常公子 2021-9-21 12:22:38 ［常威近代史］第五百九十回 人人抽後腿（高清錄音版）

#唔鍾意睇字可以聽

https://www.facebook.com/129055447762576/posts/810645989603515/

常公子 2021-9-23 11:04:34 【常公子歷史頻道416回：替大軍閥平反系列之 意識形態政權】

♊ 近代史學最大嘅發現，莫過於是「民族」和「國家」概念嘅全新移植，所為民族國家，其實是19世紀先出現，所謂中華民族，亦是20世紀初期出現嘅全新概念，本身最大作用，係用嚟取代「清帝國降虜」依個概念，響二十世紀初期，如果你認同你本身係中華民族嘅一分子，即認同革命，亦即認同推翻滿清皇朝統治。中華民族，後嚟仲包括五族共和，將原本清帝國嘅滿族亦包含在內，最後同化在內，無分彼此，大一統了對方，今日你能夠講得出名字嘅滿洲人，除咗歷史書上嘅人物外，大概只有一個周海媚。

♑ 香港人嘅問題就係有部份人唔夠愛國，或者愛英國，因此今日有「愛國者治港」依個術語，響美國英國或德國，冇「愛國者治國」依個問題，香港人，亦有部份唔認同自己係中國人，甚至敵視和鄙視依個與生俱來嘅民族身份，大概有有識之士認為，2019年所發生嘅事，同上述「民族認同」概念相當有關係，當然亦和香港樓價相當有關係。因此事件平息後，要處理嘅問題，就係「愛國」嘅問題同埋「居住」嘅問題，問題現在正在處理中，估計處理嘅時間會長達十年至二十年以上。

♈ 最近美國總統拜登喺聯合國上嘅發言，再一次強調並非想挑起新冷戰，只想謀求全世界嘅和諧團結同合作，冇正面點名批評中國，態度好似溫和咗，但係未發言之前，美國同澳洲「突然」合作，開發核潛艇計畫，甚至令歐洲同法國反目，發覺更加自18世紀美國建國以來，第一次召回美國大使以示抗議。當日美國獨立，法國係第一個承認美國嘅國家，如60年代初期，法國係第一國承認中華人民共和國嘅西方國家。盟友間會否反目？相信時間會冲淡一切，畢竟只係錢嘅問題，唔係意識形態嘅問題，亦唔係你死我活嘅問題。不過我重申一次，我個人覺得人類面對嘅最大問題，唔係經濟、意識形態或者政治問題，而係氣候變化問題，過去兩三年，大家已經明顯睇得到極端氣候逼到埋身，中秋佳節都有三十四度，氣候問題，相信會響未來幾十年內急速惡化，如果大家（無論您信奉資本主義又好共產主義好）再唔去解決，人類亦都冇其他問題要解決鳥。

✅https://youtu.be/gpnXSa9upu8

💚【我奮鬥不奮鬥】 常公子 楊熙合著

電子書下載⬇ https://play.google.com/store/books/details?id=CVo3EAAAQBAJ
Amazon Kindle版下⬇
https://www.amazon.com/dp/B098XHWTDK
實體書訂購⬇
https://www.382now.com/product?id=325

常公子 2021-9-24 10:31:42


【常威近代史】（五百九十一回）
水患問題攞你命三千

1931年7月17號，中華赤色郵政湘贛省總局發行一套三枚「赤色郵票」，我諗今時今日嘅炒價會係天文數字。7月20號，已經退休嘅民國關公吳佩孚，響四川為成都國學會會員講解《易經》，由一個叱吒風雲嘅大軍閥，變成一個普通人，過平凡退休生活，優哉遊哉，係上一個時代特有嘅風景，新一個時代，係生死相搏、血肉橫飛嘅時代，打輸咗好多時候係代表死亡。唔好問我，點解個時代會變得越嚟越血腥殘酷？蔣Sir本身有百份之五十責任要負。

講埋吳佩孚嘅收場，1931年918事變發生後，吳佩孚去咗北平居住。其間曾猛烈譴責「偽滿洲國」依附日本，分裂中國。但吳佩爭亦曾應其舊部屬、同日本人關係密切嘅齊燮元（1885-1946）聘請，為佢嘅「特高顧問」，每月領「車馬費」數千元（鬧還鬧，養老金照收）。但到咗1937年，齊燮元擔任日軍傀儡政權「華北臨時政府」京津衛戍司令時，吳佩孚便與之斷絕關係。日本占領北平後，日本駐華特務機關首腦、侵略中國主要策動人土肥原賢二（1883-1948）親自出馬，前來拜會吳佩孚，邀請吳佩孚出山，但被拒絶。1939年12月，吳佩孚於北平因吃羊肉餃子引發牙痛，由一日籍牙醫替其剝牙，4日後細菌感染，引發敗血病身亡。但江湖盛傳，吳佩孚係因為拒絕日本人遊說，故被日本人謀殺。另有傳說稱該日籍牙醫實為日軍指派嘅刺客，家人得知消息，連夜乘船逃往重慶。吳佩孚病逝前諄諄告訴國人:

「汝輩讀孔孟書，當知其義，孟子不云乎，小固不可以敵大，寡固不可以敵眾，弱固不可以敵強，奈何有其一而敵其二哉!」其葬禮各界聞人皆親臨致敬，孔祥熙及吳稚暉等人都有發表演說。

7月23號，蔣Sir第一次提出鼎鼎大名「攘外必先安內」嘅治國軍事方針，處理事情先後有次序，先打國內共產黨，再面對日本人侵略，當然蔣Sir呢個方針，被好多後世人非議，亦係佢呢個想法，引發後嚟嘅「西安事變」同「國共第二次合作」聯合抗日，不過以治國技術層面嚟睇，蔣Sir可以講並冇錯，「攘外必先安內」冇乜唔啱，自己都未搞掂？點樣可以抵禦外敵呢？不過歷史冇如果，就是如此這般發生了。同日，位高權重嘅財長宋子文喺上海火車站如刺脫險，但係佢身邊嘅機要秘書就冇咁好彩，中彈身亡，真係險過剃頭。

7月26號，兩個爐頭嘅另一個廣州國民政府外交部長陳友仁（1878-1944）響日本會晤日本外相，提出對「滿蒙問題」讓步（即係唔反對你建立偽滿洲國），以換取日本供應武器嘅要求。仲唔係漢奸？陳友仁原籍廣東順德，太平軍後裔，係一位著名的左派鐵腕人物。佢一生最著名事蹟係響1927年擔任武漢國民政府外交部長時，依靠強硬外交手段，幾經交涉，收復漢口英租界同九江英租界，創造咗弱國取得外交勝利神話！打開中國收回租界先河！

常公子 2021-9-24 10:31:53 7月28號，長江、漢水暴漲，漢口水位超越警戒線，為60年來前所未見，漢口江河決堤，當然製造咗無數災民。7月30號，賑務委員會委員長許世英（1873-1964）稱今年，即1931年全國水災區遍及16省，災民數目達到5000萬以上！至於有幾多人無家可歸？有幾多人妻離子散？至於死咗幾多人？其實冇人知，亦無統計數字，總之就立立亂，水利問題上次已經講過，唔再重複。

去到1931年8月，長江中下游產糧區水災越嚟越嚴重，8月2號，長江漢水勢大漲，漢口差唔多完全被淹沒。16號，長江水標創出53英尺嘅新紀錄，17號更加到達53.7英尺，武漢災民無處可避，到咗30號，單單係漢口就有16萬戶洪水被淹歿，浸死8000幾人。長江中下游嘅湘、鄂、贛、皖、蘇五省同時受災，根據8月11號上海《申報》報導，五省受災總人口達到2300萬，房屋倒塌一萬間，財產損失超過20億。8月30號《申報》再報導，單單係湖南一個省，水災區域達到54個縣，災民人數達1400萬，死亡人數20萬。

今次發生係1931年夏天嘅大水災，係由1931年向前數半個世紀以來最大嘅一次，人命財產損失嚴重，除咗華東長江一帶，黃河、珠江、黑龍江入夏以嚟亦都連續暴漲，河北、山東、福建、四川、河南省均有嚴重水災發生，上面講過，全國災民總數接近5000萬，每八個中國人，就有一個受災。7、8月份，中國發生半世紀以來最大嘅水災，9月，日本人發動918事變，相信亦唔會係一個巧合，趁你病，攞你命，常識啫。

1931年8月1號，上海法租界會審公廨正式撤銷，江蘇省高等法院第三分院及江蘇上海第二特區地方法院同時設立，取代會審公廨職務，今年6月16號，中法雙方開始就收回上海法租界會審公廨進行正式交涉。19號達成協議，國民政治響上海法租界設立地方法院及高等法院各一所，按中國法律進行訴訟同裁決，7月28號，中法雙方正式簽字，29號公佈全國。會審公廨（司法權）雖然被民國政府收回，但係法租界內，警察權同埋檢察權仍然係外國人手裡面，即係法院你控制，但拉邊個告邊個就我話事？咁樣，領事裁判權嘅問題依然存在啊。

#常威💀 #蔣介石平反系列 #黃金十年 #民國歷史

常公子 2021-9-24 12:41:04

我只為了自己而活著，我只為自己的人生負責任，其他人的人生和我一概無關。我選擇躺平，只因為我想這樣做而已。我不在乎經歷什麼，只在乎最後成為什麼，這才是我的哲學角度。究竟所謂「躺平主義」為什麼會引起這麼多人的共鳴？當中的具體內容又是什麼？它有什麼獨特的地方能夠吸引這麼多年輕人信奉和實行？又或者，這個新興的「躺平主義」和我們身處的時代是否有什麼必然的聯繫？這些都是這本書想探討的問題。

【我奮鬥不奮鬥】 常公子 楊熙合著

電子書下載⬇ https://play.google.com/store/books/details?id=CVo3EAAAQBAJ

Amazon Kindle版下⬇
https://www.amazon.com/dp/B098XHWTDK

實體書訂購⬇
https://www.382now.com/product?id=325

常公子 2021-9-25 13:24:39 【常公子歷史頻道417回：替大軍閥平反系列之 泥菩薩正式過江全身而退】

♊ 民國奇人黎元洪其實相當奇，首先佢本身係一個清帝國嘅中級軍官，從來冇諗過參與辛亥革命，但係就被迫成為辛亥革命中一個非常重要嘅人物，佢係被人威脅出嚟做武昌革命軍嘅話事人，其實當時嘅情況，係等於身不由己，畀人送上斷頭臺，祇不過，時來運到，佢不但冇死，而且成為新生五色旗中華民國一個重要嘅政治人物，兩度成為中華民國大總統，由於性格耿直，到時圓滑，唔會得罪人，受到國民所景仰，最後全身而退，晚年喺天津從商，平安終老，都可以講得係一個少見嘅政治童話故事。

♐ 政治係最大嘅賭博，因為贏起上嚟，係會贏到盡，贏得整個天下，贏得流芳百世； 但係如果輸，下場會相當慘烈，尤其是中國東方式政治操作； 黎元洪全身而退嘅例子，喺民國初年，亦並唔係罕見，好多政治人物，係權力鬥爭失敗之後，都可以全身而退，平安終老，先有黎元洪，再有段祺瑞，甚至後來的吳佩孚、孫傳芳，馮玉祥……比比皆是，當然1927年北伐之後，整個玩法全然不同，高階政治人物全身而退幾乎成為不可能，一係成為階下囚或死，一係繼續玩落去，冇得退場。當中的變化，其實非常可怕，至於點解會變成咁？明眼人都明白係因為一個人，係佢親手打開血腥嘅恐怖殺戮大門，從此以後再不能再輕易關上。

♒ 香港嘅情況都係一樣，2019年前，到2019年後，完全係兩個世界，兩種玩法，因為「破局」出現，雙方被迫攤牌，因此，「鬥而不破」 其實相當重要，嗌交還嗌交、鬥還鬥，千萬唔可以破局，大家處於拉扯狀態，彼此都有底線要遵從，因此彼此仲有下臺階，一旦拆毀下臺階，越過底線，彼此再無退路，就祇有破局收場。但明白「鬥而不破」政冶藝術嘅人並唔多，最佳嘅狀態，並非達到你心裡面所響往嘅結果，而係將狀態維持於前往你心裡面所響往結果嘅路途上，將條路拉長嚟行，本心不變，但係唔希望咁快衝過終點，就叫做「鬥而不破」，成世人流流長，其實係有好多時間可以浪費，冇必要急於破局，亦冇必要急於收割。「鬥而不破」 除咗可以用嚟套用於政治上，亦都可以用嚟套用於日常生活或人際關係上，好多時候，退一步，海闊天空，停一停，就會有新嘅發展。所以到咗今日，我都係好唔明白香港呢兩年所發生嘅所有事囉……

✅https://youtu.be/WJ4Fu49eUKI

💚【我奮鬥不奮鬥】 常公子 楊熙合著

電子書下載⬇ https://play.google.com/store/books/details?id=CVo3EAAAQBAJ
Amazon Kindle版下⬇
https://www.amazon.com/dp/B098XHWTDK
實體書訂購⬇
https://www.382now.com/product?id=325

常公子 2021-9-25 22:49:36 ［常威近代史］第五百九十一回 水患問題攞你命3000（高清錄音版）

#唔鍾意睇字可以聽

https://www.facebook.com/129055447762576/posts/813276846007096/

常公子 2021-9-27 12:28:17

【常威近代史】（五百九十二回）
幾個軍人喺大時代嘅遭遇

1931年8月，洪水淹沒了三分一個中華民國，5000萬人受災，生靈塗炭，無數人無家可歸，情況大概比今日嘅埃塞俄比亞同黎巴嫩惡劣百倍，8月1號，財政部制定扶植新聞業辦法，不再徵收報館或通信社嘅營業稅，即係搞傳媒唔使交稅。8月8號，馮玉祥手下十三太保之一石友三（1891-1940）戰敗，喺山東德州通電下野。講起石友三，佢仲有一件豐功偉績，就係火燒少林寺。話說1926年，吳佩孚同馮玉祥交手打仗。吳佩孚手下有一個團長，法號妙興，本來係少林僧人，可能因為功夫好所以從軍，妙興偷襲馮玉祥後方，令其損失慘重，於是馮玉祥就下令石友三帶領軍追擊，一路打到嵩山少林寺，殺死妙興和尚，傳説石友三圍困少林，殺死200名僧人，仲命人把煤油搬進寺中，燒毀多座大殿。由此事可以睇到，無論係易筋經黑級或者金鐘罩第十二關，都難敵真槍實彈。

8月9號，國軍蔡廷鍇（1892-1968）部隊佔領江西瑞金，蔡廷鍇係一位出名嘅抗日軍人，1931年佢為國軍剿共，1932年參予「淞滬抗戰」，粉碎日本人策劃企圖佔領上海嘅「一二八事變」（第一次上海事變）；1933年11月20日，蔡廷鍇與陳銘樞（1889-1965），蔣光鼐（1888-1967）等軍頭發動著名嘅「福建事變」，建立「中華共和國人民革命政府」。蔡廷鍇任軍事委員會委員，人民革命軍第一方面軍總司令，佢哋抵抗合圍福建嘅國民黨嫡系部隊，同紅軍簽訂了抗日反蔣初步協定（又易如反蔣）。依個行動，響當時產生咗巨大影響。

事變失敗後，蔡廷鍇流亡海外，1935年蔡廷鍇響香港同李濟深（1885-1959），陳銘樞，蔣光鼐等組織「中華民族革命大同盟」，主張聯合各黨各派一致團結抗日。1935年底，蔡廷鍇擔任國民革命軍第十六集團軍總司令，參加抗日戰爭。全面抗戰初期，蔡廷鍇領導軍隊參加咗崑崙關戰役等，但後來被蔣Sir奪去軍權。國共戰爭期間，蔡廷鍇一直主張和平，1949年後，蔡廷鍇先後當選為中央人民政府委員、全國政協常務委員、全國人大常委會委員，後又任全國政協副主席，中華人民共和國國防委員會副主席，國家體委副主任，中國國民黨革命委員會中央委員會副主席及世界和平理事會理事等重要職務。韓戰時，蔡廷鍇擔任抗美援朝保家衛國委員會常務委員。「文革」期間，蔡廷鍇作為周恩來點名保護嘅要人之一，逃過被紅衛兵批鬥，1968年4月25日，蔡廷鍇響北京逝世，享年七十有五，結束身經百戰嘅光榮一生。

8月11號，新疆富蘊附近發生八級地震，死亡人數不詳。8月13號，國民政府任命蔣作賓（1884-1942）為著日本全權公使，順便一提，蔣作賓係孫文同蔣Sir親信，佢係軍人出身，中年後擔任外交工作，曾經替中華民國去到唔同個家擔任外交官，1931年去日本嘅時候，918事變爆發，蔣作賓個人主張強硬路綫不符合蔣Sir期望，蔣作賓遂奉蔣Sir指示，對日本採取克制態度。1935年5月，兩國公使館升格為大使館，蔣作賓成爲中國第一位駐日本大使。

常公子 2021-9-27 12:28:29 同日13號，澳門彈藥庫爆炸，炸死24人；同日，美國遠東商業考察團到達上海，視察中國嘅商務情形。8月13號，離開中華民國一段時間嘅宋慶齡，因為母親倪桂珍（1869-1931）病故，由柏林返國，抵達上海。北伐成功之後，蔣Sir血腥清黨，搞獨裁主義，引發國母宋慶齡不滿，1927年8月，宋慶齡憤然離開中國，先後遊歷蘇聯、法國、德國、瑞士等多個國家，喺海外從事國際反帝國主義同埋保衛和平運動，曾經兩次當選為「國際反對帝國主義同盟大會」主席，而且佢係孫文老婆，名氣大於一切，今年，南京政府同廣州政府都屢次致電，請佢回國參與政治，但係國母始終冇答應。8月23號，宋慶齡發表聲明：「此次因母喪回國，暫擬留滬休養」，並未參與任何南京及廣州政府嘅活動，聲明裡面仲講，佢嘅政治立場，仍然同1927年離國前一致，冇人吹得佢脹（包括蔣Sir在內）。

8月14號，國民政府統籌救災，特設救濟水災委員會。8月15號，中國駐墨西哥熊崇志（1883-?）就墨西哥發生大規模排華事件向墨西哥總統提出抗議，「排華」 真係一個詛咒，成日都會響不同時代不同地域發生，點解呢？係因爲我哋中國人太乞人憎？抑或係中國國勢太弱呢？我唔知道，亦想唔通。同日，羅馬教皇對中國災區捐出25萬意大利里拉，同日上海《申報》報導，本年水災區域為1000平方公里，經濟損失合共30億元，相等於中國內外債總和。

8月17號，「第三黨」 首領鄧演達（1895-1931）等15人喺上海被捕，鄧演達歷任黃埔軍校教練部副主任、黃埔軍校教育長、國民革命軍總司令部政治部主任兼武漢行營主任、中國國民黨中央執行委員、中國國民黨中央政治委員會委員、中國國民黨中央軍事委員會總政治部主任等，國民黨內部屬於國民黨左派。1931年被蔣Sir秘密處決於南京麒麟門，唔好嘆息，世事本來如此。

#常威💀 #蔣介石平反系列 #黃金十年 #民國歷史

常公子 2021-9-28 18:04:00 ［常威近代史］第五百九十二回 幾個軍人喺大時代嘅遭遇（高清錄音版）

#唔鍾意睇字可以聽

https://www.facebook.com/129055447762576/posts/814912809176833/

常公子 2021-9-29 13:29:24


【常威近代史】（五百九十三回）
918事變爆發前夕

1931年8月17號，全國唯一一間國產皮革大廠哈爾濱雙合盛皮革工廠發生大火，全廠被焚燬，損失500萬元！8月22號，日本天皇為長江水災區域捐款10萬日元賑災，今日10萬日元，大概值七、八千蚊港幣，唔夠響銅鑼灣租劏房，但係當日未打第二次世界大戰，日元未大幅度貶值，日元同美元同步，當然10萬都算少，算係做個樣。8月25號，武漢傳染病流行，每日大概有300人死亡；同日，上海聯華影業公司及全國37間影院，聯合進行電影義演，以籌款賑濟水災，8月26號，立法院討論賑濟水災問題，決定發行賑災公債8000萬元，即係印銀紙賑災，但係呢個提議，被財政部長宋子文反對，因為佢都心知肚明，再印落去都唔係辦法，印刷機一早已經引爆咗，佢堅持只發行1000萬公債。

8月27號，張學良喺北平召集韓複榘（馮玉祥手下十三太保之一，1890-1938）、徐永昌（1887-1959）、傅作義（1895-1974）以及東北軍國將領開會，討論閻錫山同馮玉祥出洋嘅問題，之前中原大戰嘅戰敗者，山西王閻石山已被架空，無權無兵得返個朵，一代大軍閥馮玉祥更加一鋪清袋，隱居於山西汾陽縣山谷河道。為免兩人再響新時代篤眼篤鼻，張學良提這兩人出國，去考察又好，去旅遊都好，總之唔好再留響中華民國，旅費方面可由中央及東北負擔，中央亦可給予相當名義，並保障其沿途安全。

閻石山於是宣佈下野出洋，並於12月22號前赴大連，表示過埋農曆年就去日本，但係好奇怪佢遲遲未動身。1932年1月5號，閻石山仲響大連雇用咗一架日本飛機飛返去山西探親，引起各方注意。蔣Sir見佢未走，亦指令張學良對其採取威逼行動。

8月仲有幾件事要補充，首先魯迅在上海創辦木刻講習會，成為中國最早研究現代創作木刻藝術嘅組織； 另外之前舉行嘅中華民國第一次高等考試響8月放榜，有99個人被取錄為公務員，呢次高等考試，分別考選普通行政人員、外交官領事官、教育行政人員、財務行政人員同警察行政人員，即係AO，不過全中國得99個人被取錄，就真係寡咗少少，相信被取錄嘅人，亦都唔係普通人。

常公子 2021-9-29 13:29:34 今個月，一艘由天津港開出嘅英國貨船「順天號」，比大海盜傅瑞五（1904-1965）夫婦劫持，引發外交事件，傅瑞五係老牌海盜，不過1931年，佢只係得27歲，就係一個老牌海盜？可以睇得出佢出道比較早，可能10歲左右已經做緊海賊王路飛，傅瑞五綽號傅老七，五定七？自幼生活貧困，四處漂泊，咁梗係啦，唔通一個富二代會做賊？富家小姐會為興趣做雞咩？佢十幾歲就加入黑社會，後來同老婆劫持「順天號」而名噪渤海，好多人慕名投奔，自此成為獨霸一方嘅大海盜品牌。過多幾年，傅老七就去上海從商，應該瀨嘢，做開海盜冇乜可能識投資？冇幾耐，佢又俾國民黨招攬為軍官，撈到團長職位，最後更加棄暗投明，國共內戰期間加入八路軍，1944年12月，傅老七部隊被改編為八路軍渤海海軍區第四軍分區獨立團，並先後擔任沾化縣大隊大隊長，渤海軍區海防支隊支隊長，海防總隊參謀長等職位，1947年響「三查三整」 中被管制教養，1952年轉業回鄉（應該係耕田了），1986年中共沾化縣委為其恢復名譽，都算係傳奇一生。

時間線進入轟轟烈烈嘅1931年嘅9月，即係「918事變」發生嘅9月，其實今個月，日本正式侵略中國嘅開始，8年抗戰，理論上係指1937年到1945年，中日全面戰爭爆發，但係真相，中日嘅全面戰爭開始，應該係1931年嘅「918事變」，8年抗戰，亦應該係14年抗戰先啱，有部分歷史學家，採納後者，將中日全面戰爭定為14年，並非8年。

9月1號，葡萄牙、芬蘭、智利等國家就中國遭逢水災表示慰問，慰問？Yes， only慰問。美國紅十字會捐款10萬美元賑災，杯水車薪。同日，廣州至香港長途電話業務正式開通，廣州可以直接打電話去香港，唔使打電報。9月2號，墨西哥華僑被迫離境，資產全部被沒收？墨西哥當局因墨西哥華僑反對不平等待遇，今日宣佈將華僑全部驅逐出境，今年7月以來，墨西哥多個州嘅排華委員會積極活動，Why？政府亦對華人經營生意加以重稅，並且制定新勞動法，規定華人商店必須有80%為墨西哥人，令到華僑做生意非常艱難，墨西哥政府仲下令華僑財產不準出售轉手，是引發華人嘅反抗情緒，今日被驅逐出境嘅華人，一無所有，赤貧返國，真係非常陰公。9月4號，廣州國民政府之下嘅粵軍進入湖南，同南京政府嘅蔣Sir軍隊喺衡陽一帶對峙。

9月10號，立法院通過《賑災工作條例》，正式發行公債8000萬元，之前講過財政部長宋子文認為衹能夠發行1000萬公債，但到最後就照發8000萬，亦由此可以睇得出，堂堂財長宋子文亦唔能夠話事，蔣Sir對印銀紙發債嘅概念，相信同宋子文有一定距離。銀紙真係唔可以亂印，印得多就會貶值，債亦唔可以亂發，能夠兌現定期派息就最perfect，一旦違約冇息派或變廢紙，就會大失民心，個人信用非常重要，國家金融信用更加重要。

#常威💀 #蔣介石平反系列 #黃金十年 #民國歷史

常公子 2021-9-30 11:41:58 【常公子歷史頻道418回：替大軍閥平反系列之 日本大正時代】

♊ 響日本歷史上，大正時代係一個奇怪嘅產物，雄才大略嘅明治天皇逝世後，結束日本明治維新時代，一個毫不起眼嘅東方島國，經過差唔多50年嘅明治維新，一躍成為世上列強之一，1896年打贏甲午戰爭，1905年打贏日俄戰爭，間接將清帝國同俄國羅曼諾夫王朝推向墳墓，相信當時世界上，冇人能夠想像得到，當然亦包括明治天皇自己同日本國民。當然明治維新時代，亦被後世人所美化同神化符號化，不過無論如何，響日本歷史上，明治時代就係佢哋最偉大嘅時代。

♉ 一個永恆不滅嘅遺憾，每一次當有能力嘅父親成就過高嘅時候，作為兒子就要承受強大嘅壓力，大正天皇正正就係其中一個典型例子，加上傳說，佢仲要有小小低能添，情況真係好很大鑊。明治天皇之死，代表天皇絕對威權時代結束，自由民主抬頭，平民百姓聲音開始響亮起來，挑戰日本藩族貴族階層長久以來對民間社會嘅剝削同壓逼，結果打造咗一個奇怪、充滿衝突同多元化嘅大正時代，大正時代響日本後世人眼中，亦係一個美好嘅時代， 最近大紅大紫嘅日本漫畫「鬼滅之刃」，就係以大正時代作為背景。

♈ 日本大正時代，未能將日本真正帶入自由民主歐美式嘅議會時代，締造和平，反而舖下咗邁向軍國主義嘅康莊大道，正正亦係一個好心做壞事嘅典型例子，當然，一場東京大地震，亦徹底將時代改寫，加上大正天皇之子昭和天皇，本身亦比佢老豆優越得多，能力大得多，野心亦都大得多，風雲際會，軍國主義之花響昭和手上終於開花結果，之後為整個亞洲帶來一場前所未有嘅巨大戰爭災難。時勢造英雄，的確冇錯，只有喺適當嘅時代，先能夠做出偉大嘅事情，不論係好事定係壞事。昭和之後天皇係邊個？相信你一時間亦都諗唔起……

✅https://youtu.be/2zvO5TCVN30

💚【我奮鬥不奮鬥】 常公子 楊熙合著

電子書下載⬇ https://play.google.com/store/books/details?id=CVo3EAAAQBAJ
Amazon Kindle版下⬇
https://www.amazon.com/dp/B098XHWTDK
實體書訂購⬇
https://www.382now.com/product?id=325

常公子 2021-9-30 22:38:38 ［常威近代史］第五百九十三回 918事變爆發前夕（高清錄音版）

#唔鍾意睇字可以聽

https://www.facebook.com/129055447762576/posts/816159835718797/

常公子 2021-10-1 14:36:13


【常威近代史】（五百九十四回）
對於918事變的某些觀點

日本人對中國嘅侵略野心，源遠流長，起源於一場發生於1895年嘅甲午戰爭，依場歷史性嘅大戰，代表住兩個歐化新興國家嘅興衰存亡，一場黃海大戰，日本帝國完勝清帝國，亦間接將清帝國嘅命運劃上句號，簽訂《馬關條約》之後，日本帝國得到韓國、臺灣及澎湖列島嘅主權，但係響清帝國國內嘅佔領區，包括遼闊無邊嘅遼東半島在內，基於西方列強嘅壓力，日本帝國被逼監生嘔返出嚟，呢單嘢，佢哋已經心有不甘。點解你搞殖民主義就得？我搞就唔得？冇人能夠得出一個滿意嘅答覆。第一次世界大戰結束之後，作為戰勝國嘅日本，奪取德國所有在華利益，喺佢哋心裡面，山東半島亦已經係囊中物。加上當時中華民國立立亂，有多個分裂政權存在，冇人能夠話到事。直至去到1927年蔣Sir北伐成功，先有個比較似樣嘅「民國政府」存在。當其時嘅東北，係張學良嘅勢力範圍，而張學良同蔣Sir嘅平等結盟，更加名義上將東北納入蔣Sir嘅南京國民政府管轄之下，日本人認為，東北並唔屬於蔣Sir南京政府，佢只係佢冷手執個熱煎堆，問題喺呢度。

即係話，蔣Sir國民政府擁有東北嘅主權，都祇不過係區區4，5年間嘅事，日本人喺東北所經營嘅一切， 前前後後已經搞咗二三十年，好話唔好聽，張作霖同張學良亦都係日本人扶植出響東北嚟話事，東北幾個重要嘅大城市，都係由日本人投資建立同經營嘅，咁點解從來一個仙都未出過嘅蔣Sir可以後發先至？更何況，東北一向係清帝國滿州人嘅故土，幾時關你中華民國蔣Sir事呢？所以，日本人稱呼東北為「滿蒙問題」，並唔係「中華民國」嘅問題，基本上唔關中華民國同蔣Sir事。更更更何況，響1931年，仲有兩個中華民國政權存在，一個首都響南京，另一個首都響廣州。廣州嘅中華民國政權，仲認同日本人對東北嘅做法添，咁條數應該點計呢？

剪不斷，理還亂。

呢個世界嘅嘢，永遠都係當事情發生咗之後，先至有一個定案，先至有一個官方說法出現，而個「官方說法」出現咗，就要大家相信同認同，大家都相當明白，所謂「正義」同「正確」，量度嗰把尺並唔喺普通人手上，而係響勝利者手上。當事情發生中，或者當鬥爭發生期間，根本各有各嘅講法，亦各有各嘅理據，亦各有各的正義同正確。

常公子 2021-10-1 14:36:23 響蔣Sir心目中，東北地區屬於中華民國就係理所當然，因為東北地區本來屬於清帝國，辛亥革命之後，中華民國係一個完全承繼清帝國嘅正式合法政權（包括承繼其土地權及債務），當然所謂中華民國嘅構成同內容多次轉變及易手，甚至國旗都變埋（由五色旗變咗青天白日旗），但本心不變，個招牌始終都係「中華民國」，國父係所有中國人認同嘅孫中山，而我蔣Sir就係孫中山嘅合法承繼者+親戚（另一個合法承繼者汪精衛早已著草了），所謂中華民國，其國內嘅人民均包含在「中華民族」呢個民族概念之中，而所謂「中華民族」，本身就包括滿洲人同蒙古人在內，呢個叫「五族共和」，五族共和概念係至高無上，不能更改嘅，因為佢係孫文講嘅。因此，由中華民國建立嘅1911年開始，東北地區就係屬於中華民國固有國土，意義上神聖不可侵犯，亦不可能被分割出去，如果有人想將東北地區從中華民國分割出去，就係一個侵略行為。

呢個就係918事變出現嘅前因後果，相信大家亦都好清楚。日本人 係想攞返本來佢哋已經得到嘅嘢，而蔣Sir則堅持本來就屬於佢嘅嘢，其實都冇話啱定錯，都係觀點與角度嘅問題，日本人進軍東北，亦都利用建立「滿洲國」而撇甩「侵略」依個十惡不赦嘅用詞，從而避免其他外國勢力嘅干擾（最重要當然係美國同蘇聯）。況且，原本清帝國嘅末代皇帝愛新覺羅溥儀亦響我手，清帝國從來無消失過，只係縮細咗，起碼1911年之後仲保有「紫禁城」清帝國國土嘅主權，溥儀亦冇退位，係清帝國嘅合法最高統治者，現在佢離開北京，返番去故鄉東北，返番去老祖宗努爾哈赤用十三副盔甲起家嘅白山黑水滿洲人龍脈源頭，重新建立一個屬於滿洲人自己嘅國家，有乜嘢唔啱先？我日本人只係出幾億日元幫佢手，出於一番善意，叫做守望相助，互相扶持，仲小？後嚟搞咗幾年，滿洲國仲愈玩愈好境，曾經成為全世界第四大經濟體系，發展欣欣向榮，威掛？

無法否認，「滿洲國」 只係一個傀儡政權，幕後人係日本帝國，真正嘅最高領導人應該係昭和天皇裕仁。加個「偽」字，亦都好合理，冇違和感。當然之後1937年中日全面戰爭爆發，亦都係基於兩個理由，第一，日本人並未甘心只擁有及控制東北地區，佢哋想染指中原，起碼要奪取大錢罌上海嘅控制權；而蔣Sir心裡亦明白，假如唔爆發戰爭決一死戰，東北地區就永遠分裂出中華民國之外，成為一個獨立個體存在。蘇聯人亦都明白，假如畀日本人佔領全中國，蘇聯始終會步中國後塵； 美國人亦都明白，如果日本統領亞洲，佢哋響東方嘅勢力就要全部撤走，比日本再坐大落去，東風就會壓倒西風，加上當其時，希特拉已經以風捲殘雲之勢佔領歐洲，兩邊夾住美國，日本一定會橫跨太平洋，打去美國本土（亦都打鳥），以報當年黑船之辱。

#常威💀 #蔣介石平反系列 #黃金十年 #民國歷史

常公子 2021-10-2 12:43:14 【常公子歷史頻道419回：替大軍閥平反系列之 三島由紀夫】

♊ 由大正時代講到三島由紀夫，其實有點風馬牛不相及，不過三島由紀夫係一個影響我好深嘅日本作家，所以不得不提，我記得我第一次接觸三島由紀夫，係我讀中二那一年，因為無心向學，成日周街逛，我響樓下啲舊書攤執到一本舊小説，係三島由紀夫的短篇小說集，由臺灣星光出版社出版，我睇咗第一篇短篇小說，就深深愛上他，之後幾年，將三島由紀夫所有作品讀遍，亦順便讀咗好多日本作家嘅作品，在睇三島由紀夫同時，我亦在睇金庸和古龍，少年時期閱讀時代，就是這樣渡過，當年，仍在青春期嘅我，大概唔明白三島講緊乜，咁唔緊要，長大後就明白了，響明白了之後，先知道有幾哀傷。

♐ 三島由紀夫最令人震撼嘅，就係佢以生命投入佢嘅文學，1970年，佢同幾個志同道合嘅朋友，發動小型政變，佔據東京自衛隊一處地方，之後向群衆發表宣言，呼籲國民回歸大和民族本源，忠於天皇，當然冇人理佢，最後切腹自殺，由同伴砍首，無可否認，係一個非常瘋狂嘅行為，瘋狂到了極點，不過，亦都非常切合三島由紀夫嘅獨特性格，去到最盡，以後無人能夠超越了。三島由紀夫絕對係一個極端民族主義者右翼主義者，亦由佢身上，可以睇得出日本自明治維新之後行到20世紀70年代嘅命運。二次世界大戰被投下原子彈嘅失敗震撼，一直震盪至25年後作家嘅生命終結。

♏ 60年代同70年代交界，係一個躁動不安嘅世界，美國西方有嬉皮士運動、反越戰、黑人民權運動，有John Lenon嘅歌星，日本有赤軍有三島由紀夫，當時嘅中國，正發生著浩浩蕩蕩、破舊立新嘅文化大革命，整個世界，仍然響二次世界大戰嘅血海之中尋找新出路，60-70年代之間嘅瘋狂燥動聚合於一瞬間爆發，激情過後，就可以開始忘記，忘記之後，就係一個全新嘅開始，而全新嘅開始，就係我哋而家面對嘅世界運作模式。順帶一提，我感覺到整個地球嘅燥動又再重新開始，由70年代產生嘅新世界秩序，到咗21世紀20年代，半個世紀過去，又係時候要改朝換代，下一個時代會點？我並唔知道，或者亦都冇命見到……

✅https://youtu.be/oEiN7xO7Gvw

💚【我奮鬥不奮鬥】 常公子 楊熙合著

電子書下載⬇ https://play.google.com/store/books/details?id=CVo3EAAAQBAJ
Amazon Kindle版下⬇
https://www.amazon.com/dp/B098XHWTDK
實體書訂購⬇
https://www.382now.com/product?id=325

常公子 2021-10-2 12:43:30

✅本土唯一香港土話近代史文本

❤【常威近代史】第一部《大清亡國關慈禧蛋牛治》，全面開放，免費下載， #freedownload！

Free下載連結🔽

https://play.google.com/store/books/details?id=C3hjDwAAQBAJ

常公子 2021-10-3 22:48:00 ［常威近代史］第五百九十四回 關於918事變某些觀點（高清錄音版）

#唔鍾意睇字可以聽

https://www.facebook.com/129055447762576/posts/817917548876359/

常公子 2021-10-4 17:01:17


【常威近代史】（五百九十五回）
918事變

如果你話有幾件事改變咗成個中國近代史走向，我覺得第一件事就係1840年嘅鴉片戰爭，第二件事就係1895年嘅甲午戰爭，第三件事就係1911年嘅辛亥革命，至於第四件事明顯就係1931年嘅918事變，第五件事係1949年中華人民共和國建立，第六件事係1980年鄧小平嘅開放改革。而根據我嘅定義，1931年9月，中日戰爭（或者叫日本侵華戰爭）已經全面爆發！

未到住，9月12號，中國第一輛自行研製嘅汽車，今日係全國道路協會主辦嘅上海路市展覽會中展出，呢架車由遼寧瀋陽市民生工廠製造，65匹馬力，載重量為4000磅（1.82公噸），時速最高可達25公里，遼寧民生工廠係遼寧迫擊炮廠嘅附屬企業，依間迫擊炮廠係1926年6月張作霖死於謀殺，其子張學良掌握東北大政後，開始附設生產汽車、暖房材料同各種皮革製品嘅民生工廠。東北邊防軍司令官公署仲將迫擊炮廠結餘款項中嘅4.3萬元，撥畀民用產品嘅試製費用，民生工廠將美國「瑞雷」型汽事進行拆卸，除咗發動機、後軸、電器裝置同埋輪胎等由國外進口外，（吓？咁多嘅？），對其他零件進行咗重新設計裝配，試製於1929年5月完成，響今日試車，好好醜醜都係中國製造（自行研製）。

1931年9月13號，距離918事變仲有5日時間，國民政府救災委員會公佈，收到各界捐款為銀元253萬4224元，小洋2935角，銅元3318枚，白銀73316兩，對5000萬災民嚟講，應該冇乜作用，何況最後有幾多落到災民手上，亦都冇人會知道，捐款嘅嘢，但求心安理得買贖罪券啫，千祈唔好太認真。記得好多年前，有個朋友去東京響某聯合國嘅大型慈善機構度做咗一年義工，卻發現機構高層，出差一定要搭商務客位，住嘅一定係五六星級大酒店，之後佢發誓永遠唔會再捐款比該機構。9月14號，中國當選為國際聯盟非常任理事國； 9月15號，紅軍響方石嶺殲滅「剿赤」軍韓德勤師6個團及蔣鼎文師機關、炮兵各一營。9月16號，因洋輪領航員罷工，中國成立領航員工會，從而打破外國人壟斷港口領航權局面。

毫無先兆地，到咗9月18號嘅夜晚，日本關東軍獨立守備隊第二大隊第三中隊副隊長河本末守中尉，帶領6名士兵嚟到距離瀋陽北大營700米嘅柳條湖，將多包小型炸彈設置在南滿鐵路路軌上。晚上10點20分，日本兵引爆炸藥，東側道軌接頭處有1.5米嘅鋼軌被炸彎，兩根枕木損毀，20分鐘後，一列喺長春開嚟嘅火車仍然係安全駛過爆炸點，12點到達瀋陽車站。但係日軍隨即造謠指責中國軍隊破壞南滿鐵路，想開拖搵個藉口啫，高級參謀板垣征四郎（1885-1948）代表響旅順嘅關東軍司令本莊繁（1876-1945）下令，以獨立守備隊第二大隊、第五大隊夾攻瀋陽北大營，另外第29聯隊進攻瀋陽，並抽調第二師團主力前來增援，正式向中國發動武力侵略！由於中國軍隊奉命不抵抗，日軍分別於第二日破曉時分5:30同6:30，不費一兵一卒，完全佔領咗北大營同瀋陽！上述事件是為918事變！

常公子 2021-10-4 17:01:27 早響1927年7月，日本軍方已經制定咗《對華策略綱領》同《帝國對滿蒙之積極根本政策》（田中奏折），提出「惟欲征服支那，必先征服滿蒙，如欲征服世界，必先征服支那」等論調，近年有歷史學者話《田中奏折》同嗰句排比句未必係真，不過日本關東軍明刀明槍侵略中國就係千真萬確。1931年6月，日本陸軍省反復研究制定出《解決滿洲問題方策大綱》，指示響一年內對中國東北採取直接軍事行動，7月，陸軍省將《大綱》 作為指令下達俾駐紮喺中國東北嘅關東軍，關東軍隨即策劃咗爆炸鐵路挑釁事端行動，因計畫被日本內閣知悉，陸軍省同關東軍為免夜長夢多，節外生枝，於是將行動日期提前，造成軍事行動嘅既定事實，霸王硬上弓，打咗先算！

蔣Sir喺918事變前後，多次下令不準抵抗，而張學良亦都忠實執行咗命令，對日本嘅一切挑釁同軍事行動都不加抵抗，張學良嘅東北軍關外部隊一再忍讓一再退讓，避免事件升級，如果要比喻，情況就係有一隻兔仔媽媽，佢生咗一竇仔女，但有隻老虎嚟食啲兔仔兔女，兔仔媽媽唔反抗，反而希望隻老虎食飽後就走，留返一兩隻仔女俾自己湊大，大概係咁，日本人見你真係唔反抗，於是乎兩日後，9月21號，關東軍又以「保護日本僑民」為藉口，順利佔領咗吉林城！東北兩大重要城市瀋陽同吉林，就係咁樣落入咗日本人手上！

918事變發生後第二日，國民政府駐國際聯盟代表施肇基（1877-1958）將東北事件報告國聯，要求其他國家主持公道，當然對成件事冇乜作用。

9月20號，日軍喺瀋陽組織市政府，任命日本駐奉天特務關長土肥原賢二（1883-1948）為市長，取而代之，正式奪取主權。同日，廣州中華民國政府，因為知道日本侵佔東北，於是停止軍隊進入湖南嘅軍事行動；牽一髮，動全身，同一日，江西紅軍主力向蔣軍發動猛烈進攻，蔣軍全面撤退，「第三次圍剿」亦正式結束！

#常威💀 #蔣介石平反系列 #黃金十年 #民國歷史

常公子 2021-10-5 11:58:13 ［常威近代史］第五百九十五回 918事變（高清錄音版）

#唔鍾意睇字可以聽

https://www.facebook.com/129055447762576/posts/818609435473837/

常公子 2021-10-6 12:27:21

【常威近代史】（五百九十六回）
日本為何要發動918

918事變，其實係「破局」，中日之前一直「鬥而不破」，中日之間，仍然可以維持一種實力完全不均等嘅微妙平衡，其實呢種平衡情況，自從上一次大破局1895年甲午戰爭之後，一直維持咗整整30幾年，日本慢慢食你，一步一步嚟，軟硬兼施，你亦吹佢唔漲？但係點解要破局呢？今集，同大家分析一下，再重申一次，從事政治工作，必須明白，反枱及破局，會係最後選擇，一般嚟講，都會拖得就拖，維持基本現狀不變，讓問題深化及繼續累積，享受咗現在，將來嘅問題，留畀下一任或下一代解決，同買股票同奧運會開幕一樣，基本上都係一個傳遞火棒遊戲。

918事變，當中嘅主角係關東軍，中國東北關東軍，係響1906年成立，目的係保護日本租借自中國嘅土地及南滿鐵路權益，當然亦要保護日本橋民，關東軍係1905年日俄戰爭日本勝利嘅果實，但係你睇吓，由1906年開始，去到1931年，前後足足25年，即係話關東軍成立咗25年，係一段非常長久嘅歷史，關東軍之中，已經有一兩代人在中國東北落地生根，佢哋離開日本帝國本土自立門戶，視東北為故鄉，關東軍亦衍生出自己一套想法同意識形態，佢哋對東北嘅感情（或者叫野心），甚至可能比對日本本土更大。

去到1920年代末期，關東軍已經重新界定自己嘅角色，佢哋唔單止係要防衛日本喺東北嘅利益，而且認為日本同西方未來終將一戰（為西方，領頭羊無可否認響當時嚟講就是美國），而關東軍係擔任依場大戰局嘅C9前鋒角色。當中1928年暗殺張作霖，似乎係敗筆中嘅敗筆，一方面張作霖對日本嘅忠誠似乎有所動搖，關東軍先下手為強；另一方面關東軍亦希望藉著暗殺張作霖，迫使日本國內文人政治家採取更積極嘅滿洲政策，例如傾向武力侵略東北。當然張作霖之死，即係張學良背棄日本投向蔣sir易幟最大嘅原因，不過無論點都好，行刺張作霖，的確係令東北推向戰爭邊緣，滿足關東軍嘅希望。

對於行刺張作霖一事，亦有一段故事可以補充，當時日本國內，田中內閣（田中義一，1864-1929）喺路線上係比較溫和，唔希望用太急進嘅策略侵略東北，因此所謂《田中奏摺》事件備受質就係呢個原因，當然國內嘅問題亦令到內閣總理大臣田中義一相當頭痛，東京大地震後重建東京已經非常棘手。歷史記載，田中內閣係響張作霖死後，先至發現原來關東軍係真正嘅策劃者，由呢件事可以睇得出，關東軍係中國東北已經係接近自把自為； 而日本軍方亦同政府內閣開始各有各做，相信未必係昭和天皇意思（佢話佢自己一直冇參與過政治同戰爭，你信唔信先？），但係軍政分離，亦係當時日本嘅政治大趨勢，文人主內，武夫主外，分工合作，一齊搞好個帝國建設。但關東軍殺死張作霖，皇室卻施加壓力，要求田中內閣唔好張揚此事（至少喺國內），以免有損軍威。不過日本政府亦因此開壞個頭，對違反紀律嘅軍人不採取有力嘅行動去規範同懲處，終於令到軍人更大膽行事，狼狗唔戴口罩，一定會到處咬人！而田中義一，亦因為好戰嘅昭和天皇裕仁唔滿意其處理張作霖事件嘅方式，被迫辭去首相職務。

常公子 2021-10-6 12:27:38 對於行刺張作霖一事，亦有一段故事可以補充，當時日本國內，田中內閣（田中義一，1864-1929）喺路線上係比較溫和，唔希望用太急進嘅策略侵略東北，因此所謂《田中奏摺》事件備受質就係呢個原因，當然國內嘅問題亦令到內閣總理大臣田中義一相當頭痛，東京大地震後重建東京已經非常棘手。歷史記載，田中內閣係響張作霖死後，先至發現原來關東軍係真正嘅策劃者，由呢件事可以睇得出，關東軍係中國東北已經係接近自把自為； 而日本軍方亦同政府內閣開始各有各做，相信未必係昭和天皇意思（佢話佢自己一直冇參與過政治同戰爭，你信唔信先？），但係軍政分離，亦係當時日本嘅政治大趨勢，文人主內，武夫主外，分工合作，一齊搞好個帝國建設。但關東軍殺死張作霖，皇室卻施加壓力，要求田中內閣唔好張揚此事（至少喺國內），以免有損軍威。不過日本政府亦因此開壞個頭，對違反紀律嘅軍人不採取有力嘅行動去規範同懲處，終於令到軍人更大膽行事，狼狗唔戴口罩，一定會到處咬人！而田中義一，亦因為好戰嘅昭和天皇裕仁唔滿意其處理張作霖事件嘅方式，被迫辭去首相職務。

去到30年代嘅日本，不但同中國係東北嘅問題上發生嚴重衝突，佢哋同美國及英國亦因海軍嘅問題產生極大矛盾，1922年華盛頓會議，要求列強係八年之後1930年於倫敦再會面，商談延續或修改1922年嘅限制海軍規定，空軍未普及以及原子彈未發明之前，海軍就係最先進同埋最可怕嘅武力。30年代初期，日本政府喺政治上犯咗一個嚴重錯誤，就係事先宣佈要增加日本軍艦嘅噸數比率，即係由原來英、美、日之間嘅5:5:3，改為10:10:7，即係日本軍艦總噸數要增加至英美海軍嘅70%，英國美國當然拒絕日本嘅要求，響多方折衷後，英美最後答應俾日本喺某些艦種上增加噸數，但並非全部。

談判結束之後，日本代表回到國內，卻受到媒體及海軍指責，認為1930年響倫敦嘅軍備談判結果，同內閣總理大臣濱口雄幸（1870-1931） 之前所提出嘅要求完全唔同，新嘅協議根本係出賣日本嘅國家利益，因此喺往後嘅日子，日本軍方出現咗「反條約派」，或稱之為「艦隊派」，控制咗整個海軍，而日本嘅民間，都認為海軍條約嘅爭議係文人政治懦弱嘅表現，怕咗西方列強咁講，甚至乎，民間對政黨政治亦開始不信任，大正年間留低落嚟嘅自由民主風氣，亦開始全面瓦解。日本民眾開始相信，要帝國繼續強大落去，自由民主議會多黨制，可能先係最大嘅絆腳石，窮兵贖武，向外擴張，先至係真正嘅出路，呢條出路，我哋有一個名畀佢，叫做「軍國主義」。

918事變，日本關東軍武力入侵東北，日本民衆仲普遍歡迎同接受，無可否認就係「軍國主義」 意識形態下嘅現實反映，「大東亞共榮圈」講咗成二十年，卻因為一個自由意識氾濫嘅大正時代而被撂置下來，都係時候重新擺返上 Agenda，當然日本軍方發動918事變，仲有其時代背景，我哋下次繼續分析，總之都係一句，世界上冇無緣無故嘅愛，亦冇無緣無故嘅恨，愛恨出現，總係因果相承，睇得通透，則可以信佛。

#常威💀 #蔣介石平反系列 #黃金十年 #民國歷史

常公子 2021-10-6 12:27:48

【渠頭者聯盟第十部：光頭佬時間大暴走】最新上市

電子書下載⬇⬇
https://play.google.com/store/books/details?id=wR5GEAAAQBAJ

Amazon下載⬇⬇
https://www.amazon.com/dp/B09HRK2NG7