赤座明 2021-6-13 17:52:00 庫斯科又係高海拔

利馬皇子 2021-6-13 18:21:48 巴打識食喎，小弟覺得秘魯菜麻麻，係得幾款好食，rocoto relleno就係my飛佛之一，見到你d食物相條脷已經feel到陣味

:^(

依家想返去都難

:^(

好掛住Aji de Gallina同埋cuy chactado，前排行過寵物舖見到d Cuy好肥，差d想買返屋企炸

:^(

:^(

牙痛不是病 2021-6-13 21:31:52 聖誕裝飾永遠冇得輸

深山巨蟒 2021-6-14 11:42:02 啲建築物真係好靚

千奴 2021-6-14 22:49:19 到咗庫斯科，搵到Hostel落腳瞓咗一陣之後，就出嚟做少少正經嘢。嚟得庫斯科都係為咗去馬丘比丘，喺去之前都要搵方法去同買飛入場，我哋預咗成日嚟做呢件事。見時間有多，順便去埋領事館搞搞下一站嘅玻利維亞簽證。


玻利維亞喺秘魯有一個大使館同四個領事館，除咗利馬嗰個大使館之外，其餘四個領事館全部位於秘魯南部最近玻利維亞嗰幾個大城市，其中Cuzco呢個因為去馬丘比丘必經，係最受遊客歡迎嘅一個。呢個領事館喺旅遊嘅旺季係日日都爆滿。而最戇鳩係咩？係佢爆滿之餘係唔會派籌，亦冇得排隊，大家堆晒喺入面同埋門口，邊個搶到先就邊個嬴

:^(

初頭都諗住正正常常排隊，但一路排嘅同時，發現遲嚟嘅人都唔係排喺我後面，而係喺我側邊唔知做咩，湧吓湧吓就爬埋我頭，亂晒次序，十足中國嗰啲火車站。結果我哋都被迫參加呢場泥漿捽角

:^(

霸咗位入去之後，職員就會比張紙我哋叫我哋去一間銀行入數交錢，交完拎返張收據比佢就得。


視乎你揸嘅係咩護照，簽證費用都有所不同。當時我揸嘅特衰護照就收60美金

:^(

聽講揸美國護照係最貴，要過百美金，因為玻利維亞人申請美國簽證都係好撚貴。聽過有人話揸BNO會當咗英國護照直接入得，但我就唔知道了

:^(

比完錢返嚟，喺門口見到有幾個亞洲人仲企喺我去交錢之前嗰個位冇郁過，就埋去吹咗幾句水。佢哋排隊排到有啲躁躁地，覺得條隊點解好似唔識郁，嗰頭講完就見到有個人打咗佢哋尖

:^(

見佢哋咁有禮貌比人瘋狂打尖都唔反擊，諗住實係日本人嚟，點知原來係韓國人。佢哋好自豪噉話自己嚟咗南美成個月，但知道我哋已經出咗嚟八個月都不禁露出驚歎嘅神情。我話我哋去咗Antarctica，佢哋幾個都冇人明白

:^(

我用廣東話講南極，佢哋反而Get到，남극（namgeug）噉叫咗出嚟

:^(

雖然唔識韓文，但有時發現好多韓文日文嘅音同廣東話好相近，都會覺得有種莫明嘅興奮。


完成咗簽證之後，就返去市中心買馬丘比丘門票同埋搵車飛。馬丘比丘係一座山上面嘅古蹟，而隔離就有一個因為遊客而發展出嚟嘅旅遊城鎮——熱水鎮（Aguas Calientes）。入去熱水鎮有幾個方法，最簡單就直接坐火車，好似有分豪華車同普通車，價錢印象中過百USD，第二就報啲印加古道嘅行山團，通常都要行四五日，因為要導遊帶，同埋個團準備晒啲露營野，見親都收五六百USD以上，我哋唔諗住行咁多日，就冇特別考慮。第三個方法係搭一程六七個鐘嘅巴士去到最近熱水鎮可以停車嘅地方，一個叫Hidroelectrica嘅火車站，然後沿住條火車軌行兩三個鐘入去，嗰時賣緊50Sol（約100蚊港紙）來回，係就係要孭住廿公斤行三個鐘辛苦少少，但平好多。第四就係由Cuzco直接用腳屌入去熱水鎮，網上啲痴線佬話73km預行20個鐘，但唔露營嘅話中途要比一晚房錢，同埋喺秘魯深山自己行73km可能連部新電話都冇埋

:^(

聽完Toni仔分享，就決定跟佢哋機揀搭巴士行路軌。雖然遊客極多，但今日買聽日飛都冇咩障礙，例牌入教堂拜一拜祈求聽日順利平安

:^(

成個下晝一路都雨粉粉，都係食埋嘢就返歸。覓食之時見到有幾條友圍住一個喊緊嘅女仔坐咗喺Cuzco嘅兵器廣場，睇真啲咪啱啱領事館嗰班韓國囝囝囡囡，唔通高原反應唔舒服？諗住睇吓發生咩事，原來佢哋等吓等吓，領事館啲人收工，趕晒佢哋出去，叫佢哋明天請早，其中一個女仔就即刻爆喊咗出嚟

:^(

等咗成日都得個吉又真係有啲慘，但都叫咗你哋唔好咁乖，迫入去先會排到。亦因為見佢哋失敗咗，先發覺自己半日搞掂算係好彩，唯有祝你哋聽日可以申請成功

:^(

夜已深，我哋去咗一間明昆遊客嘅餐廳，點咗份天竺鼠嚟食，但同之前喺厄瓜多爾昆卡嗰間比，今次啲肉又羶又靭，難食好多，同上次當地人都排隊嗰間差好遠

:^(

拿拿林食完就返去瞓，準備聽日一早出發

:^(

千奴 2021-6-14 22:50:23 Cuy好得意，唔捨得炸

:^(

千奴 2021-6-14 22:51:43 嗰期去嗰幾個城市都幾有氣氛

:^(

千奴 2021-6-14 22:53:40 南美嗰堆西班牙式建築全部都好正

:^(

深山巨蟒 2021-6-14 22:56:22 期待馬丘比丘

:^(

利馬皇子 2021-6-14 23:32:33 唔捨得炸你又點天竺鼠黎食

:^(

牙痛不是病 2021-6-15 17:32:09 叫親肉都好驚中伏，成日有雞肉就一定叫雞

:^(

千奴 2021-6-16 00:20:29
喺庫斯科嘅第二朝，七點幾已經去到上巴士嘅地方等車，迎接七個鐘嘅巴士之旅。


為咗減輕負重，我哋將兩個大背囊放咗喺庫斯科嘅Hostel，淨係帶咗呢兩日要用嘅少少嘢去熱水鎮。多數Hostel對於寄存行李呢啲嘢都冇乜所謂，唔會點額外收錢，你信得過佢哋就可以

:^(

頭兩個鐘天氣都極好，南天白雲配埋群山嘅背景，真係有種由俗世遁入山林嘅感覺。司機喺中途站擺低大家痾篤尿食啲嘢，抖一陣就繼續向巍峨嘅深山進發。


馬路依山而建，初頭路況尚算唔錯，但天空就變得風起雲湧。連過N個髮夾彎之後，諗起聽講有人坐呢程巴士坐到嘔出嚟，先醒起自己又冇食暈浪藥，又冇咬防高反嗰啲Coca Leaves，唯有瞓一陣希望自己唔好有咩唔舒服，同埋祈吓禱陣間落車行路軌時唔好落雨

:^(

好彩山區嘅天氣真係好無常，轉個頭已經出返藍天，但石屎路不知不覺已經完結咗，取而代之嘅係無盡嘅沙石爛路。


唔少彎位唔好話圍欄，連石壆都冇，一個唔覺意碌咗落去就係噉先

:^(

坐到一半先發覺程巴士都幾得人驚，不過南美洲就係噉，大家都話秘魯啲路已經算唔錯，玻利維亞嗰啲仲恐怖

:^(

坐到晏晝兩點幾就到咗Hidroelectrica，開始徒步入熱水鎮嘅地方。嚟之前都唔明點解唔起埋條馬路入熱水鎮，但落車後就覺得用雙腳行好似比較安全

:^(

由呢個位同我哋一齊行入去嘅人都唔少，熱鬧得嚟又唔會擠迫。行吓行吓啲人拉開咗距離，大約維持喺視線範圍內總有一兩班人咁上下嘅密度

:^(

如果選擇直接由Cuzco坐火車嚟嘅遊客，就會喺呢啲藍色火車上面同我哋揮手，恥笑我哋行到隻狗噉樣

:^(

我哋就沿住同一條路軌一路向前行，唔會盪失路。


揀得行入去嘅人都預咗去到都係休息，聽朝先正式參觀馬丘比丘，所以都冇乜時間嘅限制，行到攰就坐埋一邊抖夠再繼續。照計點慢都唔會行到天黑。



我個人非常鐘意呢一段路，有行山嘅寧靜得嚟全段都係平路，完全唔辛苦。就算請我搭火車我諗我都會揀行呢段路。但隨住旅遊業嘅發展，秘魯已經講咗會喺馬丘比丘直接起機場，嗰時聽講好似23定24年已經落成，只係唔知會唔會受疫情影響。可以肯定嘅係，遲啲再嚟一定會變得更加方便，但就無可避免會少咗呢啲好正嘅回憶

:^(

行咗兩個半鐘左右，終於到咗熱水鎮，我哋求其搵咗一間住宿，佢有房比我哋就入咗去了，一Book就Book咗兩晚。行完今日呢段路，我對馬丘比丘嘅期待反而提高咗。嚟之前都冇做太多資料搜集，就算知道佢唔似羅馬鬥獸場噉喺正市中心，都冇諗過會係咁荒蕪嘅一個地方。究竟一個起到咁入嘅古國遺跡，會係點樣樣嘅呢？

牙痛不是病 2021-6-16 08:27:14 走係唔係再行番出去

:^(

千奴 2021-6-17 14:56:07 係呀，要行返同一條路出去

:^(

狗糧蛋糕 2021-6-17 17:16:46 痴晒線咁靚

:^(

現場應該好震撼

女朋友鍾意毒撚 2021-6-18 04:04:31 明明好努力忍手儲埋幾日份量一次過睇
但係半個鐘唔夠又睇哂

:^(

千奴 2021-6-18 22:45:10 由熱水鎮上馬丘比丘一係搭巴士穿過一條之字型山路，一係就行山上去。女神行完嗰三粒鐘火車軌見到條山路就話搭巴士，我哋就拿拿林買飛聽朝上。之前上網睇同聽人講，知道朝早巴士嗰條隊會好誇張，頭班車六點鐘啲人會好撚早就喺度等。但講旅行有邊個痴線得過我哋，我哋就決定凌晨三點出去排佢卥味

:^(

點知我咁撚早出嚟，都仲有幾個人早過我哋，不過唔緊要，上到車就得。但四五點先嚟嘅人就冇咁好彩，好快就要等多兩三班車了

:^(

我前面嗰個肥婆仲要排排吓坐低咗，然後喺個背囊到拎咗枝筆出嚟，掀開件衫就一嘢拮落個肚度

:^(

原來係胰島素嚟，連糖尿病人都要咁早起身睇馬丘比丘，呢個古跡真係唔簡單

:^(

上到山，只係一架巴士嘅人已經淹沒咗馬丘比丘嘅門口。唔好話全秘魯，我諗呢度隨時係全南美最受遊客歡迎嘅景點，同之前去過嘅其他地方都不能同日而語。雖然入到去嘅園區都好大，但喺旺季嘅時候都要實施人流管制嘅措拖，某啲路段係一定要單向噉行，如果行過咗，係冇得走返轉頭。


為咗入到去唔好行錯，大家都聚精匯神噉望住個地圖，了解清楚個行法先正式入場。


馬丘比丘帶比我嘅第一印象其實好複雜。首先係有啲失望，去南極要睇天氣就聽過，但從來冇聽人講過馬丘比丘都要好天先嚟得。喺完全冇預過會咁大霧嘅情況下，真係有啲擔心萬一全日都係噉嘅天，咪好似上山頂睇唔到日出噉食白果？但另一方面，又不禁拜服將呢座城起喺呢度嘅印加人，識到揀到呢個畀山包圍住咁有靈氣嘅仙境。


喺入口附近等咗一陣，雖然霧氣仍然好重，但馬丘比丘嘅遺跡開始喺雲霧中慢慢出嚟，勉強可以見到呢座鬼斧神工。馬丘比丘（Machu Picchu）喺印加語言Quechua入面意思係指古老嘅山，呢種語言時至今日住喺安第斯山脈一帶嘅原住民仍然用緊

:^(

我好多年前第一次喺迪卡儂買嘢見到呢個牌子仲以為係啲中國拼音嚟

:^(

後來先知原來係一個咁有民族色彩嘅語言嚟。


究竟係佢哋比人捉去摵晒啲毛先，定喺呢度啲霧會散先呢

:^(

千奴 2021-6-18 22:46:57

痴晒線咁靚

:^(

現場應該好震撼

真係好靚

:^(

千奴 2021-6-18 22:48:04 會盡快出多啲

:^(

深山巨蟒 2021-6-18 23:43:51 馬丘比丘好天既話個景真係靚到哇哇聲

:^(

女朋友鍾意毒撚 2021-6-19 01:35:08 辛苦哂巴打
但唔好太勉強自己

:^(

千奴 2021-6-19 13:30:02
馬丘比丘開始變得清朗。呢一座失落嘅印加古城雖然推算起咗五百幾年，但就要去到二十世紀先至被發現。相傳有個探險家為咗考察印加人比西班牙入侵秘魯時嘅避難地方，被住喺附近嘅原住民帶咗去馬丘比丘，先令到呢座城市曝光。建築上到今日都冇人知道究竟啲印加人點樣將啲咁重嘅石頭一舊一舊噉搬上嚟，而且仲可以唔需要用任何物料，純粹靠精準嘅切割就將啲石頭完美搭好，成座城砌咗出嚟。同樣係精密嘅建築，起喺群山之中嘅馬丘比丘比起墨西哥嘅奇琴伊察難度似乎更加高。身置其中就更加好似入咗仙境一樣。


好天嘅馬丘比丘好靚，有霧嘅睇下睇下仲多種一重矇矓美。據講點解會揀呢度嚟起，係同山嘅輪廓有關。印加人覺得城市背後嘅山就好似一個瞓低咗嘅人喺度仰望天空一樣，中間最尖嗰座就係個鼻嚟，叫做Huayna Picchu。


要行上去後面嘅Huayna Picchu，就要喺Cuzco買飛嘅時候講明要Machu Picchu＋Huayna Picchu嘅套票。我哋嗰時冇乜點諗就買咗，嚟到之後更加覺得唔行埋上去簡直會抱撼終生

:^(

啲梯級都幾窄幾高，幾時都話去旅行一定要趁身體好，唔係又可以喺山下等了

:^(

行到半路望返轉頭，清楚見到成座印加古城以及搭巴士上嚟嗰段山路

:^(

如果揀唔坐車，就可以爬嗰條連住嗰條路嘅天梯，不過行完女神應該就唔上Huayna Picchu了

:^(

啲石級仲高過膝頭，大脾細力啲都行到腳震。好彩有留返啲力。


仲未到頂，已經好接近天堂。喺呢一刻我發覺，我從來冇信仰，只係因為生活距離天空太遠。


相比起馬丘比丘，後面呢座Huayna Picchu人少咗六七成，可能因為行上嚟辛苦，同埋好多人冇買到呢邊嘅飛，結果呢度就變咗靜心欣賞嘅好地方。後來嘅時間，我哋都係坐喺呢座成個範圍內最高嘅山峰，俯瞰呢個印加王國。


行去山嘅背面，就會見到Huayna Picchu一樣都係比另一堆山包圍住，整個遺跡就係一個一重又一重嘅山之城。呢刻嘅我哋就係雲端上的人，將天地靈氣都集喺身上，感受一吓洗滌心靈係咩感覺。



以前去景點，會將人工建築同自然環境分得好開。如果係睇山睇海嘅，盡量都係唔好搞咁多嘢，整色整水往往都係畫蛇添足，呢樣嘢喺旅程一開始就已經喺內蒙古狠狠得到教訓。只係印加人就話比我哋知，原來呢個世界真係可以天人合一。人哋就起馬丘比丘，中國人就起石屎尿味蒙古包，冇辦法融入自然只係因為內蒙古班仆街道行未夠

:^(

有人話好似馬丘比丘呢啲神級建築係靠外星人指點先至起得成，我諗完全唔出奇。另一個我覺得可能有外星人幫手嘅神跡係納斯卡線，細細個睇啲樣已經覺得好震撼，去完馬丘比丘就一直十五十六想去睇睇。但呢個好似要參加啲直升機團先可以喺高空望到，最後都係冇去到

:^(

總結呢個馬丘比丘之旅係超乎預期，不愧為近年投選出嚟嘅新世界七大奇跡，亦都肯定係我呢個旅程嘅七大最愛之一。連平時怕行山嘅女神都話，一定要買去埋Huayna Picchu嘅門票。一定要買！一定要買！一定要買！就算行到好攰都值得。

由Huayna Picchu落返嚟，都已經下晝兩三點。諗起今朝三點幾就出咗嚟等巴士，已經郁咗十幾個鐘，非常之攰。好彩當初知自己年紀大已經預多咗一日喺熱水鎮

:^(

一返到房第一件事沖涼瞓返個晏晝，聽日再行火車軌返Cuzco

:^(

千奴 2021-6-19 13:30:33 真係靚到哇哇聲，我自己就非常鐘意

:^(

千奴 2021-6-19 13:30:53 我都想加速呀，打咗四年啦

:^(

牙痛不是病 2021-6-19 14:18:32 好似好正，本身興趣不大