常公子 2021-5-8 11:54:42 前帖重溫

:^(

大清亡國關慈禧蛋牛治
https://lih.kg/729281

大清亡國關慈禧蛋牛治 2
https://lih.kg/1487275

:^(

:^(

:^(

常公子 2021-5-8 11:55:26 【常公子歷史頻道381回：替大軍閥平反系列之 新時代的意識形態】

♉Covid-19疫情終於會過去，世界始終會回復正常運作，祇不過係時間嘅問題，因為南亞印度熱情嘅大爆發，原本以為2021年中全面復甦回復正常，已成泡影。大概要去到2022年，世界先有可能回復正常狀態運作，呢個已經係最理想嘅情況，倘若病毒再出現變種，情況會不堪想像。

♑單以疫情而論，香港嘅情況，比起世界其他國家及地區，情況其實已經好好，去到2021年，全世界人類先至明白，原來要用非常極端嘅措施，先可以成防止病毒蔓延，作為一個社會主義國家中國一早有覺悟，結果話比我哋知，疫情成功被控制，去年一直反對中國抗疫做法嘅國家，現在紛紛模仿中國嘅抗疫手法，睇返轉頭，其實都相當好笑。不過有早知，就冇乞衣，一啲都唔需要奇怪。

🔯不過有一點要注意，冠狀病毒疫襲人類，2003年有沙士，跟住有中東呼吸道疫情，其實已經響晒警鐘，2020年嘅大爆發，一早亦有跡可尋，而且現實話俾我哋知，Covid-19之後，亦一定會有下一次，亦一定會有下一隻病毒來襲，經過今次嘅教訓，全人類會否汲取經驗，迎接下一輪病毒嘅衝擊？我真係唔知道，人類進入21世紀，由於各種生存問題逼到埋身，好多時候衹能夠有能力解決當下發生嘅難題，至於未來，已經好難兼顧。今日嘅問題尚未解決，又邊有時間對未來未雨綢繆呢？呢個係我哋面對嘅最大困境，其實已經唔需要再講。

✅https://youtu.be/OvBoVejkKrc

💙最新上線，請課金支持

【常威近代史】第八部《最九衰的大軍閥時代》Round 3
https://play.google.com/store/books/details?id=fY8mEAAAQBAJ

認真你就輸 2021-5-8 11:57:42 此回覆已被刪除

等那個女孩 2021-5-8 14:01:19

:^(

:^(

常公子 2021-5-10 13:09:45

【常威近代史】（五百三十四回）
咁唔係叫打仗，叫送頭喎

1929年1月15號，上海國際無線電臺開始與歐美等國通報，交通部無線電管理處電臺與奉天電臺簽訂通報合同，是日起，正式收發國際電報，南北統一行動，再進一步；同日，廣州中山紀念堂舉行奠基典禮。

1月14號，為粉碎國民黨軍隊對井岡山嘅第三次「會剿」，毛澤東、朱德、陳毅等率領紅四軍主力離開井岡山，向贛南、閩西進軍，以吸引包圍井岡山嘅國民黨軍隊南下。去年底，彭德懷（1898-1974）、滕代遠（1904-1974）紅五軍第四、第五縱隊到達井岡山，響寧岡同紅四軍會合。隨後湘、贛兩省國民黨軍隊以何鍵（1887-1956）、金漢鼎（1891-1967）為「剿共」軍隊正副指揮，出動兵力30000人，採取層層緊縮、嚴密封鎖嘅戰術，發動更大規模嘅軍事「會剿」。1月4號，毛澤東喺寧岡縣柏露村主持召開紅第四、紅第五軍委及湘贛邊界特委聯席會議，商議對策，決定採取「圍魏救趙」嘅戰略，由彭德懷、滕代遠指揮紅五軍主力同紅四軍32團留守井岡山，由毛澤東、朱德、陳毅率領紅四軍主力贛南出發，以求打破敵人封鎖網，先行解決經濟困難，響國民黨軍隊會剿開始後，則在外線作戰，配合守山部隊挫敗「會剿」。

2月10號，紅四軍喺大柏地殲滅追兵兩個團，3月10號入閩，14號乘機佔領長汀，建立紅色政權。隨後回師贛南，開闢咗贛南根據地。1929年7月建立閩西根據地，為以後嘅中共蘇區奠定咗初步基礎。毛澤東、朱德、陳毅、彭德懷等人充分展現快速應變、移動遊擊戰嘅精髓，同時亦為對應之後國民黨軍隊多次「會剿」立下戰術先例，所謂紅軍16字訣：「敵進我退，敵駐我擾，敵疲我打，敵退我追」，就響嗰陣時出現，用今時今日嘅講法，應該就係「Be water」勒，唔通企喺度俾你打？唔通圍住自己響個死位、聚埋圍爐俾你登記身份證俾你逐個殲滅逐個秋後算賬？咁唔係叫打仗，叫送頭喎。

1月16號，招商局「新華輪」喺香港附近觸礁沉沒，浸死300餘人。同日國民政府對留學蘇聯歸國嘅學生定出處理辦法，情況亦都相當尷尬，「聯俄容共」期間，大量人被送往蘇聯接受布爾什維克共產黨幹部訓練，蔣Sir個仔蔣經國（1910-1988）都係其中一個，但係豬肚已經反轉咗，「聯俄容共」已經係過去式，今日唔可以合作，要斬要殺。處理留蘇學生嘅方法如下：凡留蘇學生歸國後，應於一個禮拜內前赴中央或各省市黨部報導，否則以共產嫌疑犯處理（死罪來的），由中央通令各地黨部政府駐軍嚴密偵捕，押解中央查辦；報到後，由中央所設立嘅流蘇歸國學生臨時招待所收容，「招待所」如果我冇理解錯，應該就係「監獄」或者叫「拘留所」，入住咗「招待所」嘅留蘇學生，未經中央詳細考察、認為確無共產黨背景嫌疑並給予證明書前，不得擅自離去，取得「身家清白」證明書後，亦需由五名以上嘅國民黨員連坐保證（連坐呀呀呀呀！），先至可以得到行動自由，之後一年內，亦必須將住址同埋行動隨時報告以備查詢；若確係共產黨員但在發現前自首者，依自首條例辦理。

常公子 2021-5-10 13:09:56 哇……嚴格到呢……鬼叫你去蘇聯留學咩？如果我冇估計錯誤，當時響蘇聯返嚟嘅人，應該冇乜邊個有好收場？璧懷其罪，唔同時代有唔同嘅罪孽，今日正確，昨日正確，唔代表明日正確，政治嘅嘢，一日都嫌長，都係少掂為妙，真心一句，冇人冇物冇錢冇背景冇人脈，只憑心中一片赤子之心同一腔熱血想去改變社會改變世界甚至拯救地球，以為可以將自己嘅崇高理想付諸實行，呢個行為唔係叫「搞政治」，mean小小，叫「送頭」。

換個例子說明，如果有個人想搞個上市大project，你估佢會搵一個有錢人傾？抑或揾個窮人傾呢？答案一字咁淺，而你又覺得理所當然。同樣道理，政治本身就係大project，仲要係最大最揾水嗰種project，邊度係窮人搞架？做人要量力而為，任何人都可以透過學習同閱讀獲得獨立思考批判社會嘅能力，窮人同凡夫俗子都可以，但窮人只可以批判社會作打飛機之用，而冇能力去改變社會，因為你唔夠資格。當然如果你唔怕送頭，連死都唔驚，又可以提昇多一個境界，就好似當年抵抗「會剿」嘅共產黨員一樣，用條命搏，缸瓦撼瓷器，或者會有小小勝算。

1929年1月19號，清末維新著名領袖、文化界巨人梁啟超（1873-1929）係北京病逝，享年只係得56歲。梁啟超出生於1873年，廣東新會人，號任公，別號飲冰室主人，1889年考中舉人，1890年師從康有為，深受其影響，隨後康有為公車上書參與百日維新戊戌政變（康師傅話有）失敗後逃亡日本，創辦《清議報》、《新民叢報》，宣傳改革，鼓吹立憲，主張保皇（保光緒帝），又傾力介紹西方思想學說，評擊傳統儒家哲學，倡導以興民為興國之本（文化救國論，讀書救國論）。民國創立之後回國，曾任北洋政府司法總長，1915年袁世凱復辟帝制，梁啟超策動蔡鍔組織護國軍倒袁。1920年後放棄政治，專心從事學術研究，生平著作甚豐，對中國學術文化發展影響極大，晚年主將復歸「東方文化」。

梁啟超係學術巨人，係文化巨人，並非政治巨人。佢師承康有為，而且以15個馬位遠遠拋離康師傅最後衝過終點，無論學術上、性格上及影響力上。「青出於藍勝於藍」，用響梁啟超身上最適合不過。

#常威💀 #蔣介石平反系列 #黃金十年 #民國歷史

常公子 2021-5-10 13:26:47

:^(

【常威近代史】第九部《孫文之死》
https://play.google.com/store/books/details?id=evMsEAAAQBAJ

:^(

amazon同步上架👍請大家大力支持！
https://www.amazon.com/dp/B094D663XH

常公子 2021-5-10 18:15:36

1⃣【常威近代史】第一部《大清亡國關慈禧蛋牛治》（免費下載）
https://play.google.com/store/books/details?id=C3hjDwAAQBAJ

2⃣【常威近代史】第二部《中國一百年前第一次開放改革》
https://play.google.com/store/books/details?id=_6KMDwAAQBAJ

3⃣【常威近代史】第三部《東方維多利亞女王之死》
https://play.google.com/store/books/details?id=GaGrDwAAQBAJ

4⃣【常威近代史】第四部《霹靂大忠臣對決無敵大買辦》Round One
https://play.google.com/store/books/details?id=Np3PDwAAQBAJ

5⃣【常威近代史】第五部《霹靂大忠臣對決無敵大買辦》Round two
http://shorturl.at/dW145

6⃣【常威近代史】第六部《最九衰的大軍閥時代》Round 1
https://play.google.com/store/books/details?id=bCMNEAAAQBAJ

7⃣【常威近代史】第七部《最九衰的大軍閥時代》Round 2
https://play.google.com/store/books/details?id=lPgaEAAAQBAJ

8⃣【常威近代史】第八部《最九衰的大軍閥時代》Round 3
https://play.google.com/store/books/details?id=fY8mEAAAQBAJ

9⃣【常威近代史】第九部《孫文之死》
https://play.google.com/store/books/details?id=evMsEAAAQBAJ

❤請大家批量下載，支持公子繼續以廣東口語寫作中國近代史，大功所就，大名所居，君子於此，有讓道焉。

常公子 2021-5-12 13:13:08

【常威近代史】（五百三十五回）
和平唔舒服 又要打仗鳥

1929年1月21號，羅馬教皇代表剛恒毅（1876-1958）抵達南京，次日會唔蔣Sir，剛恒毅係羅馬教廷意大利籍天主教樞機，佢表示教徒愿意接受中國法律支配，即係話承認南京政府嘅合法地位，教皇嘅舉動相當重要，教皇承認你，即係整個西方世界承認你。

之前，北京發生學潮（其實成日都發生），北京大學學生不滿國民政府將「北京大學」改名為「北平大學」，1月22號，北大學潮解決，北京大學正式改名為北平大學北大學院，南北問題，伸延到名相之上，不過世事嘅嘢，名不正則言不順，世間上好多衝突，都係為咗「正名」而發生，有時候內容並唔重要，名相反而最重要，人係語言嘅動物，依靠（只能）語言思考，難怪有哲學家講過，人類大部分嘅問題，其實都係語言嘅問題，呢個層次好深奧，唔係好多人能夠順利瞭解。

正如「虛擬貨幣」同「股票」、「基金」、「保險」，又咪係同一樣野？都係製造出嚟呃錢嘅，哈哈。你信就有，不信則無。天下間萬事萬物皆虛無，人類不得不利用語言賦予名相同意義（或價值）。

1月23號，國民政府下令將直隸灣、直隸海峽定名為勃海灣、渤海海峽，名相用到今日，亦從嗰日起，「直隸」呢個詞開始喺中國歷史上消失。1月24號，國民政府任命張靜江為建設委員會委員長；1月25號，中日開始談判，先從濟南事件開始，濟南事件又稱呼為「濟南慘案」，之前講過，無厘頭死咗好多人，單嘢令到東北一帶非常動盪，日本人武力侵華嘅野心攤晒出嚟（一早喇），加上張學良唔聽日本人枝笛易幟，日本人冇理由比你蔣Sir順利統一南北，建立一個大一統、向心力更強嘅「中華民國」，因此一定會加快步伐玩侵略，面對經濟實力軍事力量無比強大的日本帝國，南京政府蔣Sir當然想拖得就拖，不過亦拖唔到幾耐。

1月27號，比利時同意中國回收天津比利時租界；1月29號，行政院通過發行1929年裁兵工債5000萬元，cap水還是最重要的；1月30號，國民政府決定改奉天省為遼寧省，名相大變，同日，日本承認中日關稅協定，2月1日起由中國實施海關新稅質，侵略還侵略，生意貿易還是要繼續做。

今個月，暢銷雜誌《良友》畫報刊登咗豐子愷（1898-1976）嘅漫畫，豐子愷係浙江省石門縣人，中國散文家、漫畫家、文學家、美術家與音樂教育家。師從弘一法師李叔同（1880-1942），以中西融合畫法創作漫畫及散文聞名於世，係中國漫畫藝術的先驅，豐子愷漫畫造形簡約，畫風樸實，饒富童趣，在眾多畫家中，獨樹一格。

常公子 2021-5-12 13:13:18 1929年2月1號，南京國民政府海關正式開始實施《海關進口稅稅則》，經過1928年成年嘅努力，南京政府同西方各國簽訂咗一系列嘅新關稅條約，12月7號，新嘅《海關進口稅稅則》通過。新稅制改變咗以往每百抽五（5%）嘅均一稅制狀況，將進口產品分為七類，稅率由7%點27.5%之間，大家都睇到，新稅率會令到中華民國嘅收入大大增加，水漲船高，當然亦會造成民間嘅通貨膨脹問題，不過亦冇辦法，鬼叫你窮咩。另外，新稅則亦裁撤咗煤油、卷烟特別稅徵收局，將稅收統一喺海關辦理，亦廢除陸路進口貨品嘅優待稅率，一次過統一咗海、陸關稅。

點解要南北統一？點解唔可以分裂？點解需要民族團結？關稅可能係當中嘅重要紐帶。

2月4號，有聲電影喺中國出現上映，啲咁先進嘅科技，當然只會喺東方超級大都會上海發生。2月6號，由著名文人郭沫若、郁達夫等文人組成「創造社」，上海被當局查封，理由當然係左傾喇。2月8號，日本政府推翻濟南事件交涉原案，中日談判暫停，真係傾都費事同你傾。2月10號，係中國農曆嘅正月初一，國民政府決定從1929年起，將中國嘅農曆新年正式改名為「春節」，「春節」一詞，開始應用。

2月10號，國民政府聘用嘅財政顧問美國人甘末爾等12人抵達上海，協助國民政府改革幣制，當時中國嘅貨幣制度，自19世紀中葉開始到現在，依然混亂不堪，既然國家已經南北統一，連關稅都初步搞掂，下一步就要改革幣制，政權統一之後，就係貨幣統一、經濟統一，屬於正常操作。

2月11號，，紅四軍響贛南瑞金大柏地消滅國民黨軍劉士毅（1886-1982）部隊，依一次係紅軍嘅重要勝利。

2月19號，由桂系主持嘅武漢政治分會免去魯滌平（1887-1935）職務，改組湖南省政府，桂系控制咗兩湖地區，魯滌平原本係湖南省主席兼清鄉督辦，佢係蔣Sir嘅人，對蔣Sir唯命是從，以李宗仁為首嘅武漢政治分會一早對佢唔妥，為清除兩湖地區嘅親蔣勢力，武漢政治勳會今日將佢炒魷魚，任何鍵（1887-1956）為湖南省主席，並派出第52師師長葉琪（1896-1935）同25師師長夏威率軍進攻湖南省會長沙，魯滌平估唔到對方動武，隻身逃往南京避難。

桂系擺到明玩地方政變，蔣Sir當然大為震怒，蔣Sir稱「編遣」期間，地方無權任免特定區域官員，為此召開國民黨中央政治會議，並且決定派遣監察院院長蔡元培前往查辦。同時，蔣Sir亦決定發兵討桂。人無百日好，花無百日紅，和平只係維持左好短嘅時間，又要開始龍裡雞作反，又要打仗了！不過以軍人作為職業嘅人，冇仗打又係比較悶嘅，必須要體諒。

#常威💀 #蔣介石平反系列 #黃金十年 #民國歷史

常公子 2021-5-13 13:20:43 【常公子歷史頻道382回：替大軍閥平反系列之 蒙古問題

♊金球獎一直被視為奧斯卡嘅前哨戰，屬於美國電影界最高榮譽之一，最近又爆出金球獎得獎名單，其實係由所謂90個記者組成嘅荷里活外國記者協會（Hollywood Foreign Press Association, HFPA）大家圍威喂投票選出，小圈子選舉不特止，而且最重要嘅係90個人裡面全部都係白人，並冇非裔成員，於是就被指控有種族歧視嘅情況出現。事情越鬧越大，湯告魯斯退還三個金球獎，連炙手可熱嘅Scarlett Johansson黑寡婦都出來批判，話金球獎唔透明同埋唔夠多元化。

♉老實講，邊個頒獎典禮唔係圍威喂？唔通大家真係認為世界上有絕對公平公正嘅（娛樂圈）選舉存在？到頭來什麼都係一盤生意姐，問題係有幾多人圍威喂？當中涉及幾多枱底交易？問題係，係唔係唔透明到完全黑色？你話冇非裔人士參加就唔夠多元化？咁黃種人？南亞人呢？愛斯基摩人呢？如果無限上綱，事情就會沒完沒了……問題在此。

♉潮流真係興拆大台，所有事情都去中心化去權威化，包括貨幣在內，加密貨幣正在衝擊緊傳統貨幣嘅權威性（最低限度衝擊緊黃金），「更包容、更多元」係大潮流，即係玩「大愛」，早兩年依種想法更加會被稱呼為「左膠文化」，時移世易，今日玩包容玩大愛玩多元，先係行係潮流尖端，大家希望消滅階級，卻不相信共產主義；大家希望平均主義多元主義，但佢仍然相信資本主義制度下可以做得到？本身就有大問題（嚴重的智力問題）。當然藥到病除係最好嘅事，但係服食安慰劑安慰心靈都係好重要，反正你唔去提出問題世界就沒有問題，凡事凡物，都係宣傳手段啫，不需要太認真，認真你便輸了，認真就要坐監了。

♐「遠看，大部份事物都很美麗」，村上春樹講嘅，好多事情只係需要一個朦朧大概，睇書也可以只睇書背嘅簡介就足夠，凡事不應該太深入，人要保持一定距離觀察事物，亦唔好花太多時間深入研究細節，魔鬼還是避而不見好，因為世界上仲有好多其他嘢搞，蜻蜓點水，鏡花水月，人生本來就一場幻象，其實並沒有什麼不妥噢。

✅https://youtu.be/yOz_yxj2ulo

💙最新上線，請課金支持

【常威近代史】第九部《孫文之死》
https://play.google.com/store/books/details?id=evMsEAAAQBAJ

常公子 2021-5-14 12:33:45

【常威近代史】（五百三十六回）
蔣桂戰爭一觸即發

1929年蔣Sir建立嘅威權政治南京政府，基本上係一個脆弱嘅軍事聯盟所組成，當中「蔣系」同「桂系」嘅平衡，首先傾倒，早兩年北伐，出力最多嘅人無疑係桂系李宗仁同白崇禧，到頭來，政治分贓之下，桂系所得到嘅實際政治利益同佢哋想像嘅相差甚遠，於是籠裏雞作反亦屬必然。許冠傑有首歌叫「半斤八兩」，——「出咗半斤力，都話攞番足八兩，家陣惡搵食，邊有半斤八兩咁理想？」——其實已經全部講曬，明就明，唔明就唔明。

蔣Sir面對嘅，除咗外憂，仲有內患。國家立立亂，真係唔可以用幾個月時間執番正，以為可以？只係太天真。想用短時間撥亂反正，除非用上非常極權同殘酷嘅手段處理，否則冇可能，大家亦應該一清二楚。舉個例子，2月19號，北平第一師範學院學生向北大辦公室請願，要求增加經費，軍警立刻干涉，打傷學生40人，立刻驅散你，否則俾你聚下聚下，又會演變成為下一輪學潮。

2月22號，國民黨南京各區黨部聯席會議，請求中央電促汪精衛等中委回國主政，蔣Sir一生人我諗最憎嘅就係汪精衛，胡漢民可以比佢收編，但汪精衛一定冇可能，畢竟汪精衛——呢位本來孫文嘅指定繼承人——喺國民黨黨內嘅勢力根深蒂固，佢一定會返嚟，亦一定會覆灼。國民黨黨內，有好多人相信「北伐」戰爭已經結束，所謂「軍政」時代已經過去，進入「訓政」時代，就應該由文人取代軍人執政，蔣Sir係軍人，而汪精衛就係文人，脈絡上可以咁樣理解，當然蔣Sir並唔認同，打完齋唔要和尚？打完仗唔要軍人？大家係咪想得太輕易呢？不過蔣Sir都想唔要桂系喇。

同日，國民政府發出通告，國民革命軍總司令部、各集團軍總司令部限於3月15日前撤銷，全國兵工廠限4月1日前停工。

2月23號，國民政府「第一屆中央衛生委員會會議」響南京召開。余雲岫（1879-1954）響會上，以「不科學」為理由，提出廢止舊醫案，力圖通過行政手段，取締所有中醫同中藥。消息傳出，舉國譁然，中醫中藥界反對激烈，你無厘頭打爛我隻飯兜做乜鳩先？3月17號，全國中醫中藥界15省132個團體嘅262名代表雲集上海，舉行「全國中醫藥團體代表大會」，強烈要求政府給予中醫藥業合法地位，會後代表由上海出發前赴南京，連同南京中醫藥界100餘人同赴行政院請願。講真，喺國家政權未完全穩定期間，提出呢啲犯眾怒嘅方案，就真係「不科學」勒。

常公子 2021-5-14 12:33:56 2月25號，全國商會聯合會電請撤銷16種特種消費稅，並召開第二次全國裁厘會議；2月26號，行政院決議由財政部發行海河公債400萬元，同日國民政府財政部發表外債調查報告，原來當時國民政府共欠外債108條，長期外債達到10億多，其實還條毛咩？國家仍然窮到仆街，外表身光頸靚都冇用，原來冇著底褲。

2月25號，中國工人運動領袖蘇兆征（1885-1929）喺上海病逝，蘇兆征生於1885年廣東香山縣淇澳島，自幼家貧，讀咗三年私墊之後，就去香港喺外輪上做雜工，期間加入同盟會。1921年3月，蘇兆征同林偉民（1887-1927）喺香港組建中華海員工會聯合總會，佢參與咗領導香港海員大罷工、省港大罷工，兩次罷工均取得勝利，震驚中外，於是佢成為咗著名嘅工運領袖。1925年春天，佢加入中共，1927年春天，聯俄容共期間，任武漢國民政府勞動部長。蘇兆征同時係中共五大、六大中央委員，共產國際執行委員。喺蘇聯工作期間，積勞成疾，上個月抱病返國，今個月過身。

1929年3月1號，「全國反日會」喺上海舉行代表大會，3月3號，蔣Sir密令第一集團軍各師向皖鄂、贛鄂邊境開發，預備向武漢桂系用兵。3月5號，中央銀行發生擠兌事件，可能民眾都知道就快又要打仗，都係提款將啲錢擺喺屋企夾萬或埋響後園地底穩陣啲啲；3月6號，紅四軍3000餘人攻剋江西石城，中共不停喺一窮二白嘅江西擴展勢力。

3月15號，戰雲密佈，國民黨第三次全國代表大會喺南京召開，會議決定第一、第二、第三、第四集團軍總司令部及開封、武漢、廣州政治分會宣佈撤銷。3月19號，印度最偉大嘅詩人泰戈爾（1861-1941）到達上海。

3月20號，國民黨三大議決開除陳公博（1892-1946）、甘乃光（1897-1956）黨籍，並書面警告汪精衛切勿玩嘢。同日，唐生智（1889-1970）前赴唐山，重新召集相關舊部。

3月21號，殺到埋身！國民黨廣州政治分會主席李濟深（1885-1959）被蔣Sir囚禁喺南京湯山，李濟深不嬲有「半個桂系」之稱，又手握廣東軍政大權，蔣Sir要打桂系，首先就要拆散粵桂合作嘅可能，3月5號，蔣Sir搵個籍口叫李濟深去南京，半個桂系李濟深想平息一觸即發嘅蔣桂戰爭，於是不顧自己同蔣Sir嘅矛盾而北上。3月13號，李濟深到達上海，李宗仁急忙攔截，認為蔣Sir不懷好意，必定扣留李濟深，拆散粵桂聯盟。李濟深一再猶豫，但係經不起吳稚暉、蔡元培及張靜江等國民黨元老苦苦相勸，於是同佢哋一齊進入南京：叫送羊入虎口。

21號，蔣介石以李濟深夥同李宗仁、白崇禧叛國叛黨為名，將其拘捕囚禁，廣西桂系頓失粵援，老實講，幾on9，on99。

#常威💀 #蔣介石平反系列 #黃金十年 #民國歷史

常公子 2021-5-14 12:34:10

:^(

【常威近代史】第九部《孫文之死》
https://play.google.com/store/books/details?id=evMsEAAAQBAJ

:^(

amazon同步上架👍請大家大力支持！
https://www.amazon.com/dp/B094D663XH

常公子 2021-5-15 11:34:56 【常公子歷史頻道383回：替大軍閥平反系列之 第一次全國代表大會】

♊「偶像文化」最近有死灰復燃的跡象，一個姜濤彈出，Mirror演唱會門票炒到上天價，加上新聞媒體大力追捧，每日播天天播日日播，就算是謊言假話，重複1000次就會變成真實，又反正講其他東西可能犯禁，又可能惹人反感，不如風花雪月一番，回歸音樂電影偶像潮流，香港人始終都係理性嘅動物，「中環式精仔」文化從來沒有退減，很懂得找尋生存空間，適者生存，亦冇話唔啱，甚至乎好啱。

♐回想以往，1997之前，其實社會上冇人講政治，就算係講，只係侷限於一小撮高級知識份子響特定的地盤發表意見，響我成長嘅低下階層圈子之中，其實根本冇人會理會政局，搵食才是最重要，發達才是最重要，買樓才是最重要。不知道從何年何月何日開始，大概是2003年沙士之後50萬人上街哪一天是一個開端，香港人開始熱烈地投入政治，或者係自然趨勢，又或者有人推波助瀾，又或者社會普遍教育水平有所提昇，種種理由之下，香港變成了一個政治城市，終於觸發了2014年的佔中事件，才演化出後來2019年的大變局。

♑回顧過去十多年，就真係冇任何偶像誕生過，陳奕迅同楊千嬅基本上係上一個世紀遺留落嚟嘅產物，劉德華古天樂劉青雲郭富城周潤發仍然係賣座嘅保證，時間彷彿停留喺上一個世紀90年代——哪一個人人以為是最好嘅輝煌年代——但21世紀已經進入20年代，亦係時候改變，新一代偶像潮流嘅出現，係一個全新嘅訊號，講畀我哋知，舊嘅唔去，新嘅唔嚟。新生代要掌握全新嘅話語權，要話比上一輩人知，大莊始終要輪換。食老本不可能食到老，其實亦係真理。

♐正如後生仔人人玩加密貨幣，冇乜人玩股票同賭馬，即係最佳例子，長江後浪推前浪，本來坐莊嘅人，畢竟年華老去，體力同眼界亦都大不如前，不想交棒亦要交棒，一場Covid-19，加速咗呢個世代遷移嘅進程，香港會邁向一個全新嘅面貌，我覺得當然係好事，懷舊同懷緬往事始終都係安慰劑，好多時候無補於事，或者只會令病情惡化下去……

✅https://youtu.be/c45evt6vfwI

💙最新上線，請課金支持

【常威近代史】第九部《孫文之死》
https://play.google.com/store/books/details?id=evMsEAAAQBAJ

常公子 2021-5-15 11:35:12

✅本土唯一香港土話近代史文本

❤【常威近代史】第一部《大清亡國關慈禧蛋牛治》，全面開放，免費下載， #freedownload！

Free下載連結🔽

https://play.google.com/store/books/details?id=C3hjDwAAQBAJ

蠶蟲師爺 2021-5-15 11:36:11 支持樓豬

:^(

:^(

常公子 2021-5-17 12:28:01


【常威近代史】（五百三十七回）
1929年蔣Sir面對嘅頭痛問題

去到1929年年頭，蔣Sir同唔少國際社會上嘅觀察家，都認為蔣Sir已經統一「咗」中國，但其實只係一個假象，表面上蔣Sir完成咗孫文交托界佢嘅偉大事業，將中華民國自1911年以來嘅軍閥割據分裂局面結束，南北歸向統一，不過冠冕堂皇背後，其實係——乜卵嘢都冇。

點解咁講呢？1926年，蔣Sir開始用聯俄資金、顧問及軍備做底牌，開始挺兵北伐，由廣州打到去北京，勢如破竹，途中殲滅直系孫傳芳及吳佩孚勢力，最後趕走埋北京奉系張作霖，「輕而易舉」解散中華民國北京中央政府，由於打住護法同革命嘅旗號，的確係深得民心，最重要嘅係，有唔少敵人同埋將領紛紛見風駛哩、投靠到蔣Sir麾下，最重要嘅當然係桂系嘅李宗仁及白崇禧，同埋之後嘅閻錫山、馮玉祥，不過殘酷嘅現實係，蔣Sir從來冇真正地控制住佢嘅對手同埋征服佢哋嘅地盤，大家握握手做個好朋友建立聯盟，或者燒黃紙斬雞頭做結拜兄弟，全部只係表面功夫。佢哋只係用一種中國傳統嘅方式承認蔣Sir比自己強大（認大佬），所謂明哲保身良禽擇木而棲，作出最有利自己利益嘅選項。

呢個亦都係蔣Sir能夠喺戰場上面推進得如此迅速嘅理由，最初1926年時嘅國民革命軍，即係蔣Sir自己嘅「黨軍」只有區區十萬人，去到1928年中，已經號稱有200萬人，比最初嘅十萬人增加咗20倍。北伐戰爭，無論係任何意義上都係一場戰爭奇跡。

試比較1939年嘅西班牙血腥內戰，一代霸者佛朗哥將軍（Francisco Franco，1892-1975）足足經過咗差唔多32個月嘅艱苦血腥嘅戰爭先能夠成為整個西班牙嘅主人，而蔣Sir只係用咗12個月時間，其中頭九個月喺1926年同1927年之間，隨後是一個政治上嘅休戰時期，後三個月喺1928年4月到6月，蔣Sir就征服咗面積比西班牙大七倍嘅中原地區，勁唔勁？勁到顛啦！

但係佛朗哥係消滅曬自己嘅敵人，喺戰場上面徹底擊潰佢哋，並將殘餘嘅敵人流放或者處死（西班牙內戰係近代一場非常恐怖嘅血腥戰爭，每個人一定要睇睇），而蔣Sir則滿足於對手形式上嘅屈服——嗰啲原來同國民黨為敵嘅軍閥，後來都聲稱自己係國民黨黨員，而且喺大多數情況下，呢啲軍閥喺自己嘅地盤內仍然保留住原有權力，或者更多嘅權力，只係名義上歸順你蔣Sir南京國民政府，桂系同埋奉系張學良就係最好嘅例子。

由於蔣Sir急於取得軍事上嘅成功，因為咁會帶畀佢一時嘅快感、榮譽同埋威望，而事實上佢亦都成功穿上「皇帝的新衣」，但蔣Sir卻忽視咗一樣嘢——就係響一個封建國家裡進行領土征服應該注意嘅唯一正確原則——個原則就係：佢應該徹底剷除嗰啲最初反對佢嘅人，並將自己選定嘅人來代替呢啲人，而新選出嘅人應該「只」效忠於新生嘅民國政府，並「只」效忠與民國嘅最高領導人蔣Sir。

常公子 2021-5-17 12:28:13 用簡單嘅語言，即係話佢唔夠殘忍，佢只係用「協商」同「合作」來代替「征服」同「殺戮」，佢對初期盟友共產黨所做嘅嘢（血腥清黨），並沒有加諸喺其他軍閥身上，老實講真係相當唔明智同相當唔公平。最後，蔣Sir未能取得對地方嘅實際控制權，卻滿足於地方軍閥對佢毫無意義嘅效忠，呢個無疑係蔣Sir判斷上面嘅最大失誤。

之後嘅歲月中，蔣Sir嘅權威多次受到地方軍閥嘅挑戰，無論係政治上抑或係實際軍事行動上，雖然蔣Sir好多時候都係勝利者，但係呢啲接連不斷嘅地區戰爭或政治爭拗卻消耗咗佢嘅總體力量，令到佢無辦法集中注意力嚟處理中國真正面臨嘅問題，或者令佢冇辦法集中火力面對中國真正嘅敵人——日本人。而且好有可能，蔣Sir最大嘅威脅亦唔係日本人，而係不斷崛起嘅中共。

1929年，有外國記者寫下咗以下段文字嚟描述當時嘅中華民國：

「國民政府實際上只控制了幾個省，馮玉祥稱雄於北方，同時又是有名的西北王，控制了山東、河南、陝西、甘肅、青海、以及寧夏等省。而蔣的對手閻錫山則從他那坐落於山巒起伏的山西省的大本營中向河北、哈察爾、綏遠等省發號施令。在南方，李宗仁控制著廣東、廣西、湖南、湖北。中國實際上被分割得支離破碎，差不多可以算得上是諸侯割據……蔣介石只在長江下游的五個省裡享有無可爭議的權力。」

之前講過，由1928年年底開始，蔣Sir就開始推銷佢嘅裁軍行動，戰爭已經結束鳥，大部份軍人應該回歸到百姓嘅生活當中生產，其實依一點並冇錯，都非常有道理。只可惜所有軍閥心裡面都明白，要遣散軍隊，就意味住要失去自己嘅權力來源，更重要嘅一點，佢哋根本唔信任蔣Sir依個人，好明白當自己無咗軍力後，收場一定會相當悲慘，然而佢哋嘅顧慮亦都冇錯，蔣Sir點做人？點樣對自己最初期嘅盟友共產黨人？大家有眼睇到曬，所謂人在做，天在看，有啲嘢冇得呃人。

軍隊冇辦法解散，即係維持200萬正規軍左右，當然呢個只係一個好粗略嘅估計數字，食空餉虛報軍藉當年仍然係家常便飯，而且除左正規軍之外，仲有好多難以被計算在內嘅地區武裝勢力存在。不過供奉如此龐大數目軍隊，每年卻要花費國民政府財政收入約四億美元嘅75%，即係用咗四分三嚟養軍人？條數攤出來，真係幾嚇人，亦都冇得搞。

蔣桂戰爭，都只係新秩序下新混亂嘅一個序幕……

#常威💀 #蔣介石平反系列 #黃金十年 #民國歷史

常公子 2021-5-19 11:59:37

【常威近代史】（五百三十八回）
打柒你李宗仁

廣東軍頭李濟深on99自投虎口，被蔣Sir以叛國罪囚禁於南京，廣東廣西未能聯成一線抗蔣，就快打仗，民衆紛紛提現，全國各地銀行出現擠提現象，1929年3月25號，廣東省政府決定用封存中央銀行紙幣辦法平息擠兌風潮，即係唔畀你提，吹咩？由此可見，當時世界，連銀行都唔可以信任。我亦好有理由相信，呢個亦都係廣州呢個南方大都會資金逐漸轉移嚟香港同澳門嘅原因之一，因為香港係英國殖民地、澳門係葡萄牙殖民地，法律比較健全，財產得到嘅保障一定比廣州大（當然你唔可以將所謂「保障」用今日嘅概念同高度去理解）。

老實講，如果你由1911年辛亥革命之後開始住喺廣州，過咗十幾年，你都唔清楚政權易咗幾多次手喇？情況實在相當得人驚。

戰火從未平息，亂世之下民眾邊有好日子過呢？根據3月底《京報》發表一份社會局調查報告，內裡講北平全市每日銷售蔬菜4.1萬斤，除返開，北京市民人均每天吃菜0.83兩，數量少得極之驚人，當然你可以問，係咪大部分北京市民都係食肉食刺身啊！「何不食肉糜」呢句成語你聽過未？貴為當時中華民國前首都北平都係咁嘅狀態，其他偏遠地區更加不能想像，我諗當時餓死人係常態，周街鹹魚係家常便飯日日見。因為1911年辛亥革命之後，去到1949年中華人民共和國建立前，中間嘅人口數量並無顯著起伏變化，都係維持係四萬萬左右，人口唔增長，或出現負增長其實好大件事，100年前嘅人並唔會避孕亦唔識避孕，亦冇「兩個夠曬數」呢個節育概念，兩個人結婚生7、8、9件係家常便飯，點解人口唔增長吖？原因亦都好簡單，生落嚟嘅細路仔好多都養唔大囉。

3月27號，國民黨中央決定開除李宗仁、李濟深、白崇禧黨籍，I am Sorry，唔係自己人就係敵人，打柒你。3月28號，中共中央、共青團中央聯合發出《反對軍閥戰爭宣言》！

3月29號，中日濟南事件喺南京換文解決，山東日軍喺兩個月內撤退。攘外後，就開打安內！同日蔣Sir任命唐生智為「討逆軍」五路軍總指揮，閻錫山、唐生智、中華民國海軍上將楊樹莊（1882-1934）分別通電擁蔣反桂。今日，蔣Sir亦御駕親征，親赴九江前線督師討桂，蔣桂戰爭正式爆發！

常公子 2021-5-19 11:59:49 戰前，桂系沿京漢鐵路擺開一列長蛇陣，北面為白崇禧部隊，盤踞平津地區，中路有李宗仁指揮嘅第四集團軍主力部隊，而南面則有粵桂聯盟部隊。蔣Sir任命唐生智為第五路軍總指揮，因為白崇禧部隊之內多為唐生智舊部，軍人聞訊旋即嘩變，迎唐反桂，白崇禧倉皇逃往香港，北面軍潰散。

3月26號，蔣介石派朱培德（1889-1937）、劉峙（1892-1971）、韓復榘（1890-1938）兵分三路進攻桂系兩湖部隊，而湖南省主席何鍵（1887-1956）則臨陣倒戈，投向蔣Sir，桂系李明瑞（1896-1931，後嚟仲加入埋紅軍）亦倒戈，經過差唔多一個月嘅戰鬥，桂系胡宗鐸（1892-1962）、陶鈞（1891-1974）與夏威（1893-1975）率領部隊向宜昌敗逃，4月21號，胡、陶、夏宣佈下野，第四集團軍正式瓦解。

5月5號，李宗仁、白崇禧逃回廣西，與坐鎮廣西嘅軍閥黃紹竑（1895-1966）打住「護黨救國軍」進攻廣東，卻被蔣軍打敗。6月27號，被蔣介石收買咗嘅俞作柏（1889-1959）、李明瑞率軍回師廣西，桂系無力抗衡，逐與俞、李達成諒解（即係投降嘅另一種形式），李宗仁、白崇禧同黃紹竑遠赴香港避難，歷時三個多月嘅蔣桂戰爭正式結束，蔣Sir大獲全勝。

上面係整場蔣桂戰爭嘅簡單描述，情況好似玩「三國志」咁，只要你能夠收買「忠誠度」唔高嘅將領，就能夠奪取城池，根本就唔係硬橋硬馬打仗，而係大家互相出賣同充滿檯底交易，如果我冇睇錯，當時嘅軍事將領應該冇人忠誠度可以超過50（滿血100），好多投靠蔣Sir嘅桂系軍人，之後都會倒戈，而李宗仁、白崇禧嘅故事亦未就此完結，佢哋亦都好快重返政壇，重掌權力，蔣桂戰爭，某程度上都係柴娃娃式內戰。我重申我常公子嘅論點，當時好多時候打仗，可能並非對付敵人，而係軍人搵個籍口沿途打家劫舍同埋勒索有錢人資本家，信不信由你？

叉開一筆，講講陳獨秀，1929年嘅3月，前中國領導人陳獨秀經過一年嘅埋頭研究，寫成《中國拼音文字草案》書稿，陳獨秀認為中國尚未達到國語成立嘅水平，因而佢以北京、上海、漢口、廣州四種地方語言作為標準語嚟過渡。為咗核對呢四種方言嘅讀音，陳獨秀搵過鄧穎超（1904-1992，周思來妻子）、項英（1898-1941）、沈雁冰（1896-1981，亦即係茅盾）同陸綴文、楊殷（1892-1929）及楊綺園幫忙。陳獨秀離開中共領導中央之後，專心投入學術研究，好少過問政治。

#常威💀 #蔣介石平反系列 #黃金十年 #民國歷史

常公子 2021-5-19 12:00:10

🔥【常威近代史】第八部《最九衰的大軍閥時代》Round 3電子書上架，請大家多多支持！

https://play.google.com/store/books/details?id=fY8mEAAAQBAJ

展斌舟 2021-5-19 15:42:52 推

常公子 2021-5-20 11:15:37 【常公子歷史頻道384回：替大軍閥平反系列之 瞬間看世史】

♊昨日仆街，係真的在街上仆街了，因為追巴士，在路邊整個人仆低了，一字排開仆在地上，現在左邊膝頭腫起一大舊，今日要在家中休息，兼去睇鐵打，人老了都沒辦法，仆低那一下，完全沒有反應，巴士的巨輪在身邊經過，有驚無險。

♈今次仆街，或者係一個啟示，話畀我知不再年輕，身體反應亦都大不如前，歲月的確不饒人，好多時候，人都係命運嘅奴隸，冇辦法逃避命運，做人要坦然面對命運，承受命運，世事如此，亦冇人可以逆違。

♈我哋嘅時代都有其命運，借錢總要還，延綿咗兩年嘅疫情，目前仍未有好轉嘅跡象，或者今次嘅疫情講畀大家知，人類生存最好嘅日子已經過去，之後一切並唔會咁容易，今次歷史大循環的高峰已經過去，嚟緊係向谷底下調，至於谷底有幾深，其實冇人能夠預測得到，最後物極必反，又開始另一個大循環，不過我幾乎可以肯定，自己沒法活到下一個循環裡。

♑古往今來嘅歷史都係一個大循環，100年前發生嘅事，今日好似影印機咁翻版出現，100年前冇核武，所以發生咗第一次世界大戰同埋第二次世界大戰兩次毀滅性嘅血腥戰爭，我哋無辦法否認，第二次世界大戰之後嘅長期和平，原因係因為世界上出現咗原子彈，一切都係源於暴力嘅威嚇，各有各發表意見，各有各立場表達，永遠無辦法達到統一共識，人類就是這樣一種愚蠢的動物。

🔯以色列與巴勒斯坦爆發小型戰爭，由前美國總統特朗普一手推動嘅中東和平局面，一下子就煙消雲散，好人拜登一邊譴責、一邊繼續賣武器俾以色列。整個過程簡直可以以「陰謀論」嚟解讀，如果你細心推敲，拜登上臺之後，世界不但冇和平到，反而朝相反方向進發。不過，幾星期前發表嘅民調，拜登上任後100日，其支持度直逼史上最高，遠遠拋離奧巴馬同喬治布殊克林頓，直逼朗奴列根及約翰甘迺迪，民眾似乎非常歡迎依位美國總統嘅所作所為，歷史其實非常吊詭，人類普遍都相當愚蠢，這個是真的。

✅https://youtu.be/N1QjiM20S0c

💙最新上線，請課金支持

【常威近代史】第九部《孫文之死》
https://play.google.com/store/books/details?id=evMsEAAAQBAJ

常公子 2021-5-21 14:09:42


【常威近代史】（五百三十九回）
航空母艦問題

蔣桂戰爭由1929年3月打到5月，中間仲有好多事發生，1929年3月，中華民國海軍亦開始編遣，蔣Sir為咗統一海軍，喺上海召集海軍遍遣會議，決定成立國民政府中央海軍部，會議決定將海軍編為四支艦隊，閩系海軍為第一、第二艦隊，直屬海軍部，實為中央蔣Sir之嫡系艦隊；東北海軍爲第三艦隊，歸東北邊防司令長官公署節制，即係張學良話事；廣東系海軍為第四艦隊，由南天王陳濟棠（1890-1954）指揮。

當時中華民國極度貧困，海軍嘅規模同裝備都落後於世界，更加唔可以同日本帝國嘅海軍相比（蚊牛之別），當時昭和年代，日本海軍自從打贏甲午戰爭同日俄戰爭之後，不斷高速嚮前發展，日本人係1918年已經擁有自己研發第一艘航空母艦，去到30年代，日本一共擁有7艘航空母艦，數目係世界第一，躋身世界頂級海上力量，你睇吓十零年之後，1941年12月7號，日本夠薑偷襲珍珠港美軍太平洋海軍基地你就明白！當時日本海軍派出6艘航空母艦，搭載300多架戰鬥機的兵力，重創美軍8艘戰艦、3艘巡洋艦、3艘驅逐、摧毁188架戰機，造成美單2402人死亡及1282人受傷。

中國海軍要叱吒風雲，響世界上佔一席位，要去到今時今日21世紀，以1929年作起點計算，足足仲有100年嘅發展。今日中國已經有購自前蘇聯嘅瓦良格號，及自己研製嘅航空母艦遼寧號正式服役，海軍軍力，其實係反映國力嘅指標，因為經營海軍係一條大數，個國家窮少少都唔使指意玩呢個遊戲。真正大國崛起，就係呢個意思。

叉開一筆，補充少少資料，其實「瓦良格號」並非中國購入第一艘航空母艦，蘇聯響1991年解體之後，經濟陷入困境，無力維持紅軍嘅龐大艦隊（呢個亦都係美國朗奴列根、戴卓爾夫人同西方世界樂於見到嘅事情），前蘇聯嘅航母遺產，先後被拍賣，其中就包括3艘航空母艦——明斯克號、基輔號同瓦良格號——3艘航空母艦最終都係畀中國買入，當中明斯克號同基輔號已經不具備任何軍事實際價值，純粹用來觀摩研究，只有瓦良格號可以經過改裝及翻新後正式服役。目前明斯克號同基輔號兩艘航空母艦都被改造成為航母主題公園，基輔號如今落戶天津海岸，而明思克號則從深圳搬咗去南通。上一個世紀90年代泊喺深圳嘅明思克號，大家都應該上過去參觀。