zerogaro 2020-9-2 17:22:00 作為一個意大利黑手黨,會去到美國大展拳腳都係合情合理

:^(

呀木談 2020-9-2 22:33:49 我上咗的士，向司機遞咗個地址，佢就出發。

的士一步一步咁離開下城區，離開自由女神像，的士上面嘅我就好似大鄉里出城咁貼住玻璃窗望。

的士司機見到之後問：

「去酒店之前不如我帶你周圍睇下啦。」

我心諗司機一定係當咗我係遊客，不過既然有時間我都覺得一試無妨，我講：

「好呀，不過跟錶跳。」

司機笑一笑講：

「起碼有生意啦。」

燈紅酒綠嘅時代廣場，經典悠久嘅中央車站，極盡奢華嘅第五大道，司機形容得非常生動，睇嚟佢為咗小費非常落力。

可惜喺遊車河嘅途中我意識到我即將踩入黑手黨嘅世界，感覺到危險，敗壞，糜爛，又或者一切比我想像中更差。

我為我未能回應的士司機嘅興高采烈而致歉，最後我畀咗車資嘅兩成做另外小費，我仲問咗佢最近酒店嘅電話亭同郵局喺邊。

落車，行入酒店去到櫃檯，櫃檯小姐講：

「有咩幫到你？」

我第一句就答佢：

「唔好意思，可唔可以叫一叫你經理出嚟。」

職員好驚訝咁講：

「唔知有咩問題呢？」

我又答佢：

「冇咩問題嘅，我只係想見經理啫。」

職員再講：

「唔係，如果你有問題我真係可以幫你。」

我再講：

「真係冇問題，我只係想見經理，求下你啦。」

擾攘咗一輪，櫃檯小姐終於決定去叫經理出嚟，叫我等陣。

過咗陣，有個男人出現咗喺我面前，佢話：

「我就係呢到經理，有咩幫到你？」

我答佢：

「我嚟攞房架，訂房嘅係喬諾巴拿。」

呀經理一副鬆一口氣嘅樣，講：

「噢，你比預想中遲咗好多。」

唔通我會坦白承認我做咗咁耐遊客咩，我講：

「一場意外，塞咗好耐車，塞塞下仲死埋火，好大鑊啦總之。」

經理帶咗我上房，交低鎖匙同我講唔好周圍去就走咗去啦。

-----------------------------------------------------------

深夜時分。

我戇戇居居訓喺床到，就喺我幻想緊酒店有電視機嘅時候，突然有班人衝咗入嚟，其中一個望一望我然後講：

「就係你呀，我係喬諾巴拿，帶你出去行下。」

講野嘅係個睇落廿幾歲嘅髮型極之浮誇金毛仔。

我知道一定唔係咩好事，但我知道我冇拒絕嘅權利。

我跟住佢哋行咗落停車場，上咗一架黑色房車，之後有條友遞咗個紙袋畀我。

佢攞住個紙袋，呆咗一呆，怕我暈車浪？條友望住我，我又望住佢。

直到喬諾講：

「笠住你個頭。」

原來睇電視啲劇情係真架，就係咁樣我好不安咁矇住眼出發。

623，624，625，當我心中數到625秒嘅時候，有人推一推我叫我落車。

十分鐘多啲嘅車程，睇嚟酒店同秘密地點唔係差太遠。

落車，踩落地面，發現係草地，有風聲，代表係空曠地方。

繼續矇住眼行咗一段路仔，開始聽到樹葉沙沙聲，睇嚟係殺人滅口棄屍嘅好地方。

行多陣就停低咗，有人移一移我然係叫我坐。

我坐低，又真係有張凳，正當我想除咗紙袋嘅時候，有人大聲吆喝我：

「邊個畀你除。」

之後就有人綁起咗我兩隻手，我心諗荒山野嶺迫我包住個頭，點睇都冇好野。

喺我疑惑緊自己身上究竟有冇蟲爬緊嘅時候，有人講：

「湯姆勞根，聽講你想投誠，點解？」

把聲聽落去好古怪，應該有用方法變聲，我答：

「 柯里昂家族近十年已經衰落咗好多，教父奄奄一息，就算未死，但柯里昂嘅皇朝已經殞落。」

佢繼續講：

「柯里昂家族近十年的確衰弱咗，但柯里昂嘅名聲依然響徹政界，可以話係生意嘅保證，就算其他家族聯手都撼動唔倒佢嘅地位。

我再講：

「柯里昂家族名聲遠播係因為教父，當教父唔可以再主持大局，一切就唔同曬。大仔個性衝動，二仔懦弱無能，細仔一直以嚟選擇置身事外，唔喜歡行家族為佢安排嘅路。」

「柯里昂家族群龍無首，可以令帝國崩潰嘅唔係外敵，而係內亂。」

講完，係一片沉默，冇人講野，我擔心自己係唔係講錯野，有下一秒我就會俾人活埋嘅感覺。

唔知時間過耐幾耐，我只係知自己嘅心跳跳得越嚟越快，正當我以為自已會心臓病發嘅時候，呀神秘人又講：

「睇嚟你知道柯里昂家族幾多野，但係你又點樣證明自己嘅忠誠？」

我覺得自己遇上最大嘅難題，要證明忠誠一向係最難嘅野，我決定放膽一搏，我講：

「你要我證明向咩忠誠？巴西里先生同教父比，邊個會得到手下更多嘅忠誠，我相信每一個義大利人都好清楚。」

「我點解選擇背叛教父？因為我並唔係選擇向人忠誠，而係選擇向金錢同權力忠誠。」

又係一陣嘅靜默，我同自己講，佢哋反應遲鈍啫，絕對唔係想殺我，冇事嘅。

果不其然，神秘人又講：

「你選擇做真小人，你有情報，用得著。」

佢講完，有人鬆綁扶起咗我，推我向前行，我估計自己行緊翻架車。

行行吓我諗起賽德克先生晏晝講嘅野，個紙袋其實救咗我，如果唔係佢擋住我個極度不安嘅表情，頭先場戲可能已經衰咗。

諗諗吓，成件事好古怪，荒山野嶺連建築都冇，係秘密基地嘅可能性好低。

咁蒙眼係為咗啲咩？最有可能性嘅係，就係負責問我野嘅神秘人身份需要保密。

咁係邊個？純粹保安措施？公眾人物？定還是我認識嘅人？

----------------------------------------------------

酒店門口。

我除咗眼罩落車，有種重獲自由嘅感覺，但我依然俾人夾咗翻上房，翻到房，喬諾巴拿講：

「頭先有咩得罪真係唔好意思，只係聽日見巴西尼先生之前嘅小小測試，始終安全啲好嘛，聽日會再嚟接你。」

雖然我知句唔好意思只係客氣說話，但我笑一笑講：

「唔緊要啦，我都無穿無爛嘛，不過聽日溫柔啲會好啲咁囉。」

喬諾巴拿答：

「聽日當你貴賓咁招待。」

雖然我對佢嘅貴賓招待非常疑惑，但都係個句，我冇拒絕嘅條件。

佢講完就準備轉身走，我追問佢：

「我可唔可以落街買宵夜？」

佢諗咗一諗講：

「見巴西利先生之前都唔好，叫房間服務，入我哋數。」

睇嚟佢哋完全唔想我離開酒店，但酒店打電話俾麥克實在太危險，睇埋聽日巴西尼講咩先，有機會去公共電話亭再算。

Mr.Incredible 2020-9-2 23:53:42 5Jo睇落廿幾歲
即係已經佢經歷過Jojo part 5啲劇情?

:^(

呀木談 2020-9-3 00:22:28 係，JOJO發現廿一世紀年做黑手黨已經冇咩作為，所以令到黃金體驗鎮魂曲畀箭射多次，之後學識埋穿越時間，決定穿越去1946年，二戰大戰後嘅世界重新發展

:^(

你冷靜啲呀，呢個故仔冇人識波紋架

呀木談 2020-9-3 00:25:13 我調轉咗條刪除線

:^(

:^(

呀木談 2020-9-3 23:15:16 正評過十啦，雖然好冇大志，但要慶祝吓

:^(

瓦努阿圖達文西 2020-9-3 23:53:56 支持樓主繼續寫落去

呀木談 2020-9-4 02:17:42 支持你支持我

:^(

武次子敏史 2020-9-4 03:35:49 樓豬

:^(

:^(

關埋門炒樓 2020-9-4 13:28:32 屌你

你個國際標準底褲都嫌大

T-Back就差唔多

不過照等

呀木談 2020-9-4 14:18:16 國際標準我採用日本著名漫畫家-富慳義博

:^(

所以理論上我超標好多倍

:^(

本地作家例子有邦拿

:^(

除開十五年計， 日均產量我都算唔錯

:^(

好啦，我認錯啦，的而且確我寫得慢

:^(

呀木談 2020-9-4 14:19:07 樓豬都支持你支持我架

:^(

呀木談 2020-9-4 22:32:05 星期五。

朝早，冇我想像中有班人衝入嚟捉我走嘅場景，我可以平平安安咁食完個早餐。

當我喺一樓食完早餐想試吓行落一層去酒店大堂嘅時候，個嗰琴日又唔出嚟今日偏偏喺大堂嘅經理問：

「先生想去邊？」

我答佢：

「食完早餐去散下步。」

經理又講：

「散步我哋酒店好大架喎。」

見佢講野咁有趣，我就答佢：

「但你間酒店冇第五大道行喎。」

經理又荒荒張張咁講：

「你想行第五大道啫，五樓我哋有個花園喎。」

之後佢細細聲補咗句：

「唔好要我難做啦。」

聽完之後我其實都冇諗過真係要出去，我都無謂為難佢，我講：

「五樓花園咁高呀，我去感受下天空之城先。」

我就行翻上房。

而家話隨時要見巴西尼我明，但如果到時真係加入咗，禁足令禁到咁真係不得了。

——————————

十二點左右，有人敲門，喬諾開門講：

「出去行吓。」

雖然佢冇等我開門，但比一班男人衝入嚟好好多。

我跟佢一齊行出酒店，我見唔到其他人或者等緊我哋嘅車，我問喬諾：

「冇其他嘢？」

喬諾答：

「你想要啲咩？」

我再講：

「冇，冇，咁我哋行緊去邊？」

喬諾講：

「廣場酒店。」

————————-

廣場酒店，頂層客房。

我坐咗喺梳化，睡房樓梯口有兩條友眼甘甘咁望住我，雖然穿越嚟咗咁多日都習慣咗，不過喺酒店畀人眼甘甘咁望都係第一次。

等咗一陣，喬諾同巴西尼一齊行落嚟，我好自然咁企翻起身，巴西尼行到對面梳化坐低然後講：

「坐啦，唔洗咁拘謹，伊森係個聰明人，佢推薦得你，你都應該有啲本事。」

我坐低然後講：

「本事就稱唔上，只係睇野清楚少少啫。」

巴西尼笑一笑望住我講：

「我最鍾意可以睇透局勢嘅人。」

「維托喺見索拉索之前已經逐步加強保安，所有野好似預知咁，令到原本嘅暗殺計劃行唔通，你覺得係邊到出問題？」

果然薑係老嘅辣，第一條問題就同指我出嚟冇咩分別，我迴避問題答：

「邊個同佢已經講唔重要，重要嘅係佢冇機會再聽。」

巴西尼聽完繼續望住我再講：

「講得好，維托一死，柯里昂家族就會分崩離析，問題係佢仲未死。」

我控制自己嘅表情然後講：

「柯里昂先生一定會死，一切都係時間問題。」

巴西尼聽完再講：

「我都相信係。」

我反問巴西尼：

「點解你咁肯定？」

巴西尼斯斯然咁講：

「伊森係個聰明人，但同時係個古怪嘅人，佢喺上次行動得到我嘅信任。」

「而你都需要做啲野證明。」

我感覺到唔係好事發生嘅節奏，我問：

「你想我殺死教父？」

巴西尼笑開懷咁講：

「聰明人，但你唔需要自己去做，我會派人幫你。」

我知道我肉隨針板上，我冇拒絕嘅權利，但我試探咁問：

「你覺得我同賽德克先生係咩人？」

巴西尼答：

「聰明人，良好嘅生意夥伴。」

睇嚟就算係巴西尼都唔知道我同賽德克先生嘅秘密。

我再一步試探咁問：

「合作夥伴，既然係咁，咗我嘅報酬係咩？」

巴西尼冇答我問題，佢講：

「我會派喬諾幫你，而拉森會負責幫我聯絡你。」

佢講完就行翻上樓。

喬諾望一望錶同我講：

「今晚十一點，酒店房等。」

雖然基味極濃，但我答佢：

「好。」

隨即我就畀守喺樓梯個兩條友趕出咗客房啦。


----------------------------------------------

第五大道。

我係街上面無所事事咁行，望住啲貴到我買唔起嘅名貴時裝，思考緊頭先發生嘅事。

真係人老精，鬼老靈。要我殺死教父，一嚟鏟除對手，二嚟可以試我忠心，果然梁朝偉有版你睇，做卧底兩面不是人。

如果我拒絕或者失敗，就代表我仍然心繫教父，最壞情況會影響埋賽德克先生，破壞我嘅計劃。

殺死教父，又談何容易呢？賽德克先生講得啱，要生存應該放低教父情意結，但大道理係人都識講，做唔做到係第二回事。

當教父唔再喺生果檔中槍開始，故意已經開始改變，只係仲未開始擴大，我所知道嘅兩年後已經唔再適用，我覺得自己成為咗劇本中被操縱嘅一份子。

喺不安倍增嘅情況下我選擇打電話畀麥克了解更多情況，我行咗去電話亭打去柯里昂大宅，我講：

「你好，我係積尼托倫斯，我想搵麥克。」

電話另一邊嘅女聲講：

「麥克少爺唔喺屋企，佢去咗醫院，你有冇野需要我幫你講低？」

我思考緊究竟點樣可以將「有人叫我殺你老逗」講得禮貌而且含蓄，我答：

「咁唔洗啦，我會打去醫院搵佢。」

我收線，再再打電話去醫院，經歷完等待之後，接聽嘅係麥克，我決定以簡單嘅話題開始，講：

「喂，教父有冇好翻啲？」

麥克答：

「過咗危險期，一切都叫做穩定，但幾時醒係第二回事。」

我決定講咗自己啲野先，換取麥克更加多嘅信任，我講：

「聽我講，如果你個面人多，有啲名唔講得就用其他字代替。我啱啱收到巴西尼嘅任務，佢叫我殺死教父。我唔會落手，但我會接呢個任務，我會盡我所能幫你哋換取最多時間。所以你哋嗰面而家點？」

麥克答：

「膠著狀態，山尼殺了布諾塔塔基尼亞，但索拉索有警隊保護，我哋有個殺佢機會，但一切只係陷阱，就算我哋殺咗索拉索，巴西尼依然法外。」

我繼續講：

「我相信你哋唔會接受和談，所以簡單嚟講就嚟大戰一觸即發？」

麥克再講：

「睇嚟係，二哥都決定去拉斯維加斯開拓新市場以備萬一，大戰似乎無可避免。」

我再講：

「好，我明白，我會喺巴西利身上盡量攞好處架啦。」

講完我就收咗線。

我行出電話亭繼續喺第五大道遊蕩。

殺索拉索同麥考斯基會令警方同其他四大家族睇實柯里昂，若然想釣巴西尼呢條大魚的而且確唔應該輕舉妄動，令到巴西尼仍然以為柯里昂幾兄弟懵然不知仲好。

但麥克唔走，劇情就會好大分別，一切變得更加複雜，諗諗吓我決定行翻轉頭，去電話亭打另一個電話，打畀賽德克先生。

如是者等待接線生之後，賽德克先生講：

「你見完巴西尼，咁快就搵我啦。」

我答：

「同你講好消息嘛，兩大家族準備開戰，你希望借佢哋上位嘅機會嚟緊啦。」

賽德克先生再講：

「好消息睇嚟你唔係從巴西尼身上得知。」

我再講：

「巴西尼身上嘅係壞消息，佢要我殺教父換取佢嘅信任，一嚟唔易，二嚟我落唔到手。」

賽德克先生笑一笑講：

「你覺得巴西尼係點睇我哋？」

一樣嘅問題，我重複巴西尼嘅答案講：

「我今日問過，佢講聰明人，良好嘅合作夥伴。」

賽德克先生再講：

「合作夥伴，而唔係手下。佢需要我哋嘅地方唔係殺人，佢要教父死，但係唔係你殺根本唔重要，除咗你，一定有其他人做緊。」

我答佢：

「所以你就係最好嘅例子，就算你上次殺教父失敗都依然得到信任。」

賽德克先生再答：

「正確嚟講我冇失敗，上次我畀過建議，但根本冇用過。巴西克係個生意人，佢分得好清楚，生意同黑道嘅事，佢要你參與黑道嘅事，唔係因為需要你，而係需要你嘅痛腳。巴西里要嘅唔係忠誠，係控制。」

我再講：

「好，咁我明白啦，但我打畀你唔係為咗巴西尼嘅事。係麥克，麥克唔再去西西里。」

靜咗一陣。

賽德克先生再講：

「好，明白。」

講完佢就收咗線。

而我行出電話亭繼續我嘅遊客之旅。

雖然我個情況同賽德克先生唔同，但大概相似。而家睇嚟我想瓦解巴西尼都叫為人為己，為人民服務啦。

麥克個面唯有好似個套隱喻嘅電影咁話：讓子彈飛一會兒，一切都要等時間做印證。

瓦努阿圖達文西 2020-9-5 01:42:20 又live咗，啲謀略好正呀

呀木談 2020-9-5 01:50:53 本身我想寫個穿越鳩故架，但唔知點解寫寫下變咗謀略懸疑故

:^(

呀木談 2020-9-5 15:14:57 輕輕一推

:^(

武次子敏史 2020-9-5 16:07:02 主角已經冇咗穿越光環

:^(

呀木談 2020-9-5 17:20:32 主角已經有好運光環架啦

:^(

有個穿越者落到嚟俾人囚禁咗兩個星期仲一槍打死咗

:^(

光環唔洗咁多嘅

:^(

呀木談 2020-9-5 18:08:57 等作者自我介紹吓自己個故仔啦

:^(

故事中其實加入咗唔少其他舊電影嘅彩蛋，例如一開頭主角係嚟自唐人街，叫積尼高遜。 就係借用咗另一套舊電影-《唐人街》，而做主角嘅演員就係積尼高遜啦

如果對《唐人街》有興趣可以睇吓樓豬以前寫過嘅影評

https://www.inmediahk.net/node/1076124

而《唐人街》當年都有唔少奧斯卡提名，然而佢遇到強勁嘅對手，就係《教父續集》，所以《唐人街》不幸地只係攞到最佳原創劇本啫

故事入面有好多唔同嘅彩蛋，大家可以搵出嚟分享下

最後，冇咩野我出翻去繼續作文

:^(

呀木談 2020-9-6 13:20:39 樓豬今日更新唔到

:^(

點解，好明顯啦，出去行街

:^(

瓦努阿圖達文西 2020-9-6 21:08:15 支持

呀木談 2020-9-7 02:53:42 深夜自推

:^(

時不我予 2020-9-7 14:16:36 推

武次子敏史 2020-9-7 19:35:19 幫緊你幫緊你

呀木談 2020-9-7 23:34:03 距離夜晚十一點仲有好多時間，雖然唔知喬諾夜晚十一點搵我係想做咩，但下午流流長我繼續我嘅遊客生活。

戰爭過後，美國走出經濟蕭條陰影，經濟再次好起嚟，但世界旅遊未完全回復，有個亞裔人士喺街上面周圍行始終有人眼甘甘咁望，有啲仲以為我係日本仔，走嚟鬧我添。

一個下晝就喺遊客嘅平淡生活中完咗，喺經歷咗咁多日緊張嘅體驗之後真係個安慰嘅日子。

———————————

夜晚十一點，敲門聲，行入嚟理所當然係喬諾，佢講：

「帶你出去行吓。」

我答佢：

「你開場白冇第二句嘅咩？」

佢再講：

「咁帶你巡視業務。」

我心諗，我而家最多叫實習架咋啵，都有得巡視業務咁開心，我講：

「好，有咩睇咁過癮？」

佢淡淡然咁講：

「黑拳。」

黑拳？當刻我幻想到嘅係昏暗，汗水，鐵籠，血腥味，獎金，賭博，死亡。我只係幻想都已經感覺到痛。

但我冇講出口，我默默地跟住喬諾上車，大概二三十分鐘後去到一棟偏辟，睇落已經廢棄嘅建築物。

格格不入嘅係一棟殘舊嘅建築物外面泊滿各色各樣嘅名車，一睇就知非比尋常。

————————————

廢棄大廈。

我跟住喬諾行入去，幾個類似檢查站嘅野都視如無物。

行到入去發現一切同我想像中唔同，同我想像中打黑拳嘅地方唔同，甚至比打正規拳嘅地方更加豪華。

見到之後我問喬諾：

「乜咁囂張嘅咩？」

喬諾指一指兩邊嘅一樓包廂講：

「有錢使得鬼推磨，更何況唔少警察或者政府高層都係我哋座常客。」

我繼續跟住喬諾行，一邊行喬諾一邊講：

「黑拳都有分階級，呢到係高級地方，嚟得賭嘅都有啲錢。當然獎金都比一般嘅高，好多拳手都爭住嚟打。」

我繼續跟住行，去到一道門前面，喬諾同我講：

「你自己行住先，我入去整啲野。」

我心諗唔係話帶我巡視業務咩，做咩門口放低我，你知唔知黑手黨實習生都要攞經驗架，當然我冇講出口，我答佢：

「好。」

就係咁樣我成為咗係一個淪落喺黑拳格鬥場嘅異鄉人。

就喺呢個時間，有人行埋嚟同我講：

「你識諾仔架，請你飲杯野啦。」

我呆咗一呆，我問：

「吓...」

我望佢睇落四五十歲，光頭長鬍鬚，仲幾大隻添。

佢指一指間房，再講：

「喬諾，諾仔呀。」

我恍然大悟講：

「係呀，係呀，生死之交，佢生我死個種。」

佢繼續講：

「諾仔係我哋嘅驕傲呀。」

雖然我唔知點解佢無啦啦轉咗話題，我問：

「咩驕傲？話時話，點稱呼呀？」

佢再稱：

「我係海立文，過嚟邊飲邊講。」

就係咁樣我俾佢拉咗埋檯。

海立文攞住杯威士忌加冰繼續講：

「諾仔呀，出人頭地呀，有幾多人打黑拳打到死呀，佢打到變金牌打手呀，叻仔呀。」

我從佢嘅語氣已經知道佢應該已經飲咗唔少，我問：

「佢以前打黑拳架？」

海立文再講：

「呀叔以前我，都係打黑拳架，人老咗啦，唔捱得打啦。」

雖然我又唔知點解佢轉咗話題，不過我講：

「唔係啦，呀叔你都好大隻呀。」

海立文再講：

「挑，拳怕少壯呀，當日我就係俾諾仔一野左勾拳打到退休架啦。」

佢越講我就越多問號，我再問佢：

「咁佢打到你退休，點解你仲話佢係你驕傲？」

海立文又再講啦：

「佢係我教出嚟架嘛。」

哦，我又一次恍然大悟，原來係發生喺黑拳界嘅洛奇與徒弟，而師傅仲要係一個醉酒佬，睇嚟日本漫畫嘅設定都唔係太超現實啫。

我扮到好震驚咁講：

「原來係拳皇師傅，失敬，失敬。」

海立文笑一笑咁講：

「師咩傅，我都冇咩教過佢......」

我心諗，呀你條友上一句唔係咁講架啵，你陰我！但我冇阻止佢繼續講落去。

「我記得嗰時街邊遇到佢幾歲人仔，連英文都唔識多句，開口埋口都係義大利文，我都聽唔明佢講咩，之後搵咗個義大利朋友問先知。」

又係啲講野講一半嘅人，我問：

「知啲咩？」

海立文答我：

「唔知呀，幾歲𡃁仔講野九唔搭八，我估係逃避法西斯掛。」

我繼續心諗，你確定佢唔係你私生子，論講野九唔搭八你都唔弱喎，當然我冇咁講，我問：

「咁之後呢？」

海立文又講：

「冇咩之後架啦，我打拳，咁佢又打拳咁囉。」

好，我受夠呢個講野咁跳脫嘅大叔，我轉移話題問：

「我第一次嚟買拳，點玩法架呢到？」

海立文就講：

「好簡單嘅啫，你望唔望到嗰個水牌，左手面就係台柱，右手邊就係挑戰者，下面就係賠率。」

我望一望問：

「得贏同輸野買架咋？」

海立文又再講：

「呢到唔同出面啲場，呢到識玩呀，入得嚟打都叫做黑拳界嘅明星，人命都叫值啲錢，出面你想買斷幾多條肋骨都有。」

聽完我細細聲問：

「咁呢到即係會打假拳？」

海立文聽完講：

「打假拳又未至於，但唔會打死囉。」

佢望住樓上包廂再講：

「呢到同出面場唔同，出面啲人享受嘅係暴力嘅快感，呢到啲人享受嘅係權力嘅快感。外面拳手想嚟呢個場打，而我哋企場邊睇嘅都想坐上去。」

我問佢：

「點先可以上去？」

海立文繼續講：

「呢到行會員制嘅，每個月投注金額最高嗰十位就會有下個月嘅包廂使用權。」

聽完之後我又問：

「咁上個月頭十最低嘅係幾多？」

海立文答：

「唔知架，只會得人名架咋，你永遠都唔知自己係唔係第十一，十二個，覺得自己可能差少少錢有包廂坐。如果唔係點樣吸引你洗更多錢，下面嘅渴望上去，上面嘅渴望保住個位，所以咪越嚟越好生意囉。」

果然生意佬都係啲賤人，我繼續問：

「幾時開始？」

海立文望一望手錶後講：

「仲有七分鐘，搭正十二點開始。」

正當我疊埋心水準備睇拳賽嘅時候，喬諾行咗出嚟，佢攬一攬海立文，噓寒問暖咗幾句之後就同我講，

「跟我上去講啲野你知。」

我跟住行，經過一樓包廂，再行上一層，去到一間房仔。

房仔入面有六個人，咩色人種都有，喬諾隱晦咁講：

「你搵幾條友幫你做野啦。」

我問喬諾：

「佢哋邊到嚟架？」

喬諾再講：

「佢哋係出面場嘅拳手，佢哋自告奮勇話咩都肯做，只要之後俾佢哋入嚟打就得。」

我心諗佢哋一定唔知任務係殺教父，六條友要攻陷柯里昂家族嚴防嘅醫院，你估復仇者聯盟咩。

我同佢哋講：

「唔洗啦，暴力硬闖呢啲畫面唔靚，你哋走啦。」

點知佢哋其中一個衝出嚟講：

「我要做呀，點解你唔畀機會我！」

我見佢心情咁激動，嚇咗我一跳，我答：

「咁啦，如果我要人，一定搵你哋六個先，好冇？」

擾攘咗一輪，又或者高級地方佢哋不敢造次，最後我都可以全身而退。

可能就係人命唔值錢，而且覺得自己苦無機會，先至會有咁多人選擇加入黑手黨。