃」，公路始建於1938年春天，於1938年12月初步建成通車，以後陸續加以改道修建。由於當時缺乏受過訓練嘅專業技術人員，響滇緬公路總工程處中對因戰禍遷往昆明嘅一些無業知識青年進行速成培訓，依批青年後來成為咗滇緬公路嘅技術骨幹。臨近1938年春節，公路沿線嘅20萬各族勞工被徵集到工地。依啲勞工大部分係老人家、小孩同婦女。由於當時機械缺乏，呢班老弱婦孺只能依靠雙手，好多艱苦、危險工作幾乎都係由婦女、兒童來完成。滇緬公路係中國抗日戰爭時期，中國西南地區大後方一條歷時最久，運量最大嘅國際通道，去到抗戰中後期，尤其是中華民國首都遷往四川重慶之後，由於海路已經被日本海軍重重封鎖，大部份來自外國支援嘅戰略物資，都係由滇緬公路源源不絕送入四川，依條公路響抗日戰爭中嘅角色非常重要，當中亦有唔少可歌可泣嘅故事發生喺公路之上。

2月20號，軸心國嘅另一個重要成員納粹德國繼意大利之後，承認偽滿洲國。同一日，日本響開封以北強渡黃河。2月21號，蔣介石下令各軍全線反攻。今日，《少年先鋒》半月刊響武漢創刊。2月22號，第五戰區第一遊擊司令少將劉震東（1893-1938）響山東莒縣陣亡，劉震東嘅事蹟，亦係可歌可泣，20歲時後考入東北陸軍講武堂。畢業後，歷任東北軍排長、連長、營長、團長等職。1925年東北軍重新整編後，升任第七師第六旅旅長。劉震東作戰勇猛，頗著戰功。1928年，入陸軍大學受訓，學成後出任東北邊防軍總司令部中將主任參事。 1931年九一八事變爆發後，他激於愛國義憤，毅然拋開高官厚祿，前往熱河招募組織抗日義勇軍，自任第五軍團總指揮，在赤峰、開魯一帶展開游擊戰。劉震東所部5000人遊擊隊，一直響東北糾纏日本人，立下不少汗馬功勞。

2月23號，日本飛機進襲蘭州，被擊落18架。同日中國空軍首次遠征臺灣，配合蔣介石全線反攻命令。2月25號，日軍空襲南昌，同日，國民政府教育部頒佈《青年訓練大綱》，全力培養年青人抗日！2月27號，行政院核准施行《優待抗日軍人家屬辦法》，振奮士氣。2月28號，日本飛機連番轟炸廣州同惠州等地，真真正正狂轟濫炸，多少平民百姓就此葬身火海？同一日，身在武漢嘅王明（1904-1974）等反對成立晉察冀邊區人民政府。

1938年2月，繼續抗戰。

#常威💀 #蔣介石平反系列  #佛經抄寫員 #中日戰爭 #民國歷史

常公子 2023-3-19 19:06:57 ［常威近代史］第七百十一回 中緬公路開始興建（高清錄音版）

#唔鍾意睇字可以聽

https://fb.watch/jmFALMtRaq/

常公子 2023-3-20 21:51:08

【常威近代史】（七百七十二回）
希特拉的選擇

時間線進入1938年3月，3月1號，中共向國民黨提議成立統一嘅全國抗戰領導機關，到目前為止，國共兩黨分開抗日，各有各打，說到底，大家都不相信對方，一致槍口對外，並不代表要做朋友。3月2號，日軍襲擊廣州機場，並轟炸中山大學，狂轟濫炸，濫殺無辜，令人髮指。同日，《申報》出版香港版，中華民國第一夫人宋美齡（1898-2003）亦辭去航空委員會主席一職，由宋子文（1894-1971）繼任。3月3號，日本轟炸海口。3月4號，蔣介石兒子蔣經國（1910-1988）出任江西省政府保安處副處長，開始重新踏足政壇。

3月5號，國民黨宣佈不再取替中國字拉丁化運動；3月6號，中華基督教徒全國聯合會成立；3月7號，漢奸周鳳歧（1879-1938）喺上海遇刺身亡，當然係軍統戴笠做嘢。周鳳歧係軍人出身，曾經參與過1927年嘅412事變，屠殺共產黨人。1927年9月白崇禧解除周鳳岐職務，周鳳岐從此賦閒，其間佢同日本人來往甚密，好多證據顯示佢賣國求榮，抗戰爆發後，1938年2月從家鄉長興縣前赴上海。1938年3月7日下午響上海法租界亞爾培路80號上海寓所門前，被軍統亂槍打死。同日，日本佔領威海衛。

3月8號，國民黨規定，各抗日團體一切集會演講應先期呈核，國民黨最驚乜嘢？最驚你宣傳抗日，其實宣傳共產主義。3月10號，約9000名日軍，響20輛戰車，30餘門大炮，10幾架飛機掩護下，向國軍龐炳勛（1879-1963）軍團駐守嘅臨沂進攻，但板垣師團響臨沂遇到咗頑強嘅抵抗，張自忠（1891-1940）嘅第59軍已經馳援臨沂，第五戰區參謀長徐祖詒（1895-1976）也親自坐鎮臨沂指揮，中日雙方交戰近20幾日，臨沂數度告急，但始終仍然被控制喺國軍手中，雙方死傷慘重，打到3月29號夜晚，板垣師團退守義堂集、艾山一帶，其主力兩個步兵聯隊，一個野炮連隊撤出戰鬥，匆匆開向臺兒莊，由此可見，中日雙方並非冇得打，只不過係好多時候有部隊唔想打。

3月11號，中央廣播電臺遷往重慶播音，今日日軍亦都第14次空襲西安，中國空軍起飛擊退日機。武漢瀕臨大會戰前夕，之前已經講過，國軍已經喺武漢外圍築起層層防線駐軍30萬，迎接日軍大軍壓境。工礦調整署招集廠家代表開會，部署緊急遷拆工作。七七事變發生後，上海告急，各廠紛紛內遷去武漢，但係武漢亦都遭受日軍空襲，亦非安全之地。於是內遷各廠不得不進行第二次內遷，根據計畫，第二次內遷地點主要係重慶，以宜昌為中轉地，南遷一部分工廠去到廣西及雲南。其中遷移到廣西嘅工廠以紙、糖及印刷業最多；遷往雲南工廠以紡織、電器、冶鍊為最多，單單依兩個省，就預備遷入機件器材各約5000公噸。

常公子 2023-3-20 21:51:22 大家可能會問，中日戰爭爆發，日本投資係中國嘅公司同企業，又係乜嘢情況呢？好似日資大冶煤炭產量，因為中日戰爭爆發，銳減到每日出煤20噸，但係日方依然每月從香港匯款支付工人工資，以使礦工不散，其用意係一旦日軍佔領武漢，即可全面利用該礦立刻投產。從呢個例子，大家亦可以睇到香港喺當中擔任嘅金融角色，香港係英國嘅殖民地，中國同日本打仗，英國置身事外，繼續做其生意，你唔好搞到我就得喇。

3月12號，國民政府實行外匯統制，全面進入戰時經濟狀態。同一日，香港學生賑濟會發起「三日節食節用運動」，慰勞抗日將士，大概響1938年春天，香港殖民地政府仍未察覺到日軍會全面佔領香港，以為可以永遠置身事外睇戲。3月14號，新四軍北上抗日，3月15號，中央銀行設立香港辦事處，同日，八路軍喺午城一帶伏擊日軍，殲滅敵人千幾人。同日，軍委會通令喺各軍事學校設置政治部主任及團連指導員，戰爭發生，需要培育大量軍人以應付作戰需要，但培育軍人同時，絕對不能疏忽意識形態教育。

叉開一筆，講下軸心國形成，軸心國體系始於1936年10月25日德國同意大利達成協調外交政策嘅同盟條約，建立所謂「柏林－羅馬」軸心，德國並與日本帝國於1936年11月25日簽署反共產國際協定，1937年意大利於11月6日加入該協定，軸心國體系初步成型。

但係1937年中日戰爭爆發，納粹德國嘅希特拉並唔係一面倒支持日本侵華，去到1938年年頭，希特拉必須解決遠東外交困境，選擇持續與中國自1910年代建立嘅中德關係？抑或與日本結合新聯盟？當時，軍隊甚至強烈支持與中華民國持續友好關係，利用外交政策使歐洲遠離中日戰爭。但去到1938年初，希特拉任命里賓特洛甫（Friedrich von Ribbentrop，1893-1946）為新任外交部長，局面就完全改寫，佢支持同日本建立軍事同盟，繼而希特拉終止中德關係，選擇軍事上較現代化、較強大的日本。在之後德國議會中，希特拉宣佈承認日本所扶持嘅滿洲國並聲明放棄一戰戰敗在太平洋所失去被日本取得嘅殖民地。希特拉同時命令終止德國一切對中國物資與人力上援助，而蔣介石則取消咗中德經濟協定作為報復，德國失去咗自中國而來嘅軍需原料，僅能從開放市場取得有限嘅貨物供應。

#常威💀 #蔣介石平反系列  #佛經抄寫員 #中日戰爭 #民國歷史

常公子 2023-3-20 21:51:34

💜最新上架
常威近代史 第十三部 【鬼子來了】

電子書下載⬇⬇
https://play.google.com/store/books/details?id=cz6qEAAAQBAJ

🙏請捧場

常公子 2023-3-23 19:06:25 ［常威近代史］第七百十二回 希特勒的選擇（高清錄音版）

#唔鍾意睇字可以聽

https://fb.watch/jrX21epqn5/

常公子 2023-3-24 19:01:32


【常威近代史】（七百七十三回）
中華民國維新政府成立

去到1938年，整個世界風起雲湧，進入滾瀉屎狀態，發生響遠東嘅中日戰爭，事實上並未成為國際社會關注嘅焦點（正如今日非洲打仗都冇人會理），俄國十月革命後，由於意識形態及蘇聯國際主義領土擴張主義等原因，西方國家（主要是美國英國及法國）與蘇聯嘅矛盾不斷激化。1930年代末，英法美嘅主要戰略對手係史太林嘅蘇聯，不過與此同時，納粹德國強大崛起，而且亦反對共產主義，故此，西方、納粹德國與蘇聯三方之間嘅博弈與鬥爭就更加尖銳化。大概因為反共意識形態，西方對德國採取綏靖政策，西方政客以為希特拉會滿足於得到蘇台德地區（或加埋奧地利），但佢哋萬萬估唔到，希特拉嘅真正野心係得到整個歐洲及殲滅整個蘇聯。去到1939年，當希特拉同史大林簽訂《德蘇互不侵犯條約》瓜分波蘭之時，西方先至真正知道希特拉想做乜嘢？至於二次世界大戰爆發之後，西方同共產主義蘇聯攜手打敗納粹德國希特拉，正正就要講畀大家知，世界上並無永遠嘅敵人，亦冇永遠嘅朋友。

1938年3月17號，國民政府設立軍官訓練團。今日駐守滕縣嘅122師同日軍血戰兩日，師長王銘章（1893-1938）戰死殉國，次日浚晨，滕縣失守。3月16號早上，5000名日軍迫近滕縣東郊，為徐州大戰掀起序幕，日軍以重炮8門響東關猛轟，並且利用空軍向滕縣投擲炸彈，守軍工事被破壞數處，但仍然與敵奮戰，擊退日軍多次進攻，湯恩伯（1899-1954）軍團第4師奉命速來救援，不料喺滕縣東南關受阻。去到今日淩晨，日軍又增加重炮8門，坦克數十輛，分別由城東城南同時進攻，守軍堵塞城牆缺口時傷亡慘重，同時同日軍展開激烈巷戰，王銘章腰部中彈，仍斃敵三名，因誓死保衛滕縣而犧牲殉國，依一場戰役為台兒莊大捷奠定了基礎，王銘章之後被國民政府追贈為陸軍上將，係中國軍方在抗日戰爭中犧牲嘅高級將領之一。王銘章係四川人，參加過四川保路運動，辛亥革命以及二次革命，馳騁沙場多年，資歷豐富。

常公子 2023-3-24 19:01:50 3月18號，江蘇南通及崇明島淪陷，日軍對武漢嘅包圍網形成，3月22號，日本宣佈外國船隻不得自由航行於中國內河來，隨住戰事升級，把火終於燒到西方列強身上，大概當時英美法等西方大國，都係唔想跟車太貼，總之事不關己就最perfect，不過呢個世界點會咁理想？納粹德國同日本帝國嘅野心，係遠遠超出西方所能想像，事實上整個西方資本主義帝國陣型，先係軸心國要推翻嘅目標。3月24號，朱德（1886-1976）、彭德懷（1898-1974）召集東路軍將領會議，3月25號，關麟徵（1905-1980）部隊喺郭里集全殲日軍臨沂支隊第二大隊，同一日，國民政府公布《戰地守土獎勵條例》，鼓勵士兵奮勇作戰，中國學生救國聯會亦響武漢召開代表大會，3月27號，中華全國文藝界抗敵協會喺武漢成立。

3月28號，響日軍嘅操縱之下，「中華民國維新政府」喺南京成立，舉行開幕典禮後，政府返回上海辦公，非常明顯，依一個係一個徹底嘅傀儡政權，「中華民國維新政府」實行三權分立，即所謂行政、立法、司法獨立，不過實際上只係設立行政院同立法院，由漢奸梁鴻志（1882-1946）出任行政院院長兼交通部長，溫宗堯（18761946）任立法院院長，以陸軍中將原田熊吉（1888-1947）為首嘅20餘名日本顧問則控制咗「中華民國維新政府」嘅所有活動，梁鴻志及溫宗堯兩位漢奸，於戰後以漢奸罪名被處決。同日，國民政府明令褒揚武訓，「偽滿洲國」前總理鄭孝胥（1860-1938）喺長春病故，亦響今日，國民黨軍統特務喺北平暗殺大漢奸王克敏（1876-1945）未遂。日本投降之後，1945年王克敏因漢奸罪響北平被捕，同年在獄中死去，終年73歲。做漢奸果然冇好收場。

今個月，響上海各界愛國人士組織嘅抗日救亡團體「星一聚餐會」上，美國記者斯諾夫婦（3S之一，Edgar Parks Snow，1905－1972）和路易艾黎（1897-1987）提出咗喺中國建立工業合作社嘅概略計劃。抗戰爆發之後，中國工商業慘遭浩劫，斯諾夫婦同上海工部局工業科長路易艾黎為中國嘅現況而感到憂慮，產生發起工業合作化運動嘅想法，佢哋喺會上嘅建議得到成員一致贊同，4月由艾黎、盧廣錦、林福裕同吳去非組成嘅中國工業合作社設計委員會成立，推舉艾黎為召集人。

今個月由美國記者斯諾所寫嘅紀實文學《紅星照耀中國》中譯本喺上海出版，為咗避嫌，中譯本起咗個唔容易惹麻煩嘅名，叫《西行漫記》，中共嘅好朋友美國記者斯諾響1936年下半年進入西北中共控制嘅地區採訪，曾經訪問過毛澤東，並且用第一手資料將中國共產黨嘅情況向世人作出最詳細嘅報導。中譯本出版，胡愈之（1896-1986）出咗好大嘅力，胡愈之係浙江上虞人，中華民國及中華人民共和國出版家、社會活動家、政治人物。第五屆全國政協副主席、第六屆全國人大常委會副委員長、中國民主同盟中央委員會代主席、早響1933年已經加入中共，成為中國共產黨黨員。

1938年嘅3月於焉結束。

#常威💀 #蔣介石平反系列  #佛經抄寫員 #中日戰爭 #民國歷史

常公子 2023-3-27 14:16:35 ［常威近代史］第七百十三回 中華民國維新政府成立（高清錄音版）

#唔鍾意睇字可以聽

https://fb.watch/jwXzuV69bM/

常公子 2023-3-28 18:50:44

【常威近代史】（七百七十四回）
臺兒莊大捷

中日戰爭開打以來，日本不斷撳住中國砌，短短半年時間，佔領咗中華民國定義下嘅半壁江山，之前林彪嘅平型關大捷，俾人話有嚴重水分，今次臺兒莊大捷，就真係實牙實齒，首次砌低日本人！1938年4月1號，《自由中國》雜誌喺武漢出版，相信依本《自由中國》同1949年至1960年響臺灣出版嘅《自由中國》雜誌，唔係同一本雜誌。

4月2號，由北京大學，清華大學，南開大學三間大學聯合組成嘅西南聯合大學喺昆明成立，1937年7月，日軍侵佔北平，國立清華大學，國立北京大學，南開大學先後南遷。9月，三間大學奉命喺長沙組成長沙臨時大學，10月開學，由三間大學校長組成常務委員會主持校務，之後再從長沙遷往昆明，西南聯大有教授190多名，由1938年到1946年8年抗戰期間，一共有3522人畢業，著名物理學家吳建雄（1912-1997），諾貝爾獎得獎人楊振寧（1922-）等均出自該校，1946年，日本投降之後，西南聯大正式解散，三間大學分別回到原址重辦。當時，遭逢國難，國民流離失所，西南聯合大學嘅教學條件亦都相當惡劣，教授冇糧出冇飯食不在話下，學生無論上學同居住嘅地方都相當差，不過，人才似乎同教育條件未必一定成比例，今時今日香港教育條件都算係世界數一數二掛，又未見誕生乜嘢偉大嘅學者喎？反而誤人子弟嘅學棍就有大把，而且棍棍藕死你嗰隻！

4月3號，堅守臺兒莊嘅孫連仲（1893-1990）第2集團軍，外線增援部隊湯恩伯（1899-1954）嘅第20集團軍、孫桐萱（1895-1978）第3集團軍，奉第5戰區司令長官李宗仁（1891-1969）命令，分別由南嚮北、由東嚮西、由北嚮南，對陷入包圍嘅日軍第10師團瀨谷旅團同第5師團阪本旅團發動總攻擊！真真正正轉守為攻，第一次大規模主動向日軍進攻！

淞滬會戰之後，日軍必須立刻採取行動掃蕩津浦鐵路，包圍徐州，並想切斷第5戰區國民政府部隊撤退路線，日軍大將畑俊六（1879-1962）所屬嘅第13師團從南方推進到淮河沿岸，而准河正正就係東西嚮貫穿整個華北平原，北面，有大戰犯板垣征四郎（1885-1948）率領嘅第5師團駐於山東省南部嘅臨沂，國民政府亦投入大量兵力增援第5戰區，死守淮河防線。日軍第5師團於上個月18號推進至峰縣，23號開始向臺兒莊發動總進攻，臺兒莊防守主力池峰城師同日軍展開激烈巷戰、甚至係埋身肉搏戰，日軍瀨谷旅團死傷慘重，數次突入莊內，都被守軍打返出嚟！湯恩伯軍團同孫桐萱軍團及時包抄而到，從臨沂前來支援嘅阪本旅團亦同時被包圍，當中湯恩伯手中嘅軍團，係當時國軍四個戰力最強德國機械師。從4月3號開始，主動權開始掌握在國軍手中，日軍各部隊之間嘅聯繫開始被切斷，4月6號瀨谷旅團終於不支，向峰縣潰逃，4月7號，阪本旅團亦都向北潰逃，日軍喺臺兒莊一役，約有一萬到兩萬人死傷，並且留低大量輜重武器，依一役，亦係中日戰爭開始以來，國軍最重大一次勝利！

常公子 2023-3-28 18:50:57 日軍被擊退嘅消息傳到武漢之後，武漢全城沸騰！美國《華盛頓郵報》曾經咁樣報導「今晚有150萬中國人在這個臨時首都慶祝這個首次關鍵性的勝利」，全城欣喜若狂！亦為抗日戰爭打下一支強心針，國民終於睇到，中國人未必唔夠日本人打嘅！

依一場勝利對國民黨而言亦都來得正係時候，國民黨喺本年3月20號緊急召開一次臨時全國代表大會，就係要說服群眾相信國民黨對未來嘅計畫以及擴大作戰基礎，該次會議上通過《抗戰建國綱領》，將抗戰同拯救民族聯繫結合，宣稱「確定三民主義暨總理遺教爲一般抗戰行動及建國之最高準繩」，並且將中國嘅抗日戰爭視為全球行動嘅其中一部分，所謂「為世界之和平與正義共同奮鬥」！會議同時設立《國民參政會》以團結全國力量抗日，推舉蔣介石為總裁，令蔣介石成為抗日戰爭嘅最高指揮以及典範象徵，中國媒體以至中共，都對於綱領表達積極支持。不過講就梗係天下無敵，做出嚟好多人都會認為有心無力，但臺兒莊出現嘅大捷，就正正話比大家知道，蔣介石要打倒日本人嘅想法並非海市蜃樓。

4月6號，國民黨五屆四中全會響漢口舉行，4月7號，中華民族解放先鋒總隊喺武漢成立！同一日，上海滬江大學校長劉湛恩（1886-1938）因拒絕擔任維新政府教育部長而被殺！留響佔領區，唔做漢奸，好易連命仔都冇埋，做漢奸雖然可恥，不過有陣時可能只不過係冇得揀。4月9號，行政院頒佈《難民服役綱要》，難民要入伍幫拖，同一日，國民黨恢復李濟深（1885-1959）、陳銘樞（1889-1965）等七個人黨籍，冇辦法啊等人用！4月10號，延安魯迅藝術學院成立；4月12號，國民政府公佈《國民參政會組織條例》，上文已經提過，組織《國民參政會》，係要團結全國力量抗日，《國民參政會》響7月召開第一次會議，一共選出兩百幾名參政員，其中88人為各省地方代表，另外仲有非國民黨籍嘅著名知識份子、政治人物、藝術家及資本家等等，以及共產黨嘅毛澤東、王明（1904-1974）同周恩來的妻子鄧穎超（1904-1992）。

#常威💀 #蔣介石平反系列  #佛經抄寫員 #中日戰爭 #民國歷史

常公子 2023-3-29 18:40:14 ［常威近代史］第七百十四回 台兒莊大捷（高清錄音版）

#唔鍾意睇字可以聽

https://fb.watch/jzPMS4CwZM/

常公子 2023-3-31 16:48:35


【常威近代史】（七百七十六回）
此地不留人 自有留人處

1938年4月15號，中國戰時兒童救濟會喺武漢成立，中日戰爭發生後，有幾多兒童流離失所或死亡？其實無從估計，又救得幾多？不過老實講，應該響1931年918事變發生嘅中日全面戰爭，其實已經拖咗幾年，918事變後，蔣介石對日本人不斷忍讓，要求張學良東北軍不還手退出東北，不斷響華北割地求和，就係唔想打仗，就係唔想同日本人正面衝突，但係日本人見你咁「忍讓」，就不斷咄咄相逼，讀過蘇洵嘅《六國論》都會明白，「六國破滅，非兵不利 ，戰不善，弊在賂秦。賂秦而力虧，破滅之道也」、「今日割五城，明日割十城，然後得一夕安寢。起視四境，而秦兵又至矣。然則諸侯之地有限，暴秦之慾無厭」，情況亦大同小異，輿論話之前蔣介石唔抗日，其實蔣介石有苦自己知，真係鬼叫你窮，鬼叫你弱。世界冇公平，亦都冇所謂公義，你認為有公平同公義，只不過被人洗腦，或太蠢。

4月16號，由茅盾（1896-1981）主編嘅《文學陣地》響廣州創刋，當然係左派刊物，亦係共產主義嘅宣傳機器，當時嘅文學藝術人才，大部分都係傾左，呢個係當時潮流，亦都係社會現實嘅投影，脫離唔到因果關係。一種思潮要受到社會廣泛接納，必有其存在嘅原因同現實條件互相配合。正如今日全世界好多年青人話要躺平，無所作為，點解呢？就係因為好多年青人都覺得無論點樣努力都唔能夠解決眼前不死不活嘅境況，或者脫離原有嘅階級，與其參與內卷令自身情況繼續惡化，不如乾脆躺平罷就。如果個社會真係到處充滿機會，人人努力就可以向上爬或者起碼解決自身嘅貧困，條條大路可以發達，真係鬼得閒同你躺平？當然有陣時點樣看待社會嘅情況，本身又係一個好主觀同好文學嘅問題，正如一個人失戀，睇個世界一定係充滿黑暗；如果心情好，聞到嚿屎都係香嘅。意識形態真係好重要。

4月17號，陝甘寧邊區政府主席張國燾（1897-1979）喺代表陝甘寧邊區政府參加祭黃帝陵後，於今個月5號逃至西安。4月7號，響胡宗南（1896-1962）嘅保護下抵達武漢，用今日嘅講法，都係尋求政治庇護。今日，張國燾發表書面聲明，脫離中國共產黨，次日，中共中央已決定開除張國燾嘅黨籍。張國燾1921年出席中國共產黨第一次代表大會，就被選為中央局成員，之後一直係中共同埋紅軍嘅重要領導人，之前嘅長征，張國燾反對北上，甚至一度另立中央。所謂一次不忠，百次不容，冰封三尺，亦非一日之寒，不過對於張國燾脫離組織，大概當時響延安嘅毛澤東與及一眾中共領導人亦早有心理準備，所以對中共造成嘅震撼並唔係太大。張國燾脫離共產黨後，蔣介石視其為「對延安的致命打擊」，交給軍統領導人戴笠「妥善運用」，但此後張國燾對中共進行的策反工作，收效卻甚微。

常公子 2023-3-31 16:48:47 1948年底因政治環境變化，舉家遷到臺北；1949年冬又移居香港。1949年至1952年張國燾任《中國之聲》雜誌社長；1966年開始為美國堪薩斯大學撰寫《我的回憶》連載文章，並於香港明報月刊刊登中文版。1968年舉家移居往加拿大，1976年中風，右半身癱瘓；1979年12月3日在加拿大多倫多一所養老院病逝（疑是凍死），後葬於多倫多東部士嘉堡交加區的松山墓園（Pine Hills Cemetery），終年82歲。其實張國燾響1938年離開中共後，佢嘅政治生命亦都正式完結了。

4月18號，徐州會戰正式開始，同日日軍劫運上海四行倉庫嘅存貨，相信有黃金吧？4月19號，臨沂淪陷，4月20號，經濟部宣佈喺成都、昆明、桂林等地方興建嘅七個發電廠建成。4月21號，毛澤東下令中共軍隊響冀魯平原開展遊擊戰爭，今日左舜生（1893-1969）代表中國青年黨致函蔣介石、汪精衛表示擁護國民黨。4月22號，八路軍129師收復18座縣城，將日軍逐出晉東南。今日，中法關於南鎮鐵路借款合同正式簽訂；北平係臨時政府喺清河設立陸軍軍官學校。4月23號，財政部特准進口大米75萬擔，以救濟廣東嘅糧荒；4月26號，國民政府命令各機關及學校於抗戰期間每日工作時間為10小時；4月28號，國立武漢大學遷往四川東山，今日復課；4月29號，武漢空戰告捷，21架日軍戰機被擊落；4月29號，蔣介石下令取消黨內派別小組織，團結最重要。4月30號，日本轟炸遷至福建長汀嘅廈門大學。

今個月，中國國貨聯營公司成立；另外香港出海嘅漁船被日本軍艦炮擊，損毀達到400艘，死傷約2000人。今個月，年僅22歲嘅蒙古女王爺奇俊峰（1915-1947）被國民政府軍政部任命為烏拉特前旗保安司令，獲授少將軍銜。奇俊峰出生於一個蒙古貴族家庭，內蒙古阿拉善旗人，原名色福勒瑪。19歲下嫁烏拉特西公旗王爺，成為福晉（夫人），王爺病故後，佢代理旗政，被尊稱為女皇爺。七七事變後，佢積極率領部隊抗日，去年7月參戰西山咀戰役，令全國矚目。蔣介石因此將佢邀往重慶，蔣介石夫婦同多位官員均熱情接見，女王爺一時名滿天下，之後晉升為中將，後所部擴編為三個團，響傅作義（1895-1974）之前線各部隊中擔負響導同偵察任務，1947年7月20日遭暗殺身亡。

1938年4月於焉結束。


#常威💀 #蔣介石平反系列  #佛經抄寫員 #中日戰爭 #民國歷史

常公子 2023-4-2 21:48:30 ［常威近代史］第七百十六回 此地不留人自有留人處（高清錄音版）

https://fb.watch/jFgiEG2zl1/

常公子 2023-4-4 18:06:19


【常威近代史】（七百七十七回）
高度運動性遊擊戰略

1938年5月，台兒莊大捷之後，國民政府部隊開始發起反攻，蔣介石果然轉守為攻，徐州會戰爆發，根據《華盛頓日報》報導「蔣委員長約有50萬人的軍隊，從隴海鐵路的兩端發起攻擊」，隴海鐵路是一條位於華北東西向鐵路，橫切中原地區，係重要戰略位置，1945年之後嘅國共內戰，隴海鐵路之役，亦有決定性作用。但係日本參謀本部卻不容許國軍台兒莊大捷造成嘅優勢持續落去，決定揚棄1938年初避免深入中國、擴大戰場嘅計劃，投入大量兵力去到徐州，更加派遣新嘅參謀官去到徐州指揮作戰，以確保各部隊之間嘅協調工作能夠順利進行，日本投入徐州會戰嘅兵力，已達到40萬人，國軍50萬人，日軍40萬人，名副其實一場百萬人大會戰，中日戰爭發展到呢度，亦都進入全面白熱化階段。

徐州會戰，牽涉到武漢三鎮嘅存亡，國民政府臨時首都武漢能否守得住？要睇依一役。日本軍方進一步向中國投入大量兵力，亦正正就係捉蟲入屎窟，我之前已經講過，要保住勝果，或者要擴大勝果，日本人都要付上巨大代價。有一點幾乎可以肯定，響中日全面戰爭爆發初期，日本參謀本部基本上認為依一場係一場短期戰爭，亦冇諗過要付出如此龐大嘅時間同埋人力物力去打。不過既然佢哋選擇戰爭開始，佢哋亦都冇得縮。

毛澤東曾經咁樣講過：「必須記住，這次戰爭是在中國境內打的。這就是說日本人受到敵視他們的中國人民的完全包圍。日本人的全部給養不得不靠從外面運進來，並且還要加保護，在各交通線都要重兵駐守，同時在東三省和日本的基地也須重兵駐守。」猛虎不及地頭蟲，就係咁解。

1938年5月1號，國民黨中央黨部中央訓練委員會成立，同時籌設中央訓練團。今日，戰時臨時兒童保育院喺武漢成立，《抗戰日報》亦響聊城創刊。今日，天府礦業股份有限公司響重慶成立，該公司由英商公司與中原煤礦股份公司組成嘅中福兩公司聯合辦事處出資50%，與重慶天府煤礦、北川鐵路共同組成。中福聯合處董事長翁文灝（1889-1971）同時任國民政府經濟部長、國民黨軍事委員會工礦調整委員會主任，中福聯合處作為大型合資企業，又有外國資金又有國家資金，地位當然零舍不同。天府礦業公司發展迅速，由1939年生產煤炭7萬噸，去到1945年已經達到45萬多噸，重慶及川北煤炭市場一直由該公司壟斷。之後，中福聯合慮又同資源委員會以及重慶銀行合辦咗嘉陽煤礦。

武漢能否保得住仲未知，但無論需唔需要撤退去重慶，蔣介石一早已經擺定曬棋。真正嘅政治家，係會諗多幾步退路，手裡面總有幾手準備，心裡邊亦有幾副牌。當然無論如何，四川嘅重慶已經係國民政府嘅最後橋頭堡。

常公子 2023-4-4 18:06:31 5月3號，日本英國簽訂協議，將中國戰區海關所有稅收全部存入日本橫濱正金銀行，相信大家都明白發生緊乜嘢事。5月4號，毛澤東電令新四軍建立茅山根據地，進一步投入抗戰。今日《抗戰文藝》3日刊武漢創刋；5月5號，蔣介石致電史大林，洽商軍火貨物交換辦法，今日德國紅十字會代表團到達漢口，向中國贈送藥品400餘箱，大概叫做杯水車薪。響紅都延安，中共中央馬列學院正式成立，由前中央領導人張聞天（1900-1976）担任院長。5月6號，上海淪陷之後，日本人派人接管海關，5月2號，之前已經提過，長期控制中國海關主權嘅英國同日本訂立協定，同意南京傀儡政權「維新政府」接收各地海關。隨後，中國海關職工掀起護關運動，抵制日本人接管，提出反對英日協定，不與敵偽合作，提出「保護海關主權」、「反對懸掛偽旗」、 「反對修改稅則」等口號，響佔領區反對日本人，認真夠pop！

5月7號，上海海關華人員工總罷工，反對日本人接管海關，侵佔關權。5月8號，重慶臨江門碼頭大火，焚燬房屋7000餘間，死傷百人以上。4月11號，福建廈門失守。4月12號，納粹德國政權與偽滿洲國決定建立外交關係，之前已經提過，係納粹德國外交部長里賓特洛普（1993-1946）一手推動，佢最後響紐倫堡大審判被判處繯首死刑。4月13號，合肥失守。4月14號，八路軍原大清山脈建立遊擊根據地。

響毛澤東嘅戰爭思維之下，佢對抗日戰略嘅睇法係：「戰略應該是一種在一條很長的、流動的、不定的戰線上進行運動戰的戰略，戰略的成功完全要靠在地形險阻的地方保度高度機動性，其特點是進攻和退卻都要迅速，集中和分散都要迅速，這將是一種大規模的運動先，而不是深壕、重兵和堅壘的單純陣地戰，我們的戰略和戰術必須依作戰的地形來決定，而且就決定了運動戰。」

上述一段說話，總結為三個字——「打遊擊」。要贏，就係要贏地形贏速度，要贏高度嘅運動性，地頭蟲可以打死外來嘅猛虎。當時喺延安紅軍大學嘅校長、年僅30歲嘅戰術大師林彪（1907-1971）亦都係遊擊戰嘅專家，佢以「短促突擊戰」始創者著稱。既然冇坦克無飛機冇錢冇軍備，祇有命一條同家一個，咁樣打遊擊亦都係理所當然，不過無論黑貓定白貓，捉到老鼠就係好貓，日本人龐大軍事力量面對赤腳短促遊擊戰士，好多時候係一籌莫展。

#常威💀 #蔣介石平反系列  #佛經抄寫員 #中日戰爭 #民國歷史

常公子 2023-4-6 17:37:25 ［常威近代史］第七百十七回 高度運動性游擊戰略（高清錄音版）

#唔鍾意睇字可以聽

https://fb.watch/jKj5gN7rNI/

常公子 2023-4-7 16:23:50


【常威近代史】（七百七十八回）
百萬人會戰冇打過

原子彈及核武未發明之前，打仗並冇玉石俱焚呢個概念，強者勝，弱者敗，叫天經地義，二次世界大戰結束後，整個世界再冇發生大規模世界性戰爭，其實唯一嘅理由，就係因為有原子彈同核武依一類超巨大殺傷力武器存在，多謝奧本海默（J. Robert Oppenheimer，1904-1967），多謝愛因斯坦。

台兒莊大捷之後，蔣介石本來打算響隴海鐵路兩側向日軍發動全面反攻，不過情況並唔係咁簡單，好有可能嘅係，日本人只係以退為進，模彷漢尼拔（Hannibal，公元前247-公元前183）響西元前兩百多年嘅坎尼會戰（Battle of Cannae）打敗羅馬人嘅方式對付國軍，先稍做戰術佯裝退後，請君入甕，進而再包圍殲滅。但係日本人呢個構想並唔成功，如果呢個構想係存在嘅話，咁呃到蔣介石，就呃唔到身在前線嘅總指揮官李宗仁將軍，雖然蔣介石一再施壓要求李宗仁主動進攻，但係李宗仁將軍仍然喺5月15號日軍完成包圍網前選擇撤退。

5月15號，鑒於日軍南北幾路兵馬已經對徐州形成包圍之勢，響武漢召開嘅最高軍事會議，決定放棄徐州，唔同日本人正面交鋒。5月16號，第五戰區司令長官李宗仁（1891-1969）命令集結喺徐州一帶嘅國軍，大約60萬人部隊，向兵力不足嘅豫、鄂、皖地區突圍撤退，並且命令張自忠（1891-1940）軍團演繹主力撤退。自上個月8號以來，日軍先後向徐州戰場調入第16、第114師團同埋第5獨立混成旅團。4月16號，日本採取攻勢，反守為攻，4月19號，臨沂失陷，由4月18號至5月上旬，台兒莊一帶戰事呈膠著狀態，國軍嘅主力被滯留，呢個時候，日軍第6、第101、第9、第13、第16、第14、第114師團從各個方向向徐州戰場合擊，國軍忙於處處抵擋，開始陷於被動。

就咁樣睇，台兒莊國軍大捷一役，好有可能只係日本人故意安排嘅戰術陷阱，正如上述所講，係「請君入甕」嘅一記陰招，要蔣介石心紅反守為攻，繼而一鋪清袋。當然真相我哋冇辦法能夠知道，正如我哋冇可能知道蔣介石嘅智力有幾高一樣，不過李宗仁將軍就喺5月15號，響陣前選擇唔打，保存實力。5月19號上午，本來預計嘅一場百萬人大會戰其實並冇發生過，徐州就咁失守。由於國軍喺部署井然有序撤退中搶回主動權，令到日軍喺徐州會戰中殲滅國軍部隊主力嘅計畫，基本上落空。