[鳩故][穿越] 唔係吓話，我去咗《教父》世界！
上一頁
第 6 頁
下一頁
AftynRose
2020-9-14 02:28:30
睇咗一星期左右
:^(
其實我冇睇過教父，但係個標題講穿越好似幾有趣咁
:^(
:^(
Ads
呀木談
2020-9-16 01:11:48
星期日。
我攤咗喺梳化，收音機發出滋滋滋的聲音，由黑夜直至窗外嘅太陽升起，我都冇訓著過，正確嚟講我訓唔到。
的而且確，山尼同教父嘅死亡對我同賽德克先生嘅合作計畫有利，而且將一切內容導向正軌，只係所有事情早咗兩年發生啫。
不過同賽德克先生嘅合作計畫只係後備計畫，正確嚟講我只係希望佢幫我整翻好部電話，我一心渴望嘅係翻去現實世界。
我一直喺梳化上面為呢種唔會有答案嘅問題苦惱，直至收音機播出：「收到消息，約早上三時，山尼柯里昂在西十街路段上遇到交通意外而死亡。」
「據目擊者聲稱，山尼柯里昂坐駕遭貨車橫腰撞擊，被推行五米後，貨車駛離現場。其後另一輪貨車急速駛至而從後撞擊，山尼柯里昂與多名保鑣身上多處骨折，經急救員判斷即場死亡。」
「由於事發地點偏近第五大道，曾一度引起恐慌，警方亦在事發現場表明正從黑幫仇殺方向調查，並相信與其他案件有關。」
「山尼柯尼昂是有「教父」之稱的維托柯里昂的長子，而維托柯里昂在六日前亦因為槍傷送院治理，縱然病情在近日惡化，但明顯兒子就不如父親幸運。」
聽完，我覺得有種安慰嘅感覺，唔係因為山尼嘅死，而係有種當日仍然有穿越者光環，通曉一切劇情嘅感覺。
然而呢種感覺再次刺激到我，有種尋回初衷嘅感覺，我決定繼續幫助柯里昂家族，不過當前最大問題，如無意外山尼嘅死都會入埋我數，而且係一場咁大嘅騷亂，就算好似唐勞話齋我一定無事，都必然要煩一大輪，最重要嘅係，會成為巴西里控制我嘅痛腳。
反觀另一方，柯里昂家族而家可以話事嘅只有哈金先生同麥克，而佢哋會點諗呢？會一如山尼判斷我喺背叛者，還是選擇相信我呢？
我再次攞起電話，打去柯里昂大宅，我講我係積尼托倫斯，不過我再次搵麥克聽電話，然而換嚟嘅係接線生一句：
「麥克少爺好忙，唔想俾人打擾。」
我都冇咩可以多講，叫佢幫我向麥克留個口訊：
「鉈中毒。」
就係咁樣，我繼續被困喺房內呆坐。
--------------------------------------------------------------------------------------------
大概下午一點。
我正為唔可以同呀木傾電話而苦惱，
士別多日，唔知佢發現到啲咩，又或者搵唔搵到幫助我嘅方法。
突然之間，出現電話響嘅聲音，房內嘅電話響起咗，會打到過嚟嘅，必定係巴西里陣營嘅人，我攞起電話，電話另一邊傳出一把怪聲，古怪但熟悉，就喺當日迫我矇眼郊游嘅神秘人，神秘人講：
「我係拉森，我代表巴西里聯絡你，柯里昂家族暫停咗你嘅追殺令，佢哋選擇三日後召開和談會議解決問題，你會以塔塔基利亞手下嘅身份出席，詳細資料遲啲唐勞會再同你講。」
講完佢就收咗線。
我行出房門，咋眼一睇都冇曬巴西尼嘅手下，我順利離開酒店，呼吸自由嘅空氣，我都唔知自己應該做啲咩，我喺附近嘅商店遊走，直到我望到一架兒童單車，我就心血來潮有想去嘅地方。
我買咗架單車，截咗架的士，就去下城區出發，目的地係巴頓先生屋企。
經歷漫長嘅車程，終於抵達巴頓先生屋企，我攞住架單車行到門口。
敲門，冇反應。門鐘，冇反應。
星期日一家大細出街好合理嘅，於是我放低咗架單車喺屋企門口，留咗張紙寫住：「送畀溫莉嘅生日禮物，我知道兩歲踩單車都唔係咁易，唔夠力踩就你推佢啦。」
放低份禮物，坐咗喺門口前面嗰兩級樓梯，又開始思考我可以做啲咩。去揾菲兒？不了，一諗起自己連佢母親死忌都放咗飛機，而且更加唔想佢捲入呢場黑道風雲入面。
諗諗吓，既然柯里昂家族停咗我嘅追殺令，我決定將計就計，借住巴西里安排俾我嘅角色，用一招兵行險將，最高調咁揾麥克嚟試探佢嘅想法。
我搭的士去到柯里昂大宅，畀咗雙倍錢叫司機等我一陣，當我踏出的士嘅時候，好似打機入面怪獸發現主角一樣，所有人嘅注意都放喺我身上。
睇嚟我一夜之間成為咗黑道明星，正所謂人怕出名豬怕肥，咁多人嘅目光令到我怯咗一怯，不過張家輝教落，怯你就輸一世，所以我整一整理神緒向住大宅方向大叫：
「我係湯姆勞根，我希望見麥克柯里昂。」
講完我坐翻上的士，的士司機指一指出面細細聲問我：
「會唔會有事架？」
我答佢:
「冇事嘅，怕嘅可以報定警先。」
司機好驚訝咁講：
「報警？我報警講黑手黨基地有黑手黨？我驚佢唔理我。」
我同司機講：
「唔報你可能會死架啵。」
司機又講：
「咁不如開車走啦？」
我同佢講：
「你估而家開車走會有幾多架車追你啦？」
司機開始有幾分口震咁講：
「咁點算？」
我就同佢講：
「你落車先，望唔望到嗰面有棵樹，你行去後面先，搞掂再叫你翻嚟揸走架車，好冇？」
講完佢冇應我就行咗出去，向住棵樹嘅方向出發。
十分鐘過去，柯里昂大宅一直冇回應，睇嚟態度都十分明顯，我決定進一步行動。
我望一望的士司機叫咩名，然後借用的士個對講機講：
「我係基利，柯里昂大宅前面發生咗啲好奇怪嘅野，幫手報警。」
又十分鐘之後，幾架警車到場，幾個警員行去大宅方向，幾個警員行埋嚟我到，警員問：
「發生咩事？係唔係你報警架？」
我指一指樹後個司機，問非所答咁講：
「佢需要幫手。」
過咗一陣，班警察又商量過，又同電台聯絡過，另一架警車嚟咗，有個一睇膊頭就知高級好多嘅行嚟同我講：
「勞根先生，你哋嘅事我插手唔到，但你令到我好難做，可唔可以請你離開？」
事情比想像中有小小唔同，但發展比預期中順利，我同佢講：
「好，上你車邊行邊講。」
------------------------------------------------------------------
警車上。
行緊去邊，我都唔知。
我望一望佢膊頭，咩職位都睇唔明，只係知著白衫嘅，我就問佢：
「我哋去緊邊？」
白衫佬就講：
「市中心，如果你有其他地方去，我可以車你。」
我感覺到呢位差人一定係一個出色嘅黑警，我問佢：
「做警察開唔開心？」
佢望一望我然後講：
「受人錢財啫。」
我聽完之後講：
「如果你收咗巴西里錢，我諗你要聽我話啦。」
佢望住我，冇講野。我好想提醒佢揸車唔望路係危險駕駛，不過佢本身就係差人，我都吹佢唔脹，我繼續講：
「幫我搵個人，大概五十歲，姓奧雲，好似係巡警嚟。」
佢笑一笑然後望翻馬路話：
「哦，搵個人啫，奧雲嘛，冇問題。」
--------------------------------------------------------------------------
我跟佢翻到差館，人哋叫佢做副警司，我好希望差館會有個警銜表俾我睇。
我望住呀副警司喺我一邊面前努力搵緊文件，一邊攞住紙箱出出入入。我非常期待佢搵多陣就會開始大叫「膊頭有花嘅同我入嚟！」
然而我一等再等，事情都唔係我想像中咁樣，我問佢：
「點解你唔搵人幫手呢？」
佢望一望我然後講：
「我諗住呢啲野越低調越好。」
我心入面諗，你啲文件堆到自由女神像本獨立宣言咁高，咁都叫低調，睇嚟你唔知自己間房有窗。
大概一個鐘之後，佢打咗個電話，佢終於同我講：
「我搵到啦，佢早幾日俾人調咗去華埠，今日放假，如果你想我可以聽日叫佢過嚟。」
我係佢手上攞咗份文件嚟佢，我講：
「華埠？唐人街？」
佢望住我點一點頭講：
「係，你地頭。」
佢講起我先記得我自稱唐人街出身，有機會去探一探都好。
我就同佢講：
「我自己會去搵佢。」
喺我好似好瀟灑咁行出門口之前講：
「你點睇唐人街？」
呀副警司尬尷咁講：
「你唔會鍾意聽。」
我笑一笑同佢講：
「你講啦，華人最叻係自相殘殺，你講野再難聽嘅說話都唔會夠自己人講野難聽。」
佢聽完之後講：
「廉價，低賤，仲會吸毒嘅動物園。」
好，感覺的而且確比想像中差，但我都無謂發佢爛渣，我問佢：
「你叫咩名？有咩可唔可以撻你朵？」
佢唔知邊到攞咗張卡片出嚟，我都第一次見警察派卡片，佢講：
「副警司，切斯特舍曼。」
雖然我唔肯定副警司究竟對應咩職位，但睇警局入面啲人對佢恭恭敬敬咁款，我相信都唔細。
於是我就離開咗警署，為咗同巴西里保持聯絡，縱使萬般不願，我都截咗架的士向廣場酒店出發。
痰得菜
2020-9-16 01:12:49
Cd rom都特登留個名
希望樓主繼續寫
呀木談
2020-9-16 01:14:08
冇事，樓主冇棄故，只係呢幾日因為新工問題潛咗陣水啫
:^(
呀木談
2020-9-16 01:17:09
新讀者
:^(
望到越嚟越多人啦，樓豬倍感安慰
:^(
呀木談
2020-9-16 01:19:12
忠實支持者
:^(
樓豬怕自己會愛上你
:^(
武次子敏史
2020-9-16 01:21:01
:^(
15了
:^(
:^(
:^(
AftynRose
2020-9-16 02:39:05
樓主努力啲寫文自然會多人睇
:^(
:^(
呀木談
2020-9-16 13:01:51
潛水兩日反而正評多咗
:^(
呀木談
2020-9-16 13:04:17
近排戲院重開，樓主多咗流連戲院同寫影評
:^(
武次子敏史
2020-9-16 15:22:57
有咩戲好睇
:^(
Ads
呀木談
2020-9-16 15:51:58
呢幾日睇咗《天能》 《新異變人》，兩者都唔算太好
:^(
我覺得《天能》今次唔夠路蘭以前同類型作品出色，不過係有趣嘅作品
:^(
《新異變人》同以前嘅X-MEN有啲唔同，以《閃靈》個種驚悚方式拍攝，唔算太好，但有啲新意，可以一睇嘅，然而樓豬幾鍾意Anya Taylor-Joy，所以唔介意
:^(
早兩日幫《天能》寫咗個冇劇透影評，而家幫《新異變人》寫緊個劇透影評
:^(
武次子敏史
2020-9-17 01:51:01
我都諗住去睇天能
:^(
689僭建屋
2020-9-17 03:27:46
好撚好睇下 好似教父ver2咁
樓主出快啲
:^(
:^(
:^(
武次子敏史
2020-9-18 01:07:52
:^(
樓豬叫你出快啲文呀
:^(
呀木談
2020-9-18 22:49:52
星期一。
我向唐人街方向出發。
搭上的士先發覺唐人街同小義大利區原來咁近，令到我有啲擔心我個故仔會輕易敗露，又或者可能已經敗露。
不過當刻之下我都理唔到咁多，我被熟悉但又懷舊嘅感覺包圍，嗰啲再見唔到由右寫去左嘅招牌，個啲大到跌落嚟會死人嘅燈牌，就喺我沉醉緊回憶同氣氛嘅時候，呀司機講：
「勿街到咗啦，畀錢落車啦。」
就係咁樣我叫做俾人半趕咗落車，司機都急急腳離開咗。
據我本身所知唐人街都係出名嘅旅遊區，但睇司機走得咁快，睇嚟喺1946年，事情唔係我想像中咁樣。
喺街上面行嘅我感覺都唔係太好，點解咁講？因為我有種啱啱穿越嚟教父世界嘅感覺，所有人都用一種異類嘅眼神望住我，令到我非常不安。
我有種想搵奧雲陪我一齊行嘅感覺，但諗諗吓有個差佬喺隔離我係唔係仲危險呢？我都唔係好清楚，直至我見到間門面唔差嘅鋪頭，上面大大隻字寫住港式燒味，勾起咗我對叉雞飯嘅慾望，我就行咗入去幫襯啦。
可能時間尚早，食燒味飯嘅人少之有少，睇落去係老闆娘嘅女人放低咗杯凍檸茶就開始搭嗲，佢講：
「好少人出咗去都仲會翻嚟。」
睇嚟老闆娘有啲誤會，但我續繼講：
「點解咁講？」
呀老闆娘放低埋碟飯再講：
「睇你著到身光頸靚，一係出咗去嘅，一係工會人士。我喺到咁多年都冇見過你，咁你點睇都係出咗去個批。」
老闆娘對自己咁有自信係好事嚟，我都無謂表述自己咁奇特嘅經歷，我同佢講：
「係，有啲野要過嚟處理。」
我指一指自己個樣續繼續講：
「而我好明顯相比鬼佬有特別優秀，不過我好多年冇嚟過，有冇咩轉變？」
老闆娘冷笑一聲講：
「高高在上嘅白人，《排華法案》叫做廢除咗，但事實有改變咩？我哋只係城市入面最廉價嘅勞工，就連做雞都要喺白人門前乞求我哋應得嘅酬勞。」
佢停咗一停再講：
「轉變？有，當初話幫我哋，而家只係識得工會之間互鬥，同白人一齊壓榨我哋，疏通警察，豢養黑社會，而且越嚟越囂張嘅工會。」
我冇預期過老闆娘咁激動，講完就行開咗，睇嚟我觸動到佢嘅紅線，雖然同我想要嘅資訊差好遠，但睇嚟唐人街嘅生活唔係太好。
食完飯，我就去差館出發，
————————————————-
差館。
行到埋去，環境相比中央街總部差好遠，但都預想之內。
我向門口個位警員講：
「我嚟搵奧雲。」
門口位警員用奇怪嘅眼神望我然後講：
「你係邊個？」
我望一望佢個委住證再講：
「班吉警員，我係奧雲嘅朋友，我嚟搵佢。」
班吉打量我之後講：
「你著得一身名牌唔代表你哋可以就咁大模斯樣入嚟話想見邊個就邊個。」
你哋？睇嚟留難我要守護嘅唔係警署，而係某種偏執嘅尊嚴。我望一望佢膊頭講：
「我有三個建議畀你，一係俾我入去，一係你打個電話去中央街240號搵切斯特舍曼證明我身份，一係我打過去令你永遠冇得再做差人。」
班吉睇嚟嚇咗一嚇，佢叫我等陣，而我就坐咗喺木凳上面等待。
過咗一陣，班吉走翻嚟同我講：
「奧雲出咗去，如無意外佢一陣就會翻。」
---------------------------------------------------------------------------------------
大概半個鐘後，奧雲就翻咗嚟，佢見到我第一句就講：
「巴頓先生開分店嚟唐人街咩？」
我真心思考緊巴頓先生轉賣叉燒包嘅畫面，不過我冇應佢意，我講：
「唔係，我嚟搵你係因為......」
我都未講完奧雲就講：
「嗰個謠言。」
仲謠言？呢種擴散速度直頭武漢肺炎咁款，傳多兩三日我應該同亞瑟王齊名。我指一指類似會議室嘅地方繼續講：
「差唔多啦，入去先講？」
———————————————
會議室。
閂門我第一句就講：
「我知道你冇睇過《義膽雄心》，但我需要你幫我。」
奧雲坐底皺一皺眉頭然後講：
「你想我點幫你？」
我圍住會議室一路行一路講：
「如果你聽過嗰個謠音，而且對五大家族嘅事有啲了解，你一定會認為我幫塔塔基利亞做野。」
奧雲點一點頭講：
「多數人都會咁諗。」
我繼續講：
「咁如果我同你講，刺殺教父背後策劃嘅係巴西里，塔塔基利亞嘅復仇只係一場騙局呢？」
奧雲又皺一皺頭然後點頭。
我又繼續講：
「之後開始複雜，如果我話我咩都有做過呢？我係俾人陷害嘅，而有某個人加害教父，嗰條友可能係巴西里嘅手下，咁一切都容易理解，但如果嗰個人唔係巴西里手下，就代表有第三方介入咗，事情就複雜得多。」
奧雲聽完佢就講：
「所以你想我幫你啲咩？搵出真正兇手？」
我笑一笑之後講：
「其一，而且陰差陽錯之下我成為咗黑手黨中嘅大紅人，我希望可以藉住呢個機會瓦解三個黑手黨家族，同埋最後最難個樣，最壞嘅情況下喺五大家族嘅追殺下保護我。」
奧雲聽完又笑一笑講：
「你答我幾個問題先，點解我要信你？點解你會搵我？」
佢指一指自己膊頭再講：
「更何況你見唔見到我只係一個警長，你覺得我有能力頂住成個紐約嘅黑手黨？」
我坐翻低深呼吸然後講：
「我嘅答案只有一個-我相信你係一個好警察，黑手黨嘅勢力遍佈全城，我唔知邊個係佢哋嘅人，我唔知可以搵邊個幫手，但我相信你係一個好警察。」
講完我先至發現自己嗰段說話就係電影入面害死每一個好警察嘅開端。
不過我冇放棄，我繼續講：
「你記唔記得十五年前禁酒令時期芝加哥發生嘅事，你可以成為紐約嘅艾略特內斯，你個仔都會為你自豪。」
奧雲靜咗一陣再講：
「我需要啲時間。」
我鍥而不捨咁問：
「我要等咩？答案還是行動？」
奧雲望住我講：
「你需要學識靜靜等待，就算我相信你，我哋都需要更多幫手。」
我哋？好消息嘅開始，我講：
「咁我預計係好消息，我住喺廣場酒店頂樓，同監獄冇咩大分別，無咩必要唔好過嚟，我會再搵你。」
就係咁樣，我講完就行去門口，正當我準備踏出去嘅時候奧雲問：
「我聽講你唐人街出身架啵？」
我扮架咋，我唔識架啵，不過我冇咁講，我話：
「係呀，做咩？」
奧雲點起咗支煙問：
「安良堂同協勝堂喺打完仗之後越嚟越肆無忌憚，你點睇？」
嘩，兩個堂口我聽都未聽過，我扮曬野講：
「佢哋可以咁囂張，背後一定有人撐腰，一定有啲政治人物喺背後做庇護。」
奧雲噴咗下煙又講：
「所以你認為有另一個坦慕尼協會喺背後撐腰？」
我非常之苦惱佢又嚟多個新名，不過聽坦慕尼協會一知就係鬼佬野，我繼續扮：
「我覺得佢哋唔會再想屈服喺鬼佬之下，可能係更加華人化嘅組織，例如香港嘅大DEE會。」
奧雲皺一皺眉頭講：
「講多啲。」
我一時之間口快講咗屬於未來嘅野，我都唔知點樣解釋，我同佢講：
「大多數華人移民都唔著重自己嘅政治權利，佢哋覺得有錢就夠，亦都因為呢個原因成為咗少數有權有勢嘅華人嘅奴隸，而個班有權有勢嘅人就係大DEE會，佢哋掌控生活中嘅一切，而且話語權隨時比政府大。」
奧雲聽完就講：
「所以你認為唐人街會學識反抗，積極脫離白人控制？」
我預計唔到奧雲聽完後嘅著眼點係咁，我講：
「或者啦，邊個知啦。」
奧雲再講：
「我畀翻個你可能想知嘅情報你啦，當然前提係你的確俾人陷害。教父被確診為鉈中毒，醫院同柯里昂家族都冇公開，不過睇嚟中毒太耐，可能就快唔掂。」
相似嘅內容我早兩日聽過，只不過係由估計成為事實，我唔係太驚訝，我同佢講：
「我知，但我想知道嘅只係邊個嫁禍我，有消息再話我知。」
就係咁樣我好瀟灑行咗出警署。
呀木談
2020-9-18 22:51:22
幫緊你，幫緊你，幫緊你。
Btw 新讀者你好呀
:^(
瓦努阿圖達文西
2020-9-19 02:36:26
睇主角故弄玄虛都幾正
呀木談
2020-9-19 08:49:05
無辦法啦，主角又唔係奇洛里維斯，唔可以一個人打一個黑幫，唯有成為亂世中一個穿針引線，苦苦爭扎，死剩把口嘅男主角啦
:^(
呀木談
2020-9-19 08:50:29
掙*
武次子敏史
2020-9-22 18:50:52
你寫緊影評？
:^(
Ads
呀木談
2020-9-22 18:51:35
唔係，我知自己遲咗日
:^(
寫緊架啦
:^(
武次子敏史
2020-9-22 19:03:09
咁好啦
:^(
當推文
呀木談
2020-9-22 19:18:55
愛你
:^(
呀木談
2020-9-22 23:08:58
離開咗警署，當我想截的士嘅時候，我先發現唐人街嘅的士少之又少，反而多咗好多白牌車，仲唔係普通嘅白牌車，而係三輪車，大多數用人力，有啲係電單車改裝而成。
而當中有個三輪車師傅都好努力向我推銷自己，而我都成為咗幫襯嘅一份子，直至去到唐人街同小義大利交界，我先至發覺原來推銷只係一個假象。
因為喬諾已經喺小義大利嘅邊境等緊我，我落車嘅時候佢問我：
「翻去重遊舊地？」
我知道佢喺到等得我都冇好野，不過我答佢：
「係呀，你唔翻去睇吓？墨索里尼啱啱俾人搞掂咗喎。」
喬諾聽完問題冇理我，講：
「上車啦。」
上咗車去廣場酒店出發。
雖然我非常介懷佢唔答我問題，但我都無謂執著，我轉而問：
「巴西里嘅人唔可以入唐人街咩？」
喬諾諗一諗講：
「唐人街開始醞釀某種抗拒我哋嘅勢力，可能係打仗期間出現嘅民族性，唔係好清楚，只係知道一切關係要藏得更深。」
「尤其是係你，黑手黨喺唐人街公然帶走一個華人，無謂太張揚。」
我發現喬諾做野比想像中細心，睇嚟以我嘅臥底生活嚟講，佢係我嘅最大威脅。
————————————————-
廣場酒店頂樓。
我打開門，一如以往係巴西里，然後更加出奇嘅係，有另一個好熟口面嘅人都喺到，好似見過但唔太清楚，巴西里先生就講：
「呢位就係塔塔基利亞閣下。」
兩個大佬大駕光臨，我望住塔塔基利亞講：
「唔知塔塔基利亞先生搵我有咩事？」
巴西里指一指其他手下出去，留翻我，佢自己，塔塔基利亞同喬諾。巴西里就講：
「聽講你琴日走咗去柯里昂大宅。」
雖然我明明唔係問佢，不過佢衝出嚟講都唔緊要，我答：
「係，叫做轉工之後向前雇主示吓威咁啦。」
巴西里笑咗笑，行埋嚟拍往我膊頭之後講：
「示威，你真係有趣。湯姆，我好欣賞你嘅勇氣，但我希望你喺和談會議之前，稍微收斂少少，對生意有所幫助。」
睇嚟佢仍然覺得係我幫咗佢，或者佢希望我依然咁諗，我再試一試探佢咁講：
「好，教父都睇嚟就捱唔住，帝國始終都會崩潰。」
巴西里聽完就同我講：
「呢個係我過嚟搵你嘅第二樣野，我一直以為教父會喺你落手嗰日死，但件事拖到而家。」
一如以往講啲唔講啲嘅習慣，擺明要我估啫：
「所以你希望教父唔好喺和談會議咁敏感嘅時期死？」
巴西里笑一笑講：
「都話你係聰明人架啦。」
我心諗你當我係上帝定閻羅王，我同佢講：
「你其實知唔知教父發生咩事？」
巴西里搖一搖頭講：
「唔知，柯里昂家族個面守得好密，就算同警察講都只係同佢哋有密切關係嘅講。而且更加係你嘅商業秘密，我尊重我嘅合作夥伴。」
睇嚟巴西里真係咩都唔知，我故弄玄虛咁講：
「秘密在於方法，而唔係結果。我可以話畀你知教父中嘅係鉈毒，無色無味，死亡時間因人而異，不過以教父槍傷之後嘅身體，教父隨時都會死，甚至乎喺正和談當日都有可能。」
巴西里聽完之後講：
「好，明白。菲利普有野同你講，喬諾你都留低好好招呼菲利普。」
佢講完就整一整件西裝行咗出去。
先唔理嗰個企埋一邊當招呼嘅喬諾，留低我同塔塔基利亞你眼望我眼。
塔塔基利亞先生講：
「過兩日和談會議，你會做我手下，想過嚟見一見面啫。」
我呆咗一呆，特登走過嚟見我一面，真係有需要咩？就喺我迷惘之間，佢擺出握手嘅姿勢。
我行前去同佢握手，我發現佢隻手夾住咗張紙，我順利接咗過嚟之後就收埋咗落褲袋。
講完佢又自己行咗出去，然而喬諾都跟埋出去。
今次我特登行上睡房望一望，確保所有人都離開咗，我就行開張紙嚟睇。
紙上面只係寫住：「今晚七晚，灘景公寓，保密。」
我心諗，佢要我保密，而佢第一個避開嘅就係喬諾，睇嚟塔塔基利亞都有自己嘅計劃，都有啲野要瞞住巴西里。
又或者可能係同巴西里聯手嘅試驗計劃，不過都唔肯定，唯有等陣試一試先知龍與鳳。
我望一望手錶，距離七點都有段時間，但邊到係灘景公寓，又考起我呢個假紐約人。
——————————————
六點，灘景公寓。
我幾經調查，終於搵到呢間喺康尼島，門面睇落叫做符合黑手黨大佬身份嘅灘景公寓，希望搵得啱。
就係咁，我坐咗喺大堂，望住遊人喺我面前出出入入，正值盛夏亦不乏女性泳客，雖則比堅尼喺一九四六年嘅美國並未盛行，不過都不負海灘樂園嘅美譽。
就係咁樣我坐定定到七點，有人走過嚟拍一拍同我講：
「勞根先生？」
我嚇一嚇先記得自己叫勞根，我講：
「係。」
佢就講：
「請跟我嚟。」
就係咁樣，我跟住佢上頂樓。
我發現啲黑手黨對頂樓情有獨鍾，明明睇電影就係因為頂樓先容易俾人暗殺，出事架嘛。
——————————————-
頂樓。
打開門，出現喺我眼前嘅固然係菲利普塔塔基利亞，但若然要我形容，我會形容為一隻身形走樣嘅義大利雄性種馬遇上幾隻母馬，若然我可以選擇，我希望換走中間嘅主角，當然地我冇講出口，我同佢哋講：
「我去偏廳坐吓先。」
我行到去偏廳搵個位坐低咗，不幸地塔塔基利亞先生嘅呼吸聲喺房入面迴響不絕，令到腦入面嘅情景都揮之不去。
我行去黑膠碟唱機開到最大，音樂響起，係《第九交響曲》，我將梳化拉近唱機，腦入面唯一嘅想法就係：「我愛貝多芬。」
播咗兩張碟之後，我終於見到一個著住衫嘅菲利普塔塔基利亞，佢第一句就同我講：
「如果你有需要，當自己屋企得啦。」
佢好成功咁用一句說話打破咗我腦入面貝多芬嘅節奏，我積極思考緊點樣有禮貌咁拒絕，我同佢講：
「唔洗啦，我初戀情人就係我老婆，冇理由有我份架。」
塔塔基利亞坐低咗就開始講：
「我想你幫我手。」
佢講嘅野同我想像中差唔多，我問佢：
「幫啲咩？」
佢攞起酒杯講：
「好多人都覺得我只係一個生活喺布魯克林一夜致富嘅嘅流氓，我承認我做嘅野既唔高尚亦唔光彩，但我依然應該得到其他人嘅尊重。」
我諗我大概知佢想點，但我冇講出口。
佢望住我繼續講：
「而你好特別，你一夜之間深入巴西里嘅核心，所有人知道你嘅野都少之有少，你有背叛巴西里嘅能力，你可以喺全世界面前指控巴西里派人殺死柯里昂，我可以保護你安全。」
雖然佢講嘅野喺我預期之內，但我一時之間都諗唔到最好嘅反應，我試一試探
最懷情況，我講：
「如果我拒絕呢？」
塔塔基利亞摸住酒杯底繼續講：
「頭先你好似話自己有老婆架可？」
我心諗就係因為呢個原因令你唔受到大家尊重，就算我冇老婆，我都唔會有好下場。當然崩口人忌崩口碗，我冇講出口，我同佢講：
「好，我會幫你，但我需要啲時間。」
塔塔基利亞笑出口而講：
「時間？我有諗過，和談就係最好嘅時間，柯里昂家族仲係豬一般以為所有野係我做。」
睇嚟蠢過隻豬嘅係你，我好懷疑佢究竟憑咩做到黑手黨大佬，我同佢講：
「唔可以，我都有自己嘅計劃，我可以同你講，推冧巴西里都係我嘅目的之一，但時間由我話事。」
塔塔基利亞聽完靜咗落嚟。
我藉著佢嘅無知，大膽咁繼續講：
「如果你要搞掂巴西里，你要學識等待，單純我嘅指控足以令巴西里同柯里昂開戰咩？我可以同你合作，但你需要相信我。」
我等咗佢一陣，佢就講：
「好，我準備咗晚餐，一齊？」
雖然我萬般不願，但如果我話唔食咪即係唔俾面佢，無謂傷佢玻璃心，我答佢：
「好，食咩呀？」
就係咁樣我就好似深得佢心咁食咗個晚餐，縱使中間經歷咗萬般猜測，究竟塊牛扒有冇毒，嗰個唔好笑嘅笑話笑唔笑好，唔攬佢派過嚟嗰條女算唔算唔俾面佢。
慶幸最後我安全離開酒店，令到我真正擔心嘅係我嘅處境。
如果柯里昂家族仍然以為我加害教父、如果巴西里知道我背叛，如果塔塔基利亞知道我根本敷衍佢、仲有個唔知點解要陷害我嘅神秘人，究竟最後會有幾多人想殺我？
所以話加入黑社會，真係半隻腳踏咗入棺材。雖然毫無道理，但當事情越嚟越複雜，我就感覺自己越接近真相。
不過真相究竟係點，依然毫無頭緒。就係咁樣，再一次向酒店出發。
上一頁
第 6 頁
下一頁
其實我冇睇過教父，但係個標題講穿越好似幾有趣咁