十五世紀嘅英格蘭都算係多搞作啦,百年戰爭先喺1453年結束,另一場大戰又隨後爆發,就係玫瑰戰爭(War of the Roses)。玫瑰戰爭嘅政局甚至俾百年戰爭更混亂,依場戰爭打咗三十年,喺依三十年間,英格蘭總共出現七任國王。依一切亂局就要由兩大家族,蘭開斯特(Lancaster)家族,同埋約克(York)家族講起。
蘭開斯特家族亦即係當權國王亨利六世嘅家族,先前講過,依個家族嘅起源就係愛德華三世嘅三房長孫,蘭開斯特公爵亨利四世搶走大房(黑太子)話事人小理察嘅王位開始。而約克家族就係愛德華三世嘅四房子孫,當時嘅族長係約克公爵理察(Richard of York),或者直接叫做約克都得。約克除咗係愛德華三世四子嘅直系後代,佢阿媽都係愛德華三世次子個曾孫女。論資排輩,蘭開斯特家族作為三房,應該大過四房嘅約克家族,但係如果根據母系,約克家族係二房子孫喎,所以無話邊個喺法理上更適合繼承愛得華三世嘅,邊個拳頭硬啲咪邊個做囉。
不過亨利六世威咗一陣,就收到英軍加斯提隆一戰慘敗嘅噩耗,英格蘭正式戰敗,佢即時痴鬼咗線,十問九唔應,要搵人拉住先識行路。議會於是召開緊急大會,代國王處理政事,約克作為皇親國戚,又為英格蘭打過仗,可以喺大會獲得一席位。博福特千方百計想阻止約克參與會議,但係佢只不過係區區一個森麻實伯爵(Earl of Somerst),但係人哋堂堂一個公爵Duke,關你叉事咩。結果偷雞唔成蝕把米,博福特被約克動議打入冷官。而約克就獲推舉為護國公(Lord Protector)。