常公子 2022-12-26 16:24:47 8月1號，北平及天津相繼失守後，宋美齡（1898-2003）等發起組織中國婦女慰勞自衛抗戰將士總會；山西青年抗日決死隊成立；天津「治安維持會」成立，69歲嘅高浚霨出任傀儡。8月3號，宋哲元為平津失守通電引咎自責，8月4號，中英簽訂鐵路借款協議，英國人繼續做生意，但係之前講過叫佢調停中日戰爭，佢就一啲動作都冇，好X嘢！8月6號，蔣介石派第一、第二軍集團軍反攻北平天津。蔣介石嘅回應，係調派中央軍加入戰局強化抵抗，湯恩伯（1899-1954）將軍率領嘅第31集團軍部隊，支援位於北平西南、平綏鐵路上嘅小鎮南口，呢個地點對日軍前進内蒙古嚟講係非常重要，日本方面，則從南方突入，響日方嘅強大實力壓迫下，湯恩伯嘅部隊很快處於被動，8月15號南口失守，中國軍隊傷亡慘重。

呢個時候，蔣介石面臨嘅選擇係承認日本擁有華北嘅控制權，抑或將整個國家捲入全面性戰爭。如果呢個時候蔣介石雙手奉上華北比日本，戰爭大概可以暫停，不過如果蔣介石咁樣做，佢自己嘅政治生命亦都會好快玩完！華北嘅抵抗全面瓦解同時，蔣介石仲要面對喺上海嘅5個日本師團以及海軍艦隊，8月頭，日本第二及第三艦隊已經有32艘戰艦停泊喺上海港口，不過蔣介石似乎有咗選擇，佢表示「從現在開始，已經不存在所謂地方解決……中國只有在戰場上贏得最後勝利，才能得到所希望的正義和和平。」

8月7號，蔣介石於南京中山路嘅官方社團「勵志社」會議室中，同41個南京政府中嘅高層文武官員開會，當中包括汪精衛（1883-1944）、晉系領導閻石山（1883-1960）、桂系二號人物白崇禧（1893-1966），西北軍領導馮玉祥（1882-1948）等等，蔣介石表示：「現在這回中日戰爭，實在是我們國家生死存亡的關頭，如果這回戰爭能夠勝利，國家民族就可以復興起來，可以轉危為安，否則必陷於國家於萬劫不復之中。」，會上眾人都（同意）蔣介石嘅睇法，表示「軍事、外交上各方之態度均聽從中央之指揮與處置」，戰局亦自此不再侷限終華北，蔣介石同中華民國正式押上呢場大賭局。8月9號，紅軍大將朱德（1886-1976）抵達南京，同蔣介石商討軍事行動。8月12號，國民黨國防最高會議推舉蔣介石為海、陸、空三軍總司令，全面指揮抗日戰爭。

#常威 #蔣介石平反系列  #佛經抄寫員 #中日戰爭 #民國歷史

常公子 2022-12-26 16:24:57

❤【常威近代史】第一部《大清亡國關慈禧蛋牛治》，全面開放，免費下載， #freedownload！

Free下載連結🔽

https://play.google.com/store/books/details?id=C3hjDwAAQBAJ

常公子 2022-12-29 14:54:52 ［常威近代史］第七百五十回 押注（高清錄音版）

#唔鍾意睇字可以聽


https://fb.watch/hIYPz7P-Yv/

常公子 2022-12-31 14:10:57


【常威近代史】（七百五十一回）
第二次淞滬戰爭

1937年8月13號，中日全面戰爭正式蔓延到南方，短短一個月時間，北平及天津北方兩個最重要嘅工商業城市相繼淪陷，情況可謂一發不可收拾，中日雙方亦都決定全面投入戰爭，再冇辦法回頭，戰線亦即時蔓延到上海，所謂第二次淞滬戰爭爆發，事實上響918事變後，就爆發咗第一次淞滬戰爭，當時喺上海市外圍戰況非常激烈，只不過時後雙方都剋制落嚟，避免戰事擴大。所以我上集講「七七蘆溝橋事變」確係啱啱碰著剛剛，其實中日全面開戰，響1931年已經可以發生。

8月13號，駐上海日軍同中國軍隊喺八字橋一帶發生槍戰，日軍由租界向閘北進攻，佔領八字橋，由今個月上旬開始，駐滬日軍就不斷發起挑釁行動，9月下晝，兩名日軍強行闖入虹橋機場偵查，被駐軍擊斃。日本參謀部藉此下令機動部隊迅速前往上海增援，並於今日發動大規模戰事。8月14號，南京政府發表自衛抗戰聲明書：宣佈「不得不實行自衛，抵抗暴力」，正式同日本宣戰。蔣介石同日下令將京滬警備部隊改編為第九集團軍，由張治中（1890-1969）任總司令，進攻虹口及楊樹浦之敵人；蘇浙邊區部隊改編為第八集團軍，由張發奎（1896-1980）擔任總司令，守備杭州灣北岸 ，並掃蕩浦東資的人，炮擊西江山碼頭。

8月14號亦係一個重要日子，因為今日中國空軍首戰告捷，今日清晨，中國空軍第二大隊有驅逐機掩護，轟炸咗上海嘅日本第三艦隊以及喺楊樹浦碼頭登陸嘅日軍。當日下午，日軍出動13架重型轟炸機前往杭州筧橋機場報復，中國空軍第四大隊大隊長高志航（1907-1937）率領戰機迎戰，經過30分鐘激戰，擊落日本戰機六架，中國方面無一傷亡，依一次亦都係中國空軍自組成以來第一次參展戰，可謂先拔頭籌。今日中國空軍出動轟炸機及各種飛機100多架，同埋十多個航次，轟炸咗上海匯山碼頭、天通庵兵營、日本公大紗廠等，並且炸傷日本旗艦「出雲號」，破壞了大量營房同埋倉庫，取得空戰重大勝利，8月15號，日軍派出60架飛機再襲杭州，被中方擊落17架。1939年，國民政府就將8月14號定為每年嘅空軍節。

常公子 2022-12-31 14:11:08 8月16號，國民政府發行救國公債5億元，等旗打仗，打仗係燒錢活動，而且係世界上最恐怖嘅燒錢活動，少個崩都冇得繼續。同一日，中日進入正式交戰狀態，撤橋行動亦都開始，山東青島有5000名日本橋民登輪回國，8月17號，上海戲劇界救亡協會正式成立，8月18號，國民政府公佈《戰時糧食本制條例》；同日，中央、中國、交通、中國農民四大銀行聯合辦事處成立，一切發生得好快，經濟亦進入戰時狀態。8月19號，日本人任命江朝宗（1861-1943）為北平傀儡市長；8月20號，國民政府軍事委員會頒佈中國軍隊戰鬥序列及作戰指導計畫，將全國劃分為六個戰區，京滬杭（南京、上海、杭州）為第三戰區，由馮玉祥（1882-1948）擔任司令長官，計畫以主力集中華東，迅速掃蕩淞滬敵人海軍根據地，阻止敵人援軍登陸。同日，日本第一次派出戰機襲擊工業重鎮武漢。

8月21號，前中共最高領導人陳獨秀獲減刑出獄，重獲自由。1933年陳獨秀被「以文字為叛國之宣傳」判處有期徒刑13年，囚禁於南京老虎橋第一監獄，足足過咗四年牢獄生涯。8月21號，《中蘇互不侵犯條約》響南京簽字，與陳獨秀提前獲釋亦都係「國共第二次合作」帶嚟嘅結果。8月22號，中共喺洛川召開政治局擴大會議，商討抗戰大局。8月23號，粵漢鐵路黃埔支線趕築完工，並與港九鐵路接軌通車。8月24號，《救亡日報》響上海創刊，國民政府公佈《戰事軍律》。

8月25號，中共中央革命軍事委員會成立；同一日中共中央通過《抗日救國十項綱領》；同時，中共中央軍委會將紅軍正式改編為國民革命軍第八路軍，任命朱德（1886-1976）、彭德懷（1898-1974）為正副總指揮，葉劍英（1897-1986）、左權（1905-1942）為政府參謀長，任弼時（1904-1950）、鄧小平（1904-1997）為總政治部正副主任。今個月4號，中共中央應國民黨邀請，派出周恩來、朱德、葉劍英前赴南京參加國防會議，並且同國民黨繼續談判第二次國共合作，其時北平天津被日軍佔領，上海形勢亦都非常緊張，於是蔣介石就急急想調動紅軍開赴前線作戰，掘地雷嘅嘢，打頭陣嘅嘢，梗係唔會用自己人行先，因為依個原因，紅軍改編得以順利進行，8月22號，國民政府發佈改編令，確定八路軍下轄115、120及129三個師，全軍編制一共45000人，指揮權歸於中共。於是八年抗戰史上，大名鼎鼎嘅「八路軍」誕生！同一日，《呐喊》雜誌喺上海創刊，由茅盾任主編。

8月27號，上海部分工廠開始正式內遷，順昌機器廠、新民機器廠、上海機器廠，合共五金廠機器共裝木船22艘，冒險由蘇州河第一批啟運，上個月28號，國民政府資源委員會機器和化學工業組召開緊急會議，決定立刻將上海有關軍火製造同裝配嘅機器五金製造業遷入內地，響機器五金同業公會推動下，輕工業亦都表示願意遷往內地。今個月10號，行政院通過拆遷計畫，並且組成遷移監督委員會，由資源委員會撥款56萬元作為各廠遷移費用，另撥出329萬元以低息抵押貸款形式作為各廠重建費用。8月12號，監督委員會確定咗遷移步驟，但第二日淞滬戰爭爆發，遷移工作只有喺戰火中完成。8月28號，第二批船隊裝載6間工廠嘅機器，陸續從蘇州河運出，至11月12號，上海共遷出民營工廠146家，機件1.46萬噸，技工2500人。

#常威💀 #蔣介石平反系列  #佛經抄寫員 #中日戰爭 #民國歷史

常公子 2022-12-31 21:48:47 【常公子歷史頻道 513回：黃金十年系列之 平民蔣介石見日本內閣總理大臣】

https://youtu.be/_NPFlIX04Eg

#常威 #常威近代史頻道 #黃金十年系列  #民國歷史 #佛經抄寫員

常公子 2023-1-1 21:07:51 ［常威近代史］第七百五十一回 第二次淞滬戰爭（高清錄音版）

#唔鍾意睇字可以聽

https://fb.watch/hNfO9WPzzj/

常公子 2023-1-3 14:08:00


【常威近代史】（七百五十三回）
黑色周末

1937年8月30號，國民政府明令徵兵，召集民眾共同抗日，今個月毛澤東亦都寫成《矛盾論》，繼上一個月發表《實踐論》後，毛澤東喺1937年同時完成他另一篇重要嘅理論文章，《矛盾論》亦係毛澤東最重要嘅哲學作品之一，與《實踐論》合稱「兩論」，今日嚟睇，可能覺得冇乜嘢高度，但係當日嚟講，絕對係高水平嘅馬克思主義哲學著作，《矛盾論》進一步演繹馬克思主義唯物辯証法原則，指出任何事物都具有正和反兩方面矛盾嘅本質，《矛盾論》中有曰：「事物矛盾的法則，即對立統一的法則，是自然和社會的根本法則，因而也是思維的根本法則。」，矛盾嘅普遍性即矛盾存在於一切事物自始至終發展過程中，特殊性即矛盾嘅特性。為了解決問題，在各種矛盾中，應當抓住「主要矛盾」，在矛盾嘅兩個方面中，應當抓住主要方面。矛盾嘅同一性是有條件的、相對的，鬥爭性係無條件的、絕對的。矛盾又可分為對抗形式的和非對抗的。據說《矛盾論》係針對當時黨內形式主義及教條主義。任何事物發展皆有矛盾產生，因而亦為矛盾下必然而生的「鬥爭」奠下基石，毛主席就講過——「階級鬥爭，一抓便靈」。

套入當時嘅歷史去睇，原先嘅「主要矛盾」係資本主義同共產主義兩條路線嘅矛盾，即係國民黨同共產黨之間嘅鬥爭，但係日本武力侵華後，主要嘅矛盾就變成中華民族存亡興衰之爭，因此國共兩黨可以展開合作，共同對付敵人。去到1945年，日本投降之後，主要矛盾又變成咗國共兩黨之爭，情況大致上係咁樣。至於點樣先可以抓住「主要矛盾」為何？依一個大概係一個哲學問題，唔容易去解答。哲學嘅嘢，真係唔係咁簡單架。

8月份，實業家吳蘊初（1891-1953）以國民政府資源委員會代表身份喺德國柏林與巴本公司商談人造石油問題。至於，「人造石油」係乜東東？我真係搵唔到資料鳥。今個月，中國劇作者協會集體創作嘅三幕劇《保衛蘆溝橋》發表。1937年嘅8月份到此為止，以下再補充返一啲事。

之前講過，8月14號係中國空軍第一次出動，並且取得勝利！其實當日發生嘅事，並唔係咁簡單。當日中國空軍從空中打擊日本戰艦，前一日呢啲戰艦已經開始攻勢，以炮火轟擊中國軍隊第87同埋88師，中國空軍其主要嘅目標係日本嘅第三艦隊指揮艦「出雲號」，「出雲號」當時正停泊在上海碼頭正對日本領事館的位置，不過原來中國空軍嘅投彈都冇命中目標，反而部分偏離嘅炸彈卻落在外灘路同南京路街角有名嘅華懋飯店，以及在旁邊嘅匯中飯店，同不遠處的大世界娛樂中心，當日天氣非常惡劣，因此造成誤炸，引起了大慘劇，根據《字林西報》嘅報導：「大世界墜彈做成1047人死亡及303人受傷，同時華懋飯店同匯中飯店另有120人死亡。」，外國記者則以「黑色周末」之名將呢件事傳到全世界，《紐約時報》稱其為一場「恐怖」屠殺，以及「上海悲劇性的一天」。《泰唔士報》則評論「在上海發生的事，可能在任何地方都從未發生過。」

常公子 2023-1-3 14:08:23 日本1937年嘅作戰計畫明確指示，如果同中國軍隊開戰，日本一定要佔領華北五個省份同埋長江下游地區，首要係要確保關東軍嘅後側，其次係切斷國民政府主要補給線同埋摧毁主要嘅稅收供應區，這兩個目標要「速戰速決」，理由就係防範蘇聯軍隊有時間動員部隊並且乘機行動，日本人最驚嘅都係蘇聯。

相對國民政府嘅作戰計劃則係力主持久消耗戰，中日雙方部隊火力懸殊，中國軍隊裝備亦都大大落後於日本，舉一個例子俾大家參考——當時中國嘅迫擊炮最大射程只有1200公尺，日本則係5倍6000公尺，真係打條毛咩？雖然當時國民政府正在推動全面軍事改革，但去到1937年，國民政府幾乎沒有一個德械師嘅裝備能夠達到正式嘅標準編裝，即係打個7折左右，國民政府祇有3000輛載具同10000匹騾馬，中國空軍僅有202架飛機可用，況且中國軍隊嘅訓練精良程度遠遠遜於日軍，而且仲未計所謂「中國軍隊」嘅定義，「中國軍隊」其實係由唔同軍閥指揮嘅部隊湊合而成嘅「雜牌軍」，當中有嚴重嘅山頭主義同指揮問題，而且除咗蔣介石手握嘅一支中央軍外，其餘雜牌軍部隊質素非常參差，更加唔好講統一指揮集中作戰嘅問題，好多時候都係你有你打，我有我打。

而且最重要嘅係，當時嘅中國仍然冇一支真正意義嘅海軍，至於日本嘅海軍力量有幾強大？相信亦唔使我多講。當時嘅日本，可能擁有世界上最大嘅海軍力量。一個日本甲級師團嘅戰時編制，就有25000人，配備10000支步槍，300挺輕機槍，100挺重機槍，300具榴彈發射器同100門火炮，其中編有一個機械化部隊，配備40輛輕型載具同埋20輛裝甲車，6000匹馬及300輛各式其他載具，仲編有一個化學兵部隊。1937年初，日本帝國陸軍擁有正規武裝人員247,000人，分別納編於17個步兵師團，4個坦克師團，54個飛行中隊。上述的編制，仲未計義務兵役制度，日軍兵力更可在短時間內大幅擴張至1,000,000人。

1937年8月嘅第二次淞滬戰爭，蔣介石投入佢手上面最精銳嘅87同88師，響上海迎擊日本嘅海軍特別陸戰隊，企圖掃蕩上海灘外嘅日本艦隊，阻止佢哋派更多士兵登陸支援淞滬戰爭，不過雙方兵力實在太懸殊，蔣介石未能成功達到戰略目標，只能拖慢日本人進攻嘅速度同節奏，不過對日本人嚟講，已經係顏面盡失。

#常威 #蔣介石平反系列  #佛經抄寫員 #中日戰爭 #民國歷史

常公子 2023-1-5 18:13:58 ［常威近代史］第七百五十二回 黑色周末（高清錄音版）

#唔鍾意睇字可以聽

https://fb.watch/hSn5PKQ6KG/

常公子 2023-1-6 14:01:25

【渠頭者聯盟第十二部 明日大嶼打到虢礫緙嘞】

電子書下載⬇⬇

https://play.google.com/store/books/details?id=3DelEAAAQBAJ

💖電子書最新上市！請大家踴躍捧場！

常公子 2023-1-6 18:05:11

【常威近代史】（七百五十四回）
一寸山河一寸血

繼續補充1937年8月中日戰爭發展情況，上集講到8月14號中國空軍誤炸事件，造成大量平民死亡嘅上海大慘劇，中國當然唔承認責任喺自己身上，中方解釋講係因為當時日本海軍旗艦出雲號嘅炮火碎片擊中飛機攜帶炸彈嘅托架先至造成呢次事故，企圖將誤炸責任推畀日本人，情況同今日嘅俄烏戰爭一樣，所有無辜平民百姓被害，無論如何都係對方嘅錯，我話分兩頭說，錯就一定係日本人錯！因為首先發動侵略戰爭嘅人係日本人，其次我係中國人，響立場方面完全無旁貸。

之前講過，蔣介石響第二次淞滬戰爭一開始，就投入大量兵力，並且動用佢手上最精銳嘅88同89師，企圖阻止日軍響上海大規模登陸支援戰事，佢深深明白到上海唔能夠失守，可惜佢嘅如意算盤打唔響，儘管多次嘗試，出雲號始終未被擊沉，88同89師亦都未能順利拿下上海小東京區內嘅日本陸戰隊司令部，一來國軍受到日本海軍巨大砲火嘅壓制，二來受到情報同埋指揮方面嘅重重錯誤影響，雖然當時國民政府軍隊上佔有數量嘅優勢，但係喺第一波攻擊行動中卻冇辦法攻克日軍，另一方面，日軍從來冇將中國軍隊放入眼內，淞滬戰爭國軍嘅攻勢雖然未能達到戰略目標，不過已經令不可一世嘅日軍顏面無存。

8月16號，蔣介石下令進行名為「鐵拳行動」嘅第二波大規模攻擊，依一波攻擊由一位德藉顧問漢斯維特（Hans Vetter）策劃，主要目的係突破日本佈置嘅兩處防線，向黃埔江進襲，並且將小東京切割為三個分離區域，不過由於國軍情報作業太差，作戰協調唔夠同埋彈藥不足，國軍始終未能夠突破日本嘅防線，8月19號鐵拳行動無以為繼。之後形勢逆轉，中國軍隊全面進入守勢，8月23號，日本第3同埋第11師團確定實施以過往從未執行過嘅大規模兩棲登陸，早上7點前，日軍已經喺獅子林、川沙同埋吳淞完成灘頭陣地鞏固，之後幾日，日軍興建碼頭同埋道路，從運輸艦上卸載大量坦克同埋火炮，呢個時候日本空軍亦都取得上海嘅空域控制權，其實中國空軍並唔係冇得打，只不過中國空軍實在唔能夠再承受飛機嘅損失，於是只有選擇撤退。呢個時候，第3師團已經預備要繞過上海切斷國民政府撤退路線，同時11師亦預備要從南側直接打入上海！

常公子 2023-1-6 18:05:32 日本上海派遣軍司令松井石根大將（1878-1948）登陸，呢條撚樣之後會因為犯下嚴重戰爭罪行南京大屠殺響1948年被處死，松井石根發現佢要喺10月底前擊潰喺灘頭陣地同埋上海之間嘅國民政府守軍，依一片區域同第一次世界大戰戰場非常相似，四處都係戰壕，土壤被翻開，無人區屍橫遍野，只要守軍能夠喺呢片區域縱橫交錯嘅運河同埋溪流間搵到掩護，就能夠持續阻止日軍推進。而且日軍嘅補給好快因為複雜嘅地理環境出現問題，加上守護上海嘅國軍士氣高昂，所以國軍一守就守咗兩個月，直至守到9月尾，日本政府再增派3個師團嘅兵力支援為止。計埋條數，日本足足要用上5個師團嘅兵力，先能夠完全攻克上海，至於日本每個師團有幾疊馬？大家可以睇返上一回。

從8月中到9月尾，響上海外圍，中日軍隊上演咗一幕驚天動地、血肉橫飛嘅攻防戰，國軍方面，上海必不能失，因為上海失守，首都南亦京都岌岌可危；日軍方面，攻剋上海所需要嘅時間同埋投入嘅兵力遠遠超出咗佢哋嘅估算，中國軍隊嘅頑強抵抗亦都出乎佢哋意料之外。平日扮斯文有文化嘅野獸，終於比人激鳩嬲咗失控，埋下咗之後人類現代史上最可怕戰爭罪行之一南京大屠殺嘅伏線，你唔撚驚，就殺到你驚為止，當時日本人大概係咁諗掛（除非唔係）。

8月份，北方嘅戰線亦都持續發展，南口一線防禦潰散，日軍亦都一舉侵佔平綏路東線嘅每個據點，天津同埋北平失守之後，8月頭，日本召集重兵南下，從北平、天津兵分三路展開攻勢，其中一路沿平綏路西出南口，向晉察綏襲擊，其直接奪取嘅戰略目標係閻錫山（1883-1960）嘅根據地山西。

南口係扼冀察同山西嘅咽喉，8月5號，第二戰區前敵總指揮湯恩伯（1899-1954）率領部隊進駐南口，趕築防禦工事，希望憑藉險要地形對抗日軍獨立混成嘅第11旅團同埋陸軍第5師團來犯，與此同時，閻石山亦都增派部隊前赴集寧、豐鎮，同南口組成防禦線。8月8號至14號，中國守軍同日軍展開激烈嘅南口爭奪戰，喺強烈砲火轟擊下，南口陣地嘅工事幾乎被夷為平地，但中國士兵喺倒塌嘅工事裡，身陷焦土依然拼死抵抗，保住陣地，軍委會為扭轉南口被動嘅局面，派出晉綏騎兵集結察北， 以期從側翼分散日軍對南口據點嘅壓力，日軍感到嚟自察北嘅壓力，於是改攻張家口，21號，張家口失陷，令到南口處於腹背受敵嘅困境，加上增援部隊又遲遲未到，防線漏洞愈嚟愈大，南口終於失守，察南屏障消失，察哈爾全省迅速為日軍所控制，日軍嘅矛頭亦直指山西！

#常威 #蔣介石平反系列  #佛經抄寫員 #中日戰爭 #民國歷史

常公子 2023-1-6 18:05:47

❤【常威近代史】第一部《大清亡國關慈禧蛋牛治》，全面開放，免費下載， #freedownload！

Free下載連結🔽

https://play.google.com/store/books/details?id=C3hjDwAAQBAJ

常公子 2023-1-7 18:32:44 【常公子歷史頻道 513回：黃金十年系列之 農村問題】

⏩https://youtu.be/8K4UBhNRLQs

#常威💀 #常威近代史頻道 #黃金十年系列  #民國歷史 #佛經抄寫員

常公子 2023-1-8 12:21:13 ［常威近代史］第七百五十三回 一寸山河一寸血（高清錄音版）

#唔鍾意睇字可以聽

https://fb.watch/hV-yM4Am2t/

常公子 2023-1-9 21:19:28


【常威近代史】（七百五十四回）
有錢出錢買公債抗日

時間線進入1937年9月份，中日全面戰爭南北同時爆發，9月1號，吳淞口失陷，重慶防空司令部成立，同一日，長江各航運公司聯合辦理供應軍運及維持民運事宜，進入全面抗戰狀態，民眾需要上下一心，軍事方面固然要打，社會日常經濟運作其實先至係戰爭最重要嘅一環，戰爭狀態唔代表社會停擺，打仗反而需要更多嘅錢，因為戰爭本身係燒錢行為。

所以9月1號，國民政府亦以抗日救國名義，喺全國大舉發行法幣公債，俗稱為救國公債。國民政府要籌嘅錢為5億元，係一個天文數字，當然啦，打仗唔使錢咩？救國公債年息4厘，規定自1938年起，每年8月發放利息一次，自1941年起開始還本，分30年清還，條件其實唔錯，不過救國嘅嘢，應該唔係咁計數。公債發行嘅時候，國民政府喺全國各地組織「勸募委員會」，公開響民間「勸募」，即係勸你買債券救國抗日，總之有錢出錢，有力出力，之後喺八年抗戰期間，全國各地都掀起咗一場國民儲蓄運動。去到1948年9月，國民政府發行「金圓券」，規定救國公債債券安其票面加1.3萬倍，再按法幣300萬元對金圓券1元嘅比率折合償還，數學嘅嘢可能太複雜會唔明，總之如果你響1937年救國公債發行嘅時候購買咗100蚊嘅公債，去到1948年就只能獲得金圓券4毫子，大概貶值咗400倍左右，呢一招，令到好多債券持有者蒙受巨大損失，呢個問題亦冇話啱定錯，有錢唔通唔還畀你咩？不過冇就真係冇辦法，運用財技轉一轉大家好過啲咁解啫，信用嘅問題當然係蕩然無存，不過捐錢抗日救國都唔應該考慮回報掛？況且場戰爭最後打贏咗，呢個已經係最大嘅回報鳥。講多1億次都唔怕厭，千祈唔好希望戰爭發生響自己（或自己國家）身上，可以唔打就儘量唔好打，否則一係冇命，一係冇錢，任君選擇。

9月2號，教育部命令沿海各省公私立學校遷往內地省份，由戰爭一開始，中華民國已經抱住同你日本人打長久消耗戰心態，就睇吓邊個夠長命？9月3號，孩子劇團喺上海成立，全團22人，最大嘅19歲，最細嘅得9歲，呢個時候正處於淞滬戰爭期間，上海有好多地方仍然生活如常，正常運作，龍蛇混雜嘅公共租界更加係軍事中立區，戰火未能夠燒到入去（直至1941年日本向西方列強宣戰為止）。9月3號，日本海軍佔領東沙群島，所謂佔領其實即係派艘戰艦過去睇吓，順便插支旗仔，應該無遭受任何抵抗。同一日，特種警察訓練班喺湖南成立，由中華民國第一號特務頭子戴笠（1897-1946）擔任主任，關於戴笠戴春風嘅故仔實在有好多，要講真係有排講。9月5號，日本海軍擴大對中國嘅封鎖，北起秦皇島，南至北海口，要折斷中華民國經濟命脈，上集已經講過，當時中華民國並未有一支有真正意義嘅「海軍」存在，而當時日本則擁有世界上最強大嘅海軍艦隊，海權上嘅爭奪，完全冇得同日本人玩。

常公子 2023-1-9 21:19:40 9月5號，中國軍隊喺北平良鄉以南擊落日機3架，全民通訊社喺太原成立，教育家李公樸（1902-1946）擔任社長。9月6號，陝甘寧蘇維埃政府改稱為陝甘寧邊區政府，第二次國共合作框架出現之後，除去「蘇維埃」三個字，9月7號，蔣介石派出大學者胡適（1891-1962）等前赴美國、德國、意大利宣傳日本侵華經過及其暴行，當時並唔係今時今日，冇互聯網亦冇電視直播，世界上好多地方根本唔知道日本侵華戰爭已經發生咗，不過我真係唔知，身為軸心國成員嘅納粹德國同法西斯意大利究竟事前有冇收到軍國主義日本帝國嘅風呢？

9月8號，臺灣革命黨宣言與祖國協力抗日。9月9號，國防參議會成立，今日，中華民國代表前赴日內瓦，向國際聯盟申訴日本侵略中國，並要求國聯採取行動。國際聯盟同今日嘅聯合國職能一樣，唯一可以採取嘅行動就係譴責或強烈譴責日本嘅戰爭暴行，其餘可以做到嘅嘢亦都有限，日本亦都好快退出畀面派對國際聯盟。9月12號，日本海軍陸戰隊喺廣東大鵬灣登陸，大鵬灣應該係非常接近香港嗰個大鵬灣，戰火一下子亦都蔓延到廣東沿岸。

9月13號，大同淪陷，9月15號，浙贛鐵路建成通車；今日，八路軍總部東渡黃河前赴山西前線抗日，9月17號，國民政府命令全國文武官員抗戰期間不得隨意藉故辭職、調職或請假，身為公務員，國家有難自然要謹守崗位，否則太平盛世點解有隻鐵飯碗俾你呢？9月19號，西北地質礦產試探隊到達酒泉，9月22號，國民政府發表由中共起草嘅第二次國共合作宣言，9月24號，保定失守。9月26號，杭州錢塘江大橋竣工通車，呢一條係中國人自己設計同建造嘅第一座現代化大橋，依座橋由中國結構工程師茅以升（1896-1989）設計，於1934年11月動工興建，全長1453米，其中江中16孔正橋長1072米，每孔跨度67米，北岸引橋288米，南岸引橋93米，雙層聯合橋，下層係單線鐵路橋，上層係雙線公路橋，翹高71米，橋樑喺施工過程中，採用基礎、橋墩、鋼樑三種工程並進嘅方法，並且採用「射水法」、「沉箱法」及「浮運法」，全部工程中實行咗半機械化，因而只用咗兩年半時間，花費160萬美元即完成全部工程。

#常威💀 #蔣介石平反系列  #佛經抄寫員 #中日戰爭 #民國歷史

常公子 2023-1-11 18:17:33 ［常威近代史］第七百五十四回 有錢出錢買公債抗日（高清錄音版）

#唔鍾意睇字可以聽

https://fb.watch/h_hzwTEPpm/

常公子 2023-1-13 15:21:25

【常威近代史】（七百五十五回）
平型關大捷

1937年9月25日，中國軍隊取得抗戰而來首次重大勝利，被稱呼為「平型關大捷」，由大名鼎鼎鼎鼎林彪（1907-1971）指揮嘅八路軍115師，響平型關以東小寨村伏擊日軍板垣師團第21旅團，全殲日軍1000多人，摧毁日軍汽車80餘兩，並且繳獲一批武器同埋軍需品，中國軍隊取得抗戰以來，首場重大勝利！平型關為內長城重要關口，扼守靈丘至大營公路，9月22號，日本先頭部隊到達平型關，與中國軍隊展開激戰，陣地多次易手，中國軍隊雖屢挫敵鋒，但傷亡慘重，雙方處於僵持狀態。9月27號，日軍採取猛烈攻勢，9月28號茹越口防線被突破，中國軍隊退守繁峙以西鐵角嶺繼續抵抗，日軍追蹤而來，29號，鐵角嶺、繁峙又告失守，平型關中國軍隊後路被切斷，為了避免畀日軍包圍，第二戰區於30號破曉時分下令放棄平型關，全軍向五台山區轉移。

所謂一場「平型關大捷」，平型關最後都係失守，但係八路軍大將林彪則一戰成名，八路軍重挫日軍成為極佳抗戰宣傳事件，事後不少史料都指出，「平型關大捷」內容嚴重失實，林彪率領嘅部隊其實只係做咗一次小型偷襲，殺敵嘅數目同官方宣佈有非常大距離，不過真真假假，真係難以分辨，歷史就係如此一回事，有時候信就有，不信就冇！正如日本右翼都話南京大屠殺從來冇發生過一樣，佢哋話殺人嘅並唔係日本兵而係中國軍隊。何況戰爭期間，宣傳的確好重要，所謂兵不厭詐，兵者、詭道也，為求勝利，可以不擇手段，殺人都可以，區區謊言假消息假報導，其實真係冇乜嘢大不了。就算去到今時今日資訊無比發達流通嘅21世紀，響戰爭方面嘅資訊，又有幾多成係堅料？

平型關戰役係由國民政府第二戰區司令官閻錫山（1883-1960）所領導，前後歷時大約一個月，由9月3日制定作戰計劃到10月2日全線撤退為止，國民政府於1937年9月11日大同戰鬥失利後，於雁門關至平型關一線依託山脈與舊長城組織嘅一次對日抗戰戰役，戰場範圍達數百里，中國方面投入兵力11個軍共計10餘萬，對付日軍方面2個兵團約2萬人，歷經大小戰鬥數十次，屬於一場中等規模戰役。大家亦可以睇到，軍隊人數係以中國軍軍隊佔上風，不過中國軍隊係由多支不同部隊組成嘅雜牌軍，林彪所率領嘅只不過係其中一支部隊。響指揮系統及軍備上，日方遠勝中方，勝負亦都不言而喻，死傷數字方面，中國軍隊有40000人，日軍只係得3000人左右。平型關失守之後，日軍矛頭直指閻錫山老巢山西，展開咗之後1937年9月至11月發生嘅大型戰役「太原會戰」。

常公子 2023-1-13 15:21:50 9月27號，日本喺上海虹口設關收稅；9月28號，國際聯盟大會上通過「譴責日本在華暴行案」決議，國聯果然做到嘢！不過國聯嘅譴責行動，或稱呼為強烈嘅譴責行動，並唔能夠阻止日本繼續侵華，去到1937年，一眾西方列強對中日全面戰爭仍然處於觀望狀態，暫時冇人願意向中國伸出援手，亦無人願意以強硬態度對付日本，似乎大家都明白跟車太貼，好易出事。9月28號，國際新聞供應社喺上海成立，正式向國際輸出中日戰爭情況，今個月尾，國民政府成立貿易調整委員會，工礦調整委員會，農產調整委員會，壟斷主要農產品同工礦產品嘅對外貿易，國家進入戰爭狀態，一切特事特辦。

由「七七蘆溝橋事變」起計，去到九月尾，中日戰爭已經爆發咗兩個多月，北方北平天津兩大重要城市失守，日軍突破長城防線，從北方大舉南下，勢如破竹！南方上海淞滬之戰拉鋸之中，但真實情況係，一如所料，中國軍隊全面處於下風，根本唔能夠阻止軍備同指揮系統上遠勝自己嘅日軍，加上中國完全冇海軍同空軍嘅支援，制海權同制空權係零，基本上可以講係完全冇得打，只能夠拖延時間，依兩個月，蔣介石亦無辦法得到其他西方國家嘅實際支持，情況可謂岌岌可危。至於全國民眾是否萬眾一心全面抗日？或者都只係戰爭宣傳嘅手法，城市裡面受過教育，識字懂得閱讀報紙刋物嘅年青人，當然大聲疾呼要求全力抗戰，但佢哋嘅想法，並唔代表呢個擁有4億人嘅貧窮國家裡面大部份人嘅想法；識字嘅人裡面，亦有一部分人非常唔認同蔣介石，嚴重質疑佢帶領國家嘅走向。更加唔好講，4億人之中超過80%至90%以上居住在農村地區嘅廣大農民，佢哋好多根本唔知道發生緊乜嘢事？甚至乎大部份人都未知道中日戰爭已經全面爆發。

而且戰爭進行咗兩個幾月，好多人都睇到真實情況到底係點，北方不堪一擊，南方蔣介石用上佢最精銳嘅部隊都唔能夠阻止日軍登陸，好多人都知道冇得打，或者明白打落去，所需要付出嘅代價會係非常之大，中國20世紀最重要嘅歷史學者陳寅恪（1890-1969）就曾經喺抗日戰爭啱啱發生嘅時候表示：「中國之人，下愚而上詐……華北與中央皆無志抵抗，且抵抗必亡國。」，其中「下愚而上詐」五個字的確可圈可點，口講全力抗日，但有全力過嗎？主和嘅聲音，或者主張用其它方法結束戰爭嘅聲音開始出現，其中財政部長孔祥熙（1880-1967）同中國第一號大學者胡適（1891-1962）等都開始轉口風，而「主和派」最重要嘅一個人，當然就係後來成為中國第一號大漢奸嘅——汪精衛（1883-1944） 。

#常威 #蔣介石平反系列  #佛經抄寫員 #中日戰爭 #民國歷史

常公子 2023-1-14 14:25:52 【常公子歷史頻道 513回：黃金十年系列之 史太林完成托洛斯基】

⏩https://youtu.be/Wlxm6nvpXpU

#常威💀 #常威近代史頻道 #黃金十年系列  #民國歷史 #佛經抄寫員

常公子 2023-1-16 14:37:51 ［常威近代史］第七百五十五回 平型關大捷（高清錄音版）

#唔鍾意睇字可以聽

https://fb.watch/i4GA1-xa7c/

常公子 2023-1-17 19:33:43

【常威近代史】（七百五十六回）
殺到你驚殺到你投降為止

1937年10月1號，日本外務省聲明拒絕國聯調停中日戰爭，本日早已經唔將國聯放入眼內，正如今日聯合國，亦冇辦法調停俄烏戰爭一樣。今日，《民族呼聲週刊》響上海創刊，風雨飄搖，文藝界更需要團結民心抗日；今日，陝甘寧邊區銀行亦喺延安成立。10月2號，八路軍恢復政治委員制度，10月3號，61軍軍長李服膺（1890-1937）響晉北不戰而退，被判死刑，軍令如山，戰爭期間再無情講，戰爭唔係一個講感情嘅地方，戰爭只係一個殺人嘅舞臺。

10月4號，國民政府宣佈原定11月12號召開國民大會延期；10月5號，德州失陷，國軍守軍485團全部陣亡，英勇殉國。10月6號，美國國務院發表聲明，指謫日本破壞國際公約同道德。10月9號，日本侵佔大同煤礦，日本發動侵華戰爭，其中一個目的就係要搶奪中國豐富嘅天然資源，因為正正呢啲嘢就係日本所嚴重缺乏嘅，要成為東亞霸主，日本呢個島國可以講係先天不足。10月10號，雙十節，日軍攻陷石家莊。同日，《抗戰戲劇》月刊喺廣州創刊，10月11號，日本制定《華北各鐵路運營綱要》。10月12號，國民革命軍新編陸軍第4軍成立；10月14號，呂正操（1904-2009）建立河北人民自衛軍，呂正操同張學良私交甚篤，1937年4月加入中國共產黨，根據中共官方史料，在冀中抗日時期，呂正操率部隊、民眾積極展開敵後戰爭，成為冀中老百姓心目中傳奇式抗日英雄。

10月15號，邢臺失陷，同日，晉北自治政府喺大同成立，由清末舉人夏恭（1872-？）任最高委員，依一個係一個親日嘅傀儡政權，夏恭後來更成為任大同煤礦股份公司董事長，1945年中日戰爭結束嘅時候，佢下落不明。10月16號，包頭、邯鄲失陷。10月18號，北京、清華、南開三間大學南遷長沙，聯合設立臨時大學，本日起，學生開始報到。七七蘆溝橋事變發生之後，北平同天津相繼淪陷，北京、清華、南開三間名牌大學決定南遷，並且聯合建校，新校址設於長沙小吳門外聖經書院。由於多數學生從戰區而來，生活十分艱難，臨時大學籌備委員會決定從學校經費中撥出法幣5000元救濟貧苦學生，抗戰期間，流亡學生實行公費制度，亦由此而開始。

常公子 2023-1-17 19:34:01 10月19號，八路軍129師夜襲陽明堡日軍機場，炸毀日本軍機20幾架，10月21號，偽北平市當局迫令各校解散童子軍。10月22號，國民政府派出顧維鈞（1888-1885）、郭泰祺（1888-1952）、錢泰（1886-1962）為《九國公約》會議上嘅中國代表，繼續尋求其他強國支持抗日。10月25號，首批10架蘇聯輕型轟炸機飛抵蘭州，第二次國共合作後，蘇聯在向中國援助軍用物資嘅同時，仲選派空軍戰士組成援華航空志願隊，同埋援華航空運輸自願隊來到中國支援抗日戰事，去到11月頭，一共有50架飛機，志願航空人員150幾人到達蘭州。中日戰爭爆發之後，蘇聯係第一個出手支援中國抗日嘅國家，而之前已經講過，日本人最怕嘅事，就係蘇聯插手戰事，快速開打中日戰爭理由之一，亦係因為北方嘅赤色蘇聯。

去到10月尾，南北戰事繼續爆發，戰火蔓延全國。北方戰局方面，平型關失守之後，10月26號，日軍攻陷娘子關，沿正太路向山西太原城推進。10月中，日軍第20師團及108、109師團部分部隊渡過滹（音孚）沱河，沿正太鐵路向太原進攻，中國守軍沿正太路井陘至娘子關一帶佈防，扼守晉東門戶。10月12號，2000幾平日軍向井陘及其北面嘅賈莊進攻，傍晚相繼攻佔長生口、大小龍窩、井陘亦被攻陷，10月14號，孫連仲（1893-1990）部隊到達娘子關附近，21號到22號，日軍從正面進攻娘子關，呢個時候孫連仲部隊已經血戰8日8夜，實際兵力不滿6000人，26號，娘子關終於被日軍攻陷，日軍繼續西侵，響11月8號集結於太原城下。

整個10月，淞滬戰爭繼續拉鋸中，日軍大規模登陸上海外圍，但係遭受到中國軍隊嘅強頑抵抗，每推進一步，差唔多都要全力以赴同付出極大代價，呢個並唔係日本人事前能夠想像得到，事實上蔣介石派遣佢最精銳嘅部隊死守上海，其實已經係孤注一擲。日軍緩緩前進嘅同時，佢哋亦開始狂轟濫炸戰略，中國空軍為咗保存實力退出空中戰線，制空權完全俾日軍奪取，日軍就派出轟炸機不斷向上海投彈（當然唔夠膽炸公共租界區），話就話只係轟炸中華民國軍事目標，不過誤炸平民百姓亦都係理所當然之事，到咗今時今日嘅戰爭，啲導彈好多時候都會射去學校醫院孤兒院，大家心中總係明白嘅，更何況任何地方都可能係「軍事目標」，學校孤兒院都有可能窩藏軍人。

又想起19世紀，甲午戰爭之後日本人對中國人第一次進行嘅滅絕式旅順大屠殺（1894年11月21號到11月24號），藉口就係話有清國嘅官兵假扮成平民百姓窩藏於民居之內，所謂有殺錯冇放過！於是日軍大量屠殺平民，日本人開始佢哋轟炸戰略，隨即引起整個世界嘅強烈譴責，響原子彈未投落廣島同長崎之前，飛機密集式轟炸城市，原來已經係最可怕嘅戰爭畫面，日本人嘅戰爭「暴行」亦都好快傳到世界上每一個人嘅耳中，不過日本人已經不能回頭，佢哋一定要用盡一切方法儘快結束戰爭取得勝利！濫殺無辜，殺到你怕、殺到你驚、殺到你投降為止，可能係佢哋當時所採用嘅心理戰術。

#常威 #蔣介石平反系列  #佛經抄寫員 #中日戰爭 #民國歷史