元朗大球場過往一直被稱為港超「地獄主場」之一,以區內球迷入場打氣、推動球員場上發揮而見稱。惟在目前港超大有可能閉門作賽下,球隊定必喪失主場優勢,「Football without fans is nothing(足球沒有球迷的話,甚麼也不是)。我的踢法也很需要『第十二人』支持,有觀眾的話相信球隊會『踢高幾班波』。」他又笑言自己一向跟球員保持良好互動,希望疫情盡快受控,繼續向球迷展示招牌「風車手」動作。
外號「風車sir」的郭嘉諾,目前正修讀亞洲足協專業教練牌照課程(AFC Pro Licence),於今季加盟和富大埔與馮凱文合力執教球隊,後來卻因有導師被解職而導致「Pro Licence」課程延期至今年初,結果因未能兼顧亞洲賽於去年11月決定請辭。無奈課程在復課後,最近因為武漢肺炎疫情而再度延期,亦是他重投元朗的原因只一︰「好開心番到嚟元朗,其實喺大陸番嚟都自我隔離咗,我個『Pro Licence』課程無限期延遲咗,之後『Fabio』(法比奥)打過畀我好多次,『王生』(王威信)都有搵過我,其實我唔知要幾時番上去上堂,但亦都冇可能無限期咁去等,個課程一開始已經令我失去好多預算,由本來諗住2月4號可以番去考完埋個試同交論文等等,去到依家就無了期咁去延遲。我覺得自己冇可能離開呢個圈咁耐,因為如果我想繼續做我嘅嘢嘅時候,一定要繼續喺呢一個球圈用最近距離去睇球員,同埋去感受香港足球嘅變化,所以好開心可以以一個短期嘅形式番返嚟元朗。」
問及球隊短期內的目標,「郭Sir」希望能夠盡早贏波,令球員重拾士氣︰「我唔係一個魔術師,唔係話一嚟到就將所有唔好嘅嘢改番正,其實我見到隊波有好多好嘅嘢,只不過可能因為成績而將呢啲嘢埋沒咗,我只係將大家嘅潛能發放出嚟。聯賽暫時未有勝仗,呢個係首要目標,其次係將隊波嘅士氣帶起番。」港超聯及其他本地賽事的安排,仍有待足總下周一(3日)開會商討,而「郭Sir」則希望賽事能夠容許球迷入場︰「始終『Football is nothing without fans』(沒有球迷,足球甚麼都不是),尤其是我嘅踢法係好需要一班觀眾做『第12人』支持,當然希望觀眾可以入番場,我諗大家都知元朗個『地獄主場』嘅威力,所以我好肯定元朗有球迷入場的話,會踢高幾班波!」
另一邊廂,早「郭Sir」一步重返元朗的中場姚浩明認為:「放新年假之前已經知道『郭Sir』會返嚟,我踢咗一場比賽之後都知道球隊需要一個有紀律性嘅人去帶領球隊,依家佢返嚟,我相信佢可以令到球員自律。」