千奴 2022-1-27 16:05:08 你繼續睇我繼續寫

:^(

滿天的貝果 2022-1-27 20:56:37 由樓主開第一個post就開始睇
會堅持到寫完嘅一日

:^(

千奴 2022-1-28 16:58:40 瑪瑙斯係亞瑪遜河流域嘅最大城市，比起一片空白嘅巴西利亞歴史，瑪瑙斯就相對悠久少少。


呢度唔算係啲咩古城，但叫做曾經風光過。喺工業革命開始之後，全世界對橡膠嘅需求越嚟越大，無論係整車軚、整鞋、整Condom都要用到。亞馬遜盆地嘅南半部盛產橡膠樹，好多橡膠商人就嚟到呢頭生產橡膠，經瑪瑙斯運到巴西東部嘅貝倫港口，令到大量嘅資金流入瑪瑙斯，揭開咗呢度華麗發展嘅序幕。當時嘅瑪瑙斯壟斷咗全球嘅橡膠生產市場，單係橡膠就佔咗全巴西總出口量嘅四成，呢啲有錢嘅商人起到一街都係豪宅，瑪瑙斯一度成為世上最金碧輝煌嘅城市之一。


呢個亞馬遜劇院算得上係當年繁華嘅象徵。不過我哋嚟瑪瑙斯主要係想去雨林，所以第一日就冇入去參觀，而係去咗幾間旅行社格價睇下點入雨林抵啲。我哋預咗三至五日時間喺雨林入面，去到啲公司到問，發覺咩長度嘅團都有。你鐘意兩三日體驗又得，留足一個禮拜都得，最終我哋選擇咗四日三夜嘅中間方案

:^(

喺度報團同秘魯玻利維亞一樣咁方便，今日報完第二朝已經出得發，基本上日日都開團，完全唔使驚就唔到時間。未出發之前就喺旅行社識咗一個同團嘅丹麥遊客，十九歲已經一條友嚟巴西玩

:^(

佢因為驚嚟到先報會預算唔到，所以喺丹麥已經網上報定，最後團費係我嘅一倍有多，證明啲歐洲嘅agent食水都深

:^(

但我叫佢唔好咁介意，有時早啲計劃定都未必唔好，叔叔19歲嘅時候只係將美好嘅青春浪費喺A-Level身上。


出咗嚟旅行先至發現，東亞嘅教育係幾咁戇鳩。有時都會幻想，如果呢場旅行早十年發生，人生會有咩唔同。但又冇得咁計，因為早十年又唔會有錢做呢件事，玩法亦會好唔一樣。只能夠話喺意識到可以出發嘅時候就出發，已經係能力範圍內可以做到嘅最好選擇。


搭車又搭船沿住河流深入雨林，瑪瑙斯好快就喺我眼前消失。轉眼間去咗亞馬遜入面嘅木屋。亞馬遜河流域兩邊都有唔少人住，其中有啲距離城市唔算好遠嘅地方，搭建咗啲專為遊客而設嘅屋仔，嚟玩嘅團基本上都係住喺呢度。


上咗船之後首先會去到一個公共嘅空間，類似係Hostel嘅大廳。每個呢啲噉樣嘅島仔都會住幾團人，每團大約有五六人，十幾廿人分享呢個大廳入面嘅設施，好似公廁、沖涼房之類，食飯嘅時間都會一齊嚟呢度開餐，或者喺度傾吓偈識吓啲團友噉。


由大廳行木梯上去，就會去到各自嘅房。每一團人住一間房。房嘅空間都幾大，床同床之間嘅距離比起城市嘅Hostel會闊落好多，算係比較舒服。當然住喺雨林入面，蚊蟲一定多，每張床都有自己嘅蚊帳，如果唔包實係冇可能瞓得到

:^(

舟車勞頓咗一輪，導遊就叫我哋休息吓先，佢自己就順便Hea吓，轉頭再帶我哋出去。就係噉，我哋就再度由繁忙嘅都市遁入山林，正式展開亞馬遜雨林之旅。

千奴 2022-1-28 16:59:56 大家嘅留言就係我寫落去嘅動力

:^(

機械人遊世界 2022-1-28 21:56:16 巴打加油，支持你寫到尾

:^(

:^(

熱浪打手 2022-1-29 02:59:27 巴打加油 每晚上嚟睇有無update

:^(

嗱你咪過嚟啊 2022-1-29 23:10:00 唔知幾時會再update呢

:^(

月光巴記住守規矩 2022-1-31 08:52:02 終於到亞馬遜

:^(

:^(

:^(

:^(

千奴 2022-2-1 16:50:43 入到雨林，先知道原來最重大嘅體會，並唔係雨林入面嘅生活有幾獵奇同刺激，而係幾咁悠閒同寧靜。


當大家都瞓完晏覺，由坐車坐船嘅勞累之中恢復過嚟之後，我哋就準備開始第一個活動，就係準備今晚嘅晚餐。作為一個雨林生活嘅體驗團，當然要食雨林入面嘅食物。喺亞馬遜覓食，並唔係好似城市噉入餐廳放低銀両等人炮制，而係要自己去捉動物嚟食。導遊比咗啲生雞肉我哋做魚餌，就叫我哋自己釣今晚嘅嘢食上嚟。釣到幾多就食幾多。


香港都有好多人玩釣魚，唔少仲玩得好專業，但我就從來冇試過。不過在座都唔係淨係得我一個唔識，所以都冇乜壓力。最右手邊嗰個鬼仔就係上次提過嘅丹麥男仔，左二嗰個赤裸上身嘅阿叔係中國嚟嘅，同我哋係同一團。平時我都幾鐘意同啲五十幾歲仲會出嚟獨遊嘅叔叔姨姨傾偈，因為通常佢哋思維都會比一般嘅都市人開放，心境年輕得嚟又會畀到我生活上嘅啟發，聽完佢哋分享總係好似上咗一堂哲學堂噉。但呢個阿叔就比較特別，嚟咗冇幾耐已經見佢兩次對住條河吐口水吐痰，講嘢都串柒柒，人哋釣魚佢就坐埋一邊講自己釣咗好多年，轉頭你哋釣唔到再過兩招比大家。最恐怖係咩？係鐘意同我講大家都係中國人

:^(

人在外對住呢種人都只好敬而遠之。至於右二嗰個比堅尼囡囡就係日本女仔嚟，佢係同另一個日本朋友一齊過嚟巴西讀書，呢排放假先走過嚟玩。其實亞馬遜都唔係好熱，間唔中有啲雨粉都涼浸浸，可能佢嚟得巴西耐慣咗唔凍。既然佢鐘意噉着大家都唯有望多兩眼

:^(

玩咗一陣連我都有魚願者上釣，唔使聽中國叔叔鳩噏當秘笈之餘，今晚晚餐亦有着落。日本囡囡都忍唔住過嚟搵哥哥教路。不過我同佢其實有啲溝通障礙，日本囡囡淨係識日文同葡文，英文麻麻，而我日文就淨係識二姑吔媽爹，喺度冇Wi-Fi用唔到Google Translate就碌葛噉雞同鴨講。中國叔叔唔知係咪對日本囡囡好有興趣，成日借啲意過嚟話做我哋翻譯，因為佢好似又識幾句日文。但每次一行埋嚟，氣氛就即刻好尷尬

:^(

大家都釣完魚，等阿叔着返衫，就正式出發，喺附近划船兜風。日本囡囡係第二團嘅朋友，冇同我哋一齊上艇。我哋同同團嘅丹麥仔仔、中國阿叔同一個法國佬一齊河上泛舟，望吓兩邊嘅風景。導遊得閒就指吓河入面見到啲咩動物，插碌棍落去嚇吓佢哋，話可以撈上嚟比我哋睇，通常我哋都話唔使唔使，好快就過咗一兩個鐘。



老老實實入咗嚟雨林其實都冇咩嘢做，但又唔會覺得好無聊。或者調返轉講，係平時喺城市塞得啲行程太滿，甚至出嚟旅行之前每日都太過忙碌。其實點解一定要有景點先叫有嘢睇？揀好咗餐廳先叫有嘢食？靜靜哋吹吓風，索吓清爽嘅空氣，都冇咩唔好丫。


喺河中心等到日落，睇住夕陽徐徐西下，呢啲以為古代江湖片先有嘅畫面，竟然出現喺眼前。有別於天空之鏡嗰種天無際水無涯，呢個日落似乎更加入世。我哋同另外一團人喺河嘅中心相對望，又刻意保持咗一啲距離。大家忍唔住影低眼前嘅風景，又矛盾地放低手機，驚住掛住影相會錯過咗感受呢個魔幻時刻。



自己一個入到山林，總係唔敢留到日落時分，因為日落之後好快天黑，會趕唔切離開。但有導遊嘅團就唔一樣。導遊話天黑都係雨林生活嘅一部份，唔使擔心。河嘅兩邊除咗住宿嘅位置一盞街燈都冇，不過導遊好似自帶雷達噉喺闇夜中航行，勁過自動駕駛。 佢撐撐吓艇停咗喺度，問我哋見唔見到有嘢。


心諗夜媽媽有啲咩

:^(

唔通呢度都興好似內蒙古噉玩嗰味嘢？

千奴 2022-2-1 16:52:14 多謝你由頭支持到尾

:^(

要記住呢種出走嘅感覺

:^(

千奴 2022-2-1 16:53:11 今晚會唔會上嚟先

:^(

千奴 2022-2-1 16:53:45 通常隔兩三日都有Update嘅

:^(

千奴 2022-2-1 16:54:15 我都覺得好神奇，竟然真係寫到

:^(

嗱你咪過嚟啊 2022-2-1 21:40:56

:^(

熱浪打手 2022-2-2 01:37:33 上了

:^(

:^(

緊握夫手 2022-2-2 02:10:29 支持

吳若希 2022-2-2 02:14:37 Lm

千奴 2022-2-3 00:03:05
原來導遊唔知係邊度撈咗條鱷魚仔上嚟，捧喺手中做掌上玩物。佢係咁撫摸條鱷魚，話佢係亞馬遜人嘅好朋友，叫大家都可以好似抱BB噉，掃吓佢嫩滑嘅玉背。


鱷魚食人就聽得多，但見呢條細鱷魚就算發起癲一啖咬落嚟，頂盡都係吞到我一隻手，應該死唔去。人一世物一世，就膽粗粗抱吓佢。衰鬼又真係幾得意

:^(

返到去旅行團啲助手已經煮好晒晏晝釣嗰啲魚，預備好晚餐比我哋食。即係話其實就算乜都釣唔到，都唔使驚會冇得食，班友頭先只係嚇鳩我哋。食完嘢匿入蚊帳，好快就進入夢鄉。作為一個浪遊咗大半年嘅旅人，已經冇乜環境係瞓唔着。不過呢個諗法，好快就喺第二晚被顛覆。


第二日嘅行程，導遊划艇帶我哋去到一片叢林爆林。呢度啲樹為咗喺潮濕嘅環境爭取多啲陽光，都生到鬼死咁高，令到密林入面反而變得好陰暗。導遊拎住把開山刀一路劈開啲葉，一路越行越入，行行吓就停咗喺度叫我哋埋嚟睇埋嚟揀。


呢啲圓姑碌硬掘掘嘅物體係咩嚟？


導遊大刀一劈，啲硬殼就分開兩半，入面好多細細粒嘅嘢就出咗嚟。原來呢度盛產巴西堅果。亞馬遜嘅巴西堅果樹屬於有絕種威脅嘅易危物種，呢啲成舊椰青咁大嘅波波就係堅果樹嘅果實。果實外層係一浸木質化嘅殼，斬開之後入面嗰啲就係可以食用嘅種子

:^(

成日聽嗰啲巴西堅果油都係用佢哋整出嚟。


玩完堅果，導遊就問我哋有冇搽蚊怕水。亞馬遜雨林啲蚊多到痴撚咗線，我唔止有搽，仲要用華沙佛地魔（唔記得嘅巴絲罰你睇返幾年前（II）嗰篇

:^(

）教我嘅方法噴咗唔知幾多次。呢度嘅蚊都唔輸比波蘭的森林，導遊突然噉問係咪想借蚊怕水

:^(

導遊心諗，蚊怕水？佢笑而不語，淨係指住樹上面嘅呢舊嘢。


呢度周圍都係啲一碌碌巨屌一樣嘅啡色棍。導遊話亞馬遜人係唔用蚊怕水，大自然早就為大家準備咗最好嘅驅蚊劑。


我同導遊分享以前喺波蘭師父教落，防蚊唔係噉防，一定要噴啲好高濃度嘅蚊怕水先得。點知導遊一臉不屑，表示聽都未聽過波蘭Martin，仲話識佢老鼠

:^(

佢笑笑口噉問我哋知唔知呢舊係咩，仲話呢幾日唔想畀毒蚊咬死就學嘢啦！

原來呢舊係蟻竇嚟。蟻竇防蚊有咩用呢？說時遲那時快，導遊已經一手拍咗落個蟻竇度，只見成百上千嘅螞蟻喺個竇到爬出嚟，經導遊隻手四散爬入佢件衫入面

:^(

佢另一隻手用瞬雷不及掩耳嘅速度狂捽身上同手上嘅螞蟻，捽死晒佢哋。根據佢嘅講法，呢啲手上嘅螞蟻屍會散發一種驅蚊嘅氣味，對皮膚又冇害，好過用蚊怕水多多聲。


見佢講到咁有效，個樣又正常過Martin咁多，冇理由唔信佢。鱷魚都抱得，唔差在比蟻咬。於是我又將我隻玉手放喺蟻竇上面，靜待奇跡發生。


蟻群好快就湧上我手指、手掌、手臂、胸膛、下體⋯⋯

:^(

講吓姐，其實冇咁誇張，啲蟻爬到上手臂已經好撚唔舒服，即刻縮手死捽爛捽，照計就躝唔到咁落嘅

:^(

我諗我捽死咗冇一百隻都有五十隻蟻，真係阿彌陀佛。不過即使捽死晒都好，之後一路都凝住仲有蟻喺啲衫褲入面躝嚟躝去，好似好痕。嗰種由手痕到落腳嘅感覺，一路行嘅時候都總係揮之不去，久久不能散去。

時至今日諗返呢件事都會覺得個身好痕

:^(

滿天的貝果 2022-2-3 03:01:53 痴撚線

:^(

千奴 2022-2-4 00:46:13
爆完林玩完蟻又接近黃昏，導遊話今晚唔返去瞓，會去另一個地方一齊野外露出。


雖然望落去係非常簡陋，但呢個屋頂其實好穩陣，見到個地下咁乾就知佢擋雨嘅能力係一流，就算半夜落狗屎都唔驚。


趁未天黑，我哋就拿拿林紥好今晚瞓覺用嘅吊床。呢啲吊床之前喺哥倫比亞嗰堆Hostel都見過，但當時都係喺大堂度同人吹水或者Hea嗰時先會喺上面攤一陣。短暫噉搖十分八分鐘都幾舒服，但攤得太耐其實會有啲腰骨痛。尋日仲以為自己好勁，可以喺咩環境都瞓得着，點知話口未完已經有啲擔心。希望今晚唔好瞓瞓吓撻咗落地

:^(

喺我哋Set緊吊床嘅時候，導遊就劈好晒柴，準備透火整今晚嘅食物。佢唔知喺邊度變咗隻雞出嚟，今晚一齊BBQ。


話咁快天已經黑齊，短暫嘅停雨時間亦都隨之結束，又再落過。燒嘢食就燒得多，落住雨燒又少玩啲，原來風味都唔錯。


燒雞翼我最鐘意食。食完之後已經冇任何嘢可以做，呢度周圍都黑晒，唔好話冇得上網，連電都冇得叉，亦都冇得沖涼，真係玩完雀仔都冇得洗手

:^(

今舖想唔試吓瞓覺都唔得。喺陌生嘅環境，唔太舒服嘅吊床，加上咁早就去瞓，相信來自都市嘅人都唔會瞓得太好，等咗個幾兩個鐘都未聽見有鼻鼾聲出現。我自己都只係眼光光，聽住頭頂嘅雨聲同外面嘅蟲鳴，只覺得呢一夜特別漫長。

有時喺城市住得太耐，都會幻想有朝一日好似啲災難片主角噉流落荒島，或者會活得更加自在開心。但到真係去到與世隔絕嘅時候，就發現自己冇想像中咁脫離到世俗。瞓喺吊床上面，不由得會掛住前一晚蚊帳入面嗰張頹床。

嗱你咪過嚟啊 2022-2-4 02:37:20 有文啦

:^(

千奴 2022-2-4 19:18:47

呢一晚去到好夜先勉強瞓得着，亦都好早醒咗，感覺有啲似搭完夜機瞓得唔好嗰種溫溫墩墩嘅狀態。同我一齊嚟嘅團友個個都差唔多。導遊應該都預咗係噉，所以好貼心噉划船比我哋返房休息一吓。



第三日去咗睇吓而家啲亞馬遜嘅住民平日攪邊科。隨住世界越嚟越一體化，雨林人嘅生活都唔再原始，你估真係打獵為生一世唔出去咩？與世隔絕嘅人唔係冇，不過嗰啲會住得更加深入，唔係跟團可以去得到。住喺鄰近城市嘅雨林人，除咗好多都轉晒好似導遊呢種帶人入嚟玩之外，好多就係種吓生果開吓工具整啲嘢出去賣。聽過有啲團會帶遊客睇「土著」，即係上身唔着衫下身包塊布，戴啲特別頭飾嗰種，但導遊坦白講其實嗰啲「土著」等遊客走咗就會換返T-shirt牛仔褲。冇比社會同化嘅真土著根本唔會比你睇得到。

唔知係咪呢團冇土著睇所以佢先噉講。不過好似有啲道理。


呢舊鱷魚骨有幾多年歷史呢

:^(

之後就係睇吓呢頭啲野生動物，試啲古靈精怪嘅果肉。我嚟之前以為亞馬遜會睇到好多冇見過嘅奇珍異獸，嚟到之後發現唔係想像中咁多。當然一來因為我冇長鏡又唔識影相，就算見到都捕捉唔到，另一方面就真係唔太常出現。可能旅行團太多，導致啲雨林動物已經搬晒去啲更少人嘅地方。


食完呢日嘅午飯，就去咗參觀一個仲喺呢度居住嘅亞馬遜家庭。



首先都係要坐艇

:^(

然後由一個赤腳嘅妹妹帶我哋入去

:^(

一入到屋已經見到呢個屋企有三個細路，再望吓佢哋個廳，有啲書架擺滿咗啲葡文書同數學書，似係佢哋返學會用，呢個應該唔係呃遊客嘅假家庭

:^(

我覺得自己好戇鳩，自從聽完個導遊講假土著，第一件事就係諗呢個旅程遇到嘅嘢邊啲係真邊啲係假

:^(

之後我直情問個導遊其實老老實實佢哋係咪住喺度，會唔會我哋一離開佢哋就散水放工返瑪瑙斯？


不過就算真係，都唔會話畀我知啦

:^(

導遊話唔係，佢哋真係住呢度，唔信今晚食完飯留低喺度唔好走。我就即刻話我信啦，唔好扔低我喺度

:^(

呢度嘅生活其實同城市未必差好遠，例如話細路仔一樣有學返。原來呢度有啲雨林嘅學校，住附近嘅小朋友會定時聚集埋一齊上堂，學嘅都係一般課程，方便佢哋大咗想出城市升學做嘢，都唔使怕一世困喺雨林。同時政府有唔少優惠嘅政策鼓勵佢哋留低發展，甚至希望城市嘅人入嚟亞馬遜開荒，所以呢度嘅居民除咗旅遊業之餘，一路都有得攞政府補助，生活過得唔錯。但導遊話雖然係咁，似乎都唔多巴西年青人有興趣留喺呢邊。計我話搞呢啲嘢一定要學老毛，整返場文革搞上山下鄉大家自然湧住過嚟。可能有朝一日香港知識青年就要去大灣區接受貧下中農再教育

:^(

你哋大咗會想出城市打工定喺雨林生活呀？

蘋果貓 2022-2-4 19:31:30 正皮

深山巨蟒(のあ) 2022-2-5 01:54:52 睇到好痕

:^(

千奴 2022-2-5 22:45:20
霎眼嚟到亞馬遜最後一日。今日嘅主題係瑪瑙斯嘅發跡史。之前提過瑪瑙斯曾經盛極一時，靠嘅就係當時極為蓬勃嘅橡膠業。英國歷史學家Robin Furneaux噉樣形容呢個城市當時嘅盛況：如果一個橡膠大亨買一艘遊艇，另一個就會喺自己別墅馴養獅子，而第三個就會日日開香檳嚟餵佢啲馬。


一切都由亞馬遜獨有嘅橡膠樹開始。


導遊向我哋示範點樣𠝹開啲橡膠樹等啲乳膠汁自己流出嚟，然後攞個桶裝起佢。


之後只要將啲乳膠汁加熱，再用適當嘅模具，就可以變成你想要嘅嘢。如果倒啲汁落碌鳩度就會變成形狀啱啱好嘅乳膠安全套

:^(

為咗撥大個火，又即場拎啲葉做咗把芭蕉扇出嚟

:^(

起好咗火之後，導遊就叫大家伸碌鳩出嚟，係時候整Condom

:^(

喺啲鬼佬面前獻醜不如藏拙，一於等個丹麥仔或者鐘意表演嘅中國大叔出場。不過佢哋似乎都冇乜自信，唔敢除褲

:^(

導遊見大家都鳩縮，就冇再強人所難，唯有拎咗碌一早預備好嘅棍出嚟，話呢支嘢同自己嗰碌差唔多大，大家比啲想像力想像吓。


搽勻啲乳膠汁再烤一烤，一個環保撚都啱用嘅純天然Dom Dom就即將完成

:^(

搞掂晒之後，啲火已經冇咗價值，淋熄埋佢就走得。


用神聖嘅亞馬遜河水沖一沖，幫火熱嘅Dom Dom降一降溫。


導遊純熟地將個套劣鳩噉劣返出嚟，如假包換嘅亞馬遜Condom終於完成。



一摸上手，成塊鱷魚皮咁厚， 咩咩杜雷斯岡本Extra Safe都要行埋一邊，識用一定係用亞馬遜牌，包你屌極都唔穿。真係想知導遊自己究竟有冇用過

:^(

除咗整Condom，越嚟越多嘅加工方法令到橡膠喺各個行業都有廣泛嘅用途，可以整擦膠、整雨褸、整防水鞋，嚟搵食嘅商人好多都發咗達。車軚嘅應用更加將瑪瑙斯嘅橡膠業推向最高峰。不過好景不常，後來有人將橡膠樹嘅種子運咗出去其他地方種植，結束咗呢度壟斷嘅產業。今日最大嘅橡膠生產國，已經由巴西變成咗泰國、印尼、馬來西亞等等嘅東南亞國家。瑪瑙斯亦都慢慢淡出咗光輝嘅歷史舞台，淪為巴西嘅二線城市，喺香港更加係名不見經傳。


臨到最後，我哋同第一日就遇到嘅日本留學女仔、丹麥仔同法國佬一齊玩啤牌玩UNO，渡過最後嘅雨林時光。日本女仔近乎唔識英文，法國佬啲英文口音重到我都聽唔明（我啲口音佢都聽唔明，大家同一句話都經常要講三四次先估到）。但日本女仔識葡文，法國佬同丹麥仔識西班牙文，我都喺秘魯學咗一排，因為西文同葡文好似，結果大家分別用啲初階西文葡文溝通反而玩得更加順暢。好快就玩到畀人催上船。


四日三夜嘅亞馬遜之旅，冇太多預想嘅驚險刺激，反而似係走咗入一座雨林嘅博物館，細聽一草一木講城市嘅興衰，以及現代社會同雨林生活並存嘅故事。臨走嘅一場大雨，成為咗我回望亞馬遜雨林最後嘅畫面。我哋帶住呢啲亦雨亦晴嘅記憶，返到文明城市，繼續踏上南美洲最後幾日嘅旅程。