Ads
Ads
連續講咗十幾廿句之後，我feel到我已經有少少雙眼通紅。
而可琳個樣就係Keep住驚訝，仲用難以置信嘅眼神望住我，或者再直接啲--係用望住變態佬嘅眼神望住我。
氣氛好尷尬，大家都唔知講咩好……
「咔擦」呢個時候竟然有開門聲
係可琳阿媽
「咦！你就係穎冬呀？可琳成日提起你㗎！」可琳阿媽帶點熱情咁同我講
我:「係呀…我就係穎冬呀，伯母你好」
可琳阿媽:「我買咗好多餸呀，冬仔你今晚留唔留喺度食餐便飯呀？」
我望一望可琳，佢個樣仲係好似頭先咁，我諗佢都唔想我留喺度㗎啦。
我求其作咗個藉口:「唔好意思呀伯母，我今晚要同屋企人食飯呀，所以唔可以留喺度食飯喇」
可琳阿媽:「唔緊要，下次囉，實有機會嘅」
「呀係呀，我夠鐘要走喇，Bye Bye伯母、可琳」為咗避免可琳會同我繼續講埋頭先嗰件事，我都係快走為妙。
我行到去門口，準備開門離開時，點知可琳無啦啦話:「唔好走住，文穎冬！」
可琳佢嗌我全名？佢從來未試過全名咁叫我，佢唔會係想喺伯母面前講埋頭先嗰件事或者講分手掛……？
Ads