10月8號，鄭天賜（1884-1970）當選為海牙國際法庭法官，鄭天錫為廣東香山人，國父孫文同鄉，佢係當代著名法學家、外交官，與王寵惠（1881-1958）齊名。鄭天錫早年就讀於香港皇仁書院，Queens呀，香港開埠之初，叫中央書院（Government Central School，當時又稱大書院。1907年前往英國留學，1912年畢業於英國倫敦大學學院法學院（UCL Faculty of Laws），1916年獲英國倫敦大學學院法學博士學位，係博士學位，唔係學士學位。鄭天賜嘅博士論文為《國際私法中關於確定契約能力的法規》（Rules of International Law Determining Capacity to Contract），乃首位在英國獲得法學博士學位嘅中國人，之後回國成為執業律師，並且於民國期間擔任不同重要司法職位，1936年，鄭天錫當選為國際聯盟於荷蘭海牙常設國際法院法官，成為繼王寵惠之後第二個當選為常設國際法院法官嘅中國人，任期本來至1945年。1940年納粹德國入侵荷蘭，鄭天錫離開海牙，避居瑞士日內瓦。1945年二戰後返回海牙，出席常設國際法院全體法官會議，後被選為國際聯盟清理委員會委員（Member of Board of Liquidation of the League of Nations）。同年返國，重任國民政府司法行政部次長。1946年至1950年間出任中華民國末任駐英國大使，鄭天錫駐英大使任內，與英國朝野人士感情融洽，去職之日的臨別贈言――「與中國人做過朋友的，永遠是朋友」，又將中國人交友重信義嘅真諦婉轉表達，可謂「一語能彰大國風」。
10月24號，上海各界喺龍華機場舉行為慶祝蔣介石50大壽獻機命名典禮，原來眨下眼，蔣介石都50歲。同一日，中美航空全線試飛成功。5月25號，湖北省政府主席楊永泰（1880-1936）喺漢口遇刺身亡。之後話兇手又係嗰啲熱血上頭嘅愛國青年，自己組織暗殺行動，因為不滿楊永泰嘅親日態度，至於真相係點？又點會咁易俾你知道丫。10月25號，毛澤東派彭雪楓（1907-1944）與傅作義（1895-1974）洽談共同抗日事宜，繼續跳過你蔣介石。10月29號，香港禁止港製貨物上有「中國製造」字樣，要made in Hongkong，10月31號，蔣介石發表《五十生日感言》，同一日，張學良陪同蔣介石到洛陽，繼續勸佢停止內戰，卻遭蔣痛斥。
11月27號，根據上海《時事新報》報導，全國各專科以上學校醫學畢業生，指1911年至今，已經有4517人，按人口比例計算，數目少得可憐。11月28號，身為軸心國之一意大利嘅墨索里尼政權，承認偽滿洲國，正常。同一日，綏遠蒙政會委員長沙克都蘭扎布（1873-1945）、副委員長巴寶多爾濟（？-1949）等通電擁護中央。11月29號，根據上海《申報》報導，日方統計，日本喺中國紗廠共有紗錠52萬餘錠，布機8786架，佔全中國紡織業80%以上，如果呢個數字係真確無誤，你亦都會明白當時嘅局面係如何尖銳化。《申報》亦都報導，當時湖南有61個縣遭受旱災，10個縣遭受雹災，另外35個縣遭受其他災害，農村世界，始終係一個地獄世界。今個月，全國各地報刊出版魯迅逝世特輯，以悼念依一位偉大嘅文學家。同時，翻譯家梁實秋（1907-1987）翻譯嘅莎士比亞劇作《奧賽羅》（Othello: The Moor of Venice）亦都出版，中國人開始閲讀莎士比亞。
12月4號，國民政府命令統一外交職權，同時公佈《中外合資興辦實業辦法》，今日，中國無人不識嘅名妓賽金花（1872-1936）喺北平病逝，終年62歲。賽金花可以講係中國女性主義嘅前衛人物，一生人結過三次婚，每次離婚都做番交際花又再結婚，嫁親嘅都係名人有錢人，真係唔恨得咁多。今日，蔣介石亦返抵西安，進入捕鼠器內。12月7號，張學良到華清池向蔣介石「哭諫」，再次請投蔣介石聯共抗日，但蔣介石再次拒絕 Again and again。睇到呢度，大家都睇到張學良已經畀咗好多次機會蔣介石，有陣時造反真係被逼，只要蔣介石嘅態度冇咁強硬，或者只要「口頭」應承張學良，西安事件根本唔需要發生。不過我已經講過，作為一個軍事強人或獨裁領袖，真係冇得縮，冇得退半步海闊天空，因為一縮，好容易就會產生骨牌效應兵敗如山倒，事實證明，蔣介石嘅遭遇都係一樣，所以佢基本上無錯。
西安事變發生之後，何應欽（1890-1987）下令討伐張學良，蔣介石則一直表現出「決為國犧牲」嘅姿態，誓不低頭，講真，依一點我非常欣賞，軍事強人的確有軍事強人嘅風度。12月14號，威廉·亨瑞·端納（William Henry Donald，1875-1946）到達西安見蔣介石，情況先開始有轉機。端納係邊位？端納係澳大利亞人，曾先後擔任過國父孫文、張學良同蔣介石、第一夫人蔣宋美齡嘅私人顧問。一生事業都在中國，曾贊助辛亥革命，後來又成為中華民國北洋政府客卿，係中華民國時期中國政壇上最為活躍嘅西人，有「中國的端納」之稱，一句到尾，佢唔係一個普通嘅西人，甚至可以講係一個超人。
威廉·亨瑞·端納（William Henry Donald，1875-1946）依個當時嘅中國通到達西安見蔣介石，調和西安事變嚴峻局勢，端納向蔣介石傳達咗英國、美國表示贊同西安張學良方面主張嘅態度。情況亦都相當簡單，當時蔣介石背後的金主就係美國人，美國人嘅態度，亦都主宰咗蔣介石嘅態度，端納並同時遞交蔣介石夫人宋美齡嘅親筆信，內裡有講——「南京方面是戲中有戲」——即係話，南京方面亦都唔係全力支持蔣介石響西安撐落去，分分鐘有人會乘機發動政變，取而代之。呢個世界嘅嘢，真係局中有局，戲中有戲，每個人表面做嘅事，未必代表佢心裡面嘅真正想法，凡事只睇表面，唔明白內裡嘅糾纏瓜葛，就大部份情況會睇錯。
【常威近代史】（七百三十回）
紅軍會師 25000里長征結束
時間線嚟到1936年10月，10月1號，國民政府開始徵收所得稅，增加稅收渠道，預備打仗，今日，華北軍閥宋哲元（1885-1940）同日本帝國訂立《華北經濟開放協定》，到目前為止，宋哲元明顯積極賣國，亦係日本進行華分離最主要拉攏對象，日本亦有意思比宋哲元統治華北，建立傀儡政權。但係睇返，1936年宋哲元只剩低有區區四年陽壽，廣東話俗語嗰頭近，但非常神奇嘅係，響佢死後，國共兩黨對佢嘅評價都係甚高，雖然並唔係乜嘢民族抗日英雄之類，但係亦未至於被冠上「賣國賊」或「大漢奸」之名，所以做人，做錯100件事唔緊要，最緊要做啱最重要嗰件事；相反，做啱100件事冇用，如果最重要嗰件事做錯，或者揀錯，一失足成千古恨，最後都係要遺臭萬年，大家當然明白我講緊邊個？當然係講緊中國近代史上最大嘅大漢奸汪精衛先生。
10月1號，中國當選為國聯非常任理事國，同一日，巴金（1904-2005）、林語堂（1895-1976）及魯迅（1881-1936）等21文學家聯名發表《文藝界同行為團結御侮與言論自由宣言》，團結御侮即係團結抗日。10月6號，日軍喺上海製造緊張局勢，各國軍艦紛紛抵達上海戒備，隨時預備撤僑行動，嚟到呢度，其實煲水已經滾瀉咗，隨時隨地就會爆煲，似乎日本正喺度等待一個適當機會，發動全面侵略戰爭。
10月8號，鄭天賜（1884-1970）當選為海牙國際法庭法官，鄭天錫為廣東香山人，國父孫文同鄉，佢係當代著名法學家、外交官，與王寵惠（1881-1958）齊名。鄭天錫早年就讀於香港皇仁書院，Queens呀，香港開埠之初，叫中央書院（Government Central School，當時又稱大書院。1907年前往英國留學，1912年畢業於英國倫敦大學學院法學院（UCL Faculty of Laws），1916年獲英國倫敦大學學院法學博士學位，係博士學位，唔係學士學位。鄭天賜嘅博士論文為《國際私法中關於確定契約能力的法規》（Rules of International Law Determining Capacity to Contract），乃首位在英國獲得法學博士學位嘅中國人，之後回國成為執業律師，並且於民國期間擔任不同重要司法職位，1936年，鄭天錫當選為國際聯盟於荷蘭海牙常設國際法院法官，成為繼王寵惠之後第二個當選為常設國際法院法官嘅中國人，任期本來至1945年。1940年納粹德國入侵荷蘭，鄭天錫離開海牙，避居瑞士日內瓦。1945年二戰後返回海牙，出席常設國際法院全體法官會議，後被選為國際聯盟清理委員會委員（Member of Board of Liquidation of the League of Nations）。同年返國，重任國民政府司法行政部次長。1946年至1950年間出任中華民國末任駐英國大使，鄭天錫駐英大使任內，與英國朝野人士感情融洽，去職之日的臨別贈言――「與中國人做過朋友的，永遠是朋友」，又將中國人交友重信義嘅真諦婉轉表達，可謂「一語能彰大國風」。