常公子 2022-1-6 12:48:11 【常公子歷史頻道441回：替大軍閥平反系列之 八方風雨會中州】

♊ 明日防疫措施又再收緊，六點後冇堂食，體育場館同泳池要關閉14日，真係慘。冇得做運動，全因為omicron！今次失守，全因為機組人員四圍走，不過都唔可以怪佢哋，人哋都係人，而且 貨物流通唔可以停止，加上omicron傳播能力極強，你睇歐洲一日可以幾十萬感染，唔通香港可以避免？一隻可以經由空氣傳播嘅病毒，其實冇辦法可以預防咁滯。

♉幸好，omicron其實殺傷力一啲都唔高，主要集中喺上呼吸道感染，好少攻擊肺部，因此致命率好低，希望一直沿用嘅病毒理論有效，病毒會隨住每一次嘅變種而降低其威力，變多幾次，就會玩完。如無意外，所有人唔係驚omicron，而係驚送入竹篙灣檢疫或過年。去到2022，真係抗疫疲勞，究竟抗緊乜？我都唔清楚，「與病毒共存」 應該冇可能； 但係如果附上極大嘅經濟代價或喪失個人人身自由去嚴守病毒嘅蔓延，又好似做多咗咁，又好似成本太高。老實講，我自己都好迷茫。

♉世間上，原來有啲嘢，開咗個頭就好難收科，而且世間上亦冇人能夠「預測未來」，因此技術分析及所有預言皆是廢話，萬物離散、充滿偶然性先係真象，鬼唔知2003年買樓會發達？鬼唔知2010年買比特幣已經上咗太空？跑完馬，當然知道賽果係乜？未跑之前，其實亦都冇人知。疫情進入第三個年頭，全人類仍然莫衷一是，2022年嘅疫情發展，亦有好多講法。冇辦法，其實真相係冇人知……


🎦https://youtu.be/P26KAbc9pS4

常公子 2022-1-7 01:17:53 ［常威近代史］第六百三十二回 日本萌生推出國際聯盟念頭（高清錄音版）

#唔鍾意睇字可以聽

https://fb.watch/amTpNq2rq-/

常公子 2022-1-7 14:44:58

【常威近代史】（六百三十三回）
保聖寺18羅漢

時間線進入1932年11月，11月2號，教育部公佈幼稚園、小學課程標準。11月3號，蚌埠鹽業職工罷工反對政府壟斷鹽業，鹽業問題喺中國歷代都係重要社會問題，響味精未發明、化工工業未普及前，鹽係人類生存嘅必需品，究竟係公營定私營？歷代以來引發過唔少問題。11月5號，東北民眾抗日義勇軍襲擊南滿鐵路十家堡車站，打死日軍5名，兼焚燬車站，依類嘅衝突每一日都發生，仇恨不斷累積，終於響之後演變成中日嘅全面戰爭。11月9號，大連汽船株式會社開闢由大連通往長崎、基隆、高雄嘅定期航班。11月10號，中央銀行增設匯兌局，辦理對外匯兌事宜。

11月11號光棍節，由李鴻章（1823-1901）創辦嘅招商局正式更名為國營招商局，由劉鴻生（1888-1956）出任總經理。劉鴻生有中國「煤炭大王」、「火柴大王」、「企業大王」之稱，佢係白手興家，屬於商業奇才。1930年10月28號，行政院命令將招商局收歸國有，之後，為咗響招商局建立同鞏固國營制度，國民政府喺體制、人士同埋財務方面進行咗一系列嘅重大變動。當中包括，取替董事會制度，撤銷過渡時期嘅監督署機構，建立理事會、監事會及總經理制度，並且制定咗《招商局暫行組織章程》、《監事會暫行章程》及《理事會暫行章程》等等。並且規定招商局為「國營事業，直轄於交通部」。其二，切換原本招商局全部人馬，除咗委任劉鴻生擔任總經理，史量才（1880-1934）、張嘉璈（1889-1979）、杜月笙（1888-1951）等七個人任理事會常務理事； 胡筆江（1881-1938）、李銘（1887-1966）等八人為理事； 盧學溥（1877-1956）、陳光甫（1881-1976）、虞洽卿（1867-1945）等九人為監事會監事。上面好多名字，大家都耳熟能詳，就係所謂江浙財閥集團，不過將戰利品派俾自己友享受，其實係天經地義嘅事，唔需要奇怪。其三，採用低價收購嘅辦法，由官方將招商局股權逐步收回。經過兩年多時間嘅預備，全體理事、監事及總經理於今日就職，國營招商局正式掛牌上市。

常公子 2022-1-7 14:45:10 11月12號，蘇州吳縣保聖寺古物館開舉行開館儀式。保聖寺位於江蘇省蘇州市吳中區離蘇州市以東19公里嘅一個有2500年歷史小鎮，保聖寺原藏有18尊唐代開元名家、有「塑聖」之稱雕塑家楊惠之所塑嘅羅漢像，被譽為係楊惠之巔峰究極之作，大雕塑家楊惠之與唐代「百代畫聖」吳道子（685-759）齊名。1922年，著名歷史學家顧頡剛（1893-1980）發現羅漢像殘破，向各界呼籲搶救中國歷史珍貴文物。蔡元培（1868-1940）、胡適（1891-1962）及商務印書館高夢旦（1870-1936）等人均全力響應。1928年，收藏家葉恭綽（1881-1968）發起成立「唐塑保存會」，開始對保聖寺18尊羅漢像嘅修復工作，並決定係原址建造一座全新嘅古物館，羅漢像嘅修復工作主要由雕塑家江小鶼（1894-193.）及助手滑田友（1901-1986）負責，大名鼎鼎嘅大畫家徐悲鴻（1895-1953）、劉海粟（1896-1994）等亦都參與同獻策。最後，18尊羅漢像修復9尊，算係救返一半。建築史家梁思成（1901-1972）論及保聖寺羅漢塑像時寫道：「此種名手真跡，千二百年尚得保存，研究美術史者得不驚喜哉！此像於崇禎間曾經修補，然其原作之美，尚得保存典型，實我國美術造物中最可貴者也」，1961年3月4日，保聖寺羅漢塑像列入中華人民共和國國務院批准嘅國家級文物第一批全國重點文物保護單位；1988年著名畫家吳冠中（1919-2010）根據保聖寺羅漢塑像創作《羅漢居》，2011年，《羅漢居》以1840萬成交。

11月12號，綏遠首次產馬比賽會舉行開幕典禮，前往觀看嘅人達到萬人，當地學校全部放假，准許學生前去觀禮。產馬比賽會場設在城北，跑馬道長三公里，中分段設有電話。因蒙旗方便交通不便，比賽通知難以如期送到，各旗大多不知道有此次賽事，而且不少旗地方心存憂慮，恐怕比賽結束後，優勝嘅馬匹會被省政府充公，所以此次參賽馬匹不足200匹。雖然參賽馬匹有限，但係觀眾嘅熱情仍然好高，大會以蒙文、漢文兩種文字印製咗多種宣傳品，令到活動增加不少氣氛。最後決賽共取20名，烏盟西公旗產馬先拔頭籌，獲奬金500元； 第二名是包頭產馬，獲獎金200元；歸綏產馬名列第三，獲獎金100元。

11月15號，實業部宣佈取替日本式度量衡制；11月16號，偽滿洲國廢除中國通用時間，所有時鐘撥後26分鐘！至於理據係乜嘢？我並唔知道。11月18號，實業、財政、鐵道三個部門，商討救濟國產煤炭辦法，決定對外國煤炭入口加微傾銷稅； 11月20號，國民政府出席軍縮會議首席代表顏惠慶（1877-1950）同蘇聯外交人民委員會李維諾夫（1876-1951）喺日內瓦秘密商定恢復中蘇外交問題。

#常威💀 #蔣介石平反系列  #中日戰爭 #民國歷史 #佛經抄寫員

常公子 2022-1-9 15:09:49 ［常威近代史］第六百三十三回 保聖寺18羅漢（高清錄音版）

#唔鍾意睇字可以聽

https://fb.watch/aqgV29H90q/

常公子 2022-1-10 17:50:47

【常威近代史】（六百三十四回）
平頂山慘案

1932年11月18號，國民黨中常會通過決定，由下個月一號起，將中央黨部、國民政府遷回南京，並確定洛陽行都，西安為陪都。一二八事變爆發，國民政府遷都洛陽，好簡單，淞滬戰爭爆發，日本攻打上海，一個唔小心，南京即刻玩完又得，慢慢玩完又得，得咗！當然要著草嚕！5月，《淞滬停戰協議》簽字，淞滬戰爭結束，對南京嘅威脅隨之解除，政府各個部門之行政工作基本上已經陸續遷回南京進行。因此，部分中常委向國民政府建議，於下月15號三中全會召開前，將政府各個部門正式遷回南京，以正視聽，同時仲提議確定西安為陪都，洛陽為行都，老實講，都係方便隨時著草，隨時隨地可以轉移權力中心之措舉。

國聯行政會開會，中日雙方代表展開舌戰唇槍，當然係關於滿州國嘅問題，同日，大同新聞社喺南京成立。今個月，擴建後嘅中央廣播電臺亦開播，中央廣播電臺創辦於1928年，係重要嘅大氣電波官方喉舌，最初只有500瓦電力嘅中央發射機，擴建後發射機功率增至75000瓦，基本上，全國都可以聽到中央電臺嘅廣播。（ 當然大前提係你要有部收音機，AM收音機）； 11月23號，松江《松報》因為刋登調查讎貨新聞，讎貨即係日本貨，講吓都唔得，摸吓都有罪，《松報》被勒令停刊，戰爭狀態中，一步都唔能夠蝕，言論自由通通被收緊。11月24號，一啖砂糖一啖屎，國民政府頒佈大赦令，全國有3258人被赦，有2139人獲減刑。11月25號，上海社會局發表128事變損失統計，估計合共損失高達1.9億元，國仇家恨，就係咁解。

11月26號，河南災民有四、五千人乘專車由北平前赴南京，在太安被扣留，首都當然唔係咁容易俾閒雜人等進入。11月27號，太原山西大學等大學生，要求生活費掀起學潮，原來可以向政府伸手攞生活費架？供著數嘅咩？不過如果政府冇錢，就搞乜嘢都冇用。正如一個債仔向債主追債，如果債主真係冇錢或冇樓，咁追嚟都係嘥氣，分分鐘連追數嘅成本都要蝕埋，你估搵人淋紅油鎖鐵閘唔使畀錢？11月28號，國民政府水災救濟會喺南京舉行江、淮、漢運堤工程落成典禮； 11月29號，行政院會議決定調抗日名將蔣光鼐（1888-1967）任福建省政府主席，蔡廷鍇（1892-1968）任福建綏靖公署主任，再提一提大家，蔣光鼐及蔡廷鍇都係1934年「閩變」嘅主角，之後將福建分裂出蔣Sir嘅中華民國。11月30號，國民政府鐵路部命名即將建成的隴海路東端海港為連雲港；同日，山東濟南發生學潮，萬幾名學生到省政府請願；同日，國民黨中央政治會議決定，特別任命王用賓（1881-1944）為考選委員會委員長。

常公子 2022-1-10 17:51:03 時間線踏入1932年12月，12月1號，巴拿馬國會通過禁止華僑移民入境法案。點解中國移民咁唔受歡迎？我都唔明白，要check check！12月2號，陸軍工兵學校喺南京成立。12月3號，蔣Sir 致電國聯中國代表，鄭重否認中日直接交涉；同日，根據《大公報》報導，偽滿州國響東北實行「五家連坐法」及「良民證」等制度。12月4號，國民黨中央軍委會組織要塞檢閱委員會，並且決定檢閱辦法五項，同日，上海舉行萬國競走賽，中華隊獲得冠軍。同日，東北戰火連天，日軍猛烈進攻海拉爾，東北義勇軍蘇炳文（1892-1975）部隊彈盡粮絕，通電撤軍，軍民4000餘人退入蘇聯境內，12月7號，抗日嘅馬佔山部隊亦被迫退入蘇聯境內，918事變發生後，長江九號馬佔山任黑龍江省代主席，曾經率領500騎兵同日軍激戰於中東鐵路嘅嫩江橋畔。今年2月，日軍攻佔哈爾濱，馬佔山應邀前赴瀋陽同日方談判，「滿洲國」成立後，馬佔山被任命為軍政總長兼黑龍江省省長。4月，馬佔山撥亂反正，響黑河舉兵反日，通電全國繼續抗日，並向全世界揭穿偽滿洲國內幕。7月27號，日軍喺慶城附近藉助濃霧伏擊馬佔山隊部隊2000幾人，馬佔山率領少數殘部突圍入山，10月繞道到達札蘭屯同蘇炳文匯合。

蘇炳文原任呼倫貝爾警備司令，每年9月組織鐵血救國團，旋任東北民眾救國軍總司令，與副司令張殿九（1882-?）率領5000幾人，聯合馬佔山舊部會攻齊齊哈爾，不久戰敗。本月9日，蘇聊政府否認引渡蘇炳民至日方嘅傳言，並且已經准許其率領全體軍官前赴歐洲，之後衆人到歐洲打了一個白鴿轉折返中國，繼續投身抗日事業。

12月6日，日本製造「平頂山慘案」，屠殺中國村民2700餘人。滿洲國建國後，東北民間反滿抗日活動增多。1932年9月15日反滿抗日游擊隊「遼寧人民自衛軍」襲擊撫順煤礦。響撫順居住嘅日橋有5人死亡，第二日，日本憲兵響平頂山附近居民家中搜查到15日襲擊時被盜嘅物品，根據依一個發現，撫順守備隊40名隊員決定對平頂山周圍居民進行屠殺，至於佢哋係唔係游擊隊成員？則冇人理會。平頂山附近村居民被迫全部集合在山崖下，包括老人，婦女同孩子，全部被機關槍掃射屠段，部分掃射時倖存村民被守備隊員用刺刀捅死。守備隊將屍體焚燒處理，並用黃色炸藥爆破山崖，進行掩埋，將全村五百多戶八百多間房屋，平頂村夷為平地。著名的歌星李香蘭（山口淑子，1920-2014）當時就響撫順居住，時年12歲。六十幾年後她重訪中國，在平頂山萬人坑前，面對骸骨慘狀傷心落淚……

#常威💀 #蔣介石平反系列  #中日戰爭 #民國歷史 #佛經抄寫員

常公子 2022-1-10 17:51:14

❤【常威近代史】第一部《大清亡國關慈禧蛋牛治》，全面開放，免費下載， #freedownload！

Free下載連結🔽

https://play.google.com/store/books/details?id=C3hjDwAAQBAJ

常公子 2022-1-11 21:47:06 ［常威近代史］第六百三十四回 平頂山慘案（高清錄音版）

#唔鍾意睇字可以聽

https://fb.watch/atgW6sQGUg/

常公子 2022-1-12 14:33:40


【常威近代史】（六百三十五回）
中蘇恢復邦交

1932年12月6日，四川軍閥劉湘（1890-1938）與劉文輝（1895-1976）激戰，12月10號，劉文輝退出成都；同日，國聯特別大會開幕，討論中日東北問題，中國代表顏惠慶（1877-1950）發表對國聯調查報告書嘅意見，提出解決爭端嘅四點要求。12月15號，國聯特別委員會通過由英國、法國、捷克、西班牙、瑞士五國起草嘅決議草案，宣佈以國聯調查團報告為調解基礎，以19國委員會為調解委員會。但係草案既未規定製成最後報告書嘅限期，更無阻止日本侵略東北嘅具體措施。12月17號，中國代表要求對草案進行修改。件事傾到1933年，1933年2月，國聯大會以42票贊成，1票反對通，過特別委員會所提出《國際聯盟特別大會關於中日爭議報告書》，如果冇估錯，嗰1票反對票，應該就係日本自己。

中日雙方響大會上拳來腳往，中國代表陳述咗軍閥喺日本嘅橫行（軍國主義，軍人奪權），更指出中國比日本嘅財政狀況更為堅挺（？），日本方面將中國抵制日貨看成是嚴重的國際罪行，但中國方面將抵制日貨看作是「對抗不正當攻擊的報復手段」，係為咗中止、糾正國際不法行為而採取嘅強制行為，即使侵害咗對方國家同國民嘅權利亦都唔算違法。公道自在人心，最後睇投票結果，everybody就一清二楚。日本企圖將侵略東北、同扶植偽滿洲國政權行為正當化同合理化，希望得到國際社會嘅認同，但係全世界除咗日本之外，似乎冇人認同日本，多年以來，日本對中國種種嘅行徑，所有人都睇得到喺赤裸裸嘅侵略行為。今次國聯特別大會，其實是國際社會整體聲討日本侵略中國嘅宣言，雖然無任實際何約束力，但係經過今次國聯特別大會，日本知道自己已經成為國際社會嘅獨家村，更加堅定退出國聯嘅決心，同時響會議舉行期間，亦對中國熱河省發動新一輪嘅侵略戰爭（前述過）。

常公子 2022-1-12 14:33:53 12月8號，蔣Sir對鄂、豫、皖三省原紅軍根據地嘅13個縣行經濟控制，命令籌設農民銀行。12月8號，49歲嘅英國倫敦佛教友會副會長包樂登喺北京受戒，包樂登係鬼佬，受戒之後取法名為「性如」，其受戒證書由居士林董事會主席朱慶瀾（1874-1941）親自簽署。朱慶瀾亦係一個非同小可嘅人物，整個中國近代史，亦會發現到大量佢嘅蹤跡，佢曾經任職地區行政長官，上過戰場，亦對推動佛教同慈善事業不遺餘力，而且仲係《義勇軍進行》嘅命名者，中日戰爭爆發，朱慶瀾堅決抗日，組織抗日後援會，出任東北義勇軍總司令。為救濟戰爭受難者以及保護文化財産等而四處奔走。1936年,朱慶瀾出任國民政府賑務委員會委員長。1939年為救濟戰爭受難者，他展開咗陝西省開墾事業。對於其活動，中國國民黨與中國共產黨均給予高度評價。

12月12號，中國代表顏惠慶同蘇聯外交人民委員會李維諾夫喺瑞士日內瓦交換復交照會，宣佈兩國政府恢復外交關係。1917年俄國革命之後，列寧曾經宣佈廢除中俄間一切不平等條約，1924年5月，兩國簽訂《中俄解決懸案大綱協定》，制定中東鐵路協定，始建邦交，同時，孫文亦都確立「聯俄容共」嘅政策。1927年4月6號，張作霖派軍警搜查蘇聯大使館，拉人封艇，中蘇邦交幾乎中斷。1927年12月14號，南京國民政府以蘇聯人參與廣州起義發表《絕俄令》，蘇聯駐中國各地領事館先後關閉，1929年7月，中蘇因中東鐵路戰爭，正式斷絕外交關係。1930年5月，中東鐵路督辦莫德惠（1883-1968）前赴莫斯科與蘇聚方面商討解決中東鐵路問題，但冇結果，而且拖咗好耐。去到中國東北淪陷，中東鐵路被日軍破壞，中蘇重開談判，決定恢復邦交。因為中蘇大家都有共同敵人，就係日本人。日本人響東北建立「偽滿洲國」，除咗實踐佢哋最中國嘅侵略野心，同時間亦都嚴重威脅蘇聯領土安全，唇寒齒亡，世界上冇永遠嘅敵人，亦都冇永遠嘅盟友，大家都係講求利益，必須要明白，所有嘅外交關係，都係建基於「利益」之上。

12月14號，國民黨中央建設西北專門教育籌備委員會成立，于右任（1879-1965）、戴傳賢（1890-1949）、張繼（1882-1947）常務委員；同日，《大公報》報導，偽滿洲國實行鴉片公賣，成立專賣公署並開始營業，鴉片生意喺當時係大生意，因為實在有太多人吸毒，以全國四億人口計算，最粗略估計至少有5000萬人口有毒癮，你話生意有幾大？我完全唔能夠想像。

12月15號，國民黨四屆三中全會喺南京開幕，到會人數有102人，于右任為主持，上海、廣東兩方面均無代表參加。會議決定召開國民參政會，以籌備國民大會，並且擬定咗1935年3月召開國民大會，會議亦都通過《整理本當實施方案》、《確定教育標準與改善制度案》、《開放米禁勵行積谷案》、《恢復農村經濟改進青年思想以謀赤區線後徹底辦法親》、《救濟陝災案》等17個方案。參加三中全會嘅中執委又呼籲黨員以「義」為重，鞏固黨基，並主張聯合英國、美國、恢復中蘇邦交，以抗日為主要外交方針等等。


#常威💀 #蔣介石平反系列  #中日戰爭 #民國歷史 #佛經抄寫員

常公子 2022-1-13 12:32:19 【常公子歷史頻道442回：替大軍閥平反系列之 孫文和陳炯明之間的恩恩怨怨】

♊養父的喪禮辦好了，心安如海，想起過去幾年，陪他走完生命最後幾年，現在終於到了終點，對他來說，應該是一種解脫。幾年前患上腦退化症的養父，最後兩年，衹能夠躺在床上，經常意識不清，最後階段連我都認不到，他生前是一個活潑好動的人，喜歡走來走去，朝朝飲早茶，食煙飲酒賭馬大大聲講粗口，最後要他躺在床上，一動也不能動，起居飲食都要他人照顧，相信他自己都不開心，現在走到彼岸，希望他在彼岸，再能夠活動自如，繼續食煙跑馬。

♈養父最後的日子在北角一間護老院渡過，在此非常感激護老院的員工照顧他多時，無言感激。因為順路，我有一個習慣，就是時常乘巴士回家的時候，總會在北角落一落，上去看一看他，有時候只是匆匆幾分鐘或幾十秒，摸摸養父的頭，再離開護老院搭車回家。這個習慣好像維持了很久，現在巴士經過護老院，我已經不需要下車，因爲我要看的人已經離開了。老實說，我真的有點不習慣，如果可以給我選擇，我希望每天都能夠在護老院前落巴士一趟。

♋其實我不傷心，也不傷感。養父得到解脫，應該是一樁大喜事。不過，心情總有點異樣，我自己稱呼「失神」，好像一塊大拼圖，有一小塊丟失了，永遠再沒法找回來，大拼圖也永遠再沒法保持完整那種感覺，前一天，我失神得把銀包留在茶餐廳裡，幸好之後能夠完璧找回，都是一個失神的表現。可能，我的心情其實和養父去世無關，祇不過是疫情嚴重，泳池又關閉吧？

🎦https://youtu.be/4S1hO3v0lOo

常公子 2022-1-13 23:11:51 ［常威近代史］第六百三十五回 中蘇恢復邦交（高清錄音版）

#唔鍾意睇字可以聽

https://fb.watch/av_ETeqfKJ/

常公子 2022-1-14 21:36:29

【常威近代史】（六百三十六回）
門羅主義

1932年12月15號，《中美公斷條約》 響美國華盛頓換文，是日正式生效。1930年6月27號，《中美公斷條約》 由南京國民政府公使伍朝樞（1887-1934，伍廷芳個仔）同美國國務卿史汀生（Henry Lewis Stimson，1867－1950）喺華盛頓簽署。金年9月24號，國民政府批准咗呢條條約。條約規定，中華民國同美國之間，如果遇到有不能以外交方式解決，或經交付永久國際委員會仍不能解決嘅國際事項爭執，應交付海牙永久公斷法庭或其他相當裁判機關予以公斷； 但若然牽涉締約國內政、第三國利益、美國門羅主義（Monroe Doctrine）之維持、中國依照國際盟約應盡義務之履行者，則不在此列。《中美公斷條約》簽署生效，進一步加強咗南京國民政府同美國政府嘅關繫。

講講乜嘢叫門羅主義先，門羅主義係美國總統詹姆士·門羅（James Monroe，1758-1831）嘅一種思想觀點，係一項關於美洲大陸控制權嘅美國外交政策基礎。表明美國政府認為歐洲列強不應再殖民美洲，或涉足美國與墨西哥等美洲國家之主權相關事務。而對於歐洲各國之間嘅爭端，或各國與其美洲殖民地之間嘅戰事，美國應保持中立。相關戰事若發生於美洲，美國將視為具有敵意之行為。這是美國涉外事務之轉捩點，直到世界大戰爆發先有所改變。直到19世紀末葉，「門羅主義」被視為定義美國基本外交政策嘅起始點，亦係持續時間最長嘅意識形態之一。以後好多美國政治家都曾援引該聲明，去到20世紀80年代美國總統朗奴列仲會引用「門羅主義」嘅基本美國意識形態。簡單啲嚟講，「門羅主義」 就係一種以美國利益行先嘅自保意識形態，門羅主義陳述三個要點，第一點，歐洲各國不能再以任何美洲國家為殖民地。其次，在外交政策上行使華府方面原則，即美國僅在本身利益受損嘅前提下，先可以介入歐洲事務。第三，美國視任何殖民美洲嘅企圖為對美國之國安威脅。美國總統老羅斯福（Theodore Roosevelt Jr，1858-1919）總結以上三點並加入一項陳述：「溫言在口，大棒在手。」(Speak softly and carry a big stick.)，即所謂「巨棒外交」。大家明白未？去到今時今日，「巨棒外交」仍然照用緊，當然「big stick」可以變成「Fat Boy」，即係原子彈。

大愛還大愛，普世價值還普世價值，自身利益先係最重要嘅考量，希望大家明白，亦希望大家理解。其實做人都係一樣，「自私」冇錯，首先考慮自己利益行頭，其實100%正確！就好似香港人一樣，口講和平與愛推己及人乜乜物物（Speak softly），但一講到自己層樓或樓價切身利益，就要一步不蝕。我諗，正正就係「門羅主義」嚕！除非唔係。

常公子 2022-1-14 21:36:41 12月17號，國民政府命令，國難當前，各機關停止慶賀新年。同日，宋慶齡（1893-1981）、蔡元培（1868-1940）、楊杏佛（1893-1933）、魯迅（1881-1936）等人喺上海發起組織中國民權保障同盟，籌備委員會會議通過咗《中國民權保障同盟宣言》，推選咗我哋嘅國母宋慶齡為同盟總會主席，偉人蔡元培為副主席，楊杏佛為總幹事，會員多數為科技、文教、新聞、法律界著名人士，高級知識份子，總會設於上海。宣言稱中國民權保障同盟目的為：第一，為國內政治犯嘅釋放、同埋非法拘禁、酷刑及殺戳嘅廢除而奮鬥；第二，給予國內政治犯法律及其他援助，並刊佈關於國內壓迫民權嘅事實，以喚起社會嘅公正同關注；第三，協助爭取結社集會自由、言論自由、出版自由等民權而努力。

12月18號，中蘇恢復邦交後，蘇俄研究所喺南京成立，陳立夫（1900-2001，長命王）、張冲（1903-1941）、康澤（1904-1961）等為幹事。12月19號，財政部實行開弛米禁措施，凡白米運至國內口岸，一律免稅放行。同日，上海虹口公園炸彈案中嘅朝鮮義士尹奉吉（1908-1932）喺日本被槍決。12月21號，浙江寧波東晉古刹天童寺大火，燒燬房屋50餘間。天童寺位於鄞州區太白山麓，為禪宗寺院，南宋時位列五山之第三，清代同治年間為禪宗四大叢林之一，同時亦係日本曹洞宗祖庭。寺中建築屢經興廢，現存最古老建築為建於明崇禎四年嘅佛殿。1978年修復後，寺院建築達到30餘幢，占地面積7.64萬平方公尺，當然亦係中國嘅重點保護文物之一。

講吓曹洞宗，曹洞宗為佛教禪宗五個主要流派之一，同臨濟宗齊名，有曰「臨濟將軍，曹洞士民」。日本鎌倉時代，公元13世紀初，日本道元禪師（1200-1253）入宋，從學於天童山曹洞宗如淨禪師（1163-1228）門下，始傳回日本，建立永平寺，提倡「只管打坐」，為日本曹洞宗之寺始。本山係永平寺（福井縣）同總持寺（橫濱市）。今日，曹洞宗已經成為日本禪宗主要流派。日本同中國，本來每一個方面都係息息相關嘅。

12月23號，中央蘇區紅軍攻剋崇仁；25號聖誕節，甘肅發生歷時兩小時以上的強烈地震；28號，國民黨中正會決議，設立西京市，隸屬行政院；30號，國民政府通令全國公務員一律使用國貨，行政院通令蘇、浙、閩、鄂、湘等十個省厲行禁烟！愈禁，鴉片愈值錢！


#常威💀 #蔣介石平反系列  #中日戰爭 #民國歷史 #佛經抄寫員

常公子 2022-1-14 21:36:51

❤【常威近代史】第一部《大清亡國關慈禧蛋牛治》，全面開放，免費下載， #freedownload！

Free下載連結🔽

https://play.google.com/store/books/details?id=C3hjDwAAQBAJ

常公子 2022-1-15 14:48:16 【常公子歷史頻道443回：替大軍閥平反系列之 權力鬥爭中唔係朋友就係敵人】

♊ 防疫措施延長多14日，農曆新年註定要喺防疫中渡過，年宵花市會取消，團年飯亦冇得食，對好多人嘅生計都造成嚴重打擊，尤其是飲食業，啱啱先有所復蘇，現在又一棍藕埋嚟，真係喊都無謂。政府再派公帑救命，真正割肉餵鷹，情況完全唔理想。當然亦唔係單單香港係咁，全世界都係，病毒爆發以來，造成嘅經濟損失，已經超越二次世界大戰。不過，我經常去諗，因為防疫付出嘅代價會唔會太大呢？新聞日日有人因為財困跳樓，仲未計情緒或精神傷害嘅代價，更加未計算因為疫情封關而加深嘅國際衝突同矛盾。再搞落去，戰爭隨時會發生，後果不敢想像。

♐ 仲記得兩年前嘅農曆新年，剛剛疫情來襲，相信冇人會想像得到會玩成兩年有多，呢場疫情，亦徹底改變曬整個人類嘅生活模式，「旅行」 這種人類普遍嘅娛樂行為已經差唔多銷聲匿跡。人類由四圍走，開始大部份時間侍在家裏，「家」大概比以前變得更重要。工作在家，娛樂在家，上課在家，如果有一個良好嘅居住環境，其實冇乜所謂。但係香港人居住條件一向差劣，家居空間極度不足，個個望住個電話屈埋一邊過日辰，未來日子，做眼科醫生一定生意興隆。

⛎ 疫情總會過去，「與病毒共存」又好，「徹底清零」又好，大家都要需要有一個說法同一個落臺階，我個人唔相信2023年仲係會咁，冇一個國家可以付出再大嘅代價，大家都需要回復正常生活，希望依一日快啲降臨。不過，今次疫情過去之後，下一次呢？全人類又要點樣面對同處理呢？唔……難道唔會再有下一次咩？

🎦https://youtu.be/FiS1mSKsKTw

常公子 2022-1-16 12:58:16 ［常威近代史］第六百三十六回 門羅主義（高清錄音版）

#唔鍾意睇字可以聽

https://fb.watch/aznQ8InYF7/

常公子 2022-1-17 21:31:10

【常威近代史】（六百三十七回）
日軍佔領山海關

時間線進入1933年，距離1937年「七七盧溝橋事變」，中日全面戰爭爆發，仲有四年半時間，自從918事變，偽滿洲國成立，經歷淞滬戰爭，日本帝國給予中華民國空前嘅軍事壓力，明眼人都睇得出，建立「滿洲國」（偽），佔據東北東三省並唔係日本人嘅終極目標，民國政府寄望於國際社會嘅仲裁，其實無補於事。日本國內，因為經濟不景氣，文人政治倒臺，軍人權力空前上昇，理所當然地走上軍國主義之路，亦在所難免。同歐洲希特拉、意大利墨索里尼嘅想法一樣，為咗拓展生存空間，日本已經不惜一切，甚至萌生退出國際聯盟嘅念頭。

蔣Sir嘅國民政府，對於日本嘅壓力，其實顯得相當無力。外憂不及內患，國內共產主義紅軍勢力冒昇，對蔣Sir嚟講，甚至超越日本嘅威脅，國民政府本身，亦唔係一個完整嘅政治實體，蔣Sir與張學良嘅南北聯盟，本身嘅基礎已經非常脆弱，國內除咗反對派紅軍，仲有西南方嘅軍閥割據……經濟方面，更加係水深火熱，單單貨幣未完全統一，已經夠曬頭痕。日本人就係睇見你中華民國嘅內憂外患，正所謂趁你病攞你命，一陣畀你企穩陣腳就麻煩了。

1933年1月1號元旦，上海各團體將今年定為國貨年，呼籲全體國民用國貨，振興經濟。留心觀察，自己嘅國民用自己國家出產嘅產品，從來都係治國上策，一來確保外匯唔會流失，二來國民用國貨，正正就係國民對政權意識形態嘅絕對認同，而且唔係口頭認同，係身體力行。同日，《中國與蘇俄》 月刊喺南京創刋，中蘇恢復外交關係，但係中共紅軍依然威脅國民政府，情況其實相當弔詭，原來好多事，真係可以分開嚟講。一單還一單，唔好成日撈埋嚟講。

元旦日，中國航空協會喺上海成立，組織有另一個稱呼，叫做「中華航空救國會」，理事王曉籟（1886-1967）、史量才（1880-1934）、王正延（1882-1961）、杜月笙（1888-1951）、虞洽卿（1867-1945）等21人就職，嗯？啲人名咁熟口熟面嘅？又係嗰幾位喎？唔需要奇怪，小事啫，公職嘅嘢音樂椅嚟姐，掛個名姐？太公分豬肉，最緊要「榜上有名」。中國航空協會係蔣Sir授意杜月笙等人發起建立，目的志在吸納民間遊資，幫助國民政府擴充空軍。同最大敵人日本相比，國民政府可以動用嘅陸軍同裝備，相信唔會輸比日本人，但係至於海軍同空軍，完全係蚊同牛比，冇得比。1月30號，中國航空協會成立咗上海會員徵求總隊，由上海市長吳鐵城（1888-1953）任總隊長，王正延任總參謀。學生、工人、職員、社團員工等各界人士被要求儘量全體入會，一齊撐！但入會需要交納會費2蚊、10蚊至50蚊不等。各界職工所交會費由店主、廠主、老細一次代繳後再按期響量度扣還，大家一齊籌旗集資，首先做旺個勢先，做人做事，「虎頭」好重要，至於好多事最後變成「蛇尾」，老實講其實大家都唔想。「虎頭蛇尾」係常態，做人難道不是嗎？

常公子 2022-1-17 21:31:21 1月3號，扼著遼西走廊嘅仲要軍事要塞，榆關（即係關海山，Sorry，係山海關） 中午被日軍強行佔領。1932年7月，日軍第八師團藉口一名聯絡員被抗日義勇軍扣押，派兵進入熱河省內，並攻佔朝陽、邁出奪取熱河省，企圖侵入華北嘅第一步。至於有冇聯絡員失蹤？其實無關重要，搵個藉口姐開你拖姐。最近美國政府夠話普京會隨時喺烏克蘭插贓嫁禍，然後派兵入烏克蘭，真真假假，無謂知道了，反正你知道的，亦永遠唔會係真相。12月，日軍鐵甲車坦克向山海關開炮，威脅中國守軍將領何柱國（1897-1985），要佢宣佈「獨立自治」，但何先生堅決拒絕。1月1號，日軍響臨榆縣南關外開槍並投擲手榴彈，向中國軍隊嘅哨兵射擊，又反過來誣陷中方首先挑釁。1月2號清晨，日軍要求撤走南關嘅中國軍隊，獲同意後更加得寸進尺，要求南門及城內交予日軍負責警戒。被中方拒絕後，日軍開始進攻臨榆縣城，守軍被迫反擊。1月3號，日軍出動飛機同坦克助攻，渤海灣上嘅海軍炮艦亦都向山海軍開火，守軍傷亡逾半，亦冇援兵相助，下午棄城撤退，山海關亦正式落入日單手中，睇到未？日本有海軍空軍支援，中國軍隊係冇嘅，咁打條毛咩？再提一提大家，日軍佔領山海關嘅時候，國際聯盟正在召開特別大會，討論緊李頓報告書內容……

1月7號，國民政府委任施肇基（1887-1958）為駐美大使。施肇基有個仔叫施思明（1908-1998），響施肇基擔任駐英大使期間就讀於溫切斯特公學（Winchester College），後於劍橋大學基督學院獲得醫學碩士學位。畢業之後返嚟中國從事醫療衛生工作，二次世界大戰結束後，1948年起開始擔任聯合國醫學總監，負責約3000名固定聯合國職員嘅醫療衛生工作，以及執行海外任務前嘅免疫及醫療衛生準備工作，施思明喺個崗位上從事咗20年，佢亦係世界衛生組織創始人之一。

1月9號，日軍佔領山海關之後，日本海軍陸戰隊亦喺秦皇島登陸鳥……

#常威💀 #蔣介石平反系列  #中日戰爭 #民國歷史 #佛經抄寫員

常公子 2022-1-17 21:31:38

【常威近代史】第十一部《人生有幾多個黃金十年》
▶https://play.google.com/store/books/details?id=NIRKEAAAQBAJ

Kindle版
▶https://www.amazon.com/dp/B09KH5NWB9

常公子 2022-1-18 15:03:43 ［常威近代史］第六百三十七回 日軍佔領山海關（高清錄音版）

#唔鍾意睇字可以聽

https://fb.watch/aC7Yl5hY6S/

常公子 2022-1-19 15:02:43

【常威近代史】（六百三十八回）
對新中國未來的盼望

1933年1月，浙江社會運動家胡愈之（1896-1986）響其生編嘅《東方雜誌》上，以《新年的夢想》為題，發表咗160多位各界知名人士同普通讀者夢想「未來的中國」和「未來的個人生活」嘅徵稿，從而表現出國民對中國未來嘅期盼同想像。當中歷史學者周谷城（1898-1996）時樣寫「我夢想中的未來中國首要之條件便是：人人能有機會坐在抽水馬桶上大便， 我夢想著，此後我真能不再作什麼夢想了。」； 作家樓適夷（1905-2001）寫：「 未來的中國，將是新銳青年的中國，不是昏庸老朽的中國，將是勤勞大眾的中國，不是剝削階級的中國，將是中華民族自主的中國，不是帝國主義者奴役的中國。」 ；美術家錢君匋（1907-1998）寫「 未來的中國是一團糟，我深信著我的夢想是千身萬確的。因為照目前的形勢而看，而推測，要他不一團糟，無論如何也做不到的。我們的生存的苦，將跟著加濃……我曾夢想得些清福，幽閒地喝一杯茶，看一點書，或者和女人們談談……」； 劇作家陽翰笙（1902-1993）寫「 對於未來的中國……我以為祇有三種可能局面。一是完全淪為帝國主義的殖民地；二是沿海各地變成屬地或共管區域，而內地還能獨立，不受帝國主義支配；三是中國完全能獨立……」 身處當時的中國，似乎無辦法可以擺脱悲觀嘅情緒，中國能夠變成一個先進獨立自主嘅偉大國家，需要嘅時間其實係100年，到咗今時今日，終於願望成真，不過有好多人眼中，今日中國嘅富強仍是虛幻不真，或者，行到今日嘅景況付出嘅代價實在太大……不過無論如何，響21世紀初期做一個中國人，比20世紀初期做一個中國人，其實幸福咗千倍萬倍。

1月10號，行政院決定設置中央古物保管委員會；同日，《新中華》 半月刊響上海創刋，周憲民擔任主編，中華書局出版發行；同日，吉林國民救國軍總司令王德林（1875-1938）喺東寧抗戰，因弹盡粮絕退入蘇聯國境；同日，中國航空公司上海至北京航線開航。

左翼作家茅盾（沈雁冰，1896-1981）長篇小說《子夜》 響上海出版，受到廣泛歡迎，響一年內連印數版。《子夜》 小說中嘅主人翁，係一個有野心有魄力有能力嘅民族資本家，佢雄心勃勃經營佢嘅工廠同商號，但最後因為軍閥混戰、農村破產、工廠生產過剩嘅大環境下，加上外國資本同埋官僚資本嘅強力競爭同經濟封鎖中一敗塗地。另一部喺《時報》連載嘅巨著，巴金（李堯棠，1904-2005）嘅《家》 亦都喺本月集結成書，小說中，巴金描繪咗佢身處時代激流與封建大家庭之間嘅體驗，喚醒咗無數青年鼓起勇氣背棄傳統觀念同揚棄封建思想，提倡自由戀愛。之後巴金更加完成咗《春》同《秋》 兩部長篇小說，《家》《春》《秋》合稱為《激流三部曲》，影響咗幾代中國青年人，今日如果返睇，當然非常老土，但係響20世紀初期，絕對係前衛表篇小說。巴金係「五四」新文化運動中產量最多、影響力最大嘅小説家，1949年之後留響中國，再冇寫長篇小說，1983年3月起，巴金連續五次當選全國政協副主席，任職直到去世為止。

常公子 2022-1-19 15:02:53 至於茅盾，由1949年7月當選為全國文聯副主席、中國文學工作者協會主席。1949年10月，中華人民共和國成立之後，被任命為首任中華人民共和國文化部部長。文革期間也受到影響，1979年當選為全國文聯名譽主席、中國作家協會主席。1981年3月27日，因病醫治無效，於北京逝世。1981年中共中央恢復其中國共產黨籍，並從1921年起計算黨齡。

1月15號，國民政府匯款接濟退入蘇聯境內嘅東北義勇軍領袖，蘇炳文（1892-1975）、馬占山（1885-1950）、丁超（1883-1939）、李杜（1880-1956）等人。1月17號，國民政府決定將故宮重要古物珍品遷移南下，但遭到北平市民反對。1月20號，中國國貨股份有限公司成立，浙江企業家方液先（1893-1940）任總經理，2月9號正式營業。1月21號，四川軍閥劉湘（1890-1938）同劉文輝（1895-1976）雙方取得諒解，暫時中止四川嘅混戰狀態。

1月23號，由本日起至28號，為「航空救國」宣傳周，南京、上海等各大城市均召開大會，號召人民捐款救國！同日，國民政府監察院以「違背約法，蹂躪人權」 彈劾江蘇省政府主席顧祝同（1893-1987），呈請國府懲戒。事源去年7月，顧祝同扣押鎮江《江聲報》 總經理劉煜生（1900-1933），呈請軍事委員會核准後，於本月21號以「宣傳共產，背叛黨國」罪名處決，監察院監委劉莪（音俄）青（1888-1955）、田炯錦（1899-1977）據此對顧祝同提出彈劾案，經監委周利生、高一涵（1885-1968）、李夢庚（1884-1946）審查成立。對於監察院嘅彈劾案，江蘇省政府回信，稱劉煜生所辦嘅《鐵犁》副刊「蓄意煽起階級鬥爭，鼓動紅色恐怖」，對案件「戒嚴司令部有權辦理」。即係你有你彈劾，我有我做嘢，搞到我先講啦！儍逼。

#常威💀 #蔣介石平反系列  #中日戰爭 #民國歷史 #佛經抄寫員

常公子 2022-1-20 11:17:16 【常公子歷史頻道444回：替大軍閥平反系列之 黃埔軍校開學】

♊ 有一個傳說故事，講巨人拿起石頭砸自己的腳，大概目前，全人類正處於呢種狀態之中，變種病毒殺傷力極低，但係人類卻因為防範病毒而產生好多額外問題，因為防疫而負上太大代價，嚴重影響正常生活同經濟活動，而且好似香港咁，發展到現在，甚至有啲風聲鶴唳，大家似乎唔係驚染病，大家只係害怕被送到竹篙灣囚禁兩個禮拜。而是奇事一單接一單發生，撲滅倉鼠事件，更加為政府帶來一場關公災難——依照邏輯，如果驗到有犬隻帶毒，係唔係要全香港嘅狗主都要將犬隻搦出嚟人道毀滅，我唔係好明白？

♒ 英國同歐洲會逐漸放寬防疫措拖，睇嚟誓要同病毒共存，當冇件事發生，過返正常生活同進行正常經濟活動，市民可以選擇戴唔戴口罩，染病就響家居隔離幾日，只鼓勵接種疫苗同加強制。香港呢？係咪繼續清零？繼續封關？無論採用乜嘢態度應對新型冠狀病毒疫情發展，大家都有大家嘅理由，大家都有大家嘅顧慮，大家都有大家要付出嘅代價，冇話啱定錯……世人亦都逐漸明白，凡事無一定，一切都係要睇形勢。有句說話講得好好，大家摸住石頭過河吧。

🎦https://youtu.be/tMNIzgh7mTY