常公子 2022-9-23 13:27:28

❤【常威近代史】第一部《大清亡國關慈禧蛋牛治》，全面開放，免費下載， #freedownload！

Free下載連結🔽

https://play.google.com/store/books/details?id=C3hjDwAAQBAJ

常公子 2022-9-24 11:39:03 【常公子歷史頻道 501回：黃金十年系列之 武漢國民政府割蓆】

▶Youtube常公子歷史頻道邁向501回，正式邁向第二個500回，在此，在這個帶著秋意的早上，我希望能夠順利完成另一個500回，路固然很漫長，但我同阿潮會堅持行落去，堅持當然是一種美德，但堅持更加是一種殘酷試煉，在漫長的人生中，其實現代人最難剋服的問題，就是無聊和枯燥，從來如何安排自己生活，或者如何令自己的生活變得有點意義，才是人生最大的藝術，Youtube常公子歷史頻道並不是一個什麼偉大的工程，可能到了最後，呢條中國近代史頻道最大嘅目的只是純粹自娛和自我滿足，或者衹是替我自己生命產生意義的一種工具，可能係，除非唔係。古代佛門僧人，很多時候都會用抄寫佛經來當作修行的一部份，我大概同佢哋去做住同一件事……

⏩https://youtu.be/B84SAiZmxG4

#常威💀 #常威近代史頻道 #黃金十年系列  #民國歷史 #佛經抄寫員

常公子 2022-9-25 12:18:18 ［常威近代史］第七百二拾三回 民國超級悍匪劉桂堂（高清錄音版）

#唔鍾意睇字可以聽

https://fb.watch/fLA0rITSJC/

常公子 2022-9-26 18:40:49


【常威近代史】（七百二拾四回）
不能容忍的時候 就是犧牲的時候

時間線進入1936年7月，距離中日全面戰爭爆發，只剩下一年時間，1936年中，地球上大約一半人類，已經嗅到戰爭嘅血腥氣味，當然大家想像嘅血腥未來，遠遠未及真正現實將會發生嘅血腥狀態。正如今時今日，21世紀嘅今天，我哋都已經籌嗅到戰爭臨近嘅氣味，不過當戰爭未真正來到大家門前敲門say hi嘅時候，一切只係繼續流連於浪漫嘅想像中……要千方百計避免戰爭真正發生，對好多人嚟講，到目前為止，並非第一選項，而且被認為係一個錯誤嘅、矇蔽正義嘅選項。

7月1號，國民黨中政會通過《鐵路公路聯絡辦法》，同日，紅2、紅6軍團同紅4方面軍響甘孜會合，決定北上抗日，同紅1方面軍會師。今日，偽滿洲國教育部，亦都制定咗奴化教育措施。7月2號，廣西省外貿全停，進入全面戰爭動員經濟狀態，南天王陳濟棠，李宗仁及白崇禧同氣連枝，再次進行反蔣鬥爭！今日，紅2方面軍成立。7月4號，駐豐臺100多名日軍，分別乘坐汽車、坦克及軍用大卡車開入北平，遊行示威，至於佢哋遊行示威嘅訴求係乜嘢？大致上都係同華北分離有關，總之要傳達一個訊息，就係華北唔係你蔣介石嘅中華民國嘅。

7月5號，中國著名畫家徐悲鴻（1895-1953）應邀主持廣西第一屆美術節展覽會。會上，徐悲鴻展示一幅寬4呎，長9尺嘅巨畫《田橫五百士》，依一幅畫，係徐悲鴻嘅代表傑作，此畫取材於秦末軍事將領田橫（？-公元前202年）辭別海島五百壯士嘅悲壯場面，畫面上，身穿紅衣嘅田橫同佢兩個朋友正在與人群拱手作別。有人發現畫中送別人群中，有一個人極似徐悲鴻本人，於是向其詢問，徐悲鴻則回答說：「我為欽敬500壯士的忠義氣節，所以把自己畫了進去。」

《田橫五百士》取材於司馬遷《史記》，話說高祖劉邦欲招降田横，詔令説，田横來投降，封王封侯，如不降就出兵消滅佢同佢和五百名部下。為保存五百人生命，田横選擇去見漢高祖，但最最終在距離洛陽不遠自刎，遺囑命令兩名部下拿去嘅人頭去見漢高祖，高祖用王禮葬田横，又封同來的兩人為都尉，但兩人都自殺了。劉邦面去招降田横五百人，但五百人集體自殺，無一人投降。風高亮節，寧死不屈，不投仇敵，正是當時最需要嘅民間意識形態，日本人殺到埋身，全民總動員亦屬正常！《田橫五百士》現存於北京故宮博物院。

常公子 2022-9-26 18:41:16 7月6號，廣東空軍人員黃志剛等能通電反對內戰；7月9號，國民政府命令國葬章太炎（1869-1936），蔣介石如此厚待章太炎，章瘋子泉下有知，必定大慰矣。7月10號，財政部負責人對記者表示，廣東濫發嘅紙幣已經超過2億元以上，個數字都幾得人驚，怪唔之得要打仗喇，好多時候，打仗唔係因為咩嘢國仇家恨，純粹係條數爆煲啫。同一日，國軍29軍同日軍喺大沽發生軍事衝突，好彩仲勒得住。7月13號，蔣介石喺國民黨五屆二中全會上表示「中央對外交所抱的最低限度，就是保持領土主權完整」蔣介石仲講，「半年來的外交形勢，並未達到和平絕望時期」，「並未到最後關頭」，「我們決不能輕舉妄動，致陷國家民族於萬劫不複之地」，「假如有人強迫我們簽訂承認偽國等損害領土主權的時候，就是我們不能容忍的時候，就是我們最後犧牲的時候」，亦都講得清清楚楚，對頭人就係日本，可以忍就可以忍，亦都明知唔夠打，如果真係要打，犧牲會好大，所以最好唔好打，最好就係忍落去。不過形勢唔到你忍，日本人一早睇通你籠嘢，底牌係街磚三，真係驚你有牙。蔣介石發表嘅「最低限度」外交，亦都講比全國軍民知道，全面戰爭好快就會爆發，大家要做好心理準備——甚至犧牲嘅準備。

7月14號，著名教育家陶行知（1891-1946）出席世界新教育會議第七屆年會；7月15號，國防會議成立；同日，全國各界救國聯合會發表公開信，力主抗日，不怕犧牲。同日，蘇（州）嘉（慶）鐵路通車。亦響7月15號，劉少奇（1898-1969）響中共河北省委內部刊物《火綫》中，發表文章《肅清空談的領導作風》，之後響1939年7月，劉少奇亦都發表另一篇重要文章《論共產黨員的修養》。7月16號，《大公報》報導河北省有39個縣遭受蝗禍，災情嚴重。

今個月，蔡元培（1868-1940）、魯迅（1881-1936）、郭沫若（1892-1978）、茅盾（1896-1981）等140名學界名人聯合發表文章，建議對拉丁化新拚音文字解禁，「文字拉丁化運動」始於1933年，之前，響蘇聯遠東地區已經大力推行咗兩年，運動介紹到國內，隨即引起一場大眾語嘅討論，各地紛紛成立推行團體，致力將方塊字改為拉丁文字，即係日本文字嗰套玩法。但到咗本年初，文字拉丁化運動受到國民政府查禁，至於點解國民政府唔批准，我冇資料，但係首先喺河南開封，一批新文字書刊就被禁，之後更加波及全國。漢字拉丁化、拚音化究竟好定唔好？我唔知道，不過無論任何形式嘅語言文字始終都只係概念及文化嘅「載體」，內容先係最重要掛？不過中文，或者叫漢語係好難學，就珍珠都冇咁真。

#常威 #蔣介石平反系列  #佛經抄寫員 #中日戰爭 #民國歷史

常公子 2022-9-28 18:43:02 ［常威近代史］第七百二拾四回 不能容忍的時候 就是犧牲的時候 （高清錄音版）

#唔鍾意睇字可以聽

https://fb.watch/fPTHhJ7a-4/

大屎忽鬼 2022-9-28 18:46:00 留名

常公子 2022-9-29 11:08:13 【常公子歷史頻道 502回：黃金十年系列之 汪精衛分共】

▶「引刀成一快，不負少年頭」係大漢奸汪精衛人生聲譽嘅顛峰，響辛亥革命前後，直至去到20世紀30年代，中間20幾年，汪精衛實在係革命者愛國者嘅象徵，因為外型俊朗，有文學根底，亦係當時唔五四時代少年青人嘅偶像，汪精衛更加一度成為孫文嘅直接承繼人，如果中間唔係有一個軍閥蔣介石插入，成件事可能完全唔同曬，當然汪精衛本身，都好似一啲荷里活大明星一樣經常揀錯劇本，做出錯誤決定，好似1927年分共，作為國民黨左派大佬，竟然同國民黨右派一樣，要分共，甚至背信棄義將共產黨趕盡殺絕，之前國父許下嘅「聯俄容共」諾言，為咗求存汪精衛早已經拋諸腦後。如果汪精衛響武漢撐落下去，或者「寧漢分裂」玩耐少少，可能成個局面已經唔同曬，1927年之後，有理由相信汪精衛嘅聲譽已經江河日下，更被蔣介石獨佔鰲頭，響國民黨最權力鬥爭中全面敗退，去到1937年，最後只能夠步上投靠日本人之路，成為舉國譁然的一個大漢奸，從此遺臭萬年，永不翻身。

⏩https://youtu.be/AVL_svKMirk

#常威💀 #常威近代史頻道 #黃金十年系列  #民國歷史 #佛經抄寫員

常公子 2022-9-30 13:56:12

【常威近代史】（七百二拾五回）
南天王失廣東

1936年7月18號，南天王陳濟棠（1890-1954）因為受到高級將領紛紛投降蔣介石，同埋全部空軍叛變嘅打擊，今日被逼宣佈下野，離開廣州，前赴英國殖民地香港。呢頭反蔣，依頭就自炒！真係世事變化萬千，冇人可以估得到。上個月，蔣介石一方面暗中調動重兵於贛粵邊境，隨時同你南天王同桂系正面衝突，另一方面，蔣介石派人對兩廣軍人實施分化瓦解，實屬正常手段，去到今個月七號，廣東空軍先後有66架飛機，叛陳投蔣，廣西空軍亦有12架飛機倒戈。

到咗今日，7月18號，身空軍司令黃光鋭（1898-1985）率領部隊160幾人，駕駛62架飛機離開廣州，宣佈粵空軍全部脫離西南。同一時間，粵方高級將領亦都紛紛反叛，7月6號，粵第二軍副軍長出走香港，電請中央對西北叛變納諸正軌。7月8號，粵軍第一軍軍長余漢謀（1896-1981）秘密去南京見蔣介石，表示願意接受蔣介石命令收拾殘局，7月13號，蔣介石特派余漢謀成為廣東綏靖主任兼第四路軍總司令，節制廣東省全省軍隊。7月17號，余漢謀部隊倒戈，調轉槍頭向韶關挺進，陳濟棠立刻召開緊急會議，知道大勢已去，表示願意下野，離開廣州，實現和平，並電請中央停止派軍隊南下。

搞掂陳濟棠，仲有實力更強嘅桂系李宗仁同白崇禧，7月25號，國民政府委派李宗仁為軍事委員會常委，白崇禧為浙江省主席，打算收賣佢哋兩位停止一切反蔣軍事行動。但係李宗仁同白崇禧拒絕就職，並且決議組織軍政府，繼續反蔣，橫掂都反咗咁耐，都唔爭在繼續反埋落去。

講返陳濟棠，陳濟棠被迫出走香港後，蔣介石派將領黃鎮球（1898-1979）去安慰佢，說將來借重佢嘅地方仲有好多。此後陳濟棠即出洋考察，去遊吓埠散下心先。1937年全面抗戰爆發後，陳濟棠由歐洲回國，任國民政府委員及最高國防委員和戰略委員會委員。1940年春，更担任國民政府農林部長，1949年任海南行政長官兼海南警備司令。1950年到台灣，被蔣介石聘為總統府資政，1954年11月3日卒於台北，獲厚葬於新北投。

常公子 2022-9-30 13:56:29 陳濟棠叫得做南天王，當然唔可以講笑，主政廣東十年期間（1926-1936），被時人稱為廣州嘅黃金時代，廣州更一躍而成為南中國嘅「首善之區」同繁華大都市，人口達到112萬，當時中國除咗上海之外，廣州根本就係全國工商業最發達嘅城市，陳濟棠建設良多，廣州工商業發展蓬勃，欣欣向榮，佢先後興建各類工廠、港口、公路、大學/中學/小學等，當其時廣州百業繁榮，市政建設成績顯著，除咗市政建設，陳濟棠亦都著力發展廣東教育事業，增設大批職業學校，擴充平民學校、補習學校，創辦省立國醫學院、廣東陸軍軍醫學校等，培養大批軍醫人才。陳濟棠亦設立貧民教養院，收留老人窮人，仲興辦平民居留所，解決市民特別是貧民嘅住屋困難，真係大德。另外，對於地下秩序，陳濟棠亦有一套處理手法，對於黃賭毒，黑社會走私貪污嫖賭飲蕩吹，陳濟棠不單只冇趕盡殺絕，而且仲插手管理，用承包制度加以妥善控制，從中cap水，補貼正路生意，當然最重要係補貼軍費開銷！唔係邊有咁多錢起公路、起港口、起學校，同救濟窮人呢？廣州嘅黃金時代，市民可以隨時響官方嘅煙館中食鴉片，亦可以四圍去賭場賭錢，去妓院叫雞，市民大把娛樂之餘，政府亦大把稅收，你話烏煙瘴氣又得，百業逢勃又得，總之度度有生意做，度度有活水流通。呢個世界嘅嘢，最緊要就有生意有商機，有人搵錢有人使錢，一潭死水，遲早都會缺氧而死。

陳家一共有18個兒女。三子陳樹桓（1920-2003）係教育家，亦係1950年代香港政界人物，1959年至1967年任香港市政局議員；十子陳樹柏（1929-2013）在1994年9月在美國矽谷成功創辦了國際科技大學；十二子陳樹傑（1935-）則現為香港利苑飲食集團主席，銅鑼灣Lee Garden呀；女兒陳寶馨則在台灣創立德明財經科技大學。南天王後人，好多都同我哋香港息息相關，香港嘅珠海書院亦為陳濟棠戰後於廣州所建。

7月21號，廣東各界電請通緝陳濟棠，不過南天王已經去咗大英帝國殖民地香港避難，冇人吹得佢脹。7月22號，中共決定對地主、富農嘅政策作出適當調整，以適應新形勢。7月28號，行政院改組廣東省政府，任命黃慕松（1884-1937）為主席，蔣介石不費一兵一卒，全面接收廣東省。7月30號，李宗仁、白崇禧決定組織軍政府，推舉前廣東猛人李濟琛（1885-1959）為主席，同一日，廣東同廣西軍隊喺兩省邊界發生激戰。

今個月，據官方統計，全國22個省有200萬戶農民離鄉別井，由此可見時勢艱難。今個月，美學家朱光潛（1897-1986）《文藝心理學》出版。《南滿抗日聯合報》創刋，7月，中共中央亦由瓦窰堡遷到陝西保安縣。

1936年7月於焉結束。

#常威 #蔣介石平反系列  #佛經抄寫員 #中日戰爭 #民國歷史

常公子 2022-10-2 16:40:04 ［常威近代史］第七百二拾五回 南天王失廣東（高清錄音版）

#唔鍾意睇字可以聽

https://fb.watch/fV1_8N4Fqi/

常公子 2022-10-3 18:10:00


【常威近代史】（七百二拾六回）
球王烈士漢奸

時間線進入1936年嘅8月，8月1號，西南軍閥李宗仁白崇禧喺廣西南寧宣誓，決心抗擊蔣介石，完全冇偈傾。蔣介石搞掂陳濟棠，唔代表可以搞掂李宗仁同白崇禧，而且廣東已經落入蔣介石手上，李宗仁白崇禧坐鎮嘅廣西亦面對空前壓力，一個唔小心，分分鐘亦會玩完。今日，甘肅天水發生強烈地震，蘭州西安亦都感受到震動。強力颱風喺汕頭、廈門登陸，災情嚴重。

但係8月1號，亦係第十一屆奧林匹克運動會舉行嘅大日子，今屆奧運係德國嘅柏林舉行，當時希特拉的納粹政權正邁向高峰，依一屆奧運會，亦係希特拉向全世界展現國威嘅盛會。中華民國派出141人組成嘅代表團參加奧運會，分別參加田徑、籃球、游泳、舉重、自行車比賽，而且仲進行咗中國武術表演，但中國運動員除咗響撐竿跳一項取得複賽權之外，其餘均在預賽中被淘汰，順帶一提，今屆奧運會中，舉旗者為著名足球員李惠堂，李惠堂係中國第一個足球明星，生於1905年10月16日，1979年過身，祖籍廣東五華縣，出生於香港嘅大坑，擁有中華民國少將軍銜，李惠堂係公認嘅中國足球球王，帶領中國參加1936年柏林奧運足球賽，於第6、第7、第9及第10屆遠東運動會係冠軍隊成員。20世紀30年代上海流傳：「看戲要看梅蘭芳，看球要看李惠堂。」，可以同國寶梅蘭芳（1894-1961）相提並論，你都咪話唔巴閉。1950年代，李惠堂退休轉任職教練，定居香港，繼續於香港同台灣兩地兩邊走從事推廣足球活動。1954年與1958年兩屆亞運會中，他以教練身分率領中華民國代表隊於決賽擊敗韓國，連奪兩屆足球金牌。除此，他晚年協助創建嘅台灣木蘭女子足球隊，推動女子足球，亦於1970年代末期與1980年代初期稱雄亞洲。

8月1號，天津海關自本日起至20號止，一共查獲走私貨物20萬包，數量相當驚人。8月8號，日本浪人，即係黑社會小野菊池由唐山走私煙草2.5萬斤到天津，喺徐家莊被稅警截獲。24號，海關同公安局破獲北馬路福里一個走私倉庫，搜出私糖2000包，並響直裕商行及裕泰興貨棧緝獲私糖600包。26號，日警署長和久井率領巡警干涉中方海關扣留私貨，並且同關員華警對峙，27號，雙方議定將貨倉倉主等三人及私糖引渡給日方受理，究竟邊個執法？究竟主權屬誰？華北分離，就係要製造上述效果。8月2號，全國國糖產銷協會喺上海成立，宗旨係防止走私同埋外糖傾銷，日本走私賊製造無掩雞籠，自出自入，中國國貨產業大受打擊。

常公子 2022-10-3 18:10:11 8月2號，抗日女英雄趙一曼（1905-1936）喺黑龍江省珠河縣英勇就義，享年31歲。趙一曼本名叫李坤泰，生於四川省宜賓縣富裕家庭，原是一個大家閨秀。趙一曼係后投身革命後另取嘅一個名字，為了保守秘密，為了使親友不受牽連，她不曾讓親友知道趙一曼就係李坤泰。1926年加入中共投身革命事業，1926年10月，趙一曼考進武漢黃埔軍校六期學生，1927年9月，被派往蘇聯進入莫斯科中山大學學習，回國之後一直從事中共地下工作，1928年結婚產子。918事變發生後，曾經擔任東北人民革命軍第三軍第二團政委等職務，去年11月喺作戰時受傷被俘擄，今年6月28號喺守衛董憲勛同護士韓勇義援救下出逃，但第二日即被捕獲，行刑之前，趙一曼講：「為抗日鬥爭而死是光榮的！」

8月5號，日本軍艦76艘喺廈門海面演習，離曬大譜。8月6號，南昌受暴風雨襲擊，死傷272人。8月7號，重慶、成都開辦郵政汽車服務。同日，受日本人控制嘅王英偽軍進犯綏東一帶。王英（？ 一1950 ） ，河北順德人， 其父王同春係大地主。王英少年時就作惡多端， 青年時入馬福祥部當兵，後響馬鴻透部任排長、連長、營長、團副等職，1925 年被選為五原地區國民會議代表，1926年被委任為馮玉祥國民聯軍綏西護路司令，1927年春投靠奉系軍閥張作霖，1929年又倒向閻錫山，1930年投靠閻錫山、馮玉祥同蔣介石嘅中原大戰， 戰敗後私自逃回綏遠。1931 年投向蔣介石，被委任為騎兵第五師師長。1933年到天津與日本特務暗中勾結，後任國民黨軍第二十九軍參議。華北事變後，1936年參與內蒙德王組織偽蒙古聯合自治政府，收集舊部，自任大漢義軍總司令，率兵攻擊百靈廟，被傅作義（1895-1974）部迎頭痛擊慘敗。1939年任偽綏西自治軍總司令，直接聽命於日本特務機關，王英係綏遠地區作惡多端嘅大軍閥，罪大惡極嘅大漢奸。1945年日本投降後，被國民黨當局收編，參予國共內戰。1949年綏遠和平解放時未及外逃被捕。中華人民共和國成立後，1950年在全國第一次鎮壓反革命時被人民政府依法處決。

8月11號，蔣介石飛抵新接管嘅南方大都會廣州，研究解決廣西李宗仁白崇禧嘅辦法。8月13號，殷汝耕（1885-1947）命令冀東22個縣實施親日教育。今日，定一個漢奸蒙古德王德穆楚克棟魯普（1902-1966）喺百靈廟遇刺，唔死得。同一日，中共毛澤東致信中華民國將領楊虎城（1893-1949），勸其加入聯合戰線，共同抗日……

#常威💀 #蔣介石平反系列  #佛經抄寫員 #中日戰爭 #民國歷史

常公子 2022-10-4 18:10:42 ［常威近代史］第七百二拾六回 球王烈士漢奸（高清錄音版）

#唔鍾意睇字可以聽

https://fb.watch/fXM1H_n23W/

常公子 2022-10-6 11:36:17 【常公子歷史頻道 503回：黃金十年系列之 「做實事」=「有錢返」】

▶繼蔣介石412血腥清黨之後，寧漢分裂，去到武漢政府715分共宣言發表為止，前後只係三個月時間，原本反對蔣介石清黨嘅國民黨左派，亦都同中國共產黨劃清界線，汪精衛決定同蔣介石站於同一陣線上，一齊對付共產黨！情況令人相當惋惜，由頭到尾從來冇改變立場嘅，反而係我哋嘅國母宋慶齡，分共宣言發表當日，宋慶齡就講「如果黨內領袖不能貫徹他（孫文）的政策，他們就不再是孫中山的真實信徒」，孫文嘅政策或左傾立場，就係聯俄容共，與共產黨攜手合作，推翻帝國主義及軍閥主義，孫文只係死咗區區兩年，佢留低嘅嘢，已經冇人再記得，政治果然是一天都嫌太長。好多時候，政治人物的壽命，亦都決定咗歷史嘅走向，如果孫文長多十年命，整個中國近代史都唔會係現在我哋所知嘅情況……

⏩https://youtu.be/Y0AYt9cS-Co

#常威💀 #常威近代史頻道 #黃金十年系列  #民國歷史 #佛經抄寫員

常公子 2022-10-7 16:56:52

【常威近代史】（七百二拾七回）
蔣介石張學良貌合神離

1936年，執筆時剛剛過身的健筆李怡先生（1936-2022），就係響依一年嘅4月響廣州誕生。李怡先生誕生時，廣州係南天王陳濟棠時代，不過去到8月，廣州已經bee一聲落入蔣介石中央政府手中。8月15號，仲有兩個月壽命嘅魯迅（1881-1936）響《作家》月刊上發表《答徐懋庸並關於抗日統一戰線問題》，表示「贊成一切文學家，任何派別的文學家在抗日的口號下統一起來的主張」。魯迅提議結束4月開始嘅文藝界圍繞「民族革命戰爭的大眾文學」所引發嘅激烈爭論，不要「喊口號，爭正統」。情況亦都非常簡單，大敵當前，魯迅呼籲所有人要一致抗日，唔好再各自打飛機，要打就要擊落日本仔嘅零式戰機。不過，口舌相爭真係幾過癮，要真刀真槍上戰場，就咪搞亞叔嚕，其實當時好多人都咁諗。

8月16號，日本在華大量收頭糧食，為全面戰爭作準備。8月17號，中國科學社等科學團體響北平舉行聯合年會。8月19號，日本駐華大使川越在北平拜訪軍閥宋哲元（1885-1940），就「共同防共」及「經濟提攜」等交換意見。同一日，廣西組織「中華民國人民抗日救國政府」，即係組織軍政府，李宗仁（1891-1969），白崇禧（1893-1966），蔡廷鍇（1892-1968）分任正副主席。8月20號，蔣介石喺廣州召開國將領會議，桂系軍頭黃紹竑（1895-1966）派人前赴廣西南寧，勸李宗仁白崇禧等人就範，兩廣事變能否平息？進入實牙實齒談判階段，同一日，粵漢鐵路廣州致衡洲段通車。8月21號，日本陸軍海軍代表到達天津，召集日本駐華各地領事召開時局會議，商討下一步侵華步驟。劇情發展到呢度，日本已經全面預備大舉侵略中華民國，戰爭避無可避。8月22號，臺灣發生強烈地震，同一日，內政部統計處公佈全國耕地面積調查報告，全國耕地面積為11億6848萬畝。

8月24號，成都發生暴動，民眾抗議日本響當地恢復領事館。今個月，日本外務省照會中國政府，要求響成都恢復日本領事館。8月20號，領事野村派出四人到成都落實籌備事務，消息一下子傳開，成都市民勃然震怒，於今日發動遊行示威，你話當時中國人有幾憎日本仔？當晚，有萬幾名學生進入市區，同遊行嘅市民一齊衝擊日本人下榻嘅大川飯店，打死打傷日本人各2名，並且搗毀飯店同埋販買日貨嘅公司商號，發生暴動，軍警出動真槍實彈鎮壓，衝突中雙方互有傷亡。

常公子 2022-10-7 16:57:07 8月25號，中共中央發表致中國國民黨書，呼籲實現合作，聯合抗日。8月29號，國民政府為成都暴動事件重申睦鄰令，表示中國同日本關係仍然友好，口頭梗係咁講，不過雙方都已經做好戰爭心理準備就係真。老實講，其實打定唔打？或者幾時打？好多時候都好偶然好隨機，好多事情都可以一味靠拖，拖吓拖吓，好多嘢就會迎刃而解，所謂跌咗嘢唔好搵就係咁解，不過，拖字訣未必一定有用，有好多時候拖吓拖吓，會愈拖愈大件事。我講過，中日戰爭如果由九一八事件開始起計，其實已經拖長咗幾年，甚至乎可以講，已經拖咗幾十年，叫反日口號，都叫到第二代了，由明治天皇叫到大正，而家叫到昭和，中日之間嘅糾纏，始終都要有一個結果。

8月29號夜晚，張學良（1901-2001）派兵包圍並且查抄咗國民黨陝西省黨部，救出被關押嘅中共地下黨員馬紹周、關雨蒼，繳獲一批舉報東北軍「通共謀逆」嘅密件。今日日頭，國民黨便衣特務響西安市西北飯店先後拘捕咗北平學聯代表宋黎（1911-2002）、馬紹周、關雨蒼。宋黎響押送途中，被第17路軍憲兵巡邏隊截獲，其實宋黎一直喺張學良身邊負責聯絡國民眾抗日救亡團體，張學良聞訊大怒，拉我嘅人？邊個夠膽死？於是立刻派人將宋黎接回，夜晚黑更派兵查抄國民黨陝西省黨部！當時嘅中華民國，我諗張學良冇人敢得罪掛？第二日，張學良向蔣介石發電報，陳述內容經過，並且自願接受處罰，以退為進，又睇下你蔣介石敢唔敢處罰我張學良先？當時蔣介石正響廣州處理兩廣事件，只能忍氣吞聲，覆電報畀張學良講，此案處理雖然「殊失莽撞」，但「所請予以處分一節，應置免議」，即係齋屌。不過張學良上述包庇共產黨嘅行徑，亦都表明咗佢同蔣介石早已經貌合神離。呢個時候，中華民國國內三股最大嘅軍事勢力，包括蔣介石的中央政府，張學良嘅（40萬）東北軍，同埋李宗仁白崇禧嘅桂系軍隊，正處於衝突邊緣，大有可能上演另一次中原大戰。當然，如果蔣介石張學良李宗仁真係響呢個時候開拖，日本人就一定唔會發動全面戰爭侵略中國，睇你打生打死，旁邊執死雞好過啦，日本人1937年發動全面戰爭，反而係睇到對手有機會團結起來抗日。

8月31號，悍匪劉桂堂（1892-1943）、白堅武（1886-1937）等分別為投靠日本人嘅王英（？-1950）、蒙古軍頭包悅卿（1894-1939）等偽軍秘密招募舊直魯軍隊，送去察北接受訓練。今個月，國民黨中宣部查禁676種社會科學書刋。

1936年8月於焉結束。

#常威 #蔣介石平反系列  #佛經抄寫員 #中日戰爭 #民國歷史

常公子 2022-10-9 12:37:13 ［常威近代史］第七百二拾七回 蔣介石張學良貌合神離（高清錄音版）

#唔鍾意睇字可以聽

https://fb.watch/g22nhaP6eR/

常公子 2022-10-10 12:55:17


【常威近代史】（七百二拾八回）
魔鬼都有唔同級數

時間線進入1936年嘅9月。9月1號，國立中央圖書館喺南京開幕。今日亦係粵漢鐵路全線通車嘅大日子，粵漢鐵路全線竣工，於9月一號夜晚首次通車，由廣州黃沙出發，9月3號早上8時30分抵達武昌徐家棚，試車成功，由廣州去武漢，全程歷時44小時，l'm so sorry，相比起今日嘅高鐵嚟講當然好慢，但係當時絕對係民國時代一項偉大工程，機車為粵漢鐵路向英國所購置新式巨型機車。粵漢鐵路北起武昌，南達廣州，全長1094公里，早於1896年清帝國時代已經開始籌備興建，終於要到40年後先成為現實，中間嘅歷史嘅波折，可想而知。粵漢鐵路建設，原本由美國華美合興公司投資代建，1905年由清帝國收回自辦，由湖北、湖南、廣東三省各自籌款修築，南北分頭進行。1915年，南段築到韶關，北段於1918年築到株洲，之後因為政治混亂，水源斷絕，暫停興建，要去到1929年10後，蔣介石南京政權站穩陣腳，鐵路部喺廣州設立株韶段工程局，粵漢鐵路先至重新開工建築，到今日全線通車。

9月1號，中共中央發出《關於逼蔣抗日問題的指示》文件，文件內提出「我們的總方針應是逼蔣抗日」，一係「反蔣」，一係「逼蔣」，你睇蔣介石幾咁唔得閒。上個月25號，中共中央曾經致信國民黨中央委員會，提議在抗日嘅大目標下，實現國共兩黨第二次合作，並且表示預備在任何地點任何時間與國民黨代表進行具體實質嘅談判。響今日嘅指示中，中共中央認為「把日本帝國主義與蔣介石同等看待是錯誤的」，「抗日反蔣的口號也是不適當的」。大家都明白，魔鬼都有唔同級數，敵人都有先後之分，同一日，周恩來（1898-1976）致信CC系大佬陳立夫（1900-2001）、陳果夫（1892-1951），希望佢哋向蔣介石「更進一言」，實行聯俄聯共，槍口一致向外，共同抗日。事實上當時社會輿論嚟到今時今日，亦將矛頭直指蔣介石嘅頑固不靈，蔣介石「先安內，後攘外」嘅剿共政策，已經完全得唔到民心，尤其是知識份子嘅支持，而且國民黨陣營內部中，亦有好多人陽奉陰違，完全唔支持繼續打壓共產黨，所以我幾時都話，意識形態好重要，想法好重要。

常公子 2022-10-10 12:55:31 今日，被蔣介石中央政府接收嘅廣東，亦開展一系列厲行禁賭禁煙宣傳（冇禁娼？），之前講過，南天王陳濟棠時代，廣州百業興旺，響政府白手套控制之下，嫖賭飲蕩吹瓣瓣齊瓣瓣有得玩，將黑錢洗白用於軍費開銷公共建設，其實個概念咪等於大英帝國跑馬活動，（英皇御准）政底公開開賭，從中抽取高博彩稅用於慈善事業，市民有馬賭，政府有水返，呢啲叫雙贏局面。蔣介石接管廣東之後，就要執正嚟做，洗太平地全世界行老正，道德高地當然好高，高到幾十層樓咁高添，不過，水清則無魚，的確又係真理。經濟要活，就要多元化，黑白兼顧，正邪相融，自然貨幣流通，客似雲來；忠忠直直，肯定乞食，正正當當，遲早收檔。碌得幾十年，相信就會明白講乜嘢？其實好多時候，道德高地呢個概念只要存在就可以，未必一定要人人爬上去玩，所謂高處不勝寒，而且人類畢竟係哺乳類動物，都係適合喺地上行走喺泥漿打滾，做人最on9嘅係，你同人講道德講感情講理想，人哋同你講錢講利益，少年太天真，大概就係呢個意思。

9月2號，國民黨大員居正（1876-1951）奉蔣介石命令，前赴南寧同李宗仁白崇禧和談，雙方果然有偈傾，無謂打餐懵，李宗仁白崇禧亦早有投降意圖，不過投降之前，要講清楚條件先，呢個世界嘅嘢，好簡單嘅啫，一切都係利益交易，條件啱嘅咪走埋一齊囉，條件唔啱嘅咪分開囉，能夠做到和平分手最好，千祈唔好打打殺殺，不過，十對男女又有幾多對可以和平分手？要做到和平分手，分手後仲係朋友絕對係少數，兩個人之間愛情嘅事尚且如此，何況牽涉幾百幾千萬人、黨與黨、國與國之間嘅政治問題？

9月3號，廣東日僑中野響北海被殺，日本軍艦進入北海；同日，中國派代表參加世界和平運動大會，9月6號，全國各界救國會喺上海組織300多個抗日宣傳隊，大規模抗日宣傳展開。9月7號，中國國聯同志會派錢鍾書（1910-1998）等參加世界青年大會，9月10號，行政院通令全國各省市維持地方秩序，保護外橋，如無意外就係要保護日本人，唔好再生事端，唔好畀日本人有任何藉口食住上開打戰爭。9月11號，國民政府嘉許私立燕京大學校務總長傳教士司徒雷登（1876-1962）募款興學，該為該校先後籌得2000萬元嘅善舉，籌款2000萬，當時嚟講一定係天文數字，司徒雷登做得到，表示司徒雷登唔係普通人。9月13號，剛剛通車嘅粵漢鐵路，列車同長途汽車喺易家灣相撞，死傷20幾人，大吉利是。同日，天津南開學生20幾人被日軍逮捕。

9月17號，實業部成立農本局，處理農業問題，行政院通過北平、青島兩市發行公債籌旗經營。9月17號，根據上海《申報》報導，黃河入海道北移，縮短數十里。

#常威 #蔣介石平反系列  #佛經抄寫員 #中日戰爭 #民國歷史

常公子 2022-10-13 11:19:28 【常公子歷史頻道 504回：黃金十年系列之 陳獨秀say沙唷啦啦】

▶繼412蔣介石清黨，寧漢分裂，汪精衛所代表嘅國民黨左派，亦都背叛中共，715分共宣言發表，汪精衛亦同中共劃清界綫，國共第一次合作宣佈完全破產，孫文生前留低嘅「聯俄容共」政策亦不復存在，從此之後，蔣介石及國民黨全力剿共，種下咗國共雙方百年恩恩怨怨，影響延至今時今日。當時中共陷入生死存亡嘅困境，要負上政治責嘅的人，就係當時中共最高領導人陳獨秀，陳獨秀被認為係優柔寡斷，誤判時勢，先至將中共帶入一個前所未有嘅絕地中，陳獨秀因而被驅逐出中央最高領導位置。作為一手將共產主義帶入中國嘅奠基者之一（另一個人係李大釗），陳獨秀一直堅持只有共產主義或馬克思主義先可以挽救中國，無論身處局外抑或局外，陳獨秀始終沒有改變立場，離開中共領導層後，陳獨秀變成被舊戰友批評嘅「托派」，亦曾經被國民黨拘捕入獄，不過直接死前一刻，陳獨秀依然係陳獨秀。

⏩https://youtu.be/ld2ZQnZc9G0

#常威💀 #常威近代史頻道 #黃金十年系列  #民國歷史 #佛經抄寫員

常公子 2022-10-13 12:17:49 ［常威近代史］第七百二拾八回 魔鬼都有唔同級數（高清錄音版）

#唔鍾意睇字可以聽

https://fb.watch/g7iKFaV0cP/

常公子 2022-10-14 17:21:19



【常威近代史】（七百二拾九回）
兩廣事變平息

1936年9月17號，蔣介石同桂系嘅談判發生突破性發展，今日桂系大佬李宗仁（1891-1969）等由南寧飛抵廣州，與蔣介石會面，表示原意服從中央，兩廣事變最後平息。自從南天王失勢，響7月召開國民黨五屆二中全會上，蔣介石決定撤銷西南執行部和西南政務委員會，任命背叛南天王陳濟棠嘅余漢謀（1896-1981）為廣東綏靖主任，李宗仁，白崇禧為廣西綏靖正副主任，免去陳濟棠所有職務，當時李宗仁和白崇禧二人致電南京政府，表示接受任命。呢個世界嘅嘢，敵退我進，敵進我退，常態啫，見你咁順攤，不如玩嘢睇下你有乜嘢反應啦。

不久蔣介石改任白崇禧為浙江省政府主席，李宗仁為軍委常委，即係想調走佢兩位離開廣西，卻由前桂系大將黃紹竑（1895-1966）擔任廣西綏靖主任，負責兩廣善後工作，李宗仁同白崇禧亦唔係紙紮老虎，當然唔接受，差啲想問候蔣介石老母，咁容易俾你架空離開廣西根據地，你咪好爽皮？於是旋即召集大軍預備武力解決，廣西方面亦都組成「中華民國人民抗日救國軍政府」，一於另起爐灶，宣誓抗蔣到底。敵進，我退了……今個月6號，蔣介石被迫改任李宗仁為廣西綏靖主任，廣西仍然係李宗仁話事，白崇禧為軍委常委，黃紹竑則擔任浙江省政府主席，就係咁樣，事件順利解決，李宗仁同白崇禧繼續掌握廣西政局同桂系軍事力量，名義上叫follow你蔣介石，跟你做大佬，但實際上係各有各做。

世情亦復如是，真正嘅服從同名義上嘅服從真係爭好遠，真正嘅服從係一種血濃於水嘅親戚關係，名義上嘅服從，只係利益掛帥雇傭合約關係。咁即係點？就係打仗嘅時候，如果真正服從，上司叫你去掘地哩你就會仆去掘地雷，而且係心甘情願去掘地雷，炸撚死都係心甘命抵，光榮嘅。而雇傭合約關係，就係要大家傾清楚啲條件同利益，就算真係要去掘地雷，都未必係自願，可能只係出於被威嚇或者冇辦法。真心服從，十成工作會打出十二成功力，雇傭關係，比個七折你有賺了，所以講到尾，意識形態真係好緊要，或者操縱意識形態或想法係最緊要。

1936年9月18號，全國各地紛紛舉行集會紀念918事變五週年，不經不覺918事變已經過咗五年，日本對中國嘅軍事壓力不斷增加，中華民國蔣介石政權不斷容忍，底線一步一步後退，去到1936年，其實已經退無可退，唔攤牌，亦會遲早被蠶食殆盡，因為雙方國力，實在有天淵之別。1936年嘅日本帝國，已經成為世界上一個超級強國，無論經濟或軍事上早已經脫亞入歐，對於吞併小中國，當時日本人心目中好有可能只係小菜一碟，佢哋嘅真正目標，係要同對岸嘅強大美國爭奪太平洋嘅霸權地位，事實上，第二次世界大戰日本帝國嘅主要對手係美國，並非中華民國。

常公子 2022-10-14 17:21:45 9月18號下午5時40分，豐臺駐軍29軍張華亭營孫香亭連同日軍穗積中隊發生衝突，之後，日軍大隊長率領部隊將張華亭營房包圍，並且派兵增援，深夜12點後，華北日駐屯軍飯田電知軍閥宋哲元（1885-1940），要求29軍撤離豐臺，而且車站20里內不得駐扎正規軍，否則日軍將會「斷然行動」，至於「斷然行動」係咩？就要靠你自己估嘞！同收數一樣，「後果自負」四個字恐嚇債仔一樣。19號清晨，中日雙方代表喺豐臺日軍營內簽紙換約，日軍自行撤圍，29軍自行從豐臺撤退，日本人又贏一仗，不費一兵一卒，取得重要軍事據點。喺廣西，21號，19路軍亦全部撤出北海，理由就係本月3號，日僑中野喺北海因為同市民爭執，而被市民圍毆，仲監生打死，於是日方派遣海軍南下，堅持進入北海進行調查，遭駐防嘅19路軍拒絕，理由亦都相當充分，命案發生應該交由法庭處理，冇理由出動軍艦掛？9月15號，日本駐華大使川越向外交部張群（1889-1990）交涉，大石砸死蟹，逼使張群將19路軍撤出北海，呢個世界嘅嘢，惡就大曬，有水有炮，驚你有牙麼？更何況，日本好清楚對手根本連牙都冇……

9月20號，全歐華僑抗日救國大會響巴黎召開，全歐華僑抗日救國聯合會同時成立。9月21號，偽滿州國公佈《商租權整理法》同《商租權整理法施行令》；9月22號，毛澤東致信19路軍商定抗日救國協定，一於跳過你蔣介石。9月24號，日本擅自響蒙古包頭築建機場；9月26號，中國經濟學社第13屆年會喺上海舉行；9月27號，山西62個月發生水災；9月28號，日軍響天津地界及楊村演習，9月30號，國民政府派曾養甫（1898-1969）督辨黃埔開埠事宜。

今個月，東北抗日聯軍第8、第9軍成立。國民黨政府設立農產、工礦及貿易三個委員會。著名文學家老舍（1899-1966）嘅長篇小說《駱駝祥子》連載發表，同時茅盾（1869-1981）主編嘅《中國的一日》出版，多個文學家利用報告文學寫作模式，攝取歷史瞬間嘅日常生活碎片，借此拼接同把握中國社會全景，完成歷史敘事嘅實踐，轟動全國。另外，冀東偽自治政府實行鴉片專賣，月銷約700萬兩，中國人對鴉片嘅需求，從來冇停止過。今個月《兒童日報》即喺上海出版。

1936年嘅9月於焉結束。

#常威 #蔣介石平反系列  #佛經抄寫員 #中日戰爭 #民國歷史

常公子 2022-10-16 11:57:59 ［常威近代史］第七百二拾九回 兩廣事變平息（高清錄音版）

#唔鍾意睇字可以聽

https://fb.watch/gbeIjLIZqf/