時間線去到1932年,中日戰火繼續蔓延,距離華爾街經濟大崩盤(Wall Street Crash of 1929) 已經過咗三年時間,整個地球進入大蕭條年代,人窮志短,亦自然更加著重眼前嘅實際利益,貴為當時嘅資本主義大國日本亦如是,大膽放手發動918事變武裝侵略中國,玩大佢,某程度上,亦係挽救國內經濟同團結民心嘅一種政治手段。我講過,當時大家都好驚共產黨,尤其是響列寧托洛斯基建立世界上第一個共產主義國家之後,但係如果國內經濟不景,民不聊生,就自然會有更多人相信馬克思(或讀馬克思),相同情況亦都響今時今日21世紀發生,要防共防赤化,除咗要改善國內人民物質生活水平之外(呢樣嘢好難),仲有一招簡單啲,就係要搞意識形態,唔好咁深嘞,叫轉移視線喇,人類嘅注意力,好多時候只係能夠集中喺某一方面,你睇吓香港,過去十幾年,大家都將注意力集中喺政治方面,最後搞到連十歲未夠嘅孩子都學人講政治上街,結果2019年後,注意力不再集中單單政治上,連boy-band 呢啲咁老土嘅偶像文化都可以翻生,大家就一清二楚。
附帶一提,好多人將「華爾街大崩盤」同「大蕭條」 當成係同一件事,其實兩件事可以無關係,股票升升跌跌,實屬正常操作,有波幅總好過冇波幅,係唔係一場股災,就造成一個連鎖反應令全球進入大蕭條年代?我個人相信應該冇可能,不過1929年嘅華爾街大崩盤,配合之後嘅全球蕭條貧窮景況,就製造咗一個陰謀論出嚟——就係搞到德國人咁慘,原因係因為華爾街嗰班猶太人財閥吸血鬼,令到本來有神話成份嘅歐洲「反猶主義」 成為實際政治操作,之後因此死咗幾多猶太人?大家應該清楚。德國人嘅素質唔可以話係全世界最高,但係一定係on the top嘅一群,點解佢哋會相信(信奉)「反猶主義」?老實講,我到而家仲未(真正)明白,只可以安慰自己,謠言嘅力量實在好強大,民粹嘅力量實在好強大,戈培爾博士(1897-1945)講得好好,當謊言重複1000次,就會成為真實。唔信?請撫心自問自己。
♊ 第26屆聯合國氣候變化大會喺英國格拉斯哥舉行,作為東道主嘅英國痴線首相約翰遜發表開幕辭,提及全人類正被綁在一個末日裝置之上,距離爆炸時間只剩低小小,好快就會一鑊熟,同歸於盡!的而且確,過去一兩年,整個地球因氣候變化出現反常天氣狀態,加上新型冠狀病毒疫情肆虐,大家都可以睇到,情況其實都幾惡劣。當然如果你寄望COP26 依類咁嘅會議開多幾個,就可以挽救地球,咁你嘅情況就更加惡劣。
♉ 亦有科學家推算,如果地球持續升溫2度攝氏,去到今個世紀末期,就會有好多沿海嘅城市被淹沒,而阻止地球繼續升溫,就係要減碳,達到碳中和,大力減少使用有機化石原料,大量使用環保新能源,減少吃肉,減少砍伐森林……等等等等。其實目標都幾清晰,我亦唔想潑冷水,下一代人,同下下一代人的確會好大鑊,冇得迴避,希望大家盡做,救得幾多得幾多。就我自己嚟講,我會儘量節儉,唔會亂買嘢,唔會亂抌嘢,出入使用公共交通工具,儘可能食清淡啲簡單啲,煙就冇得戒了,我諗自己亦冇可能成為素食者,唯有其他方面多多努力,希望做多啲。我亦好相信,如果大家都肯做多啲,如果大家都唔係淨係得把口,坐言起行,個地球仲有得救,當然真正大洪水到嘅時候,我已經唔響呢個世界上……
♏COP26會議上,亦通過咗一個無約束力嘅議案(其實大部份都冇約束力,純粹講吓就算),就係希望係響2030年,全地球停止砍伐森林,呢個咁偉大嘅構想,實踐時間距離現在祇有7、8年,如果真係做得到,地球村民就真係嚮前行咗一大步,希望真係可以成功實現喇。「環保」最大嘅問題係乜嘢?就係個個得把口,你又講我又講,講到識飛天咁,但講就天下無敵,做就有心無力,或者講出十成功力,最後留力九成九,尤其是以地球上幾個超級大國為首,一方面又要經濟發展印銀紙,另一方面又要搞環保碳中和,其實兩個概念係背道而馳—— 即係一方面又想sales好好,另一方面又唔想去見客—— 其實係冇可能,凡事必須要作出犧牲,我都想唔X使返工,日日Bee八達通就有1000蚊駛,但其實冇可能……
✅https://youtu.be/a6yqv19OqnQ
💙最新上線,請課金支持
【常威近代史】第十一部《人生有幾多個黃金十年》
▶https://play.google.com/store/books/details?id=NIRKEAAAQBAJ
Kindle版
▶https://www.amazon.com/dp/B09KH5NWB9