常公子 2022-11-11 12:39:09


【常威近代史】（七百三十七回）
多功能性組織

戰爭之年1937年1月嘅下半葉，1月16號，抗日英雄楊靖宇（1905-1940）給中共駐共產國際代表團寫信， 提出響東北建立統一領導機關等問題。楊靖宇係中國共產黨黨員，任東北抗日聯軍第一路軍總司令和中共滿洲省委軍委代理書記。因東北抗日聯軍與位於山海關以內嘅中共中央難以取得聯繫，楊靖宇係當時東北抗聯軍實際最高領導人之一，楊靖宇戰死於1940年，亦係少數得到日軍高度評價嘅中國軍人之一。今日，一輛由香港開往廣州嘅午班列車，中途發生爆炸並起火焚燒，肇事原因係有旅客帶同易燃物品上車，因而引起爆炸，大火焚燒咗三節車廂，奪去咗80多條人命。

1月18號，德王德穆楚克棟魯普（1902-1966）自稱蒙古政府主席，正式搞分裂獨立，德王受日本人支助，佢嘅故事之前亦都交待過，不再重複。今日，中共中央同中央軍委機關由保安遷入延安，延安之後亦成為中共嘅根據地，上個月下旬，應發動西安事變嘅張學良（1901-2001）、楊虎城（1893-1949）嘅要求，紅軍出動主力南下，前往支援二人。張學良同楊虎城亦同意將瓦窰堡、延川、延長、延安等重要城鎮讓出，中共喺陝北嘅根據地亦都連成一片。延安坐落於延河中游嘅深谷裡，地處黃土高原，地勢險要，易守難攻，四周環繞著寶塔山、鳳凰山、清涼山，延安亦都係西安至陝北公路嘅終點。中共中央進駐延安後，延安成為中國革命聖地，之後，全國各地有唔少革命青年前仆後繼萬水千山到達延安，成為共產黨人，為締造新中國而拋頭顱灑熱血，中共進駐延安之時，延安可謂寸草不生，極度偏僻同落後，到咗今時今日，延安市已經有人口200萬，除咗有唔少革命聖地名勝，黃帝陵，即黃帝陵墓亦響延安之內。

1月19號，南京中央軍隊同楊虎城軍隊響赤水發生戰鬥，雖然話唔發生內戰，但牙齒印咁深，點都要打一打。1月20號，北平各界救國聯合會成立，1月22號，臺灣物產介紹所喺上海成立，當時臺灣係日本嘅殖民地，主要從事農業生產。1月24號，中國心理學會成立，同一日淩晨，錢塘江面一艘運送建橋工人嘅小客輪傾覆，浸死咗百幾個工人。1月25號，新華通訊社開始喺延安鄉全國發佈新聞，新華通訊社亦即係新華社，依一間中共領導下嘅通訊社，響1931年11月7號始建於江西瑞金，當時稱呼為紅色中華通訊社，負責向全國各地及全世界發佈中共官方嘅消息同資訊。紅色中華通訊社初期設立之時，借用軍委會電臺廣播新聞，同時抄收南京中央社電訊，編成《參考消息》供中共領導層參閱。紅軍進入陝北後，紅色中華通訊社亦都隨中共中央遷入延安，正式改名為新華社，新華社亦都成為中共官方發佈新聞消息嘅核心，運作至今時今日。

常公子 2022-11-11 12:39:25 叉開一筆，講講新華社響香港嘅發展歷史，港英時期，由1946年籌備開始，「新華通訊社香港分社」（大新華）為中共中央和中華人民共和國政府派駐香港嘅准官方代表機構，亦被稱為「北京的實質大使館」，中華人民共和國以新華社為名，與港英政府進行非官方外交接觸。提一提大家，當時英國並未承認中華人民共和國合法地位，中英雙方響北京駐港官方代表機構問題上無法達成一致，但係香港嘅地理位置同中國實在太息息相關，所以使用以「通訊社」代替「正式官方機構」方便彼此溝通，亦係權宜可行之策。而「新華通訊社香港分社總編輯室」（小新華）先係新聞機構。

初期新華社由喬冠華（1913-1983）、龔澎（1914-1970）夫婦主理，除咗負責同港英政府溝通及發佈中華人民共和國新聞之外，新華社嘅另一個主要功能就係組織香港嘅統戰工作同情報工作，可謂集多重功能於一身。香港回歸前至2000年，香港新華社分為兩個部分：俗稱「小社」或「小新華」嘅「新華社香港分社總編輯室」，設在灣仔霎西街5號，跑馬地馬場對面，業務上受新華社總社領導，辦理新聞業務；另一是俗稱「大社」或「大新華」嘅中共港澳工委，係中共響香港嘅黨組織機關。香港回歸中國後，2000年大新華更名為香港中聯辦，小新華則更名為新華通訊社香港特別行政區分社有限公司，繼續從事新聞業務。

1月28號，有菲律賓國父之稱嘅菲律賓總統奎松（Manuel L. Quezon，1878-1944）抵達上海訪問，當時嘅菲律賓，係東南亞一個具有影響力嘅國家之一。同一日，四川發生饑荒，宜賓飢民搶劫米船，多人死傷；今日，中國工農紅軍大學改名為中國人民抗日軍政大學，自瓦窰堡遷到延安。1月29號，蘇維埃中央政府機關報《紅色中華》改名為《新中華報》，響延安正式出版。1月31號，周恩來（1898-1976）同顧祝同（1893-1987）就中共部隊歸國民政府指揮及國民政府發給中共軍隊軍費等問題進行實質談判。

今個月，《文學》雜誌發表《尼采詩鈔》，將影響20世紀世界意識形態頗深嘅德國哲學家尼采（Friedrich Nietzsche，1844-1900）作品介紹到中國；《中國社會性質問題論戰》出版，對30年代嘅中國社會性質論戰進行全面總結。

1937年1月於焉結束。

#常威 #蔣介石平反系列  #佛經抄寫員 #中日戰爭 #民國歷史

常公子 2022-11-12 13:58:57 【常公子歷史頻道 508回：黃金十年系列之 秋收暴動】

▶發生響南京外圍嘅大規模戰役——龍潭之戰，可以講係中國近代史上一場轉捩性戰爭，由笑面虎孫傳芳所代表嘅北洋軍閥勢力戰敗全面退場，響中國近代史上，「軍閥時代」正式結束，「蔣介石時代」國民黨政權黃金十年正式降臨，天地換上新裝，正當蔣介石勢力同孫傳芳勢力進行大決戰之時，中共亦都同時發起咗「南昌暴動」同「秋收暴動」兩次武裝起義，雖然兩次起義宣佈失敗收場，不過，參與兩次起義嘅共產黨人，之後都成為咗之後中共在歷史發展軌跡嘅中流砥柱，基本盤鑄成，最重要嘅人物當然係毛澤東，經過呢兩次起義，中共內部「國際派」同「留蘇派」勢力，亦被毛澤東及其支持者嘅勢力所逐漸取代，中共亦正式進入毛澤東一人獨大時代，1927年，兩大歷史巨人——蔣介石同毛澤東——響不同嘅歷史條件下分別崛起，之後嘅中國近代史，可以講就係佢兩個人嘅近代史。

⏩https://youtu.be/Rn_xUoOSPlc

#常威💀 #常威近代史頻道 #黃金十年系列  #民國歷史 #佛經抄寫員

常公子 2022-11-13 14:57:02 ［常威近代史］第七百三十七回 多功能性組織（高清錄音版）

#唔鍾意睇字可以聽

https://fb.watch/gMjHbYmFYt/

常公子 2022-11-14 13:49:50

【常威近代史】（七百三十八回）
5項要求 4項保證 3中全會

1937年2月2號，首屆臺北市懇談會舉行；今日，張學良麾下嘅東北軍內部發生兵變，情況亦都非常正常，一直以嚟，幾十萬東北軍唯張學良馬首是瞻，但風高亮節嘅張學良，因為發動西安事變而被自愿軟禁於南京，蛇無頭不行，展開權力鬥爭，完全符合唯物辯證法則，世界上冇人唔鍾意錢（除非你有好多錢），同樣，世界上冇人唔鍾意權力，冇份去爭，當然口講有同冇都冇所謂，但當你有份參與遊戲時，權力無疑會係最大嘅誘餌。上個月底，東北軍、西北軍以及紅軍三方面領導人共同商定，和平解決西安事變不以釋放張學良為先決條件，呢一個原則，遭到以應德田（1900-1980）、孫銘九（1909-2000）為首嘅少壯派軍人反對，佢哋主張南京必須釋放張學良，否則不惜同南京政府決戰，而且密謀除掉主和派嘅王以哲（1896-1937）同何柱國（1897-1985）等將領，兵變因此發生，今日王以哲被槍擊身亡，何柱國則避入楊虎城公館得以倖免於難，事後，孫銘九等人被送往紅軍駐紮地，事情先冇進一步擴大。上集已經提過，得悉王以哲被殺後，身在南京的張學良痛苦不已。

2月5號，日本憲兵逮捕唐山中國銀行行長，並對其嚴刑拷打；同日，由福建人中國化工專家、有美國哥倫比亞大學化學博士學位嘅侯德榜（1890-1974）主持嘅永利仁學工業公司喺南京硫酸錏（銨）廠試車成功，侯德榜與永利另一創始人中國化工之父范旭東（1883-1945）同為中國近代民族化學工業嘅先驅人物。2月8號，當楊虎城部隊同埋東北軍部隊撤離西安後，南京中央軍隊進駐西安，10日後接管西安城防。2月10號，日本關東軍制定《關東軍治安肅正計畫綱要》，關東軍就係侵華主力，我諗呢個時候，關東軍內部已經制定全面嘅侵華策略，只等待一個藉口全力開turbo！

2月10號，中共中央致電國民黨五屆三中全會，提出抗日5項要求同埋4項保證。5項要求分別係：1.停止內戰，一致對外；2.保障言論、集會、結社之自由，釋放一切政治犯；3.召開各黨、各派、各界、各軍嘅代表會議，集中全國人才，共同救國；4.迅速完成對日抗戰之一切準備工作；5.改善人民生活。中共同時亦都作出咗4項承諾：包括1.在全國範圍內停止推翻國民政府之武裝暴動方針；2.工農政府改名為中華民國特區政府，紅軍改名為國民革命軍，直接受南京方面指揮；3.在特區政府區域內，實施普選嘅徹底民主制度；4.停止沒收地主土地之政策。

常公子 2022-11-14 13:50:10 2月11號，蔣介石喺上海同工商界領袖杜月笙（1888-1951）見面；2月12號，立法院批准《禁奴公約》，完全禁止蓄養奴婢，要變成雇傭關係。2月13號，宋希濂（1907-1993）就任西安警備司令一職，2月14號，中央研究院天文研究所測出1941年日全蝕線，2月17號，國民政府恢復張學良公民權；2月18號，宋慶齡響國民黨五屆三中全會上發表題為《實行孫中山的遺囑》演講，同一日，日軍喺豐臺購地屯軍；2月20號，日本外務省制定《第三次處理華北綱要》，與此同時，日本人亦喺華北地區瘋狂走私，已經完全當中國海關冇到，2月21號，日本走私販再次打傷天津海關關員，搗毀海關倉庫。

2月22號，國民黨五屆三中全會通過《國防經濟建設案》同蔣介石提出嘅《中國經濟建設方案》，蔣介石同時向中央社記者發表談話，提出開放言論，集中人才，釋放政治犯等口號，當然講係一回事，做又係另一回事。於今日閉幕嘅國民黨五屆三中全會，確定咗國內和平統一，適當擴大民主嘅政策，實際上亦都係接受咗中共停止內戰、一致抗日嘅建議。依一次國民黨第五屆三中全會，響2月15號開幕，歷時一個星期，中間共舉行過六次會議，會議上表面對中共響2月10號提出嘅「5項要求同埋4項保證」「不予置理，以絕效尤」，粗俗啲講句——即係睬你都有味！不過喺西安事變和平解決嘅基礎上，三中全會亦都係確定咗對共產黨和解，同對日本抗戰為中心嘅議題。

會上，蔣介石報告咗西安事變嘅經過，宋慶齡（1893-1981）、何香凝（1878-1972）同馮玉祥（1882-1948）等提出恢復孫中山三大政策嘅提案；而從前國民黨大左派，好快成為中國第一號大漢奸汪精衛（1883-1944）先生，則提出「剿共」政治決議案，邏輯亦都好簡單，從前你剿共，我就反對；今日你唔剿共，我提出剿共，總之逢蔣必反，你話左我行右，你話右我行左，響不久嘅將來，蔣介石抗日，汪精衛就要親日，其實都係好簡單嘅邏輯問題。三中全會上，汪精衛嘅決議案，受到全會大多數國民黨領袖所評擊。2月21號，大會又通過咗《關於根絕赤禍之決議案》，咁即係點呢？大會對中共仍然嚴厲指責，赤禍呀！但表示仍有談判空間；而對於日本嘅態度，則表示「超過所能忍耐之限度」，就要「決然出於抗戰」，即係話隨時預備打，依一次三中全會，表明國民黨嘅政策已經開始完全轉變，歸根究底，都係因為一場西安事變。

我記得張學良「赴京請罪」之時，除咗要承擔所有西安事變嘅政治責任外，佢仲講過，跟蔣介石去南京，就係要蔣介石唔可以反悔答應過嘅事……否則西安事變，將會毫無成效。張學良實在太清楚蔣介石係咩嘢人鳥？

#常威 #蔣介石平反系列  #佛經抄寫員 #中日戰爭 #民國歷史

常公子 2022-11-16 23:47:09 ［常威近代史］第七百三十八回 5項要求 4項保證 3中全會（高清錄音版）

#唔鍾意睇字可以聽

https://fb.watch/gQLTMloh9X/

常公子 2022-11-18 13:02:09

【常威近代史】（七百三十九回）
夜半歌聲

1937年2月22號，一架西南民航公司飛機喺廣東三水失事墜河；2月24號，周恩來提出同國民黨談判嘅五項原則，不過正式嘅談判尚未開始，我之前已經講過，大概國共第二次合作，就係日本人響1937年中發動全面侵略戰爭嘅重要理由，本來身為塘邊鶴，睇住你國民黨同共產黨打生打死，雙方不斷削弱，係最好不過嘅選擇，現在竟然和談，選擇共同一致槍口對外，咁仲得了？所以日本人選擇儘快決一死戰攤牌，免得夜長夢多，情況大致上就係咁。

2月24號，前國民黨中央宣傳部部長劉廬隱（1894-1969）因為涉嫌楊永泰（1880-1936）被殺案，今日喺上海被捕。楊永泰原本係湖北省政府主席，1936年10月25號赴日本駐漢口領事館宴會，中午後喺渡輪碼頭預備返回武昌，突然有刺客向佢背後連開數槍，楊永泰遇刺身亡，死前留低一句說話「吾早知必有今日」，不久，秘密偵查廳宣佈刺楊案已被偵破，真係快手，兇手叫做譚戎軒，話係受到劉廬隱所指示殺人，於是今日劉廬隱被捕！事實上，劉廬隱並非真正兇手，楊永泰係被CC系陳立夫（1900-2001）派出嘅「中統」特務所暗殺，事後，「中統」同「軍統」合作，嫁禍劉廬隱，將此案了結，而劉廬隱則被判十年有期徒刑。原來殺咗人，唔使終身監禁嘅，咁當然要睇吓你係邊個。1949年，劉廬隱出獄之後，應李宗仁邀任國策顧問，1951年任四川省文史研究館館員，先後當選第二至四屆全國政協委員。

2月25號，全國公路交通會議喺長沙舉行，同一日，外交部長張群（1889-1990）提出辭職；2月27號，親日嘅殷汝耕（1883-1947）到天津組織各界防共委員會，順帶一提，日本發動侵華戰爭，其中一個重要嘅理由就係打共產黨反赤色政權，漢奸殷汝耕之後亦係華北一帶有多番小動作，並且組織咗冀東防共自治政府搞分裂，1938年2月1日，冀東防共自治政府被併入另一個漢奸王克敏（1879-1945）嘅中華民國臨時政府傀儡政權。1945年抗戰勝利後，殷汝耕被重慶國民政府以漢奸罪名逮捕，押響南京老虎橋監獄，在獄中手抄《金剛經》思過，1947年被判處死刑。12月1日上午，前冀東自治政府主席殷汝耕在南京老虎橋監獄刑場被槍決。臨刑前寫下汪精衛詩《飛花》一首：「春來春去有定時，花開花落無盡期，人生代謝亦如此，殺身成仁何所辭。」，執行庭設在南京可容萬人嘅朝天宮大殿，行刑當日，殿內殿外擠滿圍觀嘅市民。

常公子 2022-11-18 13:02:25 2月27號，偽滿洲國皇帝溥儀宣佈《帝位繼承法》，可惜之後從來冇用到鳥。2月28號，楊虎城（1893-1949）將軍部隊開抵延安附近，同紅軍會合，預備抗戰。今個月，中共代表周恩來（1898-1976）、葉劍英（1897-1986）同林伯渠（1886-1960）等人同國民黨代表顧祝同（1893-1987）、張冲（1900-1980）等會面，就國共合作問題展開談判，雖然喺國民黨五屆三中全會上，蔣介石仍然堅持其剿共立場，但經過一場西安事變，蔣介石嘅態度明顯已經軟化，「第二次國共合作」框架順利出現，當然大家都明白，所謂合作抗日，都係一啲表面功夫，要做俾全國人民睇，我現在放下私怨，共同槍口對外，只不過人世間嘅恩恩怨怨，尤其是牽涉到生生死死問題，邊有咁容易放得低呢？血酬，好多時候只可以用鮮血去償還。

1937年2月，新華電影公司推出咗一部電影，叫《夜半歌聲》，喺上海引起轟動，《夜半歌聲》應該係中國電影史上第一部恐怖驚慄電影，導演係馬徐維邦（1905－1961），電影改編自法國作家加斯東·勒魯所著愛情驚悚小說《歌劇魅影》，內容描寫咗一個藏身於劇場頂樓嘅蒙面人身世，同其可怕嘅面容，仲有神秘嘅聲音，同埋詭異嘅音樂，刻意營造出恐怖非凡嘅氣氛，電影上映嘅時候甚至有觀眾被嚇得飛奔出電影院，新華電影公司嘅廣告對依部片嘅恐怖氣氛亦都大加渲染，響上海國際飯店附近挺起數層高嘅殭屍廣告畫宣傳電影，廣告畫仲話嚇死咗個六歲嘅小朋友，於是乎觀眾都爭相入場，睇吓部戲有幾恐怖，呢條橋真係駛得。

故事講述響民國初年北方一座小城市，革命戰士金子堅改名為宋丹萍，藉話劇表演宣揚革命，之後佢同大地主女兒李曉霞相戀，卻遭到大地主迫害，而惡霸湯俊為求得到李曉霞，不惜以濃硫酸將主角毀容。於是宋丹萍只有虛報已死，並隱居於戲院閣樓內，可是曉霞卻因此而精神失常，宋丹萍惟有響月圓之夜引吭高歌把她安慰。10年後，安琪兒劇團響這座荒廢咗嘅戲院演出，青年演員孫小鵬偶然間認識到宋丹萍，並得到佢響藝術上嘅協助，於是亦代佢去安慰李曉霞。但不久孫小鵬嘅愛人綠蝶又被湯俊睇中，而且孫小鵬更被槍殺。宋丹萍遂與湯俊博鬥，湯失足摔死，但係宋丹萍被官兵發現為當年嘅革命黨人，被官兵追捕時跳進大海中，生死未卜。大家睇到個故事大綱，都相當明白當年民間對革命的追求同想像。《夜半歌聲》分別響1985同1995年重拍，1995年嘅香港版本，由于仁泰（1950-）導演，張國榮、吳倩蓮主演。

1937年2月於焉結束。


#常威 #蔣介石平反系列  #佛經抄寫員 #中日戰爭 #民國歷史

常公子 2022-11-19 19:01:30 【常公子歷史頻道 509回：黃金十年系列之 政治鬥爭係沒完沒了】

▶蔣介石清黨之後，國民黨進入「寧漢分裂」時代，以蔣介石及汪精衛為首的國民黨兩派，左派同右派，各自另起爐灶，不過依一次嘅分裂好快就結束，汪精衛亦都「分共」同中共割蓆，由此可見當時國民黨內對中共不滿嘅人係佔上大多數，另一個睇法，亦都係西瓜靠大邊，唔少人見到蔣介石實力冒起，有財有勢，紛紛轉肽，調轉槍頭，而汪精衛同蔣介石，亦係呢個時候進入一山不能藏二虎嘅地步，從此以後亦都鬥爭不絕。大概呢啲就係所謂政治，政治就係權力鬥爭，政治就係利益分贓，世界上從來冇完全清潔無垢嘅政治存在，你覺得有，只係一廂情願嘅幻想。人對政治的理念，好多時候都係非常高尚，但係當政治進入現實世界實踐嘅階段，追求高尚只可以用汙糟邋遢嘅手段去完成，世事如是，人間如是。

⏩https://youtu.be/FczYD2gWHbg

#常威💀 #常威近代史頻道 #黃金十年系列  #民國歷史 #佛經抄寫員

常公子 2022-11-19 20:42:37 ［常威近代史］第七百三十九回 夜半歌聲（高清錄音版）

#唔鍾意睇字可以聽

https://fb.watch/gUybwVrBR6/

常公子 2022-11-21 19:38:14

【常威近代史】（七百四十回）
3S

時間線到達1937年嘅3月，距離中日全面戰爭爆發嘅時間愈嚟愈近，中日雙方走向大破局之萬丈深淵，再也沒法回頭。當然除咗中國同日本，整個世界亦將會面臨第二次世界大戰，生靈塗炭，無可避免。

1937年3月1號，中國同蘇聯簽訂《郵政互換包裹協定》，同日，毛澤東同朱德喺紅都延安會見美國女作家史沫特萊（Agnes Smedley，1892-1950），史沫特萊小姐係美國著名左派記者，以對中共革命報導著稱。佢支持女權、支持印度獨立、亦支持中國共產黨。史沫特萊出身於基層，係一個百分百嘅左翼新聞工作者，當然佢亦都被指控為共產黨喺西方世界間諜，不過依類指控，真係見仁見智。1928年底，史沫特萊以《法蘭克福日報》駐遠東記者身份進入中國東北，之後奔走於中國各個地區採訪，報導中國革命嘅發展情況，1929年初，史沫特萊認識咗魯迅（1881-1936）、郭沫若（1892-1978）等文化名人，並協助國母宋慶齡（1893-1981）處理文件，佢亦曾經出入莫斯科，線路好廣泛。1936年西安事變爆發，國民政府封鎖消息，張學良曾經接見史沫特萊，向佢說明西安事變意義，委託佢主持對外英語廣播，報導西安事變真相，並為史沫特萊提供一切方便。

史沫特萊係1937年1月初被中共派人接到延安。史沫特萊一到延安就受到毛澤東同朱德接見，講真，史沫特萊點止係一個左翼記者咁簡單？佢直情係一個政治活動家，延安時期，史沫特萊積極利用自己嘅國際關係為延安爭取援助，仲邀請自己好多記者朋友嚟到延安採訪，好似加拿大醫生白求恩（1890-1939），就係由史沫特萊所推薦，史沫特萊負責打國際線，打破國民黨對延安嘅新聞封鎖。1941年5月佢回到美國，回國後，繼續為中國募集救濟戰爭捐款，並為朱德作傳《偉大的道路：朱德的生平和時代》，該書同另一本埃德加·斯諾（Edgar Snow，1905-1972）所著嘅《西行漫記》被翻譯成多國文字，並列為向西方資本主義世界介紹中共革命嘅經典著作。

第二次世界大戰後，史沫特萊移居紐約，1949年響麥卡錫主義嘅反共潮流中被懷疑為「蘇聯間諜」，因此被迫流亡英國。1950年5月6日，史沫特萊因手術不治響倫敦逝世。1951年5月6日，史沫特萊逝世一周年時，骨灰安葬於北京市八寶山革命公墓，朱德親題：「中國人民之友美國革命作家艾格妮絲·史沫特萊女士之墓」。史沫特萊、埃德加·斯諾同安娜·路易絲·斯特朗（Anna Louise Strong，1885-1970）合稱為「3S」，三位對中國革命幫助好大嘅外國好朋友。

常公子 2022-11-21 19:38:30 3月3號，王寵惠（1881-1958）繼任外交部長。3月4號，蔣介石電令各省市如期肅清煙毒。今日，東北軍奉命由陝甘地區開赴豫皖地區接防，26日全部到達，由此可見東北軍已經接受中華民國南京政權嘅直接指揮。同日，四川重災，兩個月來重慶凍死餓死達到2870人，人命賤過泥；3月6號，湘、鄂、贛、粵四省特產展覽會喺廣州開幕。3月7號，中共命令陝甘駐軍，不得擅自任命地方官吏及干涉地方行政，為國共合作打好基礎。3月9號，行政院通過川黔鐵路股份有限公司章程及理事監察人員名單。3月11日，國民政府下令禁止《讀書生活》等13種刊物發售；今日國民黨中央派汪精衛前赴綏遠自致祭抗敵陣亡軍民。

3月14號，進入河西走廊嘅紅軍西路軍兵敗受困，殘部分散轉入祁連山打遊擊，徐向前（1901-1990）、陳昌浩（1906-1967）先離隊返回陝北。1936年嘅10月，紅四方面軍第30軍、第9軍，第5軍先後西渡黃河，中央革命軍事委員會計劃重點先打擊軍閥胡宗南（1896-1962）部隊，但係因為張國燾（1897-1979）擅自調動第4軍同第第31軍，上述計畫始終沒有實現，反而令到河東部隊同河西部隊隔斷。河西部隊孤軍待機，只能夠建議「若主力不能迅速渡河」、「我方先行向大靖、古浪、平番、涼州行」，繼續向西奔走。11月10號，西路軍正式命名，陳昌浩任軍政委員會主席，徐向前任副主席，西路軍西行途中，遭到軍閥馬步芳（1903-1975）、馬步青（1901-1977）部隊圍剿，西路軍記冇根據地作依靠，又冇兵源物資嘅補給，真正孤軍作戰，紅5軍軍長董振堂（1895-1937），紅9軍軍長孫玉清（1909-1937）先後殉難，部隊損失慘重。去到4月底，西路軍僅剩下400人進入新疆，另外有幾千人被俘虜同埋失散，經過多番救援，失散人員先陸續返回陝甘寧地區。

3月15號，綏遠舉行抗敵陣亡軍民追悼大會。3月16號，蕪湖全埠罷市。3月18號，中日貿易會喺上海召開首次會議。3月19號，日本吞拼長城煤礦，臺北實施新市區計畫。3月20號，日本喺上海私運大批銅元出口，中國海關關員攔阻不果，7個關員被毆傷。

#常威 #蔣介石平反系列  #佛經抄寫員 #中日戰爭 #民國歷史

常公子 2022-11-23 11:45:52 ［常威近代史］第七百四十回 3S（高清錄音版）

#唔鍾意睇字可以聽

https://fb.watch/gZkesj0aeJ/

常公子 2022-11-25 13:48:50


【常威近代史】（七百四十一回）
一山不能藏二虎

1937年3月21號，成渝鐵路開始動工，同日，禁煙總監委派14省市禁煙特派員，全力打擊吸食鴉片風氣，鴉片百年遺禍，終於行到尾聲。3月23號，陳慶雲（1897-1981）被行政院任命為中央航空學校校長，大戰爆發在即，但中日雙方在空軍方面距離相當巨大，大家都係心裡有數。

3月23號，中共發生一件大事，中共中央政治局擴大會議喺延安召開，重點係批判張國燾（1897-1979）嘅政治錯誤，一直以嚟，張國燾率領嘅紅軍，自把自為，多次違背中央指揮同命令，大家都有目共睹，將在外，自成一派，往往亦係一個政權最危險嘅計時炸彈，歷史上亦都重演過多次，點解要殺岳飛（1103-1142）？點解要殺袁崇煥（1584-1630）？就係怕佢哋會成為另一個趙匡胤（927-976）有朝一日黃袍加身，張國燾在之前，早已經響1935年卓木碉自立過中央，另起爐灶，今次返去延安，受靶（或受到批判）都是常識吧？所謂一次不忠，百次不容，尤其是當時嘅中共喺一個極度追求政治秩序嘅強大組織化政黨，張國燾能夠繼續留低嘅機會幾乎係等於零。3月31號，中共中央政治局作出《關於張國燾同志錯誤的決定》，指出張國燾嘅錯誤喺響戰爭中嘅右傾機會主義，其內容係褪卻路綫、軍閥主義同反黨行為嘅綜合，根源係農民嘅狹隘性、流氓無產階級嘅破壞性及中國封建軍閥嘅意識形態形成喺黨內嘅反映，啲帽子頂頂咁大頂扣下來，張國燾亦根本無處可逃。不過張國燾始終革命履歷異常深厚，響紅軍內影響力甚大，並冇淪為階下囚。

國共第二次合作全面抗日後，1938年4月3日時任陝甘寧邊區政府副主席張國燾借祭拜黃帝之名逃離延安，去到西安，投奔中國國民黨。周恩來多次要求張國燾回延安未果，最後決定讓張國燾選擇回歸中共與否，張國燾最後選擇離開中共，4月18日，中共中央開除佢嘅黨籍，張國燾脫離中共後，蔣介石視其為「對延安的致命打擊」，交比軍統領導人特務之王戴笠（1897-1946）「妥善運用」，不過之後，張國燾對中共大力嘅破壞力，並冇想像中咁大，可能佢對中共亦都保留一定情義都未定。1948年底因政治環境變化，舉家遷到臺北市；1949年冬又移居香港。1949年至1952年10月張國燾任《中國之聲》雜誌社長；1966年開始為美國堪薩斯大學撰寫《我的回憶》連載文章，並於香港明報月刊刊登中文版。1968年張國燾移居加拿大，1976年中風，右半身癱瘓；1979年12月3日響加拿大多倫多士嘉堡一個養老院病逝，終年82歲。1960年，3S中其中一個美國作家埃德加·斯諾響北京採訪毛澤東時問：「您一生中最黑暗的時刻是什麼時候？」毛澤東回答：「那是在1935年的長征途中，在草地與張國燾之間的鬥爭。」「當時黨內面臨著分裂，甚至有可能發生前途未卜的內戰。」張國燾曾經有幾猛？大家一清二楚，更加有人分析過，長征期間，有能力同毛澤東競逐中共最高領導地位嘅人，其實就係張國燾。

常公子 2022-11-25 13:49:17 3月24號，日本派出70艘軍艦嚟到中國，預備響青島舉行海上大演習。同一日，西藏著名學者西單加索應國民政府既蒙藏委員會教育部聘請，於今日從上海乘坐專車赴南京講學，同行者有監察委員會黎單同西單加索之弟子觀巴色呼圖等於22人。西單加索自幼出家，十多歲時求學於拉人楞寺，20歲入藏，響哲蚌寺攻五部內典，博通三藏，成為西藏一代大學者。

3月25號，國民黨中正會通過《捲煙加稅法》；亦響今日，留學蘇聯達12年之久，甚至已經加入蘇共嘅蔣介石長子蔣經國（1910-1988），自莫斯科啟程回國。情況亦都非常簡單，蔣經國一直留響莫斯科，留學又好，做人質又好，更加娶埋俄國老婆組織家庭，現在中共同蔣介石因為一場西安事變關係破冰，第二次國共合作契機出現，正所謂禮尚往來，蔣經國得以返回父親身邊。之前1927年蔣介石反轉豬肚清黨之時，身在莫斯科嘅蔣經國嚴厲指控父親，甚至同父親割蓆，睇嚟都係自保之法，回歸中國嘅蔣經國亦由左傾變番右傾，之後一直留喺老豆蔣介石身邊幫手，被蔣介石培養成為接班人，好多年之後，蔣介石死後，正式接手臺灣中華民國政權，不過呢啲係後話，關於蔣經國嘅故事，之後再加補充。

3月27號，日本經濟考察團離開上海回國，海關喺其所乘坐嘅船上查獲私運銅元52萬枚。3月29號，財政部聘請前意大利財政部長史丹法尼（Alberto De. Stefeni，1879-1969）為顧問，改革中華民國財政。今個月，周恩來代表中共中央向國民黨中央提出修改國民大會法則三項原則。有中國果戈果之稱嘅作家陳白塵（1908-1994）所著嘅七幕歷史劇《金田村》發表。傳雷（1908-1966）所翻譯嘅法國作家羅曼羅蘭（Romain Rolland，1866-1944）長篇小說《約翰克里斯朵夫》（Jean-Christophe）出版，1915年羅曼羅蘭因依部長篇小說獲得諾貝爾文學獎。今個月，郵電部開辦代收所得稅業務，交稅可以去郵局。

1937年3月於焉結束。

#常威 #蔣介石平反系列  #佛經抄寫員 #中日戰爭 #民國歷史

常公子 2022-11-25 13:49:27

❤【常威近代史】第一部《大清亡國關慈禧蛋牛治》，全面開放，免費下載， #freedownload！

Free下載連結🔽

https://play.google.com/store/books/details?id=C3hjDwAAQBAJ

常公子 2022-11-26 15:41:18 【常公子歷史頻道 510回：黃金十年系列之 蔣宋之戀】

▶1928年，政治局面一片混亂，蔣介石斷然宣佈下野，繼續沿用以退為進之老套路，明明大權在握卻在跳草裙舞，目的只在於打擊政治對手迷惑自己人，所謂一山不能藏二虎，主要是汪兆銘。同步，下野時之蔣介石爆出與宋美玲之花邊戀情，花生指數高企，遠遠拋離對手幾十個馬位。孫文老婆係宋美玲家姐宋慶齡，當時已婚嘅蔣介石如果奪得美人歸，就同孫文一家親成為直接親屬，宋家王朝蔣天下格局形成，綽號「孫文親密戰友」嘅汪兆銘仲邊有訂企呀？何況宋家真係唔可以講笑，過多幾年，宋家子弟宋子文更曾經成為世界首富，你冇聽錯，我冇吹水，係世界首富！宋子文真係曾經成為過世上最有錢嘅人。1915年孫文就係響日本娶左宋慶齡而谷底反彈，絕地反擊中原，行運又好，真係有拾卜又好，總之宋家一定有一定助力，蔣介石心中當然明白遊戲規則，所以不惜同元配離婚，改信耶穌基督，都要追到宋美玲拉埋天窗，所謂小財唔出，大財唔入，投資人眼光遠大，豈是蟻民可以相比？

⏩https://youtu.be/ltTtO4uFfxU

#常威💀 #常威近代史頻道 #黃金十年系列 #民國歷史 #佛經抄寫員

常公子 2022-11-27 15:41:33 ［常威近代史］第七百四十一回 一山不能藏二虎（高清錄音版）

https://fb.watch/h2PyjVRbJ3/

常公子 2022-11-28 18:02:53

【常威近代史】（七百四十二回）
家祭無忘告乃翁

時間線進入1937年嘅4月，4月1號，中緬、中瑞郵政開辦互換匯票業務，今日，偽滿洲國實行「第一次產業五年計劃」；同日，第二屆全國美術展覽開幕；4月2號，第三屆全國氣象會議喺南京開幕，孔祥熙（1880-1967）作為中華民國代表前赴英國慶賀英王加冕典禮，登基嘅英王，係患有口吃嘅喬治六世（George VI，1895-1952），喬治六世個女就係伊利莎白女王二世，佢個孫就係查理斯三世，2011年奧斯卡最佳電影，由哥連費夫（Colin Firth，1960-）主演嘅《皇上無話兒》（The King's Speech），就係敘述喬治六世響第二次世界大戰中嘅故事。

4月4號，國民政府蘇州高等法院起訴沈鈞儒等7人。今日亦係一個非常重要嘅日子，因為4月4號清明節，國共兩黨派出代表共祭黃帝陵，黃帝陵位於陝西中部縣（今日叫黃陵縣），史書多稱為「橋陵」，傳說係中華民族始祖軒轅黃帝嘅陵墓，相傳由漢代開始，歷代都有修茸，當然軒轅黃帝係一個傳說中嘅神話人物，實際上有冇呢個人都冇人知道。國民政府成立之後，每年都有舉行祭典，今次中共中央亦派出林柏渠（1886-1960）等代表，會同南京方面派來嘅祭陵要員，一齊前往拜謁。行祭奠禮時，林柏渠獻上毛澤東親筆撰寫嘅祭文，祭典之後，國共兩黨代表都留宿響中部縣縣政府，並就有關問題交換咗意見，直至第二日先分手。

亦嚮今日，蔣介石、周恩來杭州談判結束，周恩來返回延安。蔣介石同周恩來關於「國共第二次合作」嘅談判，自上個月下旬開始，周恩來再次重申中共嘅5項要求同埋4項保證，向蔣介石提出左11項書面要求同5項口頭聲明，當中堅持陝甘寧邊區特別行政區——即係中共根據地——必須保持獨立完整，政府人員民選推薦，由南京政府任命，邊區主要負責人由南京政府派人出任，但必須由中共方面提名推薦。紅軍編整為3個師，每個師人數為15000人，總計45000人，設立總指揮部，所有紅軍領導人員保持不變，唔能夠加人或減人。由周恩來提出嘅條件睇得出，共產黨同國民黨真係一個合作關係，名義上喺埋一齊，但係行政上，則河水不犯井水，保持適當距離，不過政治就係咁嘅一回事，政治唔係綉花，亦唔係請客食飯，國共兩黨，基本上意識形態矛盾從來冇解決過，只不過大敵當前，大家暫且將恩怨擱下，打咗日本仔先，否則連個棋盤都冇埋，亦唔使繼續捉棋。

4月4號，陝西省水利局開掘嘅渭惠渠舉行放水典禮，渭惠渠係繼涇惠渠之後，渭河流域嘅另一個大型水利工程，號稱「陝西八惠渠」之最。工程自前年8月動工，今個月完成嘅係第一期工程，原定係去年12月15號舉行放水典禮，後來因為西安事變爆發延期，渭惠渠建成之後，渭河沿岸嘅農田有水灌溉，加強農業生產力。

常公子 2022-11-28 18:03:09 4月6號，外交部長王寵惠（1881-1958）代理行政院長；4月10號，國貨聯合營業公司響南京創立，實業部長吳鼎昌（1884-1950）為董事長，吳鼎昌祖籍浙江吳興。清末官員，進士，民國初期金融界人物，企業家、官僚。亦係大公報投資人，社長，後任南京政府實業部部長、貴州省政府主席，屬政學系。4月10號，財政部統計，上半年因為走私損失1300萬元，其中華北佔咗800萬，之前已經提過，日本人喺華北瘋狂走私，直情當你中華民國係冇掩雞籠，貨品自出自入。

4月12號，西北青年第一次救國代表大會喺延安召開，決定成立西北青年救國聯合會。4月13號，四川萬源發生火災，銷毀住戶3000家，4月14號，國民政府要求川軍讓出重慶，16號四川軍閥劉湘（1890-1938）表示接受，你想點就點啦，劉湘已經行到人生尾聲，仲剩返兩年命仔。4月15號，中共中央發表《告全黨同志書》，號召全黨「為鞏固國內和平，爭取民主權利，實現對日抗戰而鬥爭」，指出「在目前新階段內，我當工作中心的一環，應該是抗日的民主運動的發展」，一方面抗日，一方面發展民主，雙管齊下。4月15號，日本人響東北各大城市進行大搜捕，被捕者達到480人，當中有80人被處決，進入戰爭狀態，再冇面畀了。

4月16號，日本方面制定《對中國實施的策略》，中國形勢已經開始有所變化，第二次國共合作出現，中華民族統一抗日戰線形成，日本方面亦都明白唔可以再拖落去，軍方決定響短時間內向中國發動全面戰爭，以反共為名，一舉殲滅你國民黨同共產黨，佔領全中國國境。當然日本對中國實施嘅全面戰爭策略，亦都配合軸心國嘅盟友納粹德國行動，納粹德國嘅希特拉，亦都喺差不多相同時候決定向歐洲發動全面侵略戰爭，一場全球嘅驚世浩劫，亦無可避免地要發生。

相信喺1937年，全世界大部份人民都冇諗過一場驚世滅頂之災真係會發生，當時不論英國、法國還是美國，本身都高舉和平主義、綏靖政策（即係拖字訣）大行其道，大家都唔相信納粹德國同日本帝國兩大強國（Sorry，真係唔計墨索里尼嘅意大利）真係會響歐洲大陸同亞洲大陸全面開拖，不過世事嘅嘢，尤其是係衰嘢，又點會咁易俾你估到丫？

#常威 #蔣介石平反系列  #佛經抄寫員 #中日戰爭 #民國歷史

常公子 2022-11-28 18:03:38 4月6號，外交部長王寵惠（1881-1958）代理行政院長；4月10號，國貨聯合營業公司響南京創立，實業部長吳鼎昌（1884-1950）為董事長，吳鼎昌祖籍浙江吳興。清末官員，進士，民國初期金融界人物，企業家、官僚。亦係大公報投資人，社長，後任南京政府實業部部長、貴州省政府主席，屬政學系。4月10號，財政部統計，上半年因為走私損失1300萬元，其中華北佔咗800萬，之前已經提過，日本人喺華北瘋狂走私，直情當你中華民國係冇掩雞籠，貨品自出自入。

4月12號，西北青年第一次救國代表大會喺延安召開，決定成立西北青年救國聯合會。4月13號，四川萬源發生火災，銷毀住戶3000家，4月14號，國民政府要求川軍讓出重慶，16號四川軍閥劉湘（1890-1938）表示接受，你想點就點啦，劉湘已經行到人生尾聲，仲剩返兩年命仔。4月15號，中共中央發表《告全黨同志書》，號召全黨「為鞏固國內和平，爭取民主權利，實現對日抗戰而鬥爭」，指出「在目前新階段內，我當工作中心的一環，應該是抗日的民主運動的發展」，一方面抗日，一方面發展民主，雙管齊下。4月15號，日本人響東北各大城市進行大搜捕，被捕者達到480人，當中有80人被處決，進入戰爭狀態，再冇面畀了。

4月16號，日本方面制定《對中國實施的策略》，中國形勢已經開始有所變化，第二次國共合作出現，中華民族統一抗日戰線形成，日本方面亦都明白唔可以再拖落去，軍方決定響短時間內向中國發動全面戰爭，以反共為名，一舉殲滅你國民黨同共產黨，佔領全中國國境。當然日本對中國實施嘅全面戰爭策略，亦都配合軸心國嘅盟友納粹德國行動，納粹德國嘅希特拉，亦都喺差不多相同時候決定向歐洲發動全面侵略戰爭，一場全球嘅驚世浩劫，亦無可避免地要發生。

相信喺1937年，全世界大部份人民都冇諗過一場驚世滅頂之災真係會發生，當時不論英國、法國還是美國，本身都高舉和平主義、綏靖政策（即係拖字訣）大行其道，大家都唔相信納粹德國同日本帝國兩大強國（Sorry，真係唔計墨索里尼嘅意大利）真係會響歐洲大陸同亞洲大陸全面開拖，不過世事嘅嘢，尤其是係衰嘢，又點會咁易俾你估到丫？

#常威 #蔣介石平反系列  #佛經抄寫員 #中日戰爭 #民國歷史

常公子 2022-12-1 19:56:45 ［常威近代史］第七百四十二回 家祭毋忘告乃翁（高清錄音版）

#唔鍾意睇字可以聽

https://fb.watch/h8j-AcBTgz/

常公子 2022-12-2 17:43:46

【常威近代史】（七百四十三回）
軍事改革之路

1937年4月17號，盤踞四川多年嘅軍閥劉湘（1890-1938），帶領部隊撤離重慶，移駐川南永川，差不多宣告收皮。4月18號，天津交通銀行經理徐伯園（1902-1980）喺北京韓國道被匪徒綁架，徐伯園係金融專家，1939年擔任中央銀行、中國銀行、中國農民銀行、交通銀行四行管理處副秘書長。1946年擔任財政部政務次長及四行聯合管理處秘書長，其後出任中央銀行副總裁，1949年赴香港接掌中國銀行董事長，1950年到台灣，擔任不同公職，1960年出任中央銀行總裁。1962年後再度出任外貿會主委，並兼中國國民黨中央委員會財務委員會主任委員。1970年出任國際貨幣基金會執行董事，翌年出任中聯信託董事長、圓山聯誼會理事主席。1980年病逝於台北市。

4月18號，國民政府派人前往四川、陝西、甘肅等省賑災，4月20號，華南米業公司成立，4月21號，日軍喺北平東單廣場作實彈演習，同一日，中美定期航線開通，由美國飛嚟嘅第一班航班，今日起飛，航線由上海、經過香港、馬尼拉、關島、中途島、火奴魯魯島到達舊金山，全程一萬餘英里，行程需要7日，需要不停轉機，其中上海飛到香港一段，由中國航空公司擔任飛行任務，香港至舊金山則由泛美航空公司負責。

4月22號，國民政府中常會公佈《國民大會組織法》、《國民大會代表選舉法》以及《中華民國憲法草案》，1911年搞到而家，仲未有一部憲法登場。4月24號，《解放》週刊喺延安創刋，而3000名日軍即係通縣舉行大規模實彈演習，4月25號，中國詩人協會喺上海成立，日本人再策動蒙軍進攻綏遠，4月26號，宋慶齡（1893-1981）、何香凝（1878-1972）等發起營救救國會領袖沈均儒（1875-1963）等人運動。4月30號，西安事變嘅其中一個主角楊虎城將軍（1893-1949）被蔣介石革職，算賬未必一定要等到秋天；今個月，宋子文（1894-1971）獲得南洋兄弟煙草公司半數股份，並自任董事長，調查報告顯示，呢個時候嘅宋子文已經係世界首富，就算唔係排第一，都係排頭幾位，真係撈到風生水起，你唔恨得咁多，宋家皇朝蔣天下，有時候並無過譽喎。

1937年4月，到此為止，今集有少少時間，同大家分享一下蔣介石南京政權嘅軍事改革之路。事實上去到1927年北伐後期，各個地方軍隊加入國民黨革命軍嘅人數已經到達220萬，呢個數字包括直接受蔣介石指揮嘅部隊（中央軍），但唔包括張學良嘅東北奉系軍隊，數字其實非常驚人，但係喺當時一個好似中國嘅貧窮國家，雖然做軍人薪水仍然少得可憐，但係對唔少人嚟講都係一份理想嘅工作。南京政府響權力有限嘅情況下，想辦法要維持中央集權，全國山頭主義林立，好多軍閥表面聽南京之笛，其實都祇不過係想攞軍費同小小津貼，這一點，大家都係明白嘅，完全係因為一個「窮」字同「錢」字。

常公子 2022-12-2 17:44:01 但蔣介石第一件事要做，就係要打造一支實力強大嘅中央核心部隊，即係南京政府直接指揮嘅中央軍，最大作用係主導抑壓敵人對手（主要係國內），1928年，第一位德籍顧問馬克思包爾（Marx Bauer）嚟到中國幫手，改革中央軍體制，1933年，蔣介石更聘請到另一個有德國國家防衛軍之父尊稱嘅漢斯·馮·塞克特（Hans von Seeckt）嘅軍事顧問幫手，佢提議響一個訓練精良嘅軍官團支援下，打造一支數量約為60個師嘅中央軍隊，經費以中央財務以外嘅資金支付，並配合嚴謹嘅人事系統，強力嘅後勤組織以及國內軍事工業，於是國民黨軍隊按照呢個想法進行打造工作，並且聘請重量級人馬阿歷山大·馮·法肯豪森（Alexander von Falkenhausen）將軍嚟推動，德國人就零舍不同。

1932年嘅11月，國民黨更加建立咗一個隱蔽嘅參謀組織「國防設計委員會」，以科技規劃，配合大規模嘅資料蒐集同調查建立軍隊，參謀組織所涉獵嘅範圍，更加包括政府每個部門以及各種不同嘅社會計畫同文化，南京政府亦同德國嘅商界協定，以商品及礦產資源換取德國提供嘅軍事同軍工設備。1934年，開始全面淘汰南京政府所管轄部隊中嘅老弱傷殘人員，配合1933年頒佈嘅全國兵役法，對照60個師嘅編制，將全國劃分為60個徵集兵源嘅師管區，加上嚴格嘅德化軍事訓練，培養出大量年青軍事人員，配合建築各種防禦工事及提昇軍備。去到1936年，第一份全國作戰計畫正式出爐，有鑒於日本軍事上嘅絕對優勢，中華民國嘅選擇係運用地大人多，同日本進行持久消耗戰，要求人民為保衛國家作出任何犧牲，力抗強敵來犯。喺抗戰前夕，其實南京政府喺軍事上已經大幅躍進，直屬嘅中央部隊無論係訓練或裝備上，均超過任何國內對手甚遠（之後比紅軍收皮，認真諷刺），即使各地部隊嘅編制仍然有啲虛張聲勢，但國民政府嘅軍力，即係蔣介石中央軍嘅實力，響中國已經係number one！而且軍隊領導已經響對日本作戰時所需要採取嘅策略，達成咗共識，隨時預備同你鍊過。

不過唔講都唔知，原來當時國民黨中央軍，係同日本人嘅盟友納粹德國如此息息相關……呢個世界，真係冇死錯人。

#常威 #蔣介石平反系列  #佛經抄寫員 #中日戰爭 #民國歷史