其實同一時間亦有經濟方面嘅原因發生，當時英國財務部派遣特使前往中華民國，干預中國貨幣制度改革，日本對此感覺相當焦慮，英國早響1935年6月上旬，任命李滋羅斯（Sir Frederick William Leith-Ross，1887-1968）為英國駐華大使館經濟顧問，李滋羅斯當時曾經同日本人進行會談，並且建議佢哋喺中國創建一間有力嘅中央銀行，獨佔貨幣發行權，並且將發行貨幣同英鎊掛鉤（聯繫匯率），同事提議讓中國承認滿洲國，讓滿洲國分擔中國巨大負債中嘅適當比例，不過上述建議冇被日本外務省積極回應。當時政治經濟嘅複雜鬥爭，其實參與者同持份者，並唔係單單係積弱嘅國民政府同埋凶暴嘅日本帝國，仲有好多人（紳士），想喺側邊執死雞……
常公子
2022-6-23 10:51:40
【常公子歷史頻道482回：黃金十年系列之 My aim is money shanghai】
▶今集內容繼續描述蔣Sir嘅北伐戰爭，勢如破竹，眨吓眼佔領湖南全境，兵臨武昌城下，矛頭直指直系軍閥吳佩孚，北伐軍嘅誓師口號係——「本國民軍之目的，以國民黨之主義喚起民眾，剷除賣國軍閥，打倒帝國主義，追求中國之自由獨立。」——吳佩孚同孫傳芳就係賣國軍閥，就係帝國主義者嘅白手套，非要打倒不可，that is ture。任何戰爭都要有一個口實或理由，正如任何反動勢力都必須有外國勢力向背後撐腰一樣，世界上沒有不吃糧的雞，正義從來都祇不過係「立場」問題，呢個世界無百分百嘅「中立」狀態，當然，有立場並無問題，每個人都有立場，而且好多人（其實係大部份人）嘅立場根本只係一個字：「錢」。
上回曾經講過，為咗解決中日之間全面戰爭嘅爆發，英國曾經派出著名經濟學家李滋羅斯（Sir Frederick William Leith-Ross，1887-1968）來華，希望向雙方作出調停，李滋羅斯曾經到訪日本同首相會談，甚至提出個極之大膽嘅方案，例如提議日本喺中國成立中央銀行，處理發行同英鎊掛鉤嘅貨幣，交換條件係西方承認偽滿洲國嘅合法地位，亦希望偽滿洲國承擔中國龐大債務嘅其中一個部分，講嚟講去，英國人大約都係驚已經窮到褲穿窿嘅中華民國冇錢還啫。響局面上佔有絕對軍事上風嘅日本，亦無視和事老李滋羅斯所提出嘅調停方案，中華民國方面，去到1935年嘅11月，堅決實行幣制改革，強硬管理貨幣流通，要求華北地區擁有現銀要運到南方嘅國民政府手中，皆因中央冇錢。不過日本方面認為現銀南運會損害華北經濟嘅自治能力，決定六間日系銀行拒絕交出手頭嘅現銀。經過《秦土協定》同《何梅協定》之後，關東軍嘅華北分離工作已經清楚體現出嚟，其實大規模嘅侵略行動已經響1935年開始。
【常威近代史】（六百九十三回）
國難當前 講係冇用嘅
時間線進入1935年嘅5月，5月1號，孫中山像郵資明信片開始發行，國父地位一歩一步鞏固。歷史本身，就係一種敍事嘅過程，所謂「敍事」，就係「講古」（唔係港股），講古即係說故事，有時間，地點，人物及情節。不過開始講故事嘅時候，我哋早已經預設咗一大堆立場，或身處一個既定嘅「世界觀」之內開始敍事，而每一次嘅敘事，由於我哋參與其中敘事，故事本身都會出現極微細嘅變化，可能係0.0000001%都未定，不過無論點都好，歷史就係咁樣不斷被不同敘事者去改變其本質，逐步逐步偏離真相，因為「我們建構故事時，便在發明自己」，呢個係哲學詮釋學觀點，其實真相一啲都唔重要，最重要嘅係我哋點樣發現真相同認識真相，更有甚者，係我哋點樣去利用所發現、或被重新發明嘅「真相」去建立一個實際應用於處世嘅世界觀同價值觀。
5月1號，西蘭公路建成通車，全長753公里。5月2日，天津日租界《國權報》社長胡恩溥（1884-1935）響日租界壽街北洋飯店遭到不明身份槍手槍擊，身中四槍，隨後他被送往醫院搶救，但因傷勢過重，於5月3日清晨逝世，享年51歲。同日，《振報》社長白逾桓（1876-1935）也響日租界住宅中遇刺身亡。浙江人胡恩溥，曾經喺石友三（1891-1940）、張宗昌（1881-1932）部下任幕僚多年；白逾桓原籍湖南，係同盟會嘅元老級人馬。兩個人立場親日，均受日本人資助，受命建立傳媒，宣傳日本人嘅「泛亞細亞思想」，即係宣傳日本人「大東亞共榮圈」，中日一家親，冇分彼此（你嘅即係我嘅、我嘅即係我嘅）嘅「合邦」思想，一般推測，兩人係比不滿其親日立場嘅人所殺（鋤奸），其後，日方派出日本駐天津總領事館和憲兵隊搜捕人犯，於5月底査明兩事件均係藍衣社所為，這兩宗暗殺事件被稱為「河北事件」，亦成為咗華北事變嘅導火線，牽一髮動全身！
所謂華北事變，是指繼九一八事變東北淪陷之後，1935年開始日本侵略蠶食侵犯華北地區嘅一系列事件統稱。
5月4號，日警武力查封柳關媒礦公司產業。同日，雲南省政府機關報《雲南日報》響昆明創刊，5月5號，著名慈善家陳家庚（1874-1961）因為捐資助學功績顯著，被國民政府授予二等采玉勛章。同日，冤獄賠償運動委員會喺蘇州召開第一次會議，上海、天津、杭州等地委員20幾人到會，由沈鈞儒（1875-1963）擔任主席。1933年6月，響中華民國律師協會第五屆代表大會上，沈鈞儒提出《請立法院即行頒制冤獄賠償法案》，但係政府完全唔理佢，1934年，全國律師協會第六屆代表大會召開，鑒於政府司法當局對冤獄賠償案態度冷淡，於是會議決議組織冤獄賠償運動委員會，沈鈞儒係主要成員之一，冤獄賠償運動委員會第一次會議討論通過咗《冤獄賠償法草案》，當時嘅冤獄何其多？亦都唔使再多講。