1925年3月12日，孫中山於北京逝世，此後中國國民黨內最具實力嘅人係汪精衛（1883-1944）、胡漢民和廖仲愷（1877-1925）三頭馬車。當時胡漢民係外交部長，同年8月，中國國民黨左派領袖廖仲愷被暗殺。汪精衛、許崇智（1887-1965）、蔣介石三人組成特別委員會，以控制局勢同處理案情。在審理廖仲愷被刺案過程中，作為中國國民黨右派領袖嘅胡漢民被認為嫌疑最大，曾一度被拘留（當然到咗最後，邊個先係殺死廖仲愷嘅幕後黑手，亦根本無人知道）。同月，胡漢民出國，被派往蘇聯考察（即係被流放）。自此以後，胡漢民亦從權力高峰滑落，無力再競逐國民黨最高權力位置，之後回國，重返政壇，亦無復當年之勇，1928年9月提出《訓政大綱》、《國民政府組織法》，並任命為立法院院長，之後因為反對蔣介石獨裁統治而遭到軟禁。1931年，寧粵分裂後，一直依靠兩廣武力對抗南京「中央」，先後創辦《三民主義月刊》，組織「新國民黨」同西南聯合政府，全方位發動反蔣活動。1935年6月，胡漢民赴歐考察，暫時停止反蔣。1935年12月，響法國嘅胡漢民，仲被中國國民黨五屆一中全會選為中央常務委員會主席。今年1月回國後，繼續對蔣介石口誅筆伐，並且連同南天王陳濟棠（1890-1954）、李宗仁（1891-1969）密謀「抗日反蔣」，企圖捲土重來，東山再起。可惜好有可能諗得太多，最後腦充血死，死因有冇可疑？l am no ideas。
有好多人認為，其實世界上嘅所有政治問題，都係貨幣問題，其實呢一個觀點並沒有錯，政治經濟本為一體，完全分不開，分開嚟睇嚟講，就一定係錯！軍事學巨著《戰爭論》作者勞塞維茨（Karl von Clausewitz,1870-1931）曾經講過：「戰爭是政治/政策的延續」，而我認為，「政治就是經濟/貨幣的延續」。
【常威近代史】（七百一拾七回）
周恩來張學良見面
時間線進入1936年嘅4月，戰爭眼看無可避免，或者蔣Sir唔想打，亦知道唔夠打，不過喺形勢上，選擇權亦唔係喺中華民國手上。日本方面，政治局面亦都係立立亂，大約兩個月前，1936年嘅2月26日，日本就發生咗一件「二二六事件」，又稱「帝都不祥事件」，直頭係一場軍事政變，當日上午由磯部淺一（1905-1937）、粟原安秀（1908-1936）等年輕軍官率領嘅，以第1師團嘅第1、第2步兵聯隊為主力嘅1400名士兵軍隊，響首都東京發動咗武裝政變，部隊攻入唔同嘅政府機構，殺害咗內大臣齋藤、財務大臣高橋同埋教育總監渡邊錠太郎（1874-1936），襲擊咗侍從長鈴木同前內大臣牧野，軍人響4日內佔領咗警視廳、陸軍大臣官邸、陸軍省同埋參謀本部，仲一度佔領東京市中心。叛軍係其宗旨書上表明立場，發動政變係要清君側、除奸臣、排軍賊。
然而叛軍並未成功殺害時任首相岡田啟介（1868-1952）和佔領皇宮，佢哋亦遭到幕後高級將領拋棄，加上昭和天皇（1901-1989）對其政變行動感到憤怒等因素，進而導致叛軍無法實現政權替換，最終於2月29日繳械投降。有別於先前數次類似青年軍官刺殺政府要員從輕發落判例，二二六事件中主謀起事者多受處重刑。在歷經一系列非公開審判後，共有19名叛軍領導人物判處死刑，另有40人判監。日本陸軍中「皇道派」勢力就此衰落，日本國內曾一度流行以刺殺方式達到政治訴求嘅活動也就此終止。
你話當時中華民國政治混亂，其實日本都唔可以講笑。去到1936年踏入夏季，其實全世界度度滾瀉屎，經濟蕭條，全球大部份國家陷入水深火熱狀態，一係躺平咁死，一係奮起打一場先死，橫死掂死，睇你點揀嘞？或者更加簡單去睇件事，社會上冇嘢撈，入伍當兵自然亦係最理想不過，有公務員糧出有皇家飯食，時勢差之下，搵食艱難，人嘅要求亦都好簡單，搵份嘢撈吓，至於份嘢撈乜？要做啲乜？其實冇乜關係，出糧嗰個要做乜就做乜囉，否則餓死街頭。衹要唔駛餓死，你叫我殺人放火都可以。有時睇見紀錄片審判啲戰犯，問啲戰犯點解可以埋沒良心做事？我都覺得好奇怪，食唔飽講咩良知呢？好似身光頸靚，衣食無憂，屋企仲要有菲傭去講共產主義，睇怕好難到肉；同樣道理，冇得食去學人講良知，你估拍戲咩？記住，唔係意識決定存在，係存在決定意識。