如果話亨利六世嘅瘋癲係個人悲劇,佢嘅康復就係國家災難。約克擔心亨利真係會以叛國罪處死佢,於是喺1455年五月,於李斯特城(Leicester)毅然起兵,亨利愴猝應戰,玫瑰戰爭由此而起。其實所謂戰爭,只不過間中有零星嘅衝突,反而兩個家族同議會之間勾心鬥角先係主菜。就好似第一場戰鬥第一次聖艾班斯之戰(Battle of St. Albans)咁,似係群毆多過打仗,首先雙方兵力夾埋唔夠一萬人,兩位大佬講咗陣數,講唔掂就拍枱叫手下開波,傷亡人數先得嗰200人都冇。
坎特伯雷大主教決定做和事佬,喺1458年嘅天使報喜節(Lady Day;3月25日)舉辦一個 Love Day:亨利六世帶領一眾約派同蘭派貴族,兩派(用力地)手牽手,含情脈脈望住對方,步向禮堂。雙方均表示對方為堅定不移的戰略合作夥伴,並承諾在以後日子深化各方面的交流,為英格蘭繁榮穩定而努力。
講完,開片。
王后瑪格爾特搵到機會逃離倫敦,留低尚被挾持嘅老公,北上搵蘇格蘭王詹士三世幫手。1460年,蘇軍南侵約克郡,啱啱喺議會通過繼承亨利嘅約克,櫈都未坐暖就要北上應戰,蘭派蘇格蘭聯軍喺約克郡嘅維奇菲(Wakefield)迎戰約克,蘭派有成18000人,係約克嘅兩倍。約克於是想逐一擊破,首先向兵力較少嘅部隊埋手,點知喺衝鋒時俾匿喺樹林入面嘅蘭派軍伏擊,混戰中被殺,瑪格爾特將佢個人頭掛喺約克城門示眾。戰鬥以蘭派全面勝利結束,而約派冇咗個大佬,就由二佬禾域同埋約克個仔,時年19歲嘅邊疆伯爵愛德華(Edward of March)擔大旗。
毛豆腐
2017-5-16 23:34:53
愛德華當時身處威爾斯,依頭哭完喪,嗰頭就要諗辦法同身處倫敦嘅禾域會合。佢首先遇上都鐸家族嘅威爾斯軍隊,展開蒙提瑪渡之戰(Battle of Mortimer’s Cross)。愛德華為咗鼓舞士氣低落嘅約派軍隊,就指住天上忽然出現嘅三個「太陽」,話依三個「太陽」就代表老竇約克包括佢在內嘅三個仔:金日成、金正日同埋金正恩,即係個天示意佢要儆惡懲奸。其實依三個「太陽」係幻日現象(Parhelion)所形成:大氣層嘅冰粒令陽光折射,造成三個太陽影像嘅錯覺。Anyway,愛得華咁樣亂噏,就噏到場勝仗返嚟,事後愛德華為咗答謝太陽,於是以燦爛陽光(Sun in Splendour)作為佢嘅個人標誌。
希望毛巴快啲閪冧出文