Ads
第三十四章 表白
放學之後琳琳同阿程喺地鐵站度相見
阿程知道自己都有錯,因為自己無聽到琳琳講唔好理琴日嘅message,所以佢決定買啲嘢送俾琳琳賠罪。
佢行到銅鑼灣嘅一間專門賣本地designer設計飾物嘅舖頭,買咗條手鏈俾琳琳。雖然唔係啲咩貴野,只係就咁一條普通嘅手鏈有個細細地嘅love字喺上面。
阿程本身就唔係太中意女仔帶耳環,所以佢考慮範圍入邊係得手鏈/頸鏈。而佢睇得中嘅款式又唔係太多,所以先揀咗呢款,而唔係話想表達啲乜。
阿程其實唔係唔中意琳琳,只不過佢本身有女朋,而琳琳喺佢心目中同自己差太遠,覺得琳琳唔會睇得上自己,所以從來都無諗過要表白。
「送俾你㗎,對唔住我琴日唔應該咁唔聽話走咗去覆佢...」一見到琳琳阿程就送咗條手鏈俾佢
「唔緊要啦,唔講都講咗,不過多謝你好靚啊條手鏈」琳琳留意到條手鏈入面嘅love字,佢估唔到阿程會咁直接
「係呢,你阿哥今朝同你講咗啲咩,令到你會咁嬲?」阿程好奇咁問琳琳
「佢話你一直都喺度玩我感情,仲show埋你地嘅對話俾我睇...」
「乜你真係覺得我玩你感情咩?我一直以來為你做嘅嘢,你真係覺得我似喺度玩你感情?」阿程不解咁問返琳琳
「如果我真係覺得你玩我感情嘅話,我就唔會揀咗你而唔係佢啦...」琳琳越講越細聲
「揀咗我而唔係佢?」
「我阿哥今朝迫我喺你同佢之間二揀一啊...」呢個時候嘅琳琳塊面紅到無得再紅
「吓?你竟然揀咗我?」知道咗呢個答案嘅阿程有啲驚訝但同時間又好興奮,因為佢知道琳琳竟然揀咗自己而唔係一直照顧咗佢咁耐嘅阿哥。
「係啊,我揀咗你啊,鬼叫我中意你咩!」琳琳喺呢個時候竟然提高聲浪向阿程表白
「咪玩啦,你點會中意我啊」阿程被琳琳突如其來嘅表白嚇到佢唔知點俾反應佢好,只係識得揾藉口黎解釋呢個唔可能嘅事實。
「我講下笑咗,你唔好咁易信我講野啦傻仔」琳琳見到阿程咁樣覆佢之後,心入面明顯有啲失望,但為個場面唔好尷尬落去,琳琳唯有咁樣自圓其說。
阿程聽到琳琳咁講,個人都冷靜返落黎。諗深一層,都啱嘅,琳琳一直咁多人追,又品學兼優又靚女,邊會睇得上自己。單單係成績已經差十萬九千里。
其實兩個人都互相中意大家。但自己一直覺得對方唔會中意對方而無講出口。愛情嘅威力就係在於可以令一個人為對方赴湯蹈火,放棄自己擁有嘅一切而在所不惜。
Ads
Ads