9月4號，純粹華資嘅廣東銀行香港總行因為資金周轉不靈結業，廣東銀行（Bank of Canton）創辦於1912年2月21日，創辦人係來自美國三藩市嘅華僑李煜堂（1851-1936）、陸蓬山等人，總行設在香港中環德輔道6號，而非傳統銀號聚集嘅上環，係香港首間華資銀行。後來響上海開設分行仲得到發鈔權，從事鈔票發行業務。第一次世界大戰期間，因為金價暴跌，陸蓬山認為機會難得，趁金銀比價巨大變動之際，請准香港政府改銀本位為金本位，大戰結束後，金價回升到原位，廣東銀行資本增加近一倍，進身全國資本雄厚銀行之列。這一時期，廣東銀行業務發展迅速，1930年代，隨着西方出現經濟大衰退，廣東銀行曾兩度出現擠提。1931年，廣東銀行曾被提走高達390多萬存款，但當時平安渡過難關。J你唔死，1934年9月嚟多劑，廣東銀行再度出現擠提，被提走存款高達1,000萬元，總行及海外6家分行被迫停業。後來，該行經國民政府插手入股改組，於1935年11月23日復業，即係又畀人食埋，由前行政院長宋子文出任總經理，雖然仍稱商辦，但人事組織已面目全非。官營資本吞拼私營資本情況，之前亦都講過唔少，你嘅即係我嘅，我嘅即係我，公平丫。1942年日軍侵佔香港時又停業，1945年日本投降時復業。1988年該行被美國太平洋銀行收購後，改名為太平洋亞洲銀行。1992年，美國銀行集團與美國太平洋集團合併，太平洋亞洲銀行易名為美國亞洲銀行。2001年，美國亞洲銀行易名為美國銀行（亞洲）。2006年，中國建設銀行宣佈向美國銀行收購該行，以擴展建行在香港業務，並於2007年1月1日易名為中國建設銀行（亞洲）。
【常威近代史】（六百九十八回）
示範點將間銀行收歸國有
1935年6月28號，國民政府任命施肇基（1877-1958）為駐美特命全權大使，程天放（1899-1967）為駐德特命全權大使。6月29號，國民政府公佈《關稅公債條例》，集資一億元，千方百計，用盡各種方法填補經濟黑洞。同日，財政部嚴令停辦有獎儲蓄；同日，漢陽圩堤崩塌，萬畝農田被淹歿。
今個月，胡愈之（1896-1986）等人發起組織中國語言學會，胡愈之係浙江上虞人，中華民國及中華人民共和國出版家、社會活動家、政治人物。1933年9月秘密成為中國共產黨黨員，新中國建立後，成為第五屆全國政協副主席、第六屆全國人大常委會副委員長、中國民主同盟中央委員會代主席。日本喺多倫一帶，徵地24萬多畝，進行大規模墾牧，並且命名為「安全農村」，老實講，其實都係人民公社集體農莊模式，名相上有所分別啫。今個月中國經濟環境進一步下滑，本月上旬，浙江絲織業急劇衰退，杭州有幾百間機坊宣佈倒閉，一沉百踩，情況非常不妙。
金融體系亦都出現亂象，杜月笙（1888-1951）把持改組後嘅中國通商銀行大權，原來嘅CEO傅筱庵（1872-1940）下臺。之前，中央、中國、交通三大銀行，喺一段時間以來，積聚哇大量通商銀行發行嘅銀行券，然後突然集中向通商銀行兌現，引起擠兌風潮，孔祥熙又暗中指示中央銀行對向其借款以渡過難關嘅傅筱庵不予理睬。於是，通商銀行即將倒閉嘅流言四起，存戶紛紛前往提款，閙擠提，響內外夾攻之下，一直為民辦嘅中國通商銀行被迫接受官股入股，即係落入中央政府官僚資本嘅控制之中。去到呢度，上海嘅官僚資本吞拼咗中國通商等三家私營銀行，掌握全國紙幣發行額嘅88%！一場終極嘅金融完美大風暴，亦都開始醞釀發生。
時間線進入1935年7月，山雨欲來。7月1號，上海市實施強迫識字教育計畫；郵政儲金匯業總局併入郵政總局，改稱郵政儲金匯業局；《婦女生活》月刊喺上海創刊；今日，英國殖民地香港當局開始承認中國船員證書，華船過港，可以喺香港出售客票，今日海關亦開始續征5%嘅附加稅。7月1號，三級三審嘅《法院組織法》開始施行，首期實行嘅魯、皖、蘇等省增設高等法院29所，合共原有一共59所，增設或改設嘅地方法院117所，合共有178所。1932年10月公佈嘅《法院組織法》，將法院分為三級，即設在縣或市嘅「地方法院」，設在省或特別區或首都或院轄市嘅「高等法院」，以及設於國民政府所在地嘅「最高法院」，各級法院設置院長及民事、刑事庭，庭置庭長同推事若干人，負責案件嘅審判工作，法院嘅三級制，喺現在嘅香港亦都相同。