蘇克雷有個外號,叫做「擁有四個名字的城市」(La Ciudad de los Cuatro Nombres)。最原始嘅蘇克雷叫做Chuquisaca(丘基薩卡),今時今日呢個變咗做蘇克雷所在省嘅省名,而因為呢度嘅原住民係查卡斯人(Charcas),呢座城市亦一度被人叫做查卡斯。到咗西班牙人嚟到之後,發現玻利維亞波托西(Potosí)一帶有好大嘅銀礦,就將呢座喺隔離嘅山谷之城命名做La Plata(西班牙文意思指白銀)。啲西班牙人將呢度挖到嘅白銀運晒去菲律賓再同當時嘅明朝中國交易香料絲綢,再運返去墨西哥賣,仲好賺過誠哥。直至呢度成為南美洲第一個爆發反西班牙帝國統治革命嘅城市之後,先至用玻利維亞獨立後第一個總統嘅名蘇克雷作為呢個首都嘅稱號。
我望住呢個唔靚得嚟但又有啲驚喜嘅煙花,數一數旅程已經嚟到第245日。好慶幸自己過咗咁刺激嘅2017年,亦好相信嚟緊嘅一年一定會更精采。雖然一路上都有起起伏伏,但整體嚟講都算順利。諗起Into The Wild戲入面嗰個出走嘅主角臨尾喺筆記度寫低嘅一句:Happiness is only real when shared。感激沿途有您。