千奴 2021-4-4 17:42:23 搭咗程內陸機好快就到咗Cartagena。降落嘅時候係凌晨。半夜喺哥倫比亞嘅街頭感覺都唔係太好。好彩機場隔離就係民居，行兩三個字已經到咗住宿。個Host叫我哋夜晚記得鎖晒啲鐵閘同門，千祈唔好鬆懈

:^(

嚟到Cartagena好似返咗歐洲啲旅遊城市噉，又係有個Old Town，四圍都係Cafe、紀念品舖嗰啲遊客嘢。


天氣麻麻，整個哥倫比亞北部都成日落雨。


Cartagena都係文青打卡嘅好地方，我會話佢係古巴Trinidad嘅現代版。


遊客以外都有居民。

要唔要哥哥教你做功課

:^(

南美洲嘅教堂亦都幾值得睇。講波哥大嘅時候漏咗呢個：

Santuario Nuestra Señora de El Carmen，外面望落幾有特色，可惜去嘅時候就冇開到，唔知入面有冇特別。成個旅程最靚嘅教堂，除咗梵蒂崗之外，另外有兩座留下好深印象嘅都喺南美洲，連我呢啲冇信教嘅人都覺得唔可以錯過

:^(

多即刻駁咀 2021-4-4 17:50:53 lm

千奴 2021-4-4 22:49:23 嚟到哥倫比亞北部，冇理由淨係留喺城市咁浪費。坐巴士向東去到Santa Marta，再轉車就到咗Tayrona National Park。走入國家公園之前，就喺附近嘅住宿落腳。


都唔記得幾耐冇住過呢啲後生仔女為主嘅Hostel。隨住旅程越嚟越長，可能我哋身心都攰，亦可能純粹冇咗嗰種想不斷識人傾偈嘅衝動，我哋都傾向留多啲空間比自己，book返啲安靜隱閉嘅Airbnb。不過喺呢度搵唔到高評分嘅住宿，反而喺Hostelworld見到呢間好多正評，睇相又幾有味道，就試試佢。


呢間就係我哋嘅房

:^(

完全融入咗大自然。房個屋頂好撚穩，就算落大雨都唔驚。空氣好流通，只會涼，唔會熱。


望出去就係噉樣

:^(

一嚟到我哋已經好鐘意呢度。真係要講缺點嘅話，就係始終喺山林入面，好多蟲蟲係走唔甩。沖緊涼都會有啲鹹蟲飛入嚟睇你

:^(

夜晚見到有好大隻嘅甲蟲喺地板到爬，但唔理佢哋就可以瞓得好好

:^(

Hostel個老板長期喺Common Area度，好鐘意同啲入住嘅遊客傾偈。因為太僻嘅關係，基本上嚟得呢度嘅都係長途客，短極都起碼玩一個月。不過就算大家都係係長途旅人，當我哋話比人聽由蒙古一路玩過嚟玩咗五個月，都仍然足以令大家羨慕。但點勁都唔夠個老闆勁。Hostel老闆係法國人，幾多歲就不詳，斷估係三字尾四字頭。大學主修建築，有次旅行嚟到哥倫比亞覺得呢度好正，就決定親手起一間Hostel出嚟，喺度定居，一做就做咗好多年

:^(

雖然佢就話其實唔難，但佢都有分享一定要同呢度啲黑幫打交道

:^(

得閒交吓保護費噉

:^(

我呢啲出嚟玩，洗晒啲錢之後始終都要返去做奴隸嘅人，對呢啲係路途上搵到想做嘅嘢仲赴諸實行嘅夢想家真係好敬佩。好多人出嚟遠行，多多少少都係帶住迷惘，覺得原本嘅生活有啲問題，希望藉住一次旅程可以改變自己，或者至少想搵到一啲嘢。但好多時去到最後，會發現時代嘅巨輪太大，唔係咁容易就改變到轉到嘅方向。尋尋覓覓，反而越嚟越迷失。

有一個英國嘅女仔好似同我諗緊同一樣嘢，言談間知道我同佢大學係讀同一科，同做一行。我就做咗幾年嘢，而佢就都啱啱完咗Intern，覺得工作太悶而出嚟旅行。佢同我講：如果我哋係為咗改變先至走出嚟，就唔好望返轉頭，你返到香港同我返到英國之後，一定唔可以再做返原本嘅嘢。Remember it.

我就失敗咗啦，唔知佢有冇做得到呢？

:^(

花濺淚 2021-4-4 22:55:41 追緊post 唔好爛尾

千奴 2021-4-4 22:59:14 洗心革面，日日都有出

:^(

最中意食蛋黃醬 2021-4-4 23:44:43 樓主唔好爛尾啊

:^(

蟲蟲特攻隊 2021-4-5 02:44:13 留名

山區兒童窩巴 2021-4-5 06:08:17 lm

千奴 2021-4-5 17:25:14
由城市遁入山林，連生活習慣都好容易改變，會不知不覺想早啲起身，索吓大自然靈氣。


嚟到南美洲，距離嘅定義唔同咗。諗住貪平唔搭車行去國家公園，一行就閒閒地行粒幾鐘先去到入口

:^(

入咗去都係繼續行山。冇幾耐就有幾個哥倫比亞人同我哋一齊行。

行咗幾粒鐘先見到個沙灘。


就係佢哋，猛咁話好靚好靚。


好靚咩？睇過？當時我都冇好驚艷嘅感覺。返嚟睇返相，更覺普通。西貢靚過佢喎

:^(

麥徑二段睇晒四灣嗰個景完全屌打

:^(

行吓吓會有啲好似係住呢頭嘅人喺度賣椰青。


土著嘅服飾都難掩佢哋摩登嘅一面，smart phone條電話線都飛埋出嚟

:^(

順帶一提，喺南美洲，以我所見最多人用嘅係華為

:^(

Samsung都多過iPhone，因為iPhone加埋稅之後真係買嗰個都戇鳩（而我好快就做咗嗰個戇鳩了

:^(

）。


Tayrona未至於唔靚，但咁遠貢入嚟性格比偏低。本身為咗嚟呢度先住Hostel，結果間人正景靚嘅住縮反而成為咗呢一段嘅主菜。旅行就係估佢唔到先至好玩

:^(

Feb 2021-4-5 18:19:24

:^(

lm

千奴 2021-4-5 22:31:19

冇幾耐之後就風起雲湧。

如果識影閃電應該可以影到好靚嘅相，可以喺房入面輕鬆見到

:^(

但怕行雷嘅人就唔好嚟呢度住了

:^(

住埋呢晚就返Santa Marta。

冇晒位唯有喺中間加櫈，不禁令人諗起東歐啲巴士，不過呢邊衰極都唔使坐廁所

:^(

Santa Marta同Cartagena一樣都係哥倫比亞北部嘅海邊城市。論旅遊嚟講就遊客少啲，冇咗Old Town嗰種商業化，反而更加舒服。少咗遊客商店，取以代之嘅係啲洗到冇乜錢淨嘅長途旅人擺地攤。

一路上都覺得呢啲人好勁，比我都唔知可以賣啲咩，連賣屎忽都冇人幫襯

:^(

大家都係旅行人，少少哋支持吓

:^(

烤魚同南美好常見嘅炸香蕉，但我食極都唔慣。

之前提到女神嘅一個心願係去冰島潛水，但我就連潛水牌都冇，帶唔到佢去。嚟到Santa Marta，終於有機會考返個牌

:^(

喺香港都間中有朋友放幾日假會去東南亞沙巴之類嘅地方潛水，有三四日已經夠報啲初級嘅潛水課程。哥倫比亞一樣有，價錢仲平少少，非常抵屌。


網上略略望吓啲評價就報咗個Open Water，報完第二日已經即刻上堂了。

教練Laurent係法國人嚟。又係因為鐘意呢度而搬咗過嚟。課程原本分四日進行。本應第一日係上理論堂，第二日先去一個淺水嘅泳池睇吓我會唔會浸死，同埋練吓啲基本功。第三、四就真係出海潛。

佢仲比個選擇我，話因為理論堂好悶，好多人都想玩咗先，所以可以將第一日嗰堂調去之後，玩晒實戰先上返都得。佢就比咗本書我叫我得閒望下。

喺課程期間Laurent都有幫我影水底嘅相，不過我就柒咗唔見咗張SD Card

:^(

唯有純文字討論。其實個海唔算太清，同埋我有近視但個眼罩又冇度數，所以全程都睇得唔清楚，落到海好似有啲浪費咗

:^(

呢張都係喺Belize影嘅，當概念圖

:^(

人生第一次玩水肺潛，好多技巧都唔太掌握到，要調節好個浮力去控制個喺水入面嘅深度，又要較啱方向，好彩初級嘅要求都唔算高。


因為我太得閒，第一日返去已經睇完Laurent比我本書，第二日直接做埋個筆試，MC題嚟，好似以前中學考Physics噉。雖然冇乜驚險，但都開心喺度完成咗一個小目標。

喺北部呢段時間，一直都打聽緊隔離委內瑞拉嘅情況。成日都聽呢個國家，終於嚟到咁近，都想睇吓有冇緣份去參觀。五個月嚟學識咗一樣嘢，就係耳聽七分假，好似伊朗、哥倫比亞呢啲地方嚟之前都好多負面評價，個個都叫我哋要好小心，但去到之後就發現係另一件事。基本嘅安全意識當然要有，但又真係唔係傳聞中咁恐怖，相反係有好值得欣賞嘅地方。委內瑞拉會唔會都比人誤解咗呢？嗰度嘅Angel Falls又有冇傳說中咁靚呢？

:^(

千奴 2021-4-5 23:50:48 問多咗幾個當地人之後，都係打消咗去委內瑞拉嘅念頭

:^(

所有人嘅答案都係Don't go there。叫我哋最多去到邊境影吓支旗仔就算。

聽聞四年前嘅委內瑞拉都已經好多人冇啖好食，要將啲變壞嘅腐肉同正常肉撈埋一齊。因為通脹太誇張，啲Condom去到成千蚊港紙一盒。總之一見遊客隨時為咗你背囊嘅嘢就一槍射瓜你

:^(

既然係哥倫比亞嘅人都噉講，都唔到我唔信了。唔向東就向南，過兩日坐Avianca去南部嘅Cali。呢間航空公司啲內陸機抵坐過巴士，可惜嘅係佢捱唔過武漢肺炎，上年已經宣布破咗產

:^(

喺北部嘅最後兩日，坐吓呢度啲電單車。

揀咗個有啲似Tayrona附近啲Hostel嘅地方，叫Bonda。


雖然爛路，但單手揸車冇難度

:^(

我就單手坐車

:^(

你就威啦車我女神

:^(

又係啲山中Hostel

:^(

嚟到呢啲Hostel冇得唔幫襯佢嘅三餐，附近根本冇嘢比你買嚟煮。


下世投胎做貓制唔制？

一場嚟到，行吓Hostel後面座山。


呢度比我嘅感覺同Tayrona National Park好相似。你話佢好靚，又真係唔算。但你話佢唔靚咩？又唔可以噉講。

睇埋專登擺喺山頂嘅呢個牌，我有少少明拉脫維亞個英國佬話好鐘意呢個國家係乜嘢意思。


You are not at the top of the world.

You are not. 無論係咩地方嘅山頂，不外乎都係寫住個山頂嘅名，咩高度，或者Best View Point之類。等登整個牌同你講呢度唔係最高，真係第一次見。或者係想提醒我哋要保持謙卑。

冇錯呢度唔係世界最高。唔係最靚，唔係最好。但呢刻先發現，呢度原來一個其他人都冇，得我同女神，相信之後嚟嘅每一個遊客，都唔會點見到其他人。因為太遠，因為唔出名。或者正因為唔係最靚，先可以保持到低調。成日去到啲景點就會怨好多人，噉呢度咪正正係我一路搵緊嘅地方？


即使欠缺咗世界級嘅地標，但呢種寧靜舒服，似乎係另一種美。好慶幸係兩個人一齊嚟呢度。我哋坐低吹吓風，傾吓呢五個月嚟嘅搞笑嘢，又傾吓未來。呢份心情至今日都未曾改變。


我諗我都開始幾鐘意呢度

:^(

千奴 2021-4-6 00:11:29 因為氣候關係，哥倫比亞有兩樣名物，咖啡同朱古力。飲咖啡同食朱古力就多，整真係未試過。喺北部嘅最後一站就睇吓人哋點食朱古力。


首先摘落嚟鋸開粒朱古力果

:^(

開咗個果拎啲豆連埋啲果肉發酵

:^(

再暴曬返啲朱古力豆十日八日

:^(

摵咗個殼

:^(

揀走啲爛豆

:^(

攪爛變朱古力漿

:^(

加甜

:^(

搓成想要嘅形狀就食得

:^(

食咗幾粒之後老闆娘話啲朱古力漿仲有另一個用途，就係可以當Mask敷，包你塊面又白又滑。

個樣好似有陰謀。

似又黑又滑多啲，啱我

:^(

敷完個Mask，夠鐘要走。

日頭真係冇得輸。我正式宣佈哥倫比亞北係Hostel嘅天堂。


回過神來已經留咗喺哥北17日，係時候再度出發

:^(

四葉寧子 2021-4-6 08:35:33 個post唔係遊記咁簡單，巴啲字有啲深度

:^(

:^(

:^(

機械人遊世界 2021-4-6 16:00:57 又追到live，而且好多篇

:^(

巴打繼續努力，呢次要寫到尾

:^(

千奴 2021-4-6 20:01:28
DAY163，由Santa Marta飛去Cali，再經Popayan南下，去到下一個國家。

歡迎嚟到厄瓜多爾共和國

過關好順利。而厄瓜多爾嘅官方貨幣係美金，所以入境後連錢都唔使唱，非常方便

:^(

其實厄瓜多爾都曾經有自己嘅貨幣，但因為金融問題瘋狂貶值，去到最後階段更加試過一星期貶值兩成。政府喺2000年唯有宣布全民轉用美金嚟穩定局面，如果唔係隨時變咗委內瑞拉。

第一站會去Otavalo ，聽講呢個有個規模頗大嘅市集。


嚟緊喺厄瓜多爾都係搭呢間公司嘅巴士。

陰功做乜咁瘦

姐姐餵你食嘢

:^(

話說之前去到哥北之後女神就好返晒，冇再頭痛同嘔。Otavalo都係山之城。海拔2550米，同波哥大差唔多，又係時候再次適應返高海拔了。希望今次唔使再拮Pat Pat

:^(

一落車我就狗衝去咗剪頭髮

:^(

個頭厚到成個蓋噉頂唔順

:^(

上次剪頭髮已經係四個幾月前喺聖彼德堡個俄妹幫我剪

:^(

今次係厄瓜多爾仔仔

:^(

4蚊美金。揀邊個髮型好

:^(

原來佢哋成班師傅都唔係厄瓜多爾人嚟，而係冇耐之前喺委內瑞拉逃難過嚟。我話我哋本身諗住去委內瑞拉睇吓，但比啲哥倫比亞人叫我唔好，其實你哋嗰邊而家咩環境？佢哋淨係講咗句：嗰度唔係一個比你去玩嘅地方。呢個世界的確唔係所有地方都可以旅遊，噉我見完你哋就當去咗啦

:^(

啱啱入境嘅時候天好藍，轉眼已經好厚雲。


塗鴉都係隨處可見。

入夜之後市面反而更加熱鬧。係夜市，夜市呀！

:^(

喺哥倫比亞慣咗唔出夜街，但嚟到Otavalo，一個只得幾萬人住嘅細城市，大家都話唔使擔心，可以放心搵食。有夜市嘅地方就係好地方

:^(

南美肉腸

:^(

亦係呢晚，返到房之後就閃過一個念頭。不如我都記低呢個旅程嘅事？就係噉，嗰晚就開咗我第一個Post，開始寫我直到世界盡頭嘅故事。

估唔到一寫就寫咗四年。

千奴 2021-4-6 21:38:10 
每逢星期六，Otavalo就會有大型嘅Saturday Market。Otavalo嘅原住民人口比例好高，因為佢哋個個星期都會喺度攞賣一啲自己織嘅地道嘢，慢慢就受咗遊客歡迎。除咗一啲手工嘅羊毛紡織品、地毯、民族服裝，亦都有啲首飾、珠寶、香料同嘢食。總之就乜嘢都有。


但成也遊客，敗也遊客。慢慢就好多都變咗附近嘅工廠量產。




都有啲街市嘅部份。


仲有得叫雞

:^(

行完市集又睇吓其他。

2017年大家玩緊咩Game？



睇吓市集呢啲就冇咩大道理，唔特別講。比較在意嘅係自從入咗厄瓜多爾，中餐館感覺多咗，連啲手機舖都見到有中國人開。當時仲未有藍絲嘅概念，見到中國人基本上都唔抗拒，反而代表有好嘢食嘅機會增加，同埋溝通會易咗。但呢啲海外華人其實好容易做咗小粉紅

:^(

喺香港就識得唔食藍店，但如果而家再去呢啲地方，又應該用咩心態去面對呢？

劍中人 2021-4-6 21:56:11 追到live
加油

滿天的貝果 2021-4-6 22:20:11 2017點會冇藍絲概念

:^(

千奴 2021-4-6 22:24:41 2017我仲食緊吉野家

:^(

冇藍店概念

:^(

風流浪人 2021-4-6 23:34:59 有D 波路喎 , 唔怪得樓豬為左佢用3百日去南極啦

:^(

町田個靚靚額頭 2021-4-6 23:58:13 Support 信住樓主唔會爛尾先
利申由post1追到依家

:^(

町田個靚靚額頭 2021-4-6 23:58:38 撳錯不推文 幫你推返

:^(

小冬瓜乾巴 2021-4-7 02:24:59 更新左好多篇，樓主好上進

:^(

加油寫埋佢呀

:^(

捩咁棄 2021-4-7 02:47:41 新po留名

:^(

希望可以樓主會堅持寫完佢
我係睇完麥徑全走po先入坑
睇左幾日追到live 蒙古同古巴入左我個to go list入面

:^(

我自己上年都係去完long trip返香港
去完雖然都冇得出咩大道理
但都覺得真係唔好局限自己 同人生真係好多意外
希望儲夠彈藥再出發