常公子 2021-10-7 11:07:35 【常公子歷史頻道420回：替大軍閥平反系列之 愛得轟烈】

♊ 世界上最轟烈的愛，就係生生死死，愛到要生要死嘅愛，仲唔轟烈？美國同日本，就係一對這樣的戀人，佢哋係鄰國關係，雖然彼此相隔住一個遼闊嘅傷心太平洋，如果坐船，需要兩個星期。不過，兩個國家關係密切，剪不斷，理還亂。響中國未崛起之前，日本無疑就係東方文化嘅號頭代表，無可否認，美國自第一次世界大戰之後就係西方文化嘅領頭羊，東西文化亦響日本同美國之間嘅關係中，展現出極大的摩擦同韌性。19世紀之前，整個世界是西方文化嘅世界，一次「黑船事件」，美國強行打開了日本的德川封建時代大門，亦同時打開了一個潘朵拉盒子。

♐ 應該冇人可以想像，只係短短半個世紀，一場轟轟烈烈嘅明治維新，已經將日本帶入世界頂級列強行列，日本不但強大起來，而且要比所有人想像更加強大，打贏甩皮甩骨清帝國嘅甲午戰爭事小，打贏紅鬚綠眼俄羅斯日俄戰爭先係大件事，東風壓西風，一個巨大嘅亞洲帝國，正正式式向主宰地球嘅西方資本主義文明挑戰。不過最可惜嘅係，日本挑戰西方巨人，祇不過係曇花一現，當兩個原子彈投下廣島同長崎，一切煙消雲散，徒勞無功。之後日本成為美國的佔領國，日元被大打劫，不過無論點都好，日本仍然係目前世界上第三大經濟體系，重要嘅角色始終不變，正如德國喺歐洲嘅角色一樣。

♏ 東風壓倒西風嘅美夢，響日本失敗後半個世紀，再一次出現，不過今次嘅主角並唔係日本，而係中國，21世紀行咗20年，中國展現強大崛起嘅勢頭，已經同西方文明領頭羊美國平起平坐，現今世界既局面，就係中美之間嘅局面，世界嘅矛盾，都係中美之間嘅矛盾。有人話，參考美國同日本嘅經驗同歷史，中美兩國必須一戰，而且係轟轟烈烈嘅一戰。對於這種想法，我並不表示反對，不過有四個理由可以提出：第一，叫通貨膨脹，今日打仗同以前打仗唔同，因為成本太高，打仗唔同起樓，打仗耗用嘅成本好多時候收唔返；第二，世界發明咗核武，玉石俱焚，亦都冇人想；第三，現代人似乎比古代人聰明，懂得拖得就拖，亦懂得鬥而不破嘅大道理，嗌交還嗌交，講打講殺就冇謂；最後一個point，硬橋硬馬嘅熱戰，已經唔係大潮流，真正嘅潮流係喺對方體內引爆政治炸彈，企圖令對方自行墜毀。

✅https://youtu.be/s5h9R3XXqL0

💚【我奮鬥不奮鬥】 常公子 楊熙合著

電子書下載⬇ https://play.google.com/store/books/details?id=CVo3EAAAQBAJ
Amazon Kindle版下⬇
https://www.amazon.com/dp/B098XHWTDK
實體書訂購⬇
https://www.382now.com/product?id=325

常公子 2021-10-7 22:37:55 ［常威近代史］第五百九十六回 日本點解要發動918事變（高清錄音版）

#唔鍾意睇字可以聽

https://www.facebook.com/129055447762576/posts/820035645331216/

常公子 2021-10-8 13:01:39
【常威近代史】（五百九十七回）
日本為何要發動918（2）

上一次講到，918事變發生前後，日本民眾開始對國內多黨制輪換政治文人政制表現不滿，本來民智未開，你話點就點，但係經過大正時代嘅自由主義鬼滅之刃洗禮，日本民眾開始懂得獨立思考，開始懂得去思考自己嘅處境為何？特別係政治處理，以前唔會諗係因為唔識諗，當然以為自己識諗去亂諗，都係好大問題，出事亦都係呢個位，作為香港人，大家都應該好清楚。

1930年前前後後，民眾對政治體制嘅攻擊，不單止停留係語言上，仲化成實際行動，1930年底到1932年間，日本青年軍官與民間志士合作發動連串暗殺同埋企圖暗殺事件，冇辦法，當時興玩暗殺，1930年11月，民政黨首相濱口幸雄（1870-1931），1930年11月14日，濱口響東京車站被日本右翼團體成員佐鄉屋留雄開槍打傷，延至第二年8月去世，佢係第一個被政治暗殺嘅日本內閣總理大臣，除咗佢之外，1932年2月及3月，前大藏大臣井上準之助（1869-1932） 以及三井財團財閥團琢磨（1856-1932），都被極端民族主義團體「血盟團」暗殺。殺人都未夠，日本青年軍官亦計劃喺1931年3月同10月發動政變，企圖推翻文人政府，雖然未能成事，但係政變前亦已經得到某啲高層將領嘅默許。

發動暗殺同埋政變嘅人，都隸屬於某啲秘密嘅讀書會或民間團體，呢啲組織遍佈全國，而且成為軍人及民間嘅秘密溝通橋樑，佢哋認為合法性嘅政治體制應該尊重天皇及人民，並將天皇同人民聯成一體，而多黨制政治同埋資本家則為天皇同人民嘅敵人，你睇吓，邏輯完全係錯，錯撚曬，呢班人，除咗仇視資本家同政客，佢哋更加批評明治元老同埋官僚唔尊重天皇同人民，總之，就乜都反一餐，而軍人則利用依種極端嘅「民粹主義」，一步一步將政權由文人政客手上奪取過來，行軍國主義路線。

關東軍領導人對上述情況有好重要嘅貢獻，佢哋策劃918事變，作為突破內政外交瓶頸嘅手段，符合帝國內軍人嘅期望，亦符合當時日本民衆嘅意識形態。在此不得不提一個非常重要嘅人物，佢叫做石原莞爾（1889-1949），佢響1929年到1932年間擔任關東軍嘅作戰主任參謀。石原係佛教日蓮正宗嘅信徒，佢亦喜歡哲學同埋世界史，而且仲建立咗一套神秘又富有幻想力嘅世界觀，佢認為世界終有一場「最終戰爭」爆發，戰爭完結之後會為人類帶來一個統一和諧嘅宇宙，當然佢心目中嘅最終戰爭，就係日本同美國嘅終極一戰，亦係東西方文化嘅最後較量。石原不斷向關東軍部下宣傳佢嘅想法，認為日本如果要取得勝利，就必須控制東北，因為東北地區礦產豐富、土地肥沃、係農民移民好地方，同時日本可以藉住向東北殖民紓解其國內人口壓力，改善日本農村嘅貧窮狀態。除此以外，石原亦視東北為一個人類社會實驗場所，在此企圖嘗試建立一個秩序良好、公平公正嘅社會，避免受資本家剝削，受政治家唆擺，人人效忠國家同天王，如果喺東北實驗成功，亦可以推動於日本國內。

常公子 2021-10-8 13:01:50 睇唔睇到？又係一個好心做壞事嘅結果，石原莞爾響東北建立的世界，明顯就係一個社會主義國家，但係佢同日本國內嘅軍官一樣，又堅決反共，本身已經自相矛盾。事實上，理論層面上，石原莞爾先生真係好難同列寧同托洛斯基比較（同著作量上亦都可以知道），「唯物辯証法」思考方式，唔可以用唯心主義作出發點，本身信佛已經係一個死穴，工人無祖國，又點可以有一個天皇呢？石原莞爾明顯犯咗本質上嘅嚴重錯誤，同石原莞爾犯同一個錯誤，仲有國家社會主義者希特勒，因此兩者都逼不得已地最後走上極權統治同戰爭嘅絕路。

呢個世界上，有強調個人嘅「資本主義」，亦有強調集體嘅「社會主義」（或叫共產主義），好多人，想響兩者之間找尋一條出路，既可擁有資本主義下嘅個人自由，亦可擁有社會主義下嘅集體好處，一個冰，一個火，撈埋一齊叫冰火七重天，其實好難做得到，就算要做到，都要係響社會資源非常豐盛及人口較少嘅情況下，先可以做到兩種主義之間嘅平衡狀態，早十幾年前嘅北歐一衆小國，好似能夠邁向依種境界，不過而家都已經宣佈玩撚猿。

1938年嘅918事變，關東軍佔領南滿嘅大部分地方，到咗今時今日為止，仍然冇證據話畀我哋知，東京方面嘅軍事將領是否事前已經知道？或者批准行動發生？總之米已成炊，或者關東軍，只係做咗東京軍事高層唔夠膽直接做嘅事，甚至係明治天皇唔夠膽講嘅事啫。無論事前是否得知，當時嘅內閣總理大臣犬養毅（1855-1932）及政友會嘅領導接獲918事變報告後，都顯得非常軟弱，犬養毅雖然唔同意軍方吞併東北嘅做法，但係仍然俾關東軍建立一個傀儡政權，1932年3月，以末代皇帝溥儀為最高領導人嘅「偽滿州國」正式建立，滿洲國持一個獨立國家嘅表面形象矗立於東北，其象徵意義在於解放全亞洲及反對西方帝國主義嘅意識形態反射。

日本人眼中，蔣Sir 嘅南京政府，只不過係帝國主義者美帝係中國嘅白手套代言人，既然你有白手套，點解我唔可以有白手套呢？

918事變前後嘅日本狀態，我哋下次再繼續。

#常威💀 #蔣介石平反系列 #黃金十年 #民國歷史

常公子 2021-10-9 12:21:41 【常公子歷史頻道421回：替大軍閥平反系列之 關東大地震】

♊ 一場關東大地震，不但改變咗日本嘅國運，同時亦改變咗中華民國國運，可以想像，如果冇呢一場差唔多毀滅咗半個東京的關東大地震，918事變或者唔會發生，或者，會推遲幾年或十幾年後先發生。天災人禍，總係接踵而來，互相構成因果關係。21世紀嘅今日，一場Covid-19新型冠狀病毒疫情，肆虐全球接近兩年，同時亦將人類21世紀的政治及經濟局面，完全改寫。最簡單一點，如果冇疫情發生，特朗普根本就篤定連任，但係一場疫情，令民主黨拜登上臺，世界又係另一個局面。

♑ 香港亦都同疫情息息相關，2019年嘅大亂，去到2020年嘅疫情爆發封關封城，到咗今日，有好多人移民離開，相信響2018年，亦冇人可以想像得到，未來會係點？我真係唔知道。目前政府聚焦嘅問題係，係開發土地，增加房屋供應，長遠嚟講，係要解決香港人嘅居住問題，啱啱發表嘅施政報告，就係要喺新界北部打造一個大都會，居住250萬人，同深圳前海聯成一體，景愿係相當美好，不過何時會成事呢？相信亦唔係我有生之年可以睇到。不過我想提一點，2019年對政府不滿嘅人，大多數反而係中產階級，並非低下階層，當然不滿嘅人好多都已經選擇離開，但係問題是否就此解決？

♉另外，阿潮因為工作非常繁忙，所以下星期上常威近代史youtube 需要暫停兩集，希望大家多多包涵，見諒。

✅https://youtu.be/8Jy8Nkua6ak

💚【我奮鬥不奮鬥】 常公子 楊熙合著

電子書下載⬇ https://play.google.com/store/books/details?id=CVo3EAAAQBAJ
Amazon Kindle版下⬇
https://www.amazon.com/dp/B098XHWTDK
實體書訂購⬇
https://www.382now.com/product?id=325

常公子 2021-10-9 23:13:56 ［常威近代史］第五百九十七回 日本點解要發動918事變(2)（高清錄音版）

#唔鍾意睇字可以聽

https://www.facebook.com/129055447762576/posts/821315555203225/

Darwinism 2021-10-11 02:22:36 留名

睇到post 1中間
仲係反修例前

好唏噓
一直講清末既弊病
加埋樓主對自97，2003、2014、16 等種種既社會事件既評價
到而家唔止過左2019，2020-21 每況愈下
只有更差

以前對局勢既發展既感受
對而家既狀況更貼切



爭啲發生既立憲胎死腹中（個人覺得就算慈禧安然無恙，立憲成功機會微乎其微，始終漢人南方勢力係佔大多數，好難令佢地服）

常公子 2021-10-11 12:37:01

【常威近代史】（五百九十八回）
日本為何要發動918（3）

其實日本發動918事變侵華，仲同一件事非常有關，不過好少人將兩樣嘢撈埋一切嚟講，瀨尿蝦同牛丸，好似風馬牛不相及。嗰件事，就係發生係1929年10月嘅紐約華爾街經濟大崩盤，一句說話講得冇錯，其實乜嘢都係股，所有嘅歷史，都係同股票（或貨幣）有關，1929年10月嘅華爾街大崩盤，之後出現嘅，係歷史上有名嘅「大蕭條」，全球經濟危機蔓延發生，各國失業率不斷上昇，亦替整個世界帶來翻天覆地嘅巨大變化，首先響歐洲，經濟不景氣，間接打造咗意大利嘅墨索里尼法西斯、以及德國嘅納粹希特拉，不景氣同時蔓延至亞洲嘅日本帝國，令佢哋落實侵華政策，開動中日戰爭機器。上述三個國家，就係之後「軸心國」嘅主要成員，可以想像，如果冇1929年嘅大崩盤，亦唔會發生二次世界大戰，死幾千萬人。

因此，每一次股票爆煲，都意味住一次政治經濟大洗牌。2008年美國因雷曼債券事件而引發金融海嘯，就係間接（或直接）打造咗今日嘅「中美冷戰」世界新格局，可以想返轉頭，2008年前，一切都係相安無事，甚至乎香港同內地同胞嘅關係，亦都好正常，邊有咁多仇恨？但2008年後，就發生咗巨大嘅變化，變化唔係一夜之間發生，係一步一步地改變，終於行到今時今日，十年河東，十年河西。邊個話世界上冇人喺度操作緊意識形態？所以我個人認為，股票好重要，失業率亦都好重要，只要兩者同時失控，世界就會失控。

日本嘅大正時代，仲有一個名相提提，叫「帝國民主主義」，日本政治體制奠基於千年一系嘅天皇制度，某程度上，亦都係一種君主立憲嘅政治體制，以此為空間，提供多元主義一定嘅活動餘地，大正時代，地主、商人、工人、佃農、勞工、男性、甚至女性嘅民間組織如雨後春筍般出現，佢哋各有各追求嘅目標，響一種和稀泥嘅政治體制下，互相產生衝突及妥協，打造大正時代嘅自由民主風氣。

常公子 2021-10-11 12:37:13 不過，社會走向多元化，亦埋藏咗連串動盪同不安嘅種子，經濟欣欣向榮，大家大撚把錢使，咁有幾多元化就可以有幾多元化（香港21世紀前都好多元化）； 不過如果遇上經濟蕭條，大家錢唔夠使，餅唔夠分，社會多元化就意味出現更多衝突同鬥爭，三隻香爐三隻鬼，十隻香爐十隻鬼，其實係數學問題。1923年東京大地震，1929年華爾街崩盤，經濟恐慌、社會矛盾不斷出現，對內，反映出嘅係一連串民間對上層建築嘅暗殺潮；對外，則係軍方肆無忌憚無上限嘅軍事擴張。其實兩者都係對應國內經濟蕭條而發生。希特拉要拓展生存空間，點解？大家知唔知道德國馬克喺一夜之間大貶值？全德國平民百姓銀行戶口被打劫清空，我睇過一本書，裡面寫當時一個擁護威馬政權嘅德國公務員，本來銀行戶口裡有足夠嘅退休金養老，點知一覺訓醒，戶口裡面嘅馬克價值唔見咗絕大部份，於是乎呢個人立刻投向納粹黨懷抱，認為祇有希特拉嘅大德國主義先可以拯救佢，大佬，係存在決定意識，並非意識決定存在啊。點解馬克會一夜大崩盤？以乎冇乜人提喎，但狂人希特拉就係認為係華爾街嗰班猶太人財閥喺背後播弄嘅結果，所以要同猶太人勢不兩立。

日本去到1930年代中後期，原本多元化嘅社會，因為對應經濟環境而重歸單一化，過往大正時代出現嗰啲咩獨立政黨、商人團體、生產者合作社、讀書會、工會、佃農協會、民間組織、女性組織……等等，全部唔見曬，大家都覺得，咁多民間組織，係會將個社會搞到立立亂嘅，取而代之，就係各種國家大型機構，收編離散嘅民間組織，將佢哋納入建制管理。同時，日本亦希望喺對中國呢場「聖戰」上發揮總動員作用，團結離心離德嘅民心。

要團結人民，其實冇乜嘢好過發動一場戰爭，所謂發動戰爭，未必係發動一場實牙實齒嘅熱戰，可以首先製造一個敵人，或叫對立面，然後話俾民衆知呢個敵人對自己有幾大威脅性，如果民眾唔相信，就用各種嘅意識形態操作手段令佢哋相信，群眾只係羊群，都係愚昧嘅，要佢哋相信一啲「真相」，其實並唔係太難，只係時間嘅問題，只係技巧嘅問題，技巧不足可以用時間補充，時間不足可以用暴力搭夠。敵人出現咗，事情就好辦得多，大家槍口請向外，唔好向內就得。「冷戰」 大概就係咁樣嘅一回事，第一次世界大戰，英法同德國嘅彌天大恨，大概就係咁樣開始。

你又可以問，人民離心離德好大件事咩？千萬唔可以用今日嘅角度去睇，當時1920年代，世界上出現咗一個國家叫做蘇聯，行緊向世界輸出共產主義革命路線（國際主義），哪裏有壓迫？哪裏就有共產主義！日本亦唔例外，窮人越多，就意味有更多人信奉馬克思主義，相信馬克思主義唔係問題，但係若果有人喺背後加以組織化或提供資金及武器，就會發生好卵大件事！中國發生喺1926年嘅北伐推翻北洋政府，就係好例子。鄰居嘅日本，唔通睇唔到發生咩事咩？防止窮人被赤化，防止馬克思主義思潮蔓延，亦係當時日本政府嘅當前急務。國內嘅經濟環境難以一夜之間改善，向中國東北發動侵略戰爭，拓展生存空間，就係比較easy嘅辦法，真相係，我寧願你相信侵略中國可以挽救自己水深火熱嘅處境，都好過你去信馬克思，響國內發動無產階級革命。

日本仲未講完，下次繼續日本！

#常威💀 #蔣介石平反系列 #黃金十年 #民國歷史

常公子 2021-10-12 21:07:33 ［常威近代史］第五百九十七回 日本點解要發動918事變（3）（高清錄音版）

#唔鍾意睇字可以聽

https://www.facebook.com/129055447762576/posts/823294928338621/

常公子 2021-10-13 17:39:03

【常威近代史】（五百九十九回）
日本為何要發動918（4）

視野仍然停留於20世紀30年代的日本，大家都知道，918事變只係一個開始，日本好快走上軍國主義嘅「康莊大道」，直至通往滅絕嘅未來。於是乎，大家可能產生一種想法，就是關於歷史借鏡同教訓，看見當日日本嘅歷史，去套入今天嘅事情，然後希望得出某啲結論。希望響歷史中找尋教訓，或者找尋一啲特定嘅軌跡—— 理所當然地，上述嘅嘢，亦都係好多人閱讀歷史嘅理由和目的—— 不過我想講，呢啲理由同目的，其實好唔實在。愛嚟吹吓水，或者茶餘飯後嘅話題，真係冇乜所謂。但係如果你認為歷史可以為你借鏡，或者可以令你預知未來，我諗你會大錯特錯。歷史同人類行為本身，其實充滿偶然性，亦冇特定嘅因果關係，昨日發生嘅嘢，唔代表今日會發生。歷史總係充滿不確定性，正如大家做咗咁多年人，難道又可以從過去嘅痛苦教訓中得到未來嘅去向？答案其實係唔可能。作為一個寫歷史嘅人，我講嘅嘢係拆自己大台，不過真心說話，讀歷史，都係唔好咁認真。

不得不再提一次，如果你認為歷史本身對未來有任何預測性嘅話，我唯有再一次套用我最喜歡嘅歷史學家霍布斯邦嘅說話——冇人能夠掌握歷史去向，唯一可以預知嘅，就係事情往往會向比較壞嗰一方面進發——廣東話講，好嘅唔靈醜嘅靈——應該就冇錯喇。

上次講到，日本開動中日戰爭機器，原因係想挽救國內嘅低迷經濟，以及團結離心離德嘅民心，避免共產主義思潮蔓延，引發內爆（或叫革命）。1929年10月嘅華爾街大崩盤，對整個地球帶來巨大嘅災難，新興工業國家日本亦唔例外，甚至首當其衝。1927年7月，日本內閣總理大臣濱口雄幸（1870-1931） 為咗振興經濟，推動兩個政策，第一個係壓抑國內嘅物價，鼓勵出口，所採用嘅方法係緊縮貨幣供應量，削減政府開支。其實，只係好普遍嘅做法，到咗今時今日，無論邊個國家想振興經濟，不外乎都係呢幾招。濱口雄幸嘅第二招，就係回復固定匯率，以穩定對外貿易及投資。日本同好多西方國家一樣，都係響第一次世界大戰時候脫離「金本位」，令貨幣匯率浮動，更加靈活調配資源同埋應付國內外瞬息萬變嘅經濟形勢，而恢復固定匯率即係回復「金本位」。如果用上述概念，香港就係一個好例子，長期同美元掛鉤，穩定匯率，曾幾何時，即係香港經濟繁榮嘅尚方寶劍。

1929年，日本實行財政緊縮政策，去到1929年下半年，似乎進行得十分順利，國內整體批發物價下跌6%，因此1930年1月，日元按照計畫恢復金本位固定匯率，不過呢個決定佢係災難性嘅，因為當時全世界嘅物價均大幅下跌，日本恢復金本位後，日本無法隨著市場調節日元嘅匯率，出口因此大受打擊。國內物價跌咗，但出口又同時暴跌，所以國內失業率攀升，跌入貧困嘅人口亦大幅上昇。

常公子 2021-10-13 17:39:15 另外，日本國內財閥銀行嘅決策亦喺政治上造成大災難，當然佢哋嘅做法其實並沒有錯。1929年，銀行界睇出政府嘅金融政策必然要放棄金本位，貶值日圓，因此佢哋大量出售日圓，換回美元。1931年日本決定脫離金本位，日圓同美圓匯率貶值達到50%，日本銀行界又決定用手中美圓收購日圓，一夜之間，一來一回，銀行界嘅資產增加一倍。銀行家同資本家賺大錢，不過上述嘅事情，卻鞏固咗一個社會上流行嘅睇法，就係嗰班資本家趁位社會不景氣出賣國家，大發國難財！或者，認為資本家係吸血鬼，最初只係小部分人嘅睇法，現在卻成為社會共識，仇恨資本家及資產階級，亦係馬克思主義普遍傳播嘅最大心理原動力。去到1930年代，日本平民百姓普遍相信，日本整個體制已經走入咗死胡同，一定要作出改變，就算比軍人當道行軍國主義都好，都好過俾你班資本家如取如攜繼續打劫口袋裡面嘅金錢。

發生嘅事同心理狀態，同今日亦都完全冇分別，政府官員同資本家互相勾結，打劫平民百姓嘅血汗金錢，莊家叫做「仇富」，做閒叫「認清真相」，各有各睇法，不過，有志之士卻為咗救國救民，去行刺濱口雄幸！都市人都咁慘，農村就會更加慘，1929年到1931年之間，日本農產品平均價格下調40%（梗係搵你農民開刀喇，仲使問嘅），由於收入驟降，唔少地主都無法繳納田賦，只得收回佃農耕地，自己一家大細再耕田增加收入，而且城市失業嘅年青人亦都回流農村，個情況會係點？大家相信唔難想像。

大家唔該理智一點，之後二次世界大戰揸住架三菱牌零式戰鬥機撞向美軍艦橋嘅神風突擊隊駕駛員，或者響硫磺島戰役中，死剩一兵一卒都要打落去日本軍人，難道佢哋係東京嘅城市人？難道佢哋會係城市中嘅資產階級？唔該唔好咁傻啦，佢哋通通就係經濟大蕭條之下嘅農村年青人，係統治階層嘅消費品（或者叫消耗品），我想講一件事實，身為窮人，就有窮人嘅命運，窮人嘅命運註定係悲慘。而社會主義或共產主義，就係想救濟窮人翻身，就算佢哋有百般不是，本心總係善良。馬克思主義就係一個以「人道主義」作為出發點嘅哲學體系，你話「唯物辯証法」冷酷無情都好，佢嘅出現，就係因爲要應對原本冷酷無情嘅世界，中間嘅因果關係，並唔難瞭解。

#常威💀 #蔣介石平反系列 #黃金十年 #民國歷史

常公子 2021-10-14 21:49:57 ［常威近代史］第五百九十九回 日本點解要發動918事變（4）（高清錄音版）

#唔鍾意睇字可以聽

https://www.facebook.com/129055447762576/posts/824513171550130/

常公子 2021-10-15 13:44:17

【常威近代史】（六百回）
泡沫是如何出現的

918事變係一個切入點，令我切入日本嘅大正時代，深入去理解一下日本點解到頭來要發動中日戰爭機器，過去嘅我，都係一條膚淺嘅苯柒，「侵略中國」就係中日全面戰爭發動嘅理由，呢個理由，亦都係我由細到大所認識嘅「真相」。當然無可否認，呢個亦都係真相，不過真相背後，到底仲有乜嘢內容呢？支持依個「真相」存在嘅樁腳，到底係啲乜嘢？人年紀大咗，開始明白，「發動戰爭」 並唔係細路仔玩泥沙，必須經過深思熟慮，或者係喺無得揀嘅情況之下先動用嘅最後手段。當然，從上述理由，我自己亦唔能夠解釋60年代美國倉促發動越南戰爭嘅原因，唔通美國人真係咁厲害，用十年越戰時間去舖排1972年尼克遜放棄金本位，之後瘋狂印銀紙以美圓主宰世界？「共濟會」深謀遠慮得咁緊要？不過應該唔係咁，「陰謀論」嘅嘢，都係唔相信比較心安理得小小。

日本嘅大正時代，由1912年雄才大略嘅明治天皇駕崩，去到1926年野心昭然嘅昭和天皇繼位為止，前後大概15年，依15年，亦係日本嘅大轉型時代，國內自由民主風氣大盛，社會由單一化邁向多元化，由充滿秩序性邁向無序性，結果最後百川匯河，軍人當道，走向軍國主義，肆虐整個亞洲，當中嘅故事，其實係由美麗童話故事開始，用悲慘戰爭故事結尾。

1920年代，日本經濟同文化嘅特徵係多元化，同埋充滿緊張矛盾。喺經濟上，因為第一次世界大戰，令到歐洲元氣大傷，傳統三大工業巨頭英國、法國同德國自行墜毀，反而為亞洲嘅日本帶嚟咗意料不到嘅經濟繁榮，一戰阻隔咗歐洲貿易商人同亞洲市場嘅聯繫，給予日本新興工業經濟一個千載難逢嘅發展機會，響1914年到1918年之間，日本工業產品嘅出口值，由14億日圓增長至68億日圓，增長速度簡直係驚人，尤其是喺綿衣製品上，日本更加成為全世界No 1，國內經濟空前繁榮，勞動力不足嘅情況下，打造左日本女性進入勞動市場嘅新秩序，「工廠女工」大概係日本人響亞洲首創，亦由於工業繁盛需要大量勞動力，工人階級薪金急速上昇，咁咪正？錯了！薪金不斷上昇同時亦都帶動可怕嘅通貨膨脹，薪水漲得快，物價漲得更快（香港八九十年代就曾經經歷過），到咗1920年，米嘅零售價上昇咗174%，因此爆咗鑊「米騷亂」，而其他嘅物價指數亦以倍計昇幅。

不過有人快樂有人愁，到頭來，又係資本家資產階級占盡便宜，「暴發戶」 成為當時嘅社會現象，情況亦同香港八九十年代非常相似，無端端發達，自然屎忽痕炫耀自己叻唔切，「暴發戶」 最大嘅特徵就係，佢哋以為自己好撚叻好撚掂，有過人嘅超卓能力，因為佢哋喺短時間內可以搵到好多錢，炒股又叻，炒樓又醒把，不過真相，只係時勢做英雄，咁啱得咁矯屎忽撞正波支pop入隻黑柴得7度啫，同個人能力同視野並無關係，到咗時勢唔就，就全部打回原形，相信大家坐的士都聽過唔少的士司機同大家講嘅類似故事。

常公子 2021-10-15 13:44:33 一戰後日本嘅繁榮盛世，除咗打造咗大批暴發戶，仲打造咗城市中嘅中產階級白領階層，佢哋嘅薪水以四五倍上昇，由於讀過書，識幾隻字，加上有水響身，於是空閒時間就大搞文化多元化活動，或者挺身而出參與政治，又或者得到靈覺上嘅覺悟而信奉馬克思，大正時代社會上唔同嘅聲音同自由風氣氾濫，就係咁樣出現。

第一次世界大戰結束後，好景依然維持多一段時間，但係去到1920年4月，就突然之間Game over，股票市場一夜間大幅下跌，日本最重要嘅出口紡織產品亦承受相同命運，唔少工廠同銀行倒閉，大量裁員，幾個主要嘅工業生產值急速下降，最低跌到原本嘅60%，真係凡事去太盡，緣分必早盡。最基本嘅問題係日本生產成本喺戰時攀升得太高（製造泡沫），即係產品嘅售價太貴，變咗缺乏競爭力（同香港廿一世紀後嘅情況都一樣，地租人工太貴，到頭來就缺乏競爭力，畀身邊嘅地區「啫」一聲過晒頭），而且歐洲人亦喺一戰後回復，又返番嚟亞洲市場同你競爭同你玩嘢。

1922年到1923年之間，日本政府採取措施，經濟有小陽春跡象。但係1923年9月1號就發生一場關東大地震，之前講過，地震事小，但事後密集無序嘅都市規劃引發嘅大火先攞你命3000！死亡人數估計係10萬到20萬之間，東京被破壞咗3/4！之後重建東京嘅大project，又令日本經濟出現短暫復甦，不過政府鼓勵銀行放鬆銀根，刺激經濟，亦係為之後更大嘅災難埋下地雷。情況同七八十年代日本非常相似，亂咁借錢，有得還就最好，冇得還就變呆賬壞賬，「借錢總要還」 真係金石良言。1923年後日本，繼續面對同一個問題，就係出口產品價錢太昂貴，冇辦法，個社會已經發展咗，生產成本當然冇辦法同其他較落後嘅國家比較。

其中以紡織品為例子，當時嘅日本，就無法同中國嘅低廉紡織品競爭，不過有樣嘢仲好笑，當時中國出產嘅紡織品，其實好多都係日本人喺背後做老細同投資者，情況實在非常弔詭。

我哋下次繼續日本日本日本。

#常威💀 #蔣介石平反系列 #黃金十年 #民國歷史

常公子 2021-10-15 13:44:53


❤【常威近代史】第一部《大清亡國關慈禧蛋牛治》，全面開放，免費下載， #freedownload！

Free下載連結🔽

https://play.google.com/store/books/details?id=C3hjDwAAQBAJ

常公子 2021-10-16 23:36:07 ［常威近代史］第六百回 泡沫是如何出現的（高清錄音版）

#唔鍾意睇字可以聽

https://www.facebook.com/129055447762576/posts/825834904751290/

江采蘋 2021-10-16 23:37:21 藍屍返去搵條周顯玩啦

:^(

常公子 2021-10-18 12:01:49

【常威近代史】（六百零一回）
統治者嘅藝術

今集繼續講日本，1917年係一個里程碑，因為列寧同托洛斯基建立咗世界上面第一個共產主義國家：蘇聯。今日蘇聯已經唔存在，共產主義運動亦已經式微，但響20世紀初期，共產主義運動 係世界上第一號大潮流大巨浪，加上當時蘇聯行緊國際主義路線，唔同你隱瞞動嘅，要向全世界輸出革命，出人出錢，毫不皺眉，於是，阻止共產主義滲透或防止民眾相信馬克思主義，係當時唔少強大國家嘅頭號任務，第一次世界大戰前後，日本貴為世上最強大嘅資本主義強國之一，當然要抗衡共產主義思潮滲透，否則一旦爆發革命，所有統治階層同貴族一定冇運行。

「統治」 係一種高深嘅藝術，以維持政權的穩定性，講就容易，做其實非常困難，當民智未開之時，個個未食甜筒，件事比較容易做，因為傳統上，社會階級較低嘅人會服從階級較高嘅人，正如六、七十年代的香港，一聽到鬼佬講英文，邊個唔腳軟先？阿sir叫你做乜，唯有yes sir yes sir！你話乜就乜啦（總之唔好講英文喇），咁管治自然得心應手！但係民智開咗，個個有degree在手，或讀過兩三本政治哲學書，就一定唔可以用呢種方法； 由於每個國家嘅客觀條件唔同，亦唔係每個國家都可以依靠傳統宗教倫理嚟確保民衆嘅服從性同秩序性。響20世紀初期日本，天皇本身就係一個宗教圖騰，服從天皇，等同服從上帝，其實日本人嘅服從性同向心力，都帶有強烈宗教色彩，不過佢哋膜拜嘅係一個活人，並非一個虛構嘅偶像。

大家都應該聽過一個故事，當時嘅日本，天皇唔係咁容易俾你見到，二次世界大戰結束前夕，好多人先第一次響收音機度聽到天皇裕仁嘅「玉音」，後嚟美國麥克阿瑟佔領日本，特登流出咗一張合照，就係高大嘅佢同五尺差小小嘅裕仁天王合照，日本民眾對天王嘅宗教式膜拜狂熱，先至開始減退。我最喜愛嘅日本文學家三島由紀夫，亦深深明白到天皇依個宗教圖騰，係維持日本民族團結同大和精神存在嘅最後樁腳，因此響1970年以切腹自殺以表忠貞，希望喚醒民眾對天皇嘅忠誠信仰，可惜大江東去，信仰麥當勞漢堡包先係大潮流所在。

大正時代嘅日本，工人運動亦同其他國家一樣，響日本蓬勃起嚟。1920年代，大量工會相繼成立，呢啲工會，大多數係工人為咗保障自己嘅權益而創立，但係有一啲己經開始支持革命，或者同日本共產黨或第三國際建立聯繫。兩者嘅分別係，一般工會只係要求提昇工人地位同保障勞動權益，並無意打破整個資本主義制度；但係後者，擁有高度階級覺悟性同戰鬥意識嘅工人革命組織，先係政權嘅眼中釘，對於付之實踐嘅馬克思主義信徒，日本政府多年以嚟都採用兇殘無比嘅手段打壓，統治階層似乎深深明白到對手嘅可怕性，不過顛壓始終唔係辦法。

常公子 2021-10-18 12:02:01 1920年代，工會發動工人有組織性罷工已經係家常便飯，而且以罷工作為手段爭取勞工權益或實踐革命理念，已經不再侷限於大企業大工廠大城市，亦逐漸蔓延到小型工廠中小企同其他二三線城市，而且有急速蔓延之勢，二次世界大戰前夕，最高峰點就係1931年，當時全日本約有8%嘅工人參加咗工會組織，人數達到36萬9000人。而正正就係1931年，日本軍方就發動咗918事變侵華，相信並唔係一個巧合。有時候，窮兵贖武未必一定向外，真正原因好多時候係向內，大家必須明白。

要民眾唔相信馬克思，其實亦都相當簡單，只係要改善工人勞動街嘅待遇就可以，個個有飽飯食，鬼同你去革命咩？大家睇美劇同荷里活電影，如果個個美國人都同電影電視劇中一樣，人人有間獨立屋house屎，前邊有車房泊兩架車，後院有個泳池仔開BBQ燒肉party，點解五年前會有人投票俾當奴侵呢？真相並唔係咁，從來受苦受難嘅民眾係隱形嘅，係不被注視嘅，最好你就相信，依群人只係社會上面嘅少數派，睇得美劇同荷里活電影多，相信你都會認同佢哋只係少數派，所以文宣好重要，軟實力有時比硬實力所發揮嘅功能更大。

大正時代工人運動蓬勃發展，亦反映出當時資產階級對工人嘅剝削亦到達頂峰，改善普羅工人待遇？No way啦，不過個人認為，最大問題並唔響工人身上，而係響嗰一群讀過書，又響社會上鬱鬱不得志懷才不遇嘅人身上，大佬我三大畢業，本來天命係要成為社會上嘅Ruling Class，或者至少有兩層康怡在手，現在你要我打份皮零嘢人工嘅閫工，朝九晚九，做到隻狗，真係唔嬲有鬼，如果我只係中三畢業，我倒願意承受自己嘅悲慘命運，現實無法如我們所期待時，那麼唯有「想像」去改變現實囉。

大正時代嘅日本，上述依種人，或者我哋叫知識份子中產階級對現實境況嘅不滿，先係整個社會上最大嘅火藥庫。世界上最可憐嘅人，就係以為自己係「精英」嗰班人，響資產階級同貴族階層眼中，「精英」一詞同普羅民衆定義有所不同。讀過書三大畢業就係「精英」？真係發夢冇咁早，「精蟲」你就有幾億，冇錯，你有冇幾億吖？冇吖嘛，咁精咩英咩呀？所以我成日都覺得英國人好聰明好狡猾，離開前夕擴大大學學額，將大學教育普及化，埋個計時核彈俾你二十年後爆！

#常威💀 #蔣介石平反系列 #黃金十年 #民國歷史

常公子 2021-10-19 13:19:37 ［常威近代史］第六百零一回 統治者的藝術（高清錄音版）

#唔鍾意睇字可以聽

https://www.facebook.com/129055447762576/posts/827311644603616/

常公子 2021-10-20 12:58:13

【常威近代史】（六百零二回）
想改變世界嘅人 最後反而改變咗自己

1931年嘅918事變，無疑係中華民國嘅轉捩點，自從蔣Sir1927年北伐成功推翻北洋軍閥，建立咗一個比較穩定同有向心力嘅南京政權，加上張學良易幟，情況雖然唔可以講話好好，但係已經比過去好得多，國民黨史觀，亦將1927年之後嘅十年稱呼為「黃金十年」，但係1931年嘅918事變，無疑就係日本人為「黃金十年」送上嘅大禮，作為競爭對手，真係冇理由比你強大落去，或者冇理由畀你就咁翻身。

918事變，同步亦係日本嘅轉捩點，上幾集已經講過，為咗防止馬克思主義工人運動擴散，以及挽救離心離德嘅日本民心，軍方越過政客，發動中日戰爭機器，所謂牽一髮，動全身，成個局面亦開始大扭轉。918係中日反檯嘅起點，同時亦都強化咗日本同西方列強衝突，英美兩國支持國聯譴責日本佔領東北（ 當然只係譴責，冇任何具體行動），之後日本建立「滿洲國」，美國政府亦一直拒絕承認滿洲國的合法地位，雖然有唔少美國企業希望同滿洲國合作做生意，政治還政治，做生意還做生意，兩件事嚟。

1930年，日本係三國海軍軍備協定上，勉強同意其10:10:7（恥辱）比例，但係去到1934年，當滿洲國建立之後，日本政府亦都乾脆廢除三國海軍協定，決定大幅擴軍，戰略上採取「北守南進」政策，響北面對抗蘇聯、美國及中國三個國家，喺南方則以擴展東南亞為目標。

滿洲國嘅出現，亦令日本對韓國、臺灣等舊有嘅殖民地重新定義，1931年前嘅日本殖民地政策，以殖民地自主安定、自給自足為主（即係英國97年前對香港嘅做法，你最緊要搞掂自己），918之後，日本則認為殖民地應該為母國提供大量人力及物資，亦要將殖民地編入軍國主義總動員體制之內，殖民地生產嘅產品及資源，亦要供應日本嘅軍事化經濟，舉個例子，去到1930年末期，韓國嘅教育以日文完全取代，韓語完全被禁止使用。

因為入侵東北同改變殖民地政策，日本國內經濟亦出現急劇變化，1931年1934年，日本係經濟大恐慌復原嘅速度比西方經濟更加快，佢嘅工業生產數字喺呢段時間成長咗82%，由1930年到1936年日本對外輸出亦增長接近一倍，除咗棉產品（紡織業）外，日本亦開始製造各式各樣其他產品，亦由低科技輕工業邁向高科技重工業（有冇睇宮崎駿風起了，呢段時間就係日本研究開發三菱零式戰鬥機），日本嘅產品除咗壟斷咗亞洲市場，亦開始大量進入歐洲同美國，日本1930年代嘅表現，簡直係一次經濟奇跡，講真日本人都幾巴閉，幾次創造經濟奇蹟，又幾次仆晒街又起翻身。

常公子 2021-10-20 12:58:24 30年代嘅經濟飛騰，有好多因素主宰，例如經濟政策同匯率政策，但其中一個，就係傳統嘅多黨制議會政治文人政府已經唔再被國民信任，之前講過，當時日本人認為，文人民主議會政治，等同爭拗不斷，完全做唔到嘢，亦等同官商勾結，貪汙舞弊圍威喂，打劫平民百姓血汗金錢之餘，國家亦唔見好境，呢個觀點，好難話啱定錯？總之事實擺在眼前，隨著1932年一個年輕軍官刺殺日本文人首相犬養毅（孫文個friend，1855-1932）後，日本走向新嘅政治體制模式，多黨制輪換再冇市場，日本平民百姓都唔想再被政黨及政客操縱政治，由1932年到1937年間，五個新任首相都唔屬於任何政黨，而且有越嚟越多官僚同埋軍人進入內閣，擔任重要公職，反而專業政治家（政客）嘅人數一直減少，去到30年代末期，國會議員入閣，只有一兩個貨仔。

由於軍人同官僚係整個日本政治體制已經到達權力高峰，繼續想逗份糧或生存嘅政客們，亦都轉軚支持軍人行軍國主義，向外擴張，傳統上，政客係替財閥領袖同埋地主服務，係佢哋嘅代言人白手套，但係時移世易，西瓜靠大邊，職業政客亦都改變咗佢哋嘅生存方式，況且唔配合大環境大趨勢，分分鐘監都有得你坐（或死）。亦都係依個理由，軍國主義最後一方獨大，終於響萬眾一心之下發動全面中日戰爭及太平洋戰爭，仲偷襲埋珍珠港添。咁咁咁，成個局面裡面，昭和天皇裕仁嘅角色又係乜？其實冇人知道，佢應該係乜嘢都唔知道，乜嘢都冇理掛（今日佢基本上冇權），理論上如此，除非唔係。

喺日本軍人嘅眼中，例如之前講過嘅關東軍智囊石原莞爾先生（1889-1949），佢哋認為，世界係互相敵視嘅，西方列強係一直抑壓日本嘅強大崛起，因為東風唔可以壓西風，西方世界嘅價值觀先至係主流，日本想改變遊戲規則，就一定會被整個西方世界圍剿至體無完膚，所以，日本必須建立一個自給自足嘅巨大帝國，以強大軍事實力壓倒西風，或者，依一個就係偷襲珍珠港最大嘅理由。石原幻想中嘅最後戰爭，就係東方同西方揸fit人嘅大決戰，亦即係美國同日本嘅大決戰。

從三個軸心國代表德國、意大利及日本嘅經驗，我哋可以睇得到個共通點，佢哋代表第二期近代化國家嘅反應，歐洲法西斯模式啟發咗1930年代日本嘅統治者，三個國家嘅統治者軍均透過一個光榮嘅國體理念以激發全體國民嘅潛能，以達成軍事上霸權、帝國經濟自足、以及國內既反民主又自上而下嘅政治體制，然而面對各種現存政治團體及財閥權力，日本同意大利均無法全面瓦解佢哋以建立一個全面極權體制，希特拉或者好一啲，不過仍然唔可以講係成功。

對日本918事變嘅反應，講到呢度為止，下一集我哋返去中華民國。

#常威💀 #蔣介石平反系列 #黃金十年 #民國歷史

常公子 2021-10-21 12:07:46 【常公子歷史頻道422回：替大軍閥平反系列之 世界新秩序建立】

♊ Youtube 暫停咗兩集，真係唔好意思，同大家say sorry，因為阿潮同我工作都相當繁忙，不過都開心，起碼搵到食，好過冇工開，或者返工不足，做人應該要感思知足知啱。

♑ 今集講新世界秩序出現，其實每一次大戰過後，就要重組全新秩序，19世紀大英帝國雄霸世界，原因係因為打敗咗法國稱雄歐洲嘅拿破崙，去到20世紀，無厘頭發生嘅第一次世界大戰將一切推倒重來，新世界秩序，中心再唔響歐洲，而喺轉移去咗美國同日本兩個新興嘅工業化國家身上，之後兩個國家打咗場驚世嘅大海戰，就係太平洋戰爭，最後美國用兩個原子彈結束戰事，於是一個全新嘅世界秩序又再建立起來，響新嘅世界秩序裡面，美國獨當一面成為世界覇主，呢個秩序延續至21世紀嘅今時今日，情況又開始出現變化。

♈ 一場新型冠狀病毒，催化咗變化嘅發生速度，相信亦都係冇人能夠想像得到，上一次，係美國對日本，今次，係美國對中國，由強大的競爭開始，但係最後，會唔會邁向變戰爭？其實冇人能夠預料得到。或者，經過時代嘅更替，一個新秩序建立係咪必須通過一次毀滅性嘅大戰先可以出現？1991年，蘇聯無聲解體或者係一個借鏡，事前，亦冇人能夠想像蘇聯呢個超巨大國家體系可以用咁嘅形式謝幕，中間並無發生過任何毀滅性戰爭，一個全新嘅世界秩序就被建立出嚟，但，今次呢？

✅https://youtu.be/fb3lDTXeVPg

常公子 2021-10-21 19:12:17 ［常威近代史］第六百零二回 想改變世界嘅人最後反而改變左自己（高清錄音版）

#唔鍾意睇字可以聽

https://www.facebook.com/129055447762576/posts/828638281137619/