想退休了 2022-2-6 13:17:41 想問樓主4日3夜團幾錢左右？
之前上網搵過大約500USD
現在book會平好多？

千奴 2022-2-6 15:28:35 一個人獨立房+獨立廁所R$800，share房R$680
2個人折完：獨立房R$1500，share房R$1300
當時Brazilian Reals : HKD = 1:2.5
我哋揀咗share房，計返應該一個人USD200就得

想退休了 2022-2-6 15:29:48 咁真係平好多

:^(

希望30歲前去到！

千奴 2022-2-6 15:36:41 不過呢個係18年頭嘅價錢，希望你成功

:^(

千奴 2022-2-10 00:56:46
臨走前入埋瑪瑙斯個劇院參觀。呢座亞馬遜劇院係巴西橡膠業興起嘅時候建成，當時嘅歐洲都依賴呢度供應嘅橡膠整車軚，瑪瑙斯同歐洲嘅崛起可以話係分唔開。法文入面有個字Belle Époque（美好年代）就係形容歐洲一戰前嘅呢段光輝歲月。


亞馬遜劇院集合咗歐洲各國嘅大成，由意大利建築師設計，利用咗法國嘅瓦片造屋頂、蘇格蘭嘅鋼造牆身，以及意大利嘅大理石造樓梯同雕像。由1896年美好年代落成去到今日，已經屹立咗超過一百年，佢嘅華麗同歷史重量可以話超越悉尼歌劇院。


不過雖然劇院好靚，亞馬遜嘅原住民對呢座地標就有唔同嘅睇法。橡膠業為好多商人帶嚟咗巨量嘅財富，但好多住喺亞馬遜嘅人就因為噉成為咗廉價勞工，受到無盡嘅剝削。就好似呢座原住民有份搭建嘅劇院，一直等到2017年，先至有第一位原住民表演者有機會喺登上呢個舞台。呢位原住民歌手Djuena Tikuna堅持用自己嘅原住民母語嚟演唱，而唔係葡文，作為對原住民聲援運動嘅一種支援。如果有機會現場睇到相信一定幾震撼。


參觀完劇院，我哋就起程去下一站。由瑪瑙斯坐飛機去里約熱內盧，要較快一個鐘時區。落機已經係夜晚八點幾。


今次揀咗一間離海邊步行距離嘅住宿。不過夜晚嘅里約都出名治安麻麻，為免第一晚嚟到就出事，寧願近近地食完野就返歸，留返之後再去海灘。


嚟到南美洲嘅最後兩站，我哋已經抱住佛系旅遊嘅心態，每朝出門嘅時候都唔知要去睇啲咩，只係見地圖寫住Centro，去一個城市嘅中央區應該唔會有錯，就出咗發。結果行咗冇耐，就畀呢幢大樓吸引住而停低咗。



原來呢幢並唔係普通嘢，而係巴西國家圖書館（Fundação Biblioteca Nacional）。呢個圖書館非常猛料，只要Google吓世界全靚嘅圖書館，頭幾間一定會有佢嘅存在。我哋去嘅時候，正做緊一個關於宗教改革嘅展覽。


Martinho Lutero（馬丁．路德）係五百年前嘅德國神學家。嗰時嘅教宗喺歐洲賣贖罪券，信徒幫襯佢就可以換嚟死後喺地獄減刑，買得越貴減得越多，仲可以幫死咗嘅人買埋一份。當時嘅教庭靠贖罪券賺到盤滿缽滿，梵蒂崗嘅聖彼得大教堂就係靠賣呢啲券得嚟嘅錢起出嚟。馬丁路德對教庭嘅貪腐有啲失望，好勇武噉對教會提出質疑，仲寫下咗批判贖罪券意義嘅《九十五條論鋼》，引起咗大家對宗教議題嘅廣泛討論，甚至促成咗基督新教嘅誕生。


成個展覧就好似呢九十五條論鋼一樣，都係用葡文寫成，係冇英文嘅

:^(

我出返嚟嘅時候其實完全唔知自己睇過啲咩，有關呢個宗教革命嘅源起都要返去睇返先略知一二

:^(

究竟點解會喺里約大肆宣揚馬丁路德改革五百年呢？其實我都唔係好清楚。我相信可能係呢次宗教改革從而導致出現基督新教呢個分支，從而令呢個教派傳入巴西，從而巴西有好多新教徒，從而影響巴西國家安全，所以要搞個展覽嚟提提大家宗教改革已經係歷史文件，大家要向前看。果然用四個從而就可以解釋到世界萬物

:^(

二寶糖 2022-2-10 06:10:03 好勁！推！！

牙痛不是病 2022-2-10 09:58:04 笑左

千奴 2022-2-10 16:37:00 里約嘅中心區好多嘢睇，即使冇特別計劃咩行程，行十分鐘又有新發現。


呢個成座長洲包山嘅物體就係里約熱內盧主教座堂（Catedral de São Sebastião do Rio de Janeiro），亦有個名叫「天梯教堂」。呢座教堂樓高七十五米，容納到足足兩萬人，教宗訪問巴西都係喺度做彌撒。



一入到去，就見到四塊落地嘅彩繪大玻璃由地下延伸到教堂嘅頂部，好鬼有型。喺度不禁諗到一個問題，世界各地咁多豪華教堂靚到成為一流嘅景點，每日嚟參觀嘅人多到數都數唔晒，咁多遊客喺度出出入入，真係嚟禱告嘅人點先可以擺脫煩擾？




喺教堂出嚟行幾分鐘，就見到另一個頗有代表性嘅景點，葡萄牙殖民時期起嘅水道橋（Arcos Da Lapa）。


佢其實係一條高架嘅水渠，當年為咗將河水引入城市先整座呢舊嘢。雖然而家已經冇再用，但就成為咗里約少數成功保留落嚟嘅葡式建築，做咗呢度嘅地標。


喺水道橋隔離，近廿年出現咗一個年輕嘅景點——Selarón嘅樓梯（Escadaria Selarón）。 Jorge Selarón係一個智利出世嘅藝術家，後生嘅時候一邊畫畫同整雕塑，一邊遊歷世界，喺八十年代旅遊仲未咁發達嘅年代已經遊歷咗五十個國家，最終喺巴西里約定居落嚟。90年嘅時候佢開始將呢度嘅階梯鋪上顏色鮮艷嘅瓷磚，仲特別鐘意用藍黃綠呢啲巴西國旗嘅色調嚟砌，話係送比巴西人嘅禮物。


Selarón日以繼夜噉砌磚，以變賣自己嘅畫作為生，但始終都應付唔到生活。佢嘅階梯作品只係完成咗一半，就已經比包租婆趕咗出去瞓街。一個藝術青年從此變咗麥難民，自從佢開始食二手薯條，佢嘅故事就逐漸被瘋傳，世界各地嘅人都將瓷磚送比佢繼續砌，呢度嘅磚亦都變得越嚟越多元同色彩繽紛。


不過一個地方嘅風光總係背負一段悲劇。喺2013年1月，即係我哋到訪呢個階梯嘅五年前，Selarón就被發現伏屍喺樓梯上面，身上有燒焦嘅痕跡

:^(

事後有人訪問佢嘅朋友，話佢死前疑似抑鬱，有講法話佢係點火自殺嘅。真係諗唔到呢個為無數遊人帶來歡樂，花咗廿幾年心血造出嚟花花樂園，竟然成為咗自己嘅墓地。對於藝術家以噉嘅方式告別人生，我哋應該惋惜，定係尊敬？


無論如何，後來嘅人都會繼續喺呢度生活。做生意嘅人繼續做生意，塗鴉嘅人繼續塗鴉，旅遊嘅人繼續旅遊。伏屍嘅地方好快就再度佈滿遊人嘅腳印，彷彿一切都只係一場夢。世界從來唔會為任何人而停落嚟。

千奴 2022-2-10 20:42:54
喺里約中區亂步遊走，差啲忘記咗點解想嚟呢個城市。由一開始，嚟里約就係為咗去基督像到此一遊。雖然玩咗咁耐，對景點都算係麻目，但對於基督像呢種七大奇跡級數嘅地方，我同多數遊客一樣都抗拒唔到打卡嘅慾望。基督像喺里約就好似東京嘅鐵塔同台北嘅101一樣，由踏入城市嘅一刻，就會不斷進入你嘅眼球，總係畀你喺遠處望見，但似近還遠想觸觸不到。


終於到咗要搭車去近距離接觸嘅時刻。


里約熱內盧（Rio de Janeiro）之所以叫做里約熱內盧， 係有佢嘅意思。喺葡文入面，Rio係河流，Janeiro係一月，意譯就係一月之河。1502年1月葡萄牙嘅探險家第一個嚟到呢度，發現咗瓜納巴拉灣（Baía da Guanabara），將海灣當咗係河口，就為呢度改咗呢個名。里約一如佢嘅名，係海灣城市。喺東望大西洋嘅海邊，有一啲小山峰，登上去就可以一覽海灣嘅景色。呢個區域都有一個朵，叫Alto da Boa Vista，意思即係好風景嘅山嶺。而基督像座落嘅基督山（又名駝背山Corcovado）正正就係喺呢個地區，一睇就知係人傑地靈嘅地方。

講開又講，香港大潭都有條叫做Boa Vista嘅山徑，但中文就叫野豬徑。


277日一路走來，終於見到基督嘅背影，神呀！只差幾步就可以掂到你啦。


但呢幾步唔係咁簡單，要過木人巷噉左穿右插先上到

:^(

所有嘅世界級景點都係一樣，馬丘比丘又好，鬥獸場又好，都逃唔過遊客太多而淪陷嘅命運。我自己都係一份子，冇資格講啲咩

:^(

唯有學習點樣喺人多之中享受熱鬧。


成功迫到上去嘅人使出渾身解數，拍攝最好嘅角度。有人瞓喺地下，有人做極限瑜珈，實行天人合一。耶穌見到呢啲行為究竟會點諗

:^(

上帝會否赦免人類嘅戇鳩？


基督彷彿在說：愚蠢的人類呀！


雖然係噉，但都不得不承認呢個基督像嘅位置係得天獨厚。喺觀景台度俯瞰里約嘅海灣絕景，稍為理解點解區區一個幾十年歷史嘅雕像，足以同馬丘比丘、佩特拉古城呢啲鬼斧神工齊名。


基督山有時會雲霧繚繞，記得初初嚟到里約，試過離遠見到基督像喺雲霧之中探頭出嚟，如果用航拍機搵個好角度影低嗰一刻，隨時拍到基督下凡嘅畫面。傳說中嘅「叫你個耶穌落嚟見我」，可能就係噉嘅意思

:^(

呢度嘅黃昏景色都係舉世聞名，但我冇忘記喺Arequipa嘅教訓，一早發咗誓喺南美鬧市唔再出夜街。仲未計里約呢啲惡名昭彰嘅地方，路上都唔知聽過幾多次啲人喺里約比人打劫，印象中有個長途客仲話識有人喺里約遇到揸搶嘅劫匪，搶完錢畀人射瓜埋。雖然唔知係咪真，但都唔想太搏，只好喺日落之前含淚離開。

牙痛不是病 2022-2-11 06:32:46 有冇考慮著避彈衣出街

:^(

千奴 2022-2-11 12:53:26 唔識買

:^(

千奴 2022-2-11 19:47:11 里約嘅最後一個下晝，我哋留咗畀海灘。


由住宿嘅地方行幾分鐘，就可以走到Copacabana Beach。記得上一次去到沙灘，係喺烏拉圭嘅Punta del Este睇日落，當時見啲人收咗工走晒去海邊飲酒開Party，覺得呢種生活好寫意。但喺里約，啲人未到放工時份已經出晒嚟，好似唔使做噉。不其然諗起布宜諾斯艾利斯嗰啲華人老闆曾經講過，啲鬼仔今日識咗囡囡，第二朝就會請假借糧去玩，鬼同你返工咩。噉嘅生活態度真係唔怕會辜負咗呢度嘅好山好水。


呢個海灘最好玩嘅地方，係好大浪。跳落水之後就可以隨住浪潮向上向下盪嚟盪去。如果喺度住多一排，我哋都覺得可能會走去學衝浪。見到咁靚嘅海灘，諗起香港嘅西貢。以前去浪茄灣鹹田灣嘅時候已經覺得香港沙灘世一，搭個零鐘車已經去到世外桃源一樣嘅地方。點知里約竟然可以喺交通便利呢方面屌打香港，好多人直情住喺沙灘隔離，距離鬧市咁短嘅路程可以靚成噉。


除咗Copacabana，里約仲有好幾個一樣咁靚嘅海灘，當中更加出名嘅Ipanema Beach直情喺Copacabana Beach隔離，好多遊客都鐘意去嗰度，貪佢有個更加靚嘅山景。但與其追追趕趕衝多一個景點，倒不如留低喺度懶洋洋噉享受多陣海浪嘅拍打。我哋決定幾分鐘路程都慳返，繼續留喺度曬太陽。喺呢堆沙灘嘅後面，就係里約嘅貧民區，佢哋好多都聚居喺山上面，如果有時間，都有啲團係會帶人上去貧民區參觀，聽講啲團嘅收益係會落返去幫助返貧民區嘅建設，聽落感覺都唔錯。但我哋喺巴西嘅日子已經進入倒數，只能緣慳一面。


玩完水，喺一間巴西葡菜嘅餐廳坐低咗。託澳門嘅福，香港人對葡國菜都唔陌生。雖然不至於好似去茶記同食燒味飯噉普遍，但見到葡菜都有少少親切感。本來都諗住一去到葡萄牙就會整返餐食吓，結果喺巴西已經提早食得到。


好耐冇食過嘅馬介休同葡撻

:^(

食埋呢餐，我哋由里約坐巴士去到南美之旅最後一個城市——聖保羅，同時收拾心情，準備由巴西飛去葡萄牙。

牙痛不是病 2022-2-11 21:14:45 推

千奴 2022-2-12 17:32:59 抵達聖保羅（São Paulo）時，已經係夜晚。兩個孭住大背囊成身污糟邋遢又散發住臭味嘅人，戇戇鳩鳩噉喺地鐵嘅閘機前面成個林奠噉唔識嘟八達通，阻鳩住後面啲人。突然有一對情侶出現，幫我哋嘟咗飛，叫我哋跟佢哋入閘就可以

:^(

呢對聖保羅嘅情侶令我諗起大半年前喺伊斯坦堡都試過畀人請搭車。感恩之餘都好疑惑，點解呢啲見慣遊客嘅都市人仲會對遊客噉友善？


咁啱佢哋要去嘅地方同我哋住宿地方差唔多，佢哋就話要送埋我哋過去。原來呢一日係佢哋網上認識完第一日約出嚟拍拖，所以佢哋覺得同我哋好有緣分。佢哋講到已經認定咗對方係結婚對象，仲話有朝一日都要好似我哋噉一齊去旅行。唔怪得對我哋咁好，原來係想喺對方心中留下好嘅第一印象

:^(

或者好人真係有好報，四年後嘅今日，喺Facebook睇到佢哋真係結咗婚，而且囝都生埋，希望你哋可以幸福生活落去

:^(

聖保羅係巴西最多人嘅城市，亦係全美洲乃至全南半球嘅第一大城。要感受大都市嘅熱鬧，就當然要去最旺嘅地區。Liberdade係聖保羅年青人好鐘意聚集嘅地方，有啲似旺角或者台北西門町噉，最特別嘅地方係佢同時係好多日本人住嘅地方，所以有好多日本嘅嘢食同商舖

:^(

嚟之前都有聽過，聖保羅有全世界最大嘅日本人海外社群，百幾萬日本裔住咗喺度，仲多過香港人喺倫敦。最早期嘅日本人喺二十世紀初已經嚟到，主要都係農民工，一戰至二戰期間每年都有一萬幾千人過嚟呢度搵食。但當時嘅移民同今日香港去英美加有啲唔同，佢哋好多都係以團體形式跟公司噉去，去到之後好集中噉住埋一齊同打工，同當哋嘅巴西人分得好開。


一場嚟到，梗係要食日本嘢。以前去日本太容易，難得去一次長途，往往唔會將日本擺落行程。巴西嘅小日本啱啱好可以一解鄉愁，呢度嘅食店好多都真係正宗日本師傅，不過就大部份都嚟咗好多年，早就同化咗。


掃完街就入舖頭食拉麵，呢碗就唔是好地道

:^(

今日嘅巴西人都好鐘意嚟呢度行街，算係唔會太介意你係葡裔日裔定咩種族，至少冇乜聽到日本人喺街度畀人針對搶劫之類，因為要搶就話之你黑人白人都要死

:^(

但幾十年前呢度都曾經有過唔太融洽嘅時期。當時日本人因為勤力、認真、守信用，無論讀書同做生意都好出色，譬如二三十年代嗰時僅僅3%嘅日本人口靠種茶葉棉花就佔咗30%嘅農業產出，識字嘅人同入到名牌大學嘅人都比起其他族裔嘅人多，令當地人又愛又恨。



但去到二戰時期，適逢巴西當地有唔少民族主義運動，加上對軸心國嘅排斥，在地嘅日本人都遇到麻煩。當時政府為免太多日本軍國主義嘅文宣流傳，一律禁止人學日文，亦都嚴格限制日本人入境，文化活動都受影響。喺巴西境內嘅日本人出於愛國或者各種原因，仍然會秘密開日文班，或者用地下渠道去宣揚日本嘅價值觀同文化。有一單比較多人流傳嘅故事，就係話有啲日本狂熱份子一直期望日本會打嬴仗，喺戰事結束之後因為資訊唔流通或者痴撚咗線，一路以為日本已經大獲全勝，稱霸地球，仲組織咗二千人去到聖保羅嘅桑托斯港口迎接凱旋而歸嘅皇軍

:^(

邊個夠膽話日軍已經輸咗，就算係日裔巴西人都會畀人暗殺

:^(

今日嘅巴西人同全世界一樣，都係追睇日本漫畫同玩Cosplay。


而近十幾廿年，都有唔少中國同韓國人嚟呢度做生意，Liberdade唔再只係日本人嘅地頭。今日嘅Liberdade又叫做東方人區，中式韓式甚至其他亞洲地方嘅餐廳同舖頭都可以喺度搵到。有人感嘆日本留落嚟嘅色彩慢慢褪色，但都有人歡迎呢度變得越嚟越多元嘅轉變。作為一個亞洲遊客我就行得好開心，唔經唔覺就行咗成個下晝。

千奴 2022-2-12 23:19:21 呢個巴西之旅其實有一個幾大嘅遺憾，就係當初買機票走嘅時候，醒唔起二月有巴西嘉年華。嚟到先知道原來呢一年嘅嘉年華喺我哋離開南美洲之後嘅一個禮拜就正式開始

:^(

我哋啱啱好同呢個巴西最大型嘅節慶擦身而過。好彩天無絕人之路，喺正式嘉年華之前，巴西人都鐘意搞一啲事前嘅活動熱一熱身，開一個Party嚟慶祝自己準備開Party

:^(

我哋喺聖保羅可以睇到呢個嘉年華前奏，算係不幸中之大幸。


嘉年華嘅最主要城市係里約熱內盧，據講以往嘉年華嘅日子係聖保羅旅遊嘅淡季。數以百萬計嘅巴西人同遊客都會走晒去里約，聖保羅反而變咗死城。近幾年聖保羅嘅人就想搞返熱呢邊嘅氣氛，唔想淨係得里約有得玩。我哋趁着星期六日，就出咗去睇吓佢哋有幾瘋狂

:^(

我哋只係去到地鐵站搭車，就已經見到人海。自從出發前辭咗工，都冇再見過呢啲景象，睇個勢真係等多幾班車都唔掂。


金鐘地鐵站車廂內的人，為甚麼你們不行入啲呢

:^(

等咗幾班車終於迫到入去。架車都未閂門，就有啲坐喺窗邊嘅人開始拍玻璃，正諗緊佢係飲醉酒定咩事之際，側邊啲人已經好有節奏噉敲埋一份。原來佢哋係打緊拍子。突然之間，成架車嘅人就跟住拍子開始唱歌，同埋喺好迫嘅環境照樣扭腰跳舞

:^(

黎生搭地鐵就係為咗返工，而佢哋嘅訴求就係要開Party，冇其他啦。我覺得我其實可以即刻落車，巴西嘉年華似乎已經喺度開始咗。


大家都盛裝出席

:^(

聖保羅嘅嘉年華都係出咗名多LGBTQ人士參與，總之嚟得就咩都唔使理，男又好，女又好，聽得明又好，聽唔明都好，一齊跳同發癲就對了。



佢哋唱完一首歌，台上嘅人又會講一堆嘢，然後又再唱過。雖然有時附近嘅人都會友善噉Yo埋我哋一齊跳，但唔係全程解釋嘅話都未能好深入噉了解。大致上有種感覺，就係巴西人都覺得佢哋政治環境唔太好，所以倍感珍惜呢啲大型聚會嘅機會。每年一次出嚟狂歡，塞吓車霸吓路，就係一個機會係宣示呢啲地方係大家嘅，我哋先係城市嘅主人。近兩年因為武漢肺炎，嘉年華都被迫取消，或者就正好印證咗佢哋嘅擔憂

:^(

雖然唔係正式嘅巴西嘉年華，但呢個嘉年華嘅預演，對最後一日留喺南美嘅我哋嚟講，都算係異常熱鬧。我哋南美嘅旅程都隨住我哋離開呢班狂歡人士，曲終人散，悄悄嚟到結尾。喺最後嘅最後，我哋選擇咗遠離煩囂嘅人群，食完飯就沿住河濱散步返歸，沿途細數呢幾個月嚟喺呢片曾經代表住冒險同刺激嘅拉美大陸所發生嘅點滴。由初初去到古巴上唔到網，整親腳又買唔到M巾，到喺墨西哥遇到地震，中間有驚無險上到南極嘅船，喺秘魯手機被偷差啲要返香港，到喺玻利維亞雪山上面大難不死，一路走來有悲有喜。喺我哋去機場嘅路上，一幕幕回憶就喺腦海中快播。呢啲畫面事隔幾年之後，至今依然歷歷在目。


真係要走啦。去過嘅人都話南美洲係人生必去一次嘅地方，事實真係駁唔到。

機械人遊世界 2022-2-13 16:43:01 終於完南美洲章了

:^(

繼續寫落去唔該，留名支持

:^(

牙痛不是病 2022-2-14 06:41:47 突然更新咁快

:^(

千奴 2022-2-14 10:12:20 有睇你古巴遊記，你會唔會寫埋其他經歷等我哋睇吓

:^(

連登啲其他遊記好多都爛晒尾

:^(

千奴 2022-2-14 10:12:44 加速

:^(

機械人遊世界 2022-2-14 11:12:22 我都想，但過獎了你，而家係香港，放假只想hea

:^(

:^(

無謂獻醜了

:^(

紅豆白玉抹茶芭菲 2022-2-15 12:56:51 千奴巴是咪WFH多咗時間出post

:^(

間道暫時人 2022-2-15 19:11:48 智利﹑玻利維亞﹑秘魯有咩咁正

:^(

:^(

:^(

一直好想去南美做backpacker

:^(

機械人遊世界 2022-2-15 22:15:34 應該無咩撞樓主既相，無騎劫，其他景點請爬樓主文

:^(

真係得手機相，拋磚引玉

:^(

智利
Valparaiso


湖區

復活島

San Pedro de Atacama

Torres del Paine

玻利維亞
死亡公路踩單車

:^(

話時話，你全走麥理浩徑

:^(

終身學習 2022-2-15 23:55:45 樓豬嘅遊紀多資訊，文筆又好。

千奴 2022-2-16 00:48:47

智利﹑玻利維亞﹑秘魯有咩咁正

:^(

:^(

:^(

一直好想去南美做backpacker

:^(

應該無咩撞樓主既相，無騎劫，其他景點請爬樓主文

:^(

真係得手機相，拋磚引玉

:^(

智利
Valparaiso

湖區

復活島

San Pedro de Atacama

Torres del Paine

玻利維亞
死亡公路踩單車

:^(

話時話，你全走麥理浩徑

:^(

啲經歷寫晒出嚟應該好正

:^(