Ads
樓主熟唔熟達文西 會唔會講下 佢係天才中既天才 :^(
同埋我想問佢地患精神病之後會唔會好似一般人畫畫咁要起稿,構圖,比例等等...但一個精神病人有無能力咁冷靜去做咁多野去畫一幅畫:^( 又如果佢唔做一般人繪畫前要準備既野,但點解佢地幅作品完成度又會咁高？
巴打我反而想問一個問題,究竟繪畫天份係先天定後天？ 因為我睇好多藝術家好多都係自學成材 同埋有d自閉/精神病既藝術家,佢地既簡介都無講過佢地自細跟邊個邊個老師學過繪畫/藝術,但一患左精神病畫d畫就好似好勁咁:^(
由康丁斯基嘅「點線面」呢本書撮要出黎，講一啲比較特別嘅概念同感覺
先簡介下，康丁斯基係抽象藝術嘅先驅之一
而當時嘅抽象並唔係突如其來，係先驅們一步步從理論中建立出黎
而「點線面」呢本書就係佢嘅其中一本著作，目的係探討藝術元素嘅本質
用更精確嘅詞彙去整理分類藝術
所以當我講到關於筆觸線條呢類，比起描述感覺，我更傾向大家先了解本質
係藝術元素入面，點線面係非常基本嘅一環
「點」係一切嘅開始，係結束，亦係上文下文之間嘅橋樑
係習慣上我地會認為封閉嘅圓點係無聲，係沉默
但當點離開文字或者形象，「點」嘅聲音就會變得好強勢，愈黎愈清晰有力
「點」無時間性同方向性，佢係一個面，亦都係
康丁斯基提到，「點」係想像中抽象中係完美地小，完美地圓
但實際上「點」有無數個造型，可以發展為自由嘅形態，無界限
所以佢認為「點」嘅基音係各式各樣，變化性係因應色彩而定，「點」只係純粹發出聲音。
「線」係「點」移動嘅軌跡，係「點」從靜態跳到動態嘅結果
「線」一定包含住張力同方向，康丁斯基先將「線」分為三種基本類型
先係水平線
想像中嘅水平線係一條直線，可以為人所站立嘅平面
感覺係一個冷而穏嘅基面，平坦咁無限延伸落去
「冷、平」就係水平線嘅基本調子
所以水平線形容為「無盡的冷性運動的最簡形式」
同前者相反，並與之成直角形嘅係垂直線
佢伸向高處，取化前者嘅平坦，佢係暖，代替前者嘅冷
所以垂直線形容為「無盡的暖性運動的最簡形式」
第三種就係對角線，係前兩者嘅變化體
帶住同等嘅冷同熱，形容為冷熱無限運動的最簡形式
而其餘嘅線只係對角線稍加變化嘅結果，不同嘅冷暖傾向就決定佢內在嘅聲音
講到呢到先，有興趣嘅可以去睇埋佢講折線同曲線
而「面」就留返下次啦
睇到呢到，開始了解到直筆橫筆會帶黎咩嘅感覺同佢地嘅基礎音色
夜空上最光位嘅筆觸係短促、橫向
短促嘅筆觸可以視為「點」，而「點」其中一個特性係純粹發出聲音，會將其內在放大，引致橫線嘅「冷、平」，藍色色調嘅「冷、平靜、安寧、沉實」以上感覺都無限放大
最暗位嘅直筆就用垂直線嘅特點將視線從最頂拉向下，有種夜幕低垂嘅感覺
而垂直線嘅移動性更大，比起水平線會更有跳躍同速度感，再加上用色深沉，更有下沉嘅感覺。
我地再跟返草圖嘅筆觸，想像一下整個夜空都用橫向筆觸，所帶黎嘅平靜、詳和同憂傷都會變得更強烈，而且同河流筆觸相同，成幅畫嘅味道都會變得單一
另外如果全用直筆就更難表達，夜空嘅空曠同深遠係好難單純用直筆去表達，氣氛會變得奇怪
所以單純用橫或直根本表達唔到更多嘅層次
梵谷就將全部合埋一齊用，分別引出夜空唔同嘅味道
所以整個夜空畫面結構用左三層
正中央畫嘅雲霧，用橫筆特點帶出雲霧嘅平移，安寧穏定，引出夜空嘅寧靜幽美
從中央向外延伸嘅就係橫直交錯嘅筆觸，係呢種筆觸下感受到嘅並唔係只有寧靜平和嘅夜空，而係更具複雜性，有神祕魅力嘅夜空
大家仲記唔記得上幾篇提到梵谷為星痴狂嘅信件，佢甚至應為到達星星可以不妨一死
呢種對星夜嘅愛同好奇某程度投映左落幅畫到，係呢啲十字筆觸嘅部分我睇到夜空嘅魅力，睇得越耐，越感受到夜空嘅神秘感，深遠，同複雜性，而呢一切並唔係單用橫筆直筆就表達到
到呢到我地終於明白梵谷點解要改變草圖嘅橫筆夜空，特意重新畫多一層十字筆觸去遮蓋之前嘅橫向筆觸
梵谷想表達嘅並唔只係寧靜詳和、廣闊舒坦呢啲咁單一嘅感覺
佢更想帶出夜空係深邃無際，富有色彩